1. Yisinke twa hepa kurugana natuvenye?

KUVHURA o lihameke melirombero lyokuduka lyoudigu, unene po nsene ono diva asi ove kuna kuvera ndi ono roroka ndi? Hawe. Nye mupositoli Paurusa kwa uyungire asi Vakriste navenye wousili kuna kuduka melirombero. (Heb. 12:1) Yi kare asi ose vanona ndi vakondi, ndi twa kara nononkondo ndi hawe, natuvenye twa hepa kulididimikira dogoro kouhura nsene tuna hara kukagwana mfeto ezi ga tu tumbwidira Jehova.—Mat. 24:13.

2. Morwasinke Paurusa ga uyungilire nonkango edi da kara mwa-2 Timoteusa 4:7, 8?

² Paurusa kwa geve epukururo olyo morwa age ga ‘mene kuduka.’ (Resa 2 Timoteusa 4:7, 8.) Nye elirombero musinke ga tembe Paurusa?

3. Elirombero musinke ga tembe paurusa?

³ Paurusa poyiruwo yimwe nga ruganesa eyi ngayi horoka momaudano aga ga kere moGereka zanare yipo a ronge vantu yitwa yomulyo. (1 Kol. 9:25-27; 2 Tim. 2:5) Yikando yoyinzi, age kwa hetakanesere eparu lyoVakriste kelirombero lyokuduka. (1 Kol. 9:24; Fil. 3:14; 2 Tim. 4:7) Muntu kutameka kulihameka melirombero eli apa a ligava kwaJehova nokugwana ekuho. (1 Pet. 3:21) Age kumana elirombero olyo apa Jehova a mu pe mfeto zeparu lyanarunye.—Mat. 25:31-34, 46; 2 Tim. 4:8.

4. Yisinke natu ka zogera mosirongwa esi?

⁴ Ngapi omu elirombero lyokuduka lya lifana neparu lyoSikriste? Elirombero lyokuduka ntani neparu lyoSikriste kwa lifana mononkedi dokulisiga-siga. Tu zogereni ko nonkedi ntatu. Zokuhova, twa hepa kukwama nzira zouhunga; zauvali, twa hepa kudemenena komfeto; ntani zautatu twa hepa  kulididimikira maudigu aga tuna kuligwanekera nago monzira ezi tuna ku duka.

5. Nzira musinke natu kwama ntani morwasinke?

⁵ Muntu nsene ana hara kukagwana mfeto melirombero, age ga hepa kukwama nzira ezi vana tura po ava vana wapaike elirombero olyo. Mokulifana, nsene tuna hara kukagwana mfeto zomweyo gwanarunye, twa hepa kukwama nayinye eyi va hepa kurugana Vakriste. (Yirug. 20:24; 1 Pet. 2:21) Nye Satana nava ava mu kwama vana hara tu kwame nzira zapeke. Awo kuna hara tu ‘lizuke nawo mundiro’ ndi tu duke kumwe nawo. (1 Pet. 4:4) Awo kusensa nzira ezi ava kwama Vakriste ntani awo kutanta asi nzira ezi ava kwama awo ngwa unene ntani awo va kara noumanguruki. Nye ayo kapisi usili.—2 Pet. 2:19.

6. Yisinke ono lirongere ko kweyi ya horokerere Brian?

⁶ Vantu ava ava paruka ngwendi ava wa pukisa uzuni waSatana, konyima kuyadimburura asi nzira ezi va horowora kapi azi twaredesa koumanguruki nye koupika. (Rom. 6:16) Koneka eyi ya horokerere Brian. Vakondi vendi kwa mu korangedere a kwame nzira zoSikriste, nye apa ga ya kere mudinkantu age kwa gazarere asi kapi nga gwana ruhafo nsene a paruka ngwendi Mukriste. Brian yipo ga tokwere kuparuka ngwendi vantu ava ga pukisa Satana. Age kwa tanta asi: “Pomuhowo kapi na yi dimbwilire asi umanguruki ou na here kugwana ngau ninkisa nge komeho ni kare mupika goyininke yoyidona. Konyima, ame kwa tamekere kunwa unene marovhu nokuruganesa yikwaepangwe ntani nokulihameka moruhonda. Konyima zonomvhura dongandi, ame ngani ruganesa yikwaepangwe yononkondo unene ntani ame kwa kere mupika gwayo. . . . Ame kwa tamekere kurandesa yikwaepangwe yipo ni gwane silinga zokuranda ko yimwe.” Nye mwaza siruwo, Brian kwa tokwere kuparuka kuliza nonompango daJehova. Age kwa ya rundwilire eparu lyendi ntani age kwa gwene ekuho mo-2001. Age ngesi ana hafa ntani kuna kukwama nayinye eyi va hepa kurugana Vakriste. *

