1. Wan ceke wacikara nitimo ang’o?

NYO iromo maru nia iring kwaya m’ing’eyo nia peko tie lee i ie, asagane saa m’ibenwang’u nia kumi remo kunoke iol? Copere iromo maru ngo. Re jakwenda Paulo uwacu nia Jukristu mandha ceke giberingo kwaya. (Ebr. 12:1) Bende, kadok nwang’u watie aradu, wadaru tii, waol kunoke watie ku kero, wan ceke wacikara niciro nitundo i ajiki tek wabemito wanwang’ sukulia ma Yehova uketho piwa.​—Mat. 24:13.

2. Pirang’o Paulo uyero wec ma nwang’ere i 2 Timoteo 4:7, 8, ku tegocwinye?

² Paulo uweco ku tegocwinye pilembe nwang’u edaru ringo kwaya pare ‘etundo i kajikne.’ (Som 2 Timoteo 4:7, 8.) Re Paulo ubino weco iwi kit kwaya ma nenedi?

3. Kwaya ma jakwenda Paulo uweco pire utie ang’o?

³ Saa moko, Paulo ubed umaku lapor mi tuko ma jubed jutuko i Giriki ma con pi niponjo lembe ma pigi tek. (1 Kor. 9:25-27; 2 Tim. 2:5) Wang’ ma pol eporo kwo mi Jukristu ku kwaya mi ng’wec. (1 Kor. 9:24; Gal. 2:2; Flp. 2:16) Ng’atini mondo i “kwaya” maeno kinde m’ethierere ni Yehova man elimo batizo. (1 Pet. 3:21) Etundo i ajiki mi kwayane nwang’u Yehova umio ire sukulia, niwacu kwo ma rondo ku rondo.​—Mat. 25:31-34, 46; 2 Tim. 4:8.

4. Wabiweco iwi lembang’o i thiwiwec maeni?

⁴ Lembe tie dupa m’urombo i kind kwaya mi ng’wec ku kwo mi Jukristu. Wakenen lembene moko adek. Mi kwong’o, wacikara niworo cik mi kwaya; mir ario, wacikara niparu kwa pi kaka ma wabijik i ie; man mir adek, wacikara niringo asu kadok saa ma wabenwang’ara ku peko.

5. Wacikara niringo nenedi, man pirang’o?

⁵ Kara jaring kwaya unwang’ sukulia ma juketho i wang’e,  ukwayu ewor cik ma ju m’upangu kwayane giketho, ku lapor ecikere niringo i yo m’atira. Kumeno bende, wacikara niworo cik mir ukungu mi Biblia i kwo mwa, tek wabemito wanwang’ sukulia mi kwo ma rondo ku rondo. (Tic. 20:24; 1 Pet. 2:21) Ento Sitani ku dhanu m’ubelubo toke gibemito watim ng’iong’ic m’ukoc: gimito ‘waring wakugi.’ (1 Pet. 4:4) Gicayuwa pilembe wabeworo cik mir ukungu mi Biblia man giwacu nia yo ma giberingo i ie re m’utie yo m’atira ma mio bedagonya. Ento i andha, gitie ngo agonya.​—2 Pet. 2:19.

6. Lapor pa Brian ubemio iri ponji ma kani?

⁶ Ka ng’atu moko ung’io niringo kwaya karacelo ku dhanu ma ng’om pa Sitani re m’ubetelo wigi, i ng’ei nindo ma nok enwang’u nia karaman eng’io gengi ma mio ngo bedagonya, ento ma terojo i ng’eca. (Rum. 6:16) Wakewec iwi lapor pa Brian. Junyodo pare giketho cwinye nia etii ku cik mir ukungu mi Biblia i kwo pare. Ento kinde m’edoko aradu, ecaku penjere ka nyo niworo cik mi Biblia biketho ebikwo ku mutoro. Brian ugam ung’io niringo kwaya ku dhanu ma gibekwo nimakere ku ng’om maeni pa Sitani. Ekoro kumae: “I ng’ei nindo moko kende ci, lembe m’abino geno nia tie bedagonya uroya i ng’eca ma lee. Nok nok, acaku tio ku yath ma merojo, acaku madhu kong’o nikadhu mukero man amondo i kit kwo mi tarwang’. I kind oro moko m’udok ulubo, acaku tio ku kit yath ma merojo ma lakgi tek magwei, man adoko ng’eca mi yathne ma pol. . . . Pi nipong’o yeny para mi timo lembe ma reco, acaku lworo bende yath ma merojo.” I ng’eye, Brian unwang’u nia kwayu ecak kwo nimakere ku cik pa Yehova. Egam etimo alokaloka i kwo pare, man elimo batizo i oro 2001. Tin dong’ etie kud anyong’a ma lee dit pilembe ebekwo kit kwo mi Jukristu. *

