1. Ano an imo ginhihimo basi magin duok mo nga sangkay an usa?

KASAGARAN, an siyahan nga paagi basi magin duok nga sangkay an usa amo an paggahin hin panahon kaupod niya. Samtang nag-iistorya kamo han iyo ginhuhunahuna ngan mga eksperyensya, nagigin magsangkay kamo. Pero may kalabotan ha pagkaada duok nga pakigsangkay kan Jesus, may mga butang nga nakakapakuri ha aton ha pagkaada hito. Ano an pipira hito?

2. Ano an siyahan nga butang nga nakakapakuri ha aton ha pakigsangkay kan Jesus?

² An siyahan, waray naton makita hi Jesus hin personal. Damu nga Kristiano han siyahan nga siglo an waray liwat makakita hin personal kan Jesus. Bisan pa hito, hi apostol Pedro nagsiring: “Bisan kon waray gud niyo hiya makita, hinigugma niyo hiya. Bisan kon diri niyo hiya nakikita yana, pero nagpapakita kamo hin pagtoo ha iya.” (1 Ped. 1:8) Salit posible nga magin duok kita nga sangkay ni Jesus bisan kon diri naton hiya nakikita hin personal.

3. Ano an ikaduha nga butang nga nakakapakuri ha aton ha pakigsangkay kan Jesus?

³ An ikaduha, diri naton nakakaistorya hi Jesus. Kon nag-aampo kita, kan Jehova kita nakikiistorya. Oo, nag-aampo kita ha ngaran ni Jesus, pero diri kita nakikiistorya ha iya. Ngani, diri karuyag ni Jesus nga mag-ampo kita ha iya. Kay ano? Kay an pag-ampo usa nga porma han pagsingba, ngan hi Jehova la an angay singbahon. (Mat. 4:10) Bisan pa hito, mahimo la gihapon naton ipakita an aton gugma kan Jesus.

4. Ano an ikatulo nga butang nga nakakapakuri ha aton ha pakigsangkay kan Jesus, ngan ano an aton hihisgotan hini nga artikulo?

⁴ An ikatulo, hi Jesus naukoy ha langit, salit diri naton hiya literal  nga makakaupod. Pero damu la gihapon an aton mahimo mahibaroan mahitungod kan Jesus bisan kon diri kita hirani ha iya ha pisikal nga paagi. Hisgotan naton an upat nga butang nga aton mahimo buhaton basi maparig-on an aton pakigsangkay ha iya. Pero siyahan, usisahon naton kon kay ano nga importante nga kultibaron naton an duok nga pakigsangkay ha Kristo.

5. Kay ano nga kinahanglan magin sangkay kita ni Jesus? (Kitaa liwat an mga kahon nga “ An Pakigsangkay kan Jesus Nagriresulta hin Pakigsangkay kan Jehova” ngan “ Balanse nga Panhunahuna Mahitungod ha Papel ni Jesus.”)

⁵ Kinahanglan magin sangkay kita ni Jesus kon karuyag naton magkaada maopay nga relasyon kan Jehova. Kay ano? Hunahunaa inin duha nga rason. Siyahan, hi Jesus nagsiring ha iya mga disipulo: “Pinalangga kamo han Amay mismo, tungod kay pinalangga niyo ako.” (Juan 16:27) Nagsiring liwat hiya: “Waray bisan hin-o nga nakakakadto ha Amay kon diri pinaagi ha akon.” (Juan 14:6) An pangalimbasog nga magin sangkay ni Jehova nga diri nagkukultibar hin duok nga pakigsangkay kan Jesus puropariho ha pagsulod ha usa nga bilding nga diri naagi ha purtahan. Hi Jesus naggamit hin puropariho nga ilustrasyon han ginhulagway niya an iya kalugaringon sugad nga “purtahan para ha mga karnero.” (Juan 10:7) An ikaduha nga rason, perpekto nga ginsubad ni Jesus an mga kalidad han iya Amay. Nagsiring hiya ha iya mga disipulo: “An bisan hin-o nga nakakita ha akon nakakita liwat ha Amay.” (Juan 14:9) Salit an usa nga importante nga paagi nga makikilala naton hi Jehova amo an paghibaro mahitungod han kinabuhi ni Jesus. Samtang mas nahibabaro kita mahitungod kan Jesus, mas hihigugmaon naton hiya. Ngan samtang nagririg-on an  aton pakigsangkay kan Jesus, mas maghihilarom an aton gugma ha iya Amay.

