1. ¿Kʼusi skʼan spasik chaʼvoʼ krixchanoetik sventa lekuk xamigoin sbaike?

JNOPBETIK skʼoplal liʼe: sventa lek xamigoin sbaik chaʼvoʼ krixchanoetike, skʼan jmojuk kʼusi spasik xchiʼuk ti xalbe sbaik li kʼusi tsnopike, ti kʼu yelan chaʼi sbaike xchiʼuk li kʼusitik snuptanojike. Pe xuʼ van jaʼ mas vokol chkaʼitik ti xkamigointik li Jesuse. Jkʼeltik batel jayibuk srasonal.

2. ¿Kʼusi li baʼyel srasonal ti vokol-o chkaʼitik yoʼ xkamigointik li Jesuse?

² Baʼyel srasonal, muʼyuk kilojbetik sat li Jesuse. Jaʼ jech kʼot ta stojolal epal yajchankʼoptak Kristo li ta baʼyel sigloe. Jaʼ yuʼun, xi laj yalanbe li jtakbol Pedroe: «Akʼanojik manchuk mi muʼyuk bu laj avilik. Avakʼoj xchʼunel avoʼontonik ta stojolal manchuk mi muʼyuk te akʼelojik» (1 Ped. 1:8). Xuʼ xkamigointik Jesus akʼo mi muʼyuk kilojbetik sat.

3. ¿Kʼusi jaʼ li xchibal srasonale?

³ Xchibal srasonal, mu xuʼ jkʼopontik li Jesuse. Akʼo mi jaʼ ta sbi Jesus ta jpastik orasion, maʼuk jaʼ ta jtatik ta kʼoponel, yuʼun jaʼ ta jkʼopontik li Jeovae. Mu onoʼox skʼan Jesus ti jaʼuk jkʼopontike. Yuʼun kʼalal ta jpastik orasione, jaʼ jech chkichʼtik ta mukʼ li Jeovae xchiʼuk jaʼ noʼox stuk skʼan xkichʼtik ta mukʼ (Mat. 4:10). Akʼo mi  jech, xuʼ xkakʼtik ta ilel ti jkʼanojtik li Jesuse.

4. 1) ¿Kʼusi jaʼ li yoxibal srasonale? 2) ¿Kʼusi ta jkʼeltik batel li ta xchanobil liʼe?

⁴ Yoxibal srasonal, mu xuʼ jchiʼintik Jesus ta skoj ti te oy ta vinajele. Akʼo mi jech, xuʼ xkojtikintik lek. Li ta xchanobil liʼe, ta jkʼeltik batel chantos kʼusi xuʼ jpastik sventa xkamigointik lek li Jesuse. Baʼyel jkʼeltik batel kʼu yuʼun toj tsots skʼoplal ti xkamigointike.

5. ¿Kʼu yuʼun skʼan xkamigointik li Jesuse? (Kʼelo xtok li rekuadro « Kamigointik li Jesuse, vaʼun chkamigointik ek li Jeovae» xchiʼuk « Ta smeloluk noʼox jkʼantik li Jesuse»).

⁵ Sventa lek xkil jbatik xchiʼuk Jeovae, skʼan xkamigointik li Jesuse. Jkʼeltik chaʼtos srasonal ti kʼu yuʼun jech chkaltike. Baʼyel, xi laj yalbe yajchankʼoptak li Jesuse: «Kʼux chaʼioxuk li Totile, yuʼun kʼux chavaʼiikun» (Juan 16:27). Xi to laj yale: «Muʼyuk buchʼu xuʼ xtal ta stojolal li Totile, jaʼ noʼox ta jventa» (Juan 14:6). Mi ta jkʼan chkamigointik li Jeovae, skʼan xkamigointik li Jesuse. Yuʼun mi mu jechuk la jpastike, xkoʼolaj ti ta jkʼan chij-och ta jpʼej nae, pe ti maʼuk te chij-och ta stiʼe. Jaʼtik jech laj yal Jesus kʼalal xi laj yale: «Voʼonun li stiʼ koral chije» (Juan 10:7). Xchibal, li Jesuse toj lek laj yakʼ ta ilel li stalelaltak Stote. Xi laj yalbe li yajchankʼoptake: «Yiloj xa Totil ek li buchʼu yilojune» (Juan 14:9). Jaʼ yuʼun, tsots skʼoplal ti xkojtikintik Jesus sventa xkojtikintik li Jeovae. Mi laj kojtikintik mas li Jesuse, mas ta jkʼantik xchiʼuk chijnopaj ta stojolal. Vaʼun, mas to ta jkʼantik li Jeovae.