7. Nimakere ku Matayo 7:13, 14, yo ario ma kani ma ni wang’wa?

⁷ Etie lembe ma pire tek lee nia wang’ii niringo i yo m’atira! Sitani ubemito wawek niringo kud i yo ma likili “ma tundo i kwo,” ento wadok i yo ma her ma tin dhanu ma pol mi ng’om maeni gini ie. Dhanu dupa gimaru yoje pilembe niringo i ie tie yot, ento eterojo “kanyoth.” (Som Matayo 7:13, 14.) Dong’ kara dhanu ma giworo ngo cik pa Yehova kud giwing wiwa, wacikara nigeno Yehova man niwinje.

8. Ka jaring kwaya upodho etimo ang’o?

⁸ Juring kwaya mi ng’wec gineno yo ma giberingo i ie cuu kara kud gipodhi. Ento  saa moko, ju ma giberingo kugi copo nyono tok tiendgi mir aka ngo, kunoke juring ng’wec gicopo kier bende i vur. Ka gipodho, giai pio pio man gimedo ku ng’wec. Giketho ngo paru migi i kum gin m’uredhogi, ento giketho paru migi zoo iwi kaka ma gibijigo ng’wec i ie, man iwi sukulia ma gibinwang’u.

9. Ka wapodho, wacikara nitimo ang’o?

⁹ I ng’wec ma waberingo, saa moko wacopo podho, niwacu waromo yero wec kunoke wacopo timo lembe m’umaku piny ungo. Kunoke ju ma waberingo kugi gicopo nyayu ng’ecwiny i iwa. Wang’ei nia eno tie lembe ma bewok. Wan ceke waleng’ ungo, man wan ceke waberingo i yo ma rom ma likili pi ninwang’u kwo. Pieno, Jukristu wadwa gicopo “nyono tok tiendwa” kunoke wan de wacopo “nyono tok tiendgi.” Jakwenda Paulo uyero nia saa moko, wan ceke watimo lembe ma ketho jumange bedo ku ‘lembe i igi i kumwa.’ (Kol. 3:13) Ento kakare niketho wiwa i kum gin m’uketho wakier, wacikara niparu zoo iwi sukulia ma ni wang’wa. Ka wapodho, ubekwayu watim kero waai pio pio, man wamedara ku ng’wec. Ka waweko ng’ecwiny umondo i iwa man wavuto asu i ng’om, wabitundo ngo kaka ma waberingo i ie, man wabinwang’u ngo sukulia. M’umedo maeno, wabidoko ni cudho, man wabicero jumange ma gibetimo kero niringo i yo ma likili pi ninwang’u kwo ma rondo ku rondo.

10. Wacopo timo ang’o kara kud wabed ni cudho mi kier ni jumange?

¹⁰ Bende, kara kud wabed ni cudho mi kier ni umego ku nyimego mwa ma waberingo kugi kwaya, ubekwayu wawek gitim lembe calu ma ging’iyo tek ecopere, kakare nirido nia gitim lembe kwa i ayi ma wamaru wan. (Rum. 14:13, 19-21; 1 Kor. 8:9, 13) Eno re m’uketho wakoc bor ku ju ma giringo kwaya mi ng’wec. I kwaya mi ng’wec, ng’atuman ringo kara ekadh wadi, man etimo kero kara enwang’ sukulia ire kende. Juring kwaya gisayu mi kwong’o yeny migi gigi. Pieno, jaring kwaya moko copo cwalu juwagi kara elar etund en. Ento tung’ kugi, wan wabemito ngo waloi Jukristu wadwa. (Gal. 5:26; 6:4) Lembakeca mwa utie nikonyo dhanu dupa kara watund wakugi kaka ma waberingo i ie, man kara wanwang’ sukulia mi kwo ma rondo ku rondo. Eno uketho watimo kero nitio ku juk ma Mungu  uketho Paulo ukiewo, m’uwacu nia ‘ng’atuman ie pid kum piny pare kende ngo, ento ng’atuman ie pid kum piny mi juwadi bende.’​—Flp. 2:4.

11. Jaring kwaya ketho paru pare zoo iwi ang’o?

¹¹ M’umedo nineno yo ma giberingo i ie cuu, juring kwaya giketho bende paru migi zoo iwi kaka ma giberingo i ie. Kadok nwang’u gicopo neno ngo ku wang’gi kaka ma gibijik i ie de, re i paru migi, gicopo neno nia dong’ gidaru tundo, man jubemio igi sukulia. Ka gibemediri niparu pi sukulia ma gibinwang’u, eno konyogi nimediri ku ng’wec kud amora.

