1. Ebɛnadze na ɔsɛ dɛ hɛn nyina yɛ?

SƐ EYAR anaa aberɛ a, ana ebɛpɛ dɛ edze woho hyɛ mbirikatu a ɔyɛ dzen mu? Bi a erennyɛ. Naaso, ɔsomafo Paul kãa dɛ nokwar Christianfo nyina dze hɔnho ahyɛ mbirikatu bi mu. (Heb. 12:1) Sɛ yɛpɛ dɛ yenya akatua a Jehovah pɛ dɛ ɔdze ma hɛn no a, dɛ hɛn mfe akɔ enyim anaa hɛn mfe nnkɔr enyim, dɛ yɛwɔ ahoɔdzen anaa yɛaberɛ no, ɔsɛ dɛ hɛn nyina dze abotar gyina mu kesi ewiei.​—Matt. 24:13.

2. Sɛ yɛhwɛ asɛm a ɔwɔ 2 Timothy 4:7, 8 no a, nna ebɛnadze ntsi na Paul wɔ kasa mu fahodzi?

² Nna Paul wɔ kasa mu fahodzi, osiandɛ nna ‘oetu mbirika no ewie.’ (Kenkan 2 Timothy 4:7, 8.) Sɛ dɛm a, ɔnodze ebɛn mbirikatu ankasa na ɔkãa ho asɛm no?

3. Ebɛn mbirikatu na Paul kãa ho asɛm no?

³ Nna wosi akan wɔ agodzi mu wɔ tsetse Greece. Paul kãa ndzɛmba a nna ɔkɔ do wɔ akansi no mu ho asɛm dze kyerɛkyerɛɛ esuadze etsitsir bi. (1 Cor. 9:25-27; 2 Tim. 2:5) Mpɛn pii no, nna ɔdze hɛn asetsena dɛ Christianfo no toto mbirikatu ho. (1 Cor. 9:24; Gal. 2:2; Phil. 2:16) Sɛ obi hyira noho do ma Jehovah na ɔbɔ esu a, nna ɔkyerɛ dɛ ɔdze noho ahyɛ ‘mbirikatu’ a ɔtse dɛm mu. (1 Pet. 3:21) Sɛ Jehovah ma no onnyiewiei nkwa dɛ konyim abɔtsir a, nna ɔkyerɛ dɛ oetu mbirika no ewie.​—Matt. 25:31-34, 46; 2 Tim. 4:8.

4. Ebɛnadze na yebosusu ho wɔ adzesua yi mu?

⁴ Sɛ yɛdze hɛn asetsena dɛ Christianfo toto mbirika a wotu dze twa kwan tsentsen ho a, yebohu dɛ ndzɛmba ahorow pii dzi nsɛ wɔ mu. Ndzɛmba a odzi nsɛ wɔ mu no, no mu bi nye dɛn? Hom mma yensusu no mu ebiasa ho nhwɛ. Odzi kan, ɔsɛ dɛ yɛfa ɔkwan a wɔakyerɛ dɛ yɛmfa do no do; otsĩa ebien, ɔsɛ dɛ yɛdze si hɛn enyi do dɛ yebotu mbirika no ewie; nye otsĩa ebiasa, ɔsɛ dɛ yedzi nsɛndzendzen ahorow a yebehyia wɔ ɔkwan mu no do.

5. Ebɛn kwan na ɔsɛ dɛ yɛfa do bɔ hɛn bra, na ebɛnadze ntsi a?

⁵ Mbirikatufo a wosi akan wɔ mbirikatu mu no, sɛ wobenya konyim abɔtsir no a, gyedɛ wotu mbirika no fa ɔkwan pɔtsee a wɔakyerɛ no do. Dɛmara so na hɛn so, sɛ yebenya onnyiewiei nkwa dɛ konyim abɔtsir a, ɔsɛ dɛ yɛkɔ do bɔ hɛn bra dɛ Christianfo. (Andw. 20:24; 1 Pet. 2:21) Naaso, Satan nye hɔn a wodzi n’ekyir no mmpɛ dɛ yɛbɔkɔ do abɔ hɛn bra dɛ Christianfo. Wɔpɛ dɛ ‘yɛkɔ do nye hɔn tu mbirika’ wɔ hɛn nkan abrabɔ no mu. (1 Pet. 4:4) Dɛm ntsi, wɔkasa tsia hɛn asetsena kwan dɛ Christianfo, na wɔkã dɛ ɔkwan a wɔfa do bɔ hɔn bra no yɛ papa kyɛn hɛndze no. Nkyii so, wɔkã dɛ hɔn asetsena ma wonya ahotɔ. Naaso, nsɛm a wɔkekã yi nnyɛ nokwar.​—2 Pet. 2:19.

