1. Kita maemin sasamaan ko hademak hani?

ANO mafanaˈ kiso pasangaray ko cacikayen, sapirienangawho kiso han? Cato alatek. Mangalef ano tatiih ko tireng anca maroray kiso, cowa ko sapirienangaw kiso. Kawra, sowal ni Pawlo o mamirienang maemin ko Krisciyang to cacikayen sanay. (Hipray 12:1) Sapakalowidaw a comikay, milifok to sapalifon ni Yihofa, ano hakowato ko mihecaan, ngaˈay anca tatiih ko tireng, o tatahatolas a mihadidi, milaheci to cacikayen.—Matay 24:13.

2. Pakayni 2 Timoti 4:7, 8, hano o ngaˈayay a taˈarawan ita ci Pawlo hani?

² O ngaˈayay a taˈarawan ita ci Pawlo, samanen malaheciayto ningra a comikay ko cacikayen. (ˈOsien ko 2 Timoti 4:7, 8.) Mihaenay, o maanan kora misowalan ni Pawlo a cacikayen hani?

3. O maanan ko mitoroˈan ni Pawlo a cacikayen hani?

³ Tano masasiayay a onto nolitengan a Krisiya ci Pawlo a mitadtad to kalimlaan a kimad. (1 Korinto 9:25-27; 2 Timoti 2:5) Kinapinaay cingra patinako to kaˈorip no Krisciyang to misiayay a comikay. (1 Korinto 9:24; Filipi 3:14) Patafang to tireng micada to paputisem ko cecay tamdaw i, mirienangayto cingra toni cacikayen. (1 Pitiro 3:21) Ano malifok ningra ko sapafeli ni Yihofa tahadaˈocay ˈorip i, tahiraayto cingra i patosokan a comikay.—Matay 25:31-34, 46; 2 Timoti 4:8.

4. Oniya lalakaw wa milengo to maanan hani?

⁴ O kaˈorip no Krisciyang ato malasong iraay ko adihayay kalecadan. Oniya lalakaw wa milengo toloay  pakayraan: saka 1, itini i masaˈosiay a lalan comikay; saka 2, misetek to falocoˈ milaheci to cacikayen; saka 3, miremo to pasangaray.

5. Mamitoor kita to maanan a palinian maˈorip hani? Misamaanay?

⁵ Misiayay comikay a tamdaw sapakalowidaw a comikay i, itini i masaˈosiay a lalan comikay. Mahecaday, ano sapilifokaw kita to tahadaˈocay a ˈorip, wa mitoor to palinian no Krisciyang maˈorip. (Dmak 20:24; 1 Pitiro 2:21) Kawra, ci Satan ato hekal a tamdaw mitokelay kitaanan ‘mahecad cangranan ko kaˈorip.’ (1 Pitiro 4:4, ato roma pihongyak.) Malikafay cangra to kaˈorip ita, sowal sa ngaˈayay ko ˈorip nangra, pairaay to pasalat sanay, kawra sahtoay o mangah konini.—2 Pitiro 2:19.

6. Mikitini nalifetan ni Porayen o maanan ko mananamay iso hani?

⁶ O roma tamdaw mipiliˈay to nohekal a kaˈorip, kawra cakahalafin mahapinangay nangra cowa paira to pasalat, ˈarawhan malakoliay ni Satan ato coos cangra. (Loma 6:16) Nengnengen ko tinakoan ni Porayen. Pakalalokay ko wama wina cingranan malo Krisciyang, kawra moetep irako pina ko mihecaan ningra i, awaay ko hemek malo Krisciyang sanay, mansa misaˈosi mitoor to palinian no hekal a maˈorip. Sowal ningra: “Cowa ka harateng kora kakaliman ako a pasalat mikayhiday takowanan malefong i masakenaay tatiihay nanaman . . . Caka halafin, misatapangay kako patelas misaka dademak to cemel, haliepahay, malafoay ko kaˈorip. Dotoc pina miheca, matongalay ko kahiyan to walak, matongalay ko patelas misaka dademak to cemel.” Ikor, pacakayay ci Porayen to walak sakaˈorip. Kawra salikoray mitooray to palinian ni Yihofa a maˈorip, hanaca itini 2001 miheca micada to paputisem. O Kaˈorip no Krisciyang pairaay to soˈlinay a lipahak ningra. *

