1. Yɛɛ naa kpou nɔ yɛ miŋ tosa?

VƐƐ kɔllo wa yɛ num te a wa pɛ a naa ɔɔ o saŋgɛi ma dimul num maa chɔŋ le kiltaŋ? Ma tambu kɔl, lende le? Kɛ mi Pɔɔl, wana Chiisu vem hɔlte ndɔ wo dimi maa Kilisiɔŋaa tonyaa kpou cho kiltaŋ. (Hibu. 12:​1) Ŋ wa feleŋgɔnɔ ɔɔ bɛndu yuu, ŋ nɔ dialuŋ kalaŋ ɔɔ miŋ wa a saŋgɛi, naa kpou nɔ miŋ lo kiltaŋ haaa o mɛɛlulaŋ te ŋ yeema pɛ le mi Chɛhowa huŋ ke naa fandaa.—Maa. 24:​13.

2. A mɛɛ Timoti Diiŋ Ndɔɔ 4:​7, 8 dimi yɛ, le yɛɛ Pɔɔl ndoo nɔla yɛ mbo kelu yoŋgaa?

² Pɔɔl ndoo nɔla mbo kelu yoŋgaa kanifuule, mbo “nyaanuŋ haaa [mbo] fuuluu o mɛɛlulaŋ.” (Nuawɔ Timoti Diiŋ Ndɔɔ 4:​7, 8. *) Kɛ a kilta suu kuɛɛ okɔɔ Pɔɔl ndoo soo yɛ?

3. A kilta suu kuɛɛ okɔɔ Pɔɔl ndoo soo yɛ?

³ Mi waŋnda ndaa tosa sindɛ pisulta teŋgeŋ teŋgeŋndaŋ o lɛŋnde Kilisileŋ niŋ. Mi Pɔɔl ndoo soo a pisultaŋ ndaŋ lapum okɔɔ o yaula ndoo poonyiaalaŋ niŋ. (1 Kɔliŋ. 9:​25-27; 2 Timo. 2:​5) Teleŋnda bɔɔbɔɔ, mi ndoo tuu yoomu leKilisiɔŋndo a nyaanɔŋ labɛɛla waŋnda ndaa nyaanuŋ ndo. (1 Kɔliŋ. 9:​24; Kalee. 2:​2; Filipi. 2:​16) Teleŋ waŋndo yɔŋguŋ o Chɛhowa lo mbo yiŋ ndo o kandu “kiltaŋ” ndaŋ ni. (1 Pitɛ 3:​21) Nduyɛ teleŋ Chɛhowa cho ndu yoomu fafɛɛŋndo ke wo o cho laŋ chii ni.—Maa. 25:​31-34, 46; 2 Timo. 4:​8.

4. Yɛɛ naŋ cho yɛ yaasiaa o buŋgɛi hei niŋ?

 ⁴ O nɛi kuɛɛ choo nyaanɔŋ waŋnda nyaanuŋ o tiŋ vilɛiyo niŋndo vel lɛ yoomu naa leKilisiɔŋndo? Velaŋndo cho o nɛila bɔɔbɔɔ niŋ. Ŋ yaasiaŋndɔ nɛilaŋ la yaa. O tasoo, ŋ nɔ miŋ nyaanuŋ o nɛi sakpoo choo. O diiŋ ndɔɔ, ŋ nɔ miŋ kɛsi kɔllo o naa naŋ nɔ le mɛɛloo wa. Nduyɛ o yaa ndɔɔ, ŋ nɔ miŋ hiou lachi a kiltaŋ o yɔŋ bɛɛ mi simultaŋ la wa.

