1. Teˇ gʼaˇ le le aˬ htoꞈ ma gʼa te cawˇ ve le?

 Gʼuiˇ enˍ daꞈ ve haˍ jaˇ leh nawˬ kaꞈ naˬ leh awˬ gʼaˇ nuˇ ve htaꞈ shiˍ ve kʼo, nawˬ kʼawꞈ gʼuiˇ enˍ daꞈ tuˬ sheˍ ve laˇ? Maˇ gʼuiˇ enˍ daꞈ taˬ. Yaꞈ hkʼaˇ, Pawˇluꞈ kʼoˆ ve, Hkriꞈ yaˇ teˇ gʼaˇ le le gʼuiˇ enˍ daꞈ chehˇ ve yoˬ. (Heˍbrehˇ 12:1) Yaˬhoˉvaˬ laꞈ shawnˍ peꞈ laˇ ve htaꞈ ngaˬ hui gʼa gaˇ ve kʼo, a shaꞈ maˇ ve leh a shaꞈ i ve chaw gʼuiˇ enˍ daꞈ leh awˬ gʼaˇ nuˇ ve htawˇ, yeunˇ hkanˍ leh awˬ leh hkʼa gaˬ ngaˬ hui gʼa gʼuiˇ ve yoˬ.—Maꞈhtehˍ 24:13.

2. 2 Tiˆmoˉseˍ liꞈ 4:7, 8 hkʼaw kʼoˆ taˍ ve hkʼe, aˬ htoꞈ ma te Pawˇluꞈ awˬ lawn chi ngaˬ hui htaꞈ beˆ maˍ laˇ gʼa ve le?

² Pawˇluꞈ ‘gʼuiˇ daꞈ ve teˇ ceuˬ htaꞈ awˬ leh hkʼa gaˬ gʼuiˇ peuˬ’ ve pa taw, chi beˆ maˍ laˇ gʼa ve yoˬ. (2 Tiˆmoˉseˍ 4:7, 8 gʼaw sheˍ.) Gʼuiˇ enˍ daꞈ ve hkʼaˬ hkʼe ve htaꞈ Pawˇluꞈ kʼoˆ gaˇ ve le?

3. Pawˇluꞈ gʼuiˇ enˍ daꞈ ve hkʼaˬ hkʼe ve htaꞈ kʼoˆ gaˇ ve le?

³ Oˇ htaˇ teˇ co˗e Heˍlaˍsaˆ chaw enˍ daꞈ ve awˬ lawn htaꞈ cuˇ leh Pawˇluꞈ a yeˇ uiˍ ve kʼoˆ maˍ laˇ ve yoˬ. (1 Kawˇrenˍhtuˆ 9:25-27; 2 Tiˆmoˉseˍ 2:5) Hkriꞈ yaˇ ve a shaꞈ teꞈ hkʼaˇ leh gʼuiˇ enˍ daꞈ ve htaꞈ yawˇ laiˉ pawˆ tehˆ daꞈ ve yoˬ. (1 Kawˇrenˍhtuˆ 9:24; Gaˍlaˍtiˆ 2:2; Hpiˇliˇpiˆ 2:16) Chaw yaˇ lehˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ htaˇ, tanˬ ‘gʼuiˇ enˍ daꞈ’ chehˇ ve yoˬ. (1 Peˍtruˆ 3:21) Yawˇ htaꞈ Yaˬhoˉvaˬ co co taiˍ taiˍ ve a shaꞈ laꞈ shawnˍ piˇ htaˇ, awˬ leh hkʼa gaˬ gʼuiˇ gaˬ ve yoˬ.—Maꞈhtehˍ 25:31-34, 46; 2 Tiˆmoˉseˍ 4:8.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Hkriꞈ yaˇ a shaꞈ teꞈ hkʼaˇ leh vuiˇ kuiˬ lo gʼuiˇ enˍ daꞈ ve laiˉ hkʼaˇ shuˍ daꞈ ve yoˬ. 3 hkʼaˇ htaꞈ teˇ geh nyi sheˍ. (1) Ngaˬ hui cawˇ ve yaꞈ kʼaw hkʼoˆ lo gʼa gʼuiˇ ve, (2) Ngaˬ hui awˬ ti lo gaˬ tuˬ gʼa dawˇ teh taˍ ve, (3) Ngaˬ hui yaꞈ kʼaw kʼaˉ lo haˍ ve gʼa hpuˇ ve htawˇ, caˉ leh gʼuiˇ kʼai cawˇ ve yoˬ.

