1. Ino nciinshi soonse ncotweelete kucita?

SA INGA mwasuna kucica mulubilo ndomucishi kabotu ayi nduyumu, bunene ciindi ndyemuli balwashi na ndyemulemete? Kwalo inga tamusumini. Nacibi boobo, mutumwi Paulo wakaamba ayi Beneklistu bancine boonse bali mulubilo. (Ebul. 12:1) Alimwi soonsebo, bacanike, bacinene, bacite nkusu na balemete, tulyeelete kuliyumya kushikila kumamanino na tulisuni kwaamba ayi Yehova akatupe cilambu.​—Mate. 24:13.

2. Kweelana a 2 Timoti 4:7, 8, ino nceebonshi Paulo wakalinga kwaangulukite kwaamba pamakani akucica lubilo lwakubuumi?

² Paulo wakalinga kwaangulukite kwaamba pamakani akucica lubilo lwakubuumi mukwiinga lakwe wakacikonsha “kucica kushikila kumamanino.” (Amubelenge 2 Timoti 4:7, 8, NWT.) Ano ino ndubilo nshi Paulo ndwaakalinga kwaambawo?

3. Ino ndubilo nshi Paulo ndwaakalinga kwaambawo?

³ Cimwi ciindi Paulo wakalinga kwiisha makani ayandika kwiinda mukwaamba pa shisekano shakalinga kucitika mucishi ca Gilisi kale kale. (1 Koli. 9:25-27; 2 Timo. 2:5) Liinji wakalinga kukoshanisha buumi bwa Bwineklistu kulubilo lwakupingana. (1 Koli. 9:24; Gala. 2:2; Fili. 2:16) Muntu alatalika kucica “lubilo” ulu kuswabo ciindi ndyaalyaaba kuli Yehova akubombekwa. (1 Pita 3:21) Alashika kumamanino alubilo ulu na Yehova wamupa cilambu ca buumi bwamuyayaya.​—Mate. 25:31-34, 46; 2 Timo. 4:8.

4. Ino nshiinshi nsheshi twiiye mumutwi uyu?

⁴ Ino kucica lubilo lwakupingana kuli koshenye buyani abuumi bwa Bwineklistu? Kuli mbasu shiinji mbokukoshenye. Amuleke tubandike mbasu shotatwe. Cakutaanguna, tulyeelete kukonkela nshila yeelete; cabili, tulyeelete kubikila maano kumamanino; alimwi catatu, tulyeelete kutolelela kucica nabi ndyetutokwiinda mumapensho.

5. Ino ni nshila nshi njotweelete kukonkela, alimwi ino nceebonshi?

⁵ Kwaamba ayi muntu utoocica mulubilo lwakupingana akapekwe cilambu, alyeelete kukonkela nshila yakabikwa abaabo bakabamba lubilo ulo. Ubu bweenka mbocibete amulubilo lwakubuumi, tulyeelete kukonkela nshila na buumi bwa Bwineklistu kwaamba ayi tukatambule cilambu ca buumi bwamuyayaya. (Milimo 20:24; 1 Pita 2:21) Nacibi boobo, Satana abaabo bamukonkela tabasuni ayi tunokonkela nshila iyi, sombi balisuni ayi ‘tunookonkela mbabo.’ (1 Pita 4:4) Balasuula buumi bwa Bwineklistu mbotukonkela akwaamba ayi inga twaba alwaanguluko na katubakonkela. Ano ubu mbubeshi bwakwaansa.​—2 Pita 2:19.

