1. ¿Ambeksï jatsiski para úni tsimani kʼuiripuecha paraksï niárani amigueni?

SÁNO méntkisï, parakaksï tsimani kʼuiripuecha niáraaka amigueni, jatsistiksï para májku kʼéri kúnguarhini ka uandontskuarheni imeri ambe engaksï eratsejka, na engaksï pʼikuarherajka ka ambe engaksï nitamakuarhijka. Peru engachi eratsentajka Jesusiri amigueni, jamberichi exejka eska sánderu úkua jukaaka. Ju je exeni andi.

2. ¿Andichisï úpirini ísï exeni eskachi no uáka Jesusiri amigueni?

² Ma ambe jindesti eskachi no méni niáraska exeni Jesusini. Uánikua erachicha primeru siglurhu anapuechajtuksï no méni niáraspti exeni. Nájkiruka ísïpka, apostuli Pedru arhiaspti: “Ima jindesti engajtsï cha xáni uékajka nájkirukajtsï no méni exeka, ka mintsikasïngajtsï nájkirukajtsï iásï no exeni jaka” (1 Ped. 1:8). Ísï jimbo, no uétarhisïndi eskachi exeaka Jesusini parachi niárani imeri amigueni.

3. ¿Náki máteru ambe jimbochi úpirini ísï exeni eskachi no uáka Jesusiri amigueni?

³ Para tsimani úni jámani, nóchi úsïnga Jesusi jingoni uandontskuarheni. Jeobanchi uandajpasïnga engachi kómarhikua újka. Ísïsti eskachi Jesusiri nombrini úrasïnga, peruchi no imanisï uandontskuarhikujka. Ka Jesusi no uékasïndi eskachi imani kómarhiaka, jimboka ístuchi kómarhikua jingoni kʼéri ambe arhisïnga Jeobani ka imantkuchisï jatsika para kómarhini  (Mat. 4:10). Peru ístuchi uáka xarhatani eskachi xénchasïnga Jesusini.

4. a) ¿Ambe jimbochi úpirini ístu ísï exeni eskachi no uáka Jesusiri amigueni? b) ¿Ambechi exea ini jorhenguarhikua jimbo?

⁴ Tanimu úni jámani, nóchi úsïnga Jesusi jingoni jarhani jimboka ima auandarhu irekaska. Peru nájkirukachi no meru imani jingoni jauaka, uákachi uánikua ambe míteni imeri ambe. Ini jorhenguarhikua jimbo, exeakachi tʼámu ambe engachi uáka úni parachi ambakiti pájperakua ma jatsini imani jingoni. Peru orheta ju je exeni andisï xáni jukaparhakue eskachi ambakiti pájperakua ma jatsiaka imani jingoni.

5. ¿Andichisï jatsi para Jesusiri amigueni? (Ístu exea je rekuadruechani “ Jesusiri amigueni, úsïndi eskachi Jeobaeri amigueuaka” ka “ Ju je ísï exeni Jesusini eska na jindeka”).

⁵ Jatsiskachi para Jesusiri amigueni parachi úni ambakiti pájperakua ma jatsini Jeoba jingoni. ¿Andichisï ísï uandajki? Ju je exeni tsimani ambe. Orheta, Jesusi arini ambe arhiaspti imeri chúxapatichani: “Jimbokaksïni mismu Diosï Táti uékasïnga chánksïni, jimboka chájtsïni uékasïnga jíndeni” (Juanu 16:27). Ka ístu uandaspti: “No nema jurhasïndi andarherani Diosï Tátini enga no jíndeni” jimboeuaka (Juanu 14:6). Uékani Jeobaeri amigueni ka no jindeni Jesusiri ambakiti amigu ma, ísïsti komu kʼumanchikuarhu ma uékani inchani peru no puertarhu ísï. Jesusi sáno májkueni jásï ejemplu ma úraspti enga uandapka eska ima jindespka “puerta jima engaksï karichicha inchantajka” (Juanu 10:7). Tsimani úni jámani, jindesti jimboka ima sési xarhataska na enga jásïka imeri Táti. Arhiaspti imeri chúxapatichani: “Ima engarini exeka jíndeni, exesti Diosï Tátini” (Juanu 14:9). Ísï jimbo, niáraakachi Jeobani míteni engachi  Jesusini míteska. Engachi sánderu jorhenguarhiaka Jesusiri ambe, sánderuchi xénchaaka. Ka engachi sánderu andarheraaka Jesusini, sánderuchi xénchaaka imeri Tátini.

