1. Akory mety hahavy olo aroe hanjary kamarady mare?

MATETIKY, manjary kamarady mare olo izikoa miaraka matetiky ndreky mifampikoran̈a. Iro samby mivolan̈a raha an̈aty jerindro ndreky fondro, ke mahaitsy fankafoe fo iro. Tsy voatery handeha ho azy karaha zen̈y ndraiky mikamarady amy Jesosy. Asa nan̈ino?

2. Ino problemo voanalohany tsy mampamora mikamarady amy Jesosy?

² Problemo voanalohany, atsika tsiary nahita Jesosy, karaha ankamarozandro Kristianin̈y tamy taonjato voanalohany tan̈y fo. Fa karaha ty nambarany apostoly Petera: “Ndray tsendriky hitanaro izy, anaro efa tia izy. Tsy zen̈y fo, fa ndray tsy hitanaro koa izy amy zioty, anaro mino izy.” (1 Pet. 1:8) Hitantsika baka amy zen̈y fa nata atsika tsiary nahita Jesosy, atsika mety hanjary kamaradiny fo.

3. Ino problemo faharoe?

³ Problemo faharoe ndraiky atsika tsy afaka mikoran̈a amy Jesosy. Lera atsika mivavaka, atsika mikoran̈a amy Jehovah, fa tsy amy Jesosy. Marin̈y ndraiky fa atsika koa fa mivavaka, ataontsika aminy an̈arany Jesosy, kanefa zen̈y tsy mivolan̈a fa atsika mikoran̈a aminany. Salakady atsika tsy tiany Jesosy hivavaka aminany foeky! Ino antony? Fotony vavaka io an̈isany fanompoan̈a Jehovah, ke Jehovah zaraiky fo tokony tompoentsika. (Mat. 4:10) Izikoa zen̈y basy, akory han̈aboahantsika fa atsika tia Jesosy?

4. Ino problemo fahatelo, baka io ino raha hidinihintsika ato?

 ⁴ Problemo fahatelo: Jesosy andan̈itry an̈y. Tsy afaka miaraka aminany atsika, fotony atsika ambony tany atỳ. Fa atsika ndraiky afaka mianatra raha maro momba izy. Hidinihintsika ato raha efatra han̈ampy atsika hanjary kamaradiny Jesosy mare. Fa alô zahavantsika antsendriky nan̈ino atsika ten̈a mila manjary kamaradiny Kristy mare.

5. Nan̈ino ma atsika tsy maintsy minaman̈a amy Jesosy? (Zahava “ Hanjary Kamaradiny Jehovah Atsika Izikoa Minaman̈a amy Jesosy” ndreky “ Aminany edy Fitiavanao Jesosy?”)

⁵ Tsy maintsy minaman̈a amy Jesosy atsika izikoa tiho tsara fihavanan̈a amy Jehovah. Nan̈ino? Fotony voanalohany, karaha ty ho Jesosy tamy pianatranany: ‘Tiany Baba andan̈itry an̈y mare anaro, fotony anaro efa tia zaho.’ (Jaona 16:27) Ho izy koa: “Tsisy olo mahavita man̈aton̈o Baba andan̈itry an̈y, izikoa tsy mandalo aminaka.” (Jaona 14:6) Anao tsy mety ho tafiditry amy tran̈o araiky izikoa tsy mandalo amy varavaran̈a. Karaha zen̈y koa, tsy mety hanjary kamaradiny Jehovah anao izikoa tsy minaman̈a amy Jesosy antsendriky. Jesosy varavaran̈a hahafahantsika mihavan̈a amy Zan̈ahary. Zen̈y nahavy izy nivolan̈a: “Zaho varavaran̈a hidirany ondrikondriky.” (Jaona 10:7) Faharoe, Jesosy ten̈a nahavita nangala tahaka toetriny Babany. Ho izy tamy pianatranany: “Lan̈iany olo nahita zaho nahita Baba koa.” (Jaona 14:9) Izikoa tiantsika hahay tsarabe Jehovah, atsika mila mianatra momba fiain̈anany Jesosy. Hahaiho tia Jesosy fo atsika izikoa atsika man̈ano zen̈y. Ke arakaraka ny itiavantsika izy hahavy fitiavantsika Jehovah hitombo fo.

