1. Gin ango ma omyero wan ducu watim?

TIKA imito ngweco pyem ngwec ma ingeyo ni tek, tutwalle ka komi lit kun iwinyo olo? Nen calo pe ibiye. Ento lakwena Paulo owaco ni Lukricitayo ducu gitye i pyem ngwec. (Ibru 12:1) Dok wan ducu, kadi watino nyo watii, watye ki kero nyo waol, omyero wacir nio wa i agikki ka wamito nongo mot ma Jehovah oketo i nyimwa.​—Mat. 24:13.

2. Kit ma kitito kwede i 2 Temceo 4:7, 8, pingo lakwena Paulo obedo agonya me lok?

² Paulo onongo twero lok agonya pien en onongo dong ‘otyeko cobo ngwecce’ woko. (Kwan 2 Temceo 4:7, 8.) Ento ngwec mene kikome ma lakwena Paulo oloko iye-ni?

3. Ngwec mene kikome ma lakwena Paulo oloko iye-ni?

³ Paulo kare mukene otiyo ki jami mogo ma onongo kitimo i tuko ma i lobo Grik macon me miyo pwony ma pire tek. (1 Kor. 9:25-27; 2 Tem. 2:5) Tyen mapol en otiyo ki lapor me pyem ngwec me tito kit ma kwo pa Lukricitayo tye kwede. (1 Kor. 9:24; Pil. 2:16) Dano donyo i “ngwec” man ka en odyere dok onongo batija. (1 Pet. 3:21) En ngolo wang tol ka Jehovah omine mot me kwo ma pe tum.​—Mat. 25:31-34, 46; 2 Tem. 4:8.

4. Gin ango ma wabinyamo i pwony man?

⁴ Jami ango ma rom arom i kin pyem ngwec maboco ki yo me kwo pa Lukricitayo? Tye jami mapol ma rom aroma. Kong dong wanyamu adek i kingi. Me acel, omyero walub yo ma atir; me aryo, omyero waring kun wakemo tol; ki dong me adek, omyero walo ariya ma wanongo i yo man.

5. Yo mene ma omyero walubi, dok pingo?

⁵ Wek ngat moni onong mot i pyem ngwec mo keken, langwec myero olub yo ma jo ma guyubo ngwec meno guketo. I yo acel-lu, ka wamito nongo mot me kwo ma pe tum, omyero walub yo me kwo pa Lukricitayo. (Tic 20:24; 1 Pet. 2:21) Ento, Catan ki jo ma gilubo kore gimito ni wamok tam mapat; gimito ni wamedde ki ngwec kwedgi i yo me kwowa macon. (1 Pet. 4:4) Gicayo yo me kwo ma wan walubo dok giwaco ni yogi aye ber, dok weko dano bedo agonya. Ento lokgi meno tye lok goba.​—2 Pet. 2:19.

6. Gin ango ma ipwonyo ki i kwo pa Brian?

⁶ Ngat mo keken ma kwo calo jo me lobo pa Catan biniang oyotoyot ni yo ma guyero-ni pe terogi i bedo agonya, ento terogi i opii. (Rom. 6:16) Nen kong labol pa Brian. Lunywalle gucuko cwinye me lubo yo me kwo pa Lukricitayo. Ento i kare ma en oromo mwaka apar ki wiye, en ocako bedo ki akalakala ka ce yo me kwo man bikelo bote yomcwiny. Brian omoko tamme me ngwec kacel ki jo ma gikwo kwo ma rwatte ki miti pa Catan. En owaco ni, “Onongo pe angeyo ni bedo agonya man ma amito-ni biweko adoko opii me jami calo jayigi-ni. I nge kare mo, acako tic ki jami calo jayi ki mato kongo i yo marac kun bene atimo tim tarwang. Rwom me tic ki jami magi kacel ki mukene marac makato omedde ci oweko adoko opii pa jami mapol. . . . Acako cato jami calo jayigi-ni me yenyo kwo.” I agikkine, Brian omoko tamme me kwo kwo ma lubbe ki rwom me kit ma atir pa Jehovah. En oloko yo me kwone ci onongo batija i mwaka 2001. I kare-ni, en tye ki yomcwiny me ada pien en dong tye ka lubo yo me kwo pa Lukricitayo. *

