1. Yetu eswe yika twatamba kulinga?

NYI UNAYIJI, shina muhasa kuzomboka? Kota, ka. Alioze, postolo Paulu kambile ngwenyi, akwa-Kristu eswe kanazomboka. (Hepre. 12:1) Kashika, yetu eswe, akweze, tushinakaji, mandumbu waze ali kanawa ni waze ali ni misongo, twatamba kunyongonona ndo ku songo, mba tukazuke fweto lize Yehova anatulakenya.—Mateu 24:13.

2. Kulita ni 2 Timoteu 4:7, 8, mumu liaka Paulu ahanyine chiyulo cha kunyongonona ha kuzomboka?

² Paulu ‘kamanunwine kuzomboka’ chenyi, kashika ahanyine chiyulo cha kunyongonona ha kuzomboka. (Tanga 2 Timoteu 4:7, 8) Kuzomboka chika Paulu anatongola hano?

3. Kuzomboka chika Paulu anatongola hano?

³ Ha mashimbu amwe, Paulu kapwile ni kutongola yuma yize apwile ni kulinga mu yiheho ya A-Ngresia hanga alongese yikuma yilemu. (1 Kori. 9:25-27; 2 Timo. 2:5) Kanji-kanji, Paulu kapwile ni kutesa mwono wa akwa-Kristu ni kuzomboka. (1 Kori. 9:24; Ngala. 2:2; Fwili. 2:16) Mutu kakuputuka “kuzomboka” chacho muze akulihana mwene kuli Yehova ni kumupapachisa. (1 Petu. 3:21) Iye kakumanununa kuzomboka chenyi, muze Yehova akumwaha fweto ya mwono wa mutolo.—Mateu 25:31-34, 46; 2 Timo. 4:8.

4. Yika mutulilongesa?

⁴ Mujila yika kuzomboka chinalita ni mwono wa akwa-Kristu? Mu majila anji, alioze mutulilongesa wika majila atatu. Chitangu, twatamba kuzombokela mu jila yalita; chamuchiali, twatamba kunyongonona ndo ku songo; chamuchitatu, twatamba  kukumba kapinda yoze mutuwana mu jila.

5. Mu jila yika twatamba kuzomboka, nawa mumu liaka?

⁵ Akwa-kuzomboka katamba kuya mu jila yize anaasongwela. Nyi maya mu jila yeka, mahasa kwahuma, nawa kechi kutambula fweto lio. Chizechene nawa, ni yetu twatamba kukaula jila yalita, hanji kupwa ni yitanga ya akwa-Kristu. Nyi twalinga chino, mututambula fweto ya mwono wa mutolo. (Yili. 20:24; 1 Petu. 2:21) Alioze, Satana ni atu jenyi, keshi kuzanga hanga twendele mu jila yacho. Kakutushinjila hanga ‘tuzomboke hamwe no.’ (1 Petu. 4:4) Ayo kakutuseha mumu lia jila yize twakukaula; kakwamba ngwo, jila yo ye yinalite, nawa ye yakuhana utuswilo wamwenemwene. Alioze, yuma yize akwamba yili ya mahuza.—2 Petu. 2:19.

6. Yika walilongesa ha chilweza cha Brian?

⁶ Mutu yoze wakusakula kuzomboka chimuwika ni atu ja Satana, kulutwe kakunyingika ngwo jila yize asakula kuyishi kutwala ku utuswilo, alioze yakutwala ku undungo. (Roma 6:16) Tutalenu chilweza cha Brian. Yisemi jenyi yamufumba mu jila ya akwa-Kristu. Alioze, muze akolele, yaputuka kukakajana ngwo jila yacho kuyichi kumunehena uwahililo wamwenemwene. Kashika, Brian yasakula kuzomboka chimuwika ni atu waze akukaula yitanga ya Satana. Yamba ngwenyi: “Yami chakanyingikine ngwami, utuswilo uze napwile ni kufupa muungutwala mu undungo. . . . Hakupalika cha mashimbu, yinguputuka kunwa makanya, walwa ni kulinga utanji. Nawa yinguputuka kushipa chinji liamba ni kupwa ndungo wa yuma yacho. . . . Nawa yinguputuka kulanjisa makanya hanga ngupwe ni mbongo ja kulikwasa nacho. Kulutwe, Brian yecha mwono wacho, yaputuka kutwama kulita ni shimbi ja Yehova. Yalumuna yitanga yenyi ni kwenda mu jila yalita, mba yamupapachisa ha mwaka 2001. Haliapwila, Brian kanende mu jila ya akwa-Kristu, nawa kanawahilila chinji. *

