1. Ithwe bosi thutholere ithwakolhaki?

WANGANANZA erithibitha omo mathangwa agho wunasi kw’akalire, kutsibu-tsibu wamabya iwulhwere kutse iwulhuhire? Alinga eyihi. Aliwe, omukwenda Paulo, mwabugha athi Abakristayo abosi bali omwa mathangwa. (Ebr. 12:1) Ithwe bosi, abalere n’abakulhu, ab’akaghalha n’abalhuhire, thutholere ithwayiyinia thwamabya thwanzire eribana olhuhembo olho Yehova abirithulhagha.—Mt. 24:13.

2. Ngoku kiri omu 2 Timoteo 4:7, 8, busana naki Paulo abya awithe obwiranda bw’erikania?

² Paulo abya awithe obwiranda bw’erikania kundi abya iniabiriyitsinga omwa mathangwa n’eribughagho. (Soma 2 Timoteo 4:7, 8.) Aliwe ibbwa, ni mathangwa wahi agho Paulo akanayako?

3. Amathangwa agho Paulo akanayako ni wahi?

³ Ihakanayira Paulo iniakolesya ebindu ebyabya omwa misathu y’Abagiriki eyakera erikangirirya amasomo w’omughaso. (1 Kor. 9:25-27; 2 Tim. 2:5) Ngendo nyingyi, mwasosekania engebe y’Ekikristayo n’amathibitho w’amathangwa. (1 Kor. 9:24; Fil. 3:14; 2 Tim. 4:7) Omundu ak’ingira omo “mathangwa” akayihayo oku Yehova n’eribatizibwa. (1 Pet. 3:21) Akaghunzagho Yehova akamuha ekihembo ky’engebe y’erikotha.—Mt. 25:31-34, 46; 2 Tim. 4:8.

4. Thukendi kania okuki omo mwatsi ono?

⁴ Amathangwa w’erithibitha lhughendo lhuuli n’engebe y’Ekikristayo bisosene bithi? Bisosene omwa nzira nyingyi. Thukanaye okw’isathu sy’okw’isyo. Ey’erimbere, thutholere ithwabya omwa nzira eyitholere; eyakabiri, thutholere  ithwalhubirira omuhuha; n’eyakasathu, thutholere ithwayiyinia omo mathangwa thukabana ebitsibu.

5. Thutholere ithwakwama nzira yahi, kandi busana naki?

⁵ Eritholera erihebwa ekihembo omo mathibitho wa buli kiro, abathibithi batholere ibakwama enzira eyo babiritheghekerwa erithibithamu. Nethu, thwamabya thwanzire eribana ekihembo ky’engebe y’erikotha, thutholere ithwakwama enzira y’Ekikristayo. (Emib. 20:24; 1 Pet. 2:21) Aliwe, Sitani n’abakamughereraya, banzire ithwakwama eyindi nzira; banzire ithwalholha embere erithibitha nabu. (1 Pet. 4:4) Bakathusekerera busana n’enzira eyo thukwamire, bathi eyabu ya yuwene, bathi y’ey’obwiranda. Aliwe ayo ni mabehi.—2 Pet. 2:19.

6. Eky’erileberyako kya Brian kikakweghesayaki?

⁶ Owosi-wosi oyukathibitha n’abali omwa kihugho kya Sitani endambi yikahika inialhuaho inialhangira ngoku enzira eyo siyirikolhaya oko bwiranda; ni y’obukobe. (Abar. 6:16) Eky’erileberyako ni Brian. Ababuthi biwe mubamuhira mw’omuhwa w’erikwama enzira y’engebe ey’Ekikristayo. Aliwe iniane omwa myaka y’obulengwa, mwabulha enzira eyo nga yangana leka iniatsema. Brian mwathwamu erithibitha n’abakaghendera okwa bya Sitani. Akabugha athi: “Mundaminya ngoku obuli nga bwiranda obo nabya ingasondya bwanga nyikolirye okwa bindu ebithuwene ebikanyiyira mw’omukobe wabyo. Munayisanga ingali okw’ikolesya ebibatsi ebikathamiraya n’erinywa obwabu n’erisingira. Eyindi myaka eyakwamako munaghenda ingalengesya n’ebindi bibatsi ebikalire kutsibu kandi ebingyi by’okw’ibyo munabikolesya kutsibu. . . . Munatsuka erighulya ebibatsi ebikathamiraya nuku ngabane esyosente esyanga nyiwathikya omo ngebe yaghe eyi.” Erighunzerera, Brian mwathwamu erighendera okwa bihano bya Yehova. Brian mwahindulha emibere yiwe, amabatizibwa 2001. Lino atsemire kutsibu eribya iniali omwa nzira y’engebe y’Ekikristayo. *