6. ¿Kʼusi yan srasonal ti skʼan xkamigointik li Jesuse? Albo smelolal.

 ⁶ Sventa xkichʼtik takʼbel li j-orasiontike, skʼan xkamigointik li Jesuse. Jaʼ xkaltik, mu taʼlouk noʼox ti xkalbetik sbi Jesus kʼalal chnel j-orasiontike. Yuʼun skʼan xkaʼibetik smelolal kʼuxi chtunesat yuʼun Jeova sventa tstakʼ li j-orasiontike. Xi laj yalbe li yajtakboltake: «Chkakʼboxuk skotol li kʼusitik chakʼanik ta [jbie]» (Juan 14:13). Akʼo mi jaʼ chchikinta kaʼyejtik xchiʼuk tstakʼ j-orasiontik li Jeovae, jaʼ yakʼojbe ta sba Xnichʼon ti jaʼuk spas li kʼusi tsnope (Mat. 28:18). Kʼalal mu to tstak’ j-orasiontik li Jeovae, baʼyel tskʼel mi jchʼunojtik li tojobtaseletik laj yal Jesuse. Jech kʼuchaʼal ta sventa liʼe: «Mi chapasbeik perton smul li krixchanoetike, jaʼ jech ta spasboxuk perton amulik ek li Atotik ta vinajele; pe mi muʼyuk chapasbeik perton smul li krixchanoetike, jaʼ jech muʼyuk tspasboxuk perton amulik ek li Atotik ta vinajele» (Mat. 6:14, 15). ¿Mi mu jechuk ti tsots skʼoplal ti xkakʼbetik yil slekil koʼontontik yantik jech kʼuchaʼal tspas ta jtojolaltik li Jeova xchiʼuk Jesuse?

7. ¿Kʼusi skʼan jpastik sventa jtabetik sbalil ti cham ta jkojtik li Jesuse?

⁷ Sventa jtabetik sbalil ti ay chamuk li Jesuse, skʼan xkamigointik. ¿Kʼuxi jnaʼojtik taje? Yuʼun li Jesuse laj yal ti «chakʼ xkuxlejal ta stojolal li yamigotake» (Juan 15:13). Li yajtuneltak Dios ti jaʼo kuxiik kʼalal muʼyuk toʼox talem ta balumil li Jesuse skʼan xojtikinik xchiʼuk ti skʼanike. Li Abraan, Sara, Moises, Raab xchiʼuk yan yajtuneltak Diose chchaʼkuxiik tal. Pe ¿kʼusi skʼan spasik mi tskʼan chkuxiik-o sbatel osile? Skʼan xamigoinik li Jesuse (Juan 17:3; Ech. 24:15; Ebr. 11:8-12, 24-26, 31).

8, 9. Jech kʼuchaʼal chal Juan 15:4 xchiʼuk 5, ¿kʼusi chkʼot ta pasel mi chkamigointik li Jesuse, xchiʼuk kʼu yuʼun skʼan mu jchʼak jbatik ta stojolal?

⁸ Jtaojtik mukʼta matanal ti jmoj chij-abtej xchiʼuk Jesus ta xcholel mantal xchiʼuk ta xchanubtasel li krixchanoetike. La xchanubtas krixchanoetik kʼalal ay ta balumil li Jesuse. Kʼalal sut batel ta vinajele, kʼot ta Jolil ta tsobobbail, vaʼun te lik sbeiltas tal li cholmantal ta jpastike xchiʼuk li chanubtasel chkakʼtike. Li Jesuse oy sbalil chil ti chkakʼtik persa ta skoltael yantik yoʼ x-ojtikinate xchiʼuk ti xojtikinik li Stote. ¿Mi spas van kuʼuntik ta kipal jtuktik? Muʼyuk, yuʼun skʼan skoltautik li Jeova xchiʼuk Jesuse (kʼelo Juan 15:4, 5).

