1. Ka fò-noutout fè ?

SI OU malad oben si ou fatigé, ou ka di ou ké ay kouri on kous, siwtou si ou ja sav kè i rèd ? An pa’a gè kwè. É poutan, lapòt Pòl di kè tout sé vré krétyen-la ka touvé-yo adan on kous (Ébr. 12:1). É ki nou jenn, ki nou ja ni on bèl laj, ki nou anfòm, ki nou fatigé, fò noutout andiré jistan lafen rivé si nou vé rèsèvwa rékonpans-la Jéova ka pwomèt-nou la (Mat. 24:13).

2. Dapré sa 2 Timoté 4:7, 8 ka di, poukwa Pòl té byen plasé pou palé dè kous-la kè tout sé krétyen-la ka kouri la ?

² Pòl té byen plasé pou palé dè sijé-lasa pas limenm a-y té « fin kous-la » (li 2 Timoté 4:7, 8). Men dè ki kous i té ka palé ègzaktèman ?

3. Dè ki kous Pòl té ka palé ?

³ An tan a Pòl, yo té ka fè gwo konpétisyon a ispò an Grès. É délè, apòt-la té ka sèvi èvè sèwten biten ki té ka fèt pannan sé évènman-lasa pou anségné dé biten ki té vréman enpòwtan (1 Kor. 9:25-27 ; 2 Tim. 2:5). A plizyè rèpriz, i konparé vi a on krétyen èvè on kous a pyé (1 Kor. 9:24 ; Gal. 2:2 ; Filip. 2:16). On moun ka koumansé kous-lasa lè i ka ba Jéova vi a-y é lè i ka pran lèbatèm (1 Pyè 3:21). É i ka pasé lign-darivé-la lè Jéova ka ba-y rékonpans-la kivédi lavi étèwnèl (Mat. 25:31-34, 46 ; 2 Tim. 4:8).

4. Ka nou ké vwè adan awtik-lasa ?

⁴ Si nou ka konparé on maraton èvè vi a on krétyen, nou ka rann-nou kont kè ni onlo biten ki ka sanm. An-nou palé dè 3 adan yo. Prèmyèwman, fò-nou pasé pa bon chimen-la. Dézyèmman, fò-nou rété konsantré asi lign-darivé-la. É twazyèmman, fò-nou rivé about a tout difikilté nou ka jwenn an chimen.

5. Ki chimen pou nou suiv, é poukwa ?

⁵ Lè ni on kous, sé moun-la ki ka òwganizé-y la ka prévwa pa ki koté kous-lasa ké pasé. É pou sé kourè-la pé sa trapé rékonpans-la, fò-yo suiv chimen-lasa. Menmjan-la, si nou vé ni rékonpans-la kivédi lavi étèwnèl, fò-nou suiv chimen-la Bondyé trasé la, fò-nou viv kon on krétyen dwètèt viv (Akt 20:24 ; 1 Pyè 2:21). Men, Satan é séla ki èvè-y la vé fè-nou pran ondòt chimen : yo vé nou « kouri ansanm èvè yo » (1 Pyè 4:4). Pou yo, vi-la nou ka menné la sé on biten a tèbè. Yo ka di kè jan-la yo ka viv la méyè pas dapré yo, yo lib. Men olasa ! (2 Pyè 2:19).

6. Ka ègzanp a Brian ka aprann-vou ?

⁶ On moun ki ka lésé mond a Satan détenn asi-y pa’a tadé a rann-li kont kè chimen-la i pran la ka rann-li èsklav é kè i pa lib kon i té ka konprann (Wom. 6:16). An-nou pran ègzanp a Brian. Pap’a-y é manman-y toujou té ka ankourajé-y a viv kon on krétyen dwètèt viv. Men lè i vin jennboug, i koumansé di kè sé ondòt jan dè vi pou i menné pou i santi-y byen. Alò, i désidé rantré an ploton-la ki ka viv kon Satan vlé la. Mi sa limenm ka admèt : « An té bizwen ni plis libèté dapré mwen. Men an pa jen konpranndèdi kè libèté-lasa té’é menné-mwen la an yé la. An koumansé fè enpé mové biten é an pa té ka rivé arété. [...] Pa ègzanp, an koumansé bwè, an tonbé an dwòg é an té ka fè onlo péché sèksyèl. Aprésa, pi nou té k’ay é pi an té ka pran dwòg ki té fò. É ni sèwten adan yo kè an pa té ka rivé lagé menm. [...] Kifè, an koumansé vann dwòg mwen té kontinyé fè bétiz an mwen *. » Anfinaldikont, Brian désidé viv kon Jéova ka mandé. I chwazi ondòt chimen é i pran lèbatèm an 2001. Konnyéla, Brian ka kouri kous-la sé krétyen-la ka kouri la é sa ka rann tchè a-y kontan toubònman !

