1. Waigu rengbe boro ka sonosa mbembedi pabakure na kurani?

DEDEDE, gu bambatapai si aida boro mangihe tipa ka sonosa mbembedi pabakure na boro nga ka dia regbo na gu boro re. Wa oni nikaa fura dagbaroni na kini peke gaoni aberãpai gbiati agu apai du tipa roni, oni naye kada ni abakure. Ono ti kura aregbo, si taata furani tipa ani da ni wene abakurea Yesu te. Tipagine?

2. Gini bambata kpakarapai duho ani agbia tirani na ni?

² Gu bambata kpakarapai duho nga ani aabingo Yesu te. Badungu agu aKristano naadu rogo bambata sa kama agarã agbiatiyo na kina gi bangisa kpakarapai re. Wa si avura du wo, gu mokedi nangia Petero aya: ‘Oni abi nga ko te, ono oni ki nikpi nyemu ko. Oni abinga ko awere te, ono oni idi pa ko.’ (1 Pet. 1:8) Sidu, ani ima rengba kadu ni wene abakurea Yesu wa vura duhe nga ani aabingo ko te.

3. Gini ue kpakarapai duho ani agbia tirani na ni?

³ Gu ue kpakarapai duho nga ani arengbanga ka fura na Yesu te. Ho ani amanga kparakpee ni, ani nafura fu Yekova. Si ni rengo nga, ani ninaamanga kparakpee ti rimo Yesu, ono ani ninaafuranga fu Yesu te. Gu rengo duho nga, Yesu aidanga ani mangi kparakpee fuko te. Tipagine duhe ti ni wo? Si wo mbiko gupai nga kparakpee nga papara irisombori, na kina Yekova sa si aida ani irisiko. (Mt. 4:10) Wa vura duhe wo,  ani kindi na rengba ka yugo gaani nyemuse tipa Yesu.

4. Gu biata kpakarapai duho nga gine, na ginipai ani nika sakapai tipaha rogo gi kekeapai re?

⁴ Gu biata kpakarapai duho nga Yesu naraka ngbangbaturũ yo, ani arengbanga ka dia regbo na ko te. Ono ani ima rengba ka ino dungu apai tipa Yesu ka si vura du nga ani rogo ba sa na ko te. Ani nika sakapai tipa apai biama nga gu rengbe ani ka mangaha tipa ka nyakasa gaani pabakure na ko. Ni bambatapai, ani wisigingo gu ndupai duhe ti ni ni nyanyakipa pai furani tipa ani sonosi mbembedi pabakure na Kristo.

5. Tipagine si aida ani du ti ni na pabakure na Yesu? (Oni bi gu sanduki a nga “ Du na Pabakure na Yesu Nasarani Ani du na Pabakure na Yekova” na “ Oni du na Ruru Bipai Tipa ga Yesu Bangiriba.”)

⁵ Ani du wa ka ani du ni abakurea Yesu ka ani aida kadu na wene pagume na Yekova. Tipagine duhe ti ni wo? Ani makianga nduapai ue. Bambataha nga, Yesu ape gupai fu gako abawiriki nga: ‘Buba nakpi nyemu roni akpi ni tiko, bambiko oni kpi nyemu re.’ (Yo. 16:27) Ko ape gupai a nga: “A nga boro sa ka ye koyo du Buba ni gbua te, kina mbiko re.” (Yo. 14:6) Pa asada ani kadu ni abakurea Yekova zanga sonosa ani mbembedi pabakure na Yesu wakina asada ka rimo ku rogo bambu zanga rimo ti ngbadimoho. Yesu amangisunge na kina gu bangisa kpiapai re ho ko afura ni tipa tiko ki ya ko nga “ngbadimo tipa akandoro.” (Yo. 10:7) Ue ndupai nga, Yesu awiriki asino Bako teketeke. Ko agumba gupai fu gako abawiriki nga: “Gu ni bi re ni bi Buba.” (Yo. 14:9) Sidu, gu nyanyakipa gene ani aye ka ino Yekova ngbaha nga vurube wisigopai tipa ga Yesu raka. Kina wai ani kaa wirika badungu apai tipa Yesu, kinawo a gaani nyemuse tipa ko nikaa  sona. Na wa gaani pabakure na Yesu nikaa sona, gaani nyemuse tipa Bako nika sona a.

