1. Kokame rosai fandun fa kofrur ya?

AUSYA waduf ḇaido wambrus ido, na wamarisen fa wakso ro fanandi farandar oso ke? Imbude na oroḇa. Mboi, Manwawan Paulus doḇe snonkaku Kristen syakam sisya siso ro fanandi farandar oso. (Ibr. 12:1) Kobabo ke koḇesinan kwar ke, kosambraḇ ke koryar ḇa ke, fandun fa kokame komkuepen isof ro papupes insama kosmai sasuref Yahwe nari ḇyuk ḇe ko na.​—Mat. 24:13.

2. Ro 2 Timotius 4:7, 8, rosai ḇefnai fa Paulus bisa ḇyuk anun ine?

² Paulus bisa danun kaku faro ḇesesya kukro mankundi ’ifrar isof ismai mun ḇepupes ya kwar’. (Wasya 2 Timotius 4:7, 8.) Ḇape, rosai Paulus ikofen kaku ḇekur fanandi farandar anya?

3. Fanandi rosaiso Paulus ikofen ya?

³ Fyorno ido, Paulus fyasḇair roi sifrur ro Yunani ḇepon iwara fa ḇyukifarkor roi ḇefandun kaku. (1 Kor. 9:25-27; 2 Tim. 2:5) Mnuk ḇeḇeso ro Refo doḇe snonkaku Kristen kenem sena imnis ra fanandi farandar. (1 Kor. 9:24; Flp. 2:16) Snonkaku oso na iso randak ro fanandi faro kankenem rofyor ḇyuk kenem ḇyedi fa fyarmyan ḇe Yahwe I ma ḇyebaptis. (1 Ptr. 3:21) Ifrar isof ismai ro mun ḇepupes iso rofyor Yahwe ḇyuk sasuref ḇe i isoine kankenem fyoro ya.​—Mat. 25:31-34, 46; 2 Tim. 4:8.

4. Rosai nari kawos ro farkarkor ineni?

⁴ Roi ḇeḇeso naisya ḇefrur fa fanandi maraton ma fanandi faro kankenem sumnis. Rwama kawos roi rikyor.  Ḇepon ya, koso nyan ḇekaku ya. Ḇesuru ya, fandun fa komam monda ḇe mun ḇepupes ya. Ma ḇekyor ya, roi ḇedwarek na naisya, mboi kofrar pdef.

5. Nyan risaiso fandun fa koso na, ma rosai ḇefnai ya?

⁵ Insama ḇeso kaku fanandi imbe sismai sasuref ido, fandun fa sifrar ro nyan skur fa sifrar ro na. Rarirya kako, komarisen kosmai kankenem fyoro ido, fandun fa koso nyan Kristen. (Kis. 20:24; 1 Ptr. 2:21) Imbape, Setan ma ḇeso i sya siḇe sifrur ko fa koso nyan ḇese, simarisen fa koso nyan sena. (1 Ptr. 4:4) Skoryae ko kukro nyan kankenem koso ine ma soḇe nyan sena iso ḇepyum syadi, naiso ḇeyun ḇe ḇaḇemkei ya. Ḇape, roi sikofen na nkaku ḇaḇeri.​—2 Ptr. 2:19.

6. Farkarkor rosai kun ro Brian fawar ḇyeja?

⁶ Snonkaku ḇeso Setan awyae ḇyena, nari sismai ḇaḇemkei ya ḇa. Imbape, sewomen faro Setan ma marisen mankun sena ḇardi. (Rm. 6:16) Kokarapan naek Brian fawar ḇyena. Sinan ḇyesuya suyanun fa iso nyan kankenem Kristen. Ḇape, fafisu Brian ḇyabo kaker, iḇoryae nyan risaiso nari ḇeyun marisen ḇe i. Brian kyinfir fa iso Setan nyan kakara ḇyena. Doḇe, ”Insape yafawi roi sor ḇe ḇaḇemkei, dun aya ḇe roi ḇeḇyeḇa na. Fafisu ya, yan narkoba, yafarandinem ma yakenem famfnome. Taun ḇeḇeso nande mura, yan ker syadi narkoba ma kenem yedi iḇyeḇa syadi wer. . . . Yaboḇ narkoba insama yana pipi fa yakenem radine pdef.” Ḇarpur mura, Brian kyinfir fa ikenem imnis Yahwe marisen Ḇyena. Fyadwer nyan ḇyena ma ḇyebaptis ro taun 2001. Kirine imarisen kaku kukro iso nyan kankenem Kristen kwar. *

