1. ?Ngue yɛ ɔ fata kɛ e kwlakwla e yo-ɔ?

?SƐ E kwlaman nun annzɛ sɛ y’a fɛ naan be se e kɛ e ko si wanndilɛ nun akplowa’n, é kɔ́? Atrɛkpa’n, e nun sunman e su kɔman. Sanngɛ akoto Pɔlu seli kɛ ɔ ti kɛ Klisifuɛ kpa’m be su si wanndilɛ nun akplowa sa. (Ebr. 12:1) Ɔ maan kannzɛ e ti gbanflɛn-o, annzɛ talua-o, annzɛ kpɛnngbɛn-o, yɛ sɛ e le wunmiɛn-o, annzɛ e leman wunmiɛn-o, ɔ fata kɛ e kwlakwla e tra e awlɛn e wanndi e ju i awieliɛ naan y’a kwla ɲan akatua mɔ Zoova waan ɔ́ fá mán e’n.​—Mat. 24:13.

2. ?Kɛ nga 2 Timote 4:7, 8 fa kan’n sa’n, ngue ti yɛ Pɔlu seli Klisifuɛ’m be kɛ be wanndi be ju i awieliɛ-ɔ?

² Pɔlu ‘wanndili juli i awieliɛ.’ I ti yɛ maan ɔ kwla seli Klisifuɛ’m be kɛ be wanndi be ju i awieliɛ’n niɔn. (An kanngan 2 Timote 4:7, 8 nun.) ?Sanngɛ wanndilɛ benin yɛ Pɔlu kɛn i ndɛ-ɔ?

3. ?Wanndilɛ benin yɛ Pɔlu kɛn i ndɛ-ɔ?

³ Kpɛ sunman’n, kɛ Pɔlu kunndɛ kɛ ɔ́ fá sran’m be ɲin síe i ninnge cinnjin wie’m be su’n, Glɛsi lɔ ngowa nga sran’m be kan’n yɛ ɔ fa kan ndɛ-ɔ. (1 Kor. 9:25-27; 2 Tim. 2:5) Blɛ sunman nun’n, ɔ fali sulɛ mɔ e su Zoova’n, ɔ fa sunnzunnin wanndilɛ nun akplowa silɛ. (1 Kor. 9:24; Fp. 2:16) Kɛ sran kun fɛ i wun man Zoova mɔ be yo i batɛmun’n, i lɛ nun yɛ ɔ bo i wanndilɛ liɛ’n i bo-ɔ. (1 Piɛ. 3:21) Kpɛkun kɛ ɔ ko ɲan nguan m’ɔ leman awieliɛ’n yɛ ɔ yaci wanndilɛ-ɔ.​—Mat. 25:31-34, 46; 2 Tim. 4:8.

4. ?Ngue su yɛ é wá fá e ɲin é síe-ɔ?

⁴ ?Ngue ti yɛ kɛ be fa sulɛ mɔ e su Zoova’n be fa sunnzun wanndilɛ nga be wanndi be kɔ mmua’n, i sɔ’n ti su-ɔ? Ninnge sunman ti-ɔ. Sanngɛ maan e fa e ɲin e sie i be nun nsan su.  I klikli’n, ɔ fata kɛ e wanndi atin nga be kle e’n su. I nɲɔn su’n, maan e ɲin tran wanndilɛ nun akatua’n su. Yɛ i nsan su’n, kannzɛ sa kekle o e su sɛ’n, sanngɛ nán e yaci wanndilɛ.

5. (1) ?Atin benin yɛ ɔ fata kɛ e wanndi su-ɔ? (2) ?Ngue ti-ɔ?

⁵ Sɛ be nga be si wanndilɛ nun akplowa’n be kunndɛ kɛ bé ɲán akatua’n, ɔ fata kɛ be wanndi be sin lika nga be seli be kɛ be sin lɛ’n. I wafa kunngba’n sɛ e waan é ɲán nguan m’ɔ leman awieliɛ’n, sɛ é kwlá sé’n, ɔ fata kɛ e wanndi e sin kan be seli e kɛ e sin lɛ’n. (Yol. 20:24; 1 Piɛ. 2:21) Sanngɛ Satan nin i sran’m be kunndɛ kɛ e fa ajalɛ uflɛ. Yɛle kɛ e nin be e wanndi likawlɛ annzɛ ‘e nin be e yo ninnge tɛtɛ mun’ ekun. (1 Piɛ. 4:4) Kɛ mɔ e nin be e wanndiman likawlɛ kun’n ti’n, be yo e finfin. Kpɛkun be se kɛ be atin liɛ’n ti kpa naan be nga be wanndi sin su’n be ɲan be ti. Sanngɛ be ndɛ sɔ’n ti ato.​—2 Piɛ. 2:19.

