1. Unsay kinahanglang himoon natong tanan?

MOAPIL ba ka sa lumba nga nahibaloan nimong lisod, ilabina kon nasakit ka o gikapoy? Tingali dili. Pero si apostol Pablo miingon nga ang tanang tinuod nga Kristohanon naa sa usa ka lumba. (Heb. 12:1) Ug kitang tanan, bata man o tigulang, baskog pa o luya na, kinahanglang molahutay hangtod sa kataposan kon gusto natong madawat ang ganti nga gitanyag ni Jehova.​—Mat. 24:13.

2. Sumala sa 2 Timoteo 4:7, 8, nganong may kagawasan si Pablo sa pagtambag?

² Si Pablo may kagawasan sa pagtambag kay ‘natapos niya ang lumba.’ (Basaha ang 2 Timoteo 4:7, 8.) Pero unsa ang lumba nga gihisgotan ni Pablo?

3. Unsa ang lumba nga gihisgotan ni Pablo?

³ Si Pablo maghisgot usahay ug mga butang nga ginahimo sa mga dula sa karaang Gresya aron magtudlog importanteng mga leksiyon. (1 Cor. 9:25-27; 2 Tim. 2:5) Sa daghang higayon, iyang gitandi ang kinabuhi sa usa ka Kristohanon ngadto sa pagdagan diha sa usa ka lumba. (1 Cor. 9:24; Gal. 2:2, footnote; Filip. 2:16) Ang usa mosugod sa pagdagan niini nga “lumba” dihang siya magpahinungod kang Jehova ug magpabawtismo. (1 Ped. 3:21) Makaabot siya sa finish line dihang ihatag na ni Jehova kaniya ang ganti nga kinabuhing walay kataposan.​—Mat. 25:31-34, 46; 2 Tim. 4:8.

4. Unsay hisgotan niining artikuloha?

⁴ Sa unsang mga paagi ang pagdagan diha sa layog distansiya nga lumba parehas sa Kristohanong pagkinabuhi? Dunay pipila ka paagi nga managsama sila, pero maghisgot lang tag  tulo. Una, kinahanglang mosubay ta sa hustong dalan; ikaduha, kinahanglang magpokus ta sa finish line; ug ikatulo, kinahanglang lahutayon nato ang mga kalisdanan.

5. Unsang dalan ang kinahanglan natong subayon, ug ngano?

⁵ Aron makadawat ug premyo sa literal nga lumba, ang mga magdadagan kinahanglang mosubay ug espesipikong dalan. Sa susama, kon gusto natong makadawat sa ganti nga kinabuhing walay kataposan, kinahanglang subayon nato ang Kristohanong dalan, o paagi sa pagkinabuhi. (Buh. 20:24; 1 Ped. 2:21) Pero dili gusto ni Satanas ug niadtong nagsunod kaniya nga mosubay ta sa Kristohanong dalan sa pagkinabuhi; gusto nila nga modagan ta uban kanila. (1 Ped. 4:4) Ilang gitamay ang dalan sa kinabuhi nga atong gisubay ug sila nag-ingon nga ang dalan nga ilang gisubay mas maayo ug makahatag ug kagawasan. Pero sayop kana.​—2 Ped. 2:19.

6. Unsang leksiyon ang imong nakat-onan kang Brian?

⁶ Si bisan kinsa nga nagdagan uban niadtong naimpluwensiyahan sa kalibotan ni Satanas makaamgo sa dili madugay nga ang dalan nga ilang gisubay motultol diay sa pagkaulipon, dili sa kagawasan. (Roma 6:16) Konsideraha ang nahitabo kang Brian. Gidasig siya sa iyang ginikanan sa pagsubay sa Kristohanong dalan sa kinabuhi. Pero sa natin-edyer na siya, nagduhaduha siya kon makahatag ba niyag kalipay kanang dalana. Midesisyon si Brian nga modagan uban niadtong nagkinabuhi subay sa mga sukdanan ni Satanas. “Wala ko magdahom nga ang gipangandoy nakong kagawasan maoy magdaldal nako sa makadaot nga mga bisyo,” siya miingon. “Sa ngadtongadto, nagdroga ko ug naghuboghubog ug nagkinabuhing imoral. Paglabay sa pipila ka tuig, misugod kog gamit ug mas isog nga mga droga ug naadik ko niana. . . . Nagbaligya kog droga aron masuportahan ang akong bisyo.” Sa ngadtongadto, si Brian midesisyon sa pagkinabuhi subay sa mga sukdanan ni Jehova. Gibiyaan niya ang iyang kanhing dalan ug nagpabawtismo siya niadtong 2001. Siya tinuod nang malipayon karon kay iya nang gisubay ang Kristohanong dalan sa kinabuhi. *

