1. ¿Ni kristiano jökrä rabadre dre nuainne?

NIA ye tare gare mäi aune mätä bren aune nainte, ¿ye ngwane mä törba ja gain yete arato ya? Ñakare ¿ñan ererea? Akwa ni kristiano metre ye jökrä tä nen nia keteitibätä apóstol Pablo käkwe niebare (Heb. 12:1). Kukwe kwin Jehovata käbämike yei ni tö ngwane, kä nuäi nibiti o ni di nuäi akwa ni jökrä kä ngwandre nüke jai nememe mrä (Mat. 24:13).

2. Kukwe tä 2 Timoteo 4:7, 8, ¿ye ñobätä Pablokwe niebare töi jämebiti?

² Pablokwe blitabare töi jämebiti kukwe nebätä ñobätä ñan aune niarakwe niabarera täte (ñäkädre 2 Timoteo 4:7, 8 yebätä). * Akwa, ¿nia medenbätä Pablo nämäne blite?

3. ¿Nia meden gäräbare Pablokwe?

³ Ruäre ngwane, Pablo nämäne kukwe bämike jadaka nuain nämäne niara näire juta Grecia yete yebiti kukwe ütiäte driekäre (1 Cor. 9:25-27; 2 Tim. 2:5). Bä kabre, niarakwe ni kristiano tä dre nuainne aune ja ngwen ño ye bämikani ni niaka ye erere (1 Cor. 9:24; 2 Tim. 4.7, TNM). Nita ja denkä mento Jehová kräke aune ja ngökö ñöte ngwane nita nia ye kömike (1 Ped. 3:21). Aune Jehovakwe ja nire käre ye biain nie ngwane nikwe nia ye ganain (Mat. 25:31-34, 46; 2 Tim. 4:8, TNM).

4. ¿Dre mikai gare jai kukwe ja tötikara nekänti?

⁴ Nia yebätä nitre tä nen ja gakäre, ¿ye ñobätä bäsi ja erebe ni kristiano tä nen ja üairebiti yebe? Ani ketamä mike  gare jai. Kena, ni rikadre ji metre yebiti. Ketebukäre, ja töi mikadre kwatibe nememe kä tä kitani nie yekänti. Aune ketamäkäre, dre tädre ni jiete yebiti ta ni rikadre.

5. ¿Ji medenbiti ni rikadre aune ñobätä?

⁵ Nitre niaka rabadre premio ganainne jai yekäre, ji ükaninte niakäre ietre yebiti niadre kwetre. Ye erere arato, ja nire käre rabadre nikwe yekäre ni rikadre ji metre yebiti, ye abokän, kukwe mikani ni kristiano kräke ye mikadre täte (Hech. 20:24; 1 Ped. 2:21). Akwa Satana aune nitre ja mikaka niarakri tö ni tuabätä nen ji blobiti niaratre ben (1 Ped. 4:4). Nita nüne ño yebätä tätre ni kötaire aune niaratre töta nemen dre nuain erere tätre nuainne, yebätä niaratre nüne bäri kwin tätre niere. Akwa yebrä ngwarbe (2 Ped. 2:19).

6. ¿Kukwe namani bare Brianbätä ye tä dre driere nie?

⁶ Nire käkwe ja töi mikadre niken ji Satanakwe yebiti ye ñaka nünain kwin, ñakare aune jerekäbe rabai klabore kisete rükai gare ie (Rom. 6:16). Kukwe namani bare ja mräkä kädekata Brianbätä ye ani mike gare jai. Niara nämäne monsore ngwane rün aune meye käkwe tötikani Bibliabätä, akwa jatani monso bati ngwane kukwe mika nämäne täte kwe ye ñaka nämäne kä mike jutobätä jatani ruin ie, yebätä ja töi mikani kwe nüne nitre tä nekete Satanakri ye erere. Brian tä niere: “Ti tö nämä jondron jökrä nuain aune ni madakwe ñaka ñäkäidre tie akwa ye käkwe ti mikai kukwe käme krubäte nuainne ye ti ñaka nämä gain jabätä”. Nikani droga duin, dröbanike aune ja ngwen käme. Niara tä niere: “Kä rikaba ruäre ta yete, tikwe droga bäri käme ni ngrabare kräke ye duaba aune droga keta kabre kisete ti rababa ni klabore kwrere. Aune ti rababa arato droga rürübäine mada kökakäre ja kräke”. Kä nikani ta ye bitikäre, ja töi mikani kwe kukwe ükaninte Jehovakwe ye miketa täte. Kukwe käme ye tuanimetre kwe aune ja ngökani ñöte kwe kä 2001 yete. Nengwane tä nen ja üairebiti ni kristiano erere aune kätä juto krubätebätä. *

7. ¿Mateo 7:13, 14 tä niere erere ji krobu meden tä ni käne?