7. Nonzira musinke mbali va tumbura mwaMateusa 7:13, 14?

⁷ Ayo ya kara nomulyo tu horowore po kukwama nzira zouhunga! Satana kapi ana hara tu kwame nzira zokulikokera ezi azi twara “komwenyo,” nye age ana hara tu kwame nzira zokungwanyunuka ezi ava kwama vantu wovanzi mouzuni. Nzira ozo kwa divikwa ntani ureru kuzikwama. Nye azo kutwaredesa “kokudona” ndi kezonauko. (Resa Mateusa 7:13, 14.) Nsene tuna hara kutwikira kukwama nzira zouhunga  nokunyokera po kutupukisa, twa hepa kuhuguvara Jehova ntani nokumupurakena.

8. Yisinke a rugana muduki nsene ana liganda?

⁸ Muduki ogu a lihameke melirombero, age kunwika eyi yina mu kara komeho yipo a nyokere po kuliganda. Nye poyiruwo yimwe, vakwawo kuvhura va mu gande va hana kuyindindira ndi kuvhura a punduke mekero. Nsene ana li ganda, age kupinduka nokutwikira kuduka. Age kapi a demenene kweyi yina mu ninkisa a ligande nye kudemenena mokukandembura rugodi ntani nokukagwana mfeto.

9. Yisinke natu rugana nsene tuna liganda?

⁹ Melirombero lyetu, kuvhura tu ligande yikando yoyinzi nokulipuka mweyi atu uyunga ndi eyi atu rugana. Vakwetu ava atu duka nawo, kuvhura va rugane mapuko aga naga tu koresa. Kapisi yi tu tetukise yininke oyo. Natuvenye kapi twa sikilira mo ntani kuna kuduka monzira zokulikokera. Yipo nye, vakwetu kuvhura va rugane yuma eyi nayi tu pundukisa. Paurusa kwa uyungire asi poyiruwo yimwe vakwetu kuvhura va tu ‘zonene.’ (Koros. 3:13) Nye mevango lyokudemenena kweyi yina tu pundukisa, twa hepa kudemenena komfeto ezi zina tu kara komeho. Nsene tuna liganda, twa hepa kurugana ko yuma yipo tu pinduke nokutwikira kuduka. Nsene tu handuka nokukara nonkoko nokunyoka kutwikira kukarera Jehova, ose kapi ngatu ka ndembura elirombero eli noku kagwana mfeto. Ntani hena ngayi ninkisa wopeke yi va karere udigu kukarera Jehova noruhafo nsene tu twikira kukara nonkoko nokuhanduka.

10. Ngapi omu natu nyokera po kupundukisa wopeke?

¹⁰ Nkedi zimwe omu natu nyokera po kupundukisa vanavazinyetu kuna kara pokudira kuvasininika va rugane yininke kuliza nomu tuna yi harere mevango lyokuyirugana omu vana yi harere. (Rom. 14:13, 19-21; 1 Kol. 8:9, 13) Eyi yiyo ayi ninkisa elirombero lyokuduka li lisige nelirombero lyoVakriste. Vantu ava ava lihameke melirombero lyokuduka navenye kukondja unene yipo va ka gwane mfeto velike. Vaduki owo kugazadara kuhamena eyi nayi va vatera yipo va gwane mfeto velike. Yipo nye, awo kuvhura va hetekere ko kugusa vakwawo monzira  yipo va kare komeho. Nye melirombero lyoVakriste ose kapi atu rumbasana novapuli vakwetu. (Gar. 5:26; 6:4) Sitambo setu kuna kara sokuvatera vantu wovanzi yipo va ka sike mouzuni woupe nokukagwana mwenyo gwanarunye. Yipo nye, ose kuhetekera ko kutura pasirugana nonkango daPaurusa ogu ga tente asi: “Walye omu lipakere mbili nyamweni nyonelike, nye omu pakere hena novakweneni mbili.”—Fil. 2:4.

11. Kosinke ava demenene vaduki ntani morwasinke?

¹¹ Vaduki kapi tupu ava nomene omu nzira zina kara komeho, nye awo hena kudemenena kokukandembura. Nampili va dire kumona eyi yina kara oku nava ka ndembwira, awo kuligazara nyamwawo omu nava ka ndembura nokugwana mfeto zawo. Apa vaduki ava gazadara mfeto ezi nava ka gwana, ayo kuvavatera va liture mo unene melirombero.

