ARTIKLE YA KULONGOKA 18
“Kima kurse tii na nsuka”
“Mu me manisa kukima kurse ya munu tii na nsuka.”—2 TIM. 4:7.
NZIMBU 129 Gardons notre endurance
YINA BETO KE LONGOKA *
1. Yinki beto nyonso zolá sala?
SI NGE ke na maladi to ya kulemba, nge lenda vanda kwandi na nsatu ya kubanda kurse yina lenda talana mpasi na nge? Ve. Kasi, apotre Paul zonzá ti bakristo nyonso ya tsyeleka ke na kimá kurse. (Ebr. 12:1) Beto nyonso, bana ya fioti to bantu ya kukula, ba yina ke na ngolo to ba yina ke ya kulemba, beto zolá lemba ve na kukima tii na nsuka, si beto ke na nsatu ya kuzwa dikabu yina Yehova me bumbila beto.—Mat. 24:13.
2. Samu na yinki Paul vandá ve na boma ya kupesa konseye yina ke na 2 Timote 4:7, 8?
2 Paul vandá ve na boma ya kupesa konseye yayi, samu yandi ‘manisá kukima kurse ya yandi tii na nsuka.’ (Tanga 2 Timote 4:7, 8.) Kasi, wapi yina ke kima ya malu-malu na kurse yina Paul ke na zonzilaka?
NA WAPI KURSE BETO KE NA ZONZILA?
3. Yinki ke kurse yina Paul zonzilá?
3 Na kupesa malongi ya nene, Paul vandá sadila ntangu ya nkaka bifwani ya bima yina vandá na Grece ya ntama. (1 Ko. 9:25-27; 2 Tim. 2:5) Bambala mingi, yandi vandá lakisa ti luzingu ya mukristo ke faso kurse. (1 Ko. 9:24; Gal. 2:2; Flp. 2:16) Muntu ke bandá “kurse” yango ntangu yandi ke pesá nzutu ya yandi na Yehova mpe ke kuzwá bateme. (1 Pi. 3:21) Yandi ke manisa kurse ya yandi, ntangu Yehova ke pesa yandi luzingu ya ntangu nyonso.—Mat. 25:31-34, 46; 2 Tim. 4:8.
4. Yinki beto ke longoka na artikle yayi?
4 Wapi bima yina ke salá muntu yina ke kimá na makulu kurse na distanse ya yinda, mpe yinki lenda sala mukristo yina ke na kimá samu na kuzwa luzingu? Na kati ya bakurse zole yayi, ya ke na bima mingi yina ke faso mosi. Beto zonzila kaka bima tatu. Ya ntete, beto ke na nsatu ya kukima kurse na nzila ya mbote; ya zole, beto zolá tala kaka na mantwala; mpe ya tatu, ata mabaku vanda na nzila, beto lemba ve na kukima.
KIMA KURSE NA NZILA YA MBOTE
Beto nyonso me lunga kukima kurse ya luzingu ya bakristo (Tala baparagrafe 5-7) *
5. Wapi nzila yina beto zolá landa, mpe samu na yinki?
5 Na kuzwa ntalu yina ba me bumbila yandi, na kurse, athlete me bonga kukima kaka na nzila yina ba me sola samu na yandi. Faso mosi mpe, si beto ke na nsatu ya kuzwa luzingu ya ntangu nyonso, beto zola landa kaka nzila yina ba me sola samu na mukristo, nzila ya luzingu. (Bis. 20:24; 1 Pi. 2:21) Kasi, Satan na bisadi ya yandi zola ti beto landa nzila ya nkaka; ba zola ve beto bika “ [kukima] dyaka na bawu.” (1 Pi. 4:4) Ba ke seká nzila yina beto ke na landá, mpe ba ke zonzá ti ni bawu ke na landá nzila ya mbote, yina ke pesá liberte. Kasi beto zaba ti, yina ba ke na zonzá ke luvunu ya nene.—2 Pi. 2:19.
