1. Kan dihlak in zeidah kan tuah awk a si?

A HLEIIN na zawt asiloah na tha a bat caan ah tlik zuamnak ah tlik cu na duh lai maw? Na duh lai lo. Lamkaltu Paul nih a hmaanmi Khrihfa vialte cu tlik zuamnak ah a tlimi kan si tiah a ti. (Heb. 12:1) Mino, upa, thazaang a ṭhawngmi le a dermi kan si ah kan dihlak in Jehovah pekmi laksawng hmuh kan duh ahcun a dongh tiang inkhawhnak kan ngeih a hau.—Matt. 24:13.

2. Paul nih 2 Timote 4:7, 8 bia hi zeicah a chim khawh?

² Paul nih hlawhtlinnak a hmuh caah “a dongh tiang khitkhet in ka tli cang” tiah a chim khawh. (2 Timote 4:7, 8 rel.) Asinain Pual nih a hleiin a chimmi tlik zuamnak cu zeidah a si?

3. Paul nih a chimmi tlik zuamnak cu zeidah a si?

³ A caan ah Paul nih a biapimi kong cawnpiak awkah hlanlio Greek lentecelhnak kong kha a hman tawn. (1 Kor. 9:25-27; 2 Tim. 2:5) Paul nih Khrihfa nunning kha tlik zuamnak he a tahchunh lengmang. (1 Kor. 9:24; Gal. 2:2; Fil. 2:16) Mi pakhat nih Jehovah sinah a pum aa pek i tipil a in tikah “tlik” zuamnak ah aa hun i telmi a si. (1 Pet. 3:21) A dongh tiangin tlik zuamnak ah a tlik ahcun Jehovah nih zungzal nunnak laksawng a pek lai.—Matt. 25:31-34, 46; 2 Tim. 4:8.

4. Hi capar ah zei kong dah kan i ruah hna lai?

⁴ Lamhlat tlik zuamnak le Khrihfa nunning aa lawhnak cu zeidah a si? Aa lawhnak tampi a um. Mah lakah a kong pathum in i ruah hmanh hna u sih. Pakhatnak, a hmaanmi lam ningin kan zulh a hau; pahnihnak, kawltung ah lungthin kan pek a  hau; pathumnak, zuamcawhnak a um hmanhah kan tlik peng a hau.

5. Zei bantuk nunning in dah kan nun awk a si, zeicah?

⁵ Tlik aa zuammi hna nih laksawng an hmuh khawh nakhnga tlik zuamnak bu nih ri an khiahmi ningin an zulh a hau. Cu bantukin zungzal nunnak laksawng hmuh kan duh ahcun Khrihfa nunning in asiloah phunglam ningin kan nun a hau. (Lam. 20:24; 1 Pet. 2:21) Asinain Satan le a mi pawl nih cun Khrihfa nunning in kan nunmi kha an duh lo; anmah bantukin nung ve hna seh ti a kan duh. (1 Pet. 4:4) Kan nunning kha an kan nihsawh i anmah nunning cu a ṭha deuh i zalonnak kan hmu deuh tiah an ruah caah anmah bantukin nun ve awkah an kan lemsoi. Asinain mah lemsoinak cu a palhmi a si.—2 Pet. 2:19.

6. Brian hmuhtonnak in zeidah kan cawn khawh?

⁶ Satan duh ningin a nungmi paoh cu zalonnak taktak an hmu kho lo. Mah canah Satan le anmah duhnak sal tu an hung si. (Rom 6:16) Brian hmuhtonnak hi zohhmanh hna u si. A nu le a pa nih Khrihfa nunning in nun awkah tha an pek. Asinain kumhra fai a hung si tikah, zei nunning nih dah nuamhnak a ka hmuhter lai tiah amahle amah bia aa hal. Cucaah Brian nih Satan nunning in nun awkah biakhiahnak a rak tuah. Hitin a ti: “Zalonnak a kan hmuhter khawh tiah an timi thil hna kha ka tuah tikah mah nih a ka lem. Mah hnu tlawmpal ah ritnak sii ka hmang, zuu ka ding i a ṭhalomi nunning in ka nung. Kum tampi a rauh tikah ritnak sii kha ka hman chin i a ka lem chin. . . . Cun ka pawcawmnak caah ritnak sii kha ka zuar.” A donghnak ah, Brian nih Jehovah phunglam ningin nun awkah bia a khiah. Cucaah Brian cu a nunning aa thleng i 2001 ah tipil a ing. Atu ah Khrihfa nunning in a nun caah nuamhnak taktak a hmu cang. *

7. Matthai 7:13, 14 ningin kan hmaiah zei lam pahnih dah a um?

⁷ Zulh awkah a hmaanmi lam i thim cu a biapi tukmi a si. Satan nih “nunnak a phanmi lam” kan zulhmi kha ngol in mi tampi nih an zulhmi, a kaumi lam kha zul hna seh ti a kan duh. Mah lam cu mi tampi nih zulh an duh i zulh awk zongah a fawi. Asinain mah cu “rawhnak ah a kalmi lam” a si. (Matthai 7:13, 14, NW rel.) * Nunnak lam kan zulh peng khawh nakhnga le mah in kan pial nakhnga lo Jehovah kha zumh in a nawl ngaih a hau.