7. Kulita ni Mateu 7:13, 14, majila aka aali aliko?

⁷ Twamona ulemu wa kukaula jila yalita. Alioze, Satana kazangile hanga twende mu jila yikehe yize yatwala “ku mwono,” kanazange hanga twende mu jila yinene yize atu a hano hashi akwendela. Jila yinene yili yashi, nawa atu anji akwendelamo. Alioze yakutwala “ku kwonwona.” (Tanga Mateu 7:13, 14.) Twatamba kujikijila kuli Yehova ni kumupanjika, mba tununge mu jila yikehe.

8. Yika mukwa-kuzomboka akulinga muze akulimbuka?

⁸ Mutu yoze wakuzomboka, kakulihulikila kulutwe kuze anayi hanga ahone kuhukana. Chipwe chocho, mahasa kuhukana hanji kumulimbula kuli akwo waze anazomboka no. Nyi mukwa-kuzomboka malimbuka, kakukatuka kawashi-washi hanga anunge ni kuzomboka. Iye keshi kulihulikila ha chuma chize chamuhukanyisa, alioze kakulihulikila kusongo ni ha fweto lize anafupu kutambula.

9. Nyi twahukana, yika twatamba kulinga?

⁹ Mu kuzomboka chetu, mutuhasa kuhukana yisuho yinji ha kuhanjika hanji ha kulinga chuma chipi. Chikwo nawa, mandumbu jetu waze tunazomboka no mahasa kulinga yuma yize muyitulemeka ku mbunge. Yino kuyatambile kutukomwesa. Yetu eswe tuli yihenge, nawa tunazomboka mu jila yikehe yakutwala ku mwono. Kashika, ha mashimbu amwe mutuhasa “kulipupa.” Paulu kanyingikine ngwenyi, ha mashimbu amwe, te mutuhasa kupwa ni kapinda hakachi ketu. (Kolo. 3:13) Nyi muhukana, kanda ulihulikila ha chuma chize chakuhukanyisa, alioze, lihulikile ha fweto lize lili kulutwe. Kashika, nunga ni kuzomboka. Kuuchi kuheta kusongo ni kutambula fweto, nyi wecha uli hanji yinyengo yikukwike kuzomboka. Chikwo nawa, muhasa kupwa chikwiko kuli akwenu waze anase tachi hanga azomboke mu jila yikehe yize yakutwala ku mwono.

10. Kuchi mutuhasa kwehuka kupwa “chitalingiso” kuli akwetu?

¹⁰ Kuli yuma yikwo yize mutuhasa kwehuka hanga tuhone kupwa “chitalingiso” kuli akwetu waze tunazomboka no. Nyi muchilita, muze akwetu mazanga chuma chize yetu kutushi kuzanga, mutuhasa kwecha hanga achilinge. (Roma 14:13, 19-21; 1 Kori. 8:9, 13) Yono mwe kalisa uli hakachi ka yetu ni akwa-kuzomboka a hano hashi. Akwa-kuzomboka a hano hashi, kakulimika ni akwo waze akuzomboka no, nawa hita mutu kakusa tachi hanga azuke fweto ukawenyi. Kakunyonga wika hali ene. Amwe kakushinjika akwo hanga apalike kulutwe lio. Alioze, yetu kutushi kushinjika akwetu waze tunazomboka no. (Ngala.  5:26; 6:4) Tunazange hanga atu anji ahete ndo kusongo lia kuzomboka chetu ni kutambula fweto ya mwono. Kashika twakukaula chiyulo cha Paulu chinambe ngwo: ‘Kanda nutala ku yuma yenu wika, alioze talenu nawa ku yuma ya akwenu.’—Fwili. 2:4.

11. Ha yika akwa-kuzomboka akulihulikila, nawa mumu liaka?

¹¹ Akwa-kuzomboka keshi kutala wika kulutwe kuze anayi. Ayo nawa kakulihulikila kusongo lia kuzomboka cho. Chipwe ngwe keshi kumona kusongo, alioze, kakunyonga ngwe haheta ku songo, nawa kanatambula fweto. Kunyonga ha yuma yino, chakwakwasa anyongonone mu kuzomboka cho.

