1. Kan zain eng nge kan tih ngai?

DAM lo leh chau tak nia i inhriat laiin, intlânsiakna huphurhawm takah i tel duh ang em? I duh a rinawm loh. Mahse, tirhkoh Paula chuan Kristian zawng zawng chu intlânsiaknaah an tlân tih a sawi a. (Heb. 12:1, 2) Kan chak emaw, chak lo emaw pawh ni se, a pui a pang kan za hian Jehova min pêk lâwmman hmuh kan duh chuan, a tâwp thlenga chhel taka kan tlân a ngai a ni.—Mt. 24:13.

2. Timothea thawn hnih 4:7, 8-a sawi angin, engvângin nge Paula chuan intlânsiakna chungchângah thurâwn a pêk theih?

² Paula chuan chu ‘intlânsiakna chu a hlen tawh’ avângin, hemi chungchângah hian thurâwn a pe thei a ni. (2 Timothea 4:7, 8 chhiar rawh.) A nih leh, ani chuan eng intlânsiakna chungchâng nge a sawi?

3. Paula sawi intlânsiakna chu eng nge ni?

³ Paula chuan thil pawimawh tak zirtîr nân hmân lai Grik rama infiamna ṭhenkhat hman châng a nei a. (1 Kor. 9:25-27; 2 Tim. 2:5) Kristian nun kawng chu intlânsiaknaa tel nên vawi engemaw zât a khaikhin a ni. (1 Kor. 9:24; Gal. 2:2; Phil. 2:14-16) Mi chu Jehova hnêna a inpumpêk a, baptisma a chan hian he ‘intlânsiaknaah’ a tlân ṭan a. (1 Pet. 3:21) Jehova’n ani chu chatuan nunna lâwmman a pêk hunah a tâwp thlengin a tlân kan ti thei ang.—Mt. 25:31-34, 46; 2 Tim. 4:8.

4. He thuziakah hian eng nge kan sawiho vang?

⁴ Thui tak intlânsiaknaa tlân leh Kristian nun kawng zawhna inanna ṭhenkhat chu eng nge ni? Inanna tam tak a awm a. Chûng zînga pathum chu i lo en ang u. Pakhatna, kawng dik  taka kan tlân a ngai; pahnihna, tiam chin lam chu kan en tlat tûr a ni; pathumna, harsatnate awm mah se, chhel taka kan tlân a ngai a ni.   

5. Eng kawng nge kan zawh ang a, engvângin nge?

⁵ Intlânsiakna tak taka telte chu lâwmman hmu tûr chuan chu infiamna huaihawttute siam tlânna kawnga an tlân a ngai a. Chutiang bawkin, chatuan nunna lâwmman hmuh kan duh chuan, Kristian nun kawng kan zawh a ngai a ni. (Tirh. 20:24; 1 Pet. 2:21) Mahse, Setana leh a hnungzuitute chuan kawng danga tlân tûra min duh bâkah, an ruala kan nun kawng hlui zawh zêl tûrin min duh a ni. (1 Pet. 4:4) Kan nun kawng zawh chu an sawisêlin, an nun kawng zawh chu ṭha zâwk leh zalên zâwk niin an sawi a. Mahse, a sawi chu a dik lo chiang hle a ni.—2 Pet. 2:19.

6. Brian-a thiltawn aṭangin eng nge i zir?

⁶ Setana khawvêl thununa awmte nêna tlânte chuan an nung kawng zawhin zalênna ni lovin, bâwihah a hruai tih an hre thuai ang. (Rom 6:16) Brian-a thiltawn hi han ngaihtuah teh. A nu leh pate chuan Kristian nun kawng zawh tûrin an fuih a. Mahse, a tleirâwl chhoh chuan, chu nun kawng chuan hlimna a thlen dâwn leh dâwn loh a ringhlel a ni. Brian-a chuan Setana tehna mila nungte nêna tlân chu a thlang a. Ani chuan: “Zalênna nia ka ngaih ka nun kawng zawh chuan thil ṭha lote chîng dawk lak tûrin min hruai ang tih rêng ka lo hre lo. A hnuah chuan, ruihhlo leh zu ngawl ka vei a, nungchang bawlhhlawh takin ka awm bawk a ni. Kum engemaw zât a liam hnuah, damdawi ngawl ka veina chu a nasa lehzual a, chûng thil tam tak bâwihah chuan ka tla lût a. . . . Chu nun kawng ka zawh zawm zêl theih nân ruihhlote ka zuar ṭan a ni,” tiin a sawi. A tâwpah, Brian-a chuan Jehova tehnate mila nun a tum ta a. A nun kawng chu thlâkin, kum 2001-ah baptisma a chang ta a. Tûnah chuan Kristian nun kawng a zawh avângin a hlim hle a ni. *

7. Matthaia 7:13, 14-a sawi angin, kan hmaah eng kawng chi hnih nge awm?

⁷ Kawng dik kan thlan chu a va pawimawh tak êm! Setana chuan “nunnaa kalna” kawngka zîma kal tawh lovin, he khawvêla mi tam takte zawh mêk kawng zau tak chu zawh tûrin min duh a. Chu kawng chu a lârin, zawh pawh awlsam tak a ni. Mahse, chu chu “boralnaa kalna” kawng a ni thung. (Matthaia 7:13, 14 chhiar rawh.) Kawng dik zawh reng tûr leh hruai bova awm lo tûr chuan, Jehova kan rinchhanin, a thusawi kan ngaithla tûr a ni.