7. Pakayni i Matay 7:13, 14, o maanan a tosaay a lalan ko papiliˈen ita hani?

⁷ Mipiliˈ kita to masamaanay a kaˈorip tada kalimlaan! Cowa ka ciharateng ci Satan materek kita i kaemingay ‘sakaˈorip a lalan’, tokel ningra malecad kita o ˈalomanay tamdaw, comikay i kakahaday a lalan. Hato sinowayay comikay toniya lalan, kawra o ‘sakapatay a lalan’ konini. (ˈOsien ko Matay 7:13, 14.) Ano sakaterekaw kita i moecelay a lalan, oha  mamitadiˈec ci Yihofaan ato midofdof Cingraanan.

8. Ano mapolin ko misiayay a tamdaw, wa samaan ko demak hani?

⁸ O malasongay a tamdaw wa misinanot to kaˈayaway lalan, hoeca ka mapolin. Kawra, mahafikoday no roma misiayay a tamdaw a mapolin alatek, anca malipaˈay ko refong. Ano mapolin cangra i, wa kaliki a tomireng, padadotoc a comikay. Misarocodan nangra i, cowa ko maanan ko pakapolinay cangranan, ao tatahira i patosokan a comikay, pakalowid to misiayay.

9. Ano mapolin kita i, wa samaan ko demak hani?

⁹ Itini cacikayen to saka tahadaˈoc no ˈorip, kinapinaay kita a mapolin alatek. Latekay mararaway ko sowal, mararaway ko demak, latekay madokaˈay no salikaka alatek. O mamifekad ko hatiniay a pakayraan, samanen cowa ko malefotay ko tamdaw, hanaca itiniay kita i mimingay lalan no saka tahadaˈoc no ˈorip a comikay, masasongtolay nolatekay. Somowalay ci Pawlo, latekay ‘iraay ko katatiihan’ ita to tao. (Kolosay 3:13) Kawra, hamaan pakinali ko harateng ita to o maanan ko pakapolinay kitaanan, ao mamisarocod to halifon no ikor, lomowad padadotoc a comikay. Ano cakafasaw ko keter ita, cakakahi a tomireng, wa awa ko pakayraan tahira patosokan a comikay, milifok to sapalifon, wa micara to roma a misiayay alatek.

10. Samaan kita eca ka malo ‘sakasetol a fakeloh’ hani?

¹⁰ Makahi kita a micaˈi, cowa ko papacieci to tao micada to harateng no niyah, ho eca ka malo ‘sakasetol a fakeloh.’ (Loma 14:13, 19-21; 1 Korinto 8:9, 13) Toniya demak, cowa kalecad kita to soˈlinay misiayay comikay a tamdaw, malalifetay cangra, o niyah aca ko miharatengan, masa samacay saan i kaˈayaw no tao a comikay. Kawra, cowa ko malalifetay kita. (Kalatiya 5:26; 6:4) O patosokan ita mamisarocod a padama to tamdaw tahira patosokan a comikay, milifok to  tahadaˈocay a ˈorip, mihaenay wa misaˈicel kita mitoor to sowal ni Pawlo a midemak, cowa ko niyah aca ko haratengen, wa miharatengho to roma tamdaw.—Filipi 2:4.

11. Misiayay a tamdaw wa misamacay to maanan hani? Misamaanay?

¹¹ Misiayay a tamdaw cowa ko kaˈayaway aca a lalan ko misinanotan, wa misamacayho to patosokan. Soˈlin cowa ka ˈaraw nangra ko patosokan, ngaˈay miharateng tahiraayto i patosokan ko niyah, milifok to sapalifon, mihaen wa irato ko ˈicel padadotoc a comikay.

12. Wa pafelien ni Yihofa kita to maanan sapalifon hani?

¹² Ano malaheci ita ko cacikayen no Krisciyang, wa pafelien ni Yihofa kita to midaˈocay a ˈorip i kakarayan anca fafekang no sera. Mitilidan no Fangcalay Cudad ko makapahay a kaˈorip noikoran, micerid kita miharateng to hatokel no ikor, wa matongal ko pisetek to falocoˈ tahatolas mihadidi.