12. Yika Yehova anatulakenya?

¹² Ha keke yenyi, Yehova kanalakenya ngwo, kavumbi kenyi yoze mazomboka ndo kusongo, matambula fweto ya mwono wa mutolo mu malilu hanji mu paraisu hano hashi. Yize Mbimbiliya yakuhanjika hakutwala ku fweto yacho, yakutukwasa kunyonga chize mwono wetu muukawaha. Nyi mutununga ni kunyonga ha kutalatala chetu, chipwe ngwe mututalinga, nihindu mutukatuka.

13. Mumu liaka kuzomboka chetu chinahiana cha akwa-hashi?

¹³ Akwa-kuzomboka A-Ngregu, kapwile ni kupinda ni yimwe yipikalo, ngwe kuhonga ni yikola. Alioze, chuma chapwile ni kwakwasa, chili tachi jo ni fumbo lize apwile ni kwaha. Chizechene ngwe akwa-kuzomboka wano, ni yetu kakutufumba chize mutuzomboka mu jila ya akwa-Kristu. Alioze, kuzomboka chetu chinahiana cha ayo. Tuli ni yoze wakutwaha tachi jize kujishi kuhwa. Nyi twajikijila muli Yehova, matufumba ni kutwaha tachi hanga tunyongonone!​—1 Petu. 5:10.

14. Kuchi 2 A-Korindu 12:9, 10, muuhasa kutukwasa kukumba kapinda?

¹⁴ Paulu kapwile ni kapinda munji. Kuchizako yihungumiona yize apwile ni kupalika, te kakulimona ngwe keshi ulemu. Iye nawa te kakupinda ni “lumbambo mu mujimba.” (2 Kori. 12:7) Alioze, Paulu kakechele hanga kapinda yono amuhongese. Kapwile ni kumona hita kapinda ngwe jila ya kusolwelamo ufulielo wenyi kuli Yehova. (Tanga 2 A-Korindu 12:9, 10.) Ha mukunda wa ufulielo wenyi, Yehova yamukwasa ha kapinda wenyi mweswe.

15. Nyi mutwimbulula Paulu, yika mutunyingika?

¹⁵ Ni yetu mahasa kutuhungumiona hanji kutwihia ha mukunda wa ufulielo wetu. Nawa mutuhasa kupinda ni umwe musongo ni kuhonga. Alioze, nyi mutwimbulula Paulu, mutunyingika ngwo kapinda wacho mahasa kutukwasa hanga tumone chize Yehova akutuzanga ni kutukwasa.

16. Chipwe ngwe wayiza, yika muhasa kulinga?

¹⁶ Shina wayiza nyi kuushi kuhasa kwenda? Shina molu je hanahongo, meso je keshi kumona kanawa? Nyi unayiji, shina muhasa kuzomboka ni akweze waze achili ni tachi? Ewa, muhasa! Mandumbu anji waze hashinakajiwa hanji waze anayiji, kanazomboka mu jila yize yakutwala ku mwono. Alioze, kananyingika ngwo, keshi kuchilinga ku tachi jo ene; ayo kakujikijila ha tachi jize Yehova akwaha. Chipwe ngwe kakupalika mu kapinda, nihindu mandumbu wano kakupanjika kukunguluka kupalikila ha telefone hanji ha internet. Ayo kakwambujola kuli mandotolo, mbuki ni asoko jo.

17. Kuchi Yehova akumona atu waze ayiza?

¹⁷ Kanda utayiza hanga musongo hanji kapinda mweswawo alumune manyonga je ni kutayiza ngwo, yena kuushi ni tachi ja kuzomboka mu jila ya mwono. Nyingika ngwo, Yehova  kakukuzanga chinji ha mukunda wa ufulielo ni kunyongonona che. Ha mashimbu wano akalu, watamba kufupa ukwaso wa Yehova, nawa iye kechi kukwehuka. (Samu 9:10) Chikwo nawa, Yehova mapwa hakamwihi ni yena. Umwe ndumbu wa pwo wayiza, kambile ngwenyi: “Amu nakuyiza chinji, chakupwa chikalu kwambujola. Alioze, ngunanyingika ngwami, Yehova kakuwahilila ha tachi jize nakusa hanga ngwambujole, chino chakunguvwisa kuwaha.” Muze unanenganyana, nyingika ngwo kuushi ukawe. Nyonga ha chilweza cha Paulu, ni ha maliji jenyi, muze ambile ngwenyi: “Nakuwaha ni ulelu, . . . mumu muze mungulela, hohene mungupwa ni tachi.”—2 Kori. 12:10.

