1. Finshi ifwe bonse tufwile ukucita?

BUSHE kuti mwatemwa ukubutuka ulubilo ulo mwishibe ukuti luntu lwa-afya, maka maka nga ca kuti namulwala nangu namunaka? Kwena te kuti mutemwe. Umutumwa Paulo alandile ukuti Abena Kristu bonse balabutuka ulubilo. (Heb. 12:1) Na kabili ifwe bonse, nampo nga tuli baice nelyo tuli bakalamba, nampo nga twalikwata sana amaka nelyo tatwakwata amaka, tufwile ukutwalilila ukushipikisha ukufika na ku mpela nga tulefwaya Yehova akatupeele icilambu.—Mat. 24:13.

2. Ukulingana ne fyaba pali 2 Timote 4:7, 8, cinshi calengele Paulo akwate ubuntungwa bwa kulanda pa kubutuka ulubilo?

² Paulo alikwete ubuntungwa bwa kulanda pa kubutuka ulubilo lwa ku mweo pantu ena ‘alibutwike ulubilo ukufika na ku mpela.’ (Belengeni 2 Timote 4:7, 8.) Nomba bushe lubilo nshi Paulo alelandapo?

3. Bushe lubilo nshi Paulo alandilepo?

³ Paulo inshita shimo alelanda pa fyalecitika mu mangalo yalebako mu Grisi pa kusambilisha amasambililo ayacindama. (1 Kor. 9:25-27; 2 Tim. 2:5) Pa miku iingi alingenye ukubutuka ulubilo lwa kucimfyanya ku mikalile ya Bena Kristu. (1 Kor. 9:24; Gal. 2:2; Fil. 2:16) Umuntu atendeka ukubutuka ulu “lubilo” nga ca kuti aipeela kuli Yehova no kubatishiwa. (1 Pet. 3:21) Kabili apwisha ukubutuka ulu ulubilo nga ca kuti Yehova amupeela icilambu ca mweo wa muyayaya.—Mat. 25:31-34, 46; 2 Tim. 4:8.

4. Finshi twalasambilila muli cino cipande?

⁴ Bushe ukubutuka ulubilo lwa kucimfyanya kwapalana shani ne mikalile ya Bena Kristu? Kwaliba umwingi umo fyapalana.  Lekeni tulandeko pali fitatu. Ica kubalilapo tufwile ukulakonka inshila iyo tufwile ukukonka; ica bubili tufwile ukubika amano ku kupwisha ulubilo; ne calenga butatu, tufwile ukutwalilila ukulabutuka nangu twaba na mafya.

5. Ni nshila nshi tufwile ukulakonka, kabili mulandu nshi?

⁵ Pa kuti umuntu uulebutuka mu lubilo lwa kucimfyanya bamupeele icilambu, afwile ukupita mu nshila iyo abapekenye ulo lubilo lwa kucimfyanya bamwebele ukupitamo. Ifi fine e fyo ca ba na ku lubilo lwa ku mweo. Pa kuti bakatupeele icilambu ca mweo wa muyayaya, tulingile ukulakonka inshila nelyo imikalile ya Bwina Kristu. (Imil. 20:24; 1 Pet. 2:21) Na lyo line, Satana na bamukonkelela tabafwaya tulekonka iyi nshila, lelo bafwaya ‘tulebakonka.’ (1 Pet. 4:4) Balasuusha imikalile ya Bwina Kristu kabili balanda ukuti nga tulebakonkelela e lyo twingaba no buntungwa. Nomba ifyo balanda fya bufi.—2 Pet. 2:19.

6. Finshi twingasambilila ku lyashi lya ba Brian?

⁶ Abakonkelela abantu ba muli cino calo ca kwa Satana balasanga ukuti tababa no buntungwa, lelo baba abasha ba kwa Satana kabili balaba abasha ku fifwaya imitima yabo. (Rom. 6:16) Lekeni tulande pali ba Brian. Abafyashi babo balebakoselesha ukulaikala ukulingana ne fyo Abena Kristu balingile ukulaikala. Ilyo bali umusepela, batendeke ukutwishika nga ca kuti ukulaikala ifyo Abena Kristu balingile ukulaikala kuti kwalenga baba ne nsansa. E ico balitendeke ukucita ifyo abakonkelela Satana bacita. Batile: “Nshaishibe ukutila ukufwaya ukuba no buntungwa bwa kucita ifyo umutima wandi ulefwaya kwali no kulenga na kunkuma mu kucita ifyabipa. Nalitendeke ukubomfya imiti babinda, nalekolwa sana, kabili nalecita ne fintu fimbi ifyabipa. Mu kupita kwa nshita, nalitendeke ukubomfya imiti babinda iikali sana kabili nalikunkwime. . . . Nalitendeke ukushitisha iyi miti pa kuti ndekwata ifyo nalefwaya.” Ilyo papitile inshita, ba Brian balisalilepo ukutendeka ukulakonka amafunde ya kwa Yehova. Ba Brian balyalwike kabili balibatishiwe mu 2001. Baliba ne nsansa pali ino nshita pantu balakonka inshila nelyo imikalile ya Bwina Kristu. *