6. Ebɛnadze na isũa fi Brian n’asɛm no mu?

⁶ Nyimpa a wɔbɔ hɔn bra tse dɛ hɔn a Satan no wiadze enya hɔn do nkantando no, ɔnnkyɛr na woehu dɛ bra a wɔrobɔ no mma wonnya ahotɔ. Na mbom, ɔma wɔbɛyɛ nkowaa ma Satan nye hɔn ankasa akɔndɔdze. (Rom. 6:16) Ma yensusu Brian n’asɛm no ho nhwɛ. N’awofo hyɛɛ no nkuran dɛ ɔmbɔ ne bra dɛ Christiannyi. Naaso, ber a nna ɔyɛ aberantsɛba no, ɔkãa dɛ ɔnngye nndzi dɛ abrabɔ a ɔtse dɛm bɛma woenya enyigye. Dɛm ntsi, Brian sii gyinae dɛ ɔnye hɔn a Satan enya hɔn do nkantando no bɔbɔ. Ɔkãa dɛ: “Nna minnyim dɛ ahotɔ a mepɛ no bɛma medze ndzɛmba bɔn akyekyer moho. Odur mber bi no, nna monom ndubɔn na nsã. Nkyii so, nna mobɔ ndwamanbra. Afei, mfe a odzi hɔ no, mehyɛɛ ase noom ndubɔn ahorow a n’ano yɛ dzen na motɔɔ mu ntentan. . . . Mehyɛɛ ase tɔɔn ndubɔn dze hwɛɛ moho wɔ ɔbrakyew a nna mobɔ no mu.” Ekyir yi, Brian bohun hia a ohia dɛ ɔdze Jehovah ne gyinapɛn bɔ ne bra. Dɛm ntsi, ɔsesaa n’abrabɔ na wonumaa no wɔ afe 2001 mu. Seseiara, n’asetsena kwan dɛ Christiannyi no ama oenya enyigye ankasa. *

7. Dɛ mbrɛ Matthew 7:13, 14 kyerɛ no, ebɛn akwan ebien na ɔda hɛn enyim?

⁷ Hwɛ hia ara a ohia dɛ yɛfa ɔkwan pa no do! Satan mmpɛ dɛ yɛbɛfa ɔkwan heaheaba a ‘ɔkɔ nkwa mu no’ do. Mbom, ɔpɛ dɛ yɛfa ɔkwan tɛtɛr a nyimpa piinara a wɔwɔ wiadze yi mu no nam do no do. Nyimpa pii nyim dɛm kwan yi na no do fa so nnyɛ dzen. Naaso, ɔyɛ ɔkwan a ‘ɔkɔ ɔsɛɛ mu.’ (Kenkan Matthew 7:13, 14.) Sɛ yebotum akɔ do anantsew ɔkwan pa no do a yɛremma afofor anaa biribiara nntwetwe hɛn adwen a, gyedɛ yɛdze hɛnho to Jehovah do na yɛyɛ setsie ma no.

8. Obi a orisi akan wɔ mbirikatu mu no, sɛ ɔbɔ famu a, ebɛnadze na ɔyɛ?

⁸ Hɔn a wosi akan wɔ mbirika a wotu twa kwan tsentsen mu no, mbrɛ ɔbɛyɛ a worimmfintsiw  no, wɔdze hɔn enyi si ɔkwan a ɔda hɔn enyim pɛɛ no do. Naaso, hɔn a wɔnye hɔn rutu mbirika no mu bi botum ama wɔabɔ famu ber a wɔnnhwɛ kwan. Bi so a, wobotum atɔ amona bi a ɔwɔ kwan no mu ber a wɔnnhwɛ kwan. Sɛ wɔbɔ famu mpo a, wɔsoɛr na wɔtoa mbirikatu no do. Wɔmmfa hɔn adwen nnsi dza ɔmaa wɔbɔɔ famu no do, na mbom dza wɔdze hɔn adwen si do tsitsir nye mbirika no a wobotu ewie nye konyim abɔtsir a wɔhwɛ kwan dɛ hɔn nsa bɛka no.