6. Yinki nge lenda longoka na kifwani ya Brian?
6 Muntu yina ke sosá na kulanda ba yina ke na nzila yina yinza ya Satan me lakisa, ke kwiza zaba na mbangu ti, nzila yango ke natá ve na liberte. Kasi, ba ke kumá bangaamba ya bansatu ya bawu mpe ya Satan. (Rom. 6:16) Beto tala kifwani ya Brian. Bibuti ya yandi lakisak’ yandi nzila ya luzingu ya bakristo. Kasi ntangu yandi lutá bamvula 10, yandi salá ntembe ti nzila yango lenda nata yandi na luzingu ya kilengi. Brian solá kukima na nzila yina ke baká bantu yina ke landá malongi ya yinza ya Satan. Yandi me zonza: “Na mwa ntangu fioti, mu kwizá tala ti liberte yina yinza ke pesá ke ve liberte yina mu vandá sosa, samu ya kumisá munu ngaamba ya bima ya yimbi.” Yandi me bwela: “Na manima, mu bandá kunwa dyamba, kusule malafu, mpe mu bandá kubasika na bakento. Bamvula mingi na mantwala, mu kumá fioti-fioti ngaamba ya badrog, na yina lenda nata na lufwa . . . Mu bandá kutekisa drog samu na kulungisa bansatu ya munu.” Kasi na manima, Brian baká desizion ya kulanda misiku ya Yehova. Yandi changeke nzila ya kulanda mpe kuzwá bateme na 2001. Bubu yayi, yandi ke na kilengi ya kukima na nzila ya luzingu ya bakristo. *
7. Faso me zonza Matayi 7:13, 14, banzila yikwa ke na mantwala ya beto?
7 Kuzaba kusola nzila ya kulanda ke kima ya mbote! Satan ke na nsatu ya kukanga beto nzila yina ke “natá na luzingu,” samu beto landa nzila ya nene yina bantu mingi na yinza, ke landaka. Nzila yango ke ve mpasi na kulanda mpe bantu mingi ke na landak’ yawu. Kasi ya ke “natá na lufwa.” (Tanga Matayi 7:13, 14.) Samu beto landa kaka nzila ya luzingu mpe beto balula ve meso na kulanda ba yina ke sadilá ve misiku ya Yehova, beto tula ntima ya beto na Yehova mpe beto kangama na misiku ya yandi.
TALA KAKA NA MANTWALA MPE KUBWA VE
Tala kaka na mantwala, kubwa ve mpe kubwisa ve bampangi (Tala baparagrafe 8-12) *
8. Si muntu yina ke na kimá me kubwa, yinki yandi ke sala?
8 Ba yina ke salá kurse na nzila ya yinda, ke tulá meso kaka na nzila yina ke na mantwala ya bawu, samu ba kubwa ve. Kasi, ata faso yina, ba lenda kubwa samu ba me tutana na mpangi to dibulu na nzila, lenda bwisa bawu. Si ba me kubwa, ba ke telamá dyaka, mpe ba ke kontinye kurse ya bawu. Ba ke tulá ve ntima na kima yina me bwisa bawu, kasi na ntalu yina ba ke kuzwa si ba me manisa kurse ya bawu.
9. Si mpangi to mambu me bwisa beto, yinki beto zolá sala?
9 Na kurse ya beto ya luzingu, beto mpe lenda kubwa bambala mingi, na faso ya beto ya kuzonza mpe na yina beto ke salaka. To mpangi ya beto lenda sala kima yina lenda bwisa beto. Si ya me kumina beto, beto pamuka ve. Beto nyonso ke bantu ya masumu, yina ke na kimá na nzila ya luzingu. Na yawu, bantangu ya nkaka, ya lenda kumina beto na “kututana” na bampangi. Paul zonzá ti bantangu ya nkaka beto mpe ke salá “mambu yina [ke pesá nkele] na bampangi.” (Kol. 3:13) Kutula ve ntima na mambu yina me lwalisa nge, kasi tula meso na ntalu yina nge ke kuzwa na mantwala. Na yawu, si kima me bwisa beto, beto telama dyaka mpe beto kontinye kurse ya beto. Si beto bumba nkele mpe manga na kutelama samu na kusadila Yehova, beto ke kuma ve tii na nsuka, mpe beto ke kuzwa ve ntalu yina ba me bumbila beto. Na kurse, si muntu yina me kubwa me manga kutelama, yandi lenda bwisa ba yina ke na kwizá na manima. Faso mosi mpe, si nge me manga kulemvokila bampangi mpe me bumba nkele, nge lenda bwisa bampangi ya nkaka yina ke na kimá na nzila ya luzingu.
