THERO I GUDWAHO 17
“Ni Khonani Dzanga”
“Ni khonani dzanga, ngauri ndo ni vhudza zwoṱhe zwe nda zwi pfa kha Khotsi anga.”—YOH. 15:15.
LUIMBO 13 Kristo, Tsumbo Yashu
MANWELEDZO *
1. Ni tea u ita mini arali ni tshi ṱoḓa u vha khonani ya muṅwe muthu?
KANZHI tshithu tsha u thoma tshine na tea u tshi ita musi ni tshi ṱoḓa u vha khonani ya muthu, ndi u fhedza tshifhinga tshinzhi nae. U amba zwine na khou humbula na u somolelana zwa haṋwani zwi ita uri ni vhe madele mapfani. Fhedzi u vha khonani ya Yesu a zwo ngo leluwa nga yeneyo nḓila. Ndi ngani ri tshi ralo?
2. Ndi tshifhio tshithu tsha u thoma tshine tsha ita uri zwi si leluwe u vha khonani ya Yesu?
2 Tshithu tsha u thoma tshine tsha ita uri zwi si leluwe u vha khonani ya Yesu ndi uri a ri athu u vhuya ra mu vhona. Na Vhakriste vhanzhi vha tshifhingani tsha kale vho vha na yeneyo thaidzo. Fhedzi muapostola Petro o ri: “Ni a mu funa naho ni sa athu u mu vhona. Naho zwino ni sa mu vhoni, fhedzi ni a tenda khae.” (1 Pet. 1:8) Zwenezwi zwi amba uri zwi a konadzea u vha khonani dza Yesu naho ri sa athu u vhuya ra mu vhona.
3. Ndi tshifhio tshithu tsha vhuvhili tshine tsha ita uri zwi si leluwe u vha khonani ya Yesu?
3 Tshithu tsha vhuvhili tshine tsha ita uri zwi si leluwe u vha khonani dza Yesu ndi uri a ri koni u amba nae. Musi ri tshi rabela ri amba na Yehova. Naho ri tshi rabela nga dzina ḽa Yesu, a ri rabeli khae. Nahone Yesu ha ṱoḓi ri tshi rabela khae na luthihi. Ndi ngani? Ndi ngauri muthu ane ra rabela khae, ri vha ri tshi khou mu gwadamela nahone ri tea u gwadamela Yehova fhedzi. (Mat. 4:10) Fhedzi ri nga kona u sumbedza uri ri funa Yesu.
4. Ndi tshifhio tshithu tsha vhuraru tshine tsha ita uri zwi si leluwe u vha khonani ya Yesu nahone ri ḓo haseledza mini kha ino thero?
4 Tshithu tsha vhuraru tshine tsha ita uri zwi si leluwe u vha khonani ya Yesu ndi uri u dzula ṱaḓulu. Zwenezwi zwi ita uri zwi sa konadzee u fhedza tshifhinga nae. Fhedzi ri nga kona u guda zwinzhi nga hae naho ri si nae kha ḽifhasi. Ri ḓo amba nga ha zwithu zwiṋa zwine zwa ḓo ri thusa u khwaṱhisa vhukonani hashu nae. Kha ri thome nga u haseledza uri ndi ngani zwi zwa ndeme u vha khonani ya tsini ya Yesu.
NDI NGANI NI TSHI TEA U VHA KHONANI YA YESU?
5. Ndi ngani ri tshi tea u vha khonani dza Yesu? (Sedzani mabogisi “ U Vha Khonani Dza Yesu Zwi Ita Uri Ri Vhe Khonani Dza Yehova” na “ Ivhani Na Mavhonele O Teaho Nga Ha Yesu.”)
5 Ndi zwa ndeme u vha khonani dza Yesu arali ri tshi ṱoḓa u vha na vhushaka havhuḓi na Yehova. Ndi ngani ri tshi ralo? Kha ri ambe nga ha zwiitisi zwivhili fhedzi. Tsha u thoma, Yesu o vhudza vhafunziwa vhawe a ri: “Khotsi u a ni funa, ngauri no vha ni tshi mpfuna.” (Yoh. 16:27) O dovha a ri: “A hu na ane a ḓa kha Khotsi a songo fhira kha nṋe.” (Yoh. 14:6) U lingedza u vha na vhushaka na Yehova ngeno ri si khonani dza Yesu, zwi fana na u lingedza u dzhena nḓuni ri sa khou shumisa muṋango. Yesu o shumisa tshifanyiso tshi fanaho musi a tshi amba uri ndi ene “muṋango wa nngu.” (Yoh. 10:7) Tsha vhuvhili ndi uri Yesu o kona u sumbedza tshoṱhe nḓila ine Khotsi awe a vha ngayo. O amba na vhafunziwa vhawe a ri: “A vhonaho nṋe o vhona Khotsi.” (Yoh. 14:9) Nga zwenezwo, arali ri tshi ṱoḓa u ḓivha Yehova khwine, ndi zwa ndeme u guda nga ha Yesu. Musi ri tshi guda nga ha Yesu, ri ḓo mu funa nga ho engedzeaho. Musi ri tshi ṋaṋa u funa Yesu, ri ḓo ṋaṋa u funa na Yehova.
