1. Intte issi urawu waanidi mata lagge gideetii?

ISSI uraara gayttidi mata lagge gidanawu koyro oottana koshshiyaabay issippe wodiyaa aattiyoogaa. Intte intte qofaanne inttena gakkidabaa issoy issuwaara haasayiyo wode lagge gideeta. Gidoppe attin, Yesuusawu mata lagge gidanawu metiyaabati deˈoosona. Hegeetuppe amaridaageeti aybee?

2. Nuna metiya koyrobay aybee?

² Metiya koyrobay nuuni Yesuusaara gaytti erennaagaa. Koyro xeetu layttan deˈida daro Kiristtaaneta hegaa malabay gakkiis. Gidikkokka, kiitettida PHeexiroosi hagaadan giis: “Intte a be7ana xayikkokka, siiqeeta; intte ha77i a be7ana xayikkokka, ammaneeta.” (1 PHe. 1:8, 9) Hegaa gishshawu, Yesuusaara gaytti erana xayikkonne ayyo mata lagge gidana danddayoos.

3. Nuna metiya naaˈˈanttobay aybee?

³ Metiya naaˈˈanttobay nuuni Yesuusaara haasayana danddayennaagaa. Nuuni woossiyo wode, Yihoowa woossoos. Nuuni woosaa Yesuusa sunttan woossoos, shin nuuni A haasayissokko. Yesuusi nuuni baakko woossanaadan koyenna. Aybissi? Woosay goyno gidiyo gishshawu goynnana koshshiyoy Yihoowa xalaalaassa. (Maa. 4:10) Gidikkokka, nuuni Yesuusa siiqiyoogaa qonccissana danddayoos.

4. Metiya heezzanttobay aybee, qassi ha huuphe yohuwan nuuni xannaˈanabay aybee?

 ⁴ Metiya heezzanttobay Yesuusi saluwan deˈiyoogaa; hegaa gishshawu, nuuni aara wodiyaa aattana danddayokko. SHin nuuni Yesuusa matan deˈana xayikkokka, abaa darobaa erana danddayoos. Nuuni aara dabbotaa minttana danddayiyo oyddubata loytti beˈana. Gidikkonne, Kiristtoosawu mata lagge gidiyoogee keehi koshshiyoy aybissakko ane koyro pilggoos.

5. Nuuni Yesuusa lagge gidana bessiyoy aybissee? (“ Nuuni Yesuusa Lagge Gidiyoogee Yihoowaara Dabbotanaadan Oottees” giyaanne “ Yesuusa Bessiyaagaadan Xeellite” giya saaxinetakka xeella.)

⁵ Nuuni Yihoowa dabbo gididi deˈanawu koyikko, Yesuusa lagge gidana bessees. Aybissi? Naaˈˈu gaasuwaa ane qoppoos. Koyroogee, Yesuusi ba erissiyo ashkkaratussi ‘intte tana siiqiyo gishshawu, Aaway ba huuphen inttena siiqees’ giidoogaa. (Yoh. 16:27) I hagaadankka giis: “Ta baggaarappe attin, ooninne ta Aawaakko baanau danddayenna.” (Yoh. 14:6) Yesuusa lagge gidennan, Yihoowaara dabbotanawu baaxetiyoogee issi keettaa penggee baynna sohuwaara gelanawu baaxetiyoogaa mala. Yesuusi bana “dorssatuyyo pengge” giido wode, hegaara issi mala leemisuwaa goˈettiis. (Yoh. 10:7) Naaˈˈanttoogee, Yesuusa eeshshay wottiyoobi baynna ogiyan A Aawaagaa mala gidiyoogaa. I ba erissiyo ashkkaratussi hagaadan giis: “Tana be7ida urai ta Aawaakka be7iis.” (Yoh. 14:9) Hegaa gishshawu, Yesuusa deˈuwaa xannaˈiyoogee Yihoowa eriyo keehi loˈˈo oge. Nuuni Yesuusabaa eriyo wode, A kaseegaappe aaruwan siiqoos. Qassi nuuni Yesuusawu mata lagge gidiyo wode, A Aawaa kaseegaappe aaruwan siiqoos.