7. Ma lubbe ki Matayo 7:13, 14, yo aryo mene ma tye i nyimwa?

⁷ Pud dong pire tek ya ni wayer yo ma atir me aluba! Catan mito ni wan ducu wajuk ngwec i yo mading “ma tero dano i kwo” dok mito ni wangak i yo malac mapol pa dano me lobo-ni gitye ka lubo. Yo meno lac dok wot iye pe diyo dano. Ento tye ka “tero dano i to.” (Kwan Matayo 7:13, 14.) Wek wamedde ki ngwec i yo ma atir dok jo ma pe giworo Jehovah pe guwir wiwa woko, omyero wagen Jehovah dok wawinye.

8. Ka langwec moni opoto, en timo gin ango?

⁸ Lungwec ma gitye i pyem ngwec maboco giketo wanggi i nyimgi ka tyengi wek pe guyokke dok gupoti. Kadi bed kit meno, pud gitwero yokke ki lungwec luwotgi nyo bene luto tyengi i gologolo (nyo buge). Ento, ka gupoto piny, gia malo oyotoyot dok gimedde ki ngwec. Pe giketo cwinygi i kom gin ma oweko gupoto, ento i kom wang tol ki mot ma gitye ki gen me nongone.

9. Ka wapoto piny, gin ango ma omyero watim?

⁹ I ngwecwa man, waromo poto tyen mapol, kun watimo bal i lokwa nyo ticwa. Nyo lungwec luwotwa gitwero timo bal ma cwero cwinywa. Pe omyero wabed ki ur ka gin ma kit meno otimme. Wan ducu watye ki roc, dok wan ducu watye ka ngwec i yo mading ma tero dano i kwo. Pi meno, kadi ki ngo wabiyokke ki luwotwa. Paulo oye ni i kare mogo, waromo weko luwotwa gibedo ‘ki lok mo i komwa.’ (Kol. 3:13) Ento me ka keto cwinywa i kom gin ma oweko wayokke, omyero waket cwinywa i kom mot ma tye anyim. Ka wayokke dok wapoto piny, omyero wamok tamwa me a malo wek wamedde ki ngwec. Ka wamako kiniga i cwinywa dok wakwero a malo, ci pe wabityeko ngwecwa dok wakeng mot. Medo i kom meno, watwero doko ariya bot jo mukene ma gitye ka yelle me ngwec i yo mading ma tero dano i kwo.

10. Watwero gwokke nining wek pe wadok “gin mo ma bimiyo ominwa yokke”?

¹⁰ Yo mukene ma watwero gwokke kwede wek pe wadok “gin mo ma bimiyo ominwa yokke” aye ka waye tam pa lungwec luwotwa ka twere, me ka moko liking i kom tamwa nyo twerowa keken. (Rom. 14:13, 19-21; 1 Kor. 8:9, 13) I yo ma pire tek man, wan pe watye calo lungwec i pyem ngwec kikome. Gin gipyem ki lungwec luwotgi, dok langwec acel acel tute me nongo mot pire kene. Lungwec magi gitamo pi mitigi kengi. Pi meno gitwero coro luwotgi wek gukat anyim. Ka iporogi ki wan, wan pe watye ka pyem ki luwotwa. (Gal. 5:26; 6:4) Mitiwa tye me konyo  jo mapol kit ma watwero wek guo i wang tol dok gunong mot me kwo ma pe tum. Dong watute matek me lubo tira pa lakwena Paulo ‘pe me tamo pi gin ma konyowa keken, ento tamo pi gin ma konyo jo mukene bene.’​—Pil. 2:4.

11. Gin ango ma langwec keto cwinye iye, dok pingo?

¹¹ Medo i kom neno anyim ka tyengi, lungwec ma gitye i pyem ngwec bene giketo cwinygi i wang tol. Kadi bed ni pe gitwero neno tol meno ki wanggi, pud gitwero goyo i wigi kit ma gibingolone kwede kacel ki mot ma gibinongo. Gibedo ki miti me ngwec ka gigoyo i wigi mot ma gibinongone.

