1. Anhte yawng hpa galaw ra ai kun?

LAKSAN hku nna, nang machyi makaw hkrum nga ai (sh) grai pu ba ai ngu hkamsha yang, gat shingjawng mayu na kun? Gat mayu na n re. Raitim, jet ai Hkristan yawng gaw gat shingjawng poi hta shang lawm nga ai ngu kasa Pawlu tsun ai. (Heb 12:1) Anhte yawng gaw asak kaji, kaba, n-gun ja ai, pu ba ai ni raitim, Yehowa jaw na kumhpa hpe lu mayu yang, jahtum du hkra hkam sharang let kagat ra ai.​—Mat 24:13.

2. 2 Timohti 4:7, 8 hku nga yang Pawlu hta hpa majaw wanglu wanglang tsun na ahkang nga ai kun?

² Pawlu gaw “gat shingjawng ai lam htum hkra gat shadu” sai majaw, wanglu wanglang tsun na ahkang shi hta nga ai. (2 Timohti 4:7, 8 hpe hti u.) Raitim, laksan hku nna kasa Pawlu gaw gara zawn gat shingjawng poi hpe tsun nga ai kun?

3. Pawlu gaw gara gat shingjawng poi a lam hpe tsun ai kun?

³ Pawlu gaw ahkyak ai lam ni hpe sharin ya na matu, moi na Grik mungdan hta galaw wa ai ginsup lam ni hpe kalang lang akyu jashawn ai. (1 Ko 9:25-27; 2 Tm 2:5) Masa lam law law hta, shi gaw Hkristan ni a prat hkrun lam hpe gat shingjawng poi hte shingdaw da ai. (1 Ko 9:24; Gal 2:2; Hpl 2:16) Marai langai gaw, shi a aprat hpe Yehowa kaw apnawng nna hkalup hkam la ai shaloi, ndai gat shingjawng poi hta shang lawm wa sai re. (1 Pe 3:21) Yehowa jaw na htani htana asak kumhpa hpe lu la mayu yang, jahtum du hkra kagat ra na re.​—Mat 25:31-34, 46; 2 Tm 4:8.

4. Ndai sumhpa hta hpa lam hkaja na kun?

⁴ Hkristan prat hkrun lam hte hkrun lam galu gat shingjawng poi a lapran bung ai lam law law nga ai. Dai ni kaw nna 3 hpe yu  yu ga. Langai, jaw ai lam hku sa ra ai. Lahkawng, bandung hpe myit maju jung ra ai. Masum, hkrun lam hta yakhkak ai lam ni hpe tawt lai ra ai.

5. Gara hkrun lam hpe anhte hkan sa ra ai kun? Hpa majaw kun?

⁵ Kagat shingjawng poi hta kumhpa lu na matu, gat shingjawng ai ni gaw masat da ai lam hku sa ra ai. Dai zawn sha, htani htana asak lu mayu yang, Hkristan prat hkrun lam hte maren hkan sa ra ai. (Kas 20:24; 1 Pe 2:21) Raitim, Satan hte shi hpang hkan ai ni gaw, anhte hpe kaga lam lata shangun mayu ai. Shanhte hte arau matut gat shangun mayu ai. (1 Pe 4:4) Anhte hkan sa nga ai prat hkrun lam hpe jahpoi asawng nna, shanhte sa nga ai lam gaw wanglu wanglang rai nna, grau kaja ai ngu hkrak tsun ma ai. Raitim, dai gaw shut ai.​—2 Pe 2:19.

