1. Ka lunbei hadügüni sun kristiánugu?

HÍNSIÑETI hamuga san woun lun lidan wamá aban éibaaguni le uágubei wasubudira hénrengu lan, dántima le sandi wamá o buchá lan wawagu? Chóuruti uá lan. Gama lumoun, ariñagati apostolu Pábulu sun lan kristiánugu inarünitiña wéibaaguña lan aban éibaaguni (Ebü. 12:1). Meberesenga ka lan warumudiribei ni were, súngubei wagía mosu wawandun darí lagumuhóun anhein busén wabéi weresibiruni afayeiruahaü le füramase lubéi Heowá woun (Mat. 24:13).

2. Según 2 Timotéu 4:7, 8, ka uagu gayara lubéi layanuhan Pábulu lau ichouruni?

² Gayaraati meha layanuhan Pábulu lau ichouruni luagu tema le, ladüga gumú lani éibaaguni “chülǘ lumoun lébeha” (aliiha huméi 2 Timotéu 4:7, 8). Ka éibaaguni le uágubei layanuha Pábulu?

3. Ka éibaaguni le uágubei layanuha Pábulu?

³ Lun gayara lan larufudahan Pábulu katei súdiniti, anihein meha dan layusurun hénpulu lídangiñe huraraü le adügǘbei lidan binadu Güresia (1 Ko. 9:25-27; 2 Tim. 2:5). Lidan saragu ókaasion, agoubaguagüda lumuti libagari aban kristiánu luma éibaaguni (1 Ko. 9:24; Gal. 2:2; Fili. 2:16). Gumese lumuti aban gürigia “éibaaguni” le dan le lederegeruni libagari lun Heowá ani badisei ligía (1 Fe. 3:21). Dan le lachülürün lumoun lébeha aba leresibirun afayeiruahaü le lánina ibagari magumuchaditi (Mat. 25:31-34, 46; 2 Tim. 4:8).

4. Kaba wariha lidan arütíkulu le?

⁴ Genegeguati aban éibaaguni migifeti luma libagari aban kristiánu. Ariha wamá ǘrüwa lídangiñe. Furumiñe, mosu woudin lídangiñe üma le buídubei. Libiaman, lunti wíchuguni warihin luagun le ñeinhin baadiwa lubéi. Luma lǘrüwan, mosu mígiraguagüdün  wamá woungua lun katei le eberesehabadiwa.

5. Ka üma lunbei wafalaruni, ani ka uagu?

⁵ Lun gayara lan lagañeiruni aban gürigia éibaaguni, lunti lafalaruni le hariñagubei ha aransehabaña lubá éibaaguni. Ítarameme, anhein busén wabéi weresibiruni afayeiruahaü lánina ibagari magumuchaditi, mosu wafalaruni üma o ligaburi lawinwandun aban kristiánu (Adü. 20:24; 1 Fe. 2:21). Gama lumoun, busenti Satanási hama ha afalarubalin lun háfuridun lubúeingu Bungiu lídangiñe éibaaguni le luma lun wafalaruniña (1 Fe. 4:4). Adügatiña bula lau ligaburi wabagaridun ani ariñaga hagía buidu lan éibaaguni le ñein habéi ladüga gayara lan hadügüni sun le habusenrunbei ñein. Le linarün katei, bulíeiguaaña (2 Fe. 2:19).