6. Ino koa antony mahavy atsika tsy maintsy minaman̈a amy Jesosy? Hazavà.

 ⁶ Tsy maintsy minaman̈a amy Jesosy koa atsika, izikoa tihahazo valimbavaka. Mahazatra atsika mivolan̈a “aminy an̈arany Jesosy” koa fa mivavaka, fa zen̈y tsy ampy. Tsy maintsy haintsika akory ataony Jehovah mampiasa Jesosy hamalian̈a vavakantsika. Ho Jesosy tamindro apostoly aby io: “Hataoko aby zay raha angatahinaro aminy an̈arako.” (Jaona 14:13) Jehovah zaraiky fo mitandren̈y ndreky mamaly vavakantsika, fa Jesosy ndraiky irahiny man̈atanteraka zay fanapahankevitry nirahesiny. (Mat. 28:18) Ke alohany Jehovah hamaly vavakantsika, zahavany antsendriky narehantsika va tsy narehantsika torohevitriny Jesosy. Ohatra, Jesosy nivolan̈a: “Anaro koa man̈ambela hadisovan̈anolo, Babanaro andan̈itry an̈y koa han̈ambela hadisovan̈anaro. Fa anaro ndraiky koa tsy man̈ambela hadisovan̈anolo, Babanaro andan̈itry an̈y koa tsy han̈ambela hadisovan̈anaro.” (Mat. 6:14, 15) Dikanizen̈y atsika koa fa mifandray aminolo, tokony ho tsara fan̈ahy mira Jehovah ndreky Jesosy koa!

7. Azovy ma hahazo hatsaran̈a baka amy vidipan̈avotan̈a?

⁷ Olo kamaradiny Jesosy marikitry fo hahazo hatsaran̈a baka amy vidipan̈avotan̈a. Jesosy efa nivolan̈a fa izy “hahatindry ain̈inany han̈avotany namany.” (Jaona 15:13) Talohany Jesosy navy tambony tany teto, efa maro olo tsy nivadiky tamy Jehovah firaka iro naty. Ke lera iro hivilomin̈y an̈y, iro tsy maintsy hianatra raha momba Jesosy ndreky hifen̈y hankatia izy mare. Karaha ataony Abrahama, Saraha, Mosesy, baka io Rahaba. Olo marin̈y iro io, kanefa tsy maintsy hifen̈y hanjary kamaradiny Jesosy fo iro amy zen̈y. Tsy hiain̈y mandrakizay edy iro izikoa tsy man̈ano zen̈y.—Jaona 17:3; Asa. 24:15; Heb. 11:8-12, 24-26, 31.

8-9. Akory han̈aboahantsika fa atsika kamaradiny Jesosy? Nan̈ino raha zen̈y ten̈a raha maventy, izikoa Jaona 15:4, 5 zahan̈a?

⁸ Ravoravo mare atsika miaraka miasa amy Jesosy. Man̈ano zen̈y atsika lera atsika mitory ndreky mampianatra vaovao tsarany Fanjakan̈any Zan̈ahary. Papianatra nahaizanolo izy tambony tany teto. Fa nanjary lohany fiangonan̈a izy, koa fa nimpody andan̈itry. Nanomboko tamy zen̈y izy mbala mitariky asa fitorian̈a ndreky fampianaran̈a io fo ziska iziô. Sady ny marin̈y aminany, tsy ho vitantsika foeky asa io izikoa tsy iô Jehovah ndreky Jesosy. (Vakia Jaona 15:4, 5.) Hay be fa mifen̈y anao man̈ampy olo farany maro hahay momba Jesosy ndreky Babany. Matokisa fa hitany Jesosy ezaka ataonao zen̈y sady ankasitrahiny koa.

⁹ Baiboly mivolan̈a tsarabe fa izikoa atsika tihamparavoravo Jehovah, atsika tsy maintsy tia ndreky mankatia Jesosy fo. Akory hahavy atsika hanjary kamaradiny Jesosy? Ty misy raha efatra mety ataontsika.

