1. Weh aala wi haftu du?

YOO wuda waahn ron wahn rays weh yu noa wahn haad fi win? How if yu feel sik, er taiyad? Yu praabli wudn waahn du dat ataal. Bot di apasl Paal mi seh dat evri chroo chroo Kristyan di ron eena wahn rays. (Heeb. 12:1) An aala wi, weda wi yong er oal, ga lata enerji er wi taiyad, haftu bayr op til wi reech di finishin lain if wi waahn geh di praiz weh Jehoava aafa wi.—Mach. 24:13.

2. Laik weh 2 Timoti 4:7, 8 seh, wai Paal kuda mi gi wi dis advais?

² Paal kuda mi giv wi dis advais bikaaz hihn “don ron di rays aredi,” an ih mi “faytful tu di en.” (Reed 2 Timoti 4:7, 8.) Bot da weh kaina rays Paal mi-di taak bowt?

3. Wat da di rays weh Paal mi rait bowt?

³ Sohntaim Paal mi rait bowt weh hapm joorin di gaym dehn weh dehn yoostu play da Greece fi teech sohn impoatant lesn. (1 Kor. 9:25-27; 2 Tim. 2:5) Lata taim hihn mi yooz di egzampl a sombadi weh di ron wahn rays fi eksplayn di laif weh wahn Kristyan sopoas tu liv. (1 Kor. 9:24; Gal. 2:2; Fil. 2:16) Wahn persn staat ron eena dis rays wen ih dedikayt ihself tu Jehoava ahn geh baptaiz. (1 Peet. 3:21) Ih kraas di finishin lain wen Jehoava giv ahn di praiz weh da evalastin laif.—Mach. 25:31-34, 46; 2 Tim. 4:8.

4. Weh wi wahn kansida eena dis aatikl?

⁴ Wahn lata wayz deh fi kompyaa wahn maraton rays tu di laif weh wahn Kristyan fi liv. Mek wi luk pahn chree a dehn. Fers, wi haftu stay pahn di karek chrak. Sekant, wi haftu foakos pahn di finishin lain. Ahn terd, wi haftu bayr op ahn kantinyu ron eevn wen wi fays prablemz.

5. Wat da di chrak weh wi haftu fala, ahn wai?

⁵ Eena wahn reel rays, if yu waahn win di praiz yu haftu ron pahn di rait chrak fahn staat tu finish. Saym way soh, if wi waahn win di praiz a evalastin laif, wi haftu fala di Kristyan way a laif. (Aks 20:24; 1 Peet. 2:21) Bot Saytan ahn peepl weh fala fi hihn egzampl waahn wi fala wahn difrent road. Dehn waahn mek wi “jain dehn agen.” (1 Peet. 4:4) Dehn chrai tek wi mek papishoh, ahn dehn klaym seh dat di way how dehn di liv fi dehn laif beta; ahn leed tu freedom. Bot da klaym da loan lai.—2 Peet. 2:19.

6. Weh wi laan fahn Brian egzampl?

⁶ Enibadi weh ron lang wid peepl hoo fala di road weh Saytan werl inkorij dehn fi fala wahn fain owt kwik taim dat da road noh leed tu freedom. Insteda dat, enibadi weh ron pahn da road wahn bee wahn slayv tu Saytan ahn tu dehn oan dizaiyaz. (Roam. 6:16) Kansida Brian egzampl. Fi hihn payrents mi inkorij hihn fi fala di Kristyan way a laif. Bot wen hihn da-mi wahn teenayja, ih mi staat tu kweschan weda er nat sombadi wuda hapi di liv da kaina laif. Brian mi chooz fi ron wid peepl weh fala Saytan standadz. Hihn seh: “Ah neva kanshos dat di soa-kaal freedom weh Ai mi waahn wuda mi get mi intu tingz weh ku hert mi. Ah mi staat tek jrogz, jrink lata lika, ahn sleep rong. Oava di neks fyoo yaaz, Ah mi staat tu tek schranga jrogz, an Ah mi en op laik wahn slayv tu lata dehn. . . . Ah mi staat sel jrogz fi sopoat di kaina laif weh Ah mi-di liv.” Afta wahn wail, Brian mi disaid fi liv bai Jehoava standadz. Hihn chaynj di road weh ih mi-di ron pan an ih mi geh baptaiz eena 2001. Now ih hapi fi chroo, bikaaz ih di fala di Kristyan way a laif. *