6. ?Ngue yɛ aniaan bian Blayanin i su ndɛ’n kle e-ɔ?

⁶ Be nga be yo ninnge mun kɛ mɛn nunfuɛ mun sa’n, be wun i wlɛ kɛ be ɲanman be ti sakpa. Sanngɛ be kaci Satan nin sa tɛtɛ nga be yo be’n, be kanga. (Rɔm. 6:16) Maan e kan aniaan bian kun m’ɔ suan Blayanin’n i ndɛ. I si nin i nin be wlɛli i fanngan kɛ ɔ yo ninnge mun kɛ nga Zoova fa klo’n sa. Sanngɛ i gbanflɛn nun’n, ɔ usɛli i wun sɛ ɔ nanti i si nin i nin be afɔtuɛ’n su’n ɔ́ dí aklunjuɛ sakpa-o. I sin’n, ɔ nin be nga be yo ninnge mun kɛ nga Satan fa klo sa’n, be wa sannin nun. I bɔbɔ seli kɛ: “N siman kɛ min ti mɔ min waan m’an ɲɛn i’n, ɔ́ yó maan ń tɔ́ sa tɛ yolɛ’n nun. Blɛblɛblɛ n ma nɔnnin drɔgi nin nzan tratrali su yɛ n yoli sa sukusuku uflɛ wie mun ekun. I sin’n, n ma nɔnnin drɔgi kekleekle mun. Ɔ maan sɛ m’an ɲanman drɔgi m’an nɔnman’n, n tran-ɔn, ɔ tranman. I kpa bɔbɔ’n, kɛ ɔ ko yo naan m’an ɲan sika m’an yo ninnge tɛtɛ sɔ mun titi’n, n ma yoli drɔgi atɛ.” Ɲanmiɛn sa, Blayanin fali ajalɛ kɛ ɔ́ nánti Zoova i mmla’m be su. Ɔ maan ɔ yacili ninnge tɛtɛ’m be yolɛ. I sɔ’n ti’n, afuɛ 2001 nun’n, be yoli i batɛmun. Siɛn’n, ɔ di aklunjuɛ yɛ sɛ é kwlá sé’n, ɔ miɛn i ɲin wanndi atin nga be kle i’n su. *

7. ?Akpɔ nɲɔn nga Matie 7:13, 14 kan be ndɛ’n yɛle benin?

⁷ Ɔ ti cinnjin kɛ e sin akpɔ kpafuɛ’n i su. Afin Satan kunndɛ kɛ e yaci akpɔ nga sɛ e sin su’n é ɲán “nguan’n” i su sinlɛ. Yɛ e sin akpɔ dan nga andɛ’n sran kpanngban kpa be sin su’n i su. Sran kpanngban be klo atin sɔ’n, yɛ i su sinlɛ yoman ya. Sanngɛ i “awieliɛ’n yɛle wie’n.” (An kanngan Matie 7:13, 14 nun.) Sɛ e waan é ká akpɔ kpafuɛ’n i su  titi’n, ɔ fata kɛ e lafi Zoova su yɛ e tie ndɛ ng’ɔ kan’n.

8. ?Sɛ be nga be su si wanndilɛ nun akplowa’n be nun kun tɔ’n, ngue yɛ ɔ yo-ɔ?

⁸ Be nga be si wanndilɛ nun akplowa’n, be nian be ɲrun kpa naan be ja w’a kplaman like wie su. Sanngɛ ɔ ju wie’n, be wiengu nga be nin be wanndi’n be kwla tanndan be ɲrun annzɛ be ja kwla tɔ kunman wie nun. Sɛ i sɔ sa’n ju naan be tɔ’n, be jaso ndɛndɛ be su be wiengu’m be su ekun. Be faman be ɲin be siemɛn i like ng’ɔ yoli maan be tɔli’n su. Sanngɛ be fa be ɲin be sie i akatua mɔ bé wá ɲɛ́n i’n su.