10. Wa’ faso beto lenda kuma faso “ditadi yina lenda bwisa” bampangi?
10 Faso ya nkaka ya kubika kukuma faso “[ditadi] yina lenda bwisa” bampangi, ni kundima mambu yina bampangi ke zonzá, mpe kusosa ve ba sala kaka yina beto me zola. (Rom. 14:13, 19-21; 1 Ko. 8:9, 13) Na mambu yayi, bakristo ke ve faso ba-athlete. Na kurse, muntu nyonso ke sosá kulutila ba-athlete ya nkaka, mpe ke salá ngolo na kuzwa ntalu kaka samu na yandi mosi. Ba-athlete ke kanisá kaka na bima yina ke sadisa bawu na kukuma bantu ya ntete. Na yawu, ba lenda puse bampangi samu ba luta na mantwala. Kasi, beto bakristo, beto ke na kimá ve samu na kusosa kuvanda na mantwala ya bampangi. (Gal. 5:26; 6:4) Kasi, beto ke nwaná na kusadisa bantu mingi na kuzwa ntalu ya luzingu faso beto. Na yawu, beto ke landá konseye ya Paul yayi: “[Beto] sosa ve kaka bambote ya beto mosi, kasi bambote ya bantu ya nkaka mpe.”—Flp. 2:4.
11. Na yinki ba-athlete ke kanisá ntangu nyonso, mpe samu na yinki?
11 Mpe, kutula kaka meso na nzila yina yandi ke na landá, ke sadisa ba-athlete na kukanisa kaka na faso ya kumanisa kurse. Ata ba ke na talá ve na meso kote nzila me suka, na yintu ya bawu, ba ke na kanisá ntangu nyonso na yawu, mpe na ntangu yina ba ke yamba ntalu ya bawu. Kukanisa ntangu nyonso na ntalu ya bawu ke puseke bawu na kunwana samu na kukuma na nsuka.
12. Yinki Yehova ke pesa beto?
12 Na kurse ya bakristo, Yehova ke pesa na ba yina nyonso ke kima tii na nsuka ntalu ya bawu: luzingu ya ntangu nyonso, na nzulu samu na ba ya nkaka, mpe na paradis awa na ntoto, samu na ba ya nkaka. Biblia ke zonzilá kilengi yina beto ke tala, samu beto kanisa ntangu nyonso na faso luzingu ke kuma kitoko. Si beto kanisa ntangu nyonso na luzingu ya kitoko yina Yehova me bumbila beto na mantwala, beto ke bika ata kima mosi lembisa nsatu ya beto ya kukima na nzila ya luzingu.
ATA MABAKU, KULEMBA VE NA KUKIMA
Ata mabaku, kulemba ve na kukima (Tala baparagrafe 13-20) *
13. Na wapi kima beto me lutila ba-athlete?
13 Na Grece bantu yina vandá kimá, zolá kutana na mambu faso, kulemba ya nzutu mpe kikoni. Kasi, bawu nyonso zolá tula ntima kaka na ngolo ya bawu mosi mpe na ba-entrenema ya bawu. Faso bawu, beto mpe ke kuzwá ba-entrenema na faso ya beto ya kukima kurse ya luzingu. Kasi beto me lutila ba-athlete na bima mingi. Beto lenda kuzwa ngolo yina me lutila na Yehova, mpe yandi ke pesá beto yina beto ke na yawu nsatu ntangu nyonso. Si beto tula ntima na Yehova, yandi ke pesa beto formasion mpe ke pesa beto ngolo ya kulutila!—1 Pi. 5:10.
14. Wa’ faso 2 Bakorinto 12:9, 10 ke sadisa beto na kulemba ve na ntangu ya mpasi?
14 Paul mpe kutaná na mabaku mingi. Na zulu ya kufinga, mpe bankwamusu yina vandá katuka na ba ya nkaka, Paul vandá nwana na mpasi yina vanda faso “dinsende na kati ya nzutu.” (2 Ko. 12:7) Kasi na kisika ya kutala bima yina zola lembisa yandi, Paul bakak’ yawu faso rezon ya kutula ntima na Yehova. (Tanga 2 Bakorinto 12:9, 10.) Samu Paul bakila bampasi ya yandi na faso ya mbote, Yehova sadisak’ yandi na kubwa ve.
15. Si beto landa kifwani ya Paul, yinki beto ke sala?
15 Beto mpe, ba lenda finga beto to kukwamisa beto samu na kiminu ya beto. Ntangu ya nkaka, beto ke ve na sante ya mbote to nzutu ke na lembaka. Kasi, si beto landa kifwani ya Paul, beto ke bakila yawu faso barezon yina ke sadisa beto na kutala faso Yehova lenda sadisa beto.