10. Ino raha voanalohany mila ataontsika izikoa atsika tiho kamaradiny Jesosy?

¹⁰ 1) Ataova raha hahaizanao Jesosy. Amy karakory? Vakia bokiny Matio, Marka, Lioka, baka io Jaona. Atsika koa fa mamaky ndreky misaintsain̈y tantarany Jesosy amy Baiboly ao, ho hitantsika fa Jesosy io ten̈a tsara fan̈ahy. Fahaizantsika zen̈y han̈ampy atsika ho tia izy ndreky han̈aja izy. Ohatra iziô, iro pianatranany aby io tsy nataony mira andevo, ndray izy Tompondro. Ndray izy aby nikoran̈iny tamindro raha niminimineny ndreky raha tan̈aty fonany! (Jaona 15:15) Nangotsoko  mare fonany koa fa nisy raha navoa iro. Niaraka nitomoan̈y tamindro lastio izy. (Jaona 11:32-36) Ndray iro fahavalonany aby io nan̈eky fa kamaradiny ankitin̈y olo aby nan̈eky hafatra nitoriany in̈y. (Mat. 11:19) Izikoa mira fomba nitondrasany Jesosy iro pianatranany aby io fomba itondrasantsika olo, hanjary ho tsara fihavanan̈a amindro atsika. Tsy zen̈y fo, fa hahaiho sambatra fo koa atsika sady hahaiho tia Kristy mare ndreky han̈aja izy.

11. Ino raha faharoe mila ataontsika izikoa atsika tiho kamaradiny Jesosy? Nan̈ino raha zen̈y ten̈a ilain̈a?

¹¹ 2) Aleva tahaka fomba fisain̈anany Jesosy ndreky raha nataony. Arakaraka ny hahaizantsika tsarabe fomba fisain̈anany Jesosy ndreky hangalantsika tahaka raha nataony hahavy atsika hanjary kamaradinany. (1 Kor. 2:16) Akory han̈anovantsika zen̈y? Ohatra iziô, han̈ampy olo raha ten̈a niritriretiny Jesosy fa tsy han̈ano raha tiatiany ain̈inany. (Mat. 20:28; Rom. 15:1-3) Baka amy zen̈y nahavy izy nahafoe ain̈inany ndreky nan̈ambela hadisovan̈anolo. Izy tsy nora neloko tamy raha nivolan̈inolo momba izy. (Jaona 1:46, 47) Ndray olo araiky nan̈ano hadisovan̈a ela be tan̈y, tsy in̈y ten̈a nahatsiarovany izy. (1 Tim. 1:12-14) Mila mangala tahaka Jesosy atsika, fotony izy nivolan̈a: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.” (Jaona 13:35) Ke tsara atsika mieritreritry karaha ty: “Asa zaho mba mangala tahaka Jesosy, ke mifen̈y mare man̈ano raha hihavanan̈a amy piaramanompo?”

12. Ino raha fahatelo mila ataontsika izikoa atsika tiho kamaradiny Jesosy? Akory han̈anovantsika zen̈y?

¹² 3) Tahitahia iro rahalahiny Kristy aby io. Amy Jesosy, mira man̈ampy izy fo atsika izikoa man̈ampy iro rahalahinany voahosotro aby io. (Mat. 25:34-40) Fomba voanalohany hahafahantsika hitahitahy iro voahosotro aby io, fan̈anovantsika asa fitorian̈a ndreky fampianaran̈a. (Mat. 28:19, 20; Asa. 10:42) Izio asa nan̈irahany zay olo pan̈aradia izy. Atao erantany asa fitorian̈a ke tsy ho vitandro voahosotro aby io raha zen̈y, izikoa tsy iô iro “ondrikondriky hafa” aby io. (Jaona 10:16) An̈isany ondrikondriky hafa ma anao? Izikoa zen̈y, aza adin̈a fa isaka anao man̈ano asa fitorian̈a io, anao tsy vitany han̈aboaka fitiavanao iro voahosotro aby io, fa ho hita koa fitiavanao Jesosy.