5. Ngaˬ hui hkʼaˬ hkʼe ve yaꞈ kʼaw htaꞈ gʼa chehˇ cawˇ ve le? Aˬ htoꞈ ma te ngaˬ hui chi hkʼe te cawˇ ve le?

⁵ Gʼuiˇ enˍ daꞈ ve chaw laꞈ shawnˍ gʼa tuˬ, yawˇ shu gu taˍ laˇ ve awˬ hkʼaˇ htaꞈ ceh gʼa gʼuiˇ ve yoˬ. Ngaˬ hui co co taiˍ taiˍ ve a shaꞈ laꞈ shawnˍ gʼa gaˇ ve kʼo, Hkriꞈ yaˇ ve yaꞈ kʼaw htaꞈ ngaˬ hui gʼa chehˇ leh Hkriꞈ yaˇ ve a shaꞈ teꞈ hkʼaˇ hkʼa shuˍ shuˍ gʼa te cawˇ ve yoˬ. (Tcuh yaˇ 20:24; 1 Peˍtruˆ 2:21) Saˍtanˍ leh yawˇ hpawˇ chehˇ ve chaw ngaˬ hui awˬ nu ve yaꞈ kʼaw htaꞈ gʼuiˇ tcuh gaˇ ve yoˬ. Ngaˬ hui ve a shaꞈ teꞈ hkʼaˇ yawˇ hui hkʼe te tcuh gaˇ ve yoˬ. (1 Peˍtruˆ 4:4) Chi hkʼoˆ kaꞈ, yawˇ hui Hkriꞈ yaˇ ve a shaꞈ teꞈ hkʼaˇ htaꞈ kʼoˆ guiˇ gʼuiˬ guiˇ leh yawˇ hui ve a shaꞈ teꞈ hkʼaˇ hkʼaˬ hkʼe te kaꞈ hpehꞈ ve pa taw, yawˇ hui ve a ciˉ daꞈ˗aꞈ tehꞈ kʼoˆ ve yoˬ. Yaꞈ hkʼaˇ, yawˇ hui kʼoˆ ve awˬ tehˬ maˇ heˆ.—2 Peˍtruˆ 2:19.

6. Bai˗aˇ ve awˬ lawn nawˬ htaꞈ aˬ htoꞈ ma maˍ laˇ ve le?

⁶ A shu teˇ gʼaˇ Saˍtanˍ ve miˬ guiˬ awˬ liˇ htaꞈ gʼaꞈ te ve chaw hkʼe te ve kʼo, maˇ maw yawˇ gʼuiˇ chehˇ ve yaꞈ kʼaw oˇ ve lehˬ dawˇ taˍ ve hkʼe maˇ heˆ law tehꞈ shiˍ la ve yoˬ. Awˬ tehˬ kʼo, yawˇ awˬ ceˬ hkʼe hpehꞈ tuˬ te piˇ ve yoˬ. (Roˉmaꞈ 6:16) Bai˗aˇ ve awˬ lawn htaꞈ teˇ geh nyi sheˍ. Yawˇ yaˇ ehˉ htaˇ kaꞈ Hkriꞈ yaˇ ve a shaꞈ teꞈ hkʼaˇ hkʼaw chehˇ tuˬ awˬ pa awˬ e coˇ caˇ leh ga piˇ ve yoˬ. Yawˇ yaˇ nehˬ hpehꞈ htaˇ, chi hkʼe leˇ a shaꞈ teꞈ ve yawˇ ha lehˬ kuiˬ cawˬ˗aw laˇ tehꞈ, htawˇ dawˇ nawˬ dawˇ cawˬ la ve yoˬ. Awˬ leh meuˇ htaˇ yawˇ Saˍtanˍ ve miˬ guiˬ awˬ liˇ htaꞈ gʼaꞈ te ve chaw hkʼe te ve yoˬ. Bai˗aˇ kʼoˆ ve, “yawˇ dawˇ taˍ ve hkʼe gʼaꞈ te ve pa taw, awˬ ceˬ hkʼe hpehꞈ la tuˬ tehꞈ, yawˇ maˇ dawˇ jaw.” Yawˇ kʼawꞈ kʼoˆ ve, “naˆ tsuhˇ awˬ yeꞈ caˆ ve, tzuhˬ dawˬ ve, leh pehꞈ ve tzuhˆ ve te ve yoˬ. Oˇ ve hkʼawꞈ nawˉ laiˉ hkʼawꞈ ngaˬ naˆ tsuhˇ awˬ yeꞈ caˆ jaˇ leh naˆ tsuhˇ laiˉ ceuˬ ve awˬ ceˬ hpehꞈ ve yoˬ. Chi aꞈ kehˉ haiˬ jaˇ ve lehˬ hpu gʼa yehˇ tuˬ ngaˬ naˆ tsuhˇ kaꞈ hawˇ ve yoˬ.” Awˬ leh meuˇ htaˇ Bai˗aˇ Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ dawˇ cheˆ ve yoˬ. Bai˗aˇ pa leh cawˇ ve yaꞈ kʼaw htaꞈ kʼawꞈ gʼuiˇ ve yoˬ. 2001 hkʼawꞈ htaˇ yawˇ Baˆtiˆsaˬ haꞈ yuˬ ve yoˬ. Chi teˇ hkui yawˇ Hkriꞈ yaˇ ve yaꞈ kʼaw htaꞈ chehˇ leh ha lehˬ jaˇ. *