5. Vɛɛ naŋ nɔ yɛ miŋ bii yoomu naa nduyɛ le yɛɛ?

⁵ Mi wanaa kɔɔna waŋnda le nyaanɔŋ labɛɛlaa wa chɔm nda nɛi nda nɔ ma nyaanuŋ choo wo. Mɛɛ ma nyaanuŋ o nɛi koŋ choo malaŋ nda sɔla fandaa. O nɛi pilɛ koŋ choo, te ŋ yeema pɛ miŋ sɔla yoomu fafɛɛŋndo, mɛɛ miŋ bii yoomu naa o nɛi leKilisiɔŋndo choo. (Walta. 20:​24; 1 Pitɛ 2:​21) Kɛ Setana a wanaa cho ndu kɔɔli wa yeema naa miŋ tol nɛi cheleŋ kɔɔli. A yeema naa miŋ ‘sɔɔŋguu nda choo le sɔɔŋ wɔɔŋndoŋ tosaa.’ (1 Pitɛ 4:​4) Lelaŋ ma mam naa tau nduyɛ ma dimi pɛŋ maa nɛi nda cho choo wo wana hiau yoomoo tueiyɔɔ yeela. Kɛ keŋ cho tonya kposoŋ te.—2 Pitɛ 2:​19.

6. Yɛɛ taamasi Bilayaŋ ndo pɛɛku yɛ num?

⁶ Te waŋndo mal dɔɔ pɛ nɛi leKilisiɔŋndo le wanaa cho o chieeŋ Setana wo niŋ nda tolɔɔ kɔɔli, hau pa mbo sina maa o chɛleŋ niŋ o kuɛ ni. (Luomaŋ. 6:​16) Tofawɔ taamasi Bilayaŋ ndo. Mi wanaa velu ndu wa dɛɛniaa ndu le mbo bii yoomu ndɔɔ o nɛi leKilisiɔŋndo choo. Kɛɛ mɛɛ o sul tiŋ kaasoŋnɔ, mbo yiyaŋ maa yoomu leKilisiɔŋndo ke wana nyaale le. Le hei, mbo tual wanaa cho o chieeŋ Setana wo niŋ nda kɔɔli. Kɛ tofawɔ nyɛ o mɛɛlu dimi wo. “Yaa che ko maa I cho wa hɛnɛkɛ. Kɛ mi simnuŋ chiɔɔ kaala wɔɔŋndaŋ o ba. Mi kandu muɛiyaŋ kolɔɔ tau a taŋ bɛndoo nduyɛ mi luei vɛlɛ balaŋ o kaa ihini nɔɔlɛiyo niŋ. Chɔŋ niŋ a teleŋ koŋ mbo kua kɛ, mi hiau lachi a taaŋnda wɔɔŋ wɔɔŋndaŋ kolɔɔ, nduyɛ mi simnuŋ chiɔɔ laŋ o ba. Mi yoomu nɔɔlɛi ya wa choo wo tosa mi kandu pɛŋ taaŋ bɛndoo pisioo.” O mɛɛlulaŋ kpɔŋ, mi Bilayaŋ kɛɛsiaa le sawala Chɛhowalaŋ tolɔɔ kɔɔli. Mbo mal nɛi o wa choo wo okoŋ, mbo sɔla yiŋɔɔ o wɔsi 2001 niŋ. O cho niŋ hau a nyaale le kɔlaŋ o nɛi leKilisiɔŋndo choo. *

7. A mɛɛ Maatiu 7:​13, 14 dimi yɛ, nɛila tiɔɔŋnda kuɛɛ cho yɛ naa lachi?

⁷ O bɛnda bɔɔ miŋ kuɛ o nɛi sakpoo choo! Setana yeema mi naa kpou pɛŋgi kiltaŋ o nɛi sɔɔkɛnyɛɛ ke wana “yoomu kpeekpeiyo” wo choo. O yeema naa miŋ hiou o nɛi tuaŋgaa wanaa bɔɔbɔɔ cho hau kɔlaŋ kɔɔli wo choo. Nɛiyo hoo waŋnda hiou sina nduyɛ o kindu  lakɔ le. Kɛ o “tambei niŋ o yaa wana ni.” (Nuawɔ Maatiu 7:​13 * , 14.) Le miŋ lo o nɛi sakpoo choo wana nɔla naa hui le, ŋ nɔ miŋ tiindaŋ Chɛhowa nduyɛ miŋ tuei ndu diom.