7. Akaadn tu Machyu 7:13, 14, wich too road wi haftu chooz fram?

⁷ Ih veri impoatant fi chooz fi ron pahn di rait road! Saytan waahn mek aala wi stap ron pahn di naro road weh ‘leed tu laif’ ahn kraas oava tu di waid road weh moas a di peepl eena dis werl deh pan. Da road papyula an ih eezi fi chravl pan. Bot da road ‘leed tu dischrokshan.’ (Reed Machyu 7:13, 14; NW) * If wi waahn stay pahn di karek road ahn noh geh dischraktid, wi haftu chros Jehoava ahn lisn tu ahn.

8. Weh wahn rona du if ih stombl?

⁸ Enibadi weh ron eena wahn maraton rays haftu kip dehn foakos pahn di road weh deh rait fronta dehn fi mek dehn noh stombl. Bot wahn nada rona mait stil chrip dehn dong bai aksident, er dehn mait step eena wahn pat hoal. If dehn doo faal dong, dehn get rait bak op ahn kantinyu ron. Dehn noh foakos pahn weh mek dehn stombl. Dehn mayn foakos da noh fi di luk pahn weh mek dehn stombl, bot fi foakos pan di praiz weh da di hoap fi win.

9. Weh wee shuda du if wi stombl?

⁹ Eena fi wee rays wi mait stombl lata taim, kaaz wi du er seh di rang ting. Er maybi wi geh hert sayka weh sombadi els weh di ron lang wid wi mek wahn mistayk. Noh bee sopraiz wen tingz laik dat hapm. Non a wi perfek, an aala wi di ron pahn di saym naro road tu laif. Soh sohntaim wi wahn “bok op” intu wan anada. Bot Paal mi seh dat “if enibadi du unu eniting, fagiv dehn.” (Kol. 3:13) Soh wi noh fi foakos pahn weh mek wi stombl. Raada, wi fi foakos pahn di praiz weh deh hed a wi. If wi doo stombl, mek wi chooz fi get op bak ahn kip aan di ron. If wi geh beks, hoal malis ahn rifyooz fi get op bak, wi noh wahn kraas di finishin lain ahn wi noh wahn geh no praiz. Pahn tap a dat, wi wahn praabli en op di get eena sombadi els way wail dehn di chrai ron di rays pahn di naro road weh leed tu laif.

10. How wi ku mek shoar dat wi noh di “stombl” nobadi?

¹⁰ Wahn nada way wi ku mek shoar wi noh “stombl” nobadi els weh di ron eena di rays fi laif da fi mek dehn du tingz fi dehn way insteda aalwayz insis dat dehn du tingz fi wee way. (Roam. 14:13, 19-21; 1 Kor. 8:9, 13) Bot dat da wan a di mayn wayz how wee ahn sombadi weh ron eena wahn rays difrent fahn wan anada. Wahn persn weh ron eena wahn rays wahn kompeet gens evribadi els weh di ron, kaaz eech persn weh di ron waahn win di praiz fi dehnself. Dehn noh waahn nobadi els geh di praiz. Soh dehn onli luk owt fi dehn oan self ahn kansaan bowt dehnself wid wateva dehn haftu du fi win. Soh dehn  mait chrai shub evribadi els owta di way mek dehn ku ron lef dehn. Bot wee noh di kompeet gens wan anada. (Gal. 5:26; 6:4) Fi wee goal da fi help az moch peepl az wi kud fi kraas di finishin lain ahn win di praiz, weh da evalastin laif. Soh wi chrai fi aplai Paal kongsl fi “luk owt fi wan anada, ahn noh oanli fi [wi] oanself.”—Fil. 2:4.

11. Weh wahn rona foakos pan, ahn wai?

¹¹ Wahn persn weh di ron eena wahn rays haftu du moa dan jos luk pahn di road weh deh heda ahn. Ih haftu foakos pahn di finishin lain tu. Eevn if ih deh tu faar fi mek ih see’t, ih ku imajin ihself di kraas it ahn di geh di praiz. If ih kip di tink bowt da praiz ahn how ih wahn win it, ih wahn waahn kantinyu ron.