⁹ ¿Kʼusi skʼan jpastik mi ta jkʼantik ti lek xilutik li Jeovae? Li Vivliae jamal chal ti skʼan jkʼantik li Jesuse. Jaʼ yuʼun chaʼa, jkʼeltik batel chantosuk kʼusi xuʼ jpastik sventa xkamigointik li Jesuse.

10. ¿Kʼusi li baʼyel skʼan jpastik sventa xkamigointik li Jesuse?

¹⁰ Baʼyel, kojtikintik li Jesuse. ¿Kʼuxi xuʼ jpastik? Jchantik li slivroal Mateo, Markos, Lukas xchiʼuk Juan. Li loʼiletik taje chalbe skʼoplal li kʼusitik la spas Jesuse. Kʼalal ta jnopbetik skʼoplale, te chkakʼtik venta ti la xkʼuxubin li krixchanoetike, vaʼun chlik jkʼantik xchiʼuk chkichʼtik ta mukʼ. Akʼo mi tsots yabtel li Jesuse, maʼuk smosotak laj yil li yajchankʼoptake. Yuʼun yamigotak laj yil, laj yakʼanbe snaʼik li kʼusi tsnope xchiʼuk ti kʼu yelan chaʼi sbae (Juan 15:15). Laj  yaʼibe li xkʼuxul svokolike xchiʼuk jmoj okʼik (Juan 11:32-36). Li yajkontratake laj yakʼik venta ti jaʼ yamigotak li buchʼutik la xchikintaik mantale (Mat. 11:19). ¿Kʼusi lek chkʼot ta pasel mi jech chkiltik yantik jech kʼuchaʼal laj yil yajchankʼoptak li Jesuse? Mas lek ta jkʼopon jbatik xchiʼukik, mas me xijmuyubaj, mas to ta jkʼantik Kristo xchiʼuk mas to chkichʼtik ta mukʼ.

11. ¿Kʼusi li xchibal skʼan jpastik sventa xkamigointik li Jesuse, xchiʼuk kʼu yuʼun toj tsots skʼoplal?

¹¹ Xchibal, jechuk jnoptik xchiʼuk jchanbetik stalelal li Jesuse. ¿Kʼuxi xuʼ mas to xkamigointik li Jesuse? Jaʼo kʼalal mas chkojtikintike xchiʼuk ti jechuk jnoptik kʼuchaʼal tsnope (1 Kor. 2:16). Jkʼeltik kʼuxi xuʼ jchanbetik stalelal. Li stuke jaʼ mas tsots skʼoplal laj yil ti tskolta yantike, «maʼuk la spas li kʼusi lek chaʼi stuke» (Rom. 15:1-3; Mat. 20:28). Jaʼ yuʼun, oy kʼusitik la spas ta stojolal yantik manchuk mi laj yil-o svokol, laj yakʼanan ta perton xchiʼuk muʼyuk xkap ta anil akʼo mi oy kʼusitik chopol albat (Juan 1:46, 47). ¿Mi chopol xa van laj yil Jesus kʼalal oy buchʼu chopol kʼusi tspase? Mu jechuk (1 Tim. 1:12-14). Toj tsots skʼoplal ti jechuk xkiltik yantik kʼuchaʼal li stuke, yuʼun xi laj yale: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:35). Jaʼ yuʼun, xiuk jakʼbe jbatike: «¿Mi chkakʼ persa sventa lekuk xkil jba xchiʼuk kermanotak jech kʼuchaʼal la spas li Jesuse?».

12. ¿Kʼusi li yoxibal skʼan jpastik sventa xkamigointik li Jesuse, xchiʼuk kʼuxi ta jpastik?

¹² Yoxibal, jkoltatik li yermanotak Kristoe. Mi ta jkoltatik li buchʼutik chbatik ta vinajele, jaʼ me yakal ta jkoltatik chaʼi li Jesuse (Mat. 25:34-40). ¿Kʼuxi ta jpastik? Jaʼo kʼalal chkakʼ ta koʼontontik xcholel mantal xchiʼuk spasel ta jchankʼop li krixchanoetike (Mat. 28:19, 20; Ech. 10:42). Skʼan xichʼ pukel li lekil aʼyej ta spʼejel balumile. Pe jaʼ noʼox me chvuʼ kuʼuntik spasel mi ta jkolta jbatik xchiʼuk li yermanotak Kristoe (Juan 10:16). Jujukoj ti chijlokʼ ta cholmantale, chkakʼtik ta ilel ti jkʼanojtik li buchʼutik chbatik ta vinajele xchiʼuk li Jesuse.