13. O pakayraan ita hano mikikakaay ko kangaˈay to soˈlinay misiayay a tamdaw hani?

¹³ Itini kasasiay nolitengan a Krisiya, marorayay ko misiayay tamdaw, adadaay, kawra o mahatatanamay to cerid ato ˈicel no niyah ko sapiremo nangra to pasangaray. Malecaday kita cangraanan micadaay to sapahatatanam, kawra cowa ko niyah ko mitiˈeran ita, ao taˈangayay ko ˈicel a Yihofa. Cowa ko pahatatanam aca Ningra kitaanan, padamaayho kitaanan tanektek a ciˈicel!—1 Pitiro 5:10.

14. Pakayni i 2 Korinto 12:9, 10, misiˈayaw kita to pasangaray i, pairaen ko masamaanay a waywayan hani?

¹⁴ Adihayay ko malifaay ni Pawlo a pasangaray, cowa ko matongangan, maroero aca, sowal ningra ‘mapacekay no ceka ko tireng’ sanay, latekay miharateng malonayay ko niyah. (2 Korinto 12:7) Kawra, cowa pisawad ci Pawlo, tahalifa to hatiniay demak o ngaˈayay toki a mitadiˈec ci Yihofaan sanay minengneng. (ˈOsien ko 2 Korinto 12:9, 10.) Iraay ko mahaenay harateng ningra, mansa padamaen ni Yihofa cingra milakowit to polong a pasangaray.

15. Ano minanam kita to taˈarawan ni Pawlo wa ngaˈay tahalifet to maanan hani?

¹⁵ Mahecad ci Pawloan, pakayni pihakelongan micada kita to pipakangodo ato sapalak alatek. Latekay ciadadaay ko tireng ita, anca miceriday a maroray. Kawra ano minanam kita to taˈarawan ni Pawlo, minengneng to pasangaray o hapitiˈeran ci Yihofaan a toki, wa ngaˈay tahalifet to kaciharateng ato pipadama Ningra.

16. Soˈlin ciadada ko tireng, wa ngaˈayho kiso a misamaan to demak hani?

¹⁶ Adadaay kiso i takar anca maroˈ to cikalilengay a kamaroˈan han? Cowa ka ngaˈay ko rakat anca tatiihay ko mata han? Ano mahaenay i, wa ngaˈay kiso kalacafay to kaemangay comikay to saka tahadaˈoc no ˈorip a cacikayen han? Hano caka ngaˈay! ˈAlomanay matoˈasay malonayay ko tireng a tamdaw comikayay to saka tahadaˈoc no ˈorip a cacikayen, cowa ko niyah a ˈicel ko mitiˈeran nangra, pakayniay i tingwa anca wangcan mitengil to kamok no saˈopo. Roma i, misawacayay cangra to salawina anca kankoho ato ising.

17. Samanay ko pinengneng ni Yihofa to tatiihay ko tireng a salikaka hani?

¹⁷ Tatiihay ko tireng iso alatek, cowato  pakademak to adihayay a demak, kawra hamaan miharateng to awaay ko pakayraan no niyah padadotoc comikay to saka tahadaˈoc no ˈorip a cacikayen. Padadotocay kiso mitadiˈec ci Yihofaan, mitafo to mihadidiay, mansa maolah Cingra tisowanan. Nohatini mikikakaay ko pisaali iso ci Yihofaan, mihaenay cowa ko mamifalah Cingra tisowanan, wa matongal ko piingid tisowanan. (ˈOlic 9:10) Cecay fafahiyan salikaka pakidemay ko adada no tireng, sanay cingra: “Malingaday ko tatiih no tireng ako, cowato ka ngaˈay malecad to salakatay micerid a mitosil. Kawra mafanaˈay kako, ora miming a pisaˈicel ako lipahakay ci Yihofa, mansa lipahakay kako.” Ano matoled ko falocoˈ iso i, aka mapawan itiniay i tatihi iso ci Yihofa. Haratengen ko ngaˈayay taˈarawan ni Pawlo, sowal ningra ‘makahiay a mihadidi to kalonay’ ko niyah, samanen ‘hacowa malonay i, hacowaay a taˈangay ko ˈicel’ ningra.—2 Korinto 12:10.