12. Weh Jehoava pramis ih peepl?

¹² Eena di rays weh wi di ron, Jehoava pramis ih peepl dat dehn wahn geh di praiz if dehn finish di rays. Da praiz da evalastin laif, eeda da hevn er eena di paradais rait ya pahn di ert. Di Baibl tel wi wahn lat bowt da praiz, soh wi ku imajin jos how wandaful wi laif wahn bee afta wi finish ron di rays. If wi kip di tink bowt wi hoap fi di fyoocha, wi wahn kip di ron noh mata wat, ahn eevn if wi stombl wi wahn get op bak.

13. Weh wee gat weh wahn akchwal rona noh gat?

¹³ Eena di Greek gaym dehn, di peepl weh mi ron eena wahn rays mi fays difrent chalenjiz, laik wen dehn geh taiyad er feel payn. Bot aal weh dehn mi gat fi help dehn da-mi dehn chraynin ahn dehn oan schrent. Stilyet wi ga sohnting weh wahn akchwal rona noh gat. Wi geh chraynin weh teech wi how fi ron di rays a laif. Bot wee aalso ku jraa schrent fahn Jehoava, ahn hihn noh ga no limit pahn humoch powa hihn ku gi wi. If wi pen pahn Jehoava, hihn pramis fi chrayn wi ahn mek wi schrang!—1 Peet. 5:10.

14. How 2 Korintyanz 12:9, 10 help wi fi fays chalenjiz?

¹⁴ Paal mi fays wahn lata chalenjiz. Peepl yoostu persikyoot ahn, an dehn yoostu insolt ahn op. Pahn tap a dat, sohntaim hihn mi feel week, an ih mi haftu deel wid wahn prablem weh hihn mi seh da laik ‘wahn big prikl eena ih badi.’ (2 Kor. 12:7) Bot hihn neva tek dehndeh chalenj az wahn ekskyoos fi giv op. Raada, hihn mi luk pahn dehn laik wahn apachooniti fi pen pahn Jehoava. (Reed 2 Korintyanz 12:9, 10.) Sayka weh Paal mi luk pahn tingz da way, Jehoava mi help ahn chroo aala ih chraiyalz.

15. If wi fala Paal egzampl, weh wi wahn get?

¹⁵ Jos laik weh Paal mi haftu deel wid, peepl mait insolt wi er persikyoot wi bikaaz a wi fayt. Wi mait haftu deel wid helt prablemz er wi mait taiyad owt. Bot if wi kapi Paal egzampl, eech chalenj weh wi haftu fays ku bee wahn apachooniti fi feel Jehoava lovin sopoat.

16. Weh yu ku du eevn if yu sofa fahn helt prablemz?

¹⁶ How fi yoo helt stan? Yu bong tu wahn bed er wahn weelchyaa? Yu nee dehn week er yu kyaahn si gud? If dat da di kays, yu tink yoo ku ron di rays lang wid peepl weh yong ahn helti? Af koars yu kud! Lata peepl weh sik er weh di geh oal di ron pahn di road weh leed tu laif. Bot dehn kyaahn du dat pahn dehn oan. Insteda dat, dehn geh dehn schrent fahn Jehoava. Dehn du dat wen dehn lisn tu di Kristyan meetin dehn oava di foan er wen dehn wach di meetin dehn pahn di websait stream.pr418.com. Ahn wen dehn preech tu di dakta dehn, di ners dehn, ahn tu dehn faamli.

17. How Jehoava feel bowt peepl weh noh helti ahn schrang?

 ¹⁷ If yu kyaahn du evriting weh yu waahn du fi Jehoava, noh mek dat diskorij yu fahn di ron pahn di road weh leed tu laif. Jehoava lov yu bikaaz yu ga fayt eena ahn, an bikaaz a aal weh yu du far ahn oava di yaaz. Moa dan eva bifoa, yu need fi hihn help ahn hihn noh wahn lef yu bai yuself. (Ps. 9:10) Insteda dat, hihn wahn jraa eevn kloasa tu yu. Noatis weh wahn sista weh ga sohn seeryos helt prablem seh: “Bikaaz mi helt di geh wers ahn wers, Ah fain dat Ah noh geh az moch chaans fi shayr di chroot wid ada peepl. Bot Ah noa dat eevn di lee bit weh Ah ku du bring jai tu Jehoava haat, ahn dat mek mee hapi.” Wen yu feel dong, memba dat yu noh deh pahn yu oan. Tink bowt di egzampl weh Paal set, ahn memba weh hihn mi seh: “Ah hapi wen Ah week, . . . kaa wen Ah week, da den Ah schrang.”—2 Kor. 12:10.