6. Ndi tshifhio tshiṅwe tshiitisi tsha uri ri vhe khonani ya Yesu? Ṱalutshedzani.
6 Ri tea u vha khonani dza Yesu arali ri tshi ṱoḓa thabelo dzashu dzi tshi fhindulwa. Zwenezwi zwi amba uri ri tea u ita zwi fhiraho u sokou amba uri “nga dzina ḽa Yesu” mafheleloni a thabelo. Ri tea u pfesesa uri Yehova u shumisa hani Yesu u itela u fhindula thabelo dzashu. Yesu o vhudza vhaapostola vhawe a ri: “Zwoṱhe zwine na zwi humbela nga dzina ḽanga, ndi ḓo zwi ita.” (Yoh. 14:13) Naho Yehova e ene ane a pfa na u fhindula thabelo dzashu, u dzi fhindula a tshi shumisa Yesu. (Mat. 28:18) Musi Yehova a sa athu u fhindula thabelo dzashu, u thoma a vhona arali ro ita zwe Yesu a ri ri zwi ite. Sa tsumbo, Yesu o ri: “Arali ni tshi hangwela vhathu zwe vha tshinya, na Khotsi aṋu wa ṱaḓulu u ḓo ni hangwela; arali ni sa hangweli vhathu zwe vha tshinya, na Khotsi aṋu wa ṱaḓulu ha nga ni hangweli.” (Mat. 6:14, 15) Hezwi zwi sumbedza uri ndi zwa ndeme u fara vhaṅwe nga nḓila ine Yehova na Yesu vha vha fara ngayo.
7. Ndi vhonnyi vhane vha vhuyelwa nga tshiṱhavhelo tsha Yesu?
7 Vhane vha vha khonani dza Yesu dza tsini-tsini ndi vhone fhedzi vhane vha ḓo vhuyelwa nga tshiṱhavhelo tshawe. Ri zwi divha hani? Yesu o amba uri u ḓo “fela khonani dzawe.” (Yoh. 15:13) Vhathu vha fhulufhedzeaho vhe vha tshila tshifhingani tsha musi Yesu a sa athu u ḓa kha ḽifhasi vha ḓo tea u guda nga hae, zwa vha thusa uri vha mu fune. Musi vhenevha vhathu vha ngaho sa Abrahamu, Sara, Mushe na Rahaba vha tshi vuswa, vha ḓo tea u vha khonani dza Yesu u itela uri vha wane vhutshilo vhu sa fheli.—Yoh. 17:3; Mish. 24:15; Vhahev. 11:8-12, 24-26, 31.
8-9. Samusi zwo ambiwa kha Yohane 15:4, 5, u vha khonani ya Yesu zwi ita uri ri ite mini nahone ndi ngani zwi zwa ndeme?
8 Zwi a ri takadza u shuma na Yesu ri tshi khou huwelela na u funza mafhungo maḓifha. Yesu o vha a tshi funza musi e kha ḽifhasi. Nahone u bva tshee a humela ṱaḓulu, u bvela phanḓa a tshi khou livhisa nḓila ine ra huwelela na u funza ngayo samusi e ṱhoho ya tshivhidzo. U a vhona na u dzhiela nṱha zwine na zwi ita u itela u thusa vhathu vhanzhi nga hune zwa nga konadzea ngaho uri vha mu ḓivhe na u ḓivha na Khotsi awe. Ri nga si kone u ita wonoyu mushumo ri sa khou thusa nga Yehova na Yesu.—Vhalani Yohane 15:4, 5.
9 Ipfi ḽa Mudzimu ḽi amba uri u itela u takadza Yehova, ri tea u dzula ri tshi funa Yesu. Kha ri ambe nga ha zwithu zwiṋa zwine ra nga zwi ita uri ri vhe khonani dza Yesu.