6. Brai Yan a mabyin kaw nna hpa sharin la lu ai kun?

⁶ Satan mungkan a shingkang ka-up hkrum ai ni hte rau kagat ai ni gaw, wanglu wanglang re ai lam n lu la ma ai. De a malai Satan hte shanhte a ra marin ai myit a mayam byin mat wa ai hpe kade nna yang, chye mat ai. (Rom 6:16) Brai Yan a mabyin hpe yu yu ga. Shi a kanu kawa ni gaw, Hkristan prat hkrun lam hpe hkan sa na matu, shi hpe n-gun jaw ai. Raitim, ramma aten hta, shi hkawm nga ai lam gaw ngwi pyaw lam jaw ai kun ngu ai hpe chye mayu wa ai. Satan a tsang madang ni hte maren asak hkrung ai ni hte arau kagat na matu shi dawdan wa ai. Shi ndai hku tsun ai: “Ngai lu mayu ai wanglu wanglang lam gaw, ngai hpe hten bya shangun ai lam de du hkra, shadut na ngu ai hpe kachyi mi pyi n chye wa ai. Nanghpam tsi ni hte tsa chyaru ni lu lai wa nna, akyang hten za wa ai. Shaning ni grai na ai hpang, tsa ya, kani ya byin mat nna, n kaja ai akyang a mayam mung byin mat ai. . .  Kan bau bungli hku nna nanghpam tsi dut hpang wa ai.” Hpang jahtum hta, Brai Yan gaw Yehowa a tsang madang ni hte maren asak hkrung na matu, dawdan kau ai. Shi a prat hkrun lam hpe galai shai nna 2001 hta hkalup hkam la ai. Hkristan prat hkrun lam hpe hkan sa nga ai majaw, ya nga yang jet ai ngwi pyaw lam lu la nga sai. *

7. Mahte 7:13, 14 hku nga yang anhte lata mai ai gara lam lahkawng nga ai kun?

⁷ Jaw ai lam hpe lata na matu grai ahkyak ai. Satan gaw anhte yawng hpe “asak hkrung ai de hkrang ai” gyip ai lam hta n hkawm shangun mayu ai. Masha law law hkawm nga ai dam lada ai lam hta hkawm shangun mayu ai. Dai lam hpe masha law law ra sharawng nna hkawm sa hkawm wa loi ai. Raitim, “hten bya ai de hkrang ai lam” re. (Mahte 7:13, 14 hpe hti u.) Anhte gaw kaga lam de n re ai sha, jaw ai lam kaw matut nga lu na matu, Yehowa hpe kamhpa ra nna, shi a ga madat ra ai.

8. Lama na kagat ai wa gaw ahtu kataw yang hpa galaw ai kun?

⁸ Hkrun lam galu gat shingjawng ai ni gaw, shanhte a shawng hta nga ai lam hpe matut myit maju jung yang she ahtu kataw na n re. Raitim, arau kagat ai wa (sh) lagyawk ai lam a majaw, kataw mat ai baw n myit mada ai sha byin chye ai. Lama na, galau mat yang, rawt tsep nna matut kagat ra ai. Shanhte hpe ahtu kataw shangun ai lam hpe n re ai sha, bandung hte awng dang yang lu la na kumhpa hpe myit maju jung ai.

9. Anhte ahtu kataw yang hpa galaw ging ai kun?

⁹ Anhte a kagat shingjawng ai lam hta, anhte tsun ai, galaw ai lam ni a majaw, chyahkring hkring ahtu kataw chye ai. Shing nrai, arau kagat ai ni shut ai lam galaw ai a majaw, anhte hkra machyi chye ai. Dai lam ni hpe myit mada da ra ai. Anhte yawng n hkum tsup nna, asak lu shangun ai gyip ai lam ntsa hta mung, arau kagat nga ai. Dai majaw, kalang lang shada da adawt hkrup chye ai. Kalang lang, anhte a lapran “mara shagun shara” nga chye ai lam Pawlu yin la ai. (Kol 3:13, JCLB) Raitim, anhte hpe ahtu kataw shangun ai lam ni hpe myit maju jung na malai, shawng hta nga ai kumhpa hpe myit maju jung ga. Lama na, ahtu kataw mat yang rawt tsap nna matut kagat ga. Anhte masin pawt na, masin n si hkraw na, n rawt na nga yang, bandung de n du ai sha n-ga, kumhpa mung lu la na n re. Dai sha n-ga, asak lu shangun ai gyip ai lam ntsa shakut nna kagat nga ai kaga ni hpe mung ahtu kataw ai baw byin shangun chye ai.