7. Ngoku kiri omu Matayo 7:13, 14, ni nzira syahi ibiri esiri embere syethu?

⁷ Ni kikulhu erisombolha enzira eyitholere ey’erikwama! Sitani anzire ithwe bosi ithwaleka erithibitha omwa nzira “eyikakolhaya okwa ngebe” neryo ithwakyurukira omwa nene-nene eyo abandu bangyi omwa kihugho kino balimo. Enzira eyo yasibwe kandi yikomire. Aliwe yikakolhaya “okw’ihera.” (Soma Matayo 7:13, 14.) Erisighalha ithune omwa nzira  eyitholere n’erithendi lengemeribwa, thutholere ithwayikethera Yehova n’erimwowa.

8. Omuthibithi amathwikalha, akakolhaki?

⁸ Abali omo mathangwa w’olhughendo lhuuli bakathibitha ibanasamalire ahisi embere syabu nuku sibathwikale. Nomwabine, owundi muthibithi anganaleka ibathwikalha kutse ibawa omwa kyuna isibayitsulirye. Bamayithinira, bakahangana n’erilholha embere n’amathibitho. Sibali hweraya obulengekania okwa kiryaleka ibathwikalha, aliwe bakabuhweraya okwa muhuha n’okwa kihembo ekyo bakendi thunga.

9. Thwamathwikalha, ni kyahi ekyo thutholere erikolha?

⁹ Omwa mathangwa wethu, thwangana thwikalha ngendo nyingyi, ithwasobya omwa bya thukabugha n’erikolha. Kutse abo thukathibitha nabu banganakolha ekisobyo, ikyathuhambako nabi. Isithwasweka ekyo kyamabya. Ithwe bosi sithuhikene, kandi ithwe bosi thuli omwa kayira kake k’engebe akahathathene. Neryo thukendibya ithune “muhumirana.” Paulo mwakangania ngoku hanganayira owundi iniathunga “omwatsi okwa wundi.” (Kol. 3:13) Omwakanya k’erihira obulengekania okwa kiryathuthwikalhaya, thuhire obulengekania okwa kihembo ekiri embere. Thwamathwikalha, ambi ithwahangana n’erilholha embere erithibitha. Thwamahithana n’eriyiponera neryo thukaghana erihangana, isithwendi kyuruka omuhuha n’eribana ekihembo ky’engebe. Kandi, ithwangana lemesya n’abandi abanemulengaho erithibitha omwa kayira k’engebe akafunda-fundene.

10. Thwangayitheya thuthi okw’ibya abakathwikalhaya abandi?

¹⁰ Eyindi nzira ey’erithendibya “ekyangathwikalya” abo thukathibitha nabu ly’eribalighira erikolha ebindu ngoku banzire kyamathokekana butsira eribahathikana erikolha ngoku ithwe thwanzire. (Abar. 14:13, 19-21; 1 Kor. 8:9, 13) Omwa nzira eyi, sithulibya ng’abakathibitha omwa mathangwa wa buli kiro. Ibo bakabya omwa malingwatha, kandi obuli muthibithi akanza yubane olhuhembo. Abathibithi abo bakayilengekanayako ibo basa. Neryo bangana lengesya n’erikuna abandi  nuku ibo babye embere. Mbaghane n’ekyo, ithwe sithuli omwa malingwatha. (Gal. 5:26; 6:4) Ekilhubirirwa kyethu ly’eriwathikya abangyi ngoku thwangathoka erighunza amathibitho haghuma nethu n’eribana ekihembo ky’engebe. Neryo thukalengaho erighendera okw’ihano lya Paulo ery’eritheya “ebindu by’abandi butsira erilhwira [ebyethu] bisa.”—Fil. 2:4.

11. Ni kyahi ekya omuthibithi akahirako obulengekania, kandi busana naki?

¹¹ Eryongera okw’isamalira ahisi embere syabu, abathibithi abali omwa mathangwa wa buli kiro bakahweraya obulengekania bw’okwa muhuha. Nomubangabya isibalhangire omuhuha, bakathera akasasani ibanemukyurukagho n’eribana olhuhembo. Endambi yosi bakahira obulengekania bw’okwa muhuha, ikyabaha amani.