9. ?Sɛ e tɔ’n ngue yɛ ɔ fata kɛ e yo-ɔ?

⁹ Wanndilɛ nga e Klisifuɛ mun e wanndi’n nun’n, ɔ ju wie’n e kwla tɔ annzɛ e kwla kan ndɛ wie annzɛ e kwla yo like wie m’ɔ timan su-ɔ. Asa ekun’n, be nga e nin be e wanndi’n be kwla lo e ngasi. Sɛ i sɔ sa’n ju’n, nán ɔ bo e nuan. Afin fɔ o e kwlaa e nun yɛ e ngba e su wanndi atin kun mɔ i su wanndilɛ leman ba’n i su. Ɔ maan blɛ wie nun’n, e kwla tu si e wiengu. Pɔlu seli kɛ ɔ ju wie’n, e kwla lo e wiengu’m be ngasi. (Kol. 3:13) Sanngɛ ɔ fataman kɛ e fa e ɲin e sie i sɔ liɛ’n su. Maan e fa e ɲin e sie i akatua nga é wá ɲɛ́n i’n su. Sɛ e tɔ’n, maan e jaso ndɛndɛ naan e wanndi ekun. Sɛ y’a yoman sɔ naan e fa sa e sie e klun’n, sɛ e tɔ’n e su kwlá jasoman. Ɔ maan e su ɲanman akatua’n. Asa ekun’n, sɛ e tɔ naan y’a jasoman’n, ɔ cɛman naan e dunman nun ti’n e wiengu’m b’a tɔ.

10. ?Ngue yɛ e kwla yo naan e niaan’m b’a tɔman-ɔn?

¹⁰ Like nga e kwla yo naan e niaan’m b’a tɔman’n, be nun kun yɛle kɛ nán e mian be kɛ be yo ninnge mun kɛ nga e bɔbɔ e fa klo’n sa. (Rɔm. 14:13, 19-21; 1 Kor. 8:9, 13) I lɛ nun’n, e timan kɛ be nga be si wanndilɛ nun akplowa’n be sa. Afin be liɛ’n, be nin be wiengu’m be su kpli. Yɛ sran kun kunndɛ kɛ i kunngba cɛ yɛ ɔ́ ɲán akatua’n niɔn. Ɔ maan be buman be wiengu akunndan. Like nga be kwla yo naan b’a ɲan akatua’n, i akunndan yɛ be bu-ɔ. I sɔ’n ti’n, ɔ ju wie’n be ɲinfu be su be wiengu’m be bo naan be jaso be ɲrun lɛ. Sanngɛ e liɛ’n, e nin e niaan mun e kpliman. (Gal. 5:26; 6:4) I kpa bɔbɔ’n, e kunndɛ kɛ é úka sran kpanngban naan be nin e wanndi lele be ju i awieliɛ naan be ɲan  akatua’n wie. I sɔ’n ti’n, e mian e ɲin e nanti ndɛ nga Pɔlu kannin’n su. Ɔ seli kɛ: ‘Nán e bu e ninnge liɛ’m be ngunmin be akunndan, sanngɛ e bu e wiengu’m be liɛ’m be akunndan wie.’​—Fp. 2:4.

11. (1) ?Ngue su yɛ be nga be si wanndilɛ nun akplowa’n be fa be ɲin be sie-ɔ? (2) ?Ngue ti-ɔ?

¹¹ Be nga be si wanndilɛ nun akplowa’n be nian be ɲrun kpa. Sanngɛ be fa be ɲin be sie i lika ng’ɔ fata kɛ be wanndi be ju lɛ’n i su wie. Kannzɛ be kwlá wunman lika sɔ’n be ɲinma nun’n, sanngɛ kɛ bé wá wánndi bé jú i awieliɛ’n ɔ nin akatua nga bé wá ɲɛ́n i’n, be kwla bu i akunndan. Kɛ be bu like nga bé ɲɛ́n i’n i akunndan’n, i sɔ’n man be wunmiɛn naan b’a wanndi kpa.

12. ?Ngue yɛ Zoova waan ɔ́ fá mán e-ɔ?