8. Tlik aa zuammi pakhat nih a tlukrilh sual ahcun zeidah a tuah awk a si?

⁸ Lamhlat tlik zuamnak ah aa zuammi hna nih an hmuitinh ah lungthin an pek ahcun tlukrilhtertu thil kha an hrial khawh lai. Asinain an tlikṭimi hawi asiloah lam bingbo hna ruangah ruahlopi in harnak an tong men lai. An tluk sual hmanhah thawhṭhan in an tlik peng a hau. A bikin lungthin an pek dingmi cu an tlukrilhmi cungah si loin kawltung phanh in teinak laksawng hmuh dingtu kha a si awk a si.

9. Kan tluk sual ahcun zeidah kan tuah awk a si?

⁹ Kan biachim asiloah kan tuahsernak in palhnak tampi kan tuah caah nunnak tlik zuamnak kan tlik lioah atu le atu kan tlu kho men. Asiloah kan tlikṭimi kan hawi nih a tuahmi palhnak ruangah kan lung a fak kho. Cutin a si lai tiah kan i ruahchan caah kan khuaruah a har awk a si lo. Kan dihlak in mitling lo kan si caah nunnak tlik zuamnak ah kan tlik tikah hnahnawhnak kan tong hna. Unau pawl he Jehovah rian kan ṭuanṭi tikah a caan ah an cungah kan thin a hung men lai asiloah pakhatkhat cu kan cungah an thin a hung men lai. Paul nih a caan ah pakhat le pakhat ‘lungsilonak kan ngei’ lai ti kha a hngalh. (Kol. 3:13) Asinain a kan tlukrilhtermi thil cungah si loin hmailei kan hmuh dingmi laksawng cung tu ah lungthin kan pek awk a si. Kan tlukrilh sual hmanhah tho in kan tlik ṭhan awk a si. Thinhun in kan thawhṭhan lo ahcun kan kawltung kan phan kho lai lo i laksawng zong kan hmu kho lai lo. Cun nunnak tlik aa zuammi hna caah dawnkhantu zong kan hung si kho.

10. Midang ‘tlukrilhtertu’ si lo awkah zeidah kan hrial khawh?

¹⁰ Tlik aa zuam vemi kan hawile ‘tlukrilhtertu’ si lo awkah kanmah duh ningin thil tuah canah anmah duh ningin thil kan tuah awk a si. (Rom 14:13, 19-21; 1 Kor. 8:9, 13) Kannih cu tlik aa zuam taktakmi bantuk kan si lo. Tlik aa zuammi hna nih cun midang kha tei in laksawng hmuh awkah an i zuam. Teinak hmuh awkah zeinihdah a kan bawmh lai timi kong lawng kha an ruah. Cucaah hmailei an phanh khawh nakhnga midang kha an en hna i an tli. Kannih cu mah he i ralkah in pakhat le pakhat  kan i engtai lo. (Gal. 5:26; 6:4) Kan hmuitinh cu a si khawh chungin mi tampi nih kawltung phanh in nunnak laksawng an hmuh nakhnga bawmh kha a si. Cucaah Paul nih “midang duhning kha hmuh thiam i zuam u law nanmah duhnak lawng kha ruat hlah u” tiah ralrin a kan pekmi kha zulh awkah kan i zuam.—Fil. 2:4.

11. Tlik aa zuammi hna nih zeidah biapi ah an chiah awk a si, zeicah?

¹¹ Tlik aa zuam taktakmi hna nih cun mi hmai ah phanh kha biapi ah an chiah i an kawltung lawngah lungthin an pek. An mit in kawltung kha an hmuh khawh lo hmanhah kawltung le laksawng hmuh ding kha cu an mitthlam ah an cuanter khawh. Kawltung le laksawng kong an ruah zungzalmi nih tlik peng awkah a forh hna.