16. Ata sante ya nge ke ve mbote, yinki nge lenda sala?
16 Nge ke ya kukangama na mfulu to na velo ya kupuse? Makulu ya nge me lembá, to meso ke na talá dyaka ve? Si ya ke faso yina, nge lenda sadila kwandi Yehova kintwadi na bantwenya to bampangi yina ke na sante ya mbote? Nge lenda sala yawu! Bantu mingi yina me nuna to ke na dikulu, diboko to kinama ya nkaka ya kubela, ke kaka na kimá na nzila ya luzingu. Ba lenda sala ve kisalu yayi na ngolo ya bawu mosi. Kasi, ba ke kulisá kindiku ya bawu na Yehova ntangu ba ke landá balukutakanu na telefone, to na tele. Mpe ba ke salá predikasion ya bawu ntangu ba ke zonzá na badoktere, mpe bantu yina ke kwizá talá bawu.
17. Wa’ faso Yehova ke tadilá ba yina ke ve na sante ya mbote?
17 Si nge ke dyaka ve na ngolo ya kupesa na Yehova nyonso yina nge me zola, kulemba ve na kukima na nzila ya luzingu, mpe bika kukanisa ti nge ke lenda ve na kukima tii na nsuka. Yehova me zola nge samu na kiminu ya nge, mpe me zimbana ve bamvula nyonso yina nge me kima deja na nzila ya luzingu. Bubu yayi, nge ke na nsatu yandi sadisa nge mpe yandi ke bika ve nge. (Nku. 9:10) Yandi ke na sosa kukuma dyaka pene-pene na nge. Kuwa mambu yina zonzá mpangi mosi ya kento yina ke ve na sante ya mbote: “Samu sante ya munu ke na lutilá kubeba, mu me tala ti mu ke dyaka ve na ngolo mingi ya kuzonzila mambu ya Nzambi na bantu ya nkaka. Kasi, mu me zaba ti mwa bangolo ya fioti yina mu ke sala, ke pesa ntima ya Yehova kilengi, mpe ya ke sala munu mosi mpe kilengi.” Ntangu nge ke dyaka ve na ngolo mpe nge me lemba, kuzimbana ve ti nge ke ve kaka nge mosi. Kanisa na kifwani ya Paul, mpe na mambu yina yandi zonzá: “Na yawu mu ke vandá na nsayi mingi ntangu mu ke vandá ya kulemba, . . . samu ti, ntangu mu ke vandá ya kulemba, ni kuna mu ke vandá ngolo.”—2 Ko. 12:10.
18. Wa’ faso ya mpasi bantu ya nkaka ke na yawu?
18 Bantu mingi yina ke kimá kurse ya luzingu, ke kutaná na bampasi ya faso ya nkaka. Ba ke nwaná na mambu ya mpasi yina bantu ya nkaka ke talá ve. Na kifwani, ba ya nkaka me fuluká na basusi mpe ba ke dyaka ve na nsatu ya luzingu to ba ke belá maladi ya yintu. Samu na yinki ya ke bamaladi yina ke ve faso bamaladi ya nkaka? Samu ti, si muntu ke na diboko ya kubela to ke tambulá na velo ya kupuse, bantu nyonso lenda tala mpasi yina ke na yandi, mpe na mawa nyonso, ba lenda sadisa yandi. Kasi, ba yina ke na maladi ya kati, ya yintu, to ya ntima, ke lakisá ve ti ba ke na belá. Ba ke talá mpasi faso muntu yina ke na dikulu to diboko ya maladi. Kasi, samu ata muntu me zaba ti ba ke na belá, ba lenda lakisa ve bawu luzolo yina ba ke na yawu nsatu.