6. Nuuni Yesuusaara dabbotana bessiyo hara gaasoy aybee? Qonccissa.

 ⁶ Nu woosay zaaruwaa demmanaadan nuuni Yesuusaara dabbotiyoogee koshshana danddayees. Hegawu “Yesuusa sunttan” woossiyoogaa xallay gidenna. Nu woosaa zaaranawu Yihooway Yesuusa waati goˈettiyaakko nuuni erana bessees. Yesuusi ba erissiyo ashkkarata hagaadan giis: “Ta sunttan intte woossiyo ubbabaa taani intteyyo polana.” (Yoh. 14:13) Nu woosaa siyiyaageenne zaariyaagee Yihoowa gidikkonne, Yihooway ba kuuyidobaa Yesuusi polanaadan maataa immiis. (Maa. 28:18) Hegaa gishshawu, Xoossay nu woosaa zaaranaappe kase, Yesuusi zorido zoriyaa nuuni oosuwan peeshshidaakkonne beˈees. Leemisuwawu, Yesuusi hagaadan giis: “Intte inttena naaqqida hara asaa naaquwaa atto giikko, saluwan de7iya intte Aawaikka intteyyo atto gaana. SHin intte inttena naaqqida hara asaa naaquwaa atto gaana xayikko, intte Aawaikka intte naaquwaa atto geenna.” (Maa. 6:14, 15) Yaatikko, Yihoowaynne Yesuusi nuna oyqqidoogaadan nuunikka harata oyqqiyoogee keehi koshshiyaaba!

7. Yesuusa wozuwaa yarshshuwaappe goˈettiyaageeti oonee?

⁷ Yesuusawu mata lagge gidiyaageetu xallay A wozuwaa yarshshuwaappe goˈettana. Nuuni hegaa waati eriyoo? Yesuusi “ba shemppuwaa ba laggiyaayyo aattidi” immanaagaa yootiis. (Yoh. 15:13) Yesuusi saˈaa yaanaappe kase ammanettiyaageeta gididi deˈida asati abaa tamaarananne A siiqana koshshees. Abrahaama, Saari, Muusenne Raˈaabi mala attuma asatinne macca asati hayquwaappe denddikkonne, Yihoowa ashkkara gidida he asati merinaa deˈuwaa demmanawu Yesuusawu lagge gidana koshshees.—Yoh. 17:3; Oos. 24:15; Ibr. 11:8-12, 24-26, 31.

8-9. Nuuni Yesuusa lagge gidikko ay oottana danddayiyoo, qassi Yohaannisa 15:4, 5n odettidaagaadan, hegee keehi koshshiyoy aybissee?

⁸ Nuuni Kawotettaa mishiraachchuwaa sabbakiyoogaaninne tamaarissiyoogan ufayttiiddi Yesuusaara issippe oottoos. Yesuusi saˈan deˈiyo wode, tamaarissiyaagaa. Qassi Yesuusi saluwaa boosappe doommidi gubaaˈiyawu huuphe gidiyoogaadan, sabbakiyoonne tamaarissiyo oosuwaa kaalettees. Intte intteyyo danddayettida keenan daroti anne A Aawaa eranaadan maaddanawu baaxetiyoogaa I beˈeesinne xoqqu ootti xeellees. Nuuni ha oosuwaa polana danddayiyoy Yihoowaynne Yesuusi maaddiyoogaa xallaana.—Yohaannisa 15:4, 5 nabbaba.

⁹ Nuuni Yihoowa ufayssanawu Yesuusa ubbatoo siiqana bessiyoogaa Xoossaa Qaalay loytti tamaarissees. Yaatiyo gishshawu, Yesuusa lagge gidanawu nuuni oottana danddayiyo oyddubata ane beˈoos.