7. Dapré sa Matyé 7:13, 14 ka di, ni 2 chimen douvan nou. Kilès ?

⁷ Fò-nou chwazi bon chimen-la ! Sé on biten ki enpòwtan toubònman ! Sa Satan té’é vlé sé kè nou arété kouri asi chimen étwèt la ki « ka menné a lavi ». Sa i té’é vlé sé kè nou pran chimen-la ki laj la kon lamajorité a moun ka fè. Onlo moun ka chwazi chimen-lasa pas i pi fasil a suiv. Men chimen-lasa « ka menné a  ladèstriksyon » (li Matyé 7:13, 14). Pou nou rété asi chimen a lavi, fò pa nou lésé ayen distrè-nou. Men, fò-nou fè Jéova konfyans é fò-nou obéyi-y.

8. Ka on kourè ka fè si i tonbé ?

⁸ On moun ki ka kouri on maraton ka gadé douvan a-y byen, pou ayen pa fè-y pran pon so. Men pyé a-y pé rivé a rantré adan on tou oben ondòt kourè pé varé asi-y. Si i tonbé, i ka woupran doubout a-y é i ka kontinyé kouri kouri a-y. Lèspri a-y pa asi sa ki jété-y atè, men asi lign-darivé-la é asi rékonpans-la i vé gangné la.

9. Si nou tonbé ka pou nou fè ?

⁹ Adan kous-la nou ka kouri la, nou toujou ka pran on so, pa ègzanp lè nou ka di oben nou ka fè on biten ki pa bon. Défwa osi, sé sélézòt kourè-la ki ka jété-nou atè akòz dè érè yo ka fè. Sa pa ka étoné-nou pas noutout enpawfè é noutout ka kouri asi on ti chimen ki étwèt. Donk, oblijé nou jété on moun atè é oblijé yo jété-nou osi. Pòl té ja di-nou kè délè, yonn té’é trapé on ti bab èvè lòt (Kol. 3:13). Men fò pa nou arété-nou asi sa ki jété-nou atè. Olyé dè sa, pisimé nou rété konsantré asi rékonpans-la. Méyè chwa ki ni a fè sé woupran doubout an nou é kontinyé kouri ! Si nou ni rankin an tchè an nou, é si nou vé pa woupran doubout an nou, nou pé’é fin kous-la é nou pé’é trapé rékonpans-la. Anplisdisa, nou pé rivé a anpéché lézòt vansé si nou ka rété anmitan chimen-la.

10. Ka nou pé fè pou nou pa fè lézòt tonbé ?

¹⁰ Si nou vé pa fè lézòt tonbé, ni ondòt biten enpòwtan pou nou fè. Ki biten ésa ? Dépi sa posib, fò-nou lésé lézòt fè gou a yo olyé nou oblijé-yo fè sa ki ka plè-nou (Wom. 14:13, 19-21 ; 1 Kor. 8:9, 13). Anrapò èvè pwen-lasa, kous-la sé krétyen-la ka kouri la pa menm biten ki on kous moun ka kouri an lari. Li kourè-la ki ka kouri kous a pyé la, i anripaj èvè sélézòt-la pas i bizwen gangné rékonpans-la. Prèmyé moun i ka sonjé sé limenm. I ké jous chèché a bouré sélézòt kourè-la pou i pé  sa pasé douvan yo. Men nou, nou pa anripaj èvè ponmoun (Gal. 5:26 ; 6:4). Pi ni moun ki ka rivé an bout a kous-la èvè nou é pi nou kontan. Sé pousa nou ka fè tousa nou pé pou édé on maksimòm dè moun pou yo gangné rékonpans-la kivédi lavi étèwnèl. Kifè, nou ka fè onlo éfò pou nou mèt sa Pòl di-nou an pratik : « Pa chèché yenki pwòp entéré a zòt, men osi ta lézòt » (Filip. 2:4).

11. Asi ki biten on kourè ka konsantré-y é poukisa ?

¹¹ Sèten on kourè pa’a kontanté-y dè gadé douvan a-y, men i ka konsantré-y asi lign-darivé-la osi. Menmsi i lwen toujou, i ja ka vwè-y ka koupé lign-la é i ja ka vwè-y èvè rékonpans-la. I ka pòté bon mannèv pou i gangné pas i toujou ka sonjé rékonpans-la.

