1. ¿Kunsa taqe cristianonakajj lurañasa?

 WALI chʼamätap yatkasinjja, ¿mä carreran tʼijuñ munsnati, yamas usutästan jan ukajj qaritästan ukhajj tʼijuñ munsnati? Janiwa. Ukampis apóstol Pablojja, taqe cristianonakaw mä carreran tʼijusktanjja sasaw säna (Heb. 12:1). Ukhamasti Jehová Diosajj servirinakapar kuna premio churañtï amtki uk katoqañatakejja, jilïrinakasa, waynanakasa, chʼamaninakasa, pisi chʼamaninakasa taqeniw jan qarjtas tukuykam tʼijuñasa (Mat. 24:13).

2. ¿Kunatsa Pablojj kuntï 2 Timoteo 4:7, 8 texton siski uk jan pächasis sispachäna?

² Apóstol Pablojj tukuykamaw tʼijüna, ukatwa jan pächasis akham säna: “Tʼijuñansa tukuyañkamaw tʼijuwayta” sasa (2 Timoteo 4:7, 8 liytʼañataki). ¿Kuna carreran tʼijuñatsa Pablojj parlaskäna?

3. ¿Kuna carreran tʼijuñatsa Pablojj parlaskäna?

³ Sum yatichañatakejja, apóstol Pablojj nayra Grecia markan kuna anatañanakas utjäna ukanakat parlasaw awisajj yatichirïna (1 Cor. 9:25-27; 2 Tim. 2:5). Cristianonakan vidapajj mä carreran tʼijuñampi sasiwa sasaw Pablojj walja kuti säna (1 Cor. 9:24; Gál. 2:2; Filip. 2:16). Maynejj Jehová Diosar vidap katuyasisin bautisasjje ukhaw uka carreran tʼijuñ qallti (1 Ped. 3:21). Ukatjja Diosajj wiñay jakaña mä premior uñtasit churki ukhaw tʼijuñ tukuyi (Mat. 25:31-34, 46; 2 Tim. 4:8).

4. ¿Kunanakatsa aka yatichäwin yatjjataskañäni?

⁴ Mä cristianon vidapampi mä carreran tʼijuñampejja, kunanakansa niya pachpaki, ukanakat kimsa uñjañäni. Maya, tʼijuñäki uka thakinwa tʼijuñasa. Paya, tʼijkasajj janiw yaqha toqenak uñchʼukiñasäkiti, tukuyar puriñatakiw chʼamachasiñasa.  Kimsa, kuna jan waltʼäwinak utjipansa tʼijuskakiñasawa.

5. ¿Kawkïr thaknamsa tʼijuñasa, kunatsa uknam sarañasa?

⁵ Mä carreran tʼijurinakajja, premio katoqañatakejj kawkïr thaktï organizadoranakajj ajllipki uka thakikwa tʼijupjjañapa. Niya ukhamarakiw cristianonakajj wiñay jakañ katoqañatakejja kawki thaktï tʼijuñasäki uknam tʼijuñasa, mä arunjja Cristot yateqasisaw jakañasa (Hech. 20:24; 1 Ped. 2:21). Ukampis Supayampi, jupar arkirinakampejja Diosar serviñat saranukuñaswa munapjje, ukatsti jupanakamp chik sarsna ukwa jaqenakajj munapjjaraki (1 Ped. 4:4). Jupanakajja, cristianjam sarnaqatas uñjasajj larusipjjewa, ukatsti jupanakas jukʼamp sum jakasipkaspa, libres jakasipkaspa ukhamwa amuyasipjje. Ukampis ukajj kʼarikiwa (2 Ped. 2:19).

6. ¿Kunsa Brian sat jilatan sarnaqäwipat yateqsna?