8. Te wana cho kiltaŋndo boŋ pɛ mbo del, yɛɛ o tosa yɛ?

⁸ Te wanaa nda chua le nyaanɔŋndo o tiŋ vilɛiyo niŋnda wa kiltaŋ pɛ, lachi sakpo nda nua ni yɔŋi nda boŋ ma del. Kɛ o wa bɛɛ lende, lepum mi ndapila kuindiaŋ ɔɔ ma nɛi o sooŋndo niŋ. Te hei tosa pɛ ma del, chɔnɔŋndo nda chaŋ ni ma hiou lachi a kiltaŋ. A hendu kɔllo o nyɛ tosa ma del lo choo le, kɛ o fanda ndaa choo a naa nda nɔ le mɛɛloo wa nda handu kɔllo ni.

9. Yɛɛ naŋ nɔ yɛ miŋ tosa te o yɔŋ pɛ miŋ del?

⁹ Mi naa bɛɛ boŋ lepum o kilta naala leKilisiɔŋndaŋ niŋ. Miŋ benduŋ tau o nyɛ naŋ dimi wo niŋ a o naŋ tosa wo. Mi chaaŋaa naa naŋ cho kiltaŋ nda pilaŋ naa vɛlɛ lepum tana. Hei nɔ mii bii naa kamaa le kanifuule wanaa lahakiaa naa kpou cho ni. Nduyɛ, o nɛi sɔɔkɛnyɛɛ ke wana yoomoo wo choo naŋ cho kiltaŋ ni. Le hei, miŋ “kuindiaŋ” teleŋndaŋ lapum. Mi Pɔɔl dimi pɛŋ maa lepum, miŋ tosal chaaŋaa naa ‘suɛi wɔɔŋnde.’ (Kolo. 3:​13) Ŋ nɔ miŋ kɛsi kɔllo o fanda cho naa lachi wo choo, kɛ o cho o nyɛ tosa miŋ boŋ ndo choo le. Nduyɛ te o yɔŋ pɛ miŋ del, ŋ nɔ miŋ chɛŋ miŋ hiou lachi a kiltaŋ. Te ŋ dɔɔŋ pɛ tumbe miŋ kɛɛ le chɔnɔŋndo, mɛɛ ŋ fuuluu niŋ o mɛɛlulaŋ miŋ sɔla fanda naa le. Kɛ i hiou lewɔu kpou ve, keŋ tosa miŋ hau nɛiyo le wanaa cho kindiŋndo le kiltaŋ o nɛi sɔɔkɛnyɛɛ ke wana yoomoo wo choo wa.

10. Yɛɛ naŋ nɔ yɛ miŋ fafaŋ te ŋ yeema pɛ mi chaaŋaa naa boŋ ɔɔ ma “tosa yɔŋ wɔɔŋndo” le?

¹⁰ Ŋ nɔ vɛlɛ miŋ fafaŋ chaaŋaa naa naŋ cho kiltaŋ nda baŋɔɔ le ma tosa sɔɔŋ mɛɛ naŋ yeema yɛ. Te ŋ tosa lende le, ŋ cho tosa ma boŋ ɔɔ ma “tosa yɔŋ wɔɔŋndo.” (Luomaŋ. 14:​13, 19-21; 1 Kɔliŋ. 8:​9, 13) O nɛiyo hoo choo naŋ cho teŋgeŋ a wanaa nyaanuŋ nyaanɔŋ yɔŋaa wa ni. Ma chiee chiee le chaaŋaa ndaa hiouwɔɔ le halikpeŋ mi o kɛ kɛ sɔla fandaa le ndupila. A ndapila okɔɔ suee nda yiyaŋ ni. Le hei, ma nyindu pɛŋ chaaŋaa ndaa le halikpeŋ ma fuuluu nda tase. Kɛ naŋ cho chiee chiee  le chaaŋaa naa hiouwɔɔ le. (Kalee. 5:​26; 6:​4) Kpeleŋ naa cho le waŋnda malaa tau miŋ luɛi naa ndaa o chieeŋ sɛnɛi Mɛlɛkaa niŋ ni. Lelaŋ naŋ kindiŋ ni le sila Pɔɔl yɔŋgu hoo wo dɔwɔɔ o wali niŋ. Mbo dimi aa: “Wana o wana o cho ko le dɛnɛ num kɛndɔɔ num pilɛ suee le ŋ landuŋ kɔl te. Nɔ kɔl landaŋndo le chaaŋnda bɛɛ dɛnɛ nda kɛndɔɔ.”​—Filipi. 2:​4.

