1. Atweba bonse twafwainwa kuba byepi?

ABYA mwakonsha kukeba kunyema kapela ko mwayuka’mba kakatazha, kikatakata inge mwakolwa nangwa mwakooka nyi? Ine. Nangwa byonkabyo, mutumwa Paulo waambile’mba bena Kilishitu ba kine bonse baji mu kapela. (Hebe. 12:1) Kabiji atweba bonse, bakulumpe ne banyike, baji na bulume ne bakooka, twafwainwa kuchinchika kufika ne ku mpelo inge kya kuba tukeba’mba tukatambule mfweto iketupa Yehoba.—Mat. 24:13.

2. Kwesakana na byaamba 2 Timoti 4:7, 8, mambo ka Paulo o akasulukijile pa kwamba?

² Paulo wakasulukile pa kwamba mambo ‘wanyemene kapela kufika ne ku mpelo.’ (Tangai 2 Timoti 4:7, 8.) Pano ñanyi kapela Paulo ko aambilengapo?

3. Kapela kaambilepo Paulo ko ka ka?

³ Paulo bimye bimo waambanga pa bintu bimo byo baubanga mu makayo mu Gilisi pa kufunjisha mafunjisho anema. (1 Ko. 9:25-27; 2 Timo. 2:5) Pa bimye byavula, waesakenye bwikalo bwa bena Kilishitu ku kunyema kapela. (1 Ko. 9:24; Nga. 2:2; Fili. 2:16) Muntu utendeka kunyema kano kapela inge wipana kwi Yehoba ne kubatizhiwa. (1 Pe. 3:21) Upwisha kano kapela inge Yehoba wamupa mfweto ya bumi bwa myaka ne myaka.—Mat. 25:31-34, 46; 2 Timo. 4:8.

4. Tusakwisamba pa ka mu uno mutwe?

⁴ Kunyema kapela ne kwikala bwikalo bwa bena Kilishitu kwipashisha mwepi? Kuji bintu byavula bingi mo kwipashisha. Twayai twisambeko bintu bisatu. Kitanshi, twafwainwa kunyemenanga mu jishinda jatongolwa; kya bubiji, twafwainwa kuta muchima pa mfweto, ne kya busatu, twafwainwa kushinda makatazho.

5. Ñanyi jishinda jo twafwainwa kulondela, kabiji mambo ka?

⁵ Pa kuba’mba bantu babena kunyema kapela batambule mfweto, bafwainwa kunyemena mu jishinda jo banengezha ku babena kwimenako. Ne atweba inge tubena kukeba kutambula mfweto ya bumi bwa myaka, twafwainwa kwikala byafwainwa bena Kilishitu. (Byu. 20:24; 1 Pe. 2:21) Nangwa byonkabyo, Satana ne bantu banji bakeba’mba tulondelenga “byubilo byatama byo bobapo.” (1 Pe. 4:4) Betwendeleka na mambo a byubilo byetu bya bwina Kilishitu ne kwamba’mba bwikalo bwabo bwawama bingi mambo bwibalengela kukasuluka. Pano bino, byo bamba ke bubela bwafitatu bwii.—2 Pe. 2:19.

6. Tufunjilako ka ku byapichilemo Brian?

⁶ Aba balondela bwikalo bwa mu ntanda ya kwa Satana bataana kuba’mba bwikalo bo basalapo kechi bwibalengela kwikala baana ba bene ne, pakuba bekala bazha kwi Satana ne ku bisakasaka michima yabo. (Loma 6:16) Langulukai pa byapichilemo Brian. Bansemi banji bamutundaikile kwikala bwikalo bwa bwina Kilishitu. Bino byo akomeneko pacheche wazhinaukilenga inge kya kuba buno bwikalo bukamulengela kwikala na lusekelo. Onkao mambo, Brian wafuukwilepo kulondela bwikalo bwa bantu ba mu ntanda ya kwa Satana. Waambile’mba: “Kechi nayukile’mba bwikalo bo nakomokelenga bukandengela kwikala muzha ku byubilo byatama ne. Mu kuya kwa kimye, natendekele kwingijisha bizhima ne kutoma maalwa avula ne kuba bulalelale. Myaka yalondejilepo, natendekele kwingijisha bizhima byashinta bingi kabiji byannonkele buzha. . . . Natendekele kupotesha bizhima pa kuba’mba ngikalenga na bikebewa mu bwikalo.” Byo papichile myaka, Brian wafuukwilepo kukooekela mizhilo ya Yehoba. Brian wapimpwile bwikalo bwanji kabiji wabatizhiwe mu 2001. Luno uji na lusekelo lwa kine na mambo a kwikala bwikalo bwa bwina Kilishitu. *