18. O pakayraan no roma salikaka hano mikiriwiˈ a pasangar hani?

¹⁸ O malifaay no roma salikaka a pasangaray cowa ko kafanaˈan no tao. Tinakoen, tada matoleday anca macariraway cangra. Hano mikiriwiˈay pasangar ko pakayraan nangra hani? Samanen ano mapetek ko kamay anca maroˈ i cikalilengay kamaroˈan ko tamdaw, mahapinangay no roma tamdaw to misaaliay cingra to papadamaen. Kawra ono nafalocoˈan ko pasangaray no tamdaw, cowa ka hapinang no tao alatek. Malecaday o mapetekay ko ˈokak a tamdaw ko adada ningra, kawra cowa pilifok to siniˈada ato sapadama no tao.

19. Mikitini i taˈarawan ni Mifiposit mananamay ita ko maanan?

¹⁹ Ano pasangaray ko kaˈorip iso, pakararawayho ko tao tisowanan, ngaˈay kiso mikitini i taˈarawan ni Mifiposit milifok to sapakalalok. (2 Samuil 4:4) O masamoˈay cingra, pakararawanho ni Tafiti cingra, oniya pakayraan cowa ko niyah ko pairaay. Kawra cowa ka pakidem ko katoled ningra, ao padotocay a miakoˈid ko falocoˈ. Miakoˈiday cingra na sidaˈitay ci Tafiti cingranan. (2 Samuil 9:6-10) Mihaenay tiya pakararawen ni Tafiti cingra i, cowa ka maketer cingra anca miroroh ci Yihofaan, ao misinanot to sasamaan midama to minilnilan ni Yihofa a hongti. (2 Samuil 16:1-4; 19:24-30) Tiliden ni Yihofa ko nalifetan ni Mifiposit i Fangcalay Cudad, wa ngaˈay kita minanam cingranan.—Loma 15:4.

20. O roma tamdaw pakayni i kacariraw misiˈayaway to maanan a pasangar hani? Kawra ngaˈay pakasoˈlin cangra to maanan hani?

 ²⁰ O roma salikaka macariraway, tada calemcemay malacafay to tao. Cowa ka olah to ˈalomanay tamdaw a kitiraan alatek, kawra padadotocay mirienang to saˈopo ato taykay. Masasowal to kafahalan tamdaw pasangaray alatek, kawra padadotocayho a mitosil. Ano o pakayraan no miso konini, sayaren ko falocoˈ, o hatiniay pakayraan marariday a mifekad. Sarocoden ko falocoˈ ato ˈicel matayal saki Yihofaan, mamahemek Cingra. Cowa pisawad kiso, misawacayay to palemedan ni Yihofa kiso, pafeli to ˈicel tisowanan. * (Filipi 4:6, 7; 1 Pitiro 5:7) Ngaˈay pakasoˈlin kiso, soˈlin ira ko adada no tireng ato nafalocoˈan a pasangaray, ano padadotoc kiso midoko ci Yihofaan, wa lipahak Cingra.

21. Ira ko sapadama ni Yihofa, kita maemin wa ngaˈay maremo ko maanan?

²¹ Kasayaran no falocoˈ i, misowalan ni Pawlo a cacikayen cowa kalecad to soˈlinay cacikayen. Lintad no Fangcalay Cudad, o cecayay aca misiayay tamdaw ko milifokay to sapalifon. Kawra itini cacikayen no Krisciyang, ano tahatolasay mihadidi, o polong a tamdaw wa ngaˈay milifok to midaˈocay a ˈorip. (Yohani 3:16) Itini soˈlinay misiayay, misiayay a tamdaw oha tanoktok ciˈicel ko tireng ngaˈ, ngaˈay pakalowid to misiayay. Kawra itini cacikayen no midaˈocay a orip i, soˈlin caka tanoktok ko tireng ita, wa ngaˈay tahatolas a mihadidi, pakalowid to pisiay. (2 Korinto 4:16) Ira ko sapadama ni Yihofa, wa ngaˈay kita maemin milaheci to cacikayen.