6. Ano an usa pa nga rason kon kay ano nga kinahanglan magin sangkay kita ni Jesus? Isaysay.

⁶ Kinahanglan magin sangkay kita ni Jesus basi batunon an aton mga pag-ampo. Nagpapasabot ini nga labaw pa an kinahanglan naton buhaton kay ha pagyakan la han mga pulong nga “ha ngaran ni Jesus” ha aton mga pag-ampo sugad nga pormalidad. Kinahanglan naton masabtan kon ha ano nga paagi ginagamit ni Jehova hi Jesus ha pagbaton han aton mga pag-ampo. Hi Jesus nagsiring ha mga apostol: “Anoman an aroon niyo ha akon ngaran, ihahatag ko ito.” (Juan 14:13) Bisan kon hi Jehova an namamati ngan nabaton han aton mga pag-ampo, gintagan niya hi Jesus hin awtoridad ha pagtuman han Iya mga desisyon. (Mat. 28:18) Salit, antes batunon han Dios an aton mga pag-ampo, ginkikita niya kon gin-aaplikar ba naton an sagdon ni Jesus. Pananglitan, hi Jesus nagsiring: “Kon pasayloon niyo an mga tawo han ira mga sayop, papasayloon liwat kamo han iyo Amay ha langit; pero kon diri niyo pasayloon an mga tawo han ira mga sayop, diri liwat papasayloon han iyo Amay an iyo mga sayop.” (Mat. 6:14, 15) Salit importante gud nga trataron naton hin buotan an iba pariho han pagtratar ha aton ni Jehova ngan ni Jesus!

7. Hin-o an makakabenepisyo han halad-lukat ni Jesus?

⁷ An duok la nga kasangkayan ni Jesus an makakabenepisyo han iya halad-lukat. Paonan-o kita nahibaro? Hi Jesus nagsiring nga ‘ihahatag niya an iya kinabuhi para ha iya kasangkayan.’ (Juan 15:13) An magtinumanon nga tawo nga nabuhi antes kumanhi hi Jesus ha tuna kinahanglan mahibaro mahitungod ha iya ngan higugmaon hiya. An mga kalalakin-an ngan kababayin-an sugad kanda Abraham, Sarah, Moises, ngan Rahab babanhawon, pero bisan inin magtadong nga surugoon ni Jehova kinahanglan magkultibar hin pakigsangkay kan Jesus basi mabuhi ha waray kataposan.​—Juan 17:3; Buh. 24:15; Heb. 11:8-12, 24-26, 31.

8-9. Sugad han iginsasaysay han Juan 15:4, 5, ano an aton mahihimo kon sangkay kita ni Jesus, ngan kay ano nga importante ito?

⁸ Nalilipay kita nga magbuhat kaupod ni Jesus ha pagsangyaw ngan pagtutdo han maopay nga sumat han Ginhadian. Han nakanhi hi Jesus ha tuna, magturutdo hiya. Ngan pagbalik niya ha langit, padayon nga ginigiyahan ni Jesus, sugad nga ulo han kongregasyon, an pagsangyaw ngan pagtutdo nga buruhaton. Nakikita ngan gin-aapresyar niya an imo mga pangalimbasog ha pagbulig ha mas damu nga tawo tubtob ha imo mahihimo nga makilala hiya ngan an iya Amay. Ngani, matutuman naton ini nga buruhaton pinaagi la ha bulig ni Jehova ngan ni Jesus.​—Basaha an Juan 15:4, 5.