11. Yɛɛ wanaa nda chua le kiltaŋ nda kɛsi yɛ kɔllo choo, nduyɛ le yɛɛ?

¹¹ O cho ko lachi sakpo le wanaa nda chua le kiltaŋ nda tofa le, kɛ ma kɛsi vɛlɛ kɔllo o naa nda nɔ le mɛɛloo wa choo. Mi che bɛɛ a chi naa kaŋ a lehɔl te, kɛ ma che fonda koŋ o kɔl niŋ nduyɛ ma yiyaŋ pɛŋ maa fandaa chuu niŋ wa le nda. Lelaŋ, mɛɛ nda yiyaŋ fau a fanda ndaa okɔɔ, lende koni nda duau sɛmbɔɔ le kiltaŋ ni.

12. Yɛɛ Chɛhowa kɛsullɛ naa?

¹² Chɛhowa kɛsul naa fandaa le kilta naŋ cho laŋ. Nduyɛ te ŋ fuuluu pɛ o mɛɛlulaŋ, nyɛ o nyɛ kuuna ndu naa fandaa hoo kioo le. Fanda koŋ cho yoomu fafɛɛŋndo ni. Waŋnda apum cho ndu sɔla o choo choo niŋ mi a tuaa sɔla ndu o kpele hɛnɛkiɔɔ niŋ o lɛŋndeŋ choo. Baabuiyo tɛɛsiaa mɛɛ yoomoo hoo wa niŋ yɛ le naa malaa miŋ yiyaŋ a mɛɛ naŋ tuɛi niŋ ndu yeela yɛ okɔɔ. Te o yɔŋ pɛ miŋ kɛsi kɔllo o tiindaŋ sɔviɔɔ hoo choo, o yɔŋ bɛɛ miŋ boŋ miŋ del, chɔnɔŋndo naŋ chaŋ ni.

13. Kuɛɛ naŋ hiou yɛ wanaa nyaanuŋ nyaanɔŋ labɛɛlaa wa?

¹³ Mi simultaŋ laa komal wanaa ndaa nyaanuŋ sindɛ o lɛŋnde Kilisileŋ niŋ nda. Mi yoomuaŋ maa pɛ nda nduyɛ mi ndaa saŋga tau. Nyɛ ndoo mala nda kinɛiyo wa pɛɛku ndaa sɔla wo a yoomuma ndaŋ ni. Mi naa bɛɛ sɔla pɛɛkoo le kilta naŋ cho laŋ maa nda. Kɛ ŋ nɔ naa naŋ hiou nda wa. Chɛhowa o ba naŋ sɔla kpaayaa ni nduyɛ kpaaya ndɔɔ nɔ la mɛɛlu le. Te ŋ dɔu pɛ tiindaŋndo o Chɛhowa niŋ, o dimi maa o cho naa pɛɛku nduyɛ mbo ke naa dialuŋ kalaŋ.—1 Pitɛ 5:​10.