10. Kaga ni a matu “ahtu kadawng shara” anhte n byin hkra gara hku koi na kun?

¹⁰ Anhte a ningmu hku hkan galaw na matu n shadut ai sha, byin mai na nga yang, kaga ni ra sharawng ai hpe hkan galaw ai hku nna, arau kagat ai ni hpe “ahtu kadawng shara” n byin na matu shakut mai ai. (Rom 14:13, 19-21; 1 Ko 8:9, 13) Dai gaw, gat shingjawng poi hta shang lawm ai ni hte n bung ai ahkyak ai lam re. Kagat shingjawng ai ni gaw kaga ni hte shingjawng hkat nna, tinang sha kumhpa lu na matu shakut ma ai. Tinang a matu sha madung hku nna myit ai. Dai majaw, shanhte gaw kaga ni a shawng de du na matu shakut ai. Dai hte n bung ai sha, anhte gaw shada da shingjawng hkat ai ni n re. (Gal 5:26; 6:4) Anhte a bandung gaw, dang lu ai daram masha law law hpe anhte hte arau jahtum du hkra gat lu na matu hte  asak kumhpa lu na matu re. Dai majaw, “langai hte langai tinang hte seng ai sha n rai, masha gale hte seng ai hpe mung, myit yu nga mu ga” ngu tsun da ai Pawlu a hpaji jaw ga hpe hkan sa na matu shakut ga ai.​—Hpl 2:4.

11. Kagat ai wa gaw hpa hpe myit maju jung ra ai kun? Hpa majaw kun?

¹¹ Kagat ai ni gaw, shawng hta nga ai lam hpe yu ai sha n-ga, bandung hpe mung myit maju jung ra ai. Bandung shadaw hpe myi hte chyaw mu lu na n raitim, bandung de du nna kumhpa lu la na hpe shingran yu mai ai. Lu la na kumhpa hpe galoi mung myit yang she, matut myit rawt nga na re.

12. Yehowa gaw anhte hpe hpa ga sadi jaw da ai kun?

¹² Anhte kagat nga ai shingjawng poi hta, jahtum du hkra gat na nga yang, Yehowa gaw shi a amyu masha ni hpe sumsing lamu (sh) ginding aga hparadisu hta htani htana asak kumhpa jaw na ngu ga sadi jaw da ai. Dai kumhpa a lam Chyum Laika hta tsun da ai majaw, anhte a asak aprat gaw gara hku rai nga na hpe shingran yu mai ai. Anhte a myit masin hta, htani htana asak myit mada lam hpe matut myit na nga yang, matut hkam jan na ngu dawdan da lu na re.

13. Gat shingjawng ai ni hta grau nna anhte hpa akyu ni lu la nga ai kun?

¹³ Grik mungdan na gin tsup poi ni hta shang lawm ai ni gaw, pu ba ai lam ni hte machyi ai lam ni zawn re ai mayak mahkak ni hpe tawt lai ra ai. Raitim, shanhte yawng gaw shaman shakyang ai lam hte n-gun atsam hpe sha kamhpa ra ai. Anhte mung dai kagat shingjawng ai ni zawn, kagat shingjawng ai poi hta gara hku gat ra na hte seng nna, shaman shakyang ai lam ni lu la ai. Raitim, dai kagat shingjawng ai ni hta grau nna akyu lu la nga ai. Chyahtum Chyalai re ai Madu kaw nna, n-gun lu la ai. Yehowa hpe kamhpa yang, shi anhte hpe shaman shakyang ya nna, n-gun shaja ya na ngu ga sadi jaw da ai.​—1 Pe 5:10.

14. Anhte manghkang hkrum ai shaloi 2 Korinhtu 12:9, 10 gaw gara hku karum ya ai kun?

¹⁴ Pawlu gaw mayak mahkak law law hkrum wa ai. Kaga ni a jahpoi asawng ai lam hte zingri zingrat ai hpe hkrum ai sha n-ga, shi hkum nan mung gawng kya ai ngu hkamsha ai. “Hkum shan hta ju ai aju” hpe mung hparan ra nga ai. (2 Ko 12:7) Raitim, dai manghkang ni hpe asum jaw kau ra na lam re ngu n mu mada ai sha, Yehowa kaw kamhpa na matu ahkaw ahkang re ngu mu mada ai. (2 Korinhtu 12:9, 10 hpe hti u.) Pawlu hta dai myit jasat nga ai majaw, shi manghkang hkrum shagu Yehowa karum ya wa ai.

