1. Aha do na maningon ibahen hita?

PORINI borit-boritan ham atap pe galek, ai ra do ham dihut marlintun bani parlumbaan? Ra do lang tene. Tapi sasintongni songon na ihatahon apostel Paulus, ganup do halak Kristen dihut bani parlumbaan. (Heb. 12:1) Ase mandapot hadiah humbani Jahowa, maningon torus do hita marlintun ronsi hu ujung, lang soal hita matua atap maposo, gogoh atap pe galek.​—Mat. 24:13.

2. Domu bani 2 Timoteus 4:7, 8, mase pag si Paulus mamodahi hita ase totap marlumba?

² Pag do si Paulus mangkatahon sonai halani ‘domma idobkon ia parlumbaonni’. (Basa 2 Timoteus 4:7, 8.) Tapi, parlumbaan aha do na isahapkon si Paulus ijon?

3. Parlumbaan aha do na isahapkon si Paulus?

³ Sipata igunahon si Paulus do parlumbaan na dong i Junani hinan laho patorangkon sada parlajaran na ponting. (1 Kor. 9:25-27; 2 Tim. 2:5) Isarupahon ia do hagoluhan ni halak Kristen songon marlintun bani parlumbaan. (1 Kor. 9:24; Gal. 2:2; Pil. 2:16) Sanggah sasada halak mangondoskon diri bani Jahowa janah ididi, ijai ma ia mulai dihut marlumba. (1 Ptr. 3:21) Ihatahon ma ia domma das hu ujung sanggah ibere Jahowa hadiah hu bani, ai ma hagoluhan sadokah ni dokahni.​—Mat. 25:31-34, 46; 2 Tim. 4:8.

4. Aha ma na laho iulas hita?

⁴ Aha ma na sarupa humbani parlumbaan i Junani hinan pakon hagoluhan ni halak Kristen? Sasintongni bahat do. Tapi sonari pitah tolu ma na iulas hita. Na parlobei, maningon totap  do hita marlintun i dalan na dob itontuhon. Na paduahon, maningon marusaha ma hita ase boi das hu ujung. Na patoluhon, maningon tongtong ma hita marlintun hassi pe dong tantangan.

5. Dalan aha do na maningon iihutkon hita, janah mase?

⁵ Anggo sihol sahalak parlintun mandapot hadiah, maningon totap do ia marlintun i dalan na dob itontuhon. Sonai homa hita, anggo sihol hita mandapot hagoluhan sadokah ni dokahni, maningon totap ma hita i dalan na dob itontuhon bani halak Kristen. (Lah. 20:24; 1 Ptr. 2:21) Tapi sihol do Sibolis pakon dunia on ase hita lang mangihutkon dalan ai. Sidea marosuh ase hita mangihutkon pargoluhan ni sidea. (1 Ptr. 4:4) Jadi irisai sidea ma hita. Ihatahon sidea ma dearan do dalan ni sidea halani boi mamboan haluahon. Tapi, ladung do ganupan ai.​—2 Ptr. 2:19.

6. Aha ma na boi iparlajari hita humbani pangalaman ni si Brian?

⁶ Ise pe na mangihutkon dunia on, ujungni gabe ibotoh sidea ma gabe iparjabolon do hape sidea halani mangihutkon dalan ai, sedo ipaluah. (Rom 6:16) Pardiateihon ma pangalaman ni si Brian. Iojur namatorasni do ia ase mangihutkon dalan ni halak Kristen. Tapi dob remaja, ipindahi ia ma dalan na legan, na iahap ia boi mambahen malas uhurni. Jadi ipilih ia ma dalan na iihutkon dunia on. Si Brian mangkatahon, “Hape haluahon na huparayak ai mambahen ahu gabe iparjabolon. Ujungni marnarkoba ma ahu, martenggen-tenggen, janah mangkorjahon parriah-riahon. Dob piga-piga tahun, lambin parah do huahap halani domma iparjabolon narkoba ai ahu. Jadi hujual ma narkoba ase boi ahu torus mamakei narkoba.” Tapi ujungni, iihutkon ia ma aturan ni Jahowa janah itadingkon ia ma dalan na sambor ai. Ididi ma ia bani tahun 2001. Sonari domma marmalas ni uhur ia halani mangihutkon dalan ni halak Kristen. *