14. Vɛɛ Kɔliŋtiaŋ Diiŋ Ndɔɔ 12:​9, 10 mala yɛ naa miŋ biuŋ simultaŋ?

¹⁴ Mi simulta bɔɔbɔɔ komal Pɔɔl. Mi waŋnda ndaa tɛɛmbuu ndu labɛɛ nduyɛ mi ndaa tusi ndu nyɛpalaa choo tau. O faŋaŋndɔ o hei kɔɔli, mi ndoo saŋga lepum nduyɛ mbo dimi maa “nyɛ nɛiyaa luɛi [ndu] sɔu mɛɛ yuɛi i huau nuaa waŋndo yɛ.” (2 Kɔliŋ. 12:​7) Pɔɔl chɛl mi simultaŋ ndaŋ la kuuna ndu Chɛhowa piɛi le. Kɛ mbo cha ndi maa fondaa o sɔla koŋ ni le tiindaŋ ndɔɔ dɔwɔɔ o ndu niŋ. (Nuawɔ Kɔliŋtiaŋ Diiŋ Ndɔɔ 12:​9, 10.) Le mɛɛ ndoo nɔ yiyaŋndo hoo yɛ, mi Chɛhowa mala ndu mbo biuŋ simultaŋ ndaŋ kpou.

15. Te ŋ tol pɛ taamasi Pɔɔllo kɔɔli, yɛɛ naŋ cho yɛ chɔ?

¹⁵ Le mɛɛ naŋ cho Chɛhowa piɛiyo yɛ, naa bɛɛ mi waŋnda tɛɛmbuu naa lepum labɛɛ nduyɛ ma tusi naa nyɛpalaa choo. Mi kɛndiaa lepɛŋndo ɔɔ saŋga ŋdiallo komal naa. Kɛ te ŋ tol pɛ taamasi Pɔɔllo kɔɔli, simultaŋ ndaŋ la nɔla mi la mala naa miŋ che ba Chɛhowaa o yoomu naa niŋ.

16. O yɔŋ bɛɛ ma nɔ kɛndiaa sɔvɛ le, yɛɛ ŋ nɔla yɛ ma tosa?

¹⁶ Baa ihini ŋ cho a naa suŋ suŋ ni? Baa o kandu namtaa niŋ ŋ kua ni? Baa wulaŋ la nɛi num ni ɔɔ a chi lɛ lapi le? Te lende i cho ni, a nɔla pa ma nyaanuŋ nya wanaa cho kpeŋkpeleŋ nda? Num bɛɛ nɔla ma nyaanuŋ nya ndaa! Wanaa yuwɛiya a wanaa nɔ kɛndiaa sɔvɛ le wa a bɔɔbɔɔ cho kiltaŋ o nɛi yoomoo choo. O cho o kpaaya nda niŋ te nda cho kiltaŋ ndaŋ te, kɛ Chɛhowa ke nda kpaayaa ni sanaa o bɔŋaŋnda leKilisiɔŋndaŋ. Te a nɔla kɔlaŋ o bɔŋaŋndo le, ma chuel nda diomndaŋ o nyɛm mapuuloŋ choo le ma kɔ yaŋ nilaŋ. Nduyɛ te o hiŋ pɛ a yooŋgu kɛndɔɔ okɔɔ, ma soo o wanaa ndaa chiɔuwaa lo a wanayaŋ ndaŋ.

