17-ТӘТҚИҚ МАҚАЛИСИ
«Силәрни достлирим дәймән»
«Силәрни достлирим дәймән, чүнки Атамдин аңлиғанлиримниң һәммисини силәргә аян қилдим» (ЙОҺ. 15:15).
5-НАХША Мәсиһ — бизниң үлгимиз
БУ МАҚАЛИДӘ a
1. Бирси билән дост болуш үчүн немә қилиш керәк?
АДӘТТӘ, бирси билән дост болушни халисиңиз, авал шу адәм билән вақит өткүзүшиңиз керәк. Бир-бириңларға ой-хияллириңиз вә һис-туйғулириңизни ейтқанда, йеқин болуп кетисиләр. Лекин Әйса билән дост болушқа тосалғулуқ қилидиған бәзи қийинчилиқлар бар. Қандақ қийинчилиқлар?
2. Биз дуч келидиған биринчи қийинчилиқ қандақ?
2 Биринчи қийинчилиқ — биз Әйсани өз көзүмиз билән көрмигән. Биринчи әсирдики нурғун Мәсиһ шагиртлириму Әйсани һечқачан көрмигән. Шундақ болсиму, әлчи Петрус мундақ дегән: «Мәсиһни һечқачан көрмигән болсаңларму, уни сөйисиләр. Һазирму көрмигиниңларға қаримай, униңға ишини[силәр]» (Пет. 1-х. 1:8). Шуңа, Әйсани өз көзүмиз билән көрмисәкму, униң билән йеқин дост болуш мүмкин.
3. Дуч келидиған иккинчи қийинчилиқ қандақ?
3 Иккинчи қийинчилиқ — биз Әйса билән сөзлишәлмәймиз. Биз дуа қилған чағда, Йәһва Худа билән сөзлишимиз. Гәрчә биз Әйсаниң исми арқилиқ дуа қилсақму, бирақ удул униң билән сөзләшмәймиз. Әйсаниң өзиму униңға дуа қилишимизни халимайду. Немә үчүн? Чүнки дуаниң өзи ибадәтниң бир қисми вә ибадәт қилишқа пәқәт Йәһва Худала лайиқтур (Мәт. 4:10). Гәрчә шундақ болсиму, биз Әйсаға өз меһир-муһәббитимизни ипадиләләймиз.
4. Үчинчи қийинчилиқ қандақ вә бу мақалидә немини көрүп чиқимиз?
4 Үчинчи қийинчилиқ — Әйса асманда яшиғачқа, биз удул мәнада униң билән вақит өткүзәлмәймиз. Амма Әйсаниң йенида болмисақму, у һәққидә көп нәрсиләрни биләләймиз. Әйса билән мунасивитимизни мустәһкәмләшкә ярдәм беридиған төрт нәрсини көрүп чиқайли. Лекин авал Әйса билән йеқин дост болуш немә үчүн муһим екәнлигигә диққәт ағдурайли.
НЕМӘ ҮЧҮН ӘЙСА БИЛӘН ДОСТ БОЛУШ МУҺИМ?
5. Немә үчүн Әйса билән дост болушимиз керәк? (« Әйса билән дост болуш арқилиқ Йәһва Худа билән дост болалаймиз» вә « Әйсаға болған тәңпуң көзқараш» дегән рамкиларға қараң.)
5 Йәһва Худа билән дост болуш үчүн Әйса билән дост болушимиз керәк. Немә үчүн? Буниң икки сәвәвинила көрәйли. Биринчидин, Әйса өз шагиртлириға мундақ дегән: «Атам Өзиму силәрни қәдирләйду, чүнки силәр мени қәдирләйсиләр» (Йоһ. 16:27). У йәнә мундақ дәп ейтқан: «Һечким мениңсиз Атамға келәлмәйду» (Йоһ. 14:6). Әйса билән дост болмай туруп, Йәһва Худа билән дост болушқа интилишни бир бена ичигә ишик арқилиқ әмәс, башқа йол билән киришкә һәрикәт қилиш билән селиштурушқа болиду. Әйса буниңға охшаш мисални кәлтүрүп, өзини «қойлар үчүн ишикмән» дегән (Йоһ. 10:7). Иккинчидин, Әйса Атисиға хас болған хисләтләрни мукәммәл әкс әттүргән. У шагиртлириға: «Мени көргән киши Атамниму көргән болиду»,— дәп ейтқан (Йоһ. 14:9). Демәк, Йәһва Худа тоғрилиқ билимгә егә болушниң әң яхши йоли — Әйсаниң һаятини тәтқиқ қилиш. Әйса тоғрилиқ көпирәк билгәнсири, уни техиму яхши көримиз. Әйса билән болған достлуқ мунасивитимиз күчәйгәнсири, униң Атиси Йәһваға болған меһир-муһәббитимиз ашиду.
