1. Chuma muka twatela kulinga tuvosena?

KUTALA munahase kwazana mukulaha chize munejiva ngwenu chachikalu, chikumanyi nge muli nakuviza chipwe nge munazeye tahi? Pamo kamweshi kusaka kwazana mukulaha kanako. Oloze kaposetolo Paulu ambile ngwenyi, vaka-Kulishitu vamuchano vosena vali nakulaha. (Hepe. 12:1) Kaha tuvosena, navanyike navakulwane, navaze vanazeye navaze vachili nangolo, twatela kulaha nalukakachila palanga nakusongo numba Yehova akatuhane fweto atushika.—Mateu 24:13.

2. Kweseka naWaChimoteu 2, 4:7, 8, mwomwo ika Paulu ahanjikilile nakukasunuka?

² Paulu ahanjikile nakukasunuka mwomwo alahile kanawa “palanga nakusongo.” (Tangenu WaChimoteu 2, 4:7, 8.) Uno kulaha muka avulukile Paulu?

3. Uno kulaha muka avulukile Paulu?

³ Shimbu jimwe Paulu azachishilenga vyakutalilaho vyavaka-kuhema vamuHelase mangana anangule vishina vyavilemu. (Koli. 1, 9:25-27; Chimo. 2, 2:5) Ahanjikilenga chikuma hali vaka-kulaha hakulumbununa omwo chatela kupwa chiyoyelo chavaka-Kulishitu. (Koli. 1, 9:24; Ngale. 2:2; Fwili. 2:16) Mutu eji kuputukanga “kulaha” omu vene eji kulihananga kuli Yehova nakumumbapachisa. (Petu. 1, 3:21) Kaha eji kuhetanga kusongo omu Yehova eji kumuhananga kuyoya chahaya myaka yosena.—Mateu 25:31-34, 46; Chimo. 2, 4:8.

4. Vyuma muka natushimutwila muchihande chino?

⁴ Uno kulaha tunda yayisuku chalifwana ngachilihi nakuyoya mujila yize yatela vaka-Kulishitu? Chalifwana mujijila jajivulu. Tushimutwilenu havyuma vitatu. Chatete, twatela kulaha mujila yize vanatulweze kulahila. Chamuchivali, twatela kufwila kuheta  kusongo. Kaha chamuchitatu, twatela kufwila kumika muukalu natumona mujila.

5. Jila muka twatela kukavangiza, kaha mwomwo ika?

⁵ Hakusaka vaka-kulaha vatambule fweto, vatela kulahila mujila yize vanavalweze vaka-kutwaminyina kuhema kana. Chochimwe nawa, hakusaka tukatambule fweto yakuyoya chahaya myaka yosena, twatela kuyoya mujila yize yatela vaka-Kulishitu. (Vili. 20:24; Petu. 1, 2:21) Chipwe ngocho, Satana navaze veji kumukundwizanga vafwila kutuhungumwisa mangana ‘tulahile navo hamwe.’ (Petu. 1, 4:4) Veji kwambanga ngwavo jila tweji kutambukangamo yapwa yayipi, kaha vasaka tukavangize jila yize veji kuyanga vakiko mwomwo ngwavo yapwa yakulihehwa. Oloze awa himakuli.—Petu. 2, 2:19.

6. Vyuma muka munalinangula kuli Brian?

⁶ Vosena vaze veji kusakulanga kulahila hamwe navaze veji kukundwizanga Satana veji kuliveyanga mwomwo veji kutachikizanga jino ngwavo, jila vasakwile kayatwala kukulihehwako oloze kuundungo. (Loma 6:16) Tutalenu hachakutalilaho chaBrian. Visemi jenyi vamukolezezele ayoyenga mujila yize yatela vaka-Kulishitu. Oloze omu ahetele haukweze, amwene ngwenyi kuyoya mujila kana kacheshi kumulingisa apwenga wakuwahililako. Ngocho ajinyine kuyoya ngana muze vayoya vatu vaze veji kukavangizanga jishimbi jaSatana. Ambile ngwenyi: “Kuyoya mujila yize ngwamwene ngwami nayingulingisa kupwa wakulihehwa changuhakile jino muukalu. Mukuhita chalwola, ngwaputukile kunwa mauundu akupendesa, nakunwa chikuma wala nakuyoya chiyoyelo chachipi. Kahomu mwahichile myaka yayivulu, ngwanwinenga maundu akupendesa amapi chikuma, ngocho ngwapwile muundungo wamaundu kana. . . . Kaha ngwaputukile kulanjisa maundu kana mangana nguwaneko jimbongo jakulikafwa najo.” Kutwala muze, Brian ajinyine jino kukavangiza jindongi jaYehova. Alumukile, kaha vamumbapachishile mu 2001. Oholyapwa apwa wakuwahilila chikuma mwomwo eji kuyoyanga mujila yize yatela vaka-Kulishitu. *

7. Kweseka naMateu 7:13, 14, jijila muka jivali jatwamako?

⁷ Shikaho chapwa chachilemu chikuma kutambuka mujila yakwoloka. Satana asaka tuvosena tulitwamine kulaha ‘mujila yakupalakanya’ mangana tulahile mujila yakuhweka muze vali nakutambuka vatu vavavulu muno mukaye. Numba tuhu jila kana kayapwa yakuswamanako, kaha nawa chapwa chachashi kutambukamo, oloze yeji ‘kutwalanga kukunonga.’ (Tangenu Mateu 7:13, 14.) Hakusaka tutwaleho lika kutambuka mujila yakwoloka  nakuhona kuseuka, twatela kufwelela Yehova nakumwivwilila.

8. Vyuma muka eji kulinganga muka-kulaha nge nalimbuka?

⁸ Vatu vaze veji kulahanga tunda yayisuku vatela kushishika meso avo kulutwe mangana vahone kuhukana. Chipwe ngocho, vanahase kuvashinjika kuli vakwavo vaka-kulaha chipwe kuhukana mumena ali mujila vali nakulahila. Nge vanalimbuka, veji kukatukanga washi nakutwalaho lika kulaha. Kavahaka mangana kukala chuma chize cheji kuvalimbwisangako, oloze veji kuhakanga mangana kukulaha mangana vakatambule fweto.

9. Vyuma muka twatela kulinga nge tunahukana nakulimbuka?

⁹ Nayetu nawa omu tuli nakulaha, tunahase kuhukana mapapa kakavulu nakulimbenja muvyuma natulinga navize natuhanjika. Kaha nawa vakwetu vaka-Kulishitu vaze tuli nakulaha navo vanahase kulinga vyuma vize navitwivwisa kupihya. Kaha katwatela kulikomokelako nge chuma kana chinasoloka. Tuvosena katwakupukako, kaha nawa tweji kulahilanga mujila yakupalakanya yakutwala kukuyoya. Ngocho tunahase kulilyatangila. Paulu ahanjikile ngwenyi, shimbu jimwe tunahase ‘kulingisa vakwetu vayayavale.’ (Kolo. 3:13) Oloze katwatela kushishika havyuma vize navituhukanyisako, shina kushishika hafweto natukatambula kulutwe. Nge tunahukana nakulimbuka, twatela kukatuka washi nakutwalaho lika kulaha. Katwatela kukwata matoto nakuhona kukatukako, mwomwo nge natulinga ngocho kaha katweshi kukatambula fwetoko. Kaha nawa tunahase kupwa chuma chize vanahase kuhukanaho vakwetu omu vali nakulaha mujila yakupalakanya yakutwala kukuyoya.

10. Uno chuma muka nachitukafwa tuhone kupwa “chimbunji chakuhukanyisa” vandumbwetu?

¹⁰ Twatela kufwila kuhaka vyuma navasaka vakwetu kulutwe nakuhona kukakachila kuli vize tunasake etu vavene, kuchina natupwa “chimbunji chakuhukanyisa” vandumbwetu vaze tuli nakulaha navo. (Loma 14:13, 19-21; Koli. 1, 8:9, 13) Echi chikiko chihandwa chatwama hakulaha chetu chakushipilitu nakulaha chakulipecha chamukaye. Vatu kana veji kulipechanga navakwavo vaka-kulaha, kaha mutu himutu eji kufwilanga kutambula fweto ukawenyi.  Vaka-kulaha kana veji kuhakanga kulutwe vyuma vize vafwila vavene. Echi cheji kuvalingisanga vashinjike vakwavo mangana vakiko vatetekele kulutwe. Oloze etu katweshi nakulipecha navandumbwetuko. (Ngale. 5:26; 6:4) Twafwila kukafwa vandumbwetu vavavulu tukatambwile navo hamwe fweto yakuyoya. Shikaho, twafwila kukavangiza mazu ahanjikile Paulu ngwenyi, katwatela ‘kuhakanga kulutwe vyuma twasaka etu kahako, oloze navyuma vasaka vakwetu nawa.’—Fwili. 2:4.

11. Chuma muka eji kushinganyekangaho muka-kulaha, kaha mwomwo ika?

¹¹ Vaka-kulaha kavatala kaha kuze vali nakuyako, oloze veji kushinganyekanga nawa haze vatela kukumina numba vavahane fweto. Numba tuhu kaveshi kumona nameso avo haze navaya nakukumishila kulahako, oloze vanahase kushinganyeka kwijiva nge vanahete lyehi kusongo, kaha vali nakutambula fweto. Echi cheji kuvalingisanga vafwile kutwalaho kulaha mangana vakatambule fweto.

12. Chuma muka atushika Yehova?

¹² Mukulaha chize tweji kulahanga etu vaka-Kulishitu, Yehova atushika ngwenyi, nge natukumisa kulaha kana, kaha mwakatuhana kuyoya chahaya myaka yosena mwilu chipwe mupalachise hano hamavu. Visoneka vyalumbununa omwo nachikapwa kuyoya kana mangana chitukafwe kushinganyeka hakuwaha natukalivwisa kulutwe. Kachi nge natushinganyekanga chikuma halutalililo lwetu, kaha nachitukafwa tuhone kwechelela kala chuma chitulimbwise nakulitwamina kulaha.

13. Uno etu twahambakana ngachilihi vaka-kulaha?

¹³ Vaka-kulaha muHelase vazeyelenga nakwivwa mavuko akulaha. Oloze vapendaminyinenga hangolo javo, kaha nawa nahakulilongesa chikuma. Nayetu tuli ngana mwavaze vaka-kulaha, mwomwo veji kutunangulanga mwakulahila. Oloze etu twavahambakanamo, mwomwo Yehova eji kutuhananga ngolo, kaha ngolo kana kajakumako. Shikaho, Yehova atushika ngwenyi, nge natupendamina hali ikiye, kaha mwatunangula nakutujikijisa.—Petu. 1, 5:10.

14. Uno mukanda Wavaka-Kolinde 2, 12:9, 10 nautukafwa ngachilihi nge tuli nakumona ukalu?

¹⁴ Paulu amwenenga ukalu wauvulu. Vamutukanyinenga nakumuyanjisa, kaha shimbu jimwe azeyelenga. Ambile nawa ngwenyi apwile ‘namungonga mumujimba wenyi.’ (Koli. 2, 12:7) Chipwe ngocho, kalitwaminyinyine kuzachila Yehovako, oloze ukalu kana wamulingishile apendamine hali ikiye. (Tangenu Wavaka-Kolinde 2, 12:9, 10.) Hakuwana nge apendaminyine hali Yehova, ngocho amukafwile muukalu wenyi wosena.

15. Chuma muka nachisoloka nge natulondezeza Paulu?

¹⁵ Nayetu nawa pamo vanahase kututukana chipwe kutuyanjisa mwomwo yakufwelela Yehova. Pamo tunahase nawa kuhita muukalu wakufwana nge misongo chipwe kuzeya. Oloze nge natulondezeza Paulu, kaha ukalu kana nautulingisa tupendamine hali Yehova nakumonomu mwatukafwa.

16. Vyuma muka munahase kulinga nge mwatwama muluuta?

¹⁶ Kutala mwatwama muluuta, chipwe muchitwamo chakushindumuna tahi? Kutala mweji kwivwanga kuzeya chipwe kamwamona kanawako tahi? Nge mukiko, kutala munahase kulahila hamwe navakweze navandumbwetu vaze vali nangolo tahi? Eyo munahase. Vandumbwetu vavavulu vatushinakaji navitonji vali nakulaha mukulaha chakuya kukuyoya. Oloze kavalaha mungolo javoko. Veji kutambulanga ngolo kuli Yehova omu veji kwivwililanga kuvihande vyakukunguluka kuzachisa likina chipwe kwivwilila kuvihande vyakukunguluka vize vanakopo. Kaha nawa veji kwazananga mumulimo wakunangula vatu vapwenga tumbaji hakwambulila vandotolo, navanase, navausoko.

17. Uno Yehova eji kumonanga ngachilihi vangamba jenyi vaze kavapwa vakulikangulako?

 ¹⁷ Nge munahombo mwomwo yakuhona kulikangula, kaha kamwatela kulitwamina kulaha chakuya kukuyoya chahaya myaka yosenako. Yehova amizanga chikuma halufwelelo lwenu nahakumika chenu. Makumbi ano munakusakiwa chikuma kumikafwa kuli Yehova, kaha ikiye nawa keshi kumisezako. (Samu 9:10) Mwapandamanga lika kuli enu. Ndumbwetu umwe wapwevo uze kapwa wakulikangulako ambile ngwenyi: “Cheji kungukaluhwilanga kwambulilako vakwetu mujimbu wamwaza mwomwo misongo yami yili nakuvulilako. Oloze ngwejiva ngwami, nguli nakwivwisa Yehova kuwaha numba tuhu nguli nakumuzachila milimo yayindende kaha.” Shikaho, nge munahombo mwatela kwanuka ngwenu kamweshi ukawenuko. Shinganyekenunga hachakutalilaho chaPaulu nahamazu akukolezeza aze ahanjikile. Ambile ngwenyi: “Ngweji kwivwilanga kuwaha kuhehela chami, . . . mwomwo nge ngunahehela, kaha ngunakwate ngolo.”—Koli. 2, 12:10.

18. Ukalu muka waunene veji kumonanga vatu vamwe?

¹⁸ Vatu vamwe vaze vali nakulaha chakuya kukuyoya chahaya myaka yosena veji kumonanga ukalu uze kavatachikiza vakwavoko. Chakutalilaho, veji kuhombanga chipwe kulizakamina chikuma. Mwomwo ika natwambila ngwetu ukalu kanou veji kuhitangamo ava vangamba jaYehova vakushishika wapwa waunene? Mwomwo nge mutu nahokoka livoko chipwe nge eji kutambukilanga muchitwamo chakushindumuna, vakwavo veji kumonanga ukalu kana nakufwila kumukafwa. Oloze vatu kaveshi kuhasa kutachikiza ukalu eji kuhitangamo mutu uze eji kuhombanga nakulizakamina chikumako. Ngocho chinahase kupwa chachikalu kukafwa vatu vatwama naukalu wangana. Oloze ukalu veji kuhitangamo navakiko unahase kupwa woumwe nauze mwahitamo mutu uze nahokoka livoko chipwe lihinji.

19. Chuma muka natulinangula kuli Mefwivoshete?

¹⁹ Kachi nge mukwechi ukalu nakumona nawa ngwenu vakwenu kavamivwishisako, kaha munahase kujikiza hakushinganyeka mujimbu waMefwivoshete. (Samwe. 2, 4:4) Mefwivoshete apwile chitonji, kaha Mwangana Ndavichi alingile chuma chachipi kuli ikiye. Mefwivoshete kalingile chuma numba chimwe chachipi chize chatelele kumulingisa ahite muukalu kanako. Chipwe ngocho, kakwachile matotoko, oloze apwile wakusuuluka navyuma vyamwaza alivwishile kuwaha mukuyoya chenyi. Asakwililile Ndavichi havyuma vyamwaza amulingililile. (Samwe. 2, 9:6-10) Shikaho, omu Ndavichi amulingile mwamupi, ikiye kahakile chuma kana muvishinganyeka nakukwachila Ndavichi matotoko. Kaha nawa kahanyine Yehova mulonga hachuma amulingile Ndavichiko. Oloze afwililile kukundwiza Mwangana uze vatongwele kuli Yehova. (Samwe. 2, 16:1-4; 19:24-30)  Yehova etavilile mujimbu waMefwivoshete vausoneke muMbimbiliya mangana tulinanguleko vimwe.—Loma 15:4.

20. Uno kulizakamina chaneha ukalu muka kuli vandumbwetu vamwe, oloze chuma muka vatela kutachikiza?

²⁰ Vandumbwetu vamwe veji kwivwanga woma nakulizakamina chikuma nge vali hakachi kavakwavo. Numba tuhu chinahase kuvakaluhwila kupwa navatu vavavulu, oloze veji kutwalangaho lika kukungulukanga kuZuvo yaWangana, nakuyanga kukukunguluka chachihanda nechi changalila. Cheji kuvakaluhwilanga nawa kuhanjika navatu vaze kavejivako, oloze veji kwambulilanga vatu vosena vaze veji kuwananga muwande. Kachi nge mukiko chili nakuli yenu, kaha tachikizenu ngwenu kamweshi ukawenuko. Navandumbwenu vavavulu vali nakuhita muukalu kana. Anukenu ngwenu Yehova eji kuwahililanga chikuma hakumimona muli nakumuzachila namwono wenu wosena. Hakuwana nge muli nakutwalaho lika kumuzachila, chinasolola nge Yehova ali nakumivwila kuwaha kaha ali nakumijikijisa. * (Fwili. 4:6, 7; Petu. 1, 5:7) Kachi nge muli nakuzachila Yehova chamokomoko nakuhomba nakuhona kupwa vakulikangula kumujimba, kaha mwatela kutachikiza ngwenu muli nakwivwisa Yehova kuwaha.

21. Yehova nahase kutukafwa tulinge ika?

²¹ Twawahilila hakwijiva ngwetu, kulaha chize ahanjikile Paulu chalihandununa nakulaha chakulipecha. Kushikulu, halizavu lyavaka-kulaha vosena, mutu umwe kaha ikiye atambwilenga fweto. Oloze mukulaha chize veji kulahanga vaka-Kulishitu, vosena vaze veji kukakachilanga palanga nakusongo, navakatambula fweto yakuyoya haya myaka yosena. (Yowa. 3:16) Kaha nawa vaka-kulaha vatelelele kupwa vakulikangula kumujimba, nge chiku kaveshi kuhasa kutambula fwetoko. Oloze mukulaha chavaka-Kulishitu, numba tuhu etu vavavulu katwapwa vakulikangulako, oloze tuli nakuhasa kulaha. (Koli. 2, 4:16) Yehova nahase kutukafwa tutwaleho lika kulaha mangana tukatambule fweto.