⁹ Klaro nga igintututdo han Pulong han Dios nga kinahanglan naton magkaada gugma kan Jesus ngan tipigan ito basi mapalipay hi Jehova. Salit hisgotan naton an upat nga aton mahihimo basi magin sangkay kita ni Jesus.

10. Ano an siyahan nga kinahanglan naton buhaton basi magin sangkay kita ni Jesus?

¹⁰ (1) Kilalaha hi Jesus. Mahihimo naton ini pinaagi ha pagbasa han mga libro han Biblia nga Mateo, Marcos, Lucas, ngan Juan. Samtang ginpapamalandong naton an rekord han Biblia mahitungod han kinabuhi ni Jesus, nagkakaada kita gugma ngan respeto kan Jesus tungod han iya pagin buotan ha mga tawo. Pananglitan, bisan kon hiya an ira Agaron, waray niya tratara an iya mga disipulo sugad hin uripon. Lugod, iya iginsumat ha ira an iya mga ginhuhunahuna ngan inaabat. (Juan 15:15) Han nasubo hira, nasubo liwat hi Jesus ngan nagtangis kaupod nira. (Juan 11:32-36) Nakita bisan han mga parakontra nga nagigin sangkay  hiya hadton mga nakarawat han iya mensahe. (Mat. 11:19) Kon ginsusubad naton an paagi han pagtratar ni Jesus ha iya mga disipulo, nagigin mas maopay an aton relasyon ha iba, nagigin mas kontento ngan malipayon kita, ngan mas nagdudugang an aton apresasyon ha iya.

11. Ano an ikaduha nga kinahanglan naton buhaton basi magin sangkay kita ni Jesus, ngan kay ano nga importante ito?

¹¹ (2) Subara an paagi han paghunahuna ngan paggios ni Jesus. Kon maaram gud kita han paagi han iya paghunahuna ngan ginsusubad ito, mas magigin duok naton hiya nga sangkay. (1 Cor. 2:16) Paonan-o naton masusubad hi Jesus? Hunahunaa an usa nga ehemplo. Mas ginhunahuna ni Jesus an pagbulig ha iba kay ha pagpalipay ha iya kalugaringon. (Mat. 20:28; Roma 15:1-3) Tungod kay ito an iya panhunahuna, andam hiya magsakripisyo ngan mapinasayloon hiya. Diri hiya madali masina ha mga ginsisiring han mga tawo parte ha iya. (Juan 1:46, 47) Ngan waray niya tuguti an maiha na nga mga sayop han mga tawo nga makaimpluwensya ha iya pagtratar ha ira. (1 Tim. 1:12-14) Hi Jesus nagsiring: “An ngatanan mahibabaro nga mga disipulo ko kamo​—kon nahigugma kamo ha usa kag usa.” (Juan 13:35) Maopay nga pakianhan an imo kalugaringon, “Ginsusunod ko ba an susbaranan ni Jesus pinaagi ha pagbuhat han ngatanan ko nga mahihimo basi matipigan an akon murayaw nga relasyon ha kabugtoan?”

12. Ano an ikatulo nga kinahanglan naton buhaton basi magin sangkay kita ni Jesus, ngan paonan-o naton ito mahihimo?

¹² (3) Suportari an kabugtoan han Kristo. Para kan Jesus, an aton mga ginbubuhat para ha iya dinihogan nga kabugtoan sugad hin ginbubuhat naton ha iya. (Mat. 25:34-40) An nangunguna nga paagi nga ginsusuportaran naton an mga dinihogan amo an bug-os nga pakigbahin ha pagsangyaw han Ginhadian ngan panhimo hin disipulo nga buruhaton nga iginsugo ni Jesus ha iya mga sumurunod. (Mat. 28:19, 20; Buh. 10:42) Matutuman la han kabugtoan han Kristo inin bug-os-kalibotan nga pagsangyaw nga ginbubuhat yana pinaagi la ha bulig han “iba nga mga karnero.” (Juan 10:16) Kon kaapi ka ha iba nga mga karnero, ha kada panahon nga nakikigbahin ka hini nga buruhaton, iginpapakita mo an imo gugma ha mga dinihogan ngan kan Jesus mismo.