7. Ro Matius 7:13, 14, rosai nyan risuru ro ḇarpon koḇedi?

⁷ Kokinfir nyan ḇekaku fa koso na, ima roi ḇefandun kaku! Setan imewer kombran ro nyan ḇefyos ’ḇeyun ḇe kankenem’, mboi imarisen kombran ro nyan ḇemkei snonkaku ḇebor ro dunya ine sya simbran ro na. Iso nyan simarisen syadi kukro napyan fa simbran ro na. Ḇape, nyan ine nari ’dun ḇe marmar ya’. (Wasya Matius 7:13, 14.) Insama kombran pdef ro nyan ḇekaku ma koso nyan ḇese ḇa, fandun fa kokyar faro Yahwe ma korower I.

8. Rofyor snonkaku ḇeso fanandi oso isapi ido, rosai nari ifrur ya?

⁸ Snonkaku ḇeso fanandi maraton sya, na smam ḇe ḇarpon ro nyan sifrar ro na insama sisapi ḇa. Mboi, imbude ḇefrar kayam kuker si ḇaido der ḇero sampak na nafnai si fa sisapi. Sisapi ido, nari sores kaḇer ḇo sifrar wer. Smam monda faro roi ḇefrur fa sisapi anya ḇa, mboi smam ḇe mun ḇepupes ya ma sasuref nari sismai na.

9. Rofyor kosapi, rosai fandun fa kofrur ya?

⁹ Ro fanandi faro kankenem, imbude kosapi ker, kofrur sasar ro wos ḇaido rosai kofrur na. Oroḇa ido, naek srar ḇefrar kayam kuker konsya sifrur roi ḇefnai fa kosnesna naduf. Kopok kokandor roi anna awer. Kokame koisya kofrar ro nyan ḇefyos ḇeyun ḇe kankenem, mboi snar koine konapes ḇa, inja bisa ḇesesya sifnai fa kokarkar. Paulus doḇe fyorno ido, nari kofrur fa ḇesesya ’sikram masasor’. (Kol. 3:13) Na komam monda awer faro roi ḇefrur fa kosapi, ḇape ipyum ya komam monda faro sasuref nari kosmai na. Fyor kosapi ido, kores kaḇer ma kofrar wer. Komsor ḇo komewer kores kaḇer wer ido, na kosmai mun ḇepupes ma sasuref ya ḇa. Oso wer ido, na kodwarek ḇesesya ḇefrar kaker ro nyan ḇefyos faro kankenem ya.

10. Rariso kofrur fa naek srar sya sisapi ḇa?

¹⁰ Nyan ḇese insama kofrur fa naek srar sya sisapi awer iso komam monda sifrur roi ono imnis kakara sena ḇo kodif ker awer si fa siso roi kokara na. (Rm. 14:13, 19-21; 1 Kor. 8:9, 13) Ro roi ḇeradine, komnis ra ḇeso kaku fanandi farandar sya ḇa. Ḇeso fanandi sya sfamfabri, ma oser-oser syewar fa ismai sasuref ḇe mankundi. Ḇefrar ansine skara monda fandun sena ḇardi. Inja, na spampum ḇesesya ḇo sisewar fa siso ḇefrar ḇepon si. Imbape, koma kofamfabri kuker ḇesesya ḇa. (Gal. 5:26; 6:4) Roi kosewar iso kofnoḇek snonkaku ḇebor syadi fa sisun ḇe dunya babo ma saksmai  kankenem fyoro fnoḇek ko. Inja kosouser Paulus anun ḇyena fa ’kosewar fandun mankun koḇena awer, ḇape fandun snonkaku ḇesesya kako’.​—Flp. 2:4.

11. Ḇefrar sya rosai skara mura yoḇ ya, ma rosai ḇefnai ya?

¹¹ Ro fanandi farandar, ḇefrar sya na smam ḇe ḇarpon pdef kuker skara muraḇe sasuref nari sismai ya. Imbude smam sasuref anya ḇaim, mboi bisa siwasen ro mankunsi sismai mun ḇepupes ma sasuref anya. Sifrur rarirya ido, nari nadif si fa sifrar pdef.

12. Sasuref rosai Yahwe nari ḇyuk ḇe ko na?

¹² Ro fanandi faro kankenem, Yahwe na ḇyuk sasuref ḇe kawasa Ḇyesi ḇesmai mun ḇepupes ya kwar. Isoine kankenem fyoro ro nanki ḇaido firdaus ro supswan ine. Refo ikofenḇair ḇepon ḇekur sasuref ine, inja bisa kowasenkara kenem koḇena nari napyum kaku. Kokara ker roi Yahwe ḇyeasas ḇe ko faro ras naiwama ido, nari kosewar fa komkuepen pdef.