7. Sumala sa Mateo 7:13, 14, unsang duha ka dalan ang atong kapilian?

⁷ Importante gyod nga pilion nato ang hustong dalan! Gusto ni Satanas nga kitang tanan mohunong sa pagdagan diha sa hiktin nga dalan “padulong sa kinabuhi” ug mobalhin sa luag nga dalan nga maoy gisubay sa daghang  tawo sa kalibotan. Daghan ang naa nianang dalana ug mas sayon kanang subayon. Pero kana “padulong sa kalaglagan.” (Basaha ang Mateo 7:13, 14.) Aron makapabilin sa hustong dalan ug dili mahitipas, kinahanglang mosalig ta kang Jehova ug maminaw kaniya.

8. Kon matumba ang magdadagan, unsay iyang himoon?

⁸ Ang mga magdadagan diha sa layog distansiya nga lumba magpokus sa ilang agian aron dili sila mapandol. Pero usahay, sila dili tinuyong maigo sa ubang magdadagan o makatunob ug libaong. Kon matumba man, sila mobangon ug mopadayon sa pagdagan. Magpokus sila, dili sa kon unsay nakapandol nila, kondili sa finish line ug sa premyo nga gilaoman nilang madaog.

9. Kon matumba ta, unsay angay natong himoon?

⁹ Sa atong lumba, kadaghan tingali tang mapandol, nga masayop sa atong isulti o buhaton. O ang kauban natong mga magdadagan makahimo tingalig mga sayop nga makapasakit kanato. Dili nâ ikatingala. Kitang tanan dili hingpit, ug nagdagan ta diha sa samang hiktin nga dalan padulong sa kinabuhi. Busa usahay “magkabanggaay” ta. Giila ni Pablo nga usahay duna tay mahimo nga ‘ikareklamo’ sa uban. (Col. 3:13) Pero imbes magpokus sa kon unsay nakapandol nato, magpokus ta sa premyo sa unahan. Kon matumba ta, hinaot nga mobangon ta ug mopadayon sa pagdagan. Kon masuko ta ug dili na mobangon, dili ta makaabot sa finish line ug dili nato madawat ang premyo. Dugang pa, basin makababag ta sa uban nga naningkamot sa pagdagan diha sa hiktin nga dalan padulong sa kinabuhi.

10. Sa unsang paagi malikayan nato nga “makapandol” sa uban?

¹⁰ Ang laing paagi nga dili ta “makapandol” sa atong kaubang mga magdadagan mao ang pagtugot kanila sa paghimo sa ilang gusto kon posible imbes ipugos nato ang atong gusto. (Roma 14:13, 19-21; 1 Cor. 8:9, 13) Niining importanteng paagi, dili ta sama sa mga magdadagan sa literal nga lumba. Magkompetensiyahay sila, ug ang matag magdadagan maningkamot nga siyay makadawat sa premyo. Ang maong mga magdadagan kaugalingon ray gihunahuna. Busa tingali ilang wahingon  ang uban aron silay makauna. Pero sa atong bahin, wala ta magkompetensiyahay. (Gal. 5:26; 6:4) Tumong nato nga daghan tag matabangan kutob sa mahimo nga makaabot sa finish line kauban nato ug makadawat sa premyo nga kinabuhi. Busa maningkamot ta sa pagpadapat sa tambag ni Pablo nga ‘tan-awon dili lang ang kaugalingong kaayohan, kondili ang kaayohan sab sa uban.’​—Filip. 2:4.

11. Sa unsa magpokus ang magdadagan, ug ngano?

¹¹ Gawas nga magpokus sa agian, ang mga magdadagan sa literal nga lumba magpokus sab sa finish line. Bisag dili nila kana literal nga makita, puwede nilang imadyinon ang ilang kaugalingon nga nakaabot sa finish line ug nakadawat sa premyo. Ang ilang kanunayng paghunahuna niana makatabang nila sa pagpadayon sa pagdagan.