⁷ Nikwe ji kwin diandre jai ye ütiäte krubäte. Satana ñaka tö ni tuai näin ji krä chi kätä niken ni ngwena nüna kärekäre kokwäre yebiti, ñakare aune tö ni tuai näin ji kwata kri yebiti känti ni kwati tä näin. Nändre ji yebiti ye nuäre, akwa tä ni ngwena gata kokwäre  (ñäkädre Mateo 7:13, 14 yebätä). Ni ñan törbadre kämikaikä ji metre yebätä ngwane, nikwe tö ngwandre Jehovai aune kukwe nieta kwe nie ye nikwe mikadre täte.

8. ¿Ni niaka tä ngoto ritekä aune tä mate tibien ngwane tä dre nuainne?

⁸ Nitre niaka ye tädre käre nikren ja känenkri ne kwe ñan ngoto ritadrete. Akwa yebiti ta, raba däte kämäkäte aune ñan nierare ni madakwe ngwandre ngoto ritekä. Raba mate tibien, akwa raba nüketa krö aune nen jankunu. Drekwe ngwani ngoto ritekä yebätä ñaka ja töi mike, ñakare aune rabadre nüke medente aune premio meden ganain kwe yebätä tä ja töi mike.

9. ¿Ni ngoto ritadrete ngwane nikwe dre nuaindre?

⁹ Niabätä ja nire käre kokwäre ni raba ngoto ritete ni ngite yebätä. Kukwe nieta nikwe o kukwe ñaka kwin nuainta nikwe o ja mräkä mada tä kukwe tare nuainne nibätä ye raba ni ngwen ngoto ritekä. Ye ñaka ni töi mikadre niä, ñobätä ñan aune ji krä chi yebiti nita näin. Aisete ruäre ngwane kukwe raba nemen jabätä nie ja mräkätre ben Pablokwe niebare erere (Col. 3:13). Akwa dreta ni ngwen ngoto ritekä yebätä ñaka ja töi mikadre, ñakare aune premio meden rabai nikwe ja känenkäre yebätä ni töi tädre. Ni raba mate tibien, akwa ni rükadreta krö aune nikwe niadre jankunu ja käne. Ni ñaka rabadre kwekebe tibien romone kwärä aune ñäke ni mada rüere ñobätä ñan aune ye köböite ni ñaka rabai kä kitani nie yekänti aune premio ñaka rabai nikwe. Ne madakäre, ni ñaka rükai krö ngwane ja mräkätre tä nen ja nire käre kokwäre ji krä chi yebiti ye nikwe ngwain ngoto ritekä arato.

10. ¿Nikwe dre nuaindre ne kwe nikwe ñaka ni mada ngwandre ngoto ritete?

¹⁰ Ni ñan törbadre ja mräkätre ngwen ngoto ritekä ngwane, kukwe ruärebätä nikwe ja töi ükadrete aune ñaka töbikadre jabebätä (Rom. 14:13, 19-21; 1 Cor. 8:9, 13). Akwa ye erere ñan nuainta nitre kä nebätä tä ja gain yekänti. Nitre niaka jökrä tö ja aibe tuabätä ganane, yebätä tätre niken ja gain kwärikwäri. Itire itire ye töita ja aibebätä aune ñaka ni madabätä. Aisete tätre niken nitre  niaka mada ye ngätäite ta niakäre käne. Ni abokän töita jene, ni ñaka ja gain ja mräkätre ja üairebiti yebe (Gál. 5:26; 6:4). Ni tö ni jökrä dimikabätä nemen kä kitani nie yekänti ne kwe ja nire käre rabadre ni jökräkwe. Yebätä Pablokwe kukwe niebare ye nita ja di ngwen mike täte. Nikwe ñaka töbikadre kukwe kwinbätä ja aibe kräke, ñakare aune nikwe töbikadre “jändrän kuinbtä ni mda mdakrä arato” niebare kwe (Filip. 2:4).

11. ¿Drebätä nitre niaka tä ja töi mike aune ñobätä?

¹¹ Ni niaka ye ñaka tä nikren jerekäbe ja käne, ñakare aune niadre medente mrä kwe yebätä tä ja töi mike arato. Kä ye jämi tuin ie, akwa ñongwane rabai yete aune premio biain ie ye tä bämike ja töite. Ye tä niaratre dimike näin jankunu ja käne.

12. ¿Ngöböta ni tarere yebätä dre käbämikata kwe nie?