NḒILA YA U VHA KHONANI YA YESU
Ni nga vha khonani ya Yesu nga u (1) guda nga hae, (2) u humbula na u ita zwithu u fana nae, (3) u tikedza vharathu vhawe na nga (4) u tikedza nzudzanyo dzine ndangulo ya Yehova ya dzi ita (Sedzani dziphara 10-14) *
10. Ndi tshifhio tshithu tsha u thoma tshine na tea u tshi ita u itela u vha khonani ya Yesu?
10 (1) Gudani nga ha Yesu. U vhala Mateo, Marko, Luka na Yohane zwi nga ni thusa u guda nga hae. Musi ri tshi elekanya nga ha bugu dzine dza amba nga ha vhutshilo ha Yesu, ri ḓo thoma u mu funa na u mu ṱhonifha nga nṱhani ha uri o vha a tshi fara vhathu zwavhuḓi. Sa tsumbo, ho ngo fara vhafunziwa vhawe sa phuli naho o vha e Muṋe wavho. Fhedzi o vha vhudza zwe a vha a tshi khou humbula na nḓila ye a vha a tshi khou ḓipfa ngayo. (Yoh. 15:15) Musi vho ṱungufhala, Yesu o ṱungufhala na u lila navho. (Yoh. 11:32-36) Na maswina awe o zwi vhona uri vhathu vhe vha ṱanganedza mulaedza we a u huwelela, vho fheleledza vho vha khonani dzawe. (Mat. 11:19) Musi ri tshi edzisa nḓila ye Yesu a fara ngayo vhafunziwa vhawe, ri ḓo vha na vhushaka havhuḓi na vhaṅwe, ra takala na u fushea nahone ra dzhiela nṱha zwe a ri itela zwone.
11. Ndi tshifhio tshithu tsha vhuvhili tshine na tea u tshi ita u itela u vha khonani ya Yesu nahone ndi ngani tshi tsha ndeme?
11 (2) Humbulani na u ita zwithu u fana na Yesu. Ri nga vha na vhushaka ha tsini na Yesu nga u mu ḓivha khwine na u humbula u fana nae. (1 Vhakor. 2:16) Ri nga edzisa hani Yesu? Humbulani nga tsumbo i tevhelaho: Yesu o vha a tshi humbulela vhaṅwe u fhira ene muṋe. (Mat. 20:28; Vharoma 15:1-3) Ngauri o vha a tshi humbula nga yeneyo nḓila, o vha a sa ḓiṱoḓeli zwawe nahone a tshi hangwela. Musi vhathu vha tshi amba zwithu zwi si zwavhuḓi nga hae, o vha a sa ṱavhanyi u sinyuwa. (Yoh. 1:46, 47) O vha a sa tendi vhukhakhi he muthu a vhu ita kale vhu tshi ṱuṱuwedza nḓila ine a mu dzhia ngayo. (1 Tim. 1:12-14) Yesu o ri: “Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” (Yoh. 13:35) Ḓivhudziseni uri: “Naa ndi khou ita zwoṱhe zwine nda nga kona u itela u vha na mulalo na vhahashu u fana na Yesu?”
12. Ndi tshifhio tshithu tsha vhuraru tshine na tea u tshi ita u itela u vha khonani ya Yesu nahone ni nga tshi ita hani?
12 (3) Tikedzani vharathu vha Kristo. Yesu u dzhia zwine ra zwi itela vharathu vhawe zwi tshi nga ri khou zwi itela ene. (Mat. 25:34-40) Nḓila ya ndeme ya u tikedza vharathu vha Yesu ndi u ita zwoṱhe zwine ra nga kona u itela u huwelela na u ita vhafunziwa samusi Yesu o ri laedza u ita nga u ralo. (Mat. 28:19, 20; Mish. 10:42) Vharathu vha Yesu vha nga si kone u ita wonoyu mushumo une wa khou itwa shangoni ḽoṱhe arali vha songo thuswa nga vha “dziṅwe nngu.” (Yoh. 10:16) Arali ni muṅwe wa vha dziṅwe nngu, musi ni tshi ya u huwelela ni vha ni tshi khou sumbedza uri ni funa Yesu na vharathu vhawe.
13. Ri nga shumisa hani nyeletshedzo ya Yesu i re kha Luka 16:9?
13 Ri nga dovha ra vha khonani dza Yehova na Yesu nga u ṋeela u itela u tikedza mushumo une vha khou livhisa. (Vhalani Luka 16:9.) Sa tsumbo, ri nga ṋeela u itela u tikedza mushumo une ndangulo ya khou ita u mona na shango ḽoṱhe. Wonoyu mushumo u katela u huwelela fhethu hu re kule, u fhaṱa na u ṱhogomela zwifhaṱo zwa ndangulo na u thusa vho welwaho nga khombo. Ri nga dovha ra ṋeela u itela u thusa kha zwine zwa ṱoḓea tshivhidzoni kana u thusa vhahashu vha ṱoḓaho thuso. (Mir. 19:17) Musi ri tshi ita zwenezwi, ri vha ri tshi khou tikedza vharathu vha Kristo.