17. Vɛɛ Chɛhowa che yɛ wanaa kɛndiaa ndaa chɛllɛ nda ma tosa tau maa paandu le wa?

 ¹⁷ O yɔŋ bɛɛ mi kɛndiaa numndo chɛllɛ num le tosaa tau le Chɛhowa maa paandu le, tambu kɔl te. Fɛŋ bɛɛ yiyaŋ naa maa a nɔla lɛ ma nyaanuŋ o nɛi yoomoo choo le le. Chɛhowa kaala num le mɛɛ ŋ nɔ tiindaŋndo o ndu niŋ yɛ nduyɛ o puɛɛnuŋ a wali ŋ tosal ndu wo le. Suŋ suŋ ŋ nɔ ni ma tiindaŋ ndu mbo hiou maa paandu nduyɛ fɛŋ bɛɛ o mel num te. (Sam 9:​10) Ndu bɛɛ cho num chɔɔlu sɔɔŋguu ikɛi. Tofawɔ nyɛ ndepilɛnɔ cho chɔulabaa a kɛndiaa lepɛŋndo wo dimi wo: “Mɛɛ kɛndiaa nuu wa hiouwɔɔ lachi a wɔuleŋ, mi saaluŋ maa I nɔla lɛ mi dimi yooŋgu kɛndɔɔ maa paandu le. Kɛ I sina maa mi Chɛhowa naŋ kɔl tau le o pɔmbɔ ya cho tosaa wo nduyɛ mi hei chuu ya nyaaloo.” Lelaŋ, te a tambu kɔl pɛ, loonuŋ maa Chɛhowa cho latulu a num. Yiyaŋ a taamasi Pɔɔllo okɔɔ. Loonuŋ a diomnda o dimi laŋ ndaŋ: “A yɔŋ bɛɛ mi I nɔ kpaaya le, . . . I cho a kɔl hiniaa. Kani fuule, boondii ya nɔ kpaaya le ve, boondii keŋ kpaaya Mɛlɛkaa tosa wallo o ya niŋ ni.”—2 Kɔliŋ. 12:​10.

18. Simul kala kala kuɛɛ waŋnda apum cho yɛ chɔulabaa?

¹⁸ Wanaa cho kiltaŋ o nɛi yoomoo choo wa apum nɔ vɛlɛ simul cheleŋ. A cho chɔulabaa a sɔɔŋ pum o yoomu ndaa niŋ ŋ wanaa cheleŋ nɔla ma sina le woŋ. Le taamaseliiyo, apum cho lɔɔlɔɔ a kɔl tambɛiyo ɔɔ buulaŋ bɛndoo. Le yɛɛ simul cho hoo buɛiyaa Chɛhowaa haa choo wo kendu yɛ mbo hiau la bɔɔbɔɔ? Kanifuule, te baa yom waŋndo pɛ ɔɔ mbo wa o kandu namtaa niŋ, waŋnda nɔla ma che bahawɛi ndɔɔ nduyɛ mi nyiɛɛye bii nda ma mala ndu. Kɛ waŋnda chɔ bɛɛ wanaa cho saŋgaa o kɔllo niŋ nda ɔɔ a nɔ bahawɛi mahullo wa, a chi nda ko o lahɔl maa a cho o saŋga niŋ te. Nyɛ nɛiyaa ndaa cho ko maa nyɛ nɛiyaa wana yem baa wo. Kɛ le mɛɛ waŋnda chi ndu le yɛ, a sɔla mala wana yem baa wo sɔla wo le.

19. Yɛɛ naŋ pɛɛku yɛ o taamasi Mɛfibosiɛɛ wo niŋ?

¹⁹ Te a ve wana kɛndiaa le nduyɛ ma yiyaŋ maa waŋnda cho num chaa biyɔɔ le, tambu kɔl te. Taamasi Mɛfibosiɛɛ wo nɔla mbo dɛɛniaa num tau. (2 Saam. 4:​4) Namtaa finyaa hoo wa ni nduyɛ teleŋ pilɛ, o tɛɛmbuu isɔɔ le mi Masaa Deeve bii ndu biyɔɔ wɔɔŋndo. O cho vɛlɛ ndupila pɛŋ te tosa mbo simnuŋ namta le. Kɛ Mɛfibosiɛɛ hendu kɔllo o sɔɔŋ palaŋ wa ndu muŋ choo woŋ te. Mbo naŋ kɔl tau le sɔɔŋ kɛndɛŋ wa ndu komallo o yoomoo niŋndoŋ. Mbo chɔm vɛlɛ balika melaa le kɛndɛi Deeve tosal ndu paandu ve. (2 Saam. 9:​6-10) Lelaŋ mɛɛ Deeve siŋgaŋ kɔl mbo bii ndu biyɔɔ wɔɔŋndo, mbo yiyaŋ a sɔɔŋ muŋ okɔɔ. Mɛfibosiɛɛ chɛl mi nyɛ Deeve tosal ndu wo tɛɛmbuu ndu kɔl te nduyɛ, o bii vɛlɛ Chɛhowa tɔɔyaŋ te. Mbo hiau lachi a Deeve tooloo a kɔl ndɔɔ kpou  kanifuule, ndu wa masa Chɛhowa hɛli wo ni. (2 Saam. 16:​1-4; 19:​24-30) Taamasi kɛndɔɔ pila Mɛfibosiɛɛ kɛsi hoo ni. Nyɛ koŋ Chɛhowa chɛl ni ma poonyiaa ndu o Baabuiyo niŋ le naa pɛɛkoo.—Luomaŋ. 15:​4.