7. Nga fintu ilembo lya kwa Mateo 7:13, 14 lilanda, misebo nshi ibili iyabako?

⁷ Calicindama nga nshi ukusala inshila iisuma iyo tulingile ukulakonka. Satana afwaya twaleka ukwenda mu musebo uunono “uwaya ku bumi” no kutendeka ukwenda mu musebo uwapabuka umo abantu abengi aba muli cino  calo benda. Uyu musebo walishibikwa sana kabili walyanguka ukwendamo, lelo “waya ku bonaushi.” (Belengeni Mateo 7:13, 14.) Pa kuti tutwalilile ukwenda mu musebo wa ku bumi na pa kuti twilakonkelela abantu ba muli cino calo, tulingile ukucetekela Yehova no kulamumfwila.

8. Finshi uulebutuka ulubilo acita nga aipununa?

⁸ Abalebutuka ulubilo lwa kucimfyanya balalolesha apo balenyanta pa kuti tabaipunwine. Na lyo line, uulebutuka muli ulu lubilo kuti bamupilikisha ku bo alebutuka nabo nelyo kuti aipununa mu cilindi ilyo alebutuka. Nga apona, alema no kutwalilila ukubutuka. Tabika sana amano ku cacilenga apone, lelo abika amano ku kupwisha ukubutuka ulubilo no kupokelela icilambu.

9. Finshi tulingile ukucita nga twaipununa?

⁹ Na ifwe bene tulaipununa ilyo tulebutuka ulubilo lwa ku mweo, pantu inshita shimo tulalufyanya mu fyo tulanda na mu fyo tucita. E lyo inshita shimbi abo tubutuka nabo ulubilo lwa ku mweo kuti bacita ifingatukalifya. Tatufwile ukupapa ifya musango uyu nga fyacitika. Bonse tatwapwililika, kabili bonse tubutuka mu musebo umo wine uwacepa uwaya ku mweo. Kanshi inshita shimo kuti twaipununa nelyo kuti twapunwisha aba bwananyina. Paulo na o alishibe ukuti inshita shimo kuti twaba ne “ca kuilishanya” ku Bena Kristu banensu. (Kol. 3:13) Nomba tatulingile ukulabika amano ku fyalengele tuipunune, lelo tulingile ukubika amano ku cilambu ico tukapokelela. Nga twaipununa, tufwile ukwima no kutwalilila ukubutuka. Nga ca kuti twafulwa sana ica kuti twaleka no kubutuka, te kuti tupwishe ukubutuka ulubilo lwesu kabili te kuti tupokelele icilambu. Na kabili, kuti twalenga Abena Kristu banensu bafilwa ukubutuka bwino.

10. Finshi twingacita pa kuti twilaba “ica kupunwisha” kuli bambi?

¹⁰ Cimbi ico twingacita pa kuti twilaba “ica kupunwisha” ku ba bwananyina, kulabika amano ku fingabawamina ukucila ukubika fye amano ku fyo tulefwaya. (Rom. 14:13, 19-21; 1 Kor. 8:9, 13) Ababutuka ulubilo lwa kucimfyanya bena te fyo bacita. Balacimfyanya kabili  balafwaya ukupokelela fye beka icilambu. Babika fye amano ku kucita ifingalenga bacimfya. Kanshi kuti basunka abo balebutuka nabo pa kuti bena e bo babe pa ntanshi. Ifwe te fyo tucita, tatucimfyanya. (Gal. 5:26; 6:4) Tulafwaya ukwafwa abantu abengi ukutwalilila ukubutuka pa kuti tukapwishishe pamo nabo ulubilo lwa ku mweo no kupokelela icilambu ca mweo wa muyayaya. Kanshi tufwile ukulaesha na maka ukulakonka ifyo Paulo alandile ukuti tatufwile ‘ukulabika fye amano ku fyo tulefwaya fye, lelo tulebika amano na ku fyo bambi bafwaya.’—Fil. 2:4.

11. Finshi uulebutuka ulubilo abikako sana amano, kabili mulandu nshi?

¹¹ Ababutuka mu lubilo lwa kucimfyanya tabalolesha fye apo balenyanta, lelo balabika sana amano na ku kupwisha ukubutuka. Nangu ca kuti te kuti bamone apo ulubilo lwalapwila, balelenganya ifyo bengaba ne nsansa nga bapwisha ukubutuka no kupokelela icilambu. Kabili ukucita ifi e kulenga batwalilila ukubutuka no kupwisha ulubilo lwabo.

