1. Kai nge si arus silakoken?

NGGIT nge kam ikut bas sada perlumban si itehndu mesera ngelakokenca, terlebih ka sanga kam sakit ntah pe latih iakapndu? Banci saja lang. Amin gia bage, ikataken Rasul Paulus maka kerina kalak Kristen sangana ikut bas sada perlumban. (Heb. 12:1) Kerina kita, la soal nggo metua ntah pe nguda denga, megegeh ntah lang, arus kita megenggeng seh ku kedungenna gelah banci sidat hadiah si ijanjiken Jahwe.​—Mat. 24:13.

2. Menurut 2 Timotius 4:7, 8, ngkai maka banci inasehati Paulus kalak si deban gelah terus kiam?

² Paulus nggo kiam bas perlumban e “seh garis akhir.” (Baca 2 Timotius 4:7, 8.) Emaka, banci inasehatina kalak si deban gelah terus kiam seh ku garis akhir. Tapi situhuna, perlumban kai kin si imaksudken Paulus e?

3. Perlumban kai kin si imaksudken Paulus?

³ Mon-mon, igunaken Paulus kai si lit hubungenna ras perlumban i Junani mbarenda guna ngajarken kai si penting. (1 Kor. 9:25-27; 2 Tim. 2:5) Lit piga-piga kali ibandingken Paulus kegeluhen kalak Kristen ras lomba lari. (1 Kor. 9:24; Gal. 2:2; Pil. 2:16) Sekalak jelma ikataken mulai ikut bas “lomba lari” e sanga ibaktikenna dirina man Jahwe janah iperidiken. (1 Pet. 3:21) Enggo seh ia ku garis akhir sanga ibere Jahwe ia hadiah eme kegeluhen si rasa lalap.​—Mat. 25:31-34, 46; 2 Tim. 4:8.

4. Kai kari sibahas bas artikel enda?

⁴ I bas kai saja lomba lari jarak jauh seri ras kegeluhenta selaku  kalak Kristen? Lit piga-piga. Mari sibahas telu saja. Si pertama, arus kita kiam bas dalan si benar. Si peduaken, arus kita fokus ku garis akhir. Janah si peteluken, arus kita terus kiam aminna pe lit masalahta.

5. Dalan geluh si apai nge si arus siikuti? Janah ngkai?

⁵ Gelah kalak si kiam banci dat hadiah, arus ia kiam bas dalan si nggo itentuken. Bage ka pe, adi sidat ateta hadiah eme kegeluhen si rasa lalap, arus siikutken dalan geluh si nggo iajarken Kristus. (Perb. 20:24; 1 Pet. 2:21) Tapi, Setan ras kalak si ipengaruhina la senang adi siikutken dalan e. Ate kalak e terus ‘siikutken perbahanenna.’ (1 Pet. 4:4) Itokoh-tokohina dalan geluhta janah ikatakenna maka ulin dalan geluhna. Iakapna dalan geluhna e banci erban ia reh bebasna. Tapi si e labo tuhu.​—2 Pet. 2:19.

6. Kai si banci ipelajarindu arah pengalamen Brian?

⁶ Adi lit si ngikuti dalan geluh kalak si ipengaruhi Setan, dungna sadar me ia maka dalan geluh e labo erban ia bebas. Malahen ia jadi budak Setan ras budak sura-surana sendiri. (Rom. 6:16) Perdiateken pengalamen Brian. Iajari orang tuana ia ngikutken dalan geluh si iajarken Kristus. Tapi sanga ia remaja, sangsi ia banci nge meriah kari ukurna adi ikutkenna dalan geluh e. Ibanna me keputusen ngikutken patoken bas doni Setan enda. Tapi, ikataken Brian maka la isadarina kepeken kebebasen si iarapkenna e erban ia nggo ketagihen ngelakoken kai si la mehuli. Nina, “Make narkoba aku, minem-minem, janah kulakoken perbahanen seks si salah. Sedekah piga-piga tahun kenca si e, kucubaken ka erbage-bage jenis narkoba si lebih keras, emaka reh canduna kel aku. . . . Mulai me kudayaken narkoba gelah banci kubiayai kebiasanku e.” Dungna, iban Brian me keputusen guna nggeluh ngikutken patoken Jahwe. Iubahna dalan geluhna janah iperidiken ia bas tahun 2001. Gundari, meriah kel ukurna perban ikutkenna dalan geluh si iajarken Kristus. *