6. Ka wafurendeirubei lídangiñe le asuseredubei lun Brian?

⁶ Anhein busén lubéi somu gürigia lidin lídangiñe üma le lafalarubei ubóu le lábugiñebei lubafu Satanási, lachülürüba dan lun líchuguba lan fe, lau lóufudagun, madügün hamani gürigia le habusenrun ñein kei le aubei hasaminara, múdiwarügütiña lidan (Rom. 6:16). Ariha waméi le asuseredubei lun aban íbiri gíriti Brian. Dan meha le irahügili, arufudaha hamuti lagübürigu lun lun lawinwanduni adundehani le tídanbei Bíbülia. Gama lumoun dan meha le wügürimémeeli aba lagumeserun lau machouruni anhein ladügüba lubéi le harufudahabei lagübürigu lun lun gunda lan. Ábati lagumeserun afalarei ligaburi hawinwandun ha adügübalin lugundan Satanási. Ariñagati Brian: “Masaminarun numuti yebe saragu, le lan uágubei nariñaga ñeinba lan nadügei le nabusenrun ligíaba lan adüga lun néiguadun lidoun layusurún katei le mabuidunbei”. Aba lagumeserun Brian éiguada lidoun átaguni, layusurún düroga luma magíaguni. Sigiti ariñaga: “Lau lásügürün irumu, hóuchatina düroga to hanarimetimatu ani aban namudiraguagüdün nungua tun saragu tídangiñe”. Dan lárigiñe aban inebe lan lugumadin Heowá lun. Aba lasansiruni ligaburi lawinwandun ani aba labadiseirun lidan irumu 2001. Ani guentó, léibaaguñein éibaaguni kristiánugu ani gúndaahali le inarüniti. *

7. Según Matéu 7:13, 14, ka bián üma wagibugiñebei?

⁷ Súdiniti lun wanúadiruni üma le buídubei. Busenti Satanási lun wígiruni wéibaagun lidan üma le bürüraübei le anügübei lidoun “ibagari le magumuchaditi” lun wásügürün lidoun üma le ñein lubéi gabaranouga lan le ñéingiñe lubéi héibuga hiibe-agei gürigia. Ménrengunti leibugún lídangiñe “üma le anügübaliña gürigia lidoun féridiguaü” (aliiha huméi Matéu 7:13, 14). Anhein mabuseerun wabéi wasagarún  lídangiñe üma le buídubei, lunti wafiñerun luagu Heowá luma lun waganbuni le lariñagubei woun.

8. Ka hadügübei éibaagutiña dan le hachugeragun ani heigua hagía?

⁸ Ha éibaagubaña dise súnwandan harihin habaruaguóun lun machugeragun hamá. Íbini ítara, gayaraati lidin hagudi lidoun aban huyu o habuguchun luagun hani paaná lun héiguadun. Ánhaña éiguada, aba hiñuragun houngua ani aba hasigirun éibaagua. Metenitiña lun le adügübei lun héiguadun, le unbei hetenira lun hachülürün lidoun lébeha éibaaguni luma lun hibihini afayeiruahaü le hagurabubei hagañeirun.

9. Ka lunbei wadügüni ánhawa achugeragua?

⁹ Lidan éibaaguni kristiánu, háfuga wachugeragun saragu wéiyaasu, másiñati ladüga lan wariñagun odi wadügün somu katei wuribati, o ladüga lan ladügün aban íbiri charati le adügübei lun wagañidun. Siñati laweiridagüdünu katei le wanigi ladüga sun wagía gafigountiwa ani wéibaaguña lidan ligiaméme üma bürüraüti le anügübaliwa lidoun ibagari. Ligíati, aniheinbei dan ñein lan magundani waganagua. Ariñagati Pábulu aniheinbei lan dan wekeheruba lan ladüga ligaburi wani paaná (Kol. 3:13). Gama lumoun, metenibadiwa lun le adügübei lun wachugeragun, lunba afayeiruahaü le lunbei weresibiruni wetenira. Ánhawa éiguada iñuragua wamá ani sigí wamá éibaagua. Meredera wamá múarugu lau igañi ni ekehara, ladüga machülübadiwa lumoun lébeha éibaaguni ani magañeirun wabéi afayeiruahaü. Lubaragiñe lira, gayaraabei ábanbadiwa lan turobuli lidan üma bürüraüti le anügübei lidoun “ibagari le magumuchaditi” houn ha éibaagubaña.