¹² Ngöböta ni tarere, yebätä nire nire käkwe niai nememe mrä yei niarata ja nire käre ye käbämike kä kwinbiti o kä bä nuäre kä tibienbätä nete. Nüna rabai ño ja känenkäre yebätä Biblia tä kukwe keta kabre mike gare nie. Ye köböire ni täi nüne ño ja känenkäre ye ni raba bämike ja töite. Nikwe ja töi mikai kwatibe nüna kärekäre käbämikata nie yebätä ngwane, kukwe raba ni ngwen ngoto ritekä ye nikwe ñaka tuainmetre ja ketebätä rabakäre kä yekänti.

13. ¿Dre ütiäte tä nikwe ye abokän ñaka nitre niaka kä nebätä yekwe?

¹³ Kirabe juta Grecia yete, nitre niaka nämäne nemen nainte aune bren ngrabare. Akwa kita nämäne ño niakäre aune ja die ye aibe ie niaratre nämäne tö ngwen kä ngwankäre nüke jai. Niaratre ye erere, ni kitata niakäre kukwe ja üairebiti. Akwa ni die mikaka bäri kwin tä nikwe, ye abokän Jehová, niara ye dite krubäte. Nikwe tö ngwain niarai ngwane, ni kitai kwe aune ni mikai dite kwe käbämikata kwe nie (1 Ped. 5:10).

14. ¿2 Corintios 12:9, 10 ye raba ni dimike ño ja tuakäre kukwe tare ben?

¹⁴ Apóstol Pablo ja tuani kukwe keta kabre ben. Nitre nämäne ñäke tare ie aune ja mike rüere aune ruäre ngwane ja nämäne nemen ruin di nekä ie. Ne madakäre, jondron “kri tukwä” kwrere ben nämäne ja tuin yebätä nämäne kä ngwen nüke jai niebare kwe (2 Cor. 12:7). Kukwe ye jökräbätä niara raba kukwe mike jabiti ñaka niakäre jankunu, akwa ye erere ñan nuainbare kwe ñakare aune tö ngwani kwe Jehovai kukwe tare yebiti ta (ñäkädre 2 Corintios 12:9, 10 yebätä). Ye medenbätä käre Jehovakwe niara dimikani.

15. ¿Nikwe ja ngwain Pablo erere ngwane dre rabai gare metre nie?

¹⁵ Namani bare Pablobätä erere, nitre käkwe ñäkäi tare nie o ja mikai ni rüere tödekabätä Ngöböi. Ne madakäre, nita bren o jata nemen ruin nainte nie yebe ni raba ja tuin arato. Akwa, nikwe ja ngwain Pablo erere ngwane, kukwe ye jökräbiti ta Jehovata ni tarere aune ni dimike ye rabai gare nie.

16. ¿Ni bren akwa yebiti ta raba dre nuainne arato?

¹⁶ Ni bren tä camanbiti o tä silla de rueda yete, ngukodokwä di ñan kitera o kä ñan tuin ie, ¿akwa raba nen monsotre bati tä kwin yebe? Jän, niaratre raba nen arato. Ja mräkätre kwati niena umbre aune ruäre tä bren, akwa tätre nen kukwe ja üairebiti, aune ñaka tä nuainne ja di jeñebiti ñakare aune Jehová die köböire tätre nuainne. Tätre gätä kukwe nuin teléfono yebiti o mike ñärärä Internet yete. Tätre kukwe driere mräkätre kwe ie, doctor ie aune ni bren ngübaka ie.

17. ¿Jehovata ja töi mike ño ni tä bren ngrabare ye kräke?

 ¹⁷ Nita bren ngrabare ye nikwe ñaka tuanemetre ja di ngwen nekä aune ni ñaka raba nen kukwe jankunu ja üairebiti ye ni ñaka raba nütüdre. Jehová tä ni tarere ñobätä ñan aune nita tö ngwen niarai aune nita sribire kä kwati krubäte te niara kräke yebätä. Nita ja tuin kukwe tare ben ngwane, bäri nita niara die ribere jai aune niara ñaka ni tuainmetre kaibe. Ñakare aune täi bäri ni ken ni dimikakäre (Sal. 9:10). Meri testiko iti bren krubäte tä dre mike gare ye ani mike gare jai: “Ti kite bäri bren aisete kä ñaka kite bäri tie blitakäre kukwe metre yebätä ni madabe. Akwa tita ja di ngwen kukwe kiakia nuainkäre ye tä kä mike juto Jehovabätä ye gare tie, ye tä kä mike juto tibätä”. Jata nemen ruin di nekä nie ngwane, Jehová tä ni ken ni dimikakäre ye nikwe ngwandre törö jai. Apóstol Pablo kukwe kwin bämikani aune kukwe ütiäte niebare kwe yebätä ani töbike: “Ne jökräbätä kätä nuäre tibätä; ñobätä ñakare angwane ti di ñakare ngware, bäri ti dite” (2 Cor. 12:10, NGT).