8. Intlânsiaknaa telte chu an tlu a nih chuan eng nge an tih ang?

⁸ Thui tak intlânsiaknaa telte chuan an tlûk loh nân an hmaa mite tlânna kawng chu an en tlat a. Mahse, anni chu an sîra tlânte’n an rawn pal tlu palh thei a, a nih loh leh khuarte pawh an rap palh thei a ni. An tlu a nih pawhin, tho lehin an tlân zawm zêl a. An en ber chu anmahni titlutu ni lovin, tiam chin lam leh hmuh an beisei lâwmman chu a ni.

9. Kan tlu palh a nih pawhin, eng nge kan tih ang?

⁹ Kan intlânsiaknaah hian kan thusawi leh thiltiha tisualin vawi tam tak kan tlu mai thei a. A nih loh leh, kan tlânpuite chuan kan chungah thil tisual palhin min tina thei bawk. Chutiang thil a thleng a nih chuan mak kan ti tûr a ni lo. Kan za hian ṭha famkim lo vek kan niin, kawngka zîmah kan tlân a. Chuvângin, a châng chuan kan “insu” palh ṭhîn a ni. Paula chuan unaute inkârah “thupawi” kan neih châng a awm dâwn tih a hria a. (Kol. 3:13) Mahse, min titlutu chu ngaihven lovin, kan hmaa awm lâwmman chu i en tlat zâwk ang u. Kan tlu palh a nih pawhin, tho lehin i tlân zawm zêl ang u. Kan thinrim avânga kan tho duh tawh lo a nih chuan, tiam chin lam chu kan thleng lo vang a, lâwmman pawh kan dawng lo vang. Chu bâkah, kawngka zîma tlân zawm zêl tumte tân anmahni dâltu kan ni thei bawk ang.

10. Engtin nge mi dangte tâna ‘dâltu’ ni lo tûra kan awm theih?

¹⁰ Kan tlânpuite tâna ‘dâltu’ ni lo tûra kan tih theih kawng dang leh chu, a theih phawt chuan kan duh dân ang chauh ni lovin, an duh dân anga thil tihsak hi a ni. (Rom 14:13, 19-21; 1 Kor. 8:9, 13) Chutianga kan tih chuan, intlânsiakna tak taka telte ang kan ni lo vang. Anni chuan an tlânpuite chu an el a, mahni chauhva lâwmman dawn an tum a. Intlânsiaknaa hneh theih dân kawng ringawt an zawng a ni. Chuvângin, a hmasa bera an tlân theih nân, an sîra mite nêk chhuah chu an tum mai thei bawk. Keini chu chutiang mi kan ni ve lo. (Gal. 5:26; 6:4) Kan thiltum chu tiam chin lam kan pannaah kan ruala tlân tûra mi a tam thei ang ber ṭanpui a, nunna lâwmman dawn hi a ni. Chuvângin, thlarauva thâwk khuma  ziak Paula fuihna: “Mahni ta ta mai en lovin, mi dang ta pawh en ṭheuh zâwk rawh u,” tih thu hi zawm kan tum a ni.—Phil. 2:4.

11. Intlânsiaknaa telte chuan eng nge an en tlat a, engvângin nge?

¹¹ Intlânsiakna tak taka telte chuan an tlânna kawng mai bâkah, tiam chin lam chu an en tlat a ni. Chu tiam chin lam chu an hmu thei lo a nih pawhin, chu chu mitthlaa hmuin lâwmman dawn an tum a. Lâwmman chu ngaihtuah reng chungin chhel takin an tlân a ni.

12. Jehova’n eng nge min pêk a tiam?

¹² Kristiante intlânsiaknaah, Jehova chuan a tâwp thlenga tlântute chu vâna chatuana nun, a nih loh leh lei paradis-a chatuana nun lâwmman pêk a tiam a. Bible-in chu lâwmman chu a târ lan avângin, kan nun a nawm dân tûr chu kan mitthla thei a ni. Jehova min tiam hmalam hun chungchâng kan ngaihtuah tam poh leh chhel taka tlân zawm zêl kan tum lehzual ang.

13. Engvângin nge intlânsiakna tak taka telte aia kan dinhmun a ṭhat zâwk?

¹³ Grik rama neih ṭhin infiamnaa telte chuan chauhna leh taksa na ang chi harsatnate chu an tawrh chhuah a ngai a. Mahse, an rinchhan ber chu an inzirna leh anmahni chakna a ni. Anmahni ang bawkin, keini pawh intlânsiaknaa tlân dân kan zir a. Mahse, intlânsiakna tak taka telte aiin kan dinhmun a ṭha zâwk a ni. Keini chuan tâwp chin nei lo Pathian thiltihtheihna chu kan rinchhan thei a. Jehova kan rinchhan chuan, ani chuan tlân dân min zirtîr mai ni lovin, min tichak ang tih pawh a tiam a ni.—1 Pet. 5:10.

14. Korinth thawn hnih 12:9, 10-nain harsatna hmachhawn tûrin engtin nge min ṭanpui?

¹⁴ Paula chuan harsatna tam tak a hmachhawn a ngai a. Sawichhiatna leh tihduhdahnate a tawrh bâkah, a châng chuan a chak lovin, ‘tisaa hlîng,’ tia a sawi chu a hmachhawn a ngai a. (2 Kor. 12:7) Mahse, chûngte chu Jehova rawngbâwl loh phah nân hmang lovin, amah rinchhanna hun remchângah a hmang zâwk a ni. (2 Korinth 12:9, 10 chhiar rawh.) Chutiang rilru put hmang chu a neih avângin, Jehova’n Paula chu fiahna a hmachhawnna zawng zawngah a ṭanpui a ni.

15. Paula kan entawn chuan eng nge kan neih ang?

¹⁵ Keini pawh, kan rinna avângin sawichhiatna leh tihduhdahna kan tuar mai thei