10. Ka lunbei wadügüni lun meberesehan wamaniña amu?

¹⁰ Anhein mabusenrun wabéi lun aban wamá eberesehati houn wánigu paaná lidan éibaaguni, lunti wígirun lun hadügüni le hasaminarunbei dan le gayara lan sin wadügüdarun hawagu lun hadügüni le wabusenrubei (Rom. 14:13, 19-21; 1 Ko. 8:9, 13). Mítaranti éibaaguni le kei éibaaguni le kamanibei. Kada aban hádangiñe sun ha éibaagubaña sügügüwatiña hámagua ani áfaaguati kada aban hádangiñe lun ligíarügü lan agañeira. Liibe-agei dan masaminaruntiña hawagu amu. Másiñati lálugun lun lichugún üma  lun lun ligía lan ubaraü lidan éibaaguni. Ánheinti wagía másügüraguntiwa hama wíbirigu (Gal. 5:26; 6:4). Le wabusenrubei wíderaguniña sun ha wayaraatiña ha lídanbaña éibaaguni kristiánu lun wachülürün úara lidoun lébeha éibaaguni luma lun wibihini afayeiruahaü lánina ibagari magumuchaditi. Ligíati, áfaaguatiwa lun wafalaruni adundehani le líchugubei Pábulu lau lubafu Bungiu lun máluaha wamani lérügü buídubei woun lun ‘wálüahani le buídubei houn amu’ (Fili. 2:4).

11. Ka un hetenira éibaagutiña, ani ka uagu?

¹¹ Lau sun ariha hamá éibaagutiña habaruaguóun, ténitiña giñe lun hachülürün lumoun lébeha. Anhein siñá lubéi harihini lébeha éibaaguni, saminatiña luagu hachülürün lumoun lébeha luma lun hibihini afayeiruahaü. Adügati le lun línchahaniña lun hasigirun.

12. Ka lachoururubei Heowá woun ladüga línsiñehabu?

¹² Lau ínsiñeni, chóurugüda lumuti Heowá woun sun lan ha achülürübaña lumoun lébeha éibaaguni heresibirubei lan afayeiruahaü lánina ibagari magumuchaditi, sielun lan yebe o ya lan ubouagu lidan Paraísu. Rutu Bíbülia ariñahani luagu afayeiruahaü le, lun gayara lan wasaminarun luagu lubuidun ibagari le lunbei wibihini. Eibu wetenirun lun wemenigi, aransetimabadiwa lun wáfaagun lun machugeragun wamá, le adügübei lun machülürün wamá lidoun lébeha éibaaguni.

13. Ka wámabei le úati hama éibaagutiña ha kamanibaña?

¹³ Lidan binadu Güresia, mosu meha mígiraguagüdün hamá éibaagutiña houngua lun lubucha uagu luma lun gáriti. Gama lumoun, mosu meha harabachun luagu le hafurendeirubei luma luagu here guánarügü. Ítara kei hagía, arufudahóuaali giñe woun lun éibaaguni kristiánu. Anihein aban katei wama le úati hama éibaagutiña ha kamanibaña: gayaraati wibihin erei lúmagiñe Heowá ladüga mébehati erei le gayara lubéi íchiga woun. Ánhawa árügüda luagu, füramaseti woun larufudahaba lan woun ani adüga ligíame lun here wamá (1 Fe. 5:10).

14. Ida luba líderaguniwa 2 Korintuna 12:9, 10 lun wagagibudagun luma lénrengunga?

¹⁴ Mosu meha lawandun apostolu Pábulu saragu lénrengunga. Amu luéi lawandun anabúni luma éibaahouni, anihein meha dan lasandiragun lungua mere lan ani mosu meha lawanduni le unbei lagúara “hiiyu charuñu nuagu” (2 Ko. 12:7). Lubaragiñe larihini lénrengunga ligía kei aban katei lun lábürühan larüna aba larihini kei aban chansi lun larufuduni afiñe lan luagu Heowá (aliiha huméi 2 Korintuna 12:9, 10). Ligía lébunabei líderagunbalin Heowá Pábulu.

