1. Мар кароно, кинэн ке матысь эшъёс луон понна?

 ӴЕМ дыръя кык адямиос матысь эшъёс луо, куке дырзэс ӵош ортчыто. Ог-огенызы вераськыса, ог-огзылы малпанъёссы но шӧдонъёссы сярысь вераса, соослэн кусыпъёссы юнмало. Нош Иисусэн матысь кусыпъёс сярысь верано ке, милям куд-ог шуг-секытъёсмы кылдо. Кыӵе шуг-секытъёс?

2. Кыӵе нырысетӥез шуг-секыт, кудӥныз ми пумиськиськомы?

² Нырысетӥез шуг-секыт — ми Иисусэн ноку ӧм пумиськылэ. Нырысетӥ даурысь тросэз христианъёслэн но таӵе шуг-секытсы вал. Со шоры учкытэк, апостол Пётр соослы гожтӥз: «Иисус Христосэз адӟытэк но яратӥськоды, та дырозь Сое тӥ ӧд адӟе, но Солы оскыса, вераны луонтэм, туж дано шумпотонэн шумпотӥськоды» (1 Пётр 1:8). Озьыен, ми Иисусэн ӧм пумиськылэ ке но, солэн матысь эшъёсыз луыны быгатӥськомы.

3. Кыӵе кыкетӥез шуг-секыт?

³ Кыкетӥез шуг-секыт — ми Иисусэн вераськыны ум быгатӥське. Вӧсяськыкумы, ми Иеговаен вераськиськомы. Зэм но, ми Иисус пыр вӧсяськиськомы, нош соин асэныз ум вераськиське. Со сяна, Иисуслэн уг но поты, ми солы мед вӧсяськомы шуыса. Малы? Малы ке шуоно вӧсяськон — со йыбырттонлэн оглюкетэз, нош йыбыртъяно Иеговалы гинэ (Матф. 4:10). Озьы ке но ми возьматыны быгатӥськомы, Иисусэз яратӥськомы шуыса.

4. Кыӵе куинетӥез шуг-секыт? Мае ми эскеромы та статьяын?

⁴ Вань на куинетӥез шуг-секыт — Иисус инмын улэ. Соин ик, мукетъёсыныз кадь, ми соин дырмес ортчытъяны ум быгатӥське. Озьы ке но ми быгатӥськомы Иисус сярысь  троссэ тодыны. Ойдолэ эскеромы ньыль вамышъёсты, кудъёсыз юрттозы милемлы Иисусэн эшъяськыны, озьы ик азьланяз но соин кусыпъёсмес утьыны. Но нырысь эскеромы, малы туж кулэ солэн эшъёсыз луыны.

5. Малы милемлы Иисуслэн эшъёсыз луыны кулэ? (Озьы ик учке « Иисусэн эшъяськыса, ми Иеговалэн эшъёсыз луиськомы» но « Иисус шоры шонер учке» рамкаосты.)

⁵ Милемлы Иисуслэн эшъёсыз луоно, Иеговаен умой кусыпъёсмы мед луозы шуыса. Малы озьы вераны луоз? Солы кык мугъёс вань. Нырысетӥез, Иисус дышетскисьёсызлы вераз: «Ачиз Атай тӥледыз яратэ, малы ке шуоно тӥ Монэ яратӥды» (Иоанн 16:27). Озьы ик со шуиз: «Мон пыр сяна нокин но Атай доры уг лыкты» (Иоанн 14:6). Иеговалэн эшез луыны тыршон, Иисусэн матысь эшъяськытэк, тупа солы, кызьы кин ке но корка пушкы ӧсэтӥ уг, нош мукет сямен пырыны тырше. Иисус та выллем ик ӵошатонэз уже кутӥз: со ассэ «ыжъёслы ӧс» шуыса нимаз (Иоанн 10:7). Кыкетӥез, Иисус Атаезлэн сямъёсызлы быдэсак адӟем кариз. Дышетскисьёсызлы со вераз: «Монэ адӟись мурт Атаез адӟиз» (Иоанн 14:9). Соин ик, Иеговаез тодон понна, туж кулэ Иисус Христослэсь улонзэ эскерыны. Иисус сярысь тросгес тодыса, милям сое яратонмы юнма. Нош Иисусэн кусыпъёсмы юнмало ке, ми солэсь Атайзэ золгес яратӥськомы.