6. Ino mweeya nshi kuswa kucakubonenaako caba Brian?

⁶ Bantu beshikukonkela bukaalo bwa mucishi cakwe Satana balesa mukucana kwaamba ayi tabacitewo lwaanguluko, sombi bali mubusha bwakwe Satana ashiyanda mibili yabo. (Loma. 6:16) Amuleke tubandike cakubonenaako ca ba Brian. Bashali babo bakalinga kubayuminisha kukonkela buumi bwa Bwineklistu. Ano ndyebakashika myaaka yamuma 15, bakatalika kutoonsha na kukonkela buumi bwa Bwineklistu inga kwabapa kuba alusangalalo. Aboobo bakatalika kucita sheesho shicita baabo bakonkela Satana. Bakaamba ayi: “Nshindakalinga kucishi ayi kusuna kuba alwaanguluko lwa kucita shintu shiyanda moyo kulaakumbika mubusha bwakucita shintu shibiibi. Ndakatalika kusebensesha misamu ikola, kukolwa abuumbi alimwi akucita shintu shimwi shibiibi. Pesule lya myaaka iinji ndakatalika kusebensesha misamu ikola abuumbi akwaalilwa kucileka. . . . Ndakatalika akuulisha misamu yeenka iyi kwaamba ayi noocana maali akuula nshesuni.” Mukuya kwaciindi, ba Brian bakasalawo kukonkela njiisho shakwe Yehova. Bakaalula buumi bwabo akubombekwa mu 2001. Balicite lusangalalo pacecino ciindi mukwiinga balakonkela buumi bwa Bwineklistu. *

7. Kweelana a Mateyo 7:13, 14, ino ni nshila nshi shobilo shiliiko?

⁷ Ncintu ciyandika abuumbi kusala nshila iluleme njotweelete kukonkela. Satana alisuni ayi tucileeke kucica lubilo panshila ishankene “itola kubuumi” akutalika kweenda munshila inene iyo itokwiindaamo bantu baanji mucishi ici. Nshila iyi ilishibikitwe abuumbi alimwi teshi ciyumu kwiindaamo. Sombi “itootola bantu kukunyonyoolwa.” (Amubelenge Mateyo 7:13, 14.) Kwaamba ayi tutolelele kuba panshila ya kubuumi akuleya kuyungwa abaabo batakakonkeli njiisho shakwe Yehova, tulyeelete kushoma Yehova akumunyumfwila.

8. Ino muntu uli mulubilo alacita buyani na walisuntula?

⁸ Abo bali mulubilo lwakupingana balalangilisha kabotu mpobatolyata kwaamba ayi batalisuntuli. Nacibi boobo, muntu uli mulubilo ulu inga wasuntushikwa abamwi mbwatoocicaabo nabi kulyata mukalindi ndyatoocica. Na wawa, alanyamuka akutolelela kucica. Taabikili bunene maano kuceeco capa kwaamba ayi awe, sombi alatolelela kubikila maano kukushika kumamanino akutambula cilambu.

9. Ino nshiinshi nshotweelete kucita na twalisuntula?

⁹ Aswebo sotuli mulubilo lwakubuumi tulalisuntula, mukwiinga cimwi ciindi tulabisha mukwaamba amushintu nshetucita. Alimwi cimwi ciindi abo mbotutoocicaabo mulubilo lwakubuumi inga bacita shimwi sheenga shatukalasha. Tatweelete kukankamana na sha mushobo uyu shacitika. Soonse tatumaninite, alimwi soonse tuli munshila yomwi ishankene iyo itola kubuumi. Aboobo cimwi ciindi inga twalisuntula na kusuntusha bamwi. Paulo alakwe wakalinga kucishi ayi cimwi ciindi inga twapa umwi “kutongooka.” (Kolo. 3:13) Nacibi boobo, tatweelete kunoobikila maano kuceeco capa kwaamba ayi tulisuntule, sombi atubikile maano kucilambu nceshi tukatambule. Na twalisuntula, tulyeelete kunyamuka akutolelela kucica. Na twakalala akucileka kusebensela Yehova, nkokwaamba ayi teshi tukashikeewo kumamanino alubilo alimwi teshi tukatambule cilambu. Alimwi inga twapa kwaamba ayi Beneklistunyineesu abalo baalilwe kucica kabotu.