12. Busana n’olhwanzo, ni kyahi ekya Yehova abirithulhagha?

¹² Omwa mathangwa agho thukathibitha, omo lhwanzo, Yehova abirilhagha abandu biwe ekyo bangathunga bamaghunzagho—engebe y’erikotha omwa lhubulha kutse okwa kihugho paradiso. E Biblia yikathusoborera ekihembo eki ku kisosire, nuku thwanga thera akasasani k’engebe eyo thukendi syathunga. Thwamabera erighanirya okwa bya Yehova abirithulhagha, ithukendi yitsinga omwa mathibitho.

13. Ni kyahi ekyo thulengirye abathibithi ba buli kiro?

¹³ Abathibithi omwa misathu y’Abagiriki ibatholere ibaghumira ebitsibu, ng’erilhuha n’obulhumi. Aliwe ekya babya bakayikethera kisa iry’eriyibegheresya n’akaghalha kabu. Ng’abathibithi abo thunemubegheresibwa ngoku thwanga thibitha omwa mathangwa agho thulimo. Aliwe ithwe thunawithe ekyo thulengirye abathibithi ba buli kiro. Thunawithe ah’er’iha akaghalha akathehwa. Yehova akalhaghanisaya athi thwamamuyikethera iniakendi thuthendeka kandi iniathuha amaaka!—1 Pet. 5:10.

14. Ebiri omu 2 Abanya Korinto 12:9, 10 bikathuwathikaya bithi erighumira ebitsibu?

¹⁴ Paulo mwabana bitsibu bingyi. Eryongera okw’itsumwa n’eriendereribwa, ihakanayira iniayowa isyawithe maaka kandi iniawithe ekitsibu ekyo ahulhamo “endwalha y’omubiri.” (2 Kor. 12:7) Aliwe omwakanya k’erilhangira ebitsibu ebyo ng’enzumwa y’erileka iniabikyako, mwabilhangira ini kaghisa k’eriyikethera Yehova. (Soma 2 Abanya Korinto 12:9, 10.) Kundi Paulo mwabya n’amalengekania aya, Yehova mwamuwathikya omwa bitsibu biwe ebyosi.

15. Thwamagherererya Paulo, ithukendi yilhangiriraki?

¹⁵ Nethu thwangana tsumwa kutse ithwendereribwa busana n’erikirirya lyethu. Thwanganabya ithuwithe n’amaghalha awathuwene kutse ithwayowa ithulhuhire. Aliwe thwamagherererya Paulo, obuli kitsibu ikyanganabya kaghisa k’eriyilhangirira obuwathikya bwa Yehova obw’olhwanzo.

16. Nomuwangabya iwabiritseka, ni kyahi ekyo wangana kolha?

¹⁶ Mbwino wuli omwa ngyingo kutse omwa kaggali k’abalema? Amarwe aleghetsene kutse siwukilhangira ndeke? Byamabya ikwa biri bithya, nawu mbwino wangana thibitha haghuma n’abalere n’abakalire? Ahathe erithika-thika! Abangyi abakulire n’abatsekire bane omwa nzira y’engebe, banemuthibitha. Sibali thoka omubiiri oyu omwa maaka wabu. Bak’iha amaaka ayo w’oku Yehova omw’ikwama emihindano okwa simu kutse okwa vidiyo. Kandi bakasangira omw’iyira abigha omw’ithulira abadokita, abanasi, n’abahughu.

17. Yehova akalhangira athi abawithe amatseke omwa maghalha?

 ¹⁷ Wamabya isiwangakolha ebyosi ebyo wanzire erikolera Yehova, isiwahwa amani n’erilengekania wuthi siwanga thasyathoka erithibitha omwa mathangwa w’engebe. Yehova akwanzire busana n’erikirirya lyawu n’ebyosi ebyo wabirimukolera. Wukayithagha kutsibu obuwathikya bwiwe lino, kandi syanga kusighania. (Esy. 9:10) Nibya ibbwa, akendi yithunda hakuhi nawu. Thahulikirira ebyabughawa na mwali wethu oyuwithe ebitsibu by’amaghalha: “Ebitsibu by’amaghalha bikabya binemwongera, ngayisanga akaghisa ak’erithulira ikanemukeha. Aliwe nganasi ngoku, n’akaghalha kaghe kake kakatsemesaya Yehova, kandi ekyo kikaleka ingatsema.” Wamahwa amani, ambi iwibuka ngoku Yehova ane haghuma nawu. Lengekanaya okwa ky’erileberyako kya Paulo, n’eryibuka ebinywe biwe ebikahimba bino: “Neryo ngatsemera obwolho, . . . Kusangwa omughulhu indi mwolho, indi mbangyi.”—2 Kor. 12:10.