9. Sɛ yefintsiw a, ebɛnadze na ɔsɛ dɛ yɛyɛ?

⁹ Yebotum efintsiw mpɛn pii wɔ nkwa ho mbirika a yerutu no mu. Yebotum afom wɔ hɛn ndzeyɛɛ anaa hɛn kasaa mu. Hɛn nuanom a yɛnye hɔn rutu nkwa ho mbirika no botum ayɛ adze ma aayɛ hɛn yaw. Sɛ biribi a ɔtse dɛm to hɛn a, onnyi dɛ yɛma ɔyɛ hɛn nwanwa. Hɛn nyina yɛ nyimpa a yenndzi mũ, na ɔkwan heaheaba a wɔdze kɔ nkwa mu no na hɛn nyina yɛnam do. Dɛm ntsi, ɔtɔ da a, yɛbɛyɛ adze ma aayɛ hɛn nua bi yaw anaa hɛn nua bi bɛyɛ adze ama aayɛ hɛn yaw. Paul kãa dɛ ɔtɔ da a ‘obi benya obi ho asɛm bi.’ (Col. 3:13) Naaso, dɛ nkyɛ yɛdze hɛn adwen besi dza ama yeefintsiw do no, ɔsɛ dɛ yɛdze hɛn adwen si konyim abɔtsir a ɔda hɛn enyim no do mbom. Sɛ yefintsiw mpo a, yɛnsoɛr na yɛntoa mbirikatu no do. Sɛ hɛn bo fuw na yegyaa dɛ yɛbɔkɔ do asom Jehovah a, yerunnwie mbirika no tu na yerinnya konyim abɔtsir no. Iyi da nkyɛn a, afofor a wɔrobɔ mbɔdzen dɛ wɔbɛfa ɔkwan heaheaba a wɔdze kɔ nkwa mu no do no, annhwɛ a nna yesiw hɔn kwan.

10. Yebesi dɛn ekwetsir dɛ yɛdze “fintsidua anaa abew” bɔto afofor hɔn akwan mu?

¹⁰ Ɔkwan fofor a yebotum ekwetsir dɛ yɛdze “fintsidua anaa abew” bɔto hɛn nuanom mbarimba na mbaa hɔn akwan mu nye dɛ yɛnnkɛhyɛ hɔn ma wɔaayɛ adze dɛ mbrɛ yɛpɛ. Mbom, sɛ ɔbɛyɛ yie a, yɛbɛma hɔn kwan ma wɔaayɛ adze dɛ mbrɛ hɔnankasa wɔpɛ. (Rom. 14:13, 19-21; 1 Cor. 8:9, 13) Dɛm ntsi, yɛnntse dɛ mbirikatufo a wosi akan wɔ mbirikatu mu no. Dɛm nkorɔfo no nye hɔnho si akan, na hɔn mu biara dzi aper mbrɛ ɔbɛyɛ a nankotsee benya konyim abɔtsir no. Dɛm mbirikatufo no, dza ɔbɔboa hɔn ma woeedzi konyim nkotsee na wɔdwen ho. Dɛm ntsi, wobotum epia afofor efi kwan mu mbrɛ ɔbɛyɛ a wobotum aba enyim. Naaso, hɛndze, yɛnye hɛnho rinnsi akan. (Gal. 5:26; 6:4) Hɛn botae nye dɛ yɛbɔboa nyimpa pii ma yɛnye hɔn nyina eewie mbirikatu no, na wɔaagye hɛn nkwa akɔ Nyankopɔn no wiadze fofor no mu na yaatsena ase daa. Dɛm ntsi, yɛbɔ mbɔdzen dɛ yɛdze afotu  a ofi Nyankopɔn no sunsum mu a Paul dze mae no bɛyɛ edwuma. Ɔkãa dɛ: “Mma obiara nnhwɛ no nko n’adze, na mbom ɔnhwɛ ne mfɛfo dze so bi.”​—Phil. 2:4.

11. Obi a orisi akan wɔ mbirikatu mu no, ebɛnadze na ɔdze n’adwen si do, na ebɛnadze ntsi a?

¹¹ Mbirikatufo a wosi akan wɔ mbirikatu mu no, ɔkwan a ɔda hɔn enyim pɛɛ a wɔdze hɔn enyi betsim do no da nkyɛn a, wɔdze hɔn adwen si mbirika a wobotu ewie no do. Sɛ wonntum mmfa hɔn enyiwa nnhu beebi a worutu mbirika no akɛka mpo a, wotum twa ho mfonyin wɔ hɔn adwen mu dɛ woedu bea a ɔtse dɛm ma hɔn nsa aka konyim abɔtsir no. Wɔdze hɔn adwen si konyim abɔtsir a wobenya no do, na iyi kenyan hɔn ma wɔkɔ do tu mbirika no.