12. Ngo ma Jehovah oketo i nyimwa?

¹² I ngwec ma watye ka ngwecone-ni, Jehovah tye oketo i nyimwa mot ma kome ma en bimiyo bot jo ma gutyeko ngwec​—mot me kwo ma pe tum i polo nyo i paradic i lobo. Ginacoya tittiwa mot man wek wabed ka goyo i wiwa kit ma kwo bibedo mamwonya kwede. Ka wabedo ka tamo pi anyim mamwonya ma Jehovah ociko pire botwa, ci wabibedo atera me ciro nio wa i agikki.

13. Gin ango ma watye kwede ma lungwec kikome gipe kwede?

¹³ Onongo mitte ni lungwec ma gingweco i tuko pa Lugrik gulo ariya mogo calo olo ki arem. Ento meno ducu onongo jenge i kom pwonyegi kacel ki tekogi. Wan bene watye calo lungwec magi pien wanongo pwonnye i kit me ngweco ngwec ma watye iye-ni. Ento megwa dok ber loyo lungwec kikome. Watwero nongo teko ki bot Jehovah, dok tekone me konyowa pe gik. Ka wajenge i kom Jehovah, en pe ocikke me pwonyowa keken ento bimiyowa teko bene!​—1 Pet. 5:10.

14. Lok ma tye i 2 Jo Korint 12:9, 10 twero konyowa nining me kato ki i ariya?

¹⁴ Paulo okato ki i ariya mapatpat. Medo i kom yet ki aunauna ma oa ki bot jo mukene, en bene onongo i kare mukene tute ki gorone dok obedo ka yelle ki gin mo ma en olwongo ni ‘okuto ma kirwako i kome.’ (2 Kor. 12:7) Ento me ka neno pekki magi macalo tyen lok me ilo cinge woko, en onenogi calo kare maber me jenge i kom Jehovah. (Kwan 2 Jo Korint 12:9, 10.) Pien Paulo obedo ki neno ma kit man, Jehovah okonye ki i ariya magi ducu.

15. Ka walubo lanen pa Paulo, ci wabineno gin ango?

¹⁵ Wan bene kitwero yetowa nyo kiketo aunauna i komwa pi niyewa. Twero mitte bene ni walweny ki peko me yotkom nyo olo. Ento ka walubo lanen pa Paulo, ci ariya magi biminiwa kare me neno kit ma Jehovah konyowa kwede i yo me mar.

16. Kadi bed itye ki peko me yotkom, gin ango ma itwero timone?

¹⁶ Tika kombeddi itye i wi kabuto nyo i wi lela pa lungolo? Tika congi dong goro nyo wangi pe neno maber? Ka tye kit meno, tika itwero ngwec kacel ki jo matino ma komgi yot? Ada twere! Jo mapol muteggi ma gitye ki goro gitye ka ngwec i yo ma tero dano i kwo. Pe gitye ka timo meno pigi kengi. Me ka meno, gitye ka nongo teko ki bot Jehovah ki i winyo pwony me cokke ma kikubo ki cim nyo neno vidio me cokke ma kimako amaka. Dok gitye ka nywako i tic me tito kwena ki miyo caden bot ludaktar, nac, kacel ki wadigi.

17. Jehovah winyo nining i kom jo ma gitye ki goro me kom?

 ¹⁷ Pe iwek turcwiny pi peko me yotkomi omi itam ni dong igoro adada me ngwec i yo ma tero dano i kwo. Jehovah mari pi nyuto niyeni i kome kacel ki jami ma itimo pire. Kombeddi imito kony ki bote makato kare mo keken, dok en pe biweki ata. (Jab. 9:10) Me ka meno, en binyikke cok boti. Tam kong i kom lok ma laminwa mo ma tye ka yelle ki two owaco: “Kit macalo yot koma tye ka balle medde ameda-ni, anongo kare manok keken me nywako lok ada ki dano. Ento angeyo bene ni tutena kadi nok yomo cwiny Jehovah, dok man kela yomcwiny.” Ka cwinyi otur, wi opo ni Jehovah tye kwedi. Tam i kom labol ma lakwena Paulo owekiwa, dok wi opo i kom lokke me cuko cwiny man: “Cwinya yom pi goro mapatpat ma atye kwede, . . . pien ka ma agoro iye, kenyo en aye ka ma atek iye.”​—2 Kor. 12:10.