13. Roi ḇepyum syadi rosai kona na, mboi ḇefrar ro fanandi sya rosai sakna na ḇa?

¹³ Ro Yunani ḇepon iwara, ḇeyakso fanandi farandar na sakmbrus ma sakdufe. Roi nane nari nadwarek si. Ḇape, sikame fandun fa siso roi sfarkor ḇe si kwar ma sikyar sisambraḇ. Kakmnis ḇefrar ansine kukro sfarkor ko kwar moḇsa kofrar ro fanandi faro kankenem ya rai. Ḇape, koma kona roi ḇepyum syadi ro si. Yahwe na ḇyuk samambraḇ ḇe ko, ma nari ifnoḇek ko ḇesya kwar. Kokyar faro Yahwe ido, ḇyeasas nari fyarkor ko ma ḇye ko fa kosambraḇ!​—1 Ptr. 5:10.

14. Rariso mnuk ro 2 Korintus 12:9, 10 nafnoḇek ko fafisu kosmai samswen?

¹⁴ Paulus ismai samswen nabore. Snonkaku ḇese skoryae ma sewayam i. Fafisu ono, ḇyabir ipok ḇa kukro ismai roi dap ḇe ’borek ḇero baken’. (2 Kor. 12:7) Ḇape samswen anna nafnai i fa isusu ḇa, imbape myam na ḇe swaf fa fyasnai kakyar faro Yahwe I. (Wasya 2 Korintus 12:9, 10.) Paulus nya kakara ḇeradine, inja Yahwe ifnoḇek i ro samswen ḇekur i na.

15. Komam samswen koḇena imnis Paulus myam na raya ido, rosai koḇaḇir na?

¹⁵ Ko kako snonkaku sya skoryae ḇaido sewayam ko kukro kakyar koḇenane. Imbude kombrus ḇaido koduf kako. Ḇape raris Paulus i, samswen kosmai na nbuk swaf ḇe ko fa kakḇaḇir saswar ma fafnoḇek ro Yahwe I.

16. Ausya wadafduf ido, rosai bisa wafrur ya?

¹⁶ Rasras Ausya ḇarek monda ḇaido kwain ro kursi roda monda ke? Wepur Besuya suryar ḇa kwar ḇaido mkamsi myam mnis wer ḇa ke? Rarirya mboi, bisa wafrar pdef fnoḇek ḇebabo ma ḇesambraḇ kaker sya ḇae. Naek srar ḇesinan ma ḇedafduf sya sibor sisya sifrar ro nyan ḇe kankenem. Sifrur roi ine kuker samambraḇ mankun sena ḇa. Sismai samambraḇ ro Yahwe I kuker srower roi sawos ro fananjur, roro vidio serekam kwar, ḇaido roro telfon vidio. Ma sisewar fa sakḇaryas ḇe dokter, suster, ma kina sesi.

17. Moḇsa Yahwe myam naek srar ḇedafduf ma ḇesambraḇ ḇa kwar sya?

¹⁷ Kwara jadi fa wafrur nabor ro fararmyan ḇe Yahwe wer ḇa ido, ḇesanekar awer ḇo woḇo wasusu kwar ro fanandi faro kankenem. Yahwe iswar Au kukro wakyar faro I ma wafrur nabor  ro fararmyan swaf taun ḇe taun kwar. Kirine wafandun syadi fafnoḇek Ḇyeja, ma nari ibur Au ḇaḇeri. (Mz. 9:10) Mboi, nari Yahwe fyanam pdef ḇe Au. Imbesrar oso idafdufe, mboi ikofen radine, ”Dafduf ḇekur aya na nabor kaku wer, nafnai fa yana swaf nabor kuf ḇa fa yasrow ma yaḇaryas ḇe snonkaku sya. Mboi, yafawi roi kermkun yafrur na nafrur fa Yahwe imarisen, ma ine nafrur fa yaryaḇ kaku.” Fafisu ḇesanekar, waswarepen Yahwe isya ryous Au. Wakkara Paulus fawar ḇyena ma waswarepen wos ḇyenane: ”Yaryaḇ kako kuker samambraḇ ḇa ayena. . . . Snar rofyor yasambraḇ ḇa, rofafisu ani yapok kaku.”​—2 Kor. 12:10.