6. ¿Ambe máteru ambe jimbochi jatsiski para Jesusiri amigueni?

⁶ Jatsiskachi para Jesusiri amigueni paraksï juchari kómarhikuecha mókuntanhani. I ambe arhikuekasïndi eska no solu jindeska pʼindekua jimbo uandani “tata Jesukristueri nombri jimbo” engachi na kʼamarajkia kómarhini. Jatsiskachi para sési kurhanguni néna úrasïni Jeoba, Jesusini para mókuantaani juchari kómarhikuechani. Jesusi arhiaspti imeri apostulichani: “Iámindu ambe engajtsï kurhakuaka Diosï Tátini juchiti nombri jimbo, jíksïni íntskuaka” (Juanu 14:13). Jeobaesti enga kurhauajka ka mókuantaani juchari kómarhikuechani, peru Jesusini íntskusti sésikua para úni ambe enga ima uéjka eska úkuarhiaka (Mat. 28:18). Ante dejtsïni mókuchintani, exesïndi sinchi úskia ambe enga Jesusi jorhentpipka. Por ejemplu, ima uandaspti: “Engajtsï puákuantauaka máteruechani ambe engaksïni no sési úchiaka, ístuksïni puáchintaati chári Táti auandarhu anapu. Peru engajtsï no puákuantauaka máteruechani ambe engaksïni no sési úchiaka, ístu chári Táti nóksïni puáchintaati ambe engajtsï no sési uáka” (Mat. 6:14, 15). ¿A no eska jukaparhakueska pʼamojperakua xarhatakuani máteruechani májkueni eskajtsïni Jeoba ka Jesusi na xarhatachijka?

7. ¿Ambechi jatsiski para úni parakachi uáka intsïnhaani kóntperatechani Jesusiri uarhikua jimbo?

⁷ Solu imecha engaksï Jesusiri ambakiti amigueuaka, uátiksï intsïnhaani iámindu kóntperatechani Jesusiri uarhikua jimbo. ¿Nénachi míteski? Jimboka Jesusi uandaspka eska íntspepiringa tsípikua imeri amiguecha jimbo (Juanu 15:13). Tata Diosïri ambakiti marhuaricha engaksï irekapka ante de Jesusi Echerirhu jurhani, jatsiatiksï para imeri ambe jorhenguarhini ka niárani xénchani. Acheeticha ka uarhiiticha engaksï jurhimbitku jámenga komu Abraani, Sara, Moisesi ka Raabi, tsíntaatiksï, peru ístuksï imecha jatsiati para Jesusiri amigueni paraksï úni irekani para méntkisï (Juanu 17:3; Uku. 24:15; Ebr. 11:8-12, 24-26, 31).

8, 9. Eska na uandajka Juanu 15:4, 5, ¿ambechi uá úni engachi Jesusiri amigueska ka andichisï jatsi para márku jarhani imani jingoni?

⁸ Ambakiti ánchikuarhitachi jatsiska, Jesusini jarhuatani aianhpini ka jorhentpini Reinueri ambakiti ambe. Jiáni enga Jesusi Echerirhu japka, jurhimbikua ambe jorhentpispti Tata Diosïri ambe. Ka jiáni uératini enga auandarhu kʼuanhatsentaka, seguirixati orhejtsïkuni ini ánchikuarhitani komu kúnguarhikuarhu anapu Orhejtsïkuti. Jesusi exesïndi ka jukaparharasïndi na engachi xáni jánguarhintajka máteruechani jarhuataani paraksï niárani imani míteni ka imeri Tátini. Ka solu Jeobaeri ka Jesusiri jarhuajperata jimbochi úsïngachi ini ánchikuarhitani úni (arhinta je Juanu 15:4, 5).