7. Menurut Matius 7:13, 14, lit dua dalan si man pilihenta. Kai e?

⁷ Seh kel pentingna milih dalan si benar e! Ate Setan ngadi min kita kerina kiam bas dalan si sempit si “nuju ku kegeluhen,” janah lawes kita ku dalan si mbelang si iikutken nterem jelma. Riahen iakap nterem jelma bas dalan e perban menukah kel ndalanisa. Tapi, dalan e “nuju ku kematen.” (Baca Matius 7:13, 14.) Gelah tetap kita bas dalan si benar  janah la ku jah ku je ukurta, perlu kita tek man Jahwe janah sibegiken Ia.

8. Adi lit sekalak pelari si tertuktuk, kai nge si ilakokenna?

⁸ Gelah la tertuktuk, pelari jarak jauh biasana mperdiateken dalan si lit i lebe-lebena. Aminna pe bage, tetap nge kalak e banci tertuktuk iban pelari si deban ntah pe perban lubang si lit bas dalan. Tapi, bicara ndabuh pe kalak e, mis kalak e cinder janah kiam mulihi. Labo kalak e fokus man kai si erban tertuktuk, tapi fokus ku garis akhir bage pe ku hadiah si iarapkenna.

9. Adi tertuktuk kita, kai si perlu silakoken?

⁹ Bas perlumban Kristen, banci saja rusur kita tertuktuk perban salah pengeranata ntah pe perbahanenta. Ntah, banci saja kitik ukurta iban turang seninata. Arusna ula kita sengget adi e terjadi. Kerina kita la sempurna, janah kiam kita bas dalan si sempit si nuju ku kegeluhen. Emaka, mon-mon banci kita siantuken ras turang seninata. Bagi si ikataken Paulus, banci saja lit ‘alasenta megelut’ iban turang seninata, bage pe sebalikna. (Kol. 3:13) Tapi, asangken fokus kita man kai si erban kita tertuktuk, padin kita fokus ku hadiah si nandangi sidat. Janah adi tertuktuk kita, arus kita cinder janah kiam mulihi. Adi terus kitik ukurta janah lanai kita nggit ngelayani Jahwe, la banci kita seh ku garis akhir janah la sidat hadiah. Selain si e, kita pe banci erban mesera iakap kalak si deban terus kiam.

10. Kai si banci silakoken gelah la kita jadi ‘batu si erban kalak tertuktuk’?

¹⁰ Lit ka cara si deban gelah la kita jadi ‘batu si erban kalak tertuktuk.’ Arus siusahaken mengalah man turang seninata janah la sipaksaken sura-surata. (Rom. 14:13, 19-21; 1 Kor. 8:9, 13) Alu bage, kita la bagi pelari-pelari si ersaing i bas lomba lari. Si iusahaken kalak e ndatken hadiah man dirina saja. Si iukurina ngenca eme uga gelah banci menang. Banci saja isorongkenna pelari si deban ku samping gelah banci ia si arah lebe. Tapi kita la bage. La kita ersaing ras turang seninata. (Gal. 5:26; 6:4) Tapi, sisampati ateta kalak si deban gelah reh teremna si banci  seh ku garis akhir radu ras kita janah ndatken hadiah eme kegeluhen si rasa lalap. Emaka, siusahaken ateta ndalanken nasehat Paulus guna ‘mperdiateken kepentingen kalak si deban labo kepentingenta saja.’​—Pil. 2:4.

11. Pelari arus fokus man kai? Janah ngkai?

¹¹ Selain mperdiateken dalan si lit i lebe-lebena, pelari bas perlumban pe arus ka fokus ku garis akhir. Aminna pe lenga tuhu-tuhu idah kalak e garis e, banci ibayangkenna dirina nggo seh bas garis akhir janah dat hadiah. Alu bage, banci terus semangat kalak e kiam.