10. Ino inga twacita buyani kwaamba ayi tuleye kuba “mfumpu” kubamwi?

¹⁰ Cimwi nceenga twaciita kwaamba ayi tuleye kuba “mfumpu” kubashominyineesu, nkwiinda mukubikila maano kushintu sheenga shabotela bamwi kuteshi ku sheenga shabotelabo ndiswe sweenka. (Loma. 14:13, 19-21; 1 Koli. 8:9, 13) Ubu mbotupusene abaabo bacica mulubilo lwakupingana. Balo balapingana alimwi balisuni kutambula cilambu beenkabo. Cinene ncobabikila maano nkucita ceenga capa kwaamba ayi bakome. Aboobo inga bashindika baabo mbobatoocicaabo kwaamba ayi balo babe kunembo. Ano swebo teshi mbotucita, tatubete mulubilo lwakupingana sobwe. (Gala. 5:26; 6:4) Tulisuni kucafwa bantu baanji kutolelela kucica kwaamba ayi tukashikile pomwi kumamanino alubilo lwakubuumi akutambula buumi bwa muyayaya. Aboobo tuleelesha cankusu kukonkela  maswi akaamba Paulo ndyaakaamba ayi ‘mutabikilibo maano kushintu nshomuyanda mwebo nweenka, sombi amubikile maano akushintu shiyanda bamwi.’​—Fili. 2:4, NWT.

11. Ino nciinshi shikucica ncabikila maano, alimwi ino nceebonshi?

¹¹ Abo bali mulubilo lwakupingana tabalangilishibo mpobatolyata, sombi balabikila maano kukushika kumamanino alubilo. Nabi kwaamba ayi tabatoboona mpobatooya mukumanishila, balayeeya lusangalalo ndweshi bakacane na bakashike kumamanino alubilo akutambula cilambu. Kuyeeya pasheeshi lyoonse kulabacafwa kutolelela kucica kushikila kumamanino alubilo lwabo.

12. Ino Yehova watushomesha kutupa nshi na tukacikonshe kucica kushikila kumamanino?

¹² Yehova wakashomesha basebenshi bakwe beshi bakacice kushikila kumamanino alubilo ulu ayi alaakubapa cilambu ca buumi bwamuyayaya kwiculu nabi pacishi capanshi. Baibo ilatulwiita buumi bwamuyayaya mbweshi bukabe, kwaamba ayi cibe cuubu kuyeeya mbweshi cikabote abuumbi kutambula buumi ubo. Kuyeeya bunene pabuumi bwamuyayaya Yehova mbwakatushomesha, kulaakutucafwa kutolelela kuliyumya ndyetuli mulubilo ulu.

13. Ino ncoolwe nshi ncetucite beshikucica mulubilo lwakupingana ncobatacite?

¹³ Nabi kwaamba ayi abo bakalinga kucica mushisekano shaku Gilisi bakacikonsha kukoma mapensho mbuli kulema alimwi akucisa, bakalinga kucinkitebo manungo pankusu nshobakalinga kucite alimwi akuliisha. Bweenka mbuli beshikucica balya, aswebo tulayiishikwa nsheenga twaciita kwaamba ayi tucikoonshe kucica mulubilo ndotubeteemo. Nacibi boobo, tulabeendaawo beshikucica lubilo lwakupingana. Mukwiinga Yehova shinkusu shoonse inga watupa nkusu akutucafwa mushintu shoonse. Aboobo watushomesha ayi alaakutwiisha akutupa nkusu na twacinka manungo muli nguwe!​—1 Pita 5:10.

14. Ino lilembo lya 2 Bene Kolinto 12:9, 10 inga lyatucafwa buyani ndyetutokwiinda mumapensho?

¹⁴ Paulo wakeenda mumapensho aanji. Wakalinga kucobolwa alimwi akupenshekwa kubamwi, cimwi ciindi wakalinga kulinyumfwa kubula nkusu alimwi wakalinga kuliyumya kulipenshi ndyaakalinga kwiita ayi “muumfwa mumubili.” (2 Koli. 12:7) Ano muciindi cakuboolela mwisule ceebo ca mapensho aya, Paulo wakatolelela kucinka manungo muli Yehova. (Amubelenge 2 Bene Kolinto 12:9, 10.) Kucita boobo kwakapa kwaamba ayi Yehova amucaafwe mumapensho oonse ngaakalinga kwiindaamo.

