1. Anni i mawag nga kuattam ngamin?

MAKKARELA ka kari ta tadday nga pareha nga ammum tu mariga, netallugaring nu mataki ka onu nabannag ka? Magga ari. Ngem kinagi ni apostol Pablo nga makippareha i ngamin nga kurug nga Cristiano. (Heb. 12:1) Mawag tu magatta-attam ittam ngamin, abbing onu manakam, masikan onu nabannagan, adde ta panuppalan nu kayà tam nga malawa i premyo nga iyawa ni Jehova nittam.​—Mat. 24:13.

2. Ngatta egga i lallaguray ni Pablo nga itabarang i 2 Timoteo 4:7, 8?

² Egga i lallaguray ni Pablo nga maguvovug megafu ta ‘naddena ngana i pantay.’ (Bibbigan i 2 Timoteo 4:7, 8.) Ngem anni talaga i pareha nga tuktukuyan ni Pablo?

3. Anni i pareha nga tuktukuyan ni Pablo?

³ Nu mittan, iyusa ni Pablo i mesissimmu ta gayam ira tagga ta Grecia tapenu mangituddu tu importante ira nga leksion. (1 Cor. 9:25-27; 2 Tim. 2:5) Namippiga nga inusana i pakkarela ta pareha tapenu iyilustra i pattolay na tadday nga Cristiano. (1 Cor. 9:24; Gal. 2:2; Fil. 2:16) Makatallung i tadday nga tolay taw nga “pareha” sonu idedikana i baggina kani Jehova anna mabawtisowan. (1 Ped. 3:21) Maddena i pantay (onu finish line) sonu iyawa nisa ni Jehova i premyo nga mannanayun nga inango.​—Mat. 25:31-34, 46; 2 Tim. 4:8.

4. Anni i ikonsidera tam taw nga artikulo?

⁴ Anni ira i napparehuan na pakkarela ta apaddu nga pareha anna na Cristiano nga pattolay? Aru i napparehuadda. Ikonsidera tam i tallu tatun. Ollu, mawag tu tuttulattam i fustu nga dalan; mekadua, mawag tu nakafokus ittam ta pantay; anna mekatallu, mawag tu tulu-tuloy ittam nga makkarela maski aru i problema.

5. Anni nakuan nga dalan i tuttulattam, anna ngatta?

⁵ Tapenu mala i premyo na literal nga pareha, mawag tu tuttulan na atleta ira i dalan nga niyunnug na nangorganisa ta pareha. Kunnatun gapa nu kayà tam nga mala i premyo nga mannanayun nga inango, mawag tu tuttulattam i dalan onu i klase na pattolay na tadday nga Cristiano. (King. 20:24; 1 Ped. 2:21) Ngem si Satanas anna danuri tumuttuttul ta ehemplona ay kayàda nga tanakuan i piliattam; kayàda nga ‘metadday ittam ta magulu nga attoleda.’ (1 Ped. 4:4) Uyu-uyawadda i klase na attoletam anna ikagida nga mas makasta kanu i attoleda anna makeyawa nira tu kapalubbang. Ngem ari tu kurug yatun nga kagiadda.​—2 Ped. 2:19.

6. Anni i magigiammum ta ekspiriensa ni Brian?

⁶ Danuri makkarela kavulu i nainfluwensian na mundo ni Satanas ay makannammuadda gabbalaman nga ari tu mamalubbang nira i pinilida nga pattolay; nabbalin ira tu aripan ni Satanas anna na sarilida ira nga pakkaraga. (Roma 6:16) Ikonsidera i ekspiriensa ni Brian. Pinagaram yayya na maganana nga tuttulan i klase na pattolay na Cristiano. Ngem turi ta tinedyer ngana yayya, nadduda yayya nu mamagayayya nisa yatun nga klase na pattolay. Pinili ni Brian nga makipakkarela kavulu danuri mattolay segun ta estandarte ira ni Satanas. “Kakku nanono nga i kara-karagatakku nga kapalubbang ay marresulta tu pakka-adiktò ta marake ira nga gannug,” kunna. “Ari nabbayag, nad-drugs ngà ngana, nagillellaw ngà, anna imoral i attolè. Aru nga dagun nga sisinu nga pinuruebakku i mas maka-adikto ira nga droga anna na-adik ngà ta aru tatun. . . . Nallaku ngà ngana gapa tu droga tapenu masuportakku i istilo na pattolè.” Ngem ta pappasa na tiempo, naddesision si Brian nga mattolay segun ta estandarte ira ni Jehova. Inulina i pattolena anna nappabawtiso yayya ta 2001. Kurug ngana i pagayayyana megafu ta tuttuttulanna ngana i pattolay na tadday nga Cristiano. *