⁶ Supayan apnaqat akapachankirinakajj kawkïr thaktï sarasipki, uknam sarañ munirinakajja, niyaw uka thakejj libre jakañar apañat sipansa esclavöñar apaskatap amuyasipjjani (Rom. 6:16). Kunas Brian jilatar pasäna uk uñjañäni. Wawakäna ukhajja, awk taykapajj Biblian yatichäwinakaparjam uywañatakiw chʼamachasipjjäna. Ukampis waynitöjjasajja, ‘¿Diosar servisajj kusisitat jakasëjja?’ sasaw pächasjjäna. Ukatwa Supayan munañaparjam sarnaqapki uka jaqenakjam sarnaqañ qalltäna. Brian jilatajj akham siwa: ‘Libre jakasiñ wal munatajajja, jan wali vicionakanwa uñjasiyitäna’ sasa. Jupajj drogasiñaru, alcohol umañaru, qʼañu juchanakan sarnaqañaruw yatintäna. Jilatajj akham saskakiwa: “Tiempompejja, jukʼamp jan waltʼayir droganakampiw [drogasjjayäta] ukat mä qhawqhanakjja janiw armirjamäjjayätti. Ukhamïpansti, [droganak] aljañar kunaw uchasjjayäta” sasa. Tiempompejja Jehová Diosan leyinakaparjam sarnaqañwa amtjjäna. Nayra jakäwip apanukusajja, 2001 maranwa bautisasjjäna. Jichhajj wiñay jakañar apki uka thakinwa tʼijuski, kusisitaw jakasjjaraki. *

7. Mateo 7:13, 14 textorjamajj ¿kuna pä kasta thakinakas utji?

⁷ Cheqap thaki ajlliñajj wali wakiskiriwa. Supayajja “jakañar apir” kʼullkʼu thaknam tʼijuñas janiw munkiti, jan ukasti jilaparte jaqenakajj sarapki uka ancho thaknam tʼijuñaswa muni. Uka ancho thak sarañajj facilakiwa, ukampis “jiwañar apir” thakiwa (Mateo 7:13, 14 liytʼañataki). Jakañar apir thakit jan saranukuñatakejja, Jehová Diosaruw  confiyañasa kuntï siskistu ukarus kasuñasarakiwa.

8. ¿Tʼijurinakajj lanktʼasis tinkupki ukhajj kuns lurapjje?

⁸ Tʼijurinakajja jan lanktʼasiñatakejj nayrar uñtasapuniw tʼijupjje. Ukham lurkasasa, mä pʼiyaruw takintapjjaspa, jan ukajj yaqha tʼijuriw jan munkasin lanktʼasiyaspa. Ukampis tinkupki ukhajja, jankʼakiw sarthapisajj tʼijusipkaki. Janiw kunas tinkuyäna uk thaqapkiti, jan ukasti tukuykam tʼijuñataki, ukhamarak premio katoqañatakiw chʼamachasipjje.

9. ¿Lanktʼasis tinkuñäni ukhajj kunsa lurañasa?

⁹ Cristianjam tʼijuñanjja, walja kutiw lanktʼassna. Sañäni, arsutasana, jan ukajj luratasanwa pantjassna, mayni jilatana jan ukajj kullakan pantjasitapaw chuym ustʼayarakistaspa. Ukhaman uñjasisajj janiw aynachtʼañasäkiti, kunattejj taqeniw pantjasirïtanjja, taqenirakiw wiñay jakañar apki uka kʼullkʼu thakin tʼijusktanjja. Ukhamasti, mayni jilat kullakanakampi chuym ustʼayasiñajja, awisajj utjakipuniwa. Pablojja, awisajj mayninakat quejasiñatak razonanakajj utjaniwa sasaw säna (Col. 3:13). Ukampis kunas lanktʼasiyistu uk thaqañat sipansa, kuna premiotï suykistu uk katoqañatakiw chʼamachasiñasa. Tinkusajja, sartasin tʼijuskakiñasawa. Janiw quejasisa chuyma ustʼata pachpar qheparañasäkiti, tinkusajj jan sartksna ukhajja janiw tukuykam tʼij-jjsnati janirakiw premio katoqksnati. Janiw ukakïkiti, wiñay jakañar apki uka kʼullkʼu thakin tʼijusipki ukanakarus lanktʼasiyaraksnawa.

10. ¿Mayninakar lanktʼasiyañ jan munkstan ukhajj kunsa lurañasa?

