1. ¿Bin ya skʼan ya spasik te machʼatik ya skʼan ya yamigoin sbaike?

SWENTA ay machʼatik ya xjuʼ ya yamigoin sbaik, ya skʼan te ya sjokin sbaik sok te ya yalbey sbaik te bin ya snopik, te bin yaʼiyel ya yaʼiy sbaik sok te bin kʼaxem ta skuxlejalike. Pero ayniwan wokol ya kaʼiytik te ya kamigointik te Jesuse. Kiltik cheʼoxebuk rason.

2. ¿Bin-a te sbabial rason yuʼun te wokol ya kaʼiytik te ya kamigointik te Jesuse?

² Te sbabial rasone, jaʼ te maba kilojtik te Jesuse. Bayal jchʼuunjeletik ta sbabial siglo te manix la yilik-euke. Manchukme jich-abi te jpuk-kʼop Pedro jich la yaltiklanbey: «Aunque ma ba awilojic, cʼux yac awaʼiy ta awoʼtanic; aunque ma ba yac awilic ta ora ini, yac achʼuhunic» (1 Ped. 1:8). Jich yuʼun ma puersauk ya skʼan ya kiltik te Jesús swenta ya kamigointik.

3. ¿Bin-a te schebal rasone?

³ Te schebal rasone, jaʼ te ma xjuʼ ya xkʼopojotik sok te Jesuse. Kʼalal ya jpastik orasion jaʼ ya jkʼopontik te Jehovae. Manchukme ya jpastik orasion ta swenta sbiil te Jesuse ma jaʼuk ya jkʼopontik. Te Jesús ma skʼan te jaʼ ya jkʼopontike, melel kʼalal ya jpastik orasion jaʼ ya kichʼtik ta mukʼ te Jehovae sok jaʼnax ya skʼan ya kichʼtik ta mukʼ stukel (Mat. 4:10). Manchukme jich-abi, ya xjuʼ ya kakʼtik ta ilel te kʼux ta koʼtantik te Jesuse.

4. 1) ¿Bin-a te yoxebal rasone? 2) ¿Bin ya kilbeytik skʼoplal ta artikulo ini?

⁴ Te yoxebal rasone, jaʼ te ma xjuʼ ya jokintik te Jesús melel ay ta chʼulchan. Manchukme maba ya xjuʼ ya jokintik te Jesuse bayal bin ya xjuʼ ya jnaʼtik ta stojol. Ta artikulo ini ya kilbeytik skʼoplal chanchajp te bin ya skʼan ya jpastik yuʼun ya kamigoin jbatik sok te Jesuse. Pero ta nail ya kiltik te bin yuʼun mukʼ skʼoplal te ya kamigointike.

5. ¿Bin yuʼun ya skʼan ya kamigointik te Jesuse? (Ilawil-euk te rekuadro « Te yamigoinel te Jesuse jaʼ ya yakʼ kamigointik te Jehovae» sok « ¿Bin yilel ya skʼan ya kiltik te Jesuse?»).

⁵ Ya skʼan ya kamigoin jbatik sok te Jesús swenta lek ya kil jbatik sok te Jehovae. ¿Bin yuʼun te jich ya kaltike? Kilbeytik cheb swentail. Sbabial, te Jesús jich la yalbey te jnopojeletik yuʼune: «Te Tatil cʼux ya yaʼiyex ta yoʼtan, como cʼuxon ta awoʼtanic» (Juan 16:27). Jaʼnix jich la yal: «Mayuc machʼa ya xtal ta stojol te Tatil teme ma haʼucon ta jcuenta» (Juan 14:6). Ma xjuʼ ya kamigointik te Jehová teme maba kamigoinejtik te Jesuse, melel jaʼ jich yaʼiyel te ya jkʼan x-ochotik ta jun na pero maba ta tiʼnail ya x-ochotik. Te Jesús ay la stuuntes te ejemplo-abi kʼalal jich la yal: «Hoʼon te tiʼcorralon yuʼun te tuminchijetique» (Juan 10:7). Schebal, te Jesús la yakʼ ta ilel ta lek te stalel te sTate. Jich la yalbey te jnopojeletik yuʼune: «Te machʼa yilojonix, ha nix yilojix te Tatile» (Juan 14:9). Jich yuʼun, jun te bitʼil ya xjuʼ ya jnaʼbeytik sba te Jehovae jaʼ te ya jnaʼbeytik sba te Jesuse. Kʼalal ya jnaʼbeytik sba ta lek te Jesuse kʼux ya kaʼiytikxan ta koʼtantik sok jichme kʼux ya kaʼiy ta koʼtantik-euk te Jehovae.