⁹ Bibliajtsïni jorhendasïndi eskachi jatsiska para xénchani Jesusini engachi uéjka jaiapanherantani Jeobani. Ísï jimbo, parachi úni Jesusiri amigueni, ju je exeni tʼámu ambe enga jukaparhakueka.

10. ¿Orheta ambechi jatsiski para úni parachi Jesusiri amigueni?

¹⁰ Orheta, ju je míteni Jesusini. Para ini ambe úni, ju je arhiantani ini Bibliarhu anapu libruechani: Mateu, Markusʌ, Lukasʌ ka Juanu. Engachi eratsentaaka ambe engaksï i libruecha uandajka Jesusiri ambe ka exeni eska sési kaasïrenga kʼuiripuechani, niáraakachi xénchani ka janhanharhini. Por ejemplu, nájkiruka ima juramukua jatsipka, no ísï kaaspti imeri chúxapatichani komueska jántspiricha.  Sánderu sési, ísï kaaspti komueska imeri amiguecha ka aiangukuarhiaspti ambe enga xáni eratsenga ka pʼikuarherani (Juanu 15:15). Engaksï imeri chúxapaticha kómu pʼikuarherani jarhenga ka uerani, imajtu májkueni pʼikuarherasïrendi (Juanu 11:32-36). Asta imecha engaksï no xénchenga Jesusini, niárasptiksï exeni eska sési pájperasïrenga imecha jingoni engaksï ísï uénga ambe enga ima aianhpienga (Mat. 11:19). Engachi jucha ísï káuaka máteruechani eska Jesusi na kaapka imeri chúxapatichani, sánderuchi sési pájperaaka imecha jingoni, sánderuchi tsípikua jingoni irekaaka ka sánderuchi xénchaaka ka janhanharhini Kristuni.

11. ¿Ambe máteru ambechi jatsiski para úni parachi Jesusiri amigueni ka andisï jukaparhakue ísï úni?

¹¹ Tsimani úni jámani, ju je májkueni eratseni ka jámani eska Jesusi. Engachi jánguarhintaska sánderu sési míteni ka májkueni eratseni eska ima, sánderuchi ambakiti pájperakua ma jatsiaka imani jingoni (1 Kor. 2:16). ¿Nénachi uá májkueni jámani eska ima? Ju je exeni ejemplu ma. Para ima sánderu jukaparhakuespti máteruechani jarhuataani ka eska imani ambe úni enga ima tsitienga (Mat. 20:28; Rom. 15:1-3). Ka jimboka ísï eratsenga, orheta peerasïrendi máteruecheri ambe ka puákuantaani. No sóntku ikiasïrendi engaksï máteruecha no sési ambe uandenga imeri ambe (Juanu 1:46, 47). Ka no méntku miáni jarhasïrendi ambe ma enga nema no sési úpiringa (1 Tim. 1:12-14). Kánikua jukaparhakuesti májkueni úni eska ima, jimboka uandaspka: “Ka ini jimboksï míteati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35). Ísï jimbo, ju je kurhamarhikuarheni: “¿Jánguarhintasïni na engani xáni uáka parani sési pájperani erachicha jingoni májkueni eska Jesusi na úpka?”.

12. ¿Ístuchi ambe jatsiski para úni parachi Jesusiri amigueni ka nénachi úsïni indeni ambe?

¹² Tanimu úni jámani, ju je jarhuataani Kristueri ermanuechani. Jesusi ísï exesïndi enajkichi imani jimbo újki ambe ma engachi erakukatechani jarhuataajka (Mat. 25:34-40). Sánderuchi jarhuataasïnga engachi jánguarhintajka na engachi xáni uáka aianhpini Reinueri ambe ka Jesusiri chúxapatichani uáni, ísï eska ima na juramuka (Mat. 28:19, 20; Uku. 10:42). ‘Máteru karichicheri’ jarhuajperata kánikua jukaparhakuesti paraksï Kristueri ermanuechani úni aianhpini interu parhakpinirhu ini jurhiatikuecha jimbo (Juanu 10:16). Méni engachi újka ini ánchikuarhitani jucha engachi “máteru karichichani” jingoni kuenta úkuarhijka, xarhatasïngachi eskachi xénchaasïnga erakukatechani ka ístu Jesusini.