¹⁰ Jiwasamp chik tʼijupki ukanakar jan lanktʼayañatakejja, janiw munañasarjam taqe kun lurayañasäkiti, jan ukasti walïskchi ukhajj munapki ukarjam lurasipkaspawa (Rom. 14:13, 19-21; 1 Cor. 8:9, 13). Mä carreran tʼijurinakajj atip atipaw tʼijupjje. Niyakejjay mayniki premio katoqchejja, taqeniw atipañatak chʼamachasipjje, janirakiw mayni tʼijurinakatsa llakisipkiti. Ukatwa nayrankañatakejj mayni tʼijurinakar jan waltʼayapjjaspa. Ukampis cristianonakajja janiw jilat kullakanakasampejj atip atipa tʼijktanti (Gál. 5:26; 6:4). Antisas taqe khitinakarutï yanaptʼañ puedktan  ukanakar yanaptʼañatakiw chʼamachastanjja, ukhamat jiwasamp chik tukuykam tʼijusin premio katoqapjjañapataki. Ukatwa Pablon ewjjtʼaparjam lurañatak chʼamachastanjja. Jupajj akham sänwa: “Jan jumanak pachpatak llakisipjjamti, jan ukasti mayninakatsa llakisipjjarakim” sasa (Filip. 2:4).

11. ¿Tʼijurinakajj kuna amtampis tʼijupjje, kunatsa ukham tʼijupjje?

¹¹ Tʼijurinakajj nayrar uñtataw tʼijupjje, tukuyar puriñ amtampiw tʼijupjjaraki. Janis tukuya uñjapkchejja, niyas tukuyar puripkaspa, niyas premio katoqapkaspa ukhamwa amuyasipjje. Ukham amuyañaw jupanakar wal chʼamañchi.

12. ¿Kunsa Jehová Diosajj munasiñat churistani?

¹² Jehová Diosajj wali munasiriwa, ukatwa taqe khitinakatï tukuykam tʼijupkani ukanakarojj wiñay jakañ premio churani, yaqhepajj alajjpachanwa jakapjjani, yaqhepasti mä paraisonwa aka oraqen jakapjjarakini. Uka premiojj kunjamänisa ukajj Biblianwa qhanañchasi. Ukhamatwa kunja kusisitas jutïrin jakasjjañäni uk amuysna. Wiñay jakañ suytʼäwisat lupʼiñäni ukhajja, kunanakatï lanktʼasiykistaspa ukanak maysaruw apanukuñäni, tukuykamaw tʼijurakiñäni.

13. Nayra Grecia markan tʼijurinakat sipansa, ¿kuna yanaptʼas jiwasan utjistu?

¹³ Nayra Grecia markanjja, tʼijurinakajj jan walin uñjaskasas tʼijusipkakiñapänwa. Sañäni, qarjatasa usuchjatasa tʼijusipkakiñapänwa. Jupanakajj chʼamapar confiyasisa, ukat kunjamtï entrenadorapajj wakichkäna ukar confiyasisakiw tʼijupjjerïna. Cristianonakarojj ukhamarakiw tʼijuñasatak wakichapjjestu. Ukampis jiwasajj janiw chʼamasampik tʼijktanti, jan ukasti, Jehová Diosan jan tukusir chʼamapampiw tʼijtanjja. Diosar confiyañäni ukhajja, jupajj tʼijuñatakiw wakichistani, chʼamaniruw tukuyarakistani (1 Ped. 5:10).

14. Kuntï 2 Corintios 12:9, 10 texton siski ukajja, ¿kunjamsa jan walinakan aguantañatak yanaptʼistu?

¹⁴ Apóstol Pablojj kunayman jan walinakwa aguantäna. Juparojj jiskʼachapjjänwa, jan waltʼayañatakiw arknaqapjjäna, awisajj janis chʼamanëjjaspa ukhamwa amuyasïna, ukatsti chʼapir uñtataw mä jan walejj tʼaqesiyarakïna (2 Cor. 12:7). Uka jan walinakan uñjasisajj aynachtʼañat sipansa, ukanakajj Jehová Diosar jukʼamp confiyañatakiw yanaptʼitani sasaw säna (2 Corintios 12:9, 10 liytʼañataki). Ukatwa Jehová Diosajj Pablor yanaptʼapunïna.