20. Vɛɛ buulaŋndo paaliaŋ yɛ waŋnda apum, kɛ tiindaŋ yɛɛ nda nɔ yɛ ma nɔ?

²⁰ Buulaŋndo pila puaapiliaa a ndepiliaa apum buulaŋ ni. Le hei, ma yiyaŋ maa a cho a sɔvɛ le nduyɛ ma yɔŋnuŋ pulaŋ pulaŋ te a wa pɛ waŋnda tɛɛŋ. Mi siɔmbulaŋ la wa nda le fulaa faŋgaa tɛɛŋ. Kɛ a koŋ kpou, ma kuɛ o bɔŋaŋnda naŋ bii o lɔɔ bɛŋgu laŋ, bɔŋaŋnda ibuŋgalaŋ a o bɔŋaŋnda bɛndaŋ. Ma yɔŋ vɛlɛ siɔmbulaŋ le suɛi o wanaa nda sina le wa lo kɛ a koŋ kpou, ma dimul waŋnda yooŋgu kɛndɔɔ. Te o yɔŋ pɛ aa num bɛɛ nɔ bahawɛi waa naa, mɛɛ kɛsiŋ o kɔl maa a cho num pilɛ le. Wanaa bɔɔbɔɔ nɔ bahawɛiyo hoo. Loonuŋ maa Chɛhowa naŋ kɔl tau a kindiŋ ŋ cho le ndu piɛiyo a kɔllo kpou wo. A bahawɛi numndo hoo kpou, a mel lɔ ndu piɛiyo le. Hei pɛŋ chɔm ni maa sala ndɔɔ cho num choo nduyɛ maa o cho num wa kpaayaa kioo le ma hiou lachi a ndu piɛiyo. * (Filipi. 4:​6, 7; 1 Pitɛ 5:​7) Te o yɔŋ pɛ aa a kɛndiaa lepɛŋ ŋ nɔ wo ɔɔ a buulaŋ ŋ cho wo kpou a cho Chɛhowa piɛiyo, mɛɛ nɔ tiindaŋndo maa o hini kɔl a num.

21. Yɛɛ Chɛhowa cho yɛ naa mala miŋ tosa?

²¹ Teŋgeŋ bɛndoo pila cho nyaanɔŋ labɛɛlaa tɛɛŋ a o Pɔɔl soo a ndu okɔɔ wo ni. O teleŋ masindɛ koŋ niŋ, wana pilɛ koni ndoo sɔla fandaa o nyaanɔŋ labɛɛlaa niŋ ni. Kɛ o nyaanɔŋ leKilisiɔŋ naŋ cho wo niŋ, wana o wana biuŋ pɛ haaa o mɛɛlulaŋ, sɔlaa o sɔla yoomu fafɛɛŋndo ni. (Chɔŋ 3:​16) Mɛɛ mi waŋndo ndoo wa vɛlɛ kpeŋkpeleŋ malaŋ o sɔɔŋguu le nyaanɔŋ labɛɛlaa. Te o ve lende le, o yɔŋ bɛɛ mbo sɔɔŋguu, o wa ikala le mbo sɔla fandaa. Kɛ mi che bɛɛ naa bɔɔbɔɔ nɔ kɛndiaa sɔvɛ le, ŋ cho hiouwɔɔ lachi a biuwɔŋndo. (2 Kɔliŋ. 4:​16) Chɛhowa cho naa mala miŋ lo kiltaŋ haaa o mɛɛlulaŋ!