¹² Nguan atin’n i su wanndilɛ’n nun’n, Zoova seli kɛ be kwlaa nga be wanndi lele be ju i awieliɛ’n bé ɲán akatua’n. Yɛle kɛ bé ɲán nguan m’ɔ leman awieliɛ’n ɲanmiɛn su lɔ annzɛ asiɛ’n su wa. Biblu’n kan akatua sɔ’n i ndɛ. Ɔ maan e kwla bu wafa nga e mɛn dilɛ’n wá káci’n i akunndan. Sɛ e bu like nga Zoova waan ɔ́ fá mán e’n i akunndan titi’n, é mían e ɲin é yó like kwlaa nga e kwla yo naan y’a jran kekle’n.

13. ?Ngue yɛ e le i mɔ be nga be si wanndilɛ nun akplowa’n be lemɛn i-ɔ?

¹³ Laa’n, be nga be si wanndilɛ nun akplowa’n Glɛsi lɔ’n, ninnge wie’m be kleli be yalɛ. I wie yelɛ kɛ be kwla fɛ annzɛ be ja’m be kwla yo be ya. Sanngɛ be lafi wafa nga be miannin be ɲin be siesieli be wun’n, nin be wunmiɛn’n su. Kɛ sran sɔ’m be sa’n, e kusu be kle e wafa nga e kwla wanndi’n. Sanngɛ e le like kun mɔ be nga be si wanndilɛ nun akplowa’n be lemɛn i-ɔ. E liɛ’n, e wunmiɛn’n fin Zoova mɔ i tinmin’n leman awieliɛ’n. Ɔ maan sɛ e lafi Zoova su’n, ɔ́ klé e like kpɛkun ɔ́ yó maan é ɲán wunmiɛn.​—1 Piɛ. 5:10.

14. ?Kɛ nga 2 Korɛntifuɛ Mun 12:9, 10 fa kan’n sa’n, ngue yɛ ɔ kwla uka e naan y’a jran kekle-ɔ?

¹⁴ Sa kpanngban tɔli Pɔlu su. I wie yɛle kɛ sran’m be kpɛli i nzowa, annzɛ be tɛnndɛnnin i ɲrun. Blɛ wie nun’n, i sa sin bubuli i yɛ ɔ jrannin sa kun mɔ i bɔbɔ seli kɛ ɔ ti kɛ ‘owie kun yɛ ɔ o i kplo’n nun’ sa’n i ɲrun kekle. (2 Kor. 12:7) Ɔ nin i sɔ’n ngba’n, w’a seman kɛ ɔ́ yáci Zoova i sulɛ. I kpa bɔbɔ’n, ɔ wunnin i wlɛ kɛ sa sɔ’m be ti’n, ɔ kwla lafi Zoova su kpa ekun. (An kanngan 2 Korɛntifuɛ Mun 12:9, 10 nun.) Kɛ mɔ Pɔlu w’a yaciman Zoova i sulɛ ti’n, Zoova ukɛli i naan w’a kwla jran sa kwlaa nga be tɔli i su’n be ɲrun kekle.

15. ?Sɛ e nian Pɔlu i ajalɛ’n su’n, ngue su yɛ é fá e ɲin é síe-ɔ?

¹⁵ E kusu Ɲanmiɛn mɔ e waan é sú i’n ti’n, sran’m be kpɛ e nzowa annzɛ be kle e yalɛ. Asa ekun’n, ɔ ju wie’n tukpacɛ annzɛ sa wie ti’n e wunman e wun fɛ mlɔnmlɔn. Sanngɛ maan e nian Pɔlu i ajalɛ’n su. Yɛle kɛ sa kwlaa nun’n, maan e fa e ɲin e sie i wafa nga Zoova suan e bo’n, i su.

16. ?Kannzɛ tukpacɛ wie kle e yalɛ’n, ngue yɛ e kwla yo-ɔ?

¹⁶ ?Tukpacɛ wie ti’n, a kwlá kejeman ɔ wun kun annzɛ a ti bubuwafuɛ’m be bia’n nun? ?Ɔ ja nannglunman’m be yo wɔ ya? ?Annzɛ kusu a wunman ase kpa kun? ?Kannzɛ ɔ ti sɔ bɔbɔ’n, a nin be nga be te yo gbanflɛn annzɛ talua’n, ɔ nin be nga be ti juejue’n, amun kwla su Zoova likawlɛ? Ɛɛn, a kwla yo sɔ. Afin aniaan kpanngban mɔ b’a yo oke’n, annzɛ b’a bubu’n be mian be ɲin be wanndi nguan atin’n su titi. Be kwlá yoman ninnge wie mun kɛ laa’n sa kun. Ɔ maan kɛ é yó aɲia’n, aniaan wie’m be tra aniaan’m be nɛn’n be sie i mannzin kun su be fa ko man be. Kɛ be tie’n be ɲan wunmiɛn. Asa ekun’n,  be bo jasin fɛ’n be kle dɔɔtrɔ mun nin be osufuɛ mun.