12. Ki bèl rékonpans Jéova ka ban-nou ?

¹² Jéova ka ba sèwvitè a-y on garanti. Siwvwè nou fin kous-la, nou sèten ni on rékonpans. Sé pé lavi étèwnèl an syèl-la oben lavi étèwnèl asi latè. Labib ja ka di-nou kijan rékonpans-la ké yé é sa ka pèwmèt-nou imajiné jan lavi ké bèl a moman-lasa. Pi èspérans-lasa ké fon an tèt an nou é an tchè an nou, pi nou ké pé woupran doubout an nou si nou tonbé.

13. Ka nou ni an plis ki sé kourè-la ki té ka kouri pannan sé konpétisyon-la an Grès ?

¹³ An Grès, pannan sé konpétisyon-la, sé kourè-la té ka las é défwa yo té ka santi mal, men fò-yo té andiré sé difikilté-lasa é dòt jan dè difikilté ankò. Men pou fè sa, fò yo té konté yenki asi pwòp fòs a yo é asi fòwmasyon-la yo té risivwè la. Menmjan ki sé kourè-lasa, yo ka fòwmé-nou pou nou sav kijan pou nou kouri. Men nou ni on biten anplis ki yo : nou pé pran fòs owa Jéova é pé’é jen manké-y puisans pou édé-nou ! Jéova ka pwomèt-nou kè si nou ka konté anlè-y, non sèlman i ké fòwmé-nou men anplisdisa, i ké fè-nou vin pi fò ! (1 Pyè 5:10).

14. Kijan 2 Korentyen 12:9, 10 pé édé-nou andiré difikilté nou ka jwenn ?

¹⁴ Pòl jwenn onpakèt difikilté. Yo té ka jiré-y é yo té ka pèwsékité-y. É pawfwa i té ka santi-y pi ba ki atè pas fò i té sipòté « on pikan andidan chè » a-y (2 Kor. 12:7). Lè i té ka jwenn difikilté, i pa jen mèt an tèt a-y kè i ké abandoné, men pou-y, sé té lokazyon dè konté asi Jéova (li 2 Korentyen 12:9, 10). Konm Pòl té ni mantalité-lasa, Jéova édé-y rivé about a tout sé éprèv-la i té ka jwenn la.

15. Si nou ka imité Pòl, dè ki biten nou ké bénéfisyé ?

¹⁵ Nou osi, sa ka rivé kè yo jiré-nou é kè yo pèwsékité-nou padavwa nou ka sèvi Jéova. Pétèt osi kè santé-la pa two flanbo é kè kò-la pran on bon koud krazé. Men si nou fè kon Pòl, chakfwa nou ké touvé-nou adan sé difikilté-lasa, nou ké santi kè Jéova ka soutyenn-nou é kè i ka fè sa èvè onlo lanmou.

16. Menmsi santé a-w pa gè bon, ka ou pé fè ?

¹⁶ Pétèt kè ou kouché é kè ou pé pa lévé ankò. Pétèt kè ou an chèz-woulant. Pétèt kè ou pa’a vwè kon avan é kè ou ni dimal a maché. Si ou adan on sitiyasyon konsa, ou ka di ou ké pé kouri èvè on jennmoun ki ni tout jénès a-y ? Ében répons-la sé wi ! Ni onlo sèwvitè a Bondyé ki ja ni on bèl laj oben ki enfim é ki ka kouri asi chimen-la ki ké pèwmèt-yo ni lavi. Men si yo ka rivé fè sa, a pa dè yomenm a yo. Sé Jéova ki ka ba-yo fòs-la. É fòs-lasa yo ka  ni-y lè yo ka pran réinyon a yo o téléfòn oben asi entèwnèt. Anplisdisa, yo ka fè éfò pou fè disip. Kijansa ? Yo ka préché pou fanmi a yo é pou sé mèdsen-la é sé enfiwmyé-la ki ka okipé dè yo la.

17. Lè kò a on moun pa bon, ka Jéova ka rèsanti pou-y ?

¹⁷ Si ti kò-la pa’a pèwmèt-vou fè tousa ou té’é vlé, pa dékourajé é pa mèt an tèt a-w kè ou pé’é pé andiré jistan lafen rivé. Jéova enmé-w pas ou ni konfyans adan-y é pas i pa ka oubliyé tousa ou ja fè ba-y. Sé konnyéla ou pi bizwen èd a-y é i pé’é lagé-w (Sòm 9:10). Okontrè, sé alè i ké vin pibon zanmi èvè-w. Gadé sa on sè ki byen malad ka di : « Pi kò-la ka désann, é mwens an pé préché. Men an sav kè mwenn ti éfò an fè ka fè Jéova plézi, é sa ka rann tchè an mwen kontan. » Lè moral a-w a zéwo, pa oubliyé kè Jéova èvè-w. Sonjé ègzanp-la Pòl lésé ban nou la. Mi sa i di : « An kontan an ni féblès, [...] pas lè an ka santi an fèb, sé lè an ka santi an ni bon fòs » (2 Kor. 12:10).