7. Segun ta Mateo 7:13, 14, anni i dua nga dalan nga pappiliattam?

⁷ Kuruga importante nga piliattam i fustu nga dalan nga tuttulattam! Kayà ni Satanas nga iyemmattam ngamin i makkarela ta atazzi nga dalan nga “mappange ta inango” anna magali ta alawa nga dalan nu sitaw nga makkarela i magaru sangawe ta mundo. Aru i manuttul tatun nga dalan anna mas mabi nga karelan yatun. Ngem “mappange ta kadaral” yatun. (Bibbigan i Mateo 7:13, 14, NW.) Tapenu ari ittam nga mawawan ta fustu nga dalan anna malsa i fokus tam megafu turi  ira ta ari manuttul ta estandarte ira ni Jehova, mawag tu mattalo anna magginna ittam nisa.

8. Nu mesiddukal i tadday nga makkarela, anni i kuanna?

⁸ Danuri makipartisipa ta apaddu nga pareha ay iinnadda i paddalanadda tapenu ari ira nga mesiddukal. Ngem baka mesiddukal ira gafu ta napasil ira na kavuluda nga makkarela onu nakebatay ira tu avvu. Nu matomba ira, tumaddag ira anna ituloyda i makkarela. Nakafokus ira ari tu ta nikesiddukalladda, nu ari, ta pantay anna ta premyo nga kayàda nga affutan.

9. Nu mesiddukal ittam, anni nakuan i kuattam?

⁹ Ta pakkarela tam, posible nga mamippiga nga mesiddukal ittam, megafu ta makkamali ittam ta kakkagian onu kukukuattam. Onu baka egga i mali nga makua na kakavvulu tam nga makkarela nga makataki nittam. Ariattam makaddag nu mesimmu yatun. Imperfekto ittam ngamin, anna makkara-karela ittam ngamin ta atazzi nga dalan mappange ta inango. Yatutta magga egga ira i tiempo nga “maddorompi” ittam. Ammu ni Pablo nga nu mittan, ‘egga i taki na nono tam ta kataggi-tadday.’ (Col. 3:13) Ngem imbes nga maffokus ittam ta nikesiddukallattam, maffokus ittam ta premyo. Nu mesiddukal ittam, tumaddag ittam nakuan uli anna ituloy i pakkarela. Nu mattaki i nono tam anna iyemmattam ngana i masserbi kani Jehova, ariattam madde i pantay anna malawa i premyo. Mabbalin ittam paga tu kesiddukallan na tanakuan nga mappuppursigi nga makkarela ta atazzi nga dalan mappange ta inango.

10. Kunnasi tam malillitan nga mabbalin tu “kesiddukallan” na tanakuan?

¹⁰ Malillitattam paga nga mabbalin tu “kesiddukallan” na kakavvulu tam nga makkarela nu ipamavuluttam nga kuadda i gannug ira segun ta kayàda nu posible imbes nga ipilit tam i kayà tam. (Roma 14:13, 19-21; 1 Cor. 8:9, 13) Nu kuattam yatun nga importante nga gannug, ari ittam megitta ta makkarela ira ta literal nga pareha. Makikompetensia ira ta kataggi-tadday, anna mappursigi i kada tadday nga makkarela tapenu yayya i makala ta premyo. Agga-nono laman danatun nga makkarela i pammakapianadda. Yatutta baka itubbada i egga ta arubadda tapenu ira i magollu. Ngem ta pareha ta inango, ariattam makikompetensia ta kataggi-tadday. (Gal. 5:26; 6:4)  Gakkag tam nga duffunan i tanakuan ta adde na mawayya tam tapenu makadde ira ta pantay nga kavulu tam anna mala i premyo nga inango. Yari tu iyaplika tam nakuan i nainspiran nga tabarang ni Pablo nga ‘ariattam laman nonopan i pammakapianattam, nu ari i pammakapianan na kataggi-tadday.’​—Fil. 2:4.

11. Sitaw nakafokus i makkarela ira, anna ngatta?

¹¹ Fuera paga ta paningan ta paddalanan, nakafokus gapa ta pantay danuri makkarela ta literal nga pareha. Maski nu ariadda masingan yatun nga pantay ta literal nga matada, imajinadda nga nakadde ngana ira tatun anna alawatadda i premyo. Nakafokus ira gukaban na kanayun nga pannono ta premyo.