15. Ino nciinshi ceenga cacitika na twakonkela cakubonenaako cakwe Paulo?

¹⁵ Aswebo inga batucobola na kutupensha ceebo ca lushomo lwesu. Mpashi cimwi ciindi inga twapeenga alipenshi lyakuciswa na kulema abuumbi. Ano na twakonkela cakubonenaako cakwe Paulo, aswebo inga twashoma muli Yehova alimwi inga watucafwa.

16. Ino nshiinshi nsheenga mwacikonsha kucita nabi kwaamba ayi mulaciswa ciswa?

¹⁶ Sa muli balwashi abuumbi cakwaamba ayi tamucikoonshi akwiimikana na mpashi muleendelabo pakacinga kabalema? Sa mulaciswa bulwashi bwa myeendo na kutalasha kabotu? Na mbocibete ubu kulindimwe, ino mbuyani kusebensela pomwi abacanike bacite nkusu abuumi bubotu? Ncakutatoonsha kwaamba ayi inga mwakondwa kucita boobo! Kuli bacinene baanji alimwi abaciswa abo batolelela kucica mulubilo lwakubuumi. Inga tabacikoonshi kukumanisha ncito iyi munkusu shabo beene. Aboobo balayuminishikwa kwiinda mukukutika kumabungano a Bwineklistu pafooni na kweebela kwiinda mukusebensesha jw.org. Alimwi balaabanamo lubasu muncito yakushimikila kwiinda mukushimikila kuma dokota, manasi, alimwi abeshikamukowa.

17. Ino Yehova ulababona buyani bacinene alimwi abaciswa ciswa?

¹⁷ Mutalefuki ceebo cakuyeeya ayi inga tamucikoonshi kutolelela mulubilo lwakubuumi  ceebo cakuciswa. Yehova alimusuni ceebo ca lushomo akuliyumya kwanu. Cino nceciindi ncomutoyandika lucafwo lwakwe, aboobo teshi akamulekeleshewo. (Kulu. 9:10) Sombi alaakusena pafwiifwi abuumbi andimwe. Nankashi umwi uciswa ciswa wakaamba ayi: “Mukwiinga mapensho angu akuciswa atofulilakobo, liinji ndaalilwa kuba acoolwe ca kushimikila bamwi. Nacibi boobo ndicishi kwaamba ayi Yehova alakondwa na wabona kweelesha kwangu, alimwi ici cilampa lusangalalo.” Na mwalinyumfwa kulefuka, mutaluubi kwaamba ayi tamubete nweenka. Amuyeeye cakubonenaako cakwe Paulo, akwiibaluka maswi ngakaamba ayi: “Ndanyumfwa kabotu nabi ndyentacite nkusu, . . . mukwiinga muciindi ndyeendefukite, ndyeenjuma.”​—2 Koli. 12:10.

18. Ino ndipenshi nshi liyumu abuumbi bamwi ndyobeendaamo?

¹⁸ Kuli mapensho aamwi ngobacana abo bali mulubilo lwakubuumi. Bamwi baleenda mubukaalo buyumu mbweenga bamwi tabashibiwo na kunyumfwisha. Kucakubonenaako, mpashi balalisukama abuumbi. Ano ino nciinshi cipa kwaamba ayi mapensho eendaamo basebenshi bakwe Yehova aba abe ayumu? Mukwiinga mapensho aya alipusene amapensho mbuli kutyoka lyaansa na kweendela pakacinga kabalema, mapensho muntu uli woonse ngeenga wabona patuba, lyalo akusuna kucafwa. Nacibi boobo, kulisukama abuumbi ngamapensho ngeenga tatushibi kwiinda mukulangilishabo muntu mbwatoboneka. Alimwi ngamapensho anene abuumbi eelenebo alipenshi mbuli kutyoka cipansha ca mubili, sombi baanji balaalilwa kuyuminisha bantu bacite lipenshi lya mushobo uyu, mukwiinga tabacishiwo muntu nshaatokwiindaamo.