7. Dong dua dalan na ipatugah bani Mateus 7:13, 14. Aha ma ai?

⁷ Jadi ponting tumang do hita mamilih dalan na sintong! Tapi lang marosuh Sibolis anggo hita mardalan i dalan na sompit, ai ma dalan “dompak hagoluhan” ai. Sihol do ia ase hita mardalan i dalan na bolag. Bahat do halak mardalan ijai halani urah idalani. Tapi “hu hamagouan” do ujungni. (Basa Mateus 7:13, 14.) Halani ai, ase boi hita totap mardalan i dalan na sintong, janah lang kahou, maningon porsaya do hita bani Jahowa anjaha manangihon-Si.

8. Anggo madabuh siparlintun, aha ma na maningon bahenonni?

⁸ Sanggah marlumba, totap do dalan na i lobeini na ididah siparlintun ase ulang madabuh ia. Tapi sipata ra do ia madabuh ibahen parlintun na legan, atap pe madabuh halani dong lobang i lobeini. Porini madabuh pe, mintor podas do sidea tindang atap jongjong, janah marlintun use. Tongtong do ipingkirhon sidea sonaha ase boi das hu ujung janah mandapot hadiah, sedo mamingkirhon aha na mambahen sidea madabuh.

9. Anggo tartolsu hita, aha ma na maningon bahenonta?

⁹ Sonai homa ibagas parlumbaan ni halak Kristen, ra do piga-piga hali madabuh hita halani lepak parsahap atap pe pambahenanta. Atap ra do homa halani hasoman sahaporsayaon mambahen borit uhurta. Lang pala tarsonggot hita, halani ganupan hita lang sempurna. Jadi sipata ra do hita mambahen “tartuktuk” hasoman atap hasoman na mambahen hita “tartuktuk” halani rup mardalan hita i dalan na sompit ai. Si Paulus mangkatahon ra do adong na mambahen “marpangkurangi uhur” ni na sada dompak hasomanni. (Kol. 3:13) Tapi ulang ma sai ipingkiri hita aha na mambahen hita tartolsu. Dearan ma ipingkiri hita hadiah na dong i lobeita. Porini tartolsu pe, mintor podas ma hita tindang janah marlintun use. Anggo lalab borit uhurta janah lang be mangidangi Jahowa, gabe lang boi hita das hu ujung, anjaha lang dapot hita hadiah ai. Dob ai, anggo lang ra hita marlintun use, boi do homa hasomanta gabe tartolsu.

10. Sonaha ase hita lang gabe “partolsuan” bani sanina botou?

¹⁰ Ra do homa gabe “partolsuan” hita bani sanina botou anggo ipaksa hita sidea mangihutkon harosuhta. (Rom 14:13, 19-21; 1 Kor. 8:9, 13) Ijon ma leganni hita pakon halak na marlintun ibagas parlumbaan. Anggo sidea marusaha do ase boi manaluhon halak na legan. Pitah dirini sandiri do na ipingkiri. Halani ai, marusaha ma ia mangonjar na legan ase pitah ia na i lobei. Tapi anggo hita lang sonai. (Gal. 5:26; 6:4) Marsiurupan do hita ase ganupan boi das hu ujung janah mandapot hadiah hagoluhan na sadokah ni dokahni.  Jadi songon na ihatahon si Paulus, ‘Ulang ma na porlu banta iparuhurhon hita, tapi dihut ma na bani hasoman!’​—Pil. 2:4.

11. Aha ma na maningon ipingkiri siparlintun, janah mase?

¹¹ Leganni totap mangidah dalan na i lobeini, maningon totap do ipingkiri siparlintun garis finis. Hassi pe lape taridah garis ai, ibayangkon ia do dirini domma das ijai janah mandapot hadiah. Gabe lambin podas do ia marlintun anggo totap mamingkirhon hadiah ai.