6. ¿Binxan yuʼun ya skʼan ya kamigointik te Jesuse?

⁶ Ya skʼan ya kamigointik te Jesús swenta ya kichʼtik sutbeyel te bin ya jkʼantik ta orasione. Jaʼ-abi ya skʼan ya yal te kʼalal ya xlaj koʼtantik ta skʼoponel te Diose ma tikʼuknax-a te ya kaltik «ta swenta sbiil te Jesús». Mukʼ skʼoplal te yakuk xkʼot ta koʼtantik te bin-utʼil te Jehová ya stuuntes te Jesús swenta ya sutbotik te jkʼoptike. Te Jesús jich la yalbey te jnopojeletik  yuʼune: «Spisil te bin yac acʼambeyic te Tatil ta scuenta jbihil, ya jpasbeyex» (Juan 14:13). Te Jehová ya yaʼiy sok ya sutbotik te jkʼoptike, pero jaʼ yakʼojbey yaʼtel te sNichʼan swenta ya skʼotes ta pasel te bin ya skʼan yoʼtane (Mat. 28:18). Kʼalal mato sutoj-a te jkʼoptike, nail ya yil teme jchʼuunejtik te tsitseletik la yakʼ te Jesuse. Jich bitʼil te la yal ta Mateo 6:14 sok 15: «Teme yac apasbeyic perdón te machʼatic ay smulic ta atojolic, ha nix hich ya spasbeyex perdón te Atatic ay ta chʼulchan. Pero teme ma ba yac apasbeyic perdón te machʼatic ay smulic ta atojolic, ha nix hich ma ba ya spasbeyex perdón yuʼun amulic te Atatique». ¿Mabal jichuk te kʼax mukʼ skʼoplal te ya kakʼtik ta ilel slekil koʼtantik ta stojol te yantik jich bitʼil ya yakʼ ta ilel ta jtojoltik te Jehová sok te Jesuse?

7. ¿Bin ya skʼan ya jpastik yuʼun ya jta jlekilaltik yuʼun te la yakʼ sba ta lajel te Jesuse?

⁷ Jaʼnax te machʼatik yamigoinejik ta lek te Jesús ya xjuʼ ya staik lekilal yuʼun te la yakʼ sba ta lajele. ¿Bin-utʼil ya jnaʼtik? Te Jesús la yal te «ya yacʼ scuxlejal ta scuenta te yamigo» (Juan 15:13). Te j-abatetik yuʼun Dios te kuxinik te kʼalal mato xtal ta Balumilal-a te Jesuse jaʼnix jich ya skʼan ya snaʼbeyik sba sok ya skʼan kʼux ya yaʼiy ta yoʼtanik. Jich bitʼil te Abraham, Sara, Moisés o Rahab te jun yoʼtan la yakʼ sbaik ta stojol te Jehovae yame skʼan ya yamigoinik-euk te Jesús te kʼalal ya xchaʼkuxajik swenta ya xjuʼ ya xkuxinik ta sbajtelkʼinal (Juan 17:3; Hech. 24:15; Heb. 11:8-12, 24-26, 31).

8, 9. Jich bitʼil ya yal Juan 15:4, 5, ¿bin ya xjuʼ kuʼuntik spasel te bitʼil kamigoinejtik te Jesús sok bin yuʼun ya skʼan te jun ayotik soke?

⁸ Ya jmulanbeytik yutsil te ya jokintik ta aʼtel te Jesús ta scholel te skʼop Dios sok te ya kakʼtik ta nopel te lek yachʼil kʼop yuʼun te Wentainele. Kʼalal xtaluk ta Balumilal te Jesuse la yakʼ ta naʼel te bin smelelil ta swenta te Diose. Jaʼto te kʼalal sujt bael ta chʼulchane yak ta swentainel te scholel skʼop Dios, melel jaʼ Jolal yuʼun te kongregasione. Ay skʼoplal ta yoʼtan te jayebto yakotik ta spasel tulan ta skoltayel te ants winiketik swenta ya xnaʼbot sba sok te ya snaʼbeyik sba-euk te sTate. Jaʼnax ya xjuʼ kuʼuntik spasel te kaʼteltik ta swenta te koltayel ya yakʼbotik te Jehová sok te Jesuse (kʼopona Juan 15:4, 5).