18. Kapinda muka mukalu chinji yoze mandunbu amwe akupwa nenyi?

¹⁸ Amwe waze anazomboka mu jila ya akwa-Kristu kali ni kapinda mweka. Ayo kakwete kapinda yoze akwo kechi kuhasa kumumona hanji kunyingika. Chakutalilaho, kakupinda ni musongo wakuhonga mu mbunge, hanji kushinginyeka chinji. Mumu liaka kapinda wa mandumbu wano mahasa kupwa mukalu chinji kuhiana? Mumu nyi mutu mamakuka kwoko hanji kakwendela ha chitwamo cha yilema, atu eswe mahasa kumona kapinda wenyi ni kulihulumba hanga amukwase. Alioze, mutu yoze wakupinda ni musongo wa kuhonga mu mbunge hanji kushinginyeka chinji, chakupwa chikalu akwo kunyingika kapinda wenyi. Musongo wenyi wakupwa ukalu chinji kuhiana wa mutu yoze wamakuka kwoko, alioze hanji akwo kechi kuhasa kumukwasa.

19. Yika twalilongesa ha chilweza cha Mefiposhete?

¹⁹ Nyi wakupinda ni musongo ni kumona ngwe akwenu keshi kuhasa kukukwasa, chilweza cha Mefiposhete muchihasa kukukwasa hanga upwe ni tachi. (2 Samue. 4:4) Chipwe ngwe Mefiposhete kapwile chilema, nihindu yamulinga upi kuli Mwanangana Ndawichi. Mefiposhete kakalingile nichimwe chuma chipi mba amulinge upi wacho. Chipwe chocho, Mefiposhete kakapwile ni kunyonga ha upi wacho. Iye yalihulikila ha yuma yipema ya ku mwono wenyi. Mefiposhete, kakavulamine upeme weswe uze amusolwelele kuli Ndawichi. (2 Samue. 9:6-10) Kashika, muze Ndawichi amulingile upi, iye yewuluka upeme wacho. Mefiposhete kakechele upi wa Ndawichi upinjise mwono wenyi. Nawa kakasumine Yehova mulonga mumu lia yuma yize Ndawichi alingile. Mefiposhete yalihulikila ha yize ahashile kulinga hanga akwase Mwanangana wa kuwayisa kuli Yehova. (2 Samue. 16:1-4; 19:24-30) Yehova yatayiza kusa chilweza chino chipema mu Mbimbiliya hanga chitukwase.—Roma 15:4.

20. Kuchi mandumbu amwe akupinda ni musongo, alioze shindakenyo uka atamba kupwa nawo?

 ²⁰ Mandumbu waze akushinginyeka chinji, kakupinda muze akupwa ni akwo. Chakwakaliwila chinji kupwa mukachi ka atu anji. Chipwe chocho, kakuya ku kukunguluka ni kukunguluka cha mbonge ni cha mambonge. Nawa chakwakaliwila kuhanjika ni atu waze kanyingikine; alioze, kakusa tachi hanga ahanjike ni atu mu munda. Nyi ukwete kapinda wacho, nyingika ngwo kuushi ukawe. Mandumbu anji ali ni kapinda wacho. Ewuluka ngwo, Yehova kanawahilila chinji ha tachi jize unase hanga ulinge yize muhasa. Kunyongonona che, chinasolola ngwo Yehova kanakuwahisa, nawa kanakwehe tachi jize unafupu. * (Fwili. 4:6, 7; 1 Petu. 5:7) Nyi unanungu ni kuwayila Yehova, chipwe ngwe wakupinda ni musongo, pwako ni shindakenyo ngwo Yehova kanawahilila hali yena.

21. Ni ukwaso wa Yehova, yika yetu eswe mutuhasa kulinga?

²¹ Chokuwaha kunyingika ngwo, kuzomboka cha akwa-hashi chinalise ni chize Paulu asonekene. Ha kuzomboka cha akwa-hashi kushakulu, mutu umwika mwe wapwile ni kutambula fweto. Alioze, kuzomboka cha akwa-Kristu, eswe waze manyongonona, makatambula fweto ya mwono wa mutolo. (Yoa. 3:16) Ha kuzomboka cha akwa-hashi, waze anazomboka katamba kupwa ni mujimba ungunu; nyi ka, mahasa kusala mu jila. Alioze, ha kuzomboka cha akwa-Kristu, hi esweko ali ni mujimba ungunu; chipwe chocho, yetweswe, tunanyongonona. (2 Kori. 4:16) Ni ukwaso wa Yehova, yetweswe mutumanuna kuzomboka chetu!