19. Ino inga tweeya nshi kuswa kucakubonenaako cakwe Mefibosheti?

¹⁹ Cimwi ciindi kuciswa ciswa na kulemana inga kwamupa kunoolibona anga bantu tabamunyumfwishishi, aboobo cakubonenaako cakwe Mefibosheti inga camuyuminisha. (2 Samwe. 4:4) Wakalinga mulema alimwi paciindi cimwi taakwe koomboloshekwa kabotu a Mwaami Defedi. Alimwi teshi ngowakaliletela mapensho ngaakalinga kwiindaamo. Nacibi boobo, Mefibosheti taakwe kuboolela mwisule na kulefuka, sombi wakatolelela kulumba pashintu shibotu shakalinga kumucitikila. Wakalumba pankumbu shakamutondesha Defedi pakutaanguna. (2 Samwe. 9:6-10) Aboobo Defedi ndyaatakwe kumoombolosha kabotu, Mefibosheti wakataanguna kuyeeya cakapa kwaamba ayi Defedi acite boobo. Taakwe kukalashikwa abuumbi ceebo ca cilubo cakacita Defedi. Alimwi taakwe kupa mulandu Yehova pasheesho shakacita Defedi. Mefibosheti wakabikila maano pashintu nsheenga wacita kwaamba ayi atolelele kutondesha bulemu mwaami wakasalwa a Yehova. (2 Samwe. 16:1-4; 19:24-30) Yehova wakapa kwaamba ayi makani akwe Mefibosheti  alembwe mu Baibo kwaamba ayi aswebo twiiyeeko.​—Loma. 15:4.

20. Ino kulisukama kulapa bamwi kucita buyani, ano ino nshiinshi nshobeelete kwiibaluka?

²⁰ Bamakwesu abenankashi bamwi balaloonda abuumbi, akunyumfwa nsoni kuba pomwi abamwi ceebo cakulisukama abuumbi. Mpashi cimwi ciindi cilabayumina kuba pabantu baanji, nacibi boobo balatolelela kucanika kumabungano ansondo ansondo, kubungana kwalubasu, alimwi akubungana kunene. Alimwi cilabayumina kubandika abantu mbobateshi, sombi balacikonsha kucita boobo ndyebatooshimikila. Na amwebo ishi nshemutokwiindaamo, amushibe ayi tamubete nweenka. Bantu baanji balalinyumfwa bweenka mbuli mbomulinyumfwa. Alimwi mutaluubi kwaamba ayi Yehova alalumba ceebo ca mbomumusebensela camoyo woonse. Kutolelela kwanu kusebensela Yehova kwakubula kuboolela mwisule, ncitondesho cakwaamba ayi wamupa shoolwe alimwi ankusu nshemuyandika. * (Fili. 4:6, 7; 1 Pita 5:7) Na mwatolelela kusebensela Yehova nabi ndyemucite lipenshi lyakuciswa ciswa, kucembela na kulisukama abuumbi, kamwiibaluka lyoonse kwaamba ayi Yehova alikondetwe ambomutoomusebensela.

21. Ino nshiinshi soonse nsheshi tukacikoonshe kukumanisha ceebo ca lucafwo lwakwe Yehova?

²¹ Cabota ncakwaamba ayi lubilo lwakupingana lulipusene alubilo Paulo ndwaakalinga kwaambawo. Mulubilo lwakupingana lwakalinga kubaako muciindi cakale kale, muntu womwibo ngowakalinga kutambula cilambu. Ano mulubilo lwakubuumi, abo boonse beshibakatolelele kucica, balaakutambula cilambu ca buumi bwamuyayaya. (Joni 3:16) Alimwi abo boonse bakalinga kwaabanamo lubasu mulubilo lwakupingana bakalinga kweelete kuba abuumi bubotu, mukwiinga kwakubula buumi bubotu mpashi naakwiinga bakaalilwa kutambula cilambu. Ano lubilo lwakubuumi teshi mbolubete, mukwiinga buunji bwa ndiswe tulicite mapensho apusenepusene sombi tulacikonsha kuliyumya akutolelela kucica. (2 Koli. 4:16) Kwiinda mulucafwo lwakwe Yehova, soonse tulaakucikonsha kucica kushikila kumamanino!