⁹ Te Biblia ya yakʼ jnoptik te ya skʼan kʼux ta koʼtantik te Jesús teme ya jkʼantik te lek ya yilotik te Jehovae. Jich yuʼun kiltik chanchajp te bin ya skʼan ya jpastik yuʼun ya kamigointik te Jesuse.

10. ¿Bin nail ya skʼan ya jpastik swenta ya kamigointik te Jesuse?

¹⁰ Sbabial, jnaʼbeytik sba te Jesuse. Swenta ya jnaʼbeytik sba ya skʼan ya jkʼopontik te libro yuʼun Mateo, Marcos, Lucas sok Juan. Kʼalal ya jnop ta koʼtantik te bin ya scholbey skʼoplal ta swenta te skuxlejal te Jesús sok te la yakʼ ta ilel yutsil yoʼtane, yame xtal skʼuxul koʼtantik ta stojol sok mukʼ skʼoplal ya kiltikxan. Maba la yil jich bitʼil smoso te jnopojeletik yuʼun manchukme jaʼ yajwalik-a. Jich la yil bitʼil yamigotak sok la yaltiklanbey te bin ya snop sok te bin yaʼiyel ya yaʼiy sbae (Juan 15:15). La yaʼiybey te swokolik sok la sjokin ta okʼel (Juan 11:32-36). Jaʼnix jich te skontratak la staik ta ilel te la yamigoin te machʼatik la schʼuunik te bin la yakʼ ta nopele (Mat. 11:19). Teme jich ya kiltik yantik te bitʼil la spas te Jesuse, junme ya  xkʼootik sok te yantike, ya jtatik stseʼelil koʼtantik sok ya kichʼtikxan ta mukʼ te Cristoe.

11. ¿Bin-a te schebal ya skʼan ya jpastik yuʼun ya kamigointik te Jesús sok bin yuʼun mukʼ skʼoplal?

¹¹ Schebal, jichuk jpensartik sok kaʼteltik te bitʼil Jesús. Kʼalal ya jnaʼbeytik sba ta lek sok te ya jtʼuntik te bin la spas te Jesuse yame kamigointikxan ta lek (1 Cor. 2:16). ¿Bin-utʼil ya xjuʼ ya jtʼuntik te bin la spas te Jesuse? Kiltik jun ejemplo. Te Jesús jaʼ mukʼ skʼoplal ta yoʼtan-a te ya skoltay te yantike ma jaʼuk te bin la skʼan yoʼtan stukele (Mat. 20:28; Rom. 15:1-3). Ta swenta te jich spensare, bayal bin la spas ta stojolik sok la spastiklanbey perdon, maba ilin ta ora te kʼalal ay bin ma lek la yalik ta stojole (Juan 1:46, 47). Jaʼnix jich maba jaʼnax ay ta yoʼtan te banti ya xchʼay te ants winiketike (1 Tim. 1:12-14). Kʼax mukʼ skʼoplal te yakuk jtʼuntik te ejemplo yuʼune, melel jich la yal: «Hich ya snaʼic spisil ants-winiquetic te haʼex jnopojelex cuʼun teme talel cʼaxel cʼux yac awaʼiy aba ta awoʼtanique» (Juan 13:35). Jaʼ yuʼun ya skʼan te jich ya jnoptike: «¿Yabal jpas tulan te leknax ya kil jba sok te kermanotak jich bitʼil la spas te Jesuse?».

12. ¿Bin-a te yoxebal ya skʼan ya jpastik yuʼun ya kamigointik te Jesuse sok bin-utʼil ya jpastik?

¹² Yoxebal, jkoltaytik te yermanotak te Cristo. Te Jesús jich ya yil te jaʼ ya jpastik ta stojol te bin ya jpastik ta stojol te machʼatik tsabilik yuʼun ya xbajtik ta chʼulchane (Mat. 25:34-40). Jun te bitʼil ya xkoltaywanotik ta aʼtele, jaʼ te ya jpastik tulan ta scholel te skʼop Dios sok yotsesel jnopojeletik jich bitʼil la yal jilel ta mantal (Mat. 28:19, 20; Hech. 10:42). Te koltayel ya yakʼik te «yantic tuminchijetic» mukʼ skʼoplal swenta ya xjuʼ yuʼunik scholel te skʼop Dios ta swolol Balumilal te yermanotak te Cristo ta kʼajkʼal ini (Juan 10:16). Kʼalal ya jcholtik te skʼop Dios ya kakʼtik ta ilel te kʼux ta koʼtantik te Jesús sok te machʼatik tsabilik yuʼun ya xbajtik ta chʼulchane.