7. Maꞈhtehˍ liꞈ 7:13, 14 hkʼaw kʼoˆ taˍ ve hkʼe, ngaˬ hui gʼa leuˆ yuˬ cawˇ ve yaꞈ kʼaw 2 caˆ aˬ htoꞈ ma le?

⁷ Cawˇ ve yaꞈ kʼaw htaꞈ leuˆ yuˬ leh gʼuiˇ tuˬ a yeˇ uiˍ jaˇ. Saˍtanˍ ngaˬ hui htaꞈ “a shaꞈ teꞈ kuiˬ lo loꞈ˗e ve” maˇ kʼoˍ ve yaꞈ kʼaw htaꞈ maˇ gʼuiˇ tcuh gaˇ. Yawˇ ngaˬ hui htaꞈ gʼuiˇ kʼai sha ve kʼoˍ ve yaꞈ kʼaw htaꞈ kʼai tcuh gaˇ leh miˬ guiˬ chi hkʼoˆ lo ve chaw laiˉ gʼaˇ kaꞈ gʼuiˇ chehˇ ve yoˬ. Chi ve lehˬ “luˬ kuiˬ lo kʼai ve” yoˬ. (Maꞈhtehˍ 7:13, 14 gʼaw sheˍ.) Ngaˬ hui caˉ leh cawˇ ve yaꞈ kʼaw htaꞈ gʼuiˇ kʼai leh awˬ nu ve yaˬ kʼaw htaꞈ maˇ gʼa gʼuiˇ kʼai tuˬ, Yaˬhoˉvaˬ htaꞈ gʼaˇ va leh yawˇ ve hkawˇ gʼa na yuˬ cawˇ ve yoˬ.

8. Gʼuiˇ ve chaw pa˗e htaˇ yawˇ hkʼaˬ hkʼe te tuˬ le?

⁸ Vuiˇ kuiˬ lo gʼuiˇ htaˇ gʼuiˇ ve chaw lehˬ maˇ gʼa pa˗e tuˬ yaꞈ kʼaw htaꞈ tiˉ gʼa nyi ve yoˬ. Yaꞈ hkʼaˇ, gʼuiˇ ve chaw laiˉ pawˆ kʼo hkui sheh htiˇ heuˆ daꞈ leh miˬ kʼoˍ htaꞈ naˆ kʼa ve pa taw, pa˗e ve yoˬ. Yaꞈ hkʼaˇ, yawˇ pa˗e ve kʼo, teˇ pawˆ kʼaw tu leh haˆ gʼuiˇ kʼai ve yoˬ. Yawˇ aˬ htoꞈ ma te leh pa˗e ve htaꞈ a yeˇ maˇ yuˬ leh awˬ ti lo gaˬ leh laꞈ shawnˍ htaꞈ gʼa tuˬ a yeˇ yuˬ ve yoˬ.

9. Ngaˬ hui pa˗e ve kʼo, hkʼaˬ hkʼe te cawˇ ve le?

⁹ Ngaˬ hui a shaꞈ gʼa tuˬ gʼuiˇ ve pa taw, laiˉ pawˆ kʼo pa˗e ve yoˬ. Ngaˬ hui tawˇ yaw yaꞈ ve maˇ heˆ leh te yaꞈ ve yoˬ. Chi hkʼoˆ kaꞈ, ngaˬ hui geh gʼuiˇ chehˇ ve awˬ viˉ awˬ nyi ngaˬ hui pa˗e tuˬ maˇ heˆ leh nyi ma naˬ tuˬ te laˇ ve yoˬ. Chi anˇ tuˬ maˇ loˍ. Ngaˬ hui maˇ biˇ ve chaw hpehꞈ leh a shaꞈ gʼa tuˬ maˇ kʼoˍ ve yaꞈ kʼaw htaꞈ teˇ geh gʼuiˇ chehˇ ve yoˬ. Ngaˬ hui maˇ dawˇ maˇ gaˇ ve hkʼaw kʼoˆ yaꞈ la ve yoˬ. Awˬ viˉ awˬ nyi ngaˬ hui beuꞈ tuˬ te laˇ ve maˇ heˆ leh yawˇ htaꞈ nyi ma maˇ sha tuˬ te piˇ la ve yoˬ. Pawˇluꞈ kʼoˆ ve, ngaˬ hui teˇ pawˆ pawˆ shu htaꞈ “venˇ baˆ taˍ daꞈ kuiˬ cawˬ” ve yoˬ. Teˇ pawˆ pawˆ kʼo, shu kaꞈ hkʼa shuˍ te laˇ ve yoˬ. (Kawˇlawˇsehˇ 3:13) Ngaˬ hui pa˗e ve kʼo pa˗e tuˬ te laˇ ve htaꞈ a yeˇ yuˬ ve aꞈ kehˉ, ngaˬ hui gʼuˇ suhˍ lo ve laꞈ shawnˍ gʼa tuˬ htaꞈ a yeˇ yuˬ leh caˉ leh gʼuiˇ kʼai sheˍ. Ngaˬ hui chi hkʼe maˇ te leh beuꞈ chehˇ sheˍ ve kʼo, awˬ ti lo maˇ gaˬ leh laꞈ shawnˍ kaꞈ maˇ gʼa taˬ. Chi hkʼe ceh maˇ heˆ. Ngaˬ hui oˇ kaˬ lo pa˗e ve maˇ tu sheˍ ve kʼo, a shaꞈ gʼa tuˬ maˇ kʼoˍ ve yaꞈ kʼaw htaꞈ gʼuiˇ kʼai tuˬ shu htaꞈ ngaˬ hui tawˍ piˇ chehˇ ve yoˬ.