6. Әйса билән йеқин мунасивәттә болушниң йәнә қандақ муһим сәвәви бар? Чүшәндүрүп бериң.
6 Дуалиримизға җавап елиш үчүн Әйса билән дост болушимиз лазим. Бу дуалиримизниң ахирида мундақла «Әйса исми арқилиқ» дейиштинму көп нәрсини өз ичигә алиду. Йәһва Худаниң дуалиримизға җавап бериштә Әйсаниң қандақ роли бар екәнлигини ениқ чүшинишимиз керәк. Әйса әлчилиригә мундақ дәп ейтқан: «Мениң исмимдин немила сорисаңлар,... мән шуни орунлаймән» (Йоһ. 14:13). Пәқәт Йәһва Худа дуалиримизни тиңшап, уларға җавап бәрсиму, У чиқарған қарарлирини әмәлгә ашурушни Әйсаға тапшурған (Мәт. 28:18). Йәһва Худа дуалиримизға җавап бериштин авал, Әйсаниң нәсиһитигә қулақ салған яки салмиғанлиғимизға диққәт ағдуриду. Мәсилән, Әйса: «Әгәр силәр инсанларниң гуналирини кәчүрсәңлар, асмандики Атаңларму силәрни кәчүриду, лекин силәр инсанларниң гуналирини кәчүрмисәңлар, Атаңларму силәрниң гуналириңларни кәчүрмәйду»,— дәп ейтқан (Мәт. 6:14, 15). Йәһва Худа вә Әйса бизгә қандақ муамилә қилса, бизму башқиларға шундақ муамилә қилишимиз бәк муһим!
7. Әйсаниң төләм қурбанлиғиниң пайдисини ким көрәләйду?
7 Пәқәт Әйсаниң йеқин достлири төләм қурбанлиғиниң пайдисини көрәләйду. Буни нәдин билимиз? Әйса «өз достлири үчүн җенини пида» қилидиғанлиғини ейтқан (Йоһ. 15:13). У йәргә келиштин бурун яшиған садиқ хизмәтчиләрму уни билиши вә яхши көрүши керәк. Йәһваниң Ибраһим, Сарә, Муса вә Раһабқа охшаш садиқ хизмәтчилириму тирилгәндин кейин мәңгү һаятқа еришиш үчүн Әйсаниң достлири болуши лазим (Йоһ. 17:3; Әлч. 24:15; Ибр. 11:8—12, 24—26, 31).
8, 9. Йоһан 15:4, 5кә асасән, Әйса билән дост болуш немигә йол ачиду вә бу немә үчүн муһим?
8 Падишалиқ һәққидики хуш хәвәрни хошаллиқ билән вәз қилиш вә тәлим бериш арқилиқ биз Әйса билән һәмкарлишимиз. Әйса йәр йүзидә яшиғанда устаз болған. Әршкә қайтқандин та һазирғичә у җамаәтниң беши сүпитидә вәз қилиш вә тәлим бериш ишиға йетәкчилик қилип кәлмәктә. Шу сәвәптин, қолуңиздин кәлгиничә башқиларға у тоғрилиқ вә Атиси тоғрилиқ ейтишқа күч селиватқанлиғиңизни Әйса көриду вә буни қәдирләйду. Бизгә тапшурулған бу ишни пәқәт Йәһва Худаниң вә Әйса Мәсиһниң қоллап-қувәтлиши билән орунлалаймиз (Йоһан 15:4, 5ни оқуң).
9 Муқәддәс китапта Йәһва Худаниң жүригини хурсән қилиш үчүн Әйсаға болған меһир-муһәббәтни йетилдүрүп, уни сақлап қелишимиз керәклиги ениқ ейтилған. Әйсаниң дости болуш үчүн қайси төрт қәдәмни басалайдиғанлиғимизни көрүп чиқайли.
ӘЙСА БИЛӘН ҚАНДАҚ ҚИЛИП ДОСТ БОЛАЛАЙМИЗ?
Әйсаниң дости болушниң усуллири: 1) Әйса тоғрилиқ көпирәк биливелиш, 2) Әйсадәк ойлиниш вә һәрикәт қилиш, 3) Әйсаниң қериндашлирини қоллап-қувәтләш вә 4) Йәһва Худаниң тәшкилатидики орунлаштурушни қоллаш (10—14 абзацларға қараң) b
10. Әйса билән дост болуш үчүн басалайдиған биринчи қәдәм немә?