12. Jehovah nih zeidah a kan pek lai?

¹² Kannih zong a dongh tiang kan tlik ahcun Jehovah nih a miphun pawl bia a kamhmi hna van asiloah vawilei paradis ah zungzal nunnak laksawng kan hmu kho lai. Mah laksawng kong kha Baibal ah a langhter caah kan nunning cu zeitluk in dah a ṭhat lai ti kha kan mitthlam ah kan cuanter khawh. Jehovah nih hmailei kong he aa tlaiin bia a kan kamhmi kong kha kan ruah peng ahcun inkhawhnak kan ngei deuh lai.

13. Tlik aa zuam taktakmi hna nakin zei bantuk ṭhatnak dah kan hmuh deuh?

¹³ Greek lentecelhnak ah a tlimi hna nih thabatnak le fahnak ti bantuk zuamcawhnak hna kha an tei khawh. Asinain annih nih an cawnmi le an thazaang lawng kha an i bochan. Mah tlik aa zuammi hna bantukin kannih zong zeitindah kan tlik awk a si timi cawnpiaknak kan hmu ve. Asinain kan nih cu tlik aa zuam taktakmi hna nakin ṭhatnak tam deuh kan hmu. Jehovah sinin ṭhawnnak kan hmu kho i mah a kan bawmh ning cu ri a ngei lo. Amah kan i bochan ahcun Jehovah nih cawnpiak lawng si loin thazaang zong kaan pek hna lai tiah bia a kan kamh.—1 Pet. 5:10.

14. Zuamcawhnak kan ton tikah 2 Korin 12:9, 10 nih zeitindah a kan bawmh khawh?

¹⁴ Paul nih zuamcawhnak tampi kha a rak tawnghtham. Midang nih an nihsawh i an hrem caah a caan ah a tha a der, cucaah “ka pum ah hin fahnak pakhat a ka pek” tiah a ti. (2 Kor. 12:7) Asinain Paul nih a tonmi zuamcawhnak hna ruangah lungdongh canah Jehovah i bochannak caanṭha tuin a rak hmuh. (2 Korin 12:9, 10 rel.) Paul nih mah sining a ngeih khawhmi cu Jehovah nih harnak a tonmi kip ah a rak bawmh caah a si.

15. Paul kan i zohchunh ahcun zei caanṭha dah kan hmuh lai?

¹⁵ Kannih zong kan zumhnak ruangah nihsawhnak asiloah hremnak kan tong ve men lai. Cun damlonak asiloah lungretheinak zong kan tong men lai. Asinain Paul kan i zohchunh ahcun kan tonmi zuamcawhnak hna kha Jehovah dawtnak langhternak caanṭha in kan hmuh khawh lai.

16. A dam lomi na si hmanhah zeidah na tuah khawh?

¹⁶ Nang cu dam lo ruangah ihnak cungah a itmi asiloah kekual bunhmi ṭhutdan cungah a ṭhumi na si maw? A khuk a fakmi asiloah a mit a ṭha lomi na si maw? Cutin na si ahcun a no i a ngan a dammi unau pawl he Jehovah rian na ṭuan kho lai maw? Na ṭuan kho ko. Kum upa le a damlomi mi tampi cu nunnak tlik zuamnak ah an tli hna. Anmah ṭhawnnak in mah rian kha an ṭuan kho lo. Mah canah, Khrihfabu pumhnak kha phone asiloah video in an zohnak thawngin Jehovah thazaang peknak kha an hmuh. Cun anmah a zohkhenhtu siibawi, nurse le an rualchan pawl sinah phung an  chimnak thawngin zultu siternak rian kha an ṭuan.

17. Jehovah nih a dam lomi hna kong he aa tlaiin zeitindah a ruah?

¹⁷ Jehovah caah na duh ningin na ṭuan khawh lo tikah na lungdong hlah, cun a dongh tiang inkhawhnak ka ngei lai lo timi ruahnak zong ngei hlah. Jehovah nih a cung i na zumhnak le a caah kum tampi chung rian na ṭuanmi kha a sunsak. Hlan nakin atu ah Jehovah bawmhnak kha na herh deuh i zeitikhmanh ah aan kaltak lai lo. (Salm 9:10) Mah canah nangmah he naih tein a um lai. A dam lomi unaunu pakhat nih hitin a ti: “Ka zawtnak a zual deuh tikah midang sinah phungchim cu ka caah a har chin. Asinain a caah ka tuah khawhmi thil tlawmpal nih Jehovah lung a lawmhter ti kha ka hngalh, mah nih ka lung a ka lawmhter.” Na lung a dongh tikah nangmah lawng na si lo ti kha philhhlah. Paul nunning kong le thazaang a ngeihtermi mah a bia kong hi ruat: “ka derthawmnak ah . . . kaa lawm ko; zeicahtiah ka derthawm tikah hin ka ṭhawn a rak si.”—2 Kor. 12:10.