13. ¿Nénachi uá úni ambe enga Jesusi uandapka ixú Lukasʌ 16:9 jimbo?

¹³ Ístuchi Jeobaeri ka Jesusiri amigu úkuarhisïnga engachi tumina íntspijka paraka imani ánchikuarhitarhu úrakuarhiaka engaksï imecha orhejtsïkujka (arhinta je Lukasʌ 16:9). Por ejemplu, uákachi íntspini tumina para iápuru parhakpinirhu aianhpinhani, komu jimesïsï enga sánderu iauanika, ístu para uáni ka sési jatsiani Jeobaeri kúnguarhikueri kʼumanchikuechani ka para jarhuajpini jimesïsï enga no sési ambe úkuarhijka. Ístuchi uáka íntspini tumina para juchari kúnguarhikua ka jarhuataani erachichani o pirenchichani engaksï uétarhinchajka ambe ma (Prov. 19:17). Ini ambe úparini, jarhuataasïngachi Kristueri ermanuechani.

14. Eska na arhijka Efesu 4:15, 16, ¿ambeteruchi jatsiski para úni parachi Jesusiri amigueni?

¹⁴ Tʼámu úni jámani, ju je úni ambe enga Jeobaeri kúnguarhikua uandaaka. Sánderuchi ambakiti pájperakua ma jatsisïnga Jesusi jingoni, ima enga Orhejtsïkujka kúnguarhikuani, engachi jarhuataajka erachichani engaksï erakunhaka  parajtsïni uékperakua jingoni kuidarini (arhinta je Efesu 4:15, 16). Por ejemplu, Jeobaeri kúnguarhikua uékasïndi eskachi sési úrauaka Kʼumanchikuechani Reinueri. Ka indeni ambe jimbo, máru kúnguarhikuechaksï májku úkuarhintasti ka máru territoriuechaksï ménderueni arhukunhastia. Ini ambe jingoni, nóteru xáni tumina úrakuarhisïndia enga míndakata jaka para Tata Diosïri kúnguarhikua. Ka ístu, máru aianhpirichaksï jatsisti para mójtakuni máru ambe. Jamberiksï i erachicha ióni páni japtia tánguarhini májku kúnguarhikuani jimbo ka kánikuaksï pʼinderhiani erachichani. Peru iásïksï arhinhastia eskaksï máteru kúnguarhikuarhu marhuauaka. Jesusi kánikua sési pʼikuarherajti enga exejka eskaksï imeri chúxapaticha úsïnga ambe engaksï arhinhajka.

15. ¿Ambe úkuarhia juchari ambakiti pájperakua jingoni engachi Jesusi jingoni jatsika?

¹⁵ Kristianuecha engaksï erakukateka espiritu santu jingoni, erokuarhixatiksï Jesusi jingoni jarhani para méntkisï ka imani jingonksï juramuni Tata Diosïri Reinurhu. Exeatiksï, imani jingonksï uandontskuarheati ka imani jingonksï jauati (Juanu 14:2, 3). Ka imechani engaksï Echerirhu pakaraaka irekani, Jesusi xénchperakua jingoni kuidariauati. Nájkirukaksï no exeaka, imecheri pájperakua Jesusi jingoni sánderu kʼéati jiáni enga Jeoba ka Jesusi íntsauaka ambakiti irekua ma (Is. 9:6, 7).

16. ¿Náki kóntperatechanchi jatsiasïni jimbokachi Jesusiri amigueska?

¹⁶ Engachi jiókuarhijka Jesusiri amigueni, uánikua kóntperatechanchi jatsiasïnga. Por ejemplu, imajtsïni jarhuatasïndi ka xénchani ini jurhiatikuecha jimbo. Ístu, uákachi irekani para méntkisï. Ka ambe enga sánderu jukaparhakueka, jindesti eska Jesusiri amigueni, uáka eskachi ambakiti pájperakua ma jatsiaka imeri Táti jingoni, Jeoba. Xáni enga kʼéri kóntperata máeka Jesusiri amigueni.