10. “Awˬ viˉ awˬ nyi hkui htiˇ poˬ paiˍ leh te yaꞈ tuˬ” ngaˬ hui maˇ gʼa te piˇ cawˇ ve aˬ htoꞈ ma le?

¹⁰ “Awˬ viˉ awˬ nyi hkui htiˇ poˬ paiˍ leh te yaꞈ tuˬ” te piˇ la ve teˇ hkʼaˇ lehˬ, yawˇ hui dawˇ cheˆ ve htaꞈ maˇ haꞈ yuˬ ve yoˬ. Ngaˬ hui dawˇ taˍ ve hkʼe te tuˬ nyiˉ piˇ ve aꞈ kehˉ ngaˬ hui ve dawˇ hkʼaˇ ceh tiˉ maˇ yehˇ. (Roˉmaꞈ 14:13, 19-21; 1 Kawˇrenˍhtuˆ 8:9, 13) Ngaˬ hui awˬ tehˬ gʼuiˇ enˍ daꞈ ve chaw htaꞈ maˇ shuˍ. Gʼuiˇ enˍ daꞈ ve chaw lehˬ awˬ nu ve chaw htaꞈ gʼaˇ tuˬ coˇ caˇ ve yoˬ. Yawˇ teˇ gʼaˇ tiˉ laꞈ shawnˍ gʼa tuˬ, yawˇ awˬ pon tiˉ dawˇ nyi leh te gʼa ve hkʼe teˇ ceuˬ le le te ve yoˬ. Yawˇ shu gʼuˇ suhˍ lo gʼuiˇ kʼai gʼa tuˬ, shu htaꞈ beuˆ ve yoˬ. Yaꞈ hkʼaˇ, ngaˬ hui oˇ hkʼe maˇ hpehꞈ. Gʼuiˇ enˍ daꞈ ve maˇ heˆ. (Gaˍlaˍtiˆ 5:26; 6:4) Ngaˬ hui dawˇ teh taˍ ve lehˬ awˬ ti lo gaˬ tuˬ gʼa ga daꞈ leh laꞈ shawnˍ oˇ ve lehˬ  co co taiˍ taiˍ ve a shaꞈ gʼa tuˬ hpehꞈ ve yoˬ. Gʼuiˬ sha ve Awˬ ha hpu Pawˇluꞈ htaꞈ dawˇ pawnˍ piˇ leh beˆ maˍ laˇ ve htaꞈ ngaˬ hui coˇ caˇ leh gʼaꞈ te ve yoˬ. Yawˇ kʼoˆ ve, “a shu yawˇ awˬ to htaꞈ caˉ daꞈ ve awˬ lawn teˇ hpaˍ htaꞈ ceh tiˉ taˇ dawˇ nyi. Yaꞈ hkʼaˇ, shu htaꞈ caˉ daꞈ ve awˬ lawn teˇ hpaˍ htaꞈ htawˇ dawˇ nyi˗o.”—Hpiˇliˇpiˆ 2:4.

11. Gʼuiˇ enˍ daꞈ ve chaw hkʼaˬ kaˬ lo nyi ve le? Aˬ htoꞈ ma te yawˇ chi hkʼe te ve le?

¹¹ Gʼuiˇ ve chaw gʼuˇ suhˍ lo nyi ve awˬ hkʼoˆ kaꞈ, yawˇ awˬ ti lo gaˬ tuˬ htaꞈ kaꞈ gʼa nyi ve yoˬ. Oˇ ve teˇ yanˇ yawˇ awˬ ti lo nyi maˇ mawˬ ve htawˇ, yawˇ awˬ to awˬ ti lo gaˬ leh laꞈ shawnˍ gʼa ve htaꞈ kaꞈ dawˇ mawˬ ve yoˬ. Chi hkʼe te ve lehˬ yawˇ awˬ gʼaˇ gʼa leh caˉ leh kʼawꞈ gʼuiˇ gaˇ tuˬ te piˇ ve yoˬ.