12. Ebɛnadze na Jehovah efi ayamuyie mu akã dɛ ɔdze bɛma hɛn?

¹² Jehovah efi ayamuyie mu ama no nkorɔfo a worutu nkwa ho mbirika no awerɛhyɛmu dɛ, sɛ wotu mbirika no wie a, ɔbɛma hɔn akyɛdze bi. Ɔbɛma hɔn onnyiewiei nkwa wɔ sor anaa wɔ paradise wɔ asaase do. Bible no kã dɛm akyɛdze yi ho asɛm, mbrɛ ɔbɛyɛ a yebotum etwa mbrɛ hɛn asetsena besi ayɛ enyigye afa no ho mfonyin wɔ hɛn adwen mu. Sɛ yɛkɔ do ma dɛm enyidado yi tsena hɛn adwen nye hɛn akoma mu a, yɛremma kwan ma biribiara nnto hɛn fintsidua da.

13. Ebɛnadze na yɛwɔ a hɔn a wosi akan wɔ mbirikatu mu no nnyi bi?

¹³ Nna hɔn a wosi akan wɔ tsetse Greece mbirikatu mu no hyia nsɛndzendzen ahorow a otwar dɛ wodzi do. Nna bi nye ɔberɛ nye honam mu yaw. Naaso, nna dza wobotum dze hɔnho ato do ara nye hɔn ahoɔdzen nye hɔn apɔw mu a wɔbɛtsentsen. Ɔkwan bi do no, yɛtse dɛ dɛm mbirikatufo no. Hɛn so yenya ntsetsee wɔ mbrɛ yebesi etu nkwa ho mbirika no mu. Naaso, yɛwɔ biribi a hɔn a wosi akan wɔ mbirikatu mu no nnyi bi. Yebotum enya ahoɔdzen a onnyi ano efi Jehovah hɔ. Jehovah ahyɛ hɛn bɔ dɛ, sɛ yɛdze hɛnho to no do a, ɔbɛtsetse hɛn na ɔaama yɛayɛ dzen!​—1 Pet. 5:10.

14. Ebɛn kwan do na 2 Corinthfo 12:9, 10 boa hɛn ma yegyina nsɛndzendzen ahorow ano?

¹⁴ Nna ɔsɛ dɛ Paul gyina nsɛndzendzen ahorow pii ano. Ahorba a nkorɔfo hyɛɛ no nye soɛr a wɔsoɛree tsiaa no da nkyɛn a, ɔtɔ da a, nna ɔtse nka dɛ ɔayɛ mberɛw. Afei so, nna ɔsɛ dɛ ogyina biribi a nankasa kãa dɛ ɔyɛ “honam mu nsoɛ” no ano. (2 Cor. 12:7) Naaso, oemmbu dɛm nsɛndzendzen ahorow yi dɛ ɔyɛ biribi a ɔbɛma oegyaa dɛ ɔbɔsom Jehovah. Mbom, obuu no dɛ ɔyɛ ho kwan a oenya a ɔbɛma ɔdze noho ato Jehovah do. (Kenkan 2 Corinthfo 12:9, 10.) Osian adwen a ɔtse dɛm a Paul nyae ntsi, Jehovah boaa no wɔ no nsɔhwɛ ahorow nyina mu.

15. Sɛ yesũasua Paul a, ebɛnadze na yebenya?

¹⁵ Hɛn so, hɛn gyedzi ntsi afofor botum ahyehyɛ hɛn ahorba anaa wɔaasoɛr etsia hɛn. Afei so, obotum aba dɛ ɔsɛ dɛ yegyina yarba anaa ɔberɛ ano. Naaso, sɛ yesũasua Paul a, dɛm nsɛndzendzen ahorow yi mu biara botum abɛyɛ ho kwan a yɛdze benya Jehovah no mboa a ɔdɔ wɔ mu no.