13. Paonan-o naton maiaaplikar an sagdon ni Jesus ha Lucas 16:9?

¹³ Nakikigsangkay liwat kita kan Jehova ngan kan Jesus pinaagi ha paghatag hin pinansyal nga suporta ha buruhaton nga ira iginsusugo. (Basaha an Lucas 16:9.) Pananglitan, mahimo kita magdonar para ha bug-os-kalibotan nga buruhaton, ngan ini nga mga donasyon ginagamit ha mga buruhaton sugad han pagsangyaw han maopay nga sumat ha higrayo nga lugar, pagtukod ngan pagmintinar han mga pasilidad para ha tinuod nga pagsingba, ngan paghatag hin materyal nga bulig ha mga biktima hin kalamidad o trahedya. Mahimo liwat naton suportaran ha pinansyal an aton mismo kongregasyon ngan buligan adton mga nahibaroan naton nga nanginginahanglan. (Prob. 19:17) Mga paagi ini nga masusuportaran naton an kabugtoan han Kristo.

14. Sugad han iginpapakita ha Efeso 4:15, 16, ano an ikaupat nga kinahanglan naton buhaton basi magin sangkay kita ni Jesus?

¹⁴ (4) Suportari an mga kahikayan han Kristiano nga kongregasyon. Nagigin mas duok kita nga sangkay ni Jesus sugad nga ulo han kongregasyon kon nakooperar kita ha mga ginpili nga mag-ataman ha aton. (Basaha an Efeso 4:15, 16.) Pananglitan, nangangalimbasog kita yana nga magamit ha pinakamaopay nga paagi an ngatanan nga Kingdom Hall. Basi mahimo ini, may mga kongregasyon nga gintampo ha iba nga mga kongregasyon ngan ginbag-o an mga tubtoban han mga teritoryo. Tungod hini  nga kahikayan, daku an natipid han organisasyon ni Jehova. Kondi tungod liwat hini, an pipira nga magwarali kinahanglan magpahiuyon ha bag-o nga mga kahimtang. Iton matinumanon nga mga magwarali bangin damu ka tuig na nga nag-aalagad ha usa nga partikular nga kongregasyon ngan bangin nagin duok na hira ha kabugtoan didto. Pero yana ginhangyo hira nga mag-alagad ha iba nga kongregasyon. Sigurado nga nalilipay hi Jesus nga makita inin maunungon nga mga disipulo nga nakooperar hini nga kahikayan!

15. Paonan-o magririg-on an aton pakigsangkay kan Jesus ha maabot nga panahon?

¹⁵ An mga dinihogan han baraan nga espiritu may paglaom nga makaupod hi Jesus ha kadayonan, magmamando hira kaupod niya ha Ginhadian han Dios. Aktuwal nga makikita, makakaistorya, ngan makakaupod nira an Kristo. (Juan 14:2, 3) Adton may tunan-on nga paglaom makakakarawat liwat han gugma ngan atensyon ni Jesus. Bisan kon diri nira makikita hi Jesus, an ira pakigsangkay ha iya mas magririg-on pa gud samtang nagpapahimulos hira han kinabuhi nga ginhimo nga posible ni Jehova ngan ni Jesus para ha ira.​—Isa. 9:6, 7.

16. Ano nga mga bendisyon an aton nakakarawat tungod han aton pakigsangkay kan Jesus?

¹⁶ Kon gin-aakseptar naton an imbitasyon ni Jesus nga magin iya sangkay, nakakakarawat kita hin damu nga bendisyon. Pananglitan, nakakabenepisyo kita yana tikang ha iya gugma ngan suporta. May oportunidad kita nga mabuhi ha waray kataposan. Ngan an pinakaimportante, an aton pakigsangkay kan Jesus magriresulta ha pagkaada naton han pinakamaopay gud nga bahandi​—an duok ngan personal nga relasyon ha Amay ni Jesus nga hi Jehova. Daku gud nga pribilehiyo naton nga tawagon nga kasangkayan ni Jesus!