17. ?Wafa sɛ yɛ Zoova bu be nga tukpacɛ wie ti’n be leman wunmiɛn kun’n niɔn?

¹⁷ Sɛ e kwlá yoman ninnge kwlaa nga e waan é yó mán Zoova’n kɛ laa’n sa kun’n, ɔ fataman kɛ e sa sin bubu e naan e bu i kɛ e su kwlá jranman kekle lele e guɛmɛn i ti nin i bo. Nán e wla fi su kɛ Zoova klo e yɛ ninnge kwlaa nga e yo mɛnnin i laa’n, i wla su fiman su. Ɔ si kɛ dɔ nga su yɛ e miɛn i wun kpa-ɔ. Ɔ maan ɔ su yiman e ase le. (Jue. 9:11) I kpa bɔbɔ’n, ɔ́ fɛ́ i wun mántan e titi. Aniaan bla kun mɔ tukpacɛ’n kle i yalɛ’n, ɔ kannin ndɛ kun. Ɔ seli kɛ: “Kɛ tukpacɛ’n yó tɛ́ kɔ’n, m’an kwlá boman jasin fɛ’n i kpa kun kɛ laa’n sa. Sanngɛ n si kɛ Zoova klun jɔ like kan nga n yo mɛn i’n su. I ti’n n di aklunjuɛ.” Sɛ amun kusu amun sa sin w’a bubu amun’n, nán amun wla fi su kɛ nán amun ngunmin yɛ sa sɔ’n ju amun su-ɔ. Maan amun bu ajalɛ klanman mɔ Pɔlu kleli e’n i su akunndan. Kpɛkun nán amun wla fi ndɛ ng’ɔ kɛnnin i yɛ’n su. Ɔ seli kɛ: “ Sɛ Klisi ti’n wunmiɛn wie min nun’n, [...] n klun ti jɔwa. Afin kɛ n ti fakafaka’n, i sɔ’n nun yɛ n le wunmiɛn kpa-ɔ.”​—2 Kor. 12:10.

18. ?Sa uflɛ benin yɛ ɔ kle aniaan wie’m be yalɛ-ɔ?

¹⁸ Sa uflɛ kle be nga be wanndi nguan atin’n su’n, be nun wie’m be yalɛ. Yɛle kɛ ɔ ju wie’n, sa ng’ɔ o be su’n sran uflɛ kwlá siemɛn i nzɔliɛ naan se kɛ ɔ́ wún wafa nga be wun yo be’n i wlɛ. I wie yɛle kɛ wie’m be ti nun w’a sanngan annzɛ be wla bo be wun tratra su. ?Ngue ti yɛ ɔ ju wie’n aniaan sɔ’m be ukalɛ ti kekle-ɔ? Afin sran nga i sa kun w’a bu’n, annzɛ ɔ ti bubuwafuɛ’m be bia’n nun’n, kɛ e wun i’n e si kɛ sa o i su. Ɔ maan sɛ e waan é úkɛ i’n, e kwla ukɛ i. Sanngɛ be nga be ti nun w’a sanngan’n, annzɛ be wla bo be wun tratra su’n, kɛ a wun be sa’n a siman kɛ sa o be su. Kusu nn sa o be su kɛ sran nga i sa annzɛ i ja w’a bu’n sa. Sanngɛ kɛ mɔ e kwlá sieman sa ng’ɔ o be su’n i nzɔliɛ ti’n, ɔ ju wie’n e fɔnvɔman be kɛ ng’ɔ nin i fata’n sa.

19. ?Ngue yɛ Mɛfibɔsɛti i su ndɛ’n kle e-ɔ?