12. Kai si ijanjiken Jahwe man banta?

¹² Kai nge sidat adi berhasil kita bas perlumban Kristen? Perban mehuli kel Jahwe e, erjanji Ia mereken hadiah man banta eme kegeluhen si rasa lalap, i surga bage pe bas pardis i doni. Ikataken Pustaka kai saja si banci sinanami bas wari si pepagi. Alu bage, banci sibayangken uga riahna geluhta pagi. Adi terus sibayangken arapen si ijanjiken Jahwe e, banci kita terus kiam alu megenggeng janah la nyerah.

13. Kai nge kelebihenta asangken pelari bas lomba lari?

¹³ Pelari-pelari bas perlumban i Junani mbarenda arus iadapina melala tentangen, misalna latih iakapna ras sakit ia. Tapi, si banci iandalken kalak e eme pelatihen si nggo idatna ras gegehna saja ngenca. Adi ibandingken ras kalak e, kita lit kelebihenta. Labo ngenca nggo sidat pelatihen gelah banci terus kiam bas perlumban. Sidat ka gegeh bas Jahwe nari, janah gegeh e la lit batasna. Adi siandalken Jahwe, erjanji Ia mereken pelatihen banta janah ibanNa kita megegeh!​—1 Pet. 5:10.

14. Kai si ikataken bas 2 Korinti 12:9, 10 si banci nampati kita ngadapi masalah?

¹⁴ Arus Paulus erjuang ngadapi melala tentangen. Misalna, ihina kalak ia ras isiksa. Mon-mon Paulus pe lemah iakapna bana janah arus ia erjuang perban lit ‘duri i bas dagingna.’ (2 Kor. 12:7) Tapi, amin gia iadapi Paulus kerina masalah e, la ia ngadi ngelayani Jahwe. Malahen ianggapna kerina e jadi kesempaten gelah lebih ngandalken Jahwe. (Baca 2 Korinti 12:9, 10.) Perban bage cara Paulus rukur, isampati Jahwe ia ngadapi kerina masalahna.

15. Adi siusih Paulus, kai nge si banci sigejapken?

¹⁵ Bagi Paulus, kita pe banci saja ihina ntah ianiaya perban kinitekenta. Banci saja kita pe arus erjuang perban mekelek pinakitta ntah pe perban latih kel siakap. Tapi adi siusih Paulus, kerina masalah e banci siban jadi kesempaten guna nggejapken penampat Jahwe si perkeleng.

16. Aminna pe lit pinakitndu, kai si banci ilakokenndu?

¹⁶ Sangana nge kam ampar bas ingan medem ntah pe kundul bas kursi roda? Mesui nge sangana tihunndu ntah pe lanai terang pengidahndu? Adi bage, banci nge kam kiam bas dalan si nuju ku kegeluhen radu ras turang senina si nguda denga ras sehat? Pasti banci! Enterem turang seninata si nggo metua ntah pe si sakit banci ka tetap kiam bas dalan si nuju ku kegeluhen. Banci ia tetap kiam labo perban gegehna sendiri. Idat kalak e gegeh arah Jahwe sanga ibegina perpulungen arah telepon ntah pe itontonna rekamen perpulungen arah sambungen Internet. Iusahakenna ka erberita man dokter, perawat, bage pe man kade-kadena si reh.

17. Uga nge perasan Jahwe nandangi turang seninata si lit pinakitna?

¹⁷ Adi lanai melala si banci ilakokenndu  man Jahwe, ula kitik ukurndu ntah pe iakapndu la kam banci megenggeng seh ku kedungenna. Keleng ate Jahwe kam perban erkiniteken kam man baNa janah nggo setia kam ngelayani ia ertahun-tahun dekahna. Gundari, iperlukenndu penampatNa lebih asa si nggo-nggona janah la pernah kam itadingkenNa. (Msm. 9:11) Malahen, reh deherna Ia ras kam. Perdiateken kai nina sekalak turang seninata si arus erjuang ngelawan piga-piga pinakitna, “Perban terus reh parahna pinakitku, nggo kurang kesempatenku erberita. Tapi, amin gia sitik ngenca si banci kubereken, kuteh meriah nge ukur Jahwe. Enda erban meriah ukurku.” Sanga kitik ukurndu, ingetlah kam labo sisada perban Jahwe ras kam. Cuba ukurindu Paulus janah ingetlah kata-katana si mpegegehi enda, “Emaka senang kuakap sanga aku lemah, . . . Paksa aku lemah, aku jadi megegeh.”​—2 Kor. 12:10.