18. Mi cheukhat nih zeibantuk a har tukmi zuamcawhnak hna dah an ton?

¹⁸ Nunnak tlik zuamnak ah a tlimi cheukhat nih a dang zuamcawhnak hna zong an ton rih. Midang nih hngalhthiam khawh lomi zuamcawhnak hna zong an tong. Tahchunhnak ah, annih cu lungdongh zawtnak asiloah lungretheinak tampi a ngeimi an si. Zeicah Jehovah salle hna nih a har tukmi zuamcawhnak hna kha an ton? Zeicahtiah mi pakhat cu a ban a kiah asiloah kekual bunhmi ṭhutdan cungah a ṭhut ahcun a hmumi kip nih anih cu harnak a tongmi asiloah bawmh a herhmi in an hmuh. Asinain lungdongh zawtnak a ngeimi hna i an intuarnak cu hmuh khawh a si lo. A ban kiakmi hna bantukin an lungre a thei ko asinain an intuarnak kha midang nih an hmuh khawh lo caah an herhmi hnemhnak kha an pe kho hna lo.

19. Mephibosheth kong in zeidah kan cawn khawh?

¹⁹ Chambaunak a ngeimi le mi nih an ka theithiam lo timi ruahnak a ngeimi na si ahcun Mephibosheth kong in thazaang na hmu kho. (2 Sam. 4:4) Anih cu a dam lomi a si, mah lengah Siangpahrang David nih a ding loin bia a rak ceih. A cungah mah bantuk thil a canmi cu amah palhnak ruangah a si lo. Asinain a thin a hung lo, a cungah a cangmi thilṭha caah a rak i lawm. David nih a rak langhtermi zaangfahnak cungah aa lawm. (2 Sam. 9:6-10) Cucaah David nih a ding loin bia a ceih tikah Mephibosheth nih thil sining kong kha a dihlak in ruah awkah aa zuam. David tuahmi palhnak ruangah a thin a hung lo. Cun David nih a tuahmi ruangah Jehovah zong a mawhchiat  lo. Mephibosheth nih Jehovah rian pekmi siangpahrang bawmh awkah a tuah khawhmi thil tu ah lungthin a pek. (2 Sam. 16:1-4; 19:24-30) Jehovah nih Mephibosheth i a ṭha tukmi a nunning kong kha Baibal ah a ṭial caah a sinin kan cawn khawh.—Rom 15:4.

20. Lungretheihnak nih mi cheukhat kha zeitindah a hnorsuan hna, asinain zeidah an zumh khawh?

²⁰ Lungretheihnak ruangah unau cheukhat cu an lung a dong i nifatin an tonmi thil sining kha tawnghtham awkah an i harh. Mibu sin um kha an i harh ko nain Khrihfabu pumhnak, peng civui le pengkomh civui tu cu an i pum peng. Mi sing pawl he chawnhbiak kha an i harh ko nain lohmun i an tonmi hna kha phung an chimh hna. Cutin na si ve ahcun nangmah lawng na si lo ti kha zum. Nangmah bantukin mi tampi zong nih an ruah ve. Lungthin dihlak in naa zuammi nih Jehovah lung a lawmhter ti kha philhhlah. Lungdongh lo awkah naa zuam ahcun Jehovah nih thluachuah aan pek lai i na herhmi thazaang zong aan pek lai. * (Fil. 4:6, 7; 1 Pet. 5:7) Pumsalei asiloah lungthinlei ah chambaunak a ngeimi na si hmanhah Jehovah rian na ṭuan ahcun mah nih Jehovah lung a lawmhter ti kha na zumh khawh.

21. Jehovah bawmhnak thawngin zeidah kan tuah khawh lai?

²¹ Lunglawmh awk ngai a simi cu Paul nih a chimmi kong le tlik aa zuam taktakmi hna kong cu an i lo lo. Baibal chan lio i tlik zuamnak ahcun mi pakhat lawng nih laksawng a hmuh. Asinain Khrihfa tlik zuamnak ahcun zumhfek tein inkhawhnak a ngeimi paoh nih zungzal nunnak laksawng an hmuh lai. (Johan 3:16) Cun tlik aa zuam taktakmi hna cu an dihlak in a ngan a dammi an si a hau. An ngan a dam lo ahcun teinak an hmu kho lai lo. Asinain kan lak i tampi cu kan ngan a dam lo nain inkhawhnak kan ngei. (2 Kor. 4:16) Mah lengah Jehovah bawmhnak thawngin a dongh tiang in kan tli kho lai.