12. Yisinke ga tu tumbwidira Jehova?

¹² Jehova kwa tu tumbwidira asi nsene tu twikira kuduka melirombero lyoVakriste, age nga ka tu pa mfeto zomwenyo gwanarunye yi kare asi ngatu ka parukira meguru ndi moparadisa pevhu. Matjangwa kwa gava mauzera kuhamena mfeto ozo. Yipo nye, nose kuvhura tu gazadare omu eparu ngali ka fana komeho. Nsene tu gazadara kuhamena eyi ga tu tumbwidira Jehova, ayo ngayi tu vatera tu lididimikire maudigu.

13. Yisinke twa kara nayo ngoVakriste, eyi va dira kukara nayo vaduki ava ava lihameke melirombero?

¹³ Vaduki ava ngava lihameke momaudano gomoGereka ngava ligwanekere nomaudigu ngwendi eroroko ntani ngava zuvhu kukora. Nye mokuninka asi va funde maudano ogo, awo ngava liyomberesa ntani ngava litura mo unene. NgoVakriste, nose kugwana edeuro ndi kuliyomberesa omu natu twikira kukarera Jehova. Nye mokulisiga novaduki ava ava lihameke melirombero, ose kuvhura tu gwane nonkondo kwaJehova. Jehova kwa tumbwidira asi nsene tu mu huguvara, age nga tu deura ntani nga tu nkondopeka.—1 Pet. 5:10.

14. Ngapi omu etjangwa lyomo-2 Vakolinte 12:9, 10, ali tu vatere tu lididimikire maudigu?

¹⁴ Paurusa kwa ligwanekerere nomaudigu gomanzi. Age ngava mu hepeke nokumuswaura ntani poyiruwo yimwe kapi ga kere nononkondo. Age hena kwa lididimikilire “nsonga morutu.” (2 Kol. 12:7) Mevango lyokupulisira maudigu ogo ga mu hagekese kukarera Jehova, ayo kwa mu pere mpito yipo a huguvare unene Jehova. (Resa 2 Vakolinte 12:9, 10.) Eyi kwa ninkisire Jehova a mu vatere mwankenye maudigu aga ga ligwanekerere nago.

15. Yisinke ngatu limonena nsene tu honena Paurusa?

¹⁵ Nose kuvhura va tu swaure ntani nokutuhepeka morwa kukarera Jehova. Kuvhura tu dire kukara noukanguki wouwa ndi tu lizuvhe eroroko. Nye nsene tu honena Paurusa, maudigu ogo ngaga tu ninkisa nose tu limonene omu Jehova ana kutuvatera.

16. Yisinke no rugana nampili yi kare asi ove kuvera-vera?

¹⁶ Ove kuna kara mombete ndi kuruganesa sipundi soyirema ndi? Ove kukankama monongoro ndi kapi o mono nawa ndi? Nsene yimo, simpe kuvhura o twikire kukarera Jehova kumwe novadinkantu nava ava dili kuvera-vera. Sinzi sovanavazinyetu wovakurupe nava ava vera-vera kuna kutwikira kukarera Jehova. Awo kapi ayi va tompoka mononkondo davene. Awo kugwana nonkondo kwaJehova pokupurakena komapongo yi kare asi kupitira koterefona ndi pokutarera epongo kotivi. Ntani awo kulihamena mosirugana sokutulisa po varongwa pokuzuvhisira vandokotora, vanesa ntani nekoro lyawo.

17. Ngapi a lizuvhu Jehova kuhamena vanavazinyetu ava va dira kukara noukanguki wouwa?

 ¹⁷ Nsene kapi ono kuvhura kurugana yininke eyi ono hara kuruganena Jehova, wa ha gazara asi kapi ngo vhura kulididimika dogoro kouhura wouzuni. Jehova ga ku hara morwa epuro lyoge ntani kweyi nayinye wa mu ruganena monomvhura da ka pita. Ove wa hepa evatero lyendi ngesi kupitakana pwanare, ntani age kapi nga ku sigilira ndi a ku zumbe. (Epis. 9:10) Nye age nga hedera pepi nove. Koneka eyi ga uyunga munazinyetu gumwe gomukadi ogu a vera-vera. Age kwa tanta asi: “Mokumona asi ame kuvera-vera, ayo kuninkisa nge ni dire kulihameka mo unene mokutantera ko wopeke usili. Nye na yi diva asi eyi ani rugana nampili yi kare yoyinunu ayo kuhafesa Jehova ntani kuhafesa nge sili.” Nsene ove ono dompo mutjima morwa ukaro woge, diworoka asi kapisi nyovelike ono kara. Gazara sihonena saPaurusa ntani nononkango edi ga uyungire asi: “Ame yiyo nye na hafera upirankondo . . . yeeyi apa na kupira nonkondo, makura tani nkondopara.”—2 Kol. 12:10.