6. Gini kura ndupai duho si aida ani du ti ni na pabakure na Yesu? Oni sakinga rogoyo.

⁶ Ani du wa ka ani du na pabakure na Yesu tipa ka gbia karagapai kuti gaani akparakpee. Gere nayugo gupai nga, si naida ani mangi kura apai kisusi gu nga kaa digiso gaani akparakpee na gu fugo nga, “ti rimo Yesu.” Si naida ani rugutirani na gu gene Yekova amangasunge na Yesu ngbaha tipa ka karagapai kuti gaani akparakpee. Yesu agumba gupai fu gako abawiriki nga: ‘Gu he oni ka nikpari pa ha ni rimore, mi animangi gu amanga re.’ (Yo. 14:13) Wa vura duhe nga Yekova du nadegatuko na kini karagapai kuti gaani akparakpee, ko ima fu gu pagbia fu Yesu nga ga mangapai kuti Gako adiaberã. (Mt. 28:18) Sidu, mbata fu Mbori karagapai kuti gaani akparakpee, ko nabihe singia ani ninaamangapai kuti gu rugute Yesu afuhe. Ni kpiapai, Yesu aya: “Ka oni vu aboro ti gayo ingaapai, Baroni du ngbangbaturũ yo ko avú roni ti gaoni ingaapai. Ono ka oni avu nga aboro ti gayo ingaapai ya, Baroni avú nga roni ti gaoni ingaapai a te.” (Mt. 6:14, 15) Si ni nyanyakipa pai tie tipa ani naamangapai na akuarani kina wai aYekova na Yesu amangapai na ani!

7. Ada nagbia undo ti ga Yesu motumo tumorii?

⁷ Kina agu aboro du na mbembedi pabakure na Yesu nika gbia undo ti gako motumo tumorii. Waigu ani ainoho wo? Yesu agumba gupai nga ko nika ‘baga kpioko tipa abadiangbako.’ (Yo. 15:13) Agu aboro naairiso Yekova nga aguyo naaraki mbata fu Yesu ye ku auru kpotosende, si nika ida i wirikipai tipa Yesu na ki kpinyemuko. Agu akumba na adee du wa Abarayama, Sara, Moize, gbiati Raba nika zinga azinga be kpio, ono tipa gi ga Yekova ruru amoyambu re gbia nyenye unga, si nika ida gupai nga i mangi pabakure amanga na Yesu.—Yo. 17:3; Amo. 24:15; Eb. 11:8-12, 24-26, 31.

8-9. A wa i nasakipai tipaha rogo Yoane 15:4, 5, gaani pabakure na Yesu nasarani ani mangi ginipai, na tipagine duhe ti ni ni nyanyakipa pai ani nye rogo Yesu yo?

⁸ Ani na ngbarago kaa mangasunge tungusapai na kini yugu gu wene pangbanga nga ga Kindo wa sa na Yesu. Ho Yesu adu ni auru kpotosende, ko adu ni bayugupai. Na wa Yesu akaragatiko ku ngbangbaturũ yo, ko nandu kindi kumbatayo kaa fu arugapai tipa sunge tungusapai na yugopai wa du ko ni barii dungurati. Ko nabi gu ome na nyanyakipaha mo amangaha tipa ka undo dungu aboro wa rengbe omero na ni tipa i ye ka inoko gbiati Bako. Nirengo, ani rengbe kadu na diabese rogo gi sunge re kina gu sa ka ani gbia undo be aYekova na Yesu.—Oni gedi Yoane 15:4, 5.