7. Kwesakana na byaamba Mateo 7:13, 14, kuji ñanyi mashinda abiji?

⁷ Onkao mambo, kyanema bingi kusala jishinda jawama kuyamo. Satana ukeba’mba atweba bonse tuleke kwenda mu jishinda jakatazha kwendamo “jitwala ku bumi,” ne kuba’mba tutendeke kwenda mu jishinda jabaya mubena kwenda bantu bavula. Jishinda jabaya jayukanyikwa bingi kabiji japeela kwendamo. Pano bino, jibena kutwala bantu “ku lonaiko.” (Tangai Mateo 7:13, 14.) Pa kuba’mba tutwajijile kwenda mu jishinda ja ku bumi ne kubula kusendukamo, twafwainwa kuketekela mwi Yehoba ne kumvwina mikambizho yanji.

8. Muntu uji mu kapela inge wituntula, uba byepi?

⁸ Bantu banyema kapela bazanzatu meso pa jishinda jo babena kunyemenamo pa kuba’mba babule kwituntula. Nangwa byonkabyo, bakonsha kwituntula mu mukwabo nangwa kunyanta mu kimbo. Inge bapona, babukapo ne kutwajijila kunyema. Kechi bata muchima pa kibalengela kwituntula ne, pakuba bata muchima pa kutambula mfweto.

9. Inge twituntula, twafwainwa kuba byepi?

⁹ Mu kapela ketu, twakonsha kwituntula bimye byavula, ko kuba’mba kulubankanya mu ñambilo ne mu byubilo. Nangwa bakwetu bo tubena kunyema nabo bakonsha kuba bintu byakonsha kwitukozha ku muchima. Kechi twafwainwa kukumya inge kino kyamweka ne. Atweba bonse twibambulwa kulumbuluka, kabiji bonse tubena kwenda mu kajishinda kakepa kaya ku bumi. Onkao mambo, bimye bimo twakonsha kwituntula mu bakwetu. Paulo waambile kuba’mba bimye bimo twakonsha kwikala na ‘mambo na bakwetu.’ (Kolo. 3:13) Bino kechi twafwainwa kuta muchima pa kitulengela kwituntula ne, pakuba twafwainwa kuta muchima pa mfweto iji kulutwe. Inge twituntula, twafwainwa kubukapo ne kutwajijila na kunyema. Inge twazhingila ne kukana kubukapo, kechi tukapwisha kunyema kapela ne kutambula mfweto ne. Kikwabo, inge twabula kubukapo, twakonsha kwikala kya kwituntulako bakwetu babena kunyemena mu jishinda ja ku bumi.

10. Twakonsha kuchinuzhuka byepi kwikala “kya kwituntulako” bakwetu?

¹⁰ Jishinda jikwabo jo twakonsha kuchinuzhikilamo kwikala “kya kwituntulako” bakwetu bo tubena kunyema nabo kapela ke kuleka bakwetu kubila bintu mo bakebela kechi kumina ku milanguluko yetu ne. (Loma 14:13, 19-21; 1 Ko. 8:9, 13) Kechi tukekala nobe banyema kapela ka kutambula mali ne. Abo bekyombesha na bakwabo mo babena kunyemena, kabiji yense utatu muchima pa kutambula mfweto yanji. Banyema kano kapela balangulukatu pa kyafwainwa kwibakwasha kushinda bakwabo. Onkao mambo, bakonsha kushinjikila bakwabo ku mbaji pa kuba’mba bekale kulutwe. Pakuba atweba kechi tubena kwikyombesha na bakwetu bo tubena kunyema nabo ne. (Nga. 5:26; 6:4) Kikonkwanyi kyetu ke kya kukwasha bantu bavula kupwisha kapela ne kutambula  mfweto ya bumi bwa myaka. Onkao mambo, tweseka na ngovu kulondela lujimuno lwa kwa Paulo lwa kuba’mba twafwainwa kuta “muchima ku bintu bya [bakwetu]” kechi “[kulangulukangatu] pa bintu [byetu] byonka ne.”—Fili. 2:4.

11. Muntu unyema kapela uta muchima pa ka?

¹¹ Kununga pa kuzanza meso pa jishinda jo babena kunyemenamo, banyema kapela ka mali bata muchima pa kupwisha kapela. Nangwa kya kuba kechi bakonsha kumonapo na meso po basakupwishisha kano kapela ne, bino bamonapo mu milanguluko. Batwajijila kunyema na mambo a kulanguluka kimye kyonse pa mfweto.