10 1) Әйса тоғрилиқ көпирәк биливелиң. Биз буни Мәтта, Марк, Луқа вә Йоһан китаплирини оқуш арқилиқ қилалаймиз. Муқәддәс китаптин Әйсаниң һаяти тоғрилиқ оқуп, мулаһизә қилсақ, униң адәмләргә көрсәткән меһрибанлиғини көрүп, уни техиму яхши көридиған вә һөрмәтләйдиған болимиз. Мәсилән, Әйса шагиртлири үчүн Ғоҗайин болсиму, уларни қул дәп қаримиған. Әксинчә, уларға көңлидики ой-пикирлири билән һис-туйғулирини ейтқан (Йоһ. 15:15). Әйса уларниң дәрдигә дәрман болған вә улар жиғлиғанда улар билән тәң жиғлиған (Йоһ. 11:32—36). Әйсаниң өзи ейтип жүргән хәвәргә қулақ салғанлар билән дост болғанлиғини һәтта дүшмәнлириму байқиған (Мәт. 11:19). Әйсаниң шагиртлириға қандақ муамилә қилғанлиғидин үлгә алсақ, башқилар билән болған мунасивитимиз яхшилиниду. Шундақла, өзүмизни техиму бәхитлик һис қилимиз вә Мәсиһкә болған миннәтдарлиғимиз ашиду.
11. Әйса билән дост болуш үчүн басалайдиған иккинчи қәдәм немә вә бу қәдәмни бесиш немә үчүн муһим?
11 2) Әйсадәк ойлиниң вә һәрикәт қилиң. Әйсаниң пикир қилиш тәрзини яхширақ билип, уни үлгә қилсақ, униң билән достлуқ мунасивитимиз йеқинирақ болиду (Кор. 1-х. 2:16). Биз Әйсани қандақ үлгә қилалаймиз? Бир мисални көрүп чиқайли. Әйса өзи тоғрилиқ әмәс, башқиларға ярдәм бериш тоғрилиқ ойлиған (Мәт. 20:28; Рим. 15:1—3). Шуңа, у һәрқачан пидакарлиқ вә кәчүрүмчанлиқ роһини көрсәткән. У башқиларниң униң тоғрилиқ ейтқан сөзлирини көңлигә алмиған (Йоһ. 1:46, 47). Шундақла Әйса адәмниң бурун өткүзгән хаталиқлири униң шу адәмгә болған көзқаришиға тәсир қилишиға йол қоймиған (Тим. 1-х. 1:12—14). Әйса: «Әгәр бир-бириңларға меһир-муһәббәтлик болсаңлар, силәрниң мениң шагиртлирим екәнлигиңларни һәммиси тонуйду»,— дәп ейтқан (Йоһ. 13:35). Шуңа өз-өзүмиздин: «Әйсадин үлгә елип, етиқатдашлар билән течлиқни сақлаш үчүн бар күчүмни чиқириватимәнму?»— дәп сорисақ яхши болиду.
12. Әйса билән дост болушниң үчинчи усули қандақ вә бу қәдәмни бесиш немә үчүн муһим?
12 3) Әйсаниң қериндашлирини қоллап-қувәтләң. Әйса униң майланған қериндашлири үчүн қилған ишлиримизни шәхсән өзигә қилинғандәк қобул қилиду (Мәт. 25:34—40). Майланған қериндашларни қоллап-қувәтлишимизниң асасий йоли — Әйса шагиртлириға бәргән буйруқни орунлап, Падишалиқ һәққидики хуш хәвәрни вәз қилиш вә шагиртларни тәйярлаш ишиға бар күчимизни чиқириш (Мәт. 28:19, 20; Әлч. 10:42). Әйсаниң майланған қериндашлири пүткүл дуния йүзидә елип бериливатқан вәз паалийитини пәқәт «башқа қойларниң» ярдими биләнла орунлалайду (Йоһ. 10:16). Әгәр сизму башқа қойларниң бири болсиңиз, вәз ишиға қатнашқансири, пәқәт Мәсиһниң қериндашлириға әмәс, Әйсаниң өзигиму меһир-муһәббәт көрситисиз.
13. Әйсаниң Луқа 16:9дики нәсиһитигә қандақ әмәл қилалаймиз?
13 Йәһва Худа вә Әйса Мәсиһ билән дост болушниң йәнә бир йоли — улар башқуруватқан ишни ихтисадий ярдәм билән қоллаш (Луқа 16:9ни оқуң). Мәсилән, дуниявий паалийитимиз үчүн ианә бәрсәк болиду. Бу ихтисадий ярдәм жирақ йәрләрдики вәз ишини қоллаш, пак ибадәткә беғишланған җайларни селиш вә асрап күтүш, тәбиий апәтләр яки башқа вақиәләр сәвәплик қийинчилиқ тартиватқанларға яр-йөләк болушқа ишлитилиду. Шуниң билән, өз җамаитимизниң хираҗәтлири үчүнму ианә пул чиқиралаймиз вә өзүмиз билидиған ярдәмгә муһтаҗ адәмләргә ярдәм қолини суналаймиз (Пәнд н. 19:17). Шундақ йоллар билән Мәсиһниң қериндашлирини қоллап-қувәтләләймиз.