12. Yaˬhoˉvaˬ ngaˬ hui htaꞈ aˬ htoꞈ ma peꞈ laˇ tuˬ le?

¹² Ngaˬ hui gʼuiˇ ve awˬ ti lo gaˬ ve kʼo, mvuhˇ naw ma hkʼoˆ lo maˇ heˆ leh Paˍraˍdiˇsuˆ hkʼaw co co taiˍ taiˍ ve a shaꞈ laꞈ shawnˍ gʼa tuˬ yoˬ tehꞈ Yaˬhoˉvaˬ ka tiꞈ te laˇ ve yoˬ. Daꞈ jaˇ ve a shaꞈ htaꞈ gʼa tuˬ Liꞈ hpu ngaˬ hui htaꞈ ga laˇ ve yoˬ. Awˬ gʼuˇ suhˍ hpawˇ Yaˬhoˉvaˬ ka tiꞈ te taˍ laˇ ve daꞈ jaˇ ve laꞈ shawnˍ htaꞈ ngaˬ hui dawˇ nyi htaˇ, ngaˬ hui yeunˇ hkanˍ leh gʼuiˇ ve hkui htiˇ poˬ tuˬ teˇ ceuˬ kaꞈ maˇ te laˇ tcuh.

13. Ngaˬ hui gʼuiˇ enˍ daꞈ ve chaw aꞈ kehˉ hkʼaˬ hkʼe te daꞈ ve le?

¹³ Oˇ htaˇ teˇ co˗e Heˍlaˍsaˆ chaw gʼuiˇ enˍ daꞈ htaˇ heuˬ ve, naˬ ve, haˍ ve laiˉ ceuˬ gʼa hpuˇ ve yoˬ. Awˉ lawˉ htaˇ hkʼa dehꞈ te jawˬ ve kʼo, yawˇ awˬ gʼaˇ hehnˇ tuˬ yoˬ. Chi ve ceh yawˇ gʼaˇ va gʼa ve yoˬ. Ngaˬ hui kaꞈ hkʼaˬ hkʼe gʼuiˇ tuˬ gʼa te jaw ve yoˬ. Yaꞈ hkʼaˇ, ngaˬ hui yawˇ hui aꞈ kehˉ daꞈ ve yoˬ. Ngaˬ hui awˬ gʼaˇ awˬ shaˉ gʼa kuiˬ lehˬ, peuˬ kuiˬ leh kuiˬ maˇ cawˬ. Ngaˬ hui Yaˬhoˉvaˬ htaꞈ gʼaˇ va ve kʼo yawˇ ngaˬ hui htaꞈ maˍ laˇ ve ceh maˇ heˆ awˬ gʼaˇ hehnˇ tuˬ kaꞈ te laˇ gʼa ve yoˬ!—1 Peˍtruˆ 5:10.

14. 2 Kawˇrenˍhtuˆ liꞈ 12:9, 10 hkʼaw ngaˬ hui haˍ ve leh shoꞈ shaꞈ ve htaꞈ tawˍ daꞈ gʼaˇ tuˬ hkʼaˬ hkʼe ga laˇ ve le?

¹⁴ Pawˇluꞈ haˍ ve leh shoꞈ shaꞈ ve laiˉ ceuˬ gʼa hpuˇ ve yoˬ. Yawˇ nyi cha ve maˇ heˆ leh fawˉ mehˍ piˇ ve kaꞈ gʼa hpuˇ ve yoˬ. Chi hkʼoˆ kaꞈ, laiˉ pawˆ kʼo yawˇ awˬ gʼaˇ nuˇ leh “aˉ chuˇ teˇ maˬ tcuhˍ laˇ ve” htaꞈ gʼa tawˍ daꞈ ve yoˬ. (2 Kawˇrenˍhtuˆ 12:7) Yaꞈ hkʼaˇ, yawˇ te tcuhˉ taˍ ve yoˬ. Chi lehˬ yawˇ Yaˬhoˉvaˬ htaꞈ gʼaˇ va tuˬ te piˇ ve yoˬ. (2 Kawˇrenˍhtuˆ 12:9, 10 gʼaw sheˍ.) Pawˇluꞈ chi hkʼe dawˇ ve pa taw, shoꞈ shaꞈ ve leh haˍ ve aˬ htoꞈ ma gʼa hpuˇ ve htawˇ, Yaˬhoˉvaˬ yawˇ htaꞈ hkʼaˬ htaˆ kaꞈ ga piˇ ve yoˬ.

15. Ngaˬ hui Pawˇluꞈ htaꞈ henˇ yuˬ ve kʼo, aˬ htoꞈ ma htaꞈ gʼa tuˬ le?

¹⁵ Ngaˬ hui yonˍ ve htaꞈ pa taw, nyi cha ve, fawˉ mehˍ ve kaꞈ gʼa hpuˇ ve yoˬ. Ngaˬ hui maˇ chehˇ sha ve maˇ heˆ leh awˬ gʼaˇ nuˇ ve yoˬ. Yaꞈ hkʼaˇ, ngaˬ hui Pawˇluꞈ htaꞈ henˇ yuˬ ve kʼo, ngaˬ hui haˍ ve, shoꞈ shaꞈ ve gʼa hpuˇ ve teˇ pawˆ le le Yaˬhoˉvaˬ ga laˇ leh ha kʼaˉ laˇ ve htaꞈ gʼa ve yoˬ.