14. U ya nga Vhaefesa 4:15, 16, ndi tshifhio tshithu tsha vhuṋa tshine na tea u tshi ita u itela u vha khonani ya Yesu?
14 (4) Tikedzani nzudzanyo dzine ndangulo ya Yehova ya dzi ita. U shumisana na vhe vha vheiwa uri vha ri ṱhogomele zwi ita uri ri vhe khonani dza tsini dza Yesu. (Vhalani Vhaefesa 4:15, 16.) Sa tsumbo, ri ita vhungoho ha uri Holo dzi shumiswa nga nḓila ine ya ḓo vhulunga masheleni. U itela uri zwenezwi zwi konadzee, ho ṱanganyiswa zwiṅwe zwivhidzo zwa vha tshivhidzo tshithihi, ha engedzwa na tsimu yavho. U ita zwithu nga yeneyi nḓila zwo ita uri ndangulo i vhulunge masheleni e a ṋeelwa. Fhedzi nga nṱhani ha yeneyi tshanduko, vhaṅwe vhahuweleli vho tea u ḓowelana na zwiimo zwiswa. Khamusi vhenevha vhahashu vha fhulufhedzeaho vho vha vhe kha tshivhidzo tshavho lwa miṅwaha minzhi, nahone vho vha vho no ḓowela vhahashu vha henefho. Fhedzi zwino vha khou humbelwa uri vha pfulutshele kha tshiṅwe tshivhidzo. Yesu u a takala vhukuma musi vhenevha vhahashu vha fhulufhedzeaho vha tshi tevhela dzenedzi nzudzanyo.
NI NGA DZULA NI KHONANI YA YESU
15. Vhukonani hashu na Yesu vhu ḓo khwiniswa hani tshifhingani tshi ḓaho?
15 Vhaḓodzwa vha na fhulufhelo ḽa u tshila na Yesu lwa tshoṱhe na u vhusa nae kha Muvhuso wa Mudzimu. Vha ḓo vhona Yesu, vha amba nae na u fhedza tshifhinga nae. (Yoh. 14:2, 3) Vhane vha ḓo tshila tshoṱhe kha ḽifhasi, vha ḓo zwi vhona uri na vhone Yesu u a vha funa nahone u na ndavha navho. Musi vha tshi khou tshila shangoni ḽe vha lugiselwa ḽone nga Yehova na Yesu, vha ḓo vha khonani dza Yesu dza tsini naho vha sa ḓo kona u mu vhona.—Yes. 9:6, 7.
16. U vha khonani ya Yesu zwi ri vhuyedza hani?
16 Musi ri tshi tenda u vha khonani dza Yesu, ri wana phaṱhutshedzo nnzhi. Sa tsumbo, u a ri funa na u ri tikedza zwino. Ri nga tshila tshoṱhe. Tsha ndemesa ndi uri u vha khonani dza Yesu zwi ḓo ita uri ri vhe na vhushaka havhuḓi na Yehova ane a vha Khotsi awe. Ḓanu tou vhona uri ndi ndugelo khulwane lungafhani u vha khonani ya Yesu!
LUIMBO 17 “Ndi A Funa”
^ phar. 5 Vhaapostola vho fhedza tshifhinga vha tshi khou amba na u shuma na Yesu, zwa ita uri vha vhe khonani dza tsini. Yesu u ṱoḓa na riṋe ri tshi vha khonani dzawe, fhedzi riṋe zwi nga si ri lelutshele u fana na vhaapostola. Ino thero i ḓo haseledza uri ndi ngani zwi sa ri lelutsheli na uri ri nga kona hani u vha khonani dza Yesu dza tsini na u dzula ri khonani dzawe.
^ phar. 55 ṰHALUSO YA TSHIFANYISO: (1) Ri nga guda nga ha Yesu kha vhurabeli ha muṱa. (2) Ri nga vha na mulalo na vhahashu tshivhidzoni. (3) Ri nga tikedza vharathu vha Yesu nga u ita zwoṱhe zwine ra nga kona u itela u huwelela. (4) Ri nga shumisana na vhahulwane musi zwivhidzo zwi tshi ṱanganyiswa.