6. Кыӵе муг эшшо вань на, Иисусэн эшъяськон понна? Валэктэ.

⁶ Милемлы Иисуслэн эшъёсыз луоно, вӧсяськонъёсмылы ответ басьтон понна. Со понна вӧсяськонлэн пумаз «Иисус Христос пыр» шуыса вераны гинэ тырмыт ӧвӧл.  Милемлы валаны кулэ, мар каре Иисус, куке Иегова вӧсяськонъёсмылы ответ сётэ. Иисус апостолъёсызлы вераз: «Мынам нимыным Атайлэсь мар гинэ уд куре, ваньзэ сое быдэсто» (Иоанн 14:13). Вӧсяськонъёсмес кылзэ но соослы ответ сётэ ачиз Иегова. Озьы ке но Иисуслы право сётэмын Иеговаен кутэм ужпумъёсты быдэсъяны (Матф. 28:18). Эскеромы, кызьы герӟаськемын Иисусэн кусыпъёсмы но вӧсяськонъёсмы. Сьӧлыкъёсты простить каремлэсь азьло, Иегова эскере, уже кутӥськомы-а ми Иисуслэсь визь-кенешсэ: «Адямиослы сьӧлыкамъёссэс куштӥды ке, Инмысь Атайды тӥлесьтыд но куштоз. Нош адямиослы сьӧлыкамъёссэс ӧд ке куштэ, Инмысь Атайды но тӥлесьтыд сьӧлыкамъёстэс уз кушты» (Матф. 6:14, 15). Соин ик милемлы асьмеды мукетъёсыныз ӟеч сямен возёно — озьы ик, кызьы Иегова но Иисус асьсэды милемын возё.

7. Кин басьтыны быгатэ бакель каронъёсты, кудъёссэ сётэ Иисуслэн мозмытӥсь курбонэз?

⁷ Соос гинэ, кинъёс Иисусэн матысь эшъёс луизы, басьтозы бакель каронъёсты, кудзэ мозмытӥсь курбон сётэ. Кытысь ми сое тодӥськомы? Иисус эшъёсыз понна улонзэ сётӥз (Иоанн 15:13). Инмарлы оскымон адямиослы, кудъёсыз улӥзы, Иисус музъем вылэ лыктытозь, соин тодматсконо но сое яратоно луоз. Иегова кулэмысь улӟытоз аслэсьтыз ужась-тыршисьёссэ, кылсярысь, Авраамез, Сарраез, Моисеез но Раавез, но, пырак улон понна, соослы но Иисусэн эшъяськоно луоз (Иоанн 17:3; Ап. уж. 24:15; Евр. 11:8—12, 24—26, 31).

8, 9. Иоаннлэсь 15:4, 5 лыдэ басьтыса, мар ми карыны быгатӥськомы, Иисуслэн эшъёсыз луимы ке? Малы милемлы Иисусэн матысь кусыпъёсмес утёно?

⁸ Ми шумпотӥськомы Иисусэн ӵош ужаны, Эксэйлык сярысь ӟеч иворез вераса но дышетскисьёсты дасяса. Музъем вылын ужакуз-тыршыкуз, Иисус адямиосты дышетӥз. Инме берытскемез бере, Иисус, кенешлэн йырыз луыса, азьланьтэ кивалтыны тодытон но дышетскисьёсты дасян ужен. Со адӟе но дунъя ваньзэ, мае тӥ лэсьтӥськоды, тросгес адямиос соин но солэн Атаеныз тодматскыны мед быгатозы шуыса. Зэмзэ вераса, ми ум быгатэ та ужез быдэстыны, Иегова но Иисус милемлы ӧз юрттэ ке. (Лыдӟе Иоаннлэсь 15:4, 5.)

⁹ Озьыен, Инмарлэн Кылаз валамон вераське, Иеговаез шумпоттон понна, ми Иисусэз яратонмес будэтыны но юнматыны кулэ шуыса. Табере эскеромы ньыль вамышъёсты, кудъёсыз юрттозы милемлы Иисуслэн эшъёсыз луыны.