12. Unsay mahigugmaong gitanyag ni Jehova kanato?

¹² Sa lumba nga atong giapilan, si Jehova mahigugmaong nagtanyag sa iyang katawhan ug seguradong ganti alang niadtong makatapos sa lumba​—kinabuhing walay kataposan, sa langit man o sa paraisong yuta. Ang Kasulatan naghubit niini nga ganti aron atong maimadyin kon unsa unya ka nindot ang atong kinabuhi. Kon hunahunaon nato pirme ang paglaom nga gisaad ni Jehova, mahimo tang mas determinado nga molahutay.

13. Unsa ang atong bentaha sa literal nga mga magdadagan?

¹³ Ang mga magdadagan sa mga dula sa Gresya kinahanglang molahutay sa mga kalisdanan sama sa kakapoy ug kaul-ol sa lawas. Pero ang ila lang gisaligan mao ang ilang pagbansay ug ang ilang kaugalingong kusog. Sama ta sa maong mga magdadagan kay gibansay ta kon unsaon pagdagan sa lumba nga atong giapilan. Pero naa tay bentaha sa literal nga mga magdadagan. Makapangayo tag tabang kang Jehova, ug walay limitasyon ang mahatag niyang tabang kanato. Kon mosalig ta niya, siya nagsaad nga dili lang kay bansayon ta niya, hatagan pa gyod ta niyag kusog!​—1 Ped. 5:10.

14. Sa unsang paagi ang 2 Corinto 12:9, 10 makatabang nato sa atong mga kalisdanan?

¹⁴ Si Pablo daghag gilahutay nga kalisdanan. Gawas nga giinsulto ug gilutos, siya mibati sab usahay ug kaluya ug nagsagubang sa gitawag niya nga “tunok sa unod.” (2 Cor. 12:7) Pero imbes mosurender, giisip niya kana ingong kahigayonan sa pagsalig kang Jehova. (Basaha ang 2 Corinto 12:9, 10.) Kay ingon niana ang panghunahuna ni Pablo, gitabangan siya ni Jehova sa tanan niyang kalisdanan.

15. Kon sundogon nato si Pablo, unsay atong masinati?

¹⁵ Kita sab mahimong insultohon o lutoson tungod sa atong pagtuo. Basin nagsagubang sab tag dili maayong panglawas o kakapoy. Pero kon sundogon nato si Pablo, ang matag usa niana nga kalisdanan mahimong kahigayonan nga masinati nato ang mahigugmaong tabang ni Jehova.

16. Bisag masakiton ka, unsay imong mahimo?

¹⁶ Naglubog ba ka sa banig o nag-wheelchair? Luya na ba kag tuhod o halap nag panan-aw? Kon mao, makadagan pa ba ka uban sa mga batan-on ug himsog? Oo! Daghang tigulang ug masakiton ang nagdagan diha sa dalan padulong sa kinabuhi. Dili nila kini mahimo sa ilang kaugalingong kusog. Hinunoa, sila gihatagan ni Jehova ug kusog pinaagi sa pagpaminaw sa mga tigom gamit ang telepono o video streaming. Ug sila nakigbahin sa paghimog mga tinun-an pinaagi sa pagsangyaw sa mga doktor, nars, ug mga paryente.

17. Unsay pagbati ni Jehova niadtong dunay mga problema sa panglawas?

 ¹⁷ Kon limitado na kag mahimo, ayawg kaluya ug ayaw paghunahuna nga dili ka makalahutay sa pagdagan hangtod sa kataposan. Gimahal ka ni Jehova tungod sa imong pagtuo kaniya ug sa imong nahimo para niya sa daghan nang katuigan. Mas gikinahanglan nimo karon ang iyang tabang, ug dili ka niya biyaan. (Sal. 9:10) Hinunoa, mas makigsuod pa siya kanimo. Matikdi ang komento sa usa ka sister nga daghag problema sa panglawas: “Kay nagkadaghan ang akong problema sa panglawas, dili na kaayo ko makasangyaw. Pero nahibalo ko nga bisan ang ginagmay nakong paningkamot makapalipay kang Jehova, ug kana nakapalipay nako.” Dihang maluya ka, hinumdomi nga wala ka mag-inusara. Hunahunaa ang ehemplo ni Pablo ug ang iyang makapadasig nga mga pulong: “Nalipay ko sa mga kahuyangon [o, kaluyahon], . . . kay dihang huyang [o, luya] ko, gamhanan hinuon ko.”​—2 Cor. 12:10.