12. Yehova umio ang’o iwa?

¹² I ng’wec ma waberingo, Yehova udaru nyutho ni dhanu pare pi sukulia ma gibinwang’u ka gidaru ng’wec migi: jumoko gibinwang’u kwo ma rondo ku rondo i polo, jumange ke i ng’om. Biblia unyutho pi sukulia maeno kara wabed wapar kite ma kwo bibedo ko ber. Ka wabemedara niparu pi kwo ma ber ma Yehova ung’olo iwa pi nindo m’ubino, wabimedara niciro.

13. Wan watie kud ang’o ma juring kwaya ma con gibino mbe kudo?

¹³ Juring kwaya mi Giriki ma con gibed giciro peko ma tung’ tung’ calu ve olo, man remokum. Ento gibed giketho genogen migi iwi tego migi, man iwi kite ma giyikiri ko pi ng’wecne. Calu juring kwaya maeno, wan bende wabecuku nwang’u ponji iwi kite ma waromo medara ko ku kwaya ma waberingo. Ento wan watie ku gin ma juring kwaya ma con gibino mbe ko. Wabenwang’u tego i bang’ Yehova m’utie ku tego m’ajikine mbe. Ka waketho genogen mwa iwi Yehova, eng’olo nia ebiponjowa aponja kende ngo, ento ebidwokowa bende tek!​—1 Pet. 5:10.

14. 2 Jukorinto 12:9, 10 konyowa nenedi niciro peko mwa?

¹⁴ Paulo ugam uciro peko dupa. Juyanye man junyayu ragedo i kume; m’umedo maeno, saa moko ebed enwang’u nia eng’ic, man ebed eciro kit peko mange m’elwong’o nia ‘ukudho mi ring’kum.’ (2 Kor. 12:7) Re kakare niweko peko maeno ucere ku timo ni Yehova, ebed eneno nia eno utie saa ma ber m’ubekwayu ejengere zoo iwi Yehova. (Som 2 Jukorinto 12:9, 10.) Calu ma Paulo ubino ku nen maeno, Yehova ugam ukonye niciro peko pare ceke.

15. Ka walubo lapor pa Paulo wabineno lembang’o?

¹⁵ Wan de jucopo yanyuwa kunoke jucopo nyayu ragedo i kumwa pi yioyic mwa. Bende, wacopo nwang’ara ku peko ma tung’ tung’ calu ve remokum kunoke olo. Ento ka walubo lapor pa Paulo, i saa ma wanwang’ara ku peko wabineno kamaleng’ nia Yehova ubekonyowa.

16. Kadok itie won goro, iromo timo ang’o?

¹⁶ Nyo twoyo udaru gonji kunoke nyo itie won goro? Nyo kero mbe i congi, kunoke nyo weng’i ucaku beneno piny cuu ngo? Ka kumeno, nyo in de icopo ringo karacelo kud aradu ma gitie ku kero? Eyo icopo! Umego ku nyimego dupa ma gidaru tii man ma gitie weg goro gibemediri asu niringo kwaya i yo ma terojo i kwo. Gijengiri iwi tego migi gigi ngo, ento gijengiri iwi tego pa Yehova. Nenedi? Giwinjo coko ma jumaku i telefon, kunoke gilubo cokone ma jumaku i video. Bende, pi nitimo tic migi mi ketho dhanu udok julub, girweyo ni badokter, ni bamunganga man ni wedi migi.

17. Yehova winjere nenedi pi ju ma remokum udaru kero migi?

¹⁷ Kan itie ku peko moko m’ubeceri nitimo lee ni Yehova i kadhiri ma nwang’u ibemito, man kan ibeparu nia jumange gibenyang’ ungo i peko peri, cwinyi kud utur.  Yehova umeri lee pilembe itie ku yioyic ma tek i ie, man pi lembe ceke m’idaru timo ire pi oro ma dupa. Kawoni, itie ku yeny mi kony pare nisagu m’i wang’e zoo, man ng’ei nia ebiwenji ngo. (Zab. 9:10) Ento ebicoro ceng’ini mandha kudi. Kewinj wec ma e ma nyamego moko ma remo ubesendo uyero: “Calu ma remo para ubemedere ameda, rieko m’acopo rweyo ko lembanyong’a ni dhanu dupa udaru voya. Ento ang’eyo nia nyathi kero ma nok m’abetimo nyayu anyong’a lee i Yehova; eno ketho abedo ku mutoro.” Kinde m’ibenwang’u nia ivoc, ng’ei nia Yehova ni kudi. Poi i kum lapor ma jakwenda Paulo uweko, man i kum wec moko m’eyero ma romo mio amora i kumi. Ewacu kumae: “Anyong’a nega i ng’ic, . . . kum kinde ma a ng’ic, kinde maeca a tek.”​—2 Kor. 12:10.