18. ¿Kukwe meden mada tare ben nitre ruäre tä ja tuin?

¹⁸ Nitre ruäre Jehová mikaka täte tä nen kukwe ja üairebiti tä ja tuin kukwe mada tare ben. Ñodre, kukwe tä kisete o bren depresión tä bätätre ye ñaka raba jutuen ni madai o ñaka nüke gare ietre. ¿Ñobätä kukwe ye tare krubäte? Ñobätä ñan aune ni iti küde nötani o tä silla de rueda yete drebe tä ja tuin ye raba tuin ni jökrä ie aune raba dimike raba ruin nie. Akwa ni iti tä ja töibikaire krubäte ye ñan raba jutuen ni madai. Ni iti krä nötaninbätä tä ja tare nike jabe ye kwrere niara tä ja tare nike, akwa ye ñaka jutuen ni madai yebätä niara ñaka tareta aune ñaka dimikata tä ribere jai ye ererebätä.

19. ¿Mefibóset kukwe kwin bämikani ye tä dre driere nie?

¹⁹ Kukwe ben nita ja tuin ye köböite ni ñan raba kukwe ruäre nuainne aune ye ñaka nüke gare ni madai raba ruin nie ngwane, kukwe namani bare Mefibosetbätä ye raba ni dimike (2 Sam. 4:4). Niara nämäne bren yebätä nämäne ja tare nike, akwa ye ñan aibe rei David ñaka kukwe ükaninte kwin kräke yebe ja tuani kwe arato. Mefibóset ñaka kukwe ye känänbare ja kräke aune ñaka kukwe ye tuanimetre kwe ja töi mike rubun. Ñakare aune David kukwe kwin nuainbare käne kräke yebätä nämäne debe bien aune nämäne ütiäte kräke (2 Sam. 9:6-10). Aisete, David kukwe ñaka kwin nuainbarebätä ngwane, Mefibóset ñaka namani rubun aune ñaka ngite kitani kwe Jehovabiti Davidkwe kukwe nuainbare yebätä, ñakare aune Ngöbökwe rei dianinkä ye dimikani  jankunu kwe (2 Sam. 16:1-4; 19:24-30). Mefibóset kukwe kwin bämikani ye Jehovakwe tikamanabare Bibliabätä ni dimikakäre (Rom. 15:4).

20. ¿Töbikata krubäte ye köböite jata nemen ruin ño nitre ruäre ie akwa dre tädre gare metre ietre?

²⁰ Töbikata krubäte yebätä ja mräkätre ruäre ie ja ñaka nemen ruin kwin nitre kwati ngätäite o blite ni ñaka gare ie ye ben. Akwa yebiti ta tätre näin gätäbätä gätä krikri aune tätre kukwe driere. Ye erere jata nemen ruin nie ngwane, ñan ni aibebätä kukwe ye kwrere tä nemen bare. Ñakare aune ni kwati mada tä ja tuin kukwe ye kwrere ben. Nita ja di ngwen ja brukwä tätebiti ye tä kä mike juto Jehovabätä ye nikwe ngwandre törö jai. Ni ñaka tä ja di ngwen nekä ye tä bämike niarata kukwe kwin mike nemen bare ni kräke aune tä ja di bien nie * (Filip. 4:6, 7; 1 Ped. 5:7). Nita bren ngrabare o nita töbike krubäte, akwa yebiti ta nita Jehová mike täte ngwane ye tä kä mike juto krubätebätä rabai gare nie.

21. ¿Jehová die köböire nikwe dre nuaindi?

²¹ Nitre niaka kä nebätä ye ñan ja erebe ni niaka kukwe ja üairebiti niebare Pablokwe yebe ye nibira gare nie. Nitre nämäne ja gain Pablo näire ye itibe nämäne ganane, akwa nitre niaka kukwe ja üairebiti ye jökrä raba ganane. Nire nire käkwe ja ngwain metre yekwe ja nire käre rabai (Juan 3:16). Nitre niaka kä nebätä rabadre ganane yekäre tädre kwin niakäre. Akwa ni niaka kukwe ja üairebiti ye ruäre ñaka tä kwin ngrabare, akwa yebiti ta tätre nen jankunu ja käne (2 Cor. 4:16). Jehová diebiti ni jökrä raba nen kukwe ja üairebiti nememe mrä.