18. Wat da wahn ekschra haad chalenj weh sohn peepl fays?

¹⁸ Som peepl weh di ron pahn di road weh leed tu laif fays wahn nada chalenj. Som a dehn di deel wid persnal prablemz weh ada peepl noh noa bowt er mait noh eevn andastan. Fi egzampl, som a dehn dipres er di wori wahn lat ahn dat di schres dehn owt. Da wat mek dehnya kaina prablem ekschra haad fi Jehoava dyaa servants? Bikaaz wen sombadi brok dehn han er haftu deh eena wahn weelchyaa, evribadi els ku si wat da di prablem, ahn dehn wahn feel kompashan ahn waahn help di persn. Bot wen sombadi sofa fahn wahn imoashanal er mental prablem, dehn noh mait shoa eni sain dat dehn ga wahn prablem. Fi dehn sichuwayshan jos az paynful az if dehn mi brok dehn han er dehn fut. Bot bikaaz peepl noh si di prablem, dehn noh si di need fi shoa kompashan.

19. Weh wi laan fahn Mefiboshet egzampl?

¹⁹ If yoo di fays eni a dehndeh kaina chalenj ahn yu feel laik nobadi andastan, Mefiboshet egzampl mait inkorij yu. (2 Sam. 4:4) Hihn mi ga helt prablemz, ahn pahn tap a dat ih mi fays wahn sichuwayshan weh King Dayvid neva chreet ahn fyaa. Mefiboshet neva du notn fi bring dehndeh prablem pan ihself. Bot stilyet, hihn neva geh beks. Hihn mi apreeshiayt di gud tingz weh mi hapm tu ahn. Hihn mi tankful fi di kainis weh Dayvid mi shoa ahn eena di paas. (2 Sam. 9:6-10) Soh wen Dayvid neva chreet ahn fyaa, Mefiboshet mi luk pahn di biga picha. Hihn neva geh beks ahn hoal malis wid Dayvid sayka ih mistayk. An ih neva blaym Jehoava fi weh Dayvid mi du needa. Mefiboshet mi foakos  pahn weh hihn kuda du fi sopoat di king weh Jehoava mi chooz. (2 Sam. 16:1-4; 19:24-30) Jehoava put Mefiboshet gud egzampl eena fi Hihn Werd di Baibl soh dat wi kuda benifit fan it.—Roam. 15:4.

20. How woriz afek sohn peepl, bot weh dehn ku bee shoar a?

²⁰ Sohn bradaz ahn sistaz wori soh moch dat dehn geh nervos rong ada peepl eevn eena naamal evriday sichuwayshanz. Dehn mait fain it haad fi deh eena wahn krowd a peepl, bot stilyet dehn goh da meetin, asembli, ahn kanvenshan. Ih mait bee haad fi dehn taak tu peepl weh dehn noh noa, bot stilyet dehn taak tu peepl eena di minischri. If dat da how yoo feel, yu noh deh pahn yu oan. Lata peepl di deel wid dehnya saym prablem. Memba dat Jehoava pleez wid weh yu du bikaaz yu du it wid aala yu haat. Di fak dat yu noh giv op, da proof dat hihn di bles yu ahn gi yu di schrent weh yu need. * (Fil. 4:6, 7; 1 Peet. 5:7) If yu di serv Jehoava eevn doa yu ga wahn fizikal er wahn imoashanal prablem, yu ku bee shoar dat Jehoava pleez wid yu.

21. Weh aala wi wahn ku du wid Jehoava help?

²¹ Wi ku bee tankful, doh, dat di rays weh Paal taak bowt da noh di egzak saym ting laik wahn naamal rays. Onli wan persn kuda mi win di praiz eena wahn naamal rays eena Baibl taimz. Bot eena fi wee rays, evribadi weh stay faytful ahn noh giv op ku geh di praiz a evalastin laif. (Jan 3:16) An eena wahn naamal rays, evri rona haftu deh eena gud fizikal kandishan, adawaiz dehn praabli noh wahn win di rays. Pahn di ada han, lata wi ga fizikal helt prablemz, bot wi noh giv op. (2 Kor. 4:16) Wid Jehoava help, aala wi wahn ron di rays tu di en!