⁹ Fugo Mbori nayugo gupai ziazia nga, ani du wa ka ani du na nyemuse tipa Yesu na ki bandaha tipa ka sa ngbarago ti Yekova. Ani wisigingo agu apai biama rengbe ani ka mangaha tipa kadu ni abakurea Yesu.

10. Gini bambatapai si aida ani mangihe tipa kadu na pabakure na Yesu?

¹⁰ (1) Mo asadi ka ino Yesu. Ani rengbe na manga gipai re ni geda ani agu akitabu nga ga Matayo, Marako, Ruka, na Yoane. Wa ani nikaa berãkurii agu apangbanga nga ga Ziazia Kekeapai du tipa ga Yesu raka, ani nika ye ka kpinyemu Yesu na kini fu irisa fuko mbiko gu wene gene ko amangipai na aboro ngbaha. Ni kpiapai, wa si avura du nga Yesu angia Baira abawiriki, ko aamanganga pai na yo wa akanga te. Kuba gure, ko agumba agu apai naadu berãko yo fuyo. (Yo. 15:15) Ho i anidu ni na gberãrago, ko anidu na gberãrago a na kini kpari na yo. (Yo. 11:32-36) Zavura agu aboro naasoga Yesu aima bi gupai nga agu  aboro nanaadia gako pangbanga kugume ada ni abakureako. (Mt. 11:19) Ho ani awirika gu gene ni Yesu amangipai ngbaha na gako abawiriki, gaani pagume na kura aboro nadu ni wenehe, ani nadu na bakere ngbarago, na ani nakpinyemu ko na kini fu irisa fuko kisusi gbe.

11. Gini ue pai si aida ani mangihe tipa kadu ni abakurea Yesu, na tipagine duhe ti ni na nyanyakipaha?

¹¹ (2) Mo naaberã na kini mangipai wa Yesu. Kina wai ani kaa rugatirani na kini wiriki gu gene Yesu aaberã ngbaha, kinawo a ani nika du na mbembedi pabakure na ko. (1 Kor. 2:16) Waigu rengbe ani ka wirika ga Yesu kpiapai? Mo berẽnga kurii gi kpiapai re. Yesu anaaberã gbe tipa undo kura aboro kisusi pa fu ngbarago fu tiko. (Mt. 20:28; Rom. 15:1-3) Mbiko wa ko adu na gi berãpai re tiko, ko adu ni gu boro nanaafu tiko kaa undo aboro na kini mbupai fu yo. Rago anaagberãnga tiko ni ipo mbiko agu apai aboro anaapehe fuko te. (Yo. 1:46, 47) Ko anaambunga gu ingahe boro aima mangaha bakuru kusayo si du na maapai kurii gako bipai tipa ni te. (1 Tim. 1:12-14) Yesu aya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) Si angba gbe ka mo sana tiro nga, “Ya mo mi napekafuo ga Yesu kpiapai ni manga mi ai gupai rengbe omere na ni tipa ka banda zereda na awirinami?”

12. Gini biata pai si aida ani mangihe tipa kadu ni abakurea Yesu, na waigu rengbe ani ka manga gipai re?

¹² (3) Mo songodi awirina Kristo. Yesu nabi gupai ani amangaha fu mbedimbedi awirinako wa ka i ya ani namangaha fu kina ko. (Mt. 25:34-40) Gu nyanyakipa gene ani asongoda mbedimbedi aKristano ngbaha nga ni manga ani ai gupai rengbe na omerani ka tungusapai wa gu Yesu arugu rani ani mangihe. (Mt. 28:19, 20; Amo. 10:42) Mbedimbedi aKristano rengbe kadu na diabese rogo gi sunge tungusapai namanga rogo zegino awere re kina mbiko gu undo nga ga “kura akandoro.” (Yo. 10:16) Ka si du nga mo nga boro sa dagba kura akandoro, mo nayugo gamo nyemuse tipa awirina Kristo na tipa Yesu nitiko ti ai gu regbo mo amanga sunge tungusapai.

