1. Chumanyi chitwatela kwila wejima wetu?

KOMANA munateli kutemuka mulufuchi lumuneluki nenu lwakala, sweje-e neyi mwakata hela munazeyi? Inehi. Hela chochu, kapostolu Pawulu wahosheli nindi akwaKristu alala ejima adi mulufuchi. (Heb. 12:1) Nawa wejima wetu, chili tudi atwansi hela akulumpi, twakola hela twazeya, twatela kuumika kushika nikunsa hakwila nawu tukatambwili wuloku watukanayi Yehova.—Mat. 24:13.

2. Kwesekeja na 2 Timotewu 4:7, 8, muloñadi Pawulu chadiñayi wakasunuka kuhosha?

² Pawulu wadiña wakasunuka kuhosha muloña ‘watemukili lufuchi ndo-o nikumufunda.’ (Tañenu 2 Timotewu 4:7, 8.) Hanu dinu, lufuchi lwamuchidinyi lwateneneñayi Pawulu?

3. Lufuchi lwamuchidinyi lwateneneñayi Pawulu?

³ Mpinji yikwawu Pawulu wazatishileña yuma yadiña muyisela yahemeneñawu muGreece yakushankulu kulonda yadizishi nachu antu nsañu yalema. (1 Kor. 9:25-27; 2 Tim. 2:5) Kakavulu wesekejeleña chihandilu chamukwaKristu nakutemuka lufuchi. (1 Kor. 9:24; Ñal. 2:2; Fwi. 2:16) Muntu watachikaña kutemuka ilu “lufuchi” neyi yadihana kudi Yehova nawa yapapatishewa. (1 Pet. 3:21) Washikaña kumufunda neyi Yehova yamwinka wuloku wakutambwila wumi wahaya nyaaka.—Mat. 25:31-34, 46; 2 Tim. 4:8.

4. Yumanyi yitukuhanjekahu muchinu chibaaba?

⁴ Kudifwananyi kudi hakachi kakutemuka lufuchi lwachintampu chachilehi nachihandilu chamukwaKristu? Kudi yuma yayivulu yadifwana. Tuhanjekenu hayuma yisatu. Chatachi, twatela kulondela nshimbi yakutemuka lufuchi; chamuchiyedi,  twatela kusha maana hakutemuka nakushika ndo-o nikumufunda; nawa chamuchisatu, twatela kuumika kukala kwejima neyi tunakutemuka.

5. Chihandilu chamuchidinyi chitwatela kuhanda, nawa muloñadi?

⁵ Hakwila nawu akwakutemuka lufuchi atambwili isomu, atela kulondela nshimbi jalufuchi jiyashaku kudi akwachisela. Munjila yoyimu, neyi tunakukeña kutambwila wuloku wawumi wahaya nyaaka, twatela kwila yuma yelañawu akwaKristu hela kuhanda neyi chahandañawu akwaKristu. (Yilw. 20:24; 1 Pet. 2:21) Hela chochu, Satana niantu jindi akeñaña nawu tuyimbujoleña; anakukeña nawu ‘tutemukileña nawu hamu.’ (1 Pet. 4:4) Adiwulaña kutemuka kutwatemukaña nawa ahoshaña nawu lufuchi lwawu dilwaluwahi, nawu lwaleteshaña muntu kwikala wasubuka. Ilaña mwahoshañawu dimu wanyi.—2 Pet. 2:19.

6. Yumanyi yimunadizili kuchakutalilahu chaBrian?

⁶ Antu ejima atemukaña hamu nawantu aluwañeshawu kudi kaayi kaSatana enzaña nakwiluka nawu njila yinatondiwu hiyayileteshaña kwikala asubukaku; ilaña ekalaña anduñu. (Rom. 6:16) Talenu chakutalilahu chaBrian. Anvwali jindi amukwashili kulondela chihandilu chawakwaKristu. Ilaña chashikiliyi hawukwenzi, wadihwili neyi chakwila ichi chihandilu chinateli kumuletela muzañalu. Brian watondelihu kutemukila hamu nawantu aluwañeshawu kudi Satana. Dichi wahosheli nindi: “Ilaña nelukili wanyi nami kusubuka kunakeñeleña kukunleñela kuteñuka nayitumbu yashetana.” Nawa wabombelelihu nindi: “Mukuhita kwampinji natachikili kunwa yitumbu yashetana niwalwa nawa nelileña niwuvumbi. Hayaaka yayivulu yalondeleluhu natwalekeluhu kuzatisha yitumbu yasweja kushetana nawa nekalili nduñu wayitumbu yashetana yayivulu. . . . Natachikili kulandisha yitumbu yashetana kulonda nidikwasheña nachu.” Nkumininaku, Brian wafuukwilihu kulondela nshimbi jaYehova. Dichi wahimpili yilwilu yindi nawa wapapatisheweli mu 2001. Chayinu mpinji wudi namuzañalu chineli nakuhanda neyi chatela kuhandawu akwaKristu. *