18. Ariya mapat ango ma jo mogo gitye ka kato ki iye?

¹⁸ Jo mogo ma gitye ka ngwec i yo ma tero dano i kwo girwatte ki ariya mapat. Gitye ka yelle ki pekki ma jo mukene pe gitwero neno nyo niang iye. Me labolle, gitye ka lweny ki two turcwiny nyo par mapol mukato kare woko. Pingo ariya ma lutic pa Jehovah magi gitye ka kato ki iye tek adada? Pien ka ngat moni oturo bade nyo tiyo ki lela pa lungolo, dano ducu gitwero neno ni en tye ki peko dok man tugo cwinygi me mine kony. Ento, jo ma gitute ki turcwiny nyo two wic pe guromo bedo ki lanyut mo ma nen ki woko me peko ma gitye ka kato ki iye. Pekkigi man lit ma rom aroma ki peko pa ngat ma bade otur, ento pol kare pe ginongo kica ma gimito ki bot jo mukene.

19. Gin ango ma wapwonyo ki i labol pa Mepibocet?

¹⁹ Ka itye ka yelle ki goro ma pe nen ki woko dok iwinyo calo dano pe giromo niang pekoni, ci itwero nongo teko ki i labol pa Mepibocet. (2 Cam. 4:4) En onongo tye langolo, dok Kabaka Daudi obedo ki tam ma pe tye atir i kome dok otere marac. Mepibocet pe otimo gin mo marac ma oweko pekki magi obino i kome. Kadi bed kit meno, en pe obedo ki kec cwiny; en obedo ki pwoc pi jami ducu mabeco ma tye i kwone. En obedo ki pwoc pi kica ma Daudi onyuto bote con. (2 Cam. 9:6-10) Pi meno, i kare ma Daudi ongolo kop alenga i kome, Mepibocet oniang jami ducu mutimme. En pe oye ni bal pa Daudi owek ebed ki kiniga i cwinye. Dok en pe okok i kom Jehovah pi bal ma  Daudi otimo. Mepibocet oketo cwinye i kom gin ma en twero timo me cwako kabaka ma Jehovah owiro. (2 Cam. 16:1-4; 19:24-30) Jehovah oweko kicoyo gin mutimme i kom Mepibocet i Baibul wek wanong pwony ki iye.​—Rom. 15:4.

20. Par mukato kare woko gudo jo mukene nining, ento gitwero bedo ki gen ango?

²⁰ Pi par mukato kare woko, omege ki lumege mukene lewic makogi dok gilworo bedo i kin dano. Kadi bed ni ginongo tek adada me bedo i kin jo mapol, ento pud gimedde ki bino i cokke, gure me adwol, kacel ki gure madito. Ginongo bene ni tek adada me lok ki jo ma pe gingeyo ento pud gimedde ki cito i tic me pwony. Ka meno aye kit ma iwinyo kwede, bed ki gen ni ipe keni. Jo mapol gitye ka kato ki i ariya ma kit man. Wi opo ni cwiny Jehovah yom i komi adada pi tuteni ki cwinyi ducu. Meddeni ki tic labongo ilo cingi obedo lanyut ni en tye ka goyo laane i komi ki mini teko ma imito. * (Pil. 4:6, 7; 1 Pet. 5:7) Ka itye ka tic pi Jehovah kadi bed itye ki goro me kom nyo turcwiny, ci itwero bedo ki gen ni itye ka yomo cwiny Jehovah.

21. Ki kony pa Jehovah, ngo ma wan ducu wabitimone?

²¹ Watye ki pwoc madit ni apokapoka tye i kin pyem ngwec kikome-ni ki ma lakwena Paulo oloko iye. I pyem ngwec ma onongo kibedo kwede i kare me Baibul, langwec acel keken aye ma loyo mot. Ki tungcel, jo ducu ma giciro nio wa i tyeko ngwec me kwo gibinongo mot me kwo ma pe tum. (Jon 3:16) Dok i ngwec kikome, lungwec ducu omyero gubed ma komgi yot, ka pe ci pe gitwero loyo ngwec. Ki tungcel, jo mapol i kinwa gitye ki goro me kom ento pud gitye ka cirone. (2 Kor. 4:16) Ki kony pa Jehovah, wan ducu wabingwec wa i agikki!