10. Nuuni Yesuusa lagge gidanawu koyro oottana koshshiyaabay aybee?

¹⁰ (1) Yesuusa loytti erite. Geeshsha Maxaafan Maatiyoosa, Marqqoosa, Luqaasanne Yohaannisa maxaafata nabbabiyoogan nuuni hegaadan erana danddayoos. Yesuusa deˈuwaabaa yootiya Geeshsha Maxaafaa taariketa nuuni wotti dentti qoppiyo wode, Yesuusi asaa kehatettan oyqqido gishshawu nuuni A siiqoosinne bonchchoos. Leemisuwawu, I etawu Goda gidikkonne, ba erissiyo ashkkarata aylledan oyqqibeenna. I ba qoppiyoobaanne bawu siyettiyaabaa etassi yootiis. (Yoh. 15:15) Yesuusi etaara azzaniisinne yeekkiis. (Yoh. 11:32-36) Yesuusi  yootiyoobaa siyidaageeti ayyo lagge gididoogaa A morkketikka akeekidosona. (Maa. 11:19) Nuuni Yesuusi ba erissiyo ashkkarata oyqqido ogiyaa kaalliyo wode, haratuura nu dabbotay kaseegaappe loˈˈo gidees, kaseegaappe aaruwan ufayttoos, qassi A loytti siiqoosinne bonchchoos.

11. Nuuni Yesuusa lagge gidanawu oottana bessiyo naaˈˈanttobay aybee, qassi hegee keehi koshshiyoy aybissee?

¹¹ (2) Yesuusaagaadan qoppitenne oottite. Nuuni A qofaa loytti eriyo wodenne aagaadan qoppiyo wode, awu mata lagge gidoos. (1 Qor. 2:16) Nuuni Yesuusa waani milatana danddayiyoo? Ane issi leemisuwaa qoppite. Yesuusi bana ufayssiyaabaa qoppiyoogaappe aaruwan harata maaddiyoogaa qoppiis. (Maa. 20:28; Roo. 15:1-3) I hegaadan qoppido gishshawu, ba goˈˈaa aggi bayiisinne haratuyyo atto giis. I asay abaa haasayidoban eesuwaara yiillotibeenna. (Yoh. 1:46, 47) Qassi issi uri daro wodeppe kase mooridobaa gishshawu, I abaa iitaban qoppenna. Yesuusi hagaadan giis: “Intte issoi issuwaara siiqettikko, ta erissiyo ashkkarata gidiyoogaa asai ubbai erana.” (Yoh. 13:35) Nena hagaadan oychchiyoogee loˈˈo: “Taani ta ishanttuuranne michchonttuura sarotettan deˈanawu danddayettida ubbabaa oottiyoogan Yesuusa leemisuwaa kaalliyaanaa?”

12. Nuuni Yesuusa lagge gidanawu oottana bessiyo heezzanttobay aybee, qassi hegaa waati oottana danddayiyoo?

¹² (3) Kiristtoosa ishantta maaddite. Yesuusi nuuni tiyettida ba ishanttuyyo oottiyoobaa baayyo oottiyoobadan xeellees. (Maa. 25:34-40) Nuuni tiyettidaageeta maaddiyo waanna ogee Yesuusi bana kaalliyaageeti oottanaadan azazido Kawotettaa mishiraachchuwaa sabbakiyoonne erissiyo ashkkara oottiyo oosuwaa kumetta wozanappe oottiyoogaa. (Maa. 28:19, 20; Oos. 10:42) Kumetta saˈan ha wodiyan oosettiiddi deˈiya sabbakuwaa oosuwaa Kiristtoosa ishantti oottana danddayiyoy eta ‘hara dorssati’ maaddiyoogaa xallaana. (Yoh. 10:16) Neeni hara dorssatuppe issuwaa gidikko, ha oosuwaa oottiyo wode ubban Kiristtoosa ishanttanne Yesuusa siiqiyoogaa bessaasa.