15. Pawlu hpe kasi la na nga yang anhte hpa hkamsha lu na kun?

¹⁵ Anhte mung, makam masham a majaw, jahpoi asawng ai lam (sh) zingri zingrat ai lam ni hkrum chye ai. Hkam kaja lam n nga wa ai, pu ba ai lam ni mung hkrum chye ai. Raitim, Pawlu hpe kasi la na nga yang, dai manghkang langai hpra gaw Yehowa a tsawra myit hte madi shadaw ya ai lam hpe hkamsha na matu ahkaw ahkang langai byin wa na re.

16. Lama na nang gaw n kung n kang raitim pyi hpa galaw lu ai kun?

¹⁶ Nang gaw yup ra kaw kaleng nga ra ai (sh) leng kap punghkum kaw dung nga ra ai kun? Myi n mu ai (sh) lahput machyi wa sai kun? Rai yang, nang gaw asak kaji ai ni, hkam kaja ai ni hte arau kagat lu na kun? Kagat lu ai. Asak kaba ai ni hte n kung n kang ai ni gaw, asak gat shingjawng ai poi hta gat nga ma ai. Tinang a n-gun atsam hte ndai bungli hpe n lu galaw ai. Shanhte gaw Hkristan zuphpawng ni hpe phone hte madat ai (sh) zuphpawng ni hpe video kaw nna yu ai hku nna Yehowa a n-gun atsam lu la nga ai. Sarawun ni, tsi sara ni hte jinghku ni hpe sakse hkam ai hku nna sape shatai ai bungli hta shang lawm nga ai.

17. Hkum hkrang n-gun yawm wa ai ni hte seng nna Yehowa gara hku hkamsha ai kun?

 ¹⁷ Hkum hkrang n-gun yawm wa ai majaw, asak gat shingjawng poi hta gat na matu, n-gun n nga ai ngu nna hkamsha nna myit n daw ging ai. Yehowa hpe kamhpa nna, hkam sharang wa ai lam ni a majaw, Yehowa nang hpe tsawra ai. Nang gaw shi a karum shingtau lam hpe ya grau ra nna, shi mung nang hpe kau da na n re. (Shk 9:10) Nang hpang de grau nna sit sa wa na re. Hkamja lam n nga ai nauna langai ndai hku tsun ai: “Hkam kaja lam grau grau sawng wa ai majaw, kaga ni hpe tengman ai lam hkaw tsun na ahkaw ahkang yawm wa ai hpe ngai chye dat ai. Yehowa a myit masin hpe shapyaw ya lu ai kaji kajaw lam ni galaw tim pyi, dai gaw ngai hpe ngwi pyaw shangun ai lam ngai chye wa ai.” Nang myit daw ai ngu hkamsha nga yang, nang langai sha n re ai hpe dum u. Pawlu a kasi ningli hpe myit yu nna, shi a ndai n-gun jaw ga ni hpe myit dum u: ‘Ngai gawng kya nga yang, n-gun atsam rawng nga nngai.’​—2 Ko 12:10.

18. Nkau mi gaw laksan hku nna hpa mayak mahkak ni hkrum nga ai kun?

¹⁸ Asak gat shingjawng poi hta kagat nga ai nkau mi gaw, kaga manghkang ni hpe mung hkrum chye ai. Shanhte hta kaga ni n mu lu nna, n chye na ya lu ai mabyin masa ni law law nga chye ai. Ga shadawn, myit daw myit hten ai (sh) ladu lai myit tsang nga chye ai. Yehowa tsawra ai mayam ni hta laksan hku nna, yakhkak ai manghkang ni hpa majaw hkrum nga ai kun? Marai langai gaw lata daw mat ai (sh) leng kap punghkum kaw dung ra ai nga yang, masha yawng gaw shi hkrum nga ai manghkang hpe mu lu nna karum ya lu na re. Raitim, myit masin hta hkamsha nga ai (sh) myit hkam kaja lam n nga ai ni gaw shanhte hpe yu yang hpa manghkang mung n nga na zawn re. Shanhte a nni nkri hkrum ai lam gaw lagaw lata daw ai marai langai a nni nkri hkrum ai lam hte maren sha re. Raitim, shanhte gaw kaga ni a tsawra matsan dum myit hpe n lu la ma ai.