15. Kaba wasandira ánhawa áyeihei Pábulu?

¹⁵ Kei meha lasuseredun lun apostolu Pábulu, másiñati giñe wanabún o wéibaahoun ladüga wafiñen. Háfuga giñe mosu lan wageindagun luma luriban átuadi o luma lubucha uagu. Gama lumoun ánhawa áyeihei Pábulu, kada aban lídangiñe waturobulin gayaraati liabin lun aban lan chansi lun wasandirun ínsiñeni luagu Heowá luma lun wárügüdün luagu.

16. Ka gayaraabei hadügüni íbini ha wuribabei hátuadi?

¹⁶ Kaba wariñaga hawagu íbirigu ha tídanbaña hagabanan ladüga sandi o ha lídanbaña haláü le gabalabalati, méreeli hagachürügü o lóuguaali harihin? Gayaraagili san héibaagun úara hama ha nibureingiñabaña ani buiti hátuadi? Anha gayaraati. Añahein saragu íbirigu derebuguhaña ani añahein híbiri mabuidunti hátuadi, íbini ítara, héibaaguña lidan éibaaguni le lánina ibagari ani mama lau here guánarügü héibaagua, gayara lubéi hadügüni ladüga erei le líchugubei Heowá houn. Aganbaha hamuti adamuridaguni luéigiñe gágamuru o luéigiñe Internet. Gadan lumutiña dasi le lánina hadügǘn disipulugu lau hapurichihan houn haduheñu, houn surusiagu luma houn anosuhatiña.

17. Ka lasandirubei Heowá hawagu íbirigu ha lóuguaali here?

 ¹⁷ Maweiyasun wamá ígira lun ladügün wasandi lun lábürüha warüna luma lun ladügün lun wasaminarun siñá lan wasigirun éibaagua lidan üma le anügübaliwa lidoun ibagari. Hínsiñetiwa lun Heowá ladüga afiñe wamá luagu luma luagu le winwan wamaalibei lidan weseriwidun lun lau úaraguni. Guentotima megei wamani lídehan ani mígirun lubadiwa (Sal. 9:10). Lubaragiñe lira, layarafadatimaba woun. Ariha waméi le tariñagubei aban íbiri to hanarimeti tisandi: “Kei aganwoundeina liña lan nisandi, eibu dan lóuguaali lan nichansin lun nayanuhan hama amu gürigia luagu inarüni. Subudi numuti murusun lan áfaaguni le nadügübei gunda lan Heowá lau. Ani adügati katei le lun gunda nan”. Dan le wasandiragun woungua maguraasun wamá, haritagua waméi anihein lan Heowá wama. Samina wamá luagu lani Pábulu hénpulu luma luagu lubuidun dimurei le lariñagubei: “Ligía nagundaarúnbei lau débili, [...], lugundun dántima le débili nan, ábatima néredun” (2 Ko. 12:10).

18. Ka lénrengunga úmabei hagagibudagua fiu íbirigu?

¹⁸ Añahein ha éibaagubaña lidan éibaaguni le lánina ibagari gagibuguatiña luma lénrengunga. Hagagibudaguña lubúeingu Heowá ha luma lénrengunga le siñá habéi amu ariha ni gunfuranda, kei burí lanarime íruni o lanarime idiheri. Ka uagu hénrengu lubéi gádantiña? Ladüga dan le láhalachun larüna aban gürigia o lídanñein lan haláü gabalabalati, súngubei ariha hamuti le asuseredubei lun ani másiñati híchugun ídemuei lun. Ánhañati ha asufurirubaña lanarime íruni o lanarime idiheri marihínti ítaraguarügü. Hanarimeti ligari hasandi kamá hamuga gáriti le lasandirubei aban gürigia le halaguaali labu, íbini ítara, másiñati marufudun hamá amu ínsiñeni houn ni lun hetenirun houn lau lubudubu.