14. Әфәсликләргә 4:15, 16дин көргинимиздәк, Әйса билән дост болушниң төртинчи усули қандақ?
14 4) Йәһва Худаниң тәшкилатидики орунлаштурушни қоллаң. Бизгә ғәмхорлуқ қилишқа тәйинләнгән бурадәрләр билән һәмкарлишиш арқилиқ биз җамаәтниң беши Әйса билән достлуқ мунасивитимизни мустәһкәмләймиз (Әфәсликләргә 4:15, 16ни оқуң). Мәсилән, биз Ибадәт өйлириниң һәммисидин толуқ пайдилиниш үчүн һәрикәт қилимиз. Шуниң үчүн бәзи җамаәтләр бирләштүрүлүп, җамаәтләрниң вәз қилиш райони яки территорияси өзгәртилгән. Буниң арқилиқ тәшкилатимиз ихтиярий ианиләрниң көпинчисини теҗәп қалалайду. Лекин бу өзгиришләр түпәйлидин бәзи қериндашларға йеңи вәзийәткә көнүшкә тоғра кәлди. Бу садиқ етиқатдашлар нурғун жиллар бир җамаәттә хизмәт қилип, бир-бирини бәк яхши көрүп қалғанду. Әнди улар башқа җамаәткә йөткилиши керәк. Әйса Мәсиһ садиқ шагиртлириниң бу орунлаштурушни қоллиғанлиғини көргәндә, бәк хошал болиду!
ӘЙСА БИЛӘН БОЛҒАН ДОСТЛУҒИМИЗ МӘҢГҮ
15. Келәчәктә Әйса билән болған достлуғимиз қандақ мустәһкәмлиниду?
15 Муқәддәс роһ билән майланғанлар асманда Әйса билән мәңгү биллә болушқа вә униң билән Худа Падишалиғиниң мирасхорлири болушқа үмүти бар. Улар әмәлийәттә Әйса билән биргә болиду, уни өз көзи билән көриду, униң билән сөзлишиду вә биллә вақит өткүзиду (Йоһ. 14:2, 3). Йәрдә яшаш үмүти барларму Әйсаниң меһир-муһәббити вә мол бәрикәтлиригә еришиду. Гәрчә улар Әйсани көрмисиму, униң билән зич мунасивәттә болуп, Йәһва Худа вә Әйса Мәсиһ мүмкинчилик яритип бәргән һаятлиқтин һузурлиниду (Йәшая 9:6, 7).
16. Әйса билән дост болсақ, қандақ бәрикәтләргә еришимиз?
16 Әйсаниң тәкливини қобул қилип, униң билән дост болсақ, нурғун бәрикәтләргә еришимиз. Мәсилән, һазирниң өзидә униң меһир-муһәббити вә қоллап-қувәтлишигә егә болимиз. Биздә мәңгү яшаш үмүти бар. Әң муһими, Әйса билән дост болуш дуниядики әң әҗайип достлуққа йол ачиду: биз униң Атиси Йәһва Худа билән йеқин мунасивәттә болалаймиз. Әйсаниң дости дәп атилиш биз үчүн немә дегән чоң шан-шәрәп-һә!
25-НАХША Һәқиқий шагирт болушниң бәлгүси
a Әлчиләр бирнәччә жил Әйса билән арилишип, униң билән биллә әмгәк қилған вә шу сәвәптин улар дост болуп кәткән. Әйса бизниңму униң достлири болушимизни халайду, амма биз дуч кәлмигән қийинчилиқларға дуч келимиз. Бу мақалидә шу қийинчилиқлар тоғрилиқ мулаһизә қилиниду вә Әйса билән йеқин дост болуш үчүн мәслиһәтләр берилиду.
b СҮРӘТЛӘРДӘ: 1) Аиләвий ибадәттә Әйсаниң һаяти вә хизмити тоғрилиқ үгәнсәк болиду. 2) Җамаәттики қериндашлар билән яхши мунасивәттә болуш үчүн бар күчимизни селишимиз керәк. 3) Вәз хизмитигә бар күчимизни чиқирип қатнишиш арқилиқ майланған қериндашларни қоллаймиз. 4) Җамаәтләр бирләштүрүлгәндә, биз ақсақалларниң қарарини қоллаймиз.