18. Ni sèwten frè é sè ki ka touvé-yo adan on sitiyasyon ki vréman rèd. Ki sitiyasyon ésa ?

¹⁸ Moun ki ka kouri pou ni lavi étèwnèl pé jwenn ondòt difikilté ankò. Fò-yo sipòté on « pikan ki andidan chè » a yo. É pétèt kè ponmoun pa’a vwè sa é pa’a konprann sa. Pa ègzanp, ni sèwten ki ka fè déprésyon oben ki angwasé bon angwasé la. Poukwa sa rèd toubònman pou sé frè é sè lasa ? Pas lèwvwè bra a on moun kasé oben kè i adan on chèz-woulant, toutmoun ka vwè sa é toutmoun ka édé-y. Men ni dòt, tchè a yo an bobo, oben tèt-la pa two bon é lè ou ka gadé-yo ou pa té’é jen di sa. Yo ka santi mal kon moun-la bra a-y kasé la, men konm ponmoun pa’a vwè kè yo ka soufè, yo pa’a rèsèvwa èd-la é lanmou-la yo bizwen la.

19. Ka ègzanp a Mefibochèt ka aprann-nou ?

¹⁹ Si kò-la pa gè bon oben tchè-la an bobo, é kè moun pa’a konprann sa ou ka rèsanti, ègzanp a Mefibochèt pé ba-w fòs (2 Sam. 4:4). I té ja enfim enfim a-y, é on jou, wa David wou mal jijé-y ankò. Maléré-la pa té pé pi inosan ki sa. Men i pa fè kòlè akòz dè sa ; i té ka pran tan aprésyé tout bon biten ki té ka rivé-y adan lavi. I té ni onlo rèkonésans pou tousa David té ja ni lokazyon fè ba-y (2 Sam. 9:6-10). Alò lè David mal jijé-y, i pa rété gadé yenki sa. I pa té ni pon rankin an tchè a-y pou David. É i pa fè kòlè èvè Jéova parapòt a sa David té fè-y. I rété konsantré asi sa i té pé fè pou soutyenn wa-la Bondyé té chwazi la (2 Sam. 16:1-4 ;  19:24-30). Si Jéova fè ansòt pou yo palé dè Mefibochèt adan pawòl a-y, sé pou édé-nou (Wom. 15:4).

20. Lè on moun angwasé bon angwasé la, kijan sa pé aji asi-y, men dè ki biten i pé sèten ?

²⁰ Ni sèwten frè é sè ki angwasé bon angwasé la menm. Lè yo k’ay sèwten koté é yo oblijé jwenn èvè moun, yo ka santi-yo istrésé é yo pa’a santi-yo alèz menm. Lè ni onpakèt moun alantou a yo, yo ka trapé lafrous, men magrésa, yo toujou réinyon é yo toujou lasanblé. Yo ni dimal a palé ba on moun yo pa konnèt men yo ka préché kanmenm. Si ou adan sitiyasyon-lasa, ou pé sèten kè ou pa tousèl. Ni onlo moun ki ka menné menm konba ki-w. Pa oubliyé kè Jéova ka aprésyé tout éfò ou ka fè pou sèvi-y èvè tout tchè a-w. É konm ou po’o jen lagé, sé on prèv kè Jéova ka béni-w é kè i ka ba-w fòs-la ou bizwen la (Filip. 4:6, 7 ; 1 Pyè 5:7). Menmsi kò a-w pa gè bon oben kè tchè a-w an bobo, si ou ka kontinyé sèvi Jéova, ou pé sèten kè ou ka fè-y plézi *.

21. Èvè èd a Jéova, ka noutout ké rivé a fè ?

²¹ Érèzman, ni onlo diférans ant on kous moun ka kouri an lari é kous-la sé krétyen-la ka kouri la. An tan a Pòl, lè té ni on kous a pyé, sé onsèl moun ki té ka gangné rékonpans-la. Men adan kous-la sé krétyen-la ka kouri la, toutmoun ki ka andiré é ki ka rété fidèl ka rèsèvwa rékonpans-la kivédi lavi étèwnèl (Jan 3:16). Anplisdisa, adan on kous a pyé, fò tout sé kourè-la anfòm ; sinon yo pé’é pé gangné. Adan kous-la sé krétyen-la ka kouri la, ni onlo frè é sè ki ka andiré menmsi kò a yo pa gè bon (2 Kor. 4:16). Men èvè èd a Jéova, noutout ké rivé a fin kous-la !