12. Hadiah aha do na laho bereon ni Jahowa hubanta?

¹² Jahowa marjanji bereon-Ni do holi hadiah bani juakjuak-Ni na marlintun das hu ujung. Dong na mandapot hagoluhan i surga, dong homa i paradeiso i tanoh on. Ipatugah do pasal ai bani Bibel ase boi ibayangkon hita sonaha dearni hagoluhanta holi. Jadi anggo totap idingat hita hadiah ai, tontu lang ipaturut hita aha pe mambahen hita tartolsu.

13. Aha do halobihanta marimbangkon siparlintun?

¹³ Bani parlumbaan i Junani hinan, dong do homa tantangan ni siparlintun. Ra do ngayotan sidea atap pe boritan halani luhani. Tapi halani domma ilatih, marusaha do sidea marlintun humbani tuk ni gogohni. Usih songon siparlintun ai, hita pe ilatih do homa ase boi totap marlintun ibagas parlumbaonta. Tapi dong do halobihanta marimbangkon siparlintun ai. Ibere Jahowa do hagogohan hubanta janah lang marnabois ai. Anggo hita marpangunsandeian bani Jahowa, lang pitah ilatih Ia hita, tapi ipargogohi do homa!​—1 Ptr. 5:10.

14. Sonaha 2 Korint 12:9, 10 mangurupi hita ase totap martahan?

¹⁴ Bahat do homa tantangan ni si Paulus. Ongga do ia irisai janah iparburu. Sipata galek do homa pangahapni halani ‘duri ibagas dagingni’. (2 Kor. 12:7) Tapi lang ra ia soh mangidangi Jahowa. Sai totap do ia marpangunsandeian hu Bani. (Basa 2 Korint 12:9, 10.) Halani ai, iurupi Jahowa ma si Paulus ase totap martahan.

15. Anggo itiru hita si Paulus, aha ma na iahapkon hita?

¹⁵ Ra do irisai atap iparburu halak hita halani haporsayaonta. Dong do homa hita na galek atap pe borit-boritan. Tapi anggo itiru hita si Paulus, gabe boi ma iahapkon hita pangurupion ni Jahowa.

16. Porini borit-boritan nasiam, aha do na boi bahenonmu?

¹⁶ Halani naboritmu, ai lalab do nasiam i podoman atap i kursi roda? Ai domma payah iahap nasiam mardalan, atap domma hurang pangidahmu? Anggo sonai situasimu, nasiam boi totap mangidangi Jahowa rap pakon na maposo ampa na sehat. Bahat do na matua ampa na galek na totap marlintun i dalan hagoluhan ai. Sedo halani gogohni tarbahen sidea ai. Tapi, halani marpangunsandeian hubani Jahowa gabe ipargogohi ma sidea. Totap do itangar sidea acara partumpuan humbani talepon atap humbani internet. Marbarita do homa sidea hubani dokter, perawat, ampa hade-hadeni.

17. Sonaha do pangahap ni Jahowa mangidah halak na borit-boritan?

¹⁷ Ulang ma nasiam maretek ni uhur halani domma hurang gogohmu mangidangi Jahowa. Totap do ihaholongi Jahowa nasiam, janah idingat do pangidangionmu sadokah on. Seng ongga tadingkonon-Ni nasiam. (Ps. 9:11) Lambin dohor do Ia bamu. Pardiateihon ma pangalaman ni hasomanta naboru na lalab borit-boritan. Nini do, “Halani lambin bahatni naboritku, gabe lambin sunsah ma ahu marbarita. Tapi hubotoh do hassi pe otik  na boi hubahen sonari bani Jahowa, malas do uhur-Ni manjalo ai. Gabe malas ma homa uhurhu mardingat ai.” Jadi sanggah maretek ni uhur ham, dingat ma lang pitah ham na sonai. Pingkirhon ma siusihan na ibahen si Paulus, janah rimangi ma na ihatahon ia, “Sonang do uhurhu ibagas hagalekon, . . . ai sanggah galek ahu, ijai do ahu margogoh.”​—2 Kor. 12:10.