12. Cinshi Yehova alaya ukutupeela nga twapwisha ukubutuka ulubilo lwesu?

¹² Yehova alilaya ababomfi bakwe abakapwisha ukubutuka ulubilo tubutuka ukuti akabapeela umweo wa muyayaya, nampo nga bakulaikala ku muulu nelyo pano isonde. Apo Baibolo yalitwebako fimo pa mweo wa muyayaya, cilatwangukila ukwelenganya ifyo cikawama ukuba no bumi bwa musango uyu. Nga tuletontonkanya sana pa mweo wa muyayaya uo Yehova atulaya, tukatwalilila ukulashipikisha ilyo tulebutuka ulu lubilo.

13. Ni muli finshi umo twacila ababutuka ulubilo lwa kucimfyanya?

¹³ Abalebutuka mu fyangalo fyalebako mu Grisi balecimfya amafya pamo nga ukunaka e lyo no kumfwa ubukali. Lelo bashintilile fye pa maka bakwete aya kubutuka e lyo no kulaisambilisha ifya kubutuka. Na ifwe bene tulasambilila ifya kubutuka ulubilo lwesu. Lelo ifwe twalicila ababutuka mu lubilo lwa kucimfyanya, pantu Yehova kuti atupeela amaka kabili kuti atwafwa mu fili fyonse. Alitulaya ukuti nga twamucetekela akatusambilisha ifya kubutuka kabili akatukosha!—1 Pet. 5:10.

14. Bushe amashiwi yaba pali 2 Abena Korinti 12:9, 10, kuti yatwafwa shani ukushipikisha amesho?

¹⁴ Paulo aleba sana na mafya. Balemusaalula no kumucusha, kabili inshita shimo alenaka sana kabili aleshipikisha ubwafya ubo aitile ukuti “umuunga mu mubili.” (2 Kor. 12:7) Paulo talekele amafya akwete yalenga aleka ukubutuka ulubilo lwakwe, lelo yalilengele acetekela sana Yehova. (Belengeni 2 Abena Korinti 12:9, 10.) Ifi acitile, fyalilengele Yehova amwafwe ukushipikisha amesho.

15. Finshi fikacitika nga tulepashanya Paulo?

¹⁵ Na ifwe bene kuti batusaalula nelyo ukutucusha pa mulandu ne fyo twasuminamo. Nalimo kuti twatendeka ukulwalilila nelyo kuti twanaka sana. Nomba nga tulepashanya Paulo, kuti twacetekela sana Yehova kabili kuti atwafwa.

16. Nangu ca kuti mulalwalilila, finshi mwingacita pa kuti mutwalilile ukubutuka ulubilo?

¹⁶ Bushe mwalilwala ica kuti tamwima no kwima nelyo bushe mwendela pa ncinga ya balemana? Bushe mwalilwala amolu nelyo tamumwenekesha? Nga ca kuti mwalilwala ubulwele bwa musango uyu, bushe kuti mwabutukila pamo na bacaice abali no bumi ubusuma? Te ca kutwishika ukutila kuti mwabutukila pamo nabo! Abakoloci abengi na balwalilila balabutuka ulubilo lwa ku mweo. Te kuti bakumanishe ukubutuka ukwabula Yehova ukubafwa. Kanshi balakoshiwa nga balekutika ukulongana kwa Bwina Kristu pa foni. Kabili  balabombako no mulimo wa kupanga abasambi pantu balashimikila kuli badokota, banasi e lyo na kuli balupwa lwabo.

17. Bushe Yehova amona shani abakoloci na balwalilila?

¹⁷ Mwilaleka ubulwele mwalwala bwalenga mwalamona kwati te kuti mutwalilile ukubutuka ulubilo lwa ku mweo. Yehova alimutemwa nga nshi pantu mwalimucetekela kabili mulashipikisha. Apo mulalwalilila, mufwile ukumucetekela sana, kabili takamulekeleshe. (Amalu. 9:10) Lelo akapalama sana kuli imwe. Umfweni ifyo nkashi umo uulwalilila alandile, atile: “Nga nalwalisha, nshikwata sana inshita ya kubila imbila nsuma. Lelo nalishiba ukuti nangu nabombako fye panono, Yehova alasekelela kabili ici cilalenga ndeba ne nsansa.” Nga mwafupuka, muleibukisha ukuti tamwaba mweka. Muletontonkanya pa fyo Paulo ashipikishe amafya, kabili muleibukisha amashiwi alandile aya kuti: “Nsansamukila mu kunaka kwandi, . . . pantu ilyo ndi uwanaka, e lyo nkwata amaka.”—2 Kor. 12:10.