12. Anni i meddu nga ginarantiya ni Jehova nittam?

¹² Ta pareha nga pakkarelattam, meddu nga ginarantiya ni Jehova ta totolena i premyo nu balinadda i pareha—mannanayun nga inango ta langi onu ta paraiso nga davvun. Dineskriba na Biblia yaw nga premyo tapenu maimajittam nu kunnasi kakasta noka i pattoletam. Nu kanayun nga nakafokus ittam meyannung ta mappange nga nipromesa ni Jehova nittam, mas determinadu ittam nga magattam.

13. Anni i bentaha tam kumpara ta literal ira nga makippareha?

¹³ Danuri makkarela ta pagayam na Griego gari ay mawag tu attammadda i problema ira, gitta na pakatageno tu bannag anna taki na baggi. Ngem nakadepende laman ira ta pinassanayda anna ta mismu nga sikadda. Kagitta danuri makkarela gari, makalawa ittam gapa tu passanay nu kunnasi makkarela ta pakipparehattam. Ngem egga i bentaha tam kumpara ta literal ira nga makippareha. Makalawa ittam tu sikan kani Jehova anna awan tu limitasion na meyuffunna nittam. Nu maddepende ittam kani Jehova, arianna laman nipromesa nga sanayan ittam, nu ari, pasikannanna paga ittam!​—1 Ped. 5:10.

14. Kunnasi ittam moffunan na 2 Corinto 12:9, 10 nga arubangan i problema tam ira?

¹⁴ Aru nga problema i inarubang ni Pablo. Fuera paga ta panguyu-uyaw anna pameppersigi na tanakuan, egga ira tiempo nga nakkafi yayya anna attattammanna i “madammo nga taki.” (2 Cor. 12:7) Imbes nga imammatanna nga mamagimmang danatun ta passerbina kani Jehova, inapprobetsana danatun nga ziga-riga tapenu mattalo kani Jehova. (Bibbigan i 2 Corinto 12:9, 10.) Megafu ta kunnatun i pagimamma ni Pablo, zinuffunan yayya ni Jehova ta ngamin nga problemana.

15. Nu parigattam si Pablo, anni i maekspiriensa tam?

¹⁵ Awayyana nga mauyu-uyaw anna mapeppersigi ittam megafu ta pangurug tam. Awayyana gapa nga attattammattam i marake nga gawa-gawayyan onu i bannag. Ngem nu parigattam si Pablo, kada tadday tatun ira nga problema ay mabbalin nga oportunidad tapenu maekspiriensa tam i meddu nga uffun ni Jehova.

16. Maski paga nu ari ngana nga makasta i gawa-gawayyammu, anni i makuam?

¹⁶ Agga-idda ka ngana laman kari megafu ta taki onu naka-wheel chair ka ngana? Mataka-taki ngana kari i tug mu onu makafi ngana i matam? Nu kunnatun, awayyam paga kari nga masserbi kani Jehova kavulu danuri mabbing anna mas magawa-gawayyan? Wan! Aru nga manakam anna mataki i makkara-karela ta dalan nga mappange ta inango. Ariadda makua yatun ta sikadda laman. Lallagu, makala ira tu sikan kani Jehova gukaban na pagginna ta study ira ta telefono onu paggiraw ta nerekord ira nga study. Makipartisipa lagapa ira ta pangngua tu disipulo gukaban na pallayyagayya ta doktor, nars, anna ta parientesda ira.

17. Anni i matageno ni Jehova turi ira ta limitadu ngana i makuada megafu ta taka-taki?

 ¹⁷ Nu ariammu makua i ngamin nga kayà mu kuan para kani Jehova, ari nakuan makkafi i nono mu anna nonopan nga ariammu makapagattam adde ta ultimu naw nga sistema. Ayatan naka ni Jehova megafu ta pangurug mu nisa anna ta pagattattammu. Mas ngana nga mawag mu i uffunna sangawe, anna arian naka nga pagurayan. (Sal. 9:10) Lallagu, mas maddukko yayya nikaw. Kunnaw i kinagi na tadday nga sister nga magattattam ta taka-taki: “Durante nga umara-aru i problema ta gawa-gawayyakku, mas bimmaddi ngana gapa i tiansà nga ibillay i kinakurug ta tanakuan. Ngem ammù nga mapagayayya ku i futu ni Jehova maski ta baraddi nga makuà, yari tu magayayya ngà megafu tatun.” Nu makkafi i nono mu, daddamman nga ari ka nga magitetadday. Nonopan i ehemplo ni Pablo, anna daddamman i mamasikan nga uvovugna: “Alawatak-ku gafu nga sigga-pagayaya i anni laman nga pakkafiyan, . . . ta nu makafi ngà, meddan ngà tu sikan.”​—2 Cor. 12:10.