18. Unsang mas lisod nga kahimtang ang giatubang sa pipila?

¹⁸ Ang pipila nga nagdagan diha sa dalan padulong sa kinabuhi nag-atubang ug laing kalisdanan. May mga problema sila nga wala tingali mahibaloi o masabti sa uban. Pananglitan, duna silay depresyon o sobrang kabalaka. Nganong mas lisod ang kahimtang niining minahal nga mga alagad ni Jehova? Tungod kay sa dihang ang usa mabaliag bukton o mag-wheelchair, makita sa tanan ang iyang problema ug mapalihok sila sa pagtabang. Pero kadtong dunay problema sa emosyon o sa hunahuna dili tingali mailhan nga dunay giantos. Ang ilang kahimtang sama ra ka lisod sa nabaliag bukton. Pero kay dili makita sa uban ang ilang pag-antos, dili tingali mahatag kanila ang pag-atiman ug pagmahal nga ilang gikinahanglan.

19. Unsay atong makat-onan kang Mepiboset?

¹⁹ Kon naa kay problema sa panglawas ug mibati ka nga walay nakasabot nimo, madasig tingali ka sa ehemplo ni Mepiboset. (2 Sam. 4:4) Lisod ang iyang kahimtang kay baldado siya, ug nasaypan sab siyag sabot ni Haring David. Dili sala ni Mepiboset nga nahitabo kaniya ang maong mga kalisdanan. Pero imbes mahimong negatibo, iyang giapresyar ang maayong mga butang nga nahitabo kaniya. Mapasalamaton siya sa kaayo nga gipakita ni David kaniya sa miagi. (2 Sam. 9:6-10) Busa dihang nasaypan siyag sabot ni David, gikonsiderar ni Mepiboset ang tibuok nga situwasyon. Wala siya masuko kang David tungod sa sayop niini. Ug wala niya basola si Jehova sa nahimo ni David. Si Mepiboset nagpokus sa kon unsay iyang mahimo  sa pagsuportar sa hari nga gipili ni Jehova. (2 Sam. 16:1-4; 19:24-30) Giparekord ni Jehova sa Bibliya ang maayo kaayong ehemplo ni Mepiboset aron makakat-on ta.​—Roma 15:4.

20. Sa unsang paagi ang kabalaka nakaapektar sa pipila, ug sa unsa sila makasalig?

²⁰ Tungod sa sobrang kabalaka, ang pipila ka igsoon mobatig grabeng kakulba bisan sa adlaw-adlawng situwasyon diin kauban nila ang ubang tawo. Tingali malisdan sila kon naa sa dagkong grupo, pero motambong gihapon sila sa mga tigom, asembliya, ug kombensiyon. Malisdan sila sa pagpakig-estorya sa dili nila kaila, pero nakigbahin gihapon sila sa ministeryo. Kon mao nay imong kahimtang, makasalig ka nga wala ka mag-inusara. Daghan ang sama nimo. Hinumdomi nga si Jehova nalipay sa imong tibuok kalag nga paningkamot. Ang imong paglahutay maoy pamatuod nga siya nagpanalangin kanimo ug naghatag nimo sa kusog nga imong gikinahanglan. * (Filip. 4:6, 7; 1 Ped. 5:7) Kon nag-alagad ka kang Jehova bisan pa sa imong problema sa panglawas o emosyon, makasalig ka nga imong napalipay si Jehova.

21. Sa tabang ni Jehova, unsay mahimo natong tanan?

²¹ Ikalipay, dunay mga kalainan ang literal nga lumba ug ang lumba nga gihisgotan ni Pablo. Sa literal nga lumba sa kapanahonan sa Bibliya, usa lang ang makadawat sa premyo. Sa kasukwahi, ang tanang makalahutay nga matinumanon sa Kristohanong dalan sa kinabuhi makadawat sa ganti nga kinabuhing walay kataposan. (Juan 3:16) Ug sa literal nga lumba, ang tanang magdadagan kinahanglang himsog. Kay kon dili, basin dili sila makadaog. Sa laing bahin, daghan kanato ang dunay problema sa panglawas, pero nagpadayon ta sa paglahutay. (2 Cor. 4:16) Sa tabang ni Jehova, matapos natong tanan ang lumba!