16. Nawˬ maˇ chehˇ sha ve htawˇ, aˬ htoꞈ ma te gʼa sheˍ ve le?

¹⁶ Nawˬ naˬ leh mui kuiˬ caꞈ tuˬ hkʼoˆ mui taˍ ve, ku˗iˍ hkʼoˆ zuhꞈ˗aꞈ ve chaw hpehꞈ˗aw laˇ? Nawˬ mehˆ maˇ mawˬ ve, hkui tcuhˉ kʼu awˬ gʼaˇ maˇ cawˬ ve chaw hpehꞈ˗aw laˇ? A shaꞈ i ve chaw leh maˇ chehˇ sha ve chaw geh, a shaꞈ teꞈ ve yaꞈ kʼaw htaꞈ teˇ geh gʼuiˇ kʼai tuˬ nawˬ dawˇ˗aw laˇ? Dawˇ ve yoˬ. Ngaˬ hui ve awˬ viˉ awˬ nyi laiˉ gʼaˇ a shaꞈ maˇ leh maˇ chehˇ sha ve htawˇ, co co taiˍ taiˍ ve a shaꞈ gʼa tuˬ yaꞈ kʼaw htaꞈ gʼuiˇ kʼai ve yoˬ. A shu yawˇ ve awˬ gʼaˇ htaꞈ gʼaˇ va ve kʼo, chi hkʼe te maˇ gʼa taˬ. Yawˇ hui Yaˬhoˉvaˬ geh awˬ gʼaˇ gʼa tuˬ hpawnˬ daꞈ chehˇ ve htaꞈ tawˇ yaw tuˬ awˬ hkʼeun hkʼaw na ve, maˇ heˆ leh hpawnˬ daꞈ chehˇ ve VDO hkʼaw nyi ve yoˬ. Chi hkʼoˆ kaꞈ, yawˇ hui shu Yeˍsuˆ ve awˬ laꞈ gʼawˇ hpehꞈ la tuˬ saˍ laꞈ gʼonˍ leh ga piˇ ve chaw, awˬ viˉ awˬ nyi htaꞈ hto maˍ piˇ ve yoˬ.

17. Naˬ ve chaw htaꞈ Yaˬhoˉvaˬ hkʼaˬ hkʼe dawˇ ve le?

 ¹⁷ Yaˬhoˉvaˬ ve kanˉ nawˬ te gaˇ ve hkʼe hkʼa dehꞈ te maˇ gʼa ve tehꞈ dawˇ ve kʼo, a shaꞈ teꞈ ve yaꞈ kʼaw htaꞈ gʼuiˇ kʼai maˇ gʼa˗oˬ tehꞈ taˇ dawˇ. Nawˬ yonˍ ve leh yeunˇ hkanˍ ve Yaˬhoˉvaˬ ve kanˉ laiˉ hkʼawꞈ te laˬ˗oˬ ve pa taw, yawˇ nawˬ htaꞈ haꞈ ve yoˬ. Ponˬ laˬ htaˇ aꞈ kehˉ chi teˇ hkui Yaˬhoˉvaˬ nawˬ htaꞈ ga laˇ tcuh ve kʼo, yawˇ nawˬ htaꞈ maˇ chiˇ baˬ. (Chiˇ mvuh ve 9:10) Yawˇ nawˬ geh meuˆ daꞈ tuˬ yoˬ. Awˬ viˉ awˬ nyi yaˇ miˇ teˇ gʼaˇ maˇ chehˇ sha ve kʼoˆ ve, “ngaˬ gʼaˇ hteꞈ kʼawꞈ naˬ ve pa taw, hkʼa dehꞈ hto toˇ maˇ gʼa˗o. Ngaˬ Yaˬhoˉvaˬ ve kanˉ te gʼa i jaˇ ve htawˇ, yawˇ ha lehˬ tuˬ te piˇ ve tehꞈ ngaˬ shiˍ leh chi ngaˬ ha lehˬ jaˇ tuˬ te laˇ ve yoˬ.” Nawˬ naˬ jaˇ htaˇ, nawˬ teˇ gʼaˇ tiˉ chehˇ ve maˇ heˆ tehꞈ tawnˇ taˍ sheˍ. Yaˬhoˉvaˬ hkʼaˬ htaˆ kaꞈ nawˬ geh chehˇ ve yoˬ. Nawˬ Pawˇluꞈ ve awˬ lawn htaꞈ dawˇ nyi sheˍ. Yawˇ kʼoˆ ve, ngaˬ awˬ gʼaˇ nuˇ htaˇ, “ngaˬ ha lehˬ ha kʼa hkanˍ ve yoˬ. Awˬ lawn kʼo, ngaˬ awˬ gʼaˇ nuˇ ve teˇ yanˇ ngaˬ awˬ gʼaˇ uiˍ ve yoˬ.”—2 Kawˇrenˍhtuˆ 12:10.