15. ¿Apóstol Pablot yateqasiñäni ukhajj kunsa qhan amuyañäni?

¹⁵ Jiwasarojj inas apóstol Pablorjam jiskʼachapjjarakchistu, inas Diosar confiyatasat arknaqapjjarakchistu. Inas usutästan, jan ukajj qaritästan. Ukampis Pablot yateqasiñäni ukhajja, Jehová Diosajj qhawqsa munasistu, kunjamsa yanaptʼistu ukwa jan walinakan uñjaskasajj qhan amuyañäni.

16. ¿Edadaninakasa usutanakasa kunsa lurapjjaraki?

¹⁶ Kawkïr jilat kullakanakatï usutäsin ikiñankapki, jan ukajj silla de ruedas ukankapki, sartañ jan puedipki, jan sum uñjapki ukanakajja, ¿jan usutäpki uka wayn tawaqonakamp chik tʼijupjjaspati? Jïsa tʼijupjjaspawa. Edadani jilat kullakanakasa, usutanakasa wiñay jakañar apki uka thakinwa tʼijusipki, ukampis janiw pachpa chʼamapamp tʼijupkiti, jan ukasti Jehová Diosan chʼamapampiw tʼijusipki. Jupanakajj telefonotwa tantachäwinak istʼapjje, jan ukajj JW Streaming programat apaqat videonakwa uñtapjje. Jupanakajj familiaranakaparu, doctoranakaru, enfermeranakaruw Diosan arunakap yatiyapjje, ukhamatwa Jesusajj ‘jaqenakar nayan  discipulojar tukuyapjjam’ siskäna uk phoqasipki.

17. ¿Kunjamsa Diosajj usuta jilat kullakanakar uñji?

¹⁷ Usutätas laykojja, janiw aynachtʼañasäkiti, janirakiw wiñay jakañar apki uka thakin janis tʼijuñ puedjjsna ukham amuyañasäkiti. Jehová Diosajj jupar confiyatasata, kunanaktï jupa layku lurawayktan ukanakat wal munasistu. Jan walinakan uñjasktan ukhaw Diosan yanaptʼap jukʼamp muntanjja, jupasti janipuniw jaytjkistaniti (Sal. 9:10). Antisas jukʼampiw jakʼachasistani. Wali usuta mä kullakajj akham siwa: “Jukʼampiw usuntaskta, janiw nayrjam predicañ puedjjti. Ukampis predicañatak wal chʼamachasisajj jukʼaksa lurkstjja, Jehová Diosajj wal kusispacha. Ukaw nayar kusisiyarakitu” sasa. Llakitäkañäni ukhajja, Diosajj jiwasampïskatapwa amtañasa. Ukatsti Pablompita chʼamañchkir arunakapampitwa amtañasaraki, jupajj akham sänwa: “Jan waltʼäwinakan uñjasta ukhajja, nayajj wal kusista. Cheqpachansa aynachtʼatäkta ukhajja wali chʼamanïtwa” sasa (2 Cor. 12:10).

18. ¿Kuna jan walinakansa yaqhep jilat kullakanakajj uñjasipjjaraki?

¹⁸ Wiñay jakañar apki uka thakin tʼijurinakat yaqhepajja, yaqha jan walinakanwa uñjasipjjaraki. Uka jilat kullakanakajj yaqha kasta usunïpjjarakiwa, jiwasajj janiw uka usup uñjktanti, ni kunjamasa uksa yatkaraktanti. Uka usojj llaki usu jan ukajj depresión satawa. ¿Kunatsa uka usunïñajj jupanakatak wali chʼamajja? Maynejj ampar pʼakjatäki, jan ukajj silla de ruedas ukankki ukhajja, taqeniw kunjamäskisa uk uñjtanjja, yanaptʼañsa munaraktanwa. Ukampis llaki usunïpki jan ukajj pʼeqet usutäpki ukanakajj kunjamsa sufrisipki ukajj janiw amuyañjamäkiti. Jupanakajja kunjamtï mä jaqejj ampara jan ukajj kayu pʼakjasisajj wal usuyaskejja, ukhamarakiw wal sufripjje, ukampis yaqhanakajj janiw usutarjam munasiñampi uñjapkiti, ni yanaptʼapkisa.