16. Sɛ innyi ahoɔdzen papa mpo a, ebɛnadze na ibotum ayɛ?

¹⁶ Ana yarba aka wo ato mpa mu anaa yarba ntsi etsena ebubuafo egua mu? Ana w’anankoroma ayɛ mberɛw anaa w’enyiwa ayɛ wo kusukusu? Sɛ dɛm a, ana ibotum nye hɔn a hɔn mfe nnkɔr enyim na wɔwɔ ahoɔdzen no abɔ mu asom Jehovah? Ibotum ayɛ dodow! Enuanom pii a hɔn mfe akɔ enyim na wonnyi ahoɔdzen papa no nam kwan a wɔdze kɔ nkwa mu no do. Naaso, nnyɛ hɔnankasa hɔn ahoɔdzen na wɔdze yɛ dɛm. Na mbom, wonya ahoɔdzen fi Jehovah hɔ. Wɔkyer nhyiamu dwumadzi ahorow gu efir do ma hɔn ma wotsie. Nkyii so, wɔnam foon do tsie dza ɔkɔ do wɔ asafo nhyiamu ase. Iyi yɛ akwan ahorow a wɔfa do nya ahoɔdzen fi Jehovah hɔ no bi. Afei so, wodzi adatserfo, anɛɛsfo, nye hɔn ebusuafo dase dze nya esuafoyɛ edwuma no mu kyɛfa.

17. Jehovah tse nka dɛn wɔ hɔn a wonnyi apɔwmudzen papa no ho?

 ¹⁷ Mma mma honam afamu ahoɔdzen a innyi no mma w’abaw mu mmbu ma enntse nka dɛ, ayɛ mberɛw araa ma irunntum nnkɔ do mmfa ɔkwan a wɔdze kɔ nkwa mu no do bio. Jehovah no mu gyedzi a ewɔ nye ndzɛmba a ayɛ ama no wɔ no som mu nyina ntsi, ɔdɔ wo. Afei dze, ihia no mboa sen mber biara a abɛsen kɔ, na ɔrenndan wo nngya da. (Ndw. 9:10) Mbom, ɔbɔtwe abɛn wo kɛse. Hyɛ asɛm a hɛn akyerɛbaa bi a orihyia ɔhaw pii wɔ n’apɔwmudzen mu no kãe no nsew. Ɔkãa dɛ: “Osiandɛ mirihyia ɔhaw pii wɔ m’apɔwmudzen mu ntsi, muhu dɛ menntaa nnya ho kwan pii mmfa nndzi afofor dase. Naaso, minyim dɛ kakra a mutum yɛ no ma Jehovah n’akoma tɔ ne yamu, na iyi ma m’enyi gye.” Sɛ etse nka dɛ w’abaw mu ebu a, kaa dɛ Jehovah ka woho. Dwendwen nhwɛdo a Paul yɛe no ho, na ma ne nsɛm a ɔhyɛ nkuran yi ntsena w’adwen mu. Ɔkãa dɛ: “Minya enyika wɔ mberɛw mu, . . . na meyɛ mberɛw a, nna mbom meyɛ dzen.”​—2 Cor. 12:10.

18. Ebɛn ɔhaw a no mu yɛ dzen na binom hyia?

¹⁸ Nyimpa binom a wɔnam nkwa kwan no do no hyia ɔhaw fofor bi so. Wohyia ɔhaw ahorow a afofor nnhu anaa ɔhaw ahorow a bi a afofor nntum nntse ase. Dɛ nhwɛdo no, wohyia tsebea ahorow a ɔma hɔn abaw mu bu anaa ɔma dadwen mbordo hyɛ hɔn do. Ebɛnadze ntsi na Jehovah n’asomfo a ɔdɔ hɔn yi hyia ɔhaw a no mu yɛ dzen dɛm? Sɛ obi ne nsamu ebu anaa ɔtsena ebubuafo egua mu a, obiara botum ehu ɔhaw a orihyia na bi a biribi bɛka hɔn ma wɔaayɛ biribi aboa dɛm nyimpa no. Naaso, hɔn a wohyia ɔhaw wɔ adwen mu anaa nkãtse afamu no dze, bi a afofor runnhu dɛ biribi haw hɔn. Nokwasɛm nye dɛ, hɔn tsebea no mu yɛ dzen tse dɛ obi a ne nsa anaa n’anan mu ebu. Naaso, osiandɛ afofor nnhu dɛ woruhu amandze ntsi, bi a nkorɔfo rennda ɔdɔ na ayamuhyehye a ɔsɛ fata hɔn no edzi nnkyerɛ hɔn.