10. Кыӵе нырысетӥ вамыш милемлы лэсьтоно, Иисуслэн эшъёсыз луон понна?

¹⁰ 1. Иисусэн умойгес тодматске. Ми сое умойгес тодыны быгатомы Матфейлэсь, Марклэсь, Лукалэсь но Иоаннлэсь Евангелиоссэс лыдӟыса. Куке ми малпаськиськомы Иисуслэн улонэз сярысь но тодӥськомы, кызьы со мукет адямиослы ӟеч сямзэ возьматъяз, ми сое яратыны но гажаны кутскиськомы. Кылсярысь, Иисус дышетскисьёсызлы Кузё вал ке но, соос шоры со ӧз учкы ляльчиос шоры кадь (Иоанн 15:15). Иисус соослэсь вӧсь луэмзэс шӧдӥз но соосын ӵош бӧрдӥз (Иоанн 11:32—36). Иисуслэн тушмонъёсыз но веразы, иворзэ кылзӥсьёслы со эш вал шуыса (Матф. 11:19). Куке ми тыршиськомы адямиос шоры учкыны озьы ик, кызьы Иисус дышетскисьёсыз шоры учкиз, милемлы капчигес соосын тупаса улыны, улонмы тросгес шумпотон вае, но милям Иисусэн кусыпъёсмы юнмало.

11. Кыӵе кыкетӥ вамыш милемлы лэсьтоно, Иисусэн эшъяськон понна, но малы со туж кулэ?

 ¹¹ 2. Малпаське но лэсьтэ, Иисус сямен. Макем умойгес ми валаны тыршиськомы но адӟем кариськомы солы, кызьы Иисус малпаськиз, сокем юнгес луэ соин эшъяськонмы (1 Кор. 2:16). Кызьы ми Иисуслэсь адӟем карыны быгатӥськомы? Кылсярысь, Иисус, аслыз гинэ ӟеч лэсьтыса, улыны ӧз тыршы, со интые, мукетъёсызлы юрттыны тыршиз (Матф. 20:28; Рим. 15:1—3). Сыӵе мылкыдызлы луыса со дась вал нырысь ик мукетъёсыз сярысь малпаськыны но соосты простить карыны. Сое вӧсь карись кылъёслы со ӧз дырты кӧтсэ ӝож карыны (Иоанн 1:46, 47). Адямилэн азьвыл лэсьтэм янгышъёсыз сэрен, Иисус со адями шоры умойтэмен ӧз учкы (1 Тим. 1:12—14). Милемлы но туж кулэ мукетъёсыз шоры Иисус кадь учкыны, малы ке шуоно со вераз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:35). Соин ик умой луысал аслэсьтыд юаны: «Адӟем карисько-а мон Христослэсь но лэсьтӥсько-а ваньзэ, мае быгатӥсько, вын-агайёсын но сузэр-апайёсын тупаса улон понна?»

12. Кыӵе куинетӥ вамыш милемлы лэсьтоно, Иисусэн эшъяськон понна, но мар со понна кароно?

¹² 3. Юрттэ Христослэн вын-агайёсызлы. Иисус лыдъя, куке ми солэн зырӟем вын-агайёсызлы мае ке лэсьтӥськомы, ми сое солы аслыз лэсьтӥськомы шуыса (Матф. 25:34—40). Валтӥсез, кызьы ми зырӟем вын-агайёслы юрттыны быгатӥськомы,— со ӟырдыт мылкыдын Эксэйлык сярысь тодытон но дышетскисьёсты дасян. Иисус дышетскисьёссэ ӵапак та ужез быдэстыны куриз (Матф. 28:19, 20; Ап. уж. 10:42). «Мукет ыжъёслэн» юрттэменызы гинэ, Христослэн вын-агайёсыз быдэстыны быгато тодытон ужез, кудӥз асьме нуналъёсы быдэс дунне вылын мынэ (Иоанн 10:16). Тӥ «мукет ыжъёс» пӧлы пыриськоды ке, тодады возе, та уже пыриськыса, тӥ зырӟем вын-агайёслы но, Иисуслы но яратондэс возьматӥськоды шуыса.