18. Ni kitsibu kyahi ekikalire ekyo abandi bawithe?

¹⁸ Abandi abali omwa mathangwa w’engebe banawithe ekindi kitsibu. Banawithe ebindi bitsibu byabu ebyo bandi bathasi kandi ebyo bathe banga yitheghererya. Ng’eky’erileberyako, babbunikire omuthima n’eribya n’amaghaniryo mangyi. Busana naki abaghombe banzwa ba Yehova aba ibabya n’ebitsibu ebikalire bithya? Kusangwa omundu amabya iniabbunikire omwa kuboko kutse iniali omwa kaggali k’abalema, obuli mundu akalhangira ekitsibu ekyo awithe neryo nibya inianza eriwathikya. Aliwe abawithe ebitsibu omw’iyowa kutse omwa bwongo banganalhangirika nga bane ndeke. Aliwe ebitsibu ebyo bin’ingene n’eribbunikako okuboko, aliwe kundi sihali oyulhangire ku bakaghalhawa, hanganabulha oyukabakanganaya olhwanzo n’eritsomana.

19. Eky’erileberyako kya Mefiboseti kikathweghesayaki?

¹⁹ Wamabya iwuwithe ekitsibu kandi iwukayowa abandi ibakakuyitheghereraya muhanda, eky’erileberyako kya Mefiboseti kyangana kughumya. (2 Sam. 4:4) Abya mulema, kandi Omwami Dawudi mwamuyitheghererya muhanda. Mefiboseti siyuwaletha ebitsibu ebi. Nomwabine, mwathahithana; mwasima ebibuya ebya koleka omwa ngebe yiwe. Mwasima ebibuya ebyo Dawudi abya iniabirimukolera kera. (2 Sam. 9:6-10) Neryo omughulhu Dawudi amuyitheghereraya muhanda, Mefiboseti mwalengesya erikubungulha ndeke omwatsi wosi. Mwathahithana busana n’esobya ya Dawudi. Kandi mwathatsweba Yehova busana n’ekyo Dawudi abya iniabirikolha. Mefiboseti mwalengekania okwa ekyo angakolha erisighika omwami oyo Yehova asombolha.  (2 Sam. 16:1-4; 19:24-30) Yehova mwalhangira athi eky’erileberyako kibuya kya Mefiboseti kikahirawa omwa Biblia nuku kyanga thweghesya.—Abar. 15:4.

20. Amaghaniryo anganahamba athi okwa bandi, aliwe batholere ibayiketheraki?

²⁰ Busana n’amaghaniryo manene, abandi balikyethu bakakwa engitsi n’eriyilhalikirira nibya n’okwa bindu bya buli kiro omwa ngebe. Ikyangana bakalira eribya ahali abandu bangyi, aliwe ibalholha embere eribya okwa mihindano emike-mike n’eminene-minene. Kyanganabya ikikabakalira erikania n’abo bathasi, nomwabine bakakanaya n’abandu omw’ithulira. Wamabya ikwa wuli wuthya, s’iwe musa. N’abandi bangyi banawithe ekitsibu ekyo. Wibuke ngoku Yehova akatsemera akaghalha akawukahiraho n’omuthima wawu wosi. Eribya isiwuthabikyako kikakanganaya ngoku anemukutsumulha kandi ngoku anemukuha amaaka agho wukayithagha. * (Fil. 4:6, 7; 1 Pet. 5:7) Wamabya iwune mukolera Yehova nomowunawithe ebitsibu omwa maghalha kutse omw’iyowa, wuyikethere ngoku wunemutsemesya Yehova.

21. Busana n’obuwathikya bwa Yehova, ni kyahi ekyo ithwe bosi thukendi thoka erikolha?

²¹ Ni ky’obutseme eribya ihali embaghane ahakathi-kathi k’amathangwa wa buli kiro n’awa Paulo akanayako. Omwa mathangwa wa buli kiro omwa buthuku bwe Biblia, omundu mughuma musa iyukahebawa ekihembo. Mbaghane n’ekyo, owosi-wosi oyukayitsinga buthaleghulha omwa mathangwa w’Ekikristayo aw’engebe akabana ekihembo ky’engebe y’erikotha. (Yn. 3:16) Kandi omwa mathangwa wa buli kiro, abathibithi abosi batholere ibabya ibanawithe amaghalha awuwene; bithe bithya ibangana lemwa. Mbaghane n’ekyo, abangyi omw’ithwe thuwithe ebitsibu by’amaghalha, aliwe thukayiyinaya. (2 Kor. 4:16) Busana n’obuwathikya bwa Yehova, ithwe bosi thukendi ghunza ndeke amathangwa!