18. Anni i mariga nga problema nga ara-arubangan na karuan?

¹⁸ Egga paga i problema nga meparubang ta karuan nga makkarela para ta inango. Meparubang ira ta problema ira nga ari masingan na tanakuan anna posible nga ariadda malippawa. Angngariganna, awayyana nga attattammadda i depresion onu grabe nga pavvuru-vurung. Ngatta netallugaring nga mariga nga problema i ara-arubangan danaw nga meddu nga aripan ni Jehova? Megafu ta nu nakattu i lima na tadday onu naka-wheelchair, masingan na tanakuan i problemana anna mapaguyu ira nga manguffun. Ngem, danuri magattattam ta taki ta emosion onu mental ay ari masingan i pazziga-rigada. Mazziga-riga gapa ira kagitta na tadday nga nakattu i limana, ngem ari tu parehu nga pangikallo i malawada ta tanakuan.

19. Anni i magigiammu tam ta ehemplo ni Mefiboset?

¹⁹ Nu limitadu ngana i makuam anna matageno mu nga awan tu makalippawa nikaw, awayyana nga mapagaram ka ta ehemplo ni Mefiboset. (2 Sam. 4:4) Magattattam yayya ta pabbalin tu baldadu, anna ari patas i pinattratu ni Patul David nisa. Ari tu si Mefiboset i makalliwa ta problemana. Ngem arianna nipamavulun nga mannegatibo yayya; inappresiana i positibo ira nga gannug ta pattolena. Dakal i appabalona ta kinasippo nga nipasingan nisa ni David ta nappasa. (2 Sam. 9:6-10) Yatutta turi ta ari patas i pinattratu ni David nisa, nikonsiderana i buu nga situasion. Arianna nipamavulun nga mattaki i nonona megafu ta nakkamalian ni David. Arianna gapa pinaliwa si Jehova megafu ta  kingngua nisa ni David. Naffokus si Mefiboset ta makuana tapenu suportan i sinunno ni Jehova nga patul. (2 Sam. 16:1-4; 19:24-30) Niperekord ni Jehova ta Biblia i makakkasta nga ehemplo ni Mefiboset tapenu makagigiammu ittam.​—Roma 15:4.

20. Anni i efekto na pavvuru-vurung ta tanakuan, ngem ta anni ira nga makasiguradu?

²⁰ Megafu ta grabe nga problema, egga ira i wawwaragi nga sobra i avvuru-vurudda anna ari ira nga komfortable kavulu i tanakuan maski ta normal ira nga situasion. Awayyana nga marigatan ira nu aru i totolay ta pallevuda, ngem itulu-tuloyda lagapa i magatende ta study ira, asembli, anna kombension. Marigatan ira nga makibbida ta estrangheru ira, ngem kiyuvovugadda lagapa i tanakuan ta ministerio. Nu kunnatun i situasiommu, mepasiguradu nikaw nga ari ka nga magitetadday. Aru gapa i kaparehum nga magattattam ta kunnatun nga problema. Daddamman nga magayayya si Jehova ta interu-kararua nga appursigim. I tulu-tuloy nga passerbim ay pamakurug nga bebbendisionan naka anna iddiddan naka tu sikan nga kawagammu. * (Fil. 4:6, 7; 1 Ped. 5:7) Nu massesserbi ka lagapa kani Jehova maski nu magattattam ka ta pisikal onu emosional nga limitasion, makasiguradu ka nga mapagayayya mu si Jehova.

21. Gukaban na uffun ni Jehova, anni i makua tam ngamin?

²¹ Pia ngana laman ta egga ira i nadduman na literal nga pareha ta espiritual nga pareha nga tinukoy ni Pablo. Ta literal nga pareha ta tiempo na Biblia, tadday laman i mangaffu ta premyo. Ngem ta pareha na Cristiano para ta inango, ngamin nga matalo nga makapagattam ay makalawa ta premyo nga mannanayun nga inango. (Juan 3:16) Ta literal nga pareha, ngamin nga atleta ay mawag tu makasta i gawa-gawayyadda ta pisikal; ta nu ari, baddi i tiansada nga mangaffu. Ngem nittam, aru i egga i limitasiodda ta pisikal, ngem magatta-attam ittam lagapa. (2 Cor. 4:16) Ta uffun ni Jehova, makapakkarela ittam ngamin adde ta pantay!