18. Pirang’o peko moko ma jutic pa Yehova gibenwang’iri ko utie kit peko ma segi?

¹⁸ Jukristu ma giberingo kwaya pi ninwang’u kwo gibenwang’iri bende ku peko mange. Gibecur ku kit peko ma dhanu mange giromo ng’eyo ngo. Ku lapor, cwinygi utur, kunoke ke pidoic re m’usagugi. Pirang’o peko ma jutic pa Yehova maeno gibenwang’iri ko utie kit peko ma segi? Pilembe ka ng’atini tie won abala kunoke cinge re m’utur, dhanu ceke copo neno peko pare, man eno romo cwalugi nikonye. Ento ka pidoic re m’ubesendo ng’atini kunoke ka cwinye utur, jumange giromo ng’eyo ngo nia ebesendere. I andha, peko pare urombo ku pa won abala kunoke pa ng’atu ma cinge tur. Re calu ma kum pekone ubenen ungo kamaleng’, jumange giromo dieng’ ungo kude i ayi ma rom ku won abala, man giromo mio ngo ire kony m’etie ku yenyne.

19. Lapor pa Mefiboceth ubemio iwa ponji ma kani?

¹⁹ Kan itie won goro, kunoke ibenwang’u nia dhanu mange ubenyang’ ungo i peko peri, lapor pa Mefiboceth copo tielo cwinyi. (2 Sam. 4:4) Mefiboceth ubino won abala, man nindo moko Ubimo Daudi upoko lembe vur vur i wie. Mefiboceth unyayu ngo peko maeno en gire i kume. Re eweko ngo paru ma rac umond i wie, ento ebedo kud anyong’a pi lembe ma beco m’utimere i kwo pare. Edwoko foyofoc lee ni Daudi pi bero ma Daudi ugam unyutho ire. (2 Sam. 9:6-10) Pieno, kinde ma Daudi upoko lembe vur vur i wie, eweko ngo ng’ecwiny umond i ie pi kosa ma Daudi utimo ire, man ekayu ngo lembe i kume. Bende, elokere ngo i kum Yehova pi lembe ma Daudi utimo. Mefiboceth uketho paru pare zoo i kum gin m’ecopo timo pi nitielo ubimo ma Yehova ung’io. (2 Sam. 16:1-4; 19:24-30)  Yehova uketho jukiewo lapor ma ber pa Mefiboceth i Biblia pi niponjowa.​—Rum. 15:4.

20. Adieng’acwiny m’akeca utie kud adwogi ma kani iwi umego ku nyimego mwa moko, ento ukwayu ging’ei lembang’o?

²⁰ Adieng’acwiny m’akeca uketho umego ku nyimego mwa moko gibedo nyalworo lworo i kind dhanu, pilembe ginwang’u nia ve jubeneno zoo gin. Ento kadok saa moko lworo bedo i kind dhanu negogi de, re gibemediri asu nicidho i coko ma kubang’ yenga, man i coko ma dongo. Kadok saa moko ginwang’u nia etie tek igi niweco ku dhanu ma ging’eyo ngo de, re gicidh girweyo lembayong’a. Ka in de ibekadhu kud i peko ma kumeno, ng’ei nia itie kendi ngo. Umego ku nyimego mwa ma dupa gibekadhu kud i lembe ma rom. Poi nia kero m’ibetimo ubenyayu anyong’a i Yehova. Calu m’ivoc ungo, eno ubenyutho kamaleng’ nia Yehova ubemio iri mugisa man kero m’itie ku yenyne. * (Flp. 4:6, 7; 1 Pet. 5:7) Tek ibetimo ni Yehova ma ke itie kud adieng’acwiny kunoke itie won goro, ng’ei m’umbe jiji nia ibenyayu mutoro ma lee i Yehova.

21. Ku kony pa Yehova wabitundo nitimo ang’o?

²¹ Wadaru ng’eyo tung’ tung’ m’utie i kind kwaya ma jubed juringo con, ku kwaya ma Paulo uweco i wie. I kwaya ma con, ng’atu acel kende re ma nwang’u sukulia. Ento i kwaya ma waberingo pi ninwang’u kwo, ng’atu moko ci m’ubeworo cik mir ukungu mi Biblia man m’ubenyutho cirocir binwang’u sukulia mi kwo ma rondo ku rondo. (Yoh. 3:16) Con, ubed ukwayu juring kwaya gibed ku kero lee; kan ungo gicopo loyo ngo. Tung’ ku maeno, ju ma dupa m’i kindwa gibemediri asu niringo kadok gitie weg goro kunoke gitie ku remokum. (2 Kor. 4:16) Ku kony pa Yehova, wabimedara asu niringo kwaya nitundo i ajikine!