12. Yehoba witukwasha kushiinwa’mba ka?

¹² Mu kapela ko tujimo, Yehoba wakwasha bantu banji kushiinwa kuba’mba bakatambula mfweto ya bumi bwa myaka ne myaka mwiulu nangwa mu paladisa pano pa ntanda inge bapwisha kano kapela. Binembelo byalumbulula biji ino mfweto pa kuba’mba tufwanyikizhenga bwikalo byo bukawama. Umvwe saka tulanguluka kimye kyonse pa luketekelo lwetu, kechi tukaswisha kintu nangwa kimo kwitutuntwisha kya kuba twaleka kunyema mu kano kapela ne.

13. Ñanyi bintu byo tuji nabyo byabula boba banyema kapela ka mali?

¹³ Bantu banyemanga kapela mu Gilisi bashindanga makatazho nabiji kukooka ne misongo. Bino baketekelanga mu byo bafundanga bya kunyema ne mu bulume bwabo. Tuji nobe bano bantu, mambo ne atweba betufunjisha bya kunyema. Bino atweba tuji na bintu byabujile Bangiliki banyemanga kapela. Kechi tuketekela mu bulume bwetu ne, pakuba tutambula bulume kwi Yehoba. Inge twaketekela mwi Yehoba, aye witulaya kuba’mba uketufunjisha bya kunyema ne kwitukosesha.—1 Pe. 5:10.

14. Kinembelo kya 2 Kolinda 12:9, 10 kitukwasha byepi kuchinchika makatazho?

¹⁴ Paulo wapichile mu makatazho avula. Kununga pa kumutuka ne kumumanyika ku balwanyi, Paulo bimye bimo wakookanga kabiji wapichilenga ne mu lukatazho lo atelele’mba “mwiba mu mubiji.” (2 Ko. 12:7) Pano bino, kechi wakebelenga kuleka kwingijila Yehoba na mambo a bino bintu ne, pakuba watwajijile kuketekela mwi Yehoba. (Tangai 2 Kolinda 12:9, 10.) Na mambo a kuba’mba Paulo waketekejile mwi Yehoba, Yehoba wamukwashishe kuchinchika meseko onse o apichilengamo.

15. Inge twalondela byaubile Paulo, tukemwena ñanyi kintu?

¹⁵ Ne atweba bakonsha kwitutuka nangwa kwitumanyika na mambo a lwitabilo lwetu. Kabiji kampe tukolwakolwa nangwa kukooka. Pano bino, inge twalondela byaubile Paulo, ano makatazho onse akonsha kwitulengela kwimwena Yehoba byo etukwasha.

16. Nangwatu inge mukolwakolwa, mwakonsha kuba byepi?

¹⁶ Nanchi mulaalatu pa mwanya nangwa mwendela pa kakinga kabilema nyi? Nanchi manungo enu akooka nangwa meso enu kechi amona bulongo nenyi? Inge byo byo kiji, nanchi mwakonsha kunyemena pamo na banyike nangwa boba baji na butuntulu bwa mubiji bwawama nyi? Ee, mwakonsha. Bavula bakoma ne bakolwakolwa babena kunyemena mu jishinda jaya ku bumi. Kechi bakonsha kuba bino na bulume bwabo ne. Pakuba batambula bulume kwi Yehoba kupichila mu kuteleka ku kupwila kwa bwina Kilishitu pa foni nangwa kutamba pa kiñambañamba. Kabiji bengila mwingilo wa kufunjisha bantu kwikala baana ba bwanga kupichila mu kusapwila ku badokotala, bamanase, ne balongo babo.

17. Yehoba umvwa byepi pa boba bakolwakolwa?

¹⁷ Inge kya kuba mukankalwa kuba byonse byo mukeba kuba mu mwingilo wa Yehoba,  kange mulefulwe ne kulanguluka’mba kechi mwakonsha kuchinchika kufika ku mpelo ya buno bwikalo ne. Yehoba wimutemwa na mambo a lwitabilo lwenu ne na mambo a byonse byo mwaingijile pa myaka yavula mu mwingilo wanji. Mwafwainwa kuketekela mu bukwasho bwanji luno kukila kala, kabiji kechi ukemusha ne. (Sala. 9:10) Pakuba ukafwenya kwipi ne anweba. Monai byaambile nyenga umo ukolwakolwa amba: “Na mambo a kuba’mba bikola bibena kutwajijilatu, kechi nsapwila bukine bimye byavula ne. Bino nayuka kuba’mba nangwa kya kuba ñingilakotu pacheche, nsangajika muchima wa Yehoba, kabiji kino kindetela bingi lusekelo.” Inge mwaikala na binyenge, vulukainga kuba’mba kechi muji bunke ne. Langulukai pe Paulo, ne kuvuluka byambo byanji bya lutundaiko bya kuba’mba: “Nsekela mu kubula kukosa, . . . mambo umvwe nakooka, ngikala ke wakosa.”—2 Ko. 12:10.

18. Ñanyi lukatazho lumo bamo lo bapitamo?