18. Tantangan na borat aha do na iahapkon piga-piga hasomanta?

¹⁸ Dong do homa tantangan na legan na iahapkon hasomanta. Ra do ai lang boi ididah atap iarusi hita. Umpamani, ra do adong hasomanta na depresi janah holsohan. Mase borat on bani sidea? Halani anggo dong hasomanta na maponggol tanganni atap dong na pitah hundul i kursi roda, mintor boi do ididah hita ai janah mintor sirsir do hita mangurupi. Tapi anggo dong hasomanta na depresi, ra do lang mintor boi ididah hita ai. Sasintongni dos do boratni tantangan ni halak sisonai pakon na maponggol tanganni. Tapi halani lang mintor boi ididah hita atap pe ibotoh hita sitarononni, ra do lang adong na mamparuhurhonsi atap mambere pangurupion hu bani.

19. Aha ma na boi iparlajari hita humbani si Mepiboset?

¹⁹ Anggo dong naboritmu, atap anggo iahap ham lang dong na mangarusi ham, ra do pangalaman ni si Mepiboset boi mangapoh ham. (2 Sam. 4:4) Repat do ia janah ongga do lepak pambahenan ni si Daud hu bani, hape lang dong salahni. Hassi pe sonai, lang borit uhurni. Ihargai ia do aha na dapotsi. Janah idingat ia do pambahenan ni si Daud na dear hu bani. (2 Sam. 9:6-10) Jadi sanggah lepak si Daud, lang manggila ia. Lang borit uhurni halani ai, janah lang homa isalahkon ia Jahowa. Na sipontingan bani, sonaha ase ia boi mangurupi raja na ipilih Jahowa. (2 Sam. 16:1-4; 19:24-30) Halani ai, ibahen Jahowa ma ase isuratkon pangalaman ni si Mepiboset ai bahen parlajaran hubanta.​—Rom 15:4.

20. Aha do na iahapkon piga-piga hasoman halani holsohan, tapi aha do na mambahen pos uhur ni sidea?

²⁰ Halani holsoh ni uhur, dong do sanina botou na maila atap pe mabiar sanggah i tongah-tongah ni buei halak. Hassi pe sonai, totap do sidea roh hu partumpuan ampa hu kebaktian. Hassi pe iahap sidea lang urah marbuali pakon na legan, tapi totap do sidea marbarita. Anggo sonai do homa iahap ham, pos ma uhurmu bahat do homa hasoman na sonai. Malas do uhur ni Jahowa halani domma humbani tuk ni gogohmu ham mangidangi-Si. Sasintongni, boi pe ham martahan ronsi sonari, on patuduhkon ipasu-pasu janah ipargogohi  Jahowa do ham. * (Pil. 4:6, 7; 1 Ptr. 5:7) Pos ma uhurmu iharosuhkon Jahowa do ham, anggo marusaha ham mangidangi-Si hassi pe dong naboritmu atap pe holsoh ni uhur.

21. Aha do na boi ibahen hita marhitei pangurupion ni Jahowa?

²¹ Tontu malas uhurta mambotoh dong do bedani parlumbaan i Junani hinan pakon parlumbaan ni halak Kristen. Bani parlumbaan i Junani, pitah sahalak do na monang. Tapi anggo bani parlumbaonta, ganup do boi mandapot hagoluhan sadokah ni dokahni. (Joh 3:16) Bani parlumbaan i Junani, maningon halak na gogoh janah sehat do na dihut marlintun. Anggo lang talu ma sidea holi. Tapi anggo bani parlumbaonta, halak na galek pe boi do martahan. (2 Kor. 4:16) Marhitei pangurupion ni Jahowa, ganup hita boi marlintun das hu ujung.