18. Rosai samswen ḇese ḇekur naek srar ḇeḇeso?

¹⁸ Ḇefrar ro fanandi faro kankenem sismai samswen ḇese wer. Sna samswen ro mankunsi ḇardi, snonkaku ḇese sipok smam ma sfawi mnis na ḇa. Imnis raris, siḇor famfnom ḇaido simkakwarek syadi kenem sena. Sima Yahwe manfamyan Ḇyesirya, mboi rosai ḇefnai fa sismai samswen ḇeradine na? Kokarapan, snonkaku oso ḇramin ḇyedi ikar ḇaido kyain ro kursi roda ido, mansei monda na bisa smame, siswar i, ma sḇuk fafnoḇek. Ḇape, snonkaku ḇesnekar ḇaido ḇeḇoryae sya, smam si ro ḇandi ido rya siduf ḇa. Sro samswen kako imnis raris ḇesmai dafduf ḇesena. Mboi snonkaku ḇese jadi fa smam kandera sena ḇa, inja na siswar si ḇa, ma sḇuk fafnoḇek ḇe si ḇa.

19. Rosai kofarkor ro Mefibosyet fawar ḇyena?

¹⁹ Nwa raryar ḇa ma ḇaḇir skara sasar Au ido, na Mefibosyet fawar ḇyena nafrur fa swambraḇ. (2 Sam. 4:4) Mefibosyet ima snon ḇepapipen diri, ma ras oso Raja Daud kyara sasar i. Mefibosyet ifrur sasar oḇa mboi roi nane nkur i. Imbape, imewer nya kakara ḇesasar, ḇyesyowi roi ḇepyum ismai ro kenem ḇyena. Fyasnai kasumasa snar Daud frur pyum ḇyena ro fafisu iwara. (2 Sam. 9:6-10) Inja fafisu Daud kyara sasar i, Mefibosyet myam faro roi anna monda ḇa. Mefibosyet ḇyuk sasar ḇe Yahwe I ḇa ma faro rosai Daud ifrur na kako. Mboi kyara monda rosai bisa ifrur fa isaramper raja Yahwe ryem kwar ine. (2 Sam. 16:1-4; 19:24-30) Yahwe imarisen faro roi Mefibosyet ifrur nane, inja ḇye fa sfas fawar ḇyena ro Refo fa ḇyukifarkor ko.​—Rm. 15:4.

20. Rariso makakwarek ḇesyadadi dun samswen ḇe naek srar ḇeḇeso sya? Ḇape rosai na sikyar ya?

²⁰ Naek srar ono sisya sna makakwarek  ḇesyadadi ḇefnai fa simkak syadi rofyor sekayam kuker snonkaku ḇese. Sḇaḇir samswen fa sro fandu kawasa ḇebor sya, mboi sisewar fa siso pdef ro fananjur ma munara kebaktian na. Rya samswen fa sawos ḇe snonkaku sifawi ḇaim sya, mboi sisewar fa sakkawos rofyor sḇaryas ro rum ḇe rum. Wakna samswen ḇeradine ido, wafawi werer monda ḇa. Ḇebor sya sakḇaḇir raris moḇ ḇaḇir raya. Waswarepen Yahwe imarisen faro roi swewar fa wafrur kuker sne ḇesiper. Wamkuepen isof ro rasine ima fyasnaiḇair Yahwe isya ḇyebarakas ma syambraḇser Au. * (Flp. 4:6, 7; 1 Ptr. 5:7) Nwa raryar ḇa ḇaido ḇesanekar mboi wafarmyan pdef ḇe Yahwe ido, wakyar Ausya wafrur fa imarisen.

21. Kuker fafnoḇek ro Yahwe I, rosai nari bisa kofrur ya?

²¹ Komarisen kukro kofawi fanandi farandar ḇekaku iḇese ro fanandi faro kankenem. Fanandi sifrur ro ḇepon iwara ima snonkaku oser monda ḇesmai sasuref ya. Imbape, snonkaku ḇesoasuser ro nyan Kristen sya nari sismai kankenem fyoro. (Yoh. 3:16) Ḇeso ro fanandi farandar sima fandun fa sna baken ḇesambraḇ pdef, oroḇa ido nari sismai sasuref ya ḇa. Imbape, kobor kona baken ḇesambraḇ wer ḇa kukro koduf ma koḇesinan kwar, ḇesyaḇo komkuepen pdef! (2 Kor. 4:16) Kuker fafnoḇek ro Yahwe I, kokame na kofrar isof kosmai mun ḇepupes ya!