18. Awˬ viˉ awˬ nyi teˇ hpaˍ hpaˍ shoꞈ shaꞈ ve leh haˍ ve aˬ htoꞈ ma gʼa hpuˇ ve le?

¹⁸ Awˬ viˉ awˬ nyi teˇ hpaˍ hpaˍ a shaꞈ teꞈ ve yaꞈ kʼaw htaꞈ gʼuiˇ htaˇ, haˍ ve laiˉ ceuˬ gʼa hpuˇ ve yoˬ. Laiˉ gʼaˇ shu maˇ mawˬ ve maˇ heˆ leh maˇ na gʼa ve shoꞈ shaꞈ ve gʼa hpuˇ ve yoˬ. Ngaˬ hui haꞈ ve awˬ viˉ awˬ nyi laiˉ gʼaˇ Yaˬhoˉvaˬ ve kanˉ te chehˇ ve chaw, dawˇ maˇ ve a naˍ maˇ heˆ leh kawˆ puiˉ ve a naˍ hpehꞈ ve yoˬ. Aˬ htoꞈ ma te chi shoꞈ shaꞈ jaˇ ve le? Ngaˬ hui laꞈ sheh hteh ve maˇ heˆ leh mui kuiˬ caꞈ tuˬ hkʼoˆ mui ve kʼo, ngaˬ hui shoꞈ shaꞈ ve aˬ htoꞈ ma gʼa hpuˇ ve shu mawˬ leh ga laˇ gʼa ve yoˬ. Yaꞈ hkʼaˇ, awˬ viˉ awˬ nyi lehˬ nyi ma shoꞈ shaꞈ ve cawˬ ve htawˇ, nyi˗a kʼo teꞈ chiˉ maˇ cawˬ ve htaꞈ shuˍ ve yoˬ. Awˬ tehˬ kʼo, yawˇ dawˇ maˇ ve a naˍ leh kawˆ puiˉ ve a naˍ cawˬ ve lehˬ hkui sheh laꞈ sheh hteh ve chaw htaꞈ shuˍ ve yoˬ. Shu maˇ shiˍ maˇ mawˬ gʼa ve pa taw yawˇ hui htaꞈ ga piˇ maˇ gʼa.

19. Meˍfiˆboˍshehˆ ve awˬ lawn ngaˬ hui htaꞈ hkʼaˬ hkʼe maˍ laˇ gʼa ve le?

¹⁹ Nawˬ shoꞈ shaꞈ ve, haˍ ve gʼa hpuˇ leh Yaˬhoˉvaˬ ve kanˉ te gaˇ ve hkʼe te maˇ gʼa tehꞈ dawˇ leh, shu nawˬ htaꞈ maˇ na gʼa laˇ ve kʼo, Meˍfiˆboˍshehˆ ve awˬ lawn nawˬ awˬ gʼaˇ gʼa tuˬ yoˬ. (2 Saˍmo˗eˍlaˆ 4:4) Meˍfiˆboˍshehˆ lehˬ hkui kʼawꞈ paˍ hpehꞈ ve yoˬ. Yawˇ maˇ gʼa te yaꞈ ve htawˇ, Daˍviˆ yawˇ htaꞈ maˇ daꞈ ve hpawˇ dawˇ yaꞈ leh maˇ hteˇ maˇ cawˇ te piˇ ve yoˬ. Meˍfiˆboˍshehˆ Daˍviˆ htaꞈ maˇ daꞈ ve hpawˇ nyi leh beuꞈ jaˇ cawˇ ve htawˇ, yawˇ daꞈ ve hpawˇ nyi leh a shaꞈ teꞈ kuiˬ hkʼaw daꞈ ve awˬ ceuˬ htaꞈ awˬ hpfuhˇ shiˍ ve yoˬ. Daˍviˆ yawˇ htaꞈ daꞈ ve te laˇ jaw ve awˬ bon uiˍ jaˇ kʼoˆ piˇ ve yoˬ. (2 Saˍmo˗eˍlaˆ 9:6-10) Daˍviˆ Meˍfiˆboˍshehˆ htaꞈ maˇ daꞈ ve hpawˇ dawˇ leh maˇ hteˇ maˇ cawˇ ve te piˇ ve htawˇ, Meˍfiˆboˍshehˆ na gʼa ve yoˬ. Daˍviˆ yawˇ htaꞈ te piˇ ve awˬ ceuˬ maˇ cawˇ ve htawˇ yawˇ maˇ beuꞈ leh Yaˬhoˉvaˬ htaꞈ  venˇ baˆ maˇ taˍ. Yaˬhoˉvaˬ leuˆ teh taˍ ve jawˇ mawˇ Daˍviˆ htaꞈ yawˇ aˬ htoꞈ ma ga piˇ gʼa tuˬ htaꞈ a yeˇ yuˬ ve yoˬ. (2 Saˍmo˗eˍlaˆ 16:1-4; 19:24-30) Ngaˬ hui awˬ pon awˬ bon cawˬ tuˬ Yaˬhoˉvaˬ Meˍfiˆboˍshehˆ ve daꞈ ve awˬ lawn Liꞈ hpu hkʼaw bvuhꞈ tcuh taˍ ve yoˬ.—Roˉmaꞈ 15:4.