13. ¿Bin-utʼil ya xjuʼ ya jpastik te bin la yal jilel te Jesús ta Lucas 16:9?

¹³ Jaʼnix jich ya kamigointik te Jehová sok te Jesús te kʼalal ya jtuuntestik te jtakʼintik ta spasel te aʼtelil yakik ta swentainele (kʼopona Lucas 16:9). Ya xjuʼ ya kakʼtik majtan takʼin ta skoltayel te aʼtelil yuʼun scholel skʼop Dios te ya yichʼ pasel ta namal lugaretik, spasel sok slekubtesel te naetik te ya yichʼ tuuntesel ta yichʼel ta mukʼ te Dios sok skoltayel te ermanoetik te ayik ta wokol ta skaj tulan yikʼal jaʼal, nijkel o yan wokolil. Jaʼnix jich ya xjuʼ ya kakʼtik majtan takʼin ta jkongregasiontik sok te ya jkoltaytik te ermanoetik te ayik ta wokole (Prov. 19:17). Jaʼ jich ya jkoltaytik te yermanotak te Cristoe.

14. Jich bitʼil ya yal Efesios 4:15, 16, ¿bin-a te schanebal te ya skʼan ya jpastik yuʼun ya kamigointik te Jesuse?

¹⁴ Schanebal, jchʼuuntik spasel te bin ya sta ta nopel te organisasion yuʼun te Jehovae. Lekxan ya kil jbatik sok te Jesús te kʼalal ya jkoltaytik te ermanoetik te ya skanantayotik sok yutsil yoʼtanik (kʼopona Efesios 4:15, 16). Jun ejemplo, te organisasion yak ta yilel bitʼil ya jtuuntestik ta lek te sNail Tsoblejetik. Jaʼ yuʼun ay jun-nax la yichʼ akʼel cheʼoxeb kongregasionetik sok jelonem te territorioetike. Te bitʼil jich yak ta pasele maba ya xlaj bayal takʼin. Ta swenta te bintik jeloneme, bayal publikadoretik yakik ta spasel tulan yuʼun ya xkʼayik-a. Ayniwan bayal jaʼbil ayinik ta jun kongregasion, jaʼ yuʼun kʼayemikix  sok te ermanoetike. Pero la yichʼik albeyel te yakuk xbajtik ta yan kongregasion. Ya x-akʼbot bayal stseʼelil yoʼtan te Jesús yuʼun te ya yakʼik ta ilel te ermanoetik te jun yoʼtan ya schʼuunik spasel te bintik ya yichʼ tael ta nopele.

15. ¿Bin-utʼil ya xlekubxan ta pajel chaʼbej te bitʼil kamigoinejtik te Jesuse?

¹⁵ Te machʼatik tsabilik yuʼun ya xbajtik ta chʼulchan jaʼ ya smaliyik te ya sjokinik sbajtelkʼinal te Jesús sok te ya xmantalteswanik ta Wentainel yuʼun te Diose. Yame xbajt sjokinik, ya yilik sok ya skʼoponik (Juan 14:2, 3). Te machʼatik ya smaliyik kuxinel sbajtelkʼinal liʼ ta Balumilal yame yichʼik kanantayel yuʼun te Jesuse. Manchukme maba ya yilbeyik sit stukel yame yamigoinikxan te kʼalal yakik ta smulanel-a te kuxlejalil ya x-akʼbotik yuʼun te Jehová sok te Jesuse (Is. 9:6, 7).

16. ¿Bintik bendision ya jmaliytik te bitʼil kamigoinejtik te Jesuse?

¹⁶ Kʼalal ya jkʼantik te ya kamigoin jbatik sok te Jesuse yame jtatik bayal bendision. Jun ejemplo, jaʼ te ya yakʼ ta ilel skʼuxul yoʼtan ta jtojoltik, ya skoltayotik sok ya xjuʼ ya jtatik te kuxinel sbajtelkʼinal. Te mukʼul bendision ya jtatik yuʼun te ya kamigointik te Jesuse jaʼ te ya xjuʼ ya kamigointik te Jehovae. ¡Kʼax lek te bitʼil ya kamigointik te Jesuse!