18. Tentangen kai si iadapi piga-piga turang seninata?

¹⁸ Lit ka tentangen si deban si iadapi piga-piga turang seninata si kiam bas dalan si nuju ku kegeluhen. Iadapina masalah si ise pe la metehsa. Misalna, terganggu mentalna, stres ia, ntah pe seh kel ia kuatirna, emaka arus ia erjuang ngadapi keadanna e. Engkai maka mesera kel situasi si iadapi umat Jahwe e? Adi lit kalak penggel tulanna ntah pe kundul ia bas kursi roda, banci idah kalak masalahna e janah tersuruh ukurna nampatisa. Tapi kalak si terganggu mentalna ntah pe stres janah erjuang ia ngadapisa, banci saja teridah la lit masalahna. Padahal situhuna mesui nge iakapna bali bagi si igejapken kalak si penggel tulanna. Tapi perban la lit kalak si metehsa, banci saja la lit si nampati ia ras mperdiatekenca.

19. Kai si banci sipelajari arah Mepiboset?

¹⁹ Adi sangana iadapindu masalah janah salah paham kalak man bandu, banci kam terpegegehi arah contoh Mepiboset. (2 Sam. 4:4) Mepiboset e cacat, janah arus ia erjuang ngadapi keadanna e. Raja Daud pe pernah la adil man bana. Situhuna kai si terjadi man Mepiboset e labo perban salahna. Amin gia bage, la negatif perukurenna. Iergaina kerina si mehuli si ialokenna. Ngata bujur kel ia perban pernah mehuli Daud man bana. (2 Sam. 9:6-10) Emaka, sanga salah paham Daud man Mepiboset janah la adil perbahanen Daud man bana, iusahaken Mepiboset ngangkai kerina situasi si nggo terjadi. Kesalahen Daud e la erban kitik ukurna. Janah la isalahkenna Jahwe kerna kai si ilakoken Daud man bana. Si pentingna man Mepiboset eme ndukung raja si ilantik Jahwe. (2 Sam. 16:1-4; 19:24-30) Ipastiken Jahwe  gelah contoh Mepiboset e itulis bas Pustaka gelah banci kita erlajar arah ia.​—Rom. 15:4.

20. Perban seh kel kuatirna piga-piga turang seninata, kai pengaruhna man bana? Tapi, banci kalak e tek kerna kai?

²⁰ Perban seh kel kuatirna piga-piga turang seninata, banci ia gugup janah la ia pang adi jumpa ras kalak si deban. Banci saja la kapna meriah bas jelma si nterem. Amin gia bage, terus ia reh ku perpulungen ras kebaktin. Ntah banci saja mesera iakapna ngerana ras kalak si la itandaina, tapi tetap ia erberita. Adi bage si iadapindu, kam labo sisada. Melala turang seninata si bagi kam. Ingetlah meriah ukur Jahwe ngidah kai si nggo ilakokenndu alu bulat ukur. Situhuna banci kam setia seh asa gundari, e sada bukti maka nggo ipasu-pasu Jahwe kam janah ibereNa gegeh si iperlukenndu. * (Pil. 4:6, 7; 1 Pet. 5:7) Adi terus ilayanindu Jahwe aminna pe kam sangana stres ntah pe sakit, banci kam tek maka nggo meriah ibanndu ukur Jahwe.

21. Alu penampat Jahwe, kai si banci silakoken?

²¹ Ngata bujur kel kita perban perlumban si ikataken Paulus la seri ras lomba lari situhu-tuhu. Bas perlumban i jaman Pustaka mbarenda, sada ngenca si menang janah dat hadiah. Tapi bas perlumban si nuju ku kegeluhen, kerina kalak banci dat hadiah kegeluhen si rasa lalap adi kiam seh ku garis akhir. (Joh. 3:16) Selain si e, bas lomba lari kerina si ikut arus megegeh. Adi lang, banci saja la ia menang. Tapi bas perlumban si sangana siikuti, nterem arah kita si ngadapi masalah kesehaten, tapi terus kita megenggeng. (2 Kor. 4:16) Alu penampat Jahwe, kerina kita banci kiam bas perlumban e seh ku garis akhir!