13. ¿Kʼuxi chvinaj ti ta jchʼuntik li tojobtasel laj yal Jesus ta Lukas 16:9?

¹³ ¿Kʼusi yan xuʼ jpastik sventa xkamigointik li Jeova xchiʼuk Jesuse? Jaʼ ti xkakʼtik matanal takʼine (kʼelo Lukas 16:9). K’alal chkakʼtik matanal tak’in sventa li abtelal ta spʼejel balumile, yakal me ta jkolta jbatik sventa xichʼuk cholel mantal ta namal lumetik, sventa xichʼ vaʼanel xchiʼuk xichʼ kʼelel salonetik o li naetik bu chkichʼtik ta mukʼ Diose xchiʼuk sventa jkolta jbatik mi echʼ junuk tsatsal vokolile. Xuʼ xkakʼtik matanal takʼin xtok li ta jtsobobbailtike xchiʼuk jkoltatik li ermanoetik ti oy kʼusi chtun yuʼunike (Prov. 19:17). Jaʼ me jech ta jkoltatik li yermanotak Kristoe.

14. ¿Kʼusi li xchanibal skʼan jpastik sventa xkamigointik Jesus jech kʼuchaʼal chal Efesios 4:15 xchiʼuk 16?

¹⁴ Xchanibal, jchʼuntik li kʼusi chkʼot ta nopel yuʼun li s-organisasion Jeovae. Mi ta jchʼuntik kʼusi chalik li buchʼutik vaʼanbilik sventa tskʼel chchabiutike, mas me chkamigointik Jesus ti jaʼ Jolil ta tsobobbaile (kʼelo Efesios 4:15, 16). Kalbetik junuk skʼelobil. ¿Kʼusi yakal tspas s-organisasion Jeova yoʼ lekuk  xichʼ tunesel li salonetike? Jmoj xa tstsob sbaik junantik tsobobbailetik xchiʼuk yichʼoj jelel junantik teritorioetik. Ti jech tspasike, jaʼ mu xa masuk yichʼoj lajesel takʼin. Junantik ermanoetike jal xa te oyik li ta stsobobbailike xchiʼuk nopem xa xaʼiik ti kʼu yepal tstsob sbaike. Pe albatemik ti xbat tunikuk ta yan tsobobbaile. ¡Solel xmuyubaj yuʼunik Jesus ti chchʼunik mantale!

15. ¿Kʼu yelan chkil jbatik xchiʼuk Jesus li ta jelavele?

¹⁵ ¿Kʼusi smalaoj li buchʼutik chbatik ta vinajele? Jaʼ ti te chchiʼinik Jesus sbatel osile xchiʼuk jmoj ch-ajvalilajik. Li stukike chilik, chchiʼinik ta loʼil xchiʼuk te chchiʼinik-o (Juan 14:2, 3). Li buchʼutik liʼ chkuxiik ta balumil eke chichʼik kʼuxubinel yuʼun Jesus xchiʼuk chchabiatik. Akʼo mi muʼyuk bu chilik-o, mas to chamigoinik kʼalal te xa ox oyik li ta achʼ balumil ti ch-akʼbatik yuʼun Jeova xchiʼuk Jesuse (Is. 9:6, 7).

16. ¿Kʼusitik bendision ta jtatik kʼalal chkamigointik li Jesuse?

¹⁶ Kʼalal chkamigointik li Jesuse, ta jtatik epal bendisionetik. ¿Kʼusitik jaʼ? Tskʼanutik xchiʼuk tskoltautik li avie. Jech xtok, xuʼ jtatik kuxlejal sbatel osil. Pe li kʼusi mas to leke jaʼ ti xuʼ xkamigointik li Stote. ¡Jaʼ jun mukʼta matanal ti xuʼ xkamigointik li Jesuse!