¹⁸ Bamo babena kunyema mu kapela ka ku bumi bapita mu lukatazho lukwabo. Bapita mu makatazho abula kumweka ku bakwabo nangwa abula kuyukanyikwa ku bantu. Kampe baji na binyenge nangwa bijikila bikatampe. Mambo ka bano bakalume ba Yehoba o kibakatezha bingi kutambula bukwasho? Mambo inge muntu wachimuka kuboko nangwa wendela pa kakinga ka bilema, bantu bonse bamona lukatazho lo aji nalo kabiji bakonsha kumukwasha. Pano bino, aba baji na binyenge nangwa bijikila, kechi bakonsha kumweshapo’mba baji na lukatazho ne. Lukatazho lo baji nalo lujitu pamo na wachimuka kuboko nangwa kulu. Bino na mambo a kuba’mba bantu bakwabo kechi bakonsha kumona luno lukatazho ne, kechi bakonsha kwibakwasha ne.

19. Tufunjilako ka ku byapichilemo Mefibosheta?

¹⁹ Inge kya kuba’mba mukankalwa kuba bintu bimo kabiji mumona’mba bakwenu kechi bayuka byo mubena kupitamo ne, mwakonsha kutundaikwa inge mwalanguluka pa byapichilemo Mefibosheta. (2 Sam. 4:4) Mefibosheta wajinga kilema, kabiji Mfumu Davida wamupelemo mambo kwa kubula kuyuka bishinka byonse. Mefibosheta kafwako kyatama kyo aubile kyafwainwe kumuletela ano makatazho ne. Pano bino, kechi watele muchima pa byatama byo apichilengamo ne, pakuba wasanchilenga pa bintu byawama byamumwekejilenga mu bwikalo bwanji. Wasanchijile Davida pa kifyele kyo amumwesheshe kala. (2 Sam. 9:6-10) Onkao mambo, byo bamupelemo mambo kwi Davida, Mefibosheta walangulukile pa kine kintu kyalengejile. Kechi wazhingijile pa byamubile Davida ne. Kabiji kechi wapelemo Yehoba mambo pa byaubile Davida ne. Mefibosheta wateletu muchima pa byo akonsheshe kuba pa kutundaika mfumu ye basajile kwi Yehoba. (2 Sam. 16:1-4; 19:24-30)  Yehoba watangijile bannembi ba Baibolo kunemba jishimikila ja kwa Mefibosheta pa kuba’mba tufunjilengako.—Loma 15:4.

20. Bijikila byakonsha kulengela bamo kwikala byepi, bino bafwainwa kuketekela ka?

²⁰ Na mambo a kuvula kwa bijikila, balongo ne banyenga bamo bakamwa bingi kabiji kechi bakasuluka inge baji na bakwabo ne. Kyakonsha kwibakatazha kutanwa pa bantu bavula, bino bakonsha kutwajijila kupwila ne kuya na kubuñana ne kushonkena. Kyakonsha kwibakatazha kwisamba na muntu ye babula kuyuka, bino bebikako kwisamba na bantu mu mwingilo. Inge kya kuba’mba lo lukatazho lo mubena kupitamo, yukai kuba’mba kechi muji bunke ne. Bavula babena kupita mu luno lukatazho. Vulukainga kuba’mba Yehoba umvwa bingi bulongo byo mumwingijila na muchima yense. Kishinka kya kuba’mba kechi mwaleka kwingijila Lesa ne, ke kishiino kimwesha kuba’mba ubena kwimupesha ne kwimupa bulume. * (Fili. 4:6, 7; 1 Pe. 5:7) Inge kya kuba mubena kwingijila Yehoba nangwa kya kuba mubena kuchinchika makatazho nangwa bijikila, mwakonsha kushiinwa kuba’mba mubena kusangajika muchima wa Yehoba.

21. Na bukwasho bwa Yehoba, atweba bonse tukoba byepi?

²¹ Kyawamakotu ke kya kuba’mba paji lupusano pa kapela ka mali ne kapela kaambilepo Paulo. Mu kapela kanyemanga bantu mu kimye kyanembejilwengamo Baibolo, muntu umotu ye watambulanga mfweto. Pakuba bonse bachinchika mu bukishinka mu kapela ka bwina Kilishitu bakatambula mfweto ya bumi bwa myaka ne myaka. (Yoa. 3:16) Kabiji mu kapela ka mali, bonse banyema mu kano kapela bafwainwa kwikala na butuntulu bwa mubiji bwawama, mambo inge ne, kechi bakonsha kushinda bakwabo ne. Pakuba atweba bavula kechi tuji na butuntulu bwa mubiji bwawama ne, bino twatwajijila kuchinchika. (2 Ko. 4:16) Na bukwasho bwa Yehoba, atweba bonse tukapwisha kapela ka ku bumi.