¹⁹ Sɛ sa wie o ɔ su naan ɔ yo wɔ kɛ sran fi wunman ɔ su sa’n i wlɛ’n, Mɛfibɔsɛti i su ndɛ kwla wla ɔ fanngan. (2 Sam. 4:4) Mɛfibɔsɛti i ja ya’n ti’n, ɔ kwlá nantiman. Yɛ blɛ wie nun’n, Davidi w’a dimɛn i ndɛ kɛ ng’ɔ nin i fata’n sa. Kusu nán Mɛfibɔsɛti bɔbɔ ti yɛ sa sɔ’m be ɲɛnnin i-ɔ. Sanngɛ w’a yaciman sa sɔ’m be lɛ naan be bubu i sa sin. I kpa bɔbɔ’n, ɔ fɛli i ɲin sieli i ninnge nga Davidi yo mɛnnin i laa’n be su. (2 Sam. 9:6-10) I sɔ’n ti’n, kɛ Davidi w’a dimɛn i ndɛ’n i kpa’n, w’a faman ya yɛ w’a faman sa w’a siemɛn i klun. Kusu w’a fɛmɛn i ya’n w’a guɛmɛn i Zoova  su. Like ng’ɔ kwla yo naan w’a suan sran nga Zoova sieli i famiɛn’n i bo’n, yɛ ɔ yoli-ɔ. (2 Sam. 16:1-4; 19:24-30) Zoova maan be klɛli Mɛfibɔsɛti i su ndɛ’n Biblu’n nun naan e ɲan su ye.​—Rɔm. 15:4.

20. (1) ?Wafa sɛ yɛ sa wie m’ɔ o aniaan wie’m be su ti’n, be wun yo be-ɔ? (2) ?Ngue yɛ be kwla lafi su-ɔ?

²⁰ Sa wie m’ɔ kle aniaan wie’m be yalɛ ti’n, kɛ be o sran’m be afiɛn’n be wun kpajaman be. Sanngɛ be mian be ɲin be tran asɔnun aɲia mun nin akpasua kun aɲia mun nin nvle kun aɲia’m be bo. Wie’m be kusu kɛ ɔ ko yo naan be nin sran nga be simɛn i’n b’a koko yalɛ’n ɔ ti kekle. Sanngɛ be mian be ɲin be bo jasin fɛ’n be kle sran mun. Sɛ i sɔ sa’n wie o ɔ su’n, nán bu i kɛ ɔ ngunmin yɛ sa sɔ’n o ɔ su-ɔ. Aniaan kpanngban be wun yo be sɔ wie. Nán ɔ wla fi su kɛ Zoova i klun jɔ ɔ ɲin mɔ a mian su i’n, i su. Kɛ mɔ a mian ɔ ɲin su i titi’n, i sɔ’n kle kɛ ɔ yra ɔ su naan ɔ man ɔ wunmiɛn. * (Fp. 4:6, 7; 1 Piɛ. 5:7) Sɛ sa o ɔ su naan sanngɛ a mian ɔ ɲin su Zoova’n, a kwla lafi su kɛ i klun jɔ́ ɔ wun titi.

21. ?Zoova fanngan nun’n, ngue yɛ é kwlá yó-ɔ?

²¹ Wanndilɛ nun akplowa nga sran’m be si’n, ɔ nin wanndilɛ nga Pɔlu kɛn i ndɛ’n be timan kun. Afin wanndilɛ nun akplowa nga sran’m be si mɔ Biblu’n kɛn i ndɛ’n, sran kunngba cɛ yɛ ɔ ɲan akatua’n niɔn. Sanngɛ nguan atin’n su wanndilɛ liɛ’n, be kwlaa nga be mian be ɲin be ju i awieliɛ’n, be kwla ɲan akatua mɔ yɛle nguan m’ɔ leman awieliɛ’n. (Zan 3:16) Asa ekun’n, wanndilɛ nun akplowa nga sran’m be si’n nun’n, ɔ fata kɛ be kwlaa nga be si akplowa’n be yo juejue. Sɛ w’a yoman sɔ’n, be su kwlá jumɛn i awieliɛ. Sanngɛ nguan atin’n su wanndilɛ liɛ’n, kannzɛ sran kun timan juejue bɔbɔ-o, ɔ kwla wanndi lele ju i awieliɛ. (2 Kor. 4:16) Ɔ maan Zoova fanngan nun’n, e kwlakwla é kwlá wánndi nguan atin’n su lele é jú i awieliɛ.