19. Ka larufudahabei lani Mefi-bosetü hénpulu woun?

¹⁹ Anhein adüga gádantiwa lun siñá lan wadügün ítaga katei ani sandigua wagía woungua ua lan gunfurandawa wamá, gayaraabei líderaguni abahüdaguni luáguti Mefi-bosetü lun wibihin erei (2 Sam. 4:4). Amu luéi lanarime buleseiti le lasufurirubei, mosu meha lawanduni lóuseruni urúei Dawidi lau marichaü. Máluahan lumuti meha Mefi-bosetü ni aban lídangiñe turobuli ligía, lau sun lira, mígirunti lun ladügün le gádanbalin lun lagañidun. Le buídubei, gebegiti lan meha katei buiti le lúmabei lun. Seremei lumuti Mefi-bosetü areida lan meha urúei Dawidi lun lidan dan le sügühalibei (2 Sam. 9:6-10). Ligíati, dan le wuriba lubéi lóuseruni Dawidi Mefi-bosetü, gunfuranda lumuti sun katei sunsuinagubei. Mígirunti lun ladügün lichara Dawidi lun lagañidun ni lun líchuguni duru luagu Heowá luagu le ladügübei Dawidi. Aba letenirun lun líchuguni lídehan lun urúei le lanúadirubei Bungiu (2 Sam. 16:1-4; 19:24-30). Aba lígirun Heowá lun labürüdǘn lubuidun lani  Mefi-bosetü hénpulu tidan Lererun lun wabuidun guánarügü (Rom. 15:4).

20. Ka lánibei lanarime idiheri hawagun fiu íbirigu ani ka gayaraabei hachoururuni?

²⁰ Ladüga lanarime idiheri, añahein hádangiñe íbirigu sanditiña anufudei ani masandiraguntiña houngua buidu dan le hama hamá amu sagü weyu. Másiñati hénrengu lan houn lun herederun haganagua saragu gürigia, gama lumoun, añahamémegua abasiha lidoun adamuridaguni luma lidoun adamurini wéiriti. Hénrenguti houn hayanuhan hama gürigia ha ibidiñetiña houn, lau sun lira, furitiña apurichiha. Anhein ligía lubéi asuseredubei woun mámarügüñadiwa wábugua. Saragu wíbirigu sügütiña lídangiñe sügǘ libe le. Haritagua waméi hínsiñe lan lun Heowá larihiniwa adügei áfaaguni le tídangiñe sun wanigi. Lau mígirun wamá lun léiguadun warüna, arufudati lira luagu biní lániwa ani ru lumuti erei le wemegeirubei woun * (Fili. 4:6, 7; 1 Fe. 5:7). Ánhawa eseriwida lun Heowá laganagua le gádanbaliwa gayaraati wachoururuni luagu gúndaagüda lani katei le.

21. Ka gayaraabei wadügün seremei lídehan Heowá?

²¹ Kei le aubei warihei, arihúati amu lan éibaaguni le kamanibei lumoun éibaaguni le uágubei lariñaga Pábulu. Lidan éibaaguni lidan tidaani Bíbülia, ábanrügüñein agañeiruti. Ánheinti lidan éibaaguni le kristiánu sun ha úaraguabaña heresibirubei afayeiruahaü le lánina ibagari magumuchaditi (Huan 3:16). Lidan burí éibaaguni le kamanibei, sun meha ha lúnbaña héibaagun mosu meha buidu lan hágubu, anhein mítaran, machourunti meha anhein hagañeiruba lubéi. Lidan le aban oubaü, saragu wádangiñe wuribati wadariragun woungua, lau sun lira, awanhagua awanda (2 Ko. 4:16). Lau lídehan Heowá, sun wagía éibaagua wamuti éibaaguni darí lagumuchun.