19. Yinki beto lenda longoka na kifwani ya Mephibosheth?
19 Si ya ke na bima ya nkaka yina nge lenda sala dyaka ve, to bantu ke na ndima ve faso ya nge ya kutadila bamambu, nge lenda kuzwa ngolo si nge kanisa na kifwani ya Mephibosheth. (2 Sa. 4:4) Yandi vandá na dikulu ya maladi, mpe David pesá ve jujema yina vandá ya kulunga na mambu ya yandi. Mephibosheth salá ata kima mosi ya yimbi samu mambu nyonso yayi kumina yandi. Kasi yandi biká ve ti nyonso yayi manisa yandi kilengi ya luzingu. Yandi zimbaná ve mambu ya mbote yina David salá samu na yandi mpe yandi vandá tonda yandi na yawu. (2 Sa. 9:6-10) Mpe ntangu David pesá jujema ya yimbi, yandi kangamá ve kaka na yawu, kasi yandi vandá tala mpe yinki salá ti mambu kuma tii kuna. Yandi kangá ve nkele na mambu yina David sala. Mpe yandi dasukilá ve Yehova. Mephibosheth vandá kanisa kaka na yina yandi zolá sala samu na kusadisa Mfumu yina Yehova solaka. (2 Sa. 16:1-4; 19:24-30) Yehova biká ba sonika disolo ya Mephibosheth na Biblia, samu beto longoka na kifwani ya yandi.—Rom. 15:4.
20. Yinki maladi ya yintu lenda nata beto na kusala, kasi yinki beto zolá zimbana ve?
20 Samu beto ke belá maladi ya yintu, bampangi ya nkaka ke vandá na nkele mpe boma ntangu nyonso, mingi-mingi si ba ke na salá na bampangi ya nkaka. Ya lenda vanda mpasi na bawu na kuvanda kisika yina bantu ke mingi, kasi, ba ke salá ngolo na kuvanda na balukutakanu ya kimvuka to ya nene. Ya ke vandá mpasi na bawu na kuzonza na bantu yina ba me zaba ve. Kasi, ba ke nwaná na kusala yawu na kisalu ya predikasion. Si ya ke faso yayi samu na nge, zaba ti nge ke ve kaka nge mosi. Bantu mingi mpe ke na kutaná na mpasi yina nge ke na yawu. Kuzimbana ve ti, Yehova ke talá kilengi na bangolo nyonso yina nge ke salá. Samu, tii bubu yayi nge me lemba ve, ya me lakisa ti, Yehova ke na sakumuná nge mpe ke na pesá nge ngolo yina me lutila. * (Flp. 4:6, 7; 1 Pi. 5:7) Si nge ke kaka na sadilá Yehova ata bampasi na nzutu, to na ntima, kuzimbana ve ti, Yehova ke sepelá mingi na nge.
21. Na ngolo ya Yehova, yinki beto nyonso ke lenda na kusala?
21 Ya ke kilengi mingi ya kuzaba ti, kurse yina Paul zonzilá ke ve faso mosi na kurse yina ke salá ba-athlete. Na kurse ya makulu yina ba vandá kima na ntangu ya ntama, kaka muntu mosi vandá kuzwa ntalu. Kasi na kurse ya luzingu, muntu nyonso yina ke kima tii na nsuka, ke kuzwa luzingu ya ntangu nyonso. (Yoa. 3:16) Na kurse ya makulu, ba-athlete nyonso zolá vanda na sante ya mbote, samu ba lenda kuzwa ve ntalu yina ba me bumbila bawu. Na kurse ya luzingu bantu mingi ke ve na sante ya mbote, kasi, ba ke ntete na kimaka. (2 Ko. 4:16) Na ngolo ya Yehova, beto nyonso ke lenda na kukima tii na nsuka!
NZIMBU 144 Fixons nos regards sur le prix !
^ par. 5 Bubu yayi, bisadi mingi ya Yehova ke na talá mpasi samu ba me nuna, to ba ke na maladi yina ke na lembisá bawu. Ntangu ya nkaka beto mpe ke vandá ya kulemba. Na yawu, dikanisi ya kukima kurse lenda talana mpasi mpe lenda pesa boma. Na artikle yayi, beto ke tala faso muntu nyonso lenda kima kurse ya luzingu yina apotre Paul zonzilá tii na nsuka, mpe kuzwa bambote yina ya ke nata.
^ par. 6 Tala na artikle “La Bible transforme des vies” ya La Tour de Garde ya 1 Janvier 2013.
^ par. 63 YINA BAFOTO KE NA ZONZILAKA: Vanda na mingi ya kusala na kisalu ya predikasion mpe landa kifwani ya bakristo ya kukula yina ke na kimá kurse ya mbote.
^ par. 65 YINA BAFOTO KE NA ZONZILAKA: Nge lenda bwisa bampangi si nge puse bawu na kunwa malafu mingi to si nge mosi ke na nwá mingi.
^ par. 67 YINA BAFOTO KE NA ZONZILAKA: Si ba ke maladi na lopital, bampangi ke kontinyeke kurse ya bakristo na kuzonzilá mambu ya Nzambi na ba yina ke salá kuna.