18. Mafya nshi bamo bakwata aya-afya ukushipikisha?

¹⁸ Bamo ababutuka ulubilo lwa ku mweo balakwata amafya na yambi. Balaba na mafya ayo abantu bambi bashingeshiba. Ku ca kumwenako, limo balasakamikwa nga nshi. Mulandu nshi amafya ya musango uyu yakosela ukushipikisha? Pantu yalipusana na mafya yambi. Nga ca kuti umuntu alifunika ukuboko nelyo nga endela pa ncinga ya kwendelapo abalemana, abantu bonse abamumona kuti baishiba ukuti alecula kabili kuti balafwaya no kumwafwa. Nomba umuntu nga nalwala amasakamika, nalimo te kuti twishibe no kwishiba ukuti nalwala. Kanshi nangu ca kuti alomfwa ubukali nga filya fine umuntu engomfwa ubukali nga aifuna ukuboko nelyo ukuulu, abantu nalimo te kuti bamulange ukutemwa nelyo ukumwafwa pa mulandu wa kuti tabeshibe ubwafya akwete.

19. Finshi tulesambilila ku lyashi lya kwa Mefiboshete?

¹⁹ Nga ca kuti mulalwalilila nelyo nga mwalilemana kabili mumfwa kwati balamufyenga, ilyashi lya kwa Mefiboshete kuti lyamukoselesha. (2 Sam. 4:4) Alilemene kabili Imfumu Davidi yalimupingwile bubi bubi, nangu ca kuti tapali ifyo alufyenye. Na lyo line, Mefiboshete tafuupwike, lelo aletasha pa fisuma fyonse ifyalemucitikila. Alitashishe pa fyo Davidi amulangile icikuuku pa kubala. (2 Sam. 9:6-10) Kanshi ilyo bamufyengele, Mefiboshete atontonkenye pa fyalengele bamufyenge. Takalipe pa fyo Davidi acitile. Kabili tapeele Yehova umulandu pa fyacitike. Mefiboshete abikile amano ku fyo engacita pa kutungilila imfumu iyo Yehova asontele. (2 Sam. 16:1-4; 19:24-30) Yehova alilengele ilyashi lya kwa  Mefiboshete lilembwe mu Cebo cakwe Baibolo pa kuti tulesambililako.—Rom. 15:4.

20. Bushe amasakamika kuti yalenga bamo balacita finshi, lelo finshi balingile ukulaibukisha?

²⁰ Pa mulandu wa masakamika ayengi, bamunyinefwe bamo na bankashi balaba sana no mwenso kabili balomfwa insoni ukuba pamo na bantu bambi. Nalimo balomfwa insoni ukuba apali abantu abengi, lelo balitwalilila ukulaya ku kulongana kwa pa cilonganino, ukwa muputule no kwa citungu. Nalimo cilabakosela ukulanda nabo bashaishiba, lelo balalanda na bantu ilyo balebila imbila nsuma. Nga ca kuti cilamukosela ukucita ifi twalandapo, te imwe mweka cikosela. Abantu abengi balomfwa nge fyo mumfwa. Muleibukisha ukuti Yehova alatasha pa fyo mumubombela no mweo onse. Na kuba, ifi mwatwalilila ukubutuka ulubilo lwa ku mweo filanga fye apabuuta ukuti Yehova alamupaala kabili alamupeela amaka ayo mukabila. * (Fil. 4:6, 7; 1 Pet. 5:7) Nga ca kuti mwalitwalilila ukubombela Yehova nangu ca kuti mulalwalilila, muli bakoloci, nelyo mulasakamikwa sana, muleibukisha ukuti Yehova alatasha pa fyo mumubombela.

21. Apo Yehova alatwafwa, finshi bonse tukapwisha ukucita?

²¹ Caliwama ukuti ulubilo lwa kucimfyanya lwalipusanako no lubilo Paulo alandilepo. Mu lubilo lwa kucimfyanya ulwalebako mu nshiku sha kale, umuntu umo fye e walepokelela icilambu. Lelo bonse abatwalilila ukubutuka ulubilo lwa ku mweo, bakapokelela icilambu ca mweo wa muyayaya. (Yoh. 3:16) Na kabili bonse abalebutuka mu lubilo lwa kucimfyanya balekabila ukuba no bumi ubusuma, pantu nga tabali no bumi ubusuma nalimo nga tabali na kupokelela icilambu. Ulubilo lwa Bena Kristu lyena te fyo lwaba. Fwe bengi tatwaba no bumi ubusuma, lelo twalitwalilila ukubutuka. (2 Kor. 4:16) Apo Yehova alatwafwa, bonse fye tukapwisha ukubutuka ulubilo lwesu!