18. Ukaro musinke woudigu ava ligwanekere nawo vanavazinyetu vamwe?

¹⁸ Vanavazinyetu vamwe ava vana kukarera Jehova kuna kuligwanekera noukaro umwe woudigu. Awo kuna kuligwanekera noudigu ou ava dili kumona vantu wopeke ndi va vhure kuvakwata egano. Pasihonena, awo nampo kuguva-guva ndi kwa kara nosinka sosinene. Morwasinke ukaro wovanavazinyetu owo wa karera udigu unene? Morwa nsene muntu ana teka kuwoko ndi kuruganesa sipundi sourema, vantu kuvhura va mone udigu ou ana kuligwanekera nawo ntani kuvhura va mu vatere. Nye vanavazinyetu ava va kara noudigu wopamalizuvho ndi ava vere mouruvi kuvhura va moneke ngwendi kapi va kara noudigu. Nye udigu wawo wa lifana nomuntu ogu ga teka kuwoko ndi eguru. Nye mokumona asi wopeke kapi ava vhuru kumona udigu wawo, awo kuvhura va dire kuvavatera.

19. Yisinke natu lirongera ko kwaMefiboseti?

¹⁹ Nsene ove wa kara noudigu ndi kulizuvha asi wopeke kapi ava kukwata egano, kuvhura o gwanene mo uwa mosihonena saMefiboseti. (2 Sam. 4:4) Age kwa kere sirema ntani hompa Ndafita kwa mu pangwire asi ana rugana epuko. Maudigu ogo kapi ga wizire po morwa Mefiboseti kwa rugene yuma yoyidona. Nye ago kapi ga mu ninkisire a handuke. Age kwa kere norupandu koyininke yoyiwa eyi ya mu horokerere. Age kwa pandwire Ndafita keharo eli ga mu likidire. (2 Sam. 9:6-10) Nampili ngomu ga mu pangwire Ndafita asi ana rugana epuko, age kwa hetekerere ko kukwata egano eyi ya horokere. Age kapi ga handukire morwa Ndafita ga rugene epuko. Ntani Mefiboseti  kapi ga pere Jehova usima kweyi ga rugene Ndafita. Mokulisiga, age kwa demenenene kweyi na vhura kurugana yipo a kwatese ko hompa ogu ga horowere Jehova. (2 Sam. 16:1-4; 19:24-30) Jehova kwa tura sihonena sosiwa saMefiboseti moNonkango dendi yipo tu lirongere ko yuma.—Rom. 15:4.

20. Ngapi omu sinka asi kundama vanavazinyetu vamwe, nye ehuguvaro musinke va hepa kukara nalyo?

²⁰ Sinka sosinene kuninkisa vanavazinyetu vamwe va tukuke nsene kuna kuligwanekera nomaukaro aga ava ligwanekere nago vantu wopeke. Nampili ngomu ayi va digopere nampo mokukara mokatji kovantu, awo kutwikira kuwiza komapongo ntani nokoyigongi. Nampili ngomu ayi va digopere kuuyunga novageni, awo kuuyunga novantu mokuzuvhisa. Nsene nove kuna kuligwanekera noukaro ou, diworoka asi kapisi nyovelike ono kara. Sinzi sovanavanyetu nawo kuna kuligwanekera noudigu wokulifana. Diworoka asi Jehova kumuhafesa nayinye eyi omu ruganene nomutjima nagunye. Mokumona asi ove kuna kutwikira kukarera Jehova, eyi kulikida asi age kuna kukutungika ntani kuna kukupa nonkondo edi wa hepa. * (Fil. 4:6, 7; 1 Pet. 5:7) Nsene ove kuna kutwikira kukarera Jehova nampili ngomu o vera-vera ndi kuna kuligwanekera noudigu wapeke, kara nehuguvaro asi ove kuna kuhafesa Jehova.

21. Yisinke ngatu vhura kurugana natuvenye nevatero lyaJehova?

²¹ Ayo kutuhafesa pokudiva asi, elirombero lyovaduki ntani nelirombero eli ga uyungire Paurusa kwa lisiga unene. Melirombero lyovaduki, muntu gumwe tupu yige a gwana mfeto. Nye melirombero lyoVakriste, nkenye ogu nga twikira kulididimikira maudigu nga ka gwana mfeto zomwenyo gwanarunye. (Joh. 3:16) Melirombero lyovaduki, vaduki navenye va hepa kukara noukanguki wouwa nsene vana hara kufunda marumbasano ogo. Mokulisiga, vakareli vaJehova wovanzi kapi va kara noukanguki wouwa, nye simpe kuna kutwikira kukarera Jehova nokulididimikira. (2 Kol. 4:16) Nevatero lyaJehova, natuvenye kuvhura yi tu tompoke kuduka dogoro kouhura!