20. Dawˇ haˍ dawˇ hkiˉ ve, chaw teˇ hpaˍ hpaˍ htaꞈ heuˆ la kuiˬ hkʼaˬ hkʼe cawˬ ve le? Yaꞈ hkʼaˇ, yawˇ hui aˬ htoꞈ ma htaꞈ yonˍ gʼa sheˍ ve le?

²⁰ Awˬ viˉ awˬ nyi teˇ hpaˍ hpaˍ dawˇ haˍ dawˇ hkiˉ ve a naˍ cawˬ ve yoˬ. Yawˇ hui a shaꞈ teꞈ kuiˬ hkʼaw dawˇ haˍ dawˇ hkiˉ jaˇ leh hkʼa dehꞈ maˇ yonˍ gʼa ve yoˬ. Chaw maˇ jaˇ kuiˬ lo chehˇ htaˇ yawˇ hui kawˆ leh dawˇ haˍ ve yoˬ. Yaꞈ hkʼaˇ, yawˇ hui Hkriꞈ yaˇ awˬ moˍ hkʼaw hpawnˬ daꞈ ve, leh hpawnˬ daꞈ lonˉ teˇ nyi, leh hpawnˬ daꞈ lonˉ shehˆ nyi kaꞈ kʼai ve yoˬ. Maˇ mawˬ jaw ve chaw htaꞈ tawˇ yaw daꞈ tuˬ yawˇ hui awˬ pon haˍ jaˇ ve htawˇ, yawˇ hui hto toˇ kʼai sheˍ. Nawˬ chi hkʼe hpehꞈ ve kʼo, nawˬ teˇ gʼaˇ ceh tiˉ hpehꞈ ve maˇ heˆ. Nawˬ hkʼe leˇ hpehꞈ ve awˬ viˉ awˬ nyi laiˉ gʼaˇ kaꞈ cawˬ ve yoˬ. Nawˬ Yaˬhoˉvaˬ awˬ pon a shaꞈ teꞈ ve htaꞈ yawˇ nyi hkʼaˇ suh jaˇ tehꞈ tawnˇ taˍ sheˍ. Nawˬ te tcuhˉ taˍ ve leh Yaˬhoˉvaˬ nawˬ htaꞈ awˬ bon naꞈ laˇ ve leh awˬ gʼaˇ peꞈ laˇ ve tehꞈ hpeuꞈ maw piˇ ve yoˬ. * (Hpiˇliˇpiˆ 4:6, 7; 1 Peˍtruˆ 5:7) Nawˬ maˇ chehˇ sha ve maˇ heˆ leh nyi ma shoꞈ shaꞈ ve htawˇ Yaˬhoˉvaˬ ve kanˉ caˉ leh te ve kʼo, nawˬ Yaˬhoˉvaˬ nyi hkʼaˇ suh tuˬ te piˇ ve tehꞈ tawnˇ taˍ sheˍ.

21. Yaˬhoˉvaˬ ga laˇ ve pa taw, ngaˬ hui teˇ gʼaˇ le le aˬ htoꞈ ma te gʼa ve le?

²¹ Gʼuiˇ ve leh co ha hpawˇ gʼuiˇ ve Pawˇluꞈ kʼoˆ ve maˇ shuˍ daꞈ ve pa taw, ngaˬ hui ha lehˬ jaˇ. Gʼuiˇ enˍ daꞈ ve chaw awˬ ti lo gaˬ ve ceh tiˉ laꞈ shawnˍ gʼa ve yoˬ. Yaꞈ hkʼaˇ, Hkriꞈ yaˇ ve yaꞈ kʼaw htaꞈ ka tiꞈ yeˬ leh yeunˇ hkanˍ ve hkʼaw gʼuiˇ ve kʼo, co co taiˍ taiˍ ve a shaꞈ laꞈ shawnˍ gʼa tuˬ yoˬ. (Yoˇhanˬ 3:16) Gʼuiˇ enˍ daꞈ ve chaw lehˬ awˬ gʼaˇ gʼa caw leh awˬ gʼaˇ gʼa daꞈ ve yoˬ. Chi hkʼe maˇ heˆ kʼo, yawˇ gʼaˇ tuˬ awˬ hkʼaˇ maˇ cawˬ. Yaꞈ hkʼaˇ, a shaꞈ teꞈ kuiˬ lo gʼuiˇ ve yaꞈ kʼaw leh ngaˬ hui laiˉ gʼaˇ maˇ chehˇ sha ve htawˇ caˉ leh gʼuiˇ ve yoˬ. (2 Kawˇrenˍhtuˆ 4:16) Ngaˬ hui awˬ ti lo gʼuiˇ gaˬ tuˬ Yaˬhoˉvaˬ gʼa ga laˇ tcuh ve yoˬ!