19. ¿Kunsa Mefibosetan sarnaqäwipat yateqassna?

¹⁹ Jiwasatï jan walinakan uñjasitasat Jehová Diosar jukʼamp serviñ jan puedkstan, jan ukajj kunjamäsktansa uk yaqhanakajj janis amuyapkaspa ukham amuyasstan ukhajja, Mefibóset chachan sarnaqäwipaw chʼamañchtʼistaspa (2 Sam. 4:4). David reyejj jan walinakwa Mefibóset chachat amuyäna, janiw cheqapar uñjkarakïnti, janiw ukakïkänti, Mefibosetajj kayut usutarakïnwa, taqe ukanakwa aguantañapäna. Uka jan walinakjja, janiw jupa pachpa thaqaskänti, ukhampachasa janiw colerkänti. Antisas kuna sumanakatï jupar paskäna ukanak wali valoranitwa uñjäna. Davidajj kunja munasiñampis nayrajj jupar uñjäna ukat wal yuspärarakïna (2 Sam. 9:6-10). Ukatsti Davidajj jan cheqapar uñjkäna ukhajja, kuna  jan walinakas pasaskäna uk taqpachwa Mefibosetajj amuytʼäna. Davidan ukham pantjasitapat janiw colerkänti, janirakiw kuntï Davidajj lurkäna ukatsa Jehová Diosar juchañchkänti. Jan ukasti Jehová Diosan uttʼayat reyirojj taqe chuymaw yanaptʼäna (2 Sam. 16:1-4; 19:24-30). Jehová Diosajja, Mefibosetat yateqasiñasatakiw sarnaqäwip Bibliar qellqayäna (Rom. 15:4).

20. ¿Llaki usuninakatakejj kunanakas chʼamäspa, kuna toqetsa jan pächasipjjañapäki?

²⁰ Yaqhep jilat kullakanakajja, llaki usunïsajj kun lurañsa, mayninakampi parlañsa wal ajjsarayasipjje. Jupanakatakejja walja jaqenak taypinkañajj wali chʼamäspawa, ukhampachasa tantachäwinakarusa, jachʼa tantachäwinakarusa sarasipkakiwa. Jan uñtʼatanakampi parlañ walsa ajjsarapkchejja, predikir sarasipkakiwa. Jiwasatï ukham ajjsarirïstanjja, jan llakisiñäniti, waljaniw ukhaman uñjasipjjaraki. ¿Kunsa amtañasapuni? Qhawqsa chʼamachastan uk yatisajja, Jehová Diosajj wal kusisi. Jupaw bendisistu, chʼamapsa churarakistu, ukatwa ajjsarirïkasas jan aynachtʼktanti * (Filip. 4:6, 7; 1 Ped. 5:7). Usutäkasasa, llaki usunïkasasa Jehová Diosar serviñatak chʼamachasiskakiñäni ukhajja, Jupajj wal kusisini, janiw ukat pächasiñasäkiti.

21. ¿Jehová Diosan yanaptʼapampejj kun lurañsa taqenejj puedsna?

²¹ Kunjamtï uñjaniwayktanjja, mä carreran tʼijuñampi, apóstol Pablojj parlkäna uka carreran tʼijuñampejj janiw taqe kunan igualäkiti. Nayra tiempon utjkäna uka carreranakanjja, mä atipirikiw utjäna. Ukampis cristianonakajj tʼijusktan uka carreranjja, Diosat jan jitheqtirinakajj taqeniw wiñay jakañ premio katoqañäni (Juan 3:16). Mä carreranjja tʼijurinakajj taqeniw jan usutäpjjañapäna, usutäpjjaspäna ukhajja, janiw atipañ puedepkaspänti. Ukampis cristianonakajj tʼijusktan ukanjja waljaniw usutäpjje, ukhampachas jan qarjtasaw tʼijusipkaki (2 Cor. 4:16). Jehová Diosan yanaptʼapampejja, taqeniw wiñay jakañar apki uka thakin tukuykam tʼijuñäni.