19. Ebɛnadze na yebotum esũa efi Mephibosheth n’asɛm no mu?

¹⁹ Sɛ irihyia ɔhaw ahorow a ɔmma inntum nnyɛ pii dɛ mbrɛ ehwɛ kwan dɛ ebɛyɛ wɔ Jehovah no som mu ma ntsi etse nka dɛ afofor nntse wo ase a, Mephibosheth n’asɛm no botum ama eenya nkuranhyɛ. (2 Sam. 4:4) Nna ɔyɛ obubuafo, na iyi da nkyɛn a, Ɔhen David ennya no ho adwen pa ma ntsi, ɔnye no enndzi no yie. Nna Mephibosheth nnyɛɛ bɔn biara a ɔwɔ dɛ dɛm nsɔhwɛ ahorow yi to no. Naaso, ɔamma no bo emmfuw. Ɔmaa n’enyi sɔɔ ndzepa ahorow a onyae wɔ n’asetsena mu no. Ɔdaa David ase wɔ ayamuyie a ɔdaa no edzi kyerɛɛ no wɔ mber bi a abɛsen kɔ no. (2 Sam. 9:6-10) Dɛm ntsi, ber a David ennya Mephibosheth no ho adwen pa ma ntsi ɔnye no enndzi no yie no, Mephibosheth susuu ndzɛmba ho kɔr ekyir. Ɔamma no bo emmfuw wɔ mfom a David dzii no ho. Dɛmara so na ɔammbɔ Jehovah sombo wɔ dza David yɛe no ho. Mephibosheth dze  n’adwen sii dza obotum ayɛ dze aboa Jehovah ne hen a ɔasera no no do. (2 Sam. 16:1-4; 19:24-30) Jehovah ama ɔayɛ Mephibosheth no nhwɛdo pa no ho kyerɛwtohɔ wɔ n’Asɛm mu, mbrɛ ɔbɛyɛ a yebotum esũa biribi efi mu.​—Rom. 15:4.

20. Ebɛn kwan do na dadwen botum aka binom, naaso ebɛn ahotodo na wobotum enya?

²⁰ Osian dadwen a ɔhyɛ hɛn nuanom mbarimba na mbaa binom hɔn do ntsi, sɛ wɔwɔ nyimpa mu a, wosuro na wɔsan so fɛr. Bi a ɔbɛyɛ dzen ama hɔn dɛ wɔbɔkɔ nyimpadɔm mu, naaso, wɔkɔ do kɔ asafo nhyiamu, ɔmansin na ɔmantɔw ehyiadzi. Ɔyɛ dzen ma hɔn dɛ wɔnye nyimpa a wonnyim hɔn bɛkasa dze, naaso wɔbɔ mbɔdzen dzi afofor dase wɔ asɛnka mu. Sɛ dɛm na ɔtse wɔ w’afamu a, nya awerɛhyɛmu dɛ ɔnnyɛ wankotsee. Dɛ mbrɛ etse nka no, dɛmara so na nyimpa pii tse nka. Ma ɔntsena w’adwen mu dɛ, Jehovah n’enyi sɔ mbɔdzen a ifi wo kra nyinara mu bɔ dɛ ebɔsom no no. Nokwasɛm nye dɛ, pa a emmpaa abaw no yɛ adanse a ɔkyerɛ dɛ Jehovah rihyira wo na ɔrema wo ahoɔdzen a ihia no. * (Phil. 4:6, 7; 1 Pet. 5:7) Sɛ erosom Jehovah ɔmmfa ho ɔhaw a irihyia wɔ honam mu anaa nkãtse afamu a, ibotum enya ahotodo dɛ ereyɛ dza ɔtsen wɔ Jehovah n’enyi do.

21. Ebɛnadze na Jehovah bɔboa hɛn nyina ma yeetum ayɛ?

²¹ Nokwasɛm nye dɛ, nsonsonee pii wɔ mbirikatu ankasa nye mbirikatu a Paul kãa ho asɛm no mu. Mbirika ankasa a nna wotu no wɔ Bible mber mu no, nna nyimpa kortsee na onya konyim abɔtsir no. Naaso, obiara a ɔdze abotar begyina mu na ɔdze nokwardzi etu nkwa ho mbirika no ekesi ewiei no benya onnyiewiei nkwa dɛ konyim abɔtsir. (John 3:16) Afei so, hɔn a wosi akan wɔ mbirikatu mu no, ɔsɛ dɛ hɔn nyina yɛ nkorɔfo a wɔtse apɔw ankasa. Annyɛ dɛm a, bi a worunntum nndzi konyim wɔ mbirikatu no mu. Dza ɔnye iyi bɔ ebira no, hɛn mu pii nnyi honam mu ahoɔdzen papa, naaso yɛdze abotar ritsintsim wɔ nkwa ho mbirikatu no mu. (2 Cor. 4:16) Jehovah bɔboa hɛn nyina ma yeetu nkwa ho mbirika no ewie!