19. Mehpiboshet a kasi ningli kaw nna hpa sharin la lu ai kun?

¹⁹ Na a masa gaw, shadawn sharam sha rai nga nna, nang hpe chye na shut ai nga yang, Mehpiboshet a kasi ningli kaw nna n-gun la mai ai. (2 Sa 4:4) Shi gaw n kung n kang byin nga nna, Hkawhkam Dawi a n tara ai hku jeyang hkrum nga ai. Mehpiboshet mara galaw ai majaw dai hku hkrum ai n re. Raitim, shi gaw n kaja ai ningmu n nga ai, shi a prat hta lu la ai kaja ai lam ni a matu chyeju dum wa ai. Lai wa sai aten hta, Dawi shi hpe madun wa ai tsawra myit a matu, chyeju dum wa ai. (2 Sa 9:6-10) Dai majaw, Dawi gaw shi hpe shut ai hku tara jeyang ai shaloi, Mehpiboshet gaw masa lam yawng hpe mu wa ai. Dawi dai hku jeyang ai a majaw, masin n pawt ai. Yehowa hpe mung mara n shagun ai. Mehpiboshet gaw, Yehowa aya tang da ai hkawhkam hpe madi shadaw na matu, myit maju jung ai. (2 Sa 16:1-4; 19:24-30) Yehowa gaw anhte akyu lu na matu,  Mehpiboshet a kaja ai kasi ningli hpe Chyum Laika hta ka matsing da ai.​—Rom 15:4.

20. Myit tsang ai lam gaw nkau mi hpe gara hku byin shangun chye ai kun? Raitim hpa hpe kam mai ai kun?

²⁰ Laja lana myit tsang ai lam a majaw, hpunau nauna nkau gaw grai hkrit ai ngu hkamsha nna, shani shagu galaw hkawm sa ai lam hta mung shim lum ai ngu n hkamsha ai. Shanhte gaw masha hpawng hta nga na matu yak ai raitim, nawku zuphpawng ni, ninghtawn zuphpawng ni hte ginwang zuphpawng ni hpe lung nga ai. Masha tsasam ni hte ga shaga na matu yak ai raitim, hkaw tsun magam hta shang lawm nga ai. Nang mung dai hku hkamsha nga yang, nang langai sha n re ai hpe kam u. Masha law law gaw, dai hte maren hkrum nga ma ai. Myit masin mahkra hte nang shakut ai hpe Yehowa ra sharawng ai hpe dum u. Nang asum n jaw ai gaw, shi nang hpe shaman chyeju jaw nga ai, nang ra ai n-gun atsam jaw nga ai ngu ai hpe sakse madun nga ai. * (Hpl 4:6, 7; 1 Pe 5:7) Myit masin hte hkum hkrang hkam n kaja tim, Yehowa hpe sak jaw na nga yang shi hpe myit shapyaw ya lu ai hpe kam u.

21. Yehowa a karum shingtau lam hte anhte yawng hpa galaw lu ai kun?

²¹ Teng sha gat shingjawng ai poi hte Pawlu tsun wa ai shingjawng poi hta shai ai lam nga ai gaw chyeju dum hpa re. Chyum Laika prat na teng sha gat shingjawng ai poi hta, marai langai sha kumhpa lu la ai. Hkristan prat hkrun lam hpe sadi dung let hkam sharang ai ni gaw, htani htana asak kumhpa hpe lu la na re. (Yhn 3:16) Teng sha gat shingjawng ai poi hta shang lawm ai ni yawng gaw, hkum hkrang hkam kaja ra ai. N rai yang, awng dang na matu n loi ai. Raitim, anhte law malawng gaw hkum hkrang n hkam kaja tim, naw hkam sharang lu nga ai. (2 Ko 4:16) Yehowa a karum shingtau lam hte gat shingjawng ai poi hpe jahtum du hkra anhte kagat lu ai.