13. Waigu rengbe ani ka mangapai kuti gu ga Yesu rugute du rogo Ruka 16:9?

¹³ Ani namanga pabakure a na aYekova na Yesu nifu ani marã tipa si songodi gu sunge i aruga paha. (Oni gedi Ruka 16:9.) Ni kpiapai, ani rengbe ka fu gamahe tipa gu sunge namanga rogo zegino dunduko, nga gu nakoda fu gamahe tipa si undo na sunge tungusapai rogo agu aba du ni tuturũ he, ngerafuo abambu wa agu nga abambu Kindo gbiati gu kura mekemeke abambu nga gu nasongoda ndikidi irisombori, na fu undo fu agu aboro gberãngo namangi yo. Ani ima rengba a ka fu marã tipa si undo na agu apai du rogo gaani dungurati. (Snz. 19:17) Gere nga agu agene rengbe ani ka undo awirina Kristo ngbaha.

14. A wa i nayuguhe rogo AEfeso 4:15, 16, gini biama pai si aida ani mangihe tipa kadu ni abakurea Yesu?

¹⁴ (4) Mo songodi agu ambakadapai du rogo gu dungurati nga ga aKristano. Ani nada ni wene abakurea Yesu nga barii gu dungurati nga ga aKristano ho ani agiasangba agu aboro ni i nasia yo tipa i naangerafuo rani. (Oni gedi AEfeso 4:15, 16.) Ni kpiapai, ani namanga ome awere ka mangasunge wenengai na aBambu Kindo. Tipa ka manga gipai re, i ima koda kura adungurati na agu akuraha na i ima manga aˈariapai rogo adagbarago nga ga tungusapai. Rogo gi gene re, riigbu ima banda bakere marã nga gu i afuhe ni gamahe fu ga Yekova riigbu. Ono mbiko gipai re, kura abatungusipai kinaho si aida i mangi aˈariapai kuti gi vovo mbakadapai re. Si ima rengba kadu nga agi abatungusipai re aima digo nimangisunge rogo dungurati sa tipa dungu agarã na  ki ima sonosa mbembedi pabakure na agu awirina du rogo gu dungurati re. Ono awere, si naida i ga ku rogo gu kura dungurati kia. Si nafu bakere ngbarago fu Yesu ho ko abi gi ruru abawiriki re ni i nipekefuo gi mbakadapai re!

15. Waigu gaani pabakure na Yesu nika ngba kumbatayo kisusi?

¹⁵ Agu aboro du ni mbedimbedi yo ni ziazia toro na gu maabangirise nga ga du na Yesu nyeanye kindi, na kini zogorago na ko rogo ga Mbori Kindo. I nika bi Yesu, kini fura na ko, na kini di regbo na ko. (Yo. 14:2, 3) Agu aboro du na maabangirise ka raka auru kpotosende, Yesu nika yugo nyemuse ayugo fuyo na kini ngerefuoyo. Wa vura duhe nga i abingo Yesu te, i nika du ni wene abakurea ko wa i nikaa gbia ngbarago ti gu raka aYekova na Yesu nika fuhe fuyo.—Yes. 9:6, 7.

16. Waigu gaani pabakure na Yesu aundo rani?

¹⁶ Ho ani aidapa ga Yesu yambahe ni tipa kada ni abakureako, ani nagbia dungu amaku. Ni kpiapai, ko nayugo nyemuse ayugo awere furani na kini undo rani a. Ani na gu momu nga ga raka nyeanye kindi. Gu nyakipaha kisusi nga, gaani pabakure na Yesu nika sa rani ani du na gu pabakure ngba kisusi, nga kadu na wene pagume na Ba Yesu nga Yekova. Nairiwo gu pa momu ngaha re nga i yambu rani nga abakurea Yesu!