13. Akory mety han̈arehantsika volan̈any Jesosy amy Lioka 16:9?

¹³ Hanjary kamaradiny Jehovah ndreky Jesosy koa atsika izikoa man̈amia vola hampandrosoan̈a asa an̈irahandro atsika. (Vakia Lioka 16:9.) Ohatra, atsika mety man̈amia vola hanohanan̈a asa fitorian̈a erantany. Tafiditry amy zen̈y asa fitorian̈a amy faritry farany lavitry, fan̈oren̈ana ndreky fikobabian̈a Tran̈o Fivorian̈a na tran̈o hafa ampiasain̈a amy fanompoampivavahan̈a amy Jehovah. Iô koa fan̈ampian̈a iro amy tany handalovany siklaony, ranobe, ndreky horohorontany. Atsika koa mety man̈amia vola hikarakaran̈a raha ilainy fiangonan̈a misy atsika na izikoa misy olo haintsika mila fan̈ampian̈a. (Ohab. 19:17) Man̈ampy iro rahalahiny Kristy aby io atsika izikoa man̈ano zen̈y.

14. Izikoa Efesianina 4:15, 16 zahan̈a, ino raha fahefatra mila ataontsika izikoa atsika tiho kamaradiny Jesosy?

¹⁴ 4) Areha toromariky amiany fandaminany Jehovah. Ho tsara fihavanan̈a amy Jesosy, lohany fiangonan̈a io atsika, izikoa man̈eky iro rahalahy voatendry hikarakara atsika. (Vakia Efesianina 4:15, 16.) Akory han̈anovanao zen̈y? Atsika iziô baka mifen̈y hampiasa amy fomba tsara iro Tran̈o Fivorian̈a jiaby misy. Ke nisy fiangonan̈a sasantsasany natambatra, baka io nisy fan̈ovoan̈a koa natao  tamy faritaniny fiangonan̈a. Natao fandaminan̈a aby zen̈y, baka atsika mahavita mitsisy vola be ndreky tsy handanindany vola fan̈amezan̈a amy raha tsy dia ilain̈a. Tsy nora tamy pitory sasany fan̈ovoan̈a aby zen̈y, fotony iro voatery niala fiangonan̈a nisy iro, piaramanompo efa fankazatra tamindro ke nifindra amy fiangonan̈a hafa. Hay be fa ravoravo mare Jesosy mahita iro pianatranany tsy mivadiky aby io man̈araka toromariky zen̈y!

15. Ino mahavy atsika mivolan̈a fa hahaiharikitry Jesosy fo atsika aminy hoavy?

¹⁵ Hiaraka hanjaka amy Jesosy iro voahosotro fan̈ahy masin̈y aby io, lera Fanjakan̈any Zan̈ahary mitondra. Amy zen̈y iro hiaraka aminany mandrakizay, salakady hahita izy ndreky hikoran̈a aminany. (Jaona 14:2, 3) Handeha haboakany Jesosy lan̈iany olo man̈anten̈a hiain̈y tsisy farany ambony tany eto koa fitiavany iro, ke iro hikarakarainy mare. Amy zen̈y, iro hankafỳ fiain̈ana handeha hamiany Jehovah ndreky Jesosy iro, ke hahaiharikitry Jesosy fo iro ndray tsy hahita izy.—Isaia 9:6, 7.

16. Ino aby hatsaran̈a ho azontsika izikoa atsika kamaradiny Jesosy?

¹⁶ Jesosy mikaiky atsika hanjary kamaradiny, ke izikoa atsika man̈eky kaikinany zen̈y, ho maro hatsaran̈a ho azontsika. Rango izioty, ho tsapantsika fitiavany atsika zen̈y ndreky fan̈ampiany atsika. Man̈anten̈a hiain̈y tsisy farany koa atsika. Tsisy raha bebeny loso kamaradiny Babany Jesosy zen̈y eky! Tombontsoa tsisy ambaka izy kahian̈a kamaradiny Jesosy zen̈y!