13. Yesuusi Luqaasa 16:9n yootido zoriyaa nuuni waati oosuwan peeshshana danddayiyoo?

¹³ Nuuni Yihoowaynne Yesuusi kaalettiyo oosuwaa maaddanawu miishshaa immiyoogankka eta dabbo gidoos. (Luqaasa 16:9 nabbaba.) Leemisuwawu, haahosan deˈiya heeran mishiraachchuwaa sabbakiyoogaa, tumu goynuwawu keexxiyoogaanne hegaa naagiyoogaa, meretay daafabaa gattin woy haraban qohettidaageeta maaddiyoogaa mala, kumetta saˈan oosettiya oosuwawu miishshaa immana danddayoos. Nuuni nu gubaaˈiyaanne maadoy koshshiyo nuuni eriyoogeetakka miishshan maaddana danddayoos. (Lee. 19:17) Hageeti Kiristtoosa ishantta nuuni maaddana danddayiyo ogeta.

14. Efisoona 4:15, 16 maaran, nuuni Yesuusa lagge gidanawu oottana bessiyo oyddanttobay aybee?

¹⁴ (4) Yihoowa dirijjitee giigissidobaa hashetidi oottite. Nuna heemmanaadan sunttettidaageetuura nuuni hashetidi oottiyo wode, gubaaˈiyawu huuphe gidida Yesuusawu mata lagge gidoos. (Efisoona 4:15, 16 nabbaba.) Leemisuwawu, SHiiquwaa Addaraashata ubbaa loytti goˈettanawu baaxetiiddi deˈoos. Amarida gubaaˈeti hara gubaaˈetuura walahettidoynne, moottatu zaway laamettidoy hegaassa. Hegaadan giigissido gishshawu daro miishshaa qoraphphida. SHin hegaappe denddidaagan, aassiya amaridaageeti ooratta hanotaa meezetana koshshiis. Ha ammanettida aassiyaageeti daro layttawu issi gubaaˈiyan  haggaazido gishshawu, yan deˈiya ishanttuuranne michchonttuura mata lagge gidennan waayi aggana. Gidoppe attin, eti hara gubaaˈiyan haggaazanaadan shoobettidosona. Giigissidobaa ha ammanettida erissiyo ashkkarati hashetidi oottiyoogaa Yesuusi beˈiyo wode keehi ufayttees.

15. Nuuni sinttappe Yesuusawu kaseegaappe aaruwan waani mata lagge gidanee?

¹⁵ Geeshsha ayyanan tiyettidaageetussi Xoossaa Kawotettan Yesuusaara merinawu haariyo hidootay deˈees. Eti A beˈana, aara haasayananne wodiyaa aattana. (Yoh. 14:2, 3) Yesuusi saˈaa hidootay deˈiyoogeetakka siiqiyoogaanne etawu qoppiyoogaa bessana. Eti Yesuusa beˈana xayikkonne, Yihoowaynne Yesuusi etawu giigissido ufayssiya deˈuwaa demmiyo wode, awu mata lagge gidana.—Isi. 9:6, 7.

16. Nuuni Yesuusa lagge gidiyoogee nuna waati maaddii?

¹⁶ Nuuni Yesuusa lagge gidanaadan I shoobbido shoobiyaa ekkiyo wode daro anjjota demmoos. Leemisuwawu, nuuni I nuna siiqiyoogaanne maaddiyoogaa beˈoos. Nuuni merinawu deˈana danddayoos. Ubbaappe aaruwan, Yesuusaara dabbotiyoogee A Aawaa Yihoowaara mino dabbotay deˈanaadan oottees; he dabbotaara laggetiyaabi baawa. Nuuni Yesuusa lagge geetettiyoogee gita maata!