13. Кызьы уже кутоно Иисуслэсь визь-кенешсэ, кудӥз гожтэмын Лукалэсь 16:9?

¹³ Озьы ик ми Иеговалэн но Иисуслэн эшъёссы луыны быгатӥськомы, куке ас мылкыд кареммыя коньдон сётӥськомы со ужлы, кудӥныз соос кивалто. (Лыдӟе Лукалэсь 16:9.) Кылсярысь, ми коньдон сётыны быгатӥськомы быдэс дунне вылын ортчытӥськись ужлы. Та коньдон кутӥське, кыдёкысь интыосын ӟеч иворез веран понна, Иеговалы йыбыртъянэн герӟаськем юртъёсты пуктон но соосты тупатъян понна, озьы ик инкуазь шимучыръёсы но мукет шуг-секытъёсы сюремъёслы юрттон понна. Со сяна, ми коньдонэн юрттыны быгатӥськомы асьме кенешмылы но соослы, кинъёслы, ми тодэмъя, юрттэт кулэ (Мад. 19:17). Озьы ми Христослэн вын-агайёсызлы юрттӥськомы.

14. Ефесъёслы 4:15, 16 лыдэ басьтыса, кыӵе эшшо вамыш лэсьтоно на, Иисусэн кусыпъёсмес юнматон понна?

¹⁴ 4. Улэ Иеговалэн организациезлэн кутэм ужпумъёсызъя. Ми Иисусэн, кенешлэн йырыныз, кусыпъёсмес юнматӥськомы, куке кылзӥськиськомы вын-агайёслэсь, кудъёсыз пуктэмын ми сярысь сюлмаськыны. (Лыдӟе Ефесъёслы 4:15, 16.) Кылсярысь, али ми тыршиськомы Эксэйлык юртъёсты тужгес но умой амалэн уже кутыны. Со понна куд-ог кенешъёсты огазеязы, но соослэн тодытон понна интызы воштӥськиз. Таӵе воштӥськонъёслы луыса вын-агайёслэн ас мылкыд каремзыя сётэм коньдонзы ӝикытгес кутӥськыны кутскиз. Нош со дыре  ик куд-ог ивортӥсьёслы выль югдуръёслы дышоно луиз. Та оскымон христианъёс трос аръёс ӵоже одӥг кенешын ужазы-тыршизы но ог-огенызы туж эшъяськизы, вылды. Нош табере соосты мукет кенеше потыны куризы. Макем шумпотэ Иисус, куке адӟе, та оскымон христианъёс Иеговалэн организациезлэн кутэм ужпумъёсызъя уло шуыса!

15. Малы Иисусэн эшъяськонмы азьланяз эшшо но юнмалоз?

¹⁵ Соос, кинъёс святой духен зырӟемын, Христосэн ӵош Инмарлэн Эксэйлыказ кивалтозы. Соос быгатозы котьку Иисусэн ӵош луыны — сое адӟыны, соин вераськыны но соин дырзэс ортчытъяны (Иоанн 14:2, 3). Соос но, кинъёс музъем вылын улыны оско, Иисуслэсь яратэмзэ но сюлмаськемзэ ас вылазы шӧдозы. Иисусэз адӟыны уз быгатэ ке но, соос шумпотозы улонлы, кудзэ кузьмазы соослы Иисус но солэн Атаез, Иегова. Солы луыса соослэн Иисусэн кусыпъёссы нуналысь нуналэ юнмалозы (Ис. 9:6, 7).

16. Кыӵе бакель каронъёс ми басьтӥськомы, Иисусэн эшъяськыса?

¹⁶ Куке ми Иисуслэн эшъёсыз луыны ӧтёнлы вазиськиськомы, милям улонмы умойгес луэ. Кылсярысь, ми али ик ини солэсь яратэмзэ но юрттэмзэ шӧдӥськомы. Милям пырак улыны луонлыкмы кылдӥз. Но самой кулэез, Иисусэн эшъяськыса, милям вань тужгес но дуноез — Иисуслэн Атаеныз, Иеговаен, матысь кусыпъёсмы. Макем бадӟым шумпотон Иисуслэн эшъёсыз луыны!