7. Kwesekeja naMatewu 7:13, 14, njilanyi jiyedi jitukweti?

⁷ Dichi, chalema kutondahu njila yayiwahi yakulondela. Satana nakukeña nindi tubuleña kutemukila munjila yanyanya “yatwalaña kuwumi” ilaña nindi tuyi munjila yeneni munakutemukila antu amavulu mukaayi. Iyi njila ayiluka kudi antu amavulu nawa yaswayi kutemukilamu. Ilaña “yatwalaña kukujilumuka.”  (Tañenu Matewu 7:13, 14.) Hakwila nawu tutwalekihu kwendela munjila yatelela nawa tubuli kuheñuka, twatela kumukuhwelela Yehova nikumutiyilila.

8. Chumanyi chelañayi mukwakutemuka lufuchi neyi nahukani?

⁸ Akwakutemuka lufuchi atemukaña mulufuchi lwachintampu chachilehi ashaña maana kumbindi kulonda abuli kuhukana. Hela chochu, anateli kuyihuma chakadi kwiluka kudi mukwawu munakutemukilawu hela kudimbuka mwibuku hanakutemukawu. Neyi adimbuka, anyamukaña nakutwalekahu kutemuka. Hiyashaña maana hachuma chinayihukeshiku, ilaña ashaña maana hakushika kumufunda nihesomu dinakufwila kutambwilawu.

9. Chumanyi chitwatela kwila neyi tunahukani?

⁹ Mulufuchi lutwatemukaña, tunateli kuhukana mapampa kakavulu, kuluwañesha munhoshelu hela muyuma yitwelaña. Indi kwiji akwetu itunakutemuka nawu anateli kwila chuma chinateli kutuneñesha. Twatela kukuhwelela chumichi kumwekana. Wejima wetu twawanina wanyi nawa wejima wetu tunakutemukila munjila yanyanya yaya kuwumi. Mpinji yikwawu “tukudihumaña” wumu namukwawu. Pawulu wahosheli nindi mpinji yikwawu tukwikalaña “namuloña” kudi wumu namukwawu. (Kol. 3:13) Dichi, chatela tusheña muchima hachuma chinatuhukeshi, tusheña muchima hesomu didi kumbidi. Neyi tunahukani, tunyamukeña nakutwalekahu kutemuka. Neyi tunahili nawa tukaana kunyamuka, hitukashika kumufunda nikutambwila isomuku. Kubombelahu, tunateli kwikala akwakuhukesha akwetu anakuzata nañovu kutemukila munjila yanyanya yaya kuwumi.

10. Tunateli kutondolwela ñahi kwikala “chuma chakumuhukesha” nachu mukwetu?

¹⁰ Njila yikwawu mutunateli cheñi kutondolwela kwikala “chuma chakumuhukesha” nachu mukwetu itunakutemuka nindi, hikulondela munakukeñayi chatela tufwileña hohu jitunakukeña. (Rom. 14:13, 19-21; 1 Kor. 8:9, 13) Muniyi njila, hitwekala neyi chekala antu anakutemuka lufuchi lwatemukañawu antuku. Adichombeshaña wumu namukwawu nawa muntu himuntu wafwilaña kumwinka isomu. Awa akwakutemuka atoñojokaña hohu hakuditiyisha  kuwaha aweni. Dichi anateli kushinjika mukwawu kulonda wena ekali kumbidi. Kwambukaku, etu hitwadichombeshañaku. (Ñal. 5:26; 6:4) Chuma chitwafwilaña hikukwasha antu amavulu kulonda tukashiki nawu kumufunda nikutambwila hamu wuloku wawumi wahaya nyaaka. Dichi twazatishaña kufumba kwaPawulu ‘kwakufwila yuma bayi yatutiyishaña kuwaha etu aweni hohuku, chiña yuma yatiyishaña kuwaha niakwetu.’—Fwi. 2:4.

11. Akwakutemuka lufuchi ashaña muchima hachumanyi, nawa muloñadi?

¹¹ Kubombela hakusha maana kumbidi hampinji yinakutemukawu lufuchi, akwakutemuka lufuchi ashaña muchima hakushika kumufunda. Hela chakwila hiyamonaña kumufunda kunakuyawuku, afwikijaña anashiki kumufunda nawa anakutambwila isomu. Neyi anakutoñojoka hesomu, ashañaku muchima.

12. Chumanyi chatukanayi Yehova?

¹² Mulufuchi lutwatemukaña, Yehova wayikana antu jindi kuyinka wuloku neyi atemuka nakushika kumufunda, wumi wahaya nyaaka chili mwiwulu hela muparadisa hamaseki. Bayibolu yalumbulula iwu wuloku kulonda tufwikijeña chihandilu chetu chichakawaha kumbidi. Neyi tutoñojokaña hayuma yatukanayi Yehova kumbidi, hitukwiteja chuma chidi chejima kutuhukeshaku.

13. Yumanyi yitukweti yabula akwakutemuka lufuchi?

¹³ Akwakutemuka lufuchi amuyisela yawaGiriki adiña nakuumika kukala kwejima. Ilaña ashili nankashi maana hakudiza nihañovu jawu. Tudi neyi ana akwakutemuka lufuchi munjila yakwila atudizishaña chakutemuka lufuchi lutudimu. Ilaña etu twayibadika akwakutemuka lufuchi. Twafumishaña ñovu kudi mukwakuhana ñovu. Neyi tumushindamena Yehova, watukana kutudizisha nikutukolesha chikupu.—1 Pet. 5:10.

14. Indi 2 Akorinda 12:9, 10 yatukwashaña ñahi kuumika kukala kutwamonaña?

¹⁴ Pawulu womikili kukala kwakuvulu. Kubombela hamakabisha nikasawuntu katambwililiyi, mpinji yikwawu wazeyeleña nawa womikileña kukala kwateneniyi nindi “mwiña mumujimba.” (2 Kor. 12:7) Chatela yeteji iku kukala kumuzeyeshi, yena wamweni nindi diyi njila yakushindamena hadi Yehova. (Tañenu 2 Akorinda 12:9, 10.) Chineli Pawulu wadiña naniyi yitoñojoka, Yehova wamukwashili kuumika kukala kwejima kwamweneñayi.

15. Chumanyi chinateli kufumamu neyi tumwimbujola Pawulu?

¹⁵ Ninetu anateli kutuhosha kasawuntu hela kutukabisha muloña wachikuhwelelu chetu. Tunateli cheñi kuhita muyikatu hela kuzeya kumujimba. Ilaña neyi tumwimbujola Pawulu, kukala kudi kwejima kutukumona kunateli kwikala njila yakumwenamu chatukwashañayi Yehova.

16. Chumanyi chimwatela kwila hela chakwila mwakata kumujimba?

¹⁶ Komana mwendaña wanyi muloña wayikatu hela wufwayi? Komana mwakata nyendu hela munakumona chiwahi wanyi? Neyi dimu, mukutwesha kutemukila hamu nawatwansi niantu akola kumujimba? Eña mukutwesha! Antu akula dehi niakata anakutemuka lufuchi munjila yaya kuwumi. Hiyazataña iwu mudimu nañovu jawuku. Ilaña afumishaña ñovu kudi Yehova kuhitila mukutiyilila kuprogilamu yinakwatiwu yakupompa kwawakwaKristu hela kutala vidiyo. Nawa azatañaku nimudimu wakwilisha atumbanji kuhitila mukuyishimwina andotolu, manensi niantaña jawu.

17. Yehova watiyaña ñahi nawantu adi nakukala kumujimba?

¹⁷ Neyi munakukañanya kumuzatila Yehova muloña wayikatu, bayi muzeya nikutoñojoka  nenu himukutwesha kuumika nakushika kunsaku. Yehova wayikeña muloña mwamukuhwelela nawa muloña mwomikaña. Yinu diyi mpinji yimwatela kumulomba wukwashu nawa hakayishiya kankawenuku. (Mas. 9:10) Ilaña wukuswina kwakwihi nanenu. Talenu chahosheliyi muhela wunakuhita muyikatu. Wahosheli nindi: “Chineli natwalekihu nakukata, nakañanyaña kushimwina kakavulu kudi antu. Ilaña neluka nami, namuzañaleshaña Yehova chinadishañaku nawa nazañalalaña.” Neyi munaneñi, ilukenu nenu himudi nkawenuku. Toñojokenu hachakutalilahu chaPawulu nawa anukenu mazu akukolesha ahosheliyi nindi: “Natiyaña kuwaha mukuzeyazeya, . . . muloña neyi nazeyi, dihu hinekalaña nañovu.”—2 Kor. 12:10.

18. Kukalanyi kwamonañawu antu amakwawu?

¹⁸ Antu anakutemuka munjila yaya kuwumi amonaña kukala kukwawu. Ahitaña mukukala kunateli kubula kumonawu nikwiluka antu. Chakutalilahu, adi nachineñi hela anakwakama nankashi. Muloñadi awa ambuña aYehova chamwenañawu kukala kwamuchidi iwu? Muloña neyi muntu yakotoka chikasa hela mwendu hela nakwendela mukakinga kawayifwayi, muntu wejima nateli kumona kukala kukwetiyi nawa anateli kumukwasha. Hela chochu, antu anakukabakana nachineñi hela nakukala kwamuyitoñojoka hiyanateli kukumwekesha kudi antuku. Kukala kwawu kudi hohu neyi kwamuntu wunakotoki chikasa hela mwendu, ilaña hiyanateli kuyakamenaku.

19. Yumanyi yitwadizilaña kuchakutalilahu chaMefwibosheti?

¹⁹ Neyi mudi nakukala kumujimba nawa mutoñojoka nenu antu anakuyitoñojokela mwaluwa, mukukoleshewa nachakutalihu chaMefwibosheti. (2 Sam. 4:4) Wadiña chifwayi, nawa Mwanta Davidi wamutoñojokeleli mwaluwa. Mefwibosheti hadileteleli yomweni iku kukala kwawufwayiku. Ilaña waneñeli wanyi; wadiña nakusakilila hayuma yayiwahi yamumwekeneni muchihandilu chindi. Wasakilili haluwi lwamumwekesheleliwu kudi Davidi kunyima. (2 Sam. 9:6-10) Dichi chamutoñojokeleliwu mwaluwa kudi Davidi, Mefwibosheti washinshikili hayuma yaletesheli. Hetejeli chiluwa chaDavidi kumuneñeshaku. Nawa hamwinkeli Yehova muloña wachuma cheliliyi Davidiku. Mefwibosheti washili muchima hachuma chateleleli kwilayi kulonda yazatili hamu namwanta atondeliwu kudi Yehova. (2 Sam. 16:1-4; 19:24-30) Yehova wasonekeli ichi chakutalilahu chachiwahi chaMefwibosheti Mwiizu Dindi Bayibolu kulonda ninetu tudiziliku.—Rom. 15:4.

20. Kusweja kwakama kunateli kuyiletesha antu kwiladi, nawa chumanyi chatela kwilukawu?

 ²⁰ Amanakwetu niahela amakwawu atiyaña woma ninsonyi nakukala kudi kwejima kunakumonawu hamuloña wakusweja kwakama. Chinateli kuyikalila kwikala hadi antu amavulu, ilaña atwalekañahu kuya nakupompa kwachipompelu, kupompa kwanyanya nikwamaneni. Chayikalilaña kuhanjeka nawantu abula kwilukawu, ilaña ahoshaña nawantu mumudimu wakushimwina. Neyi diku kukala kumukweti, ilukenu nenu himudi nkawenuku. Antu amavulu niwena ekala nansonyi. Ilukenu nenu Yehova wazañalalaña nanyidimu yimwazataña namuchima wenu wejima. Chineli munazeyi wanyi, chumichi chinakumwekesha nawu nakuyikiswila nawa nakuyinka ñovu yimunakukeña. * (Fwi. 4:6, 7; 1 Pet. 5:7) Neyi munakumukalakela Yehova hela chakwila mudi nakukala kumujimba hela chineñi, mwatela kwiluka nenu munakumuzañalesha Yehova.

21. Nawukwashu waYehova, chumanyi chitukwila wejima wetu?

²¹ Hela chochu, hadi chaambu hakachi kalufuchi lwatemukañawu antu nalufuchi lwateneniyi Pawulu. Mulufuchi lwadiñaku mumpinji yakunyima, muntu wumu hohu diyi wadiña nakutambula isomu. Kwambukaku, muntu wejima wukuumika nakashinshi muchihandilu chawakwaKristu wakatambwila wuloku wawumi wahaya nyaaka. (Yow. 3:16) Nawa mulufuchi lwatemukileñawu antu, akwakutemuka lufuchi ejima ateleleli kwikala akola kumujimba neyi nehi adi kutwesha wanyi kutemuka kulonda atambwili isomu. Kwambukaku, etu amavulu twakola wanyi kumujimba, ilaña tunakuumika. (2 Kor. 4:16) Nawukwashu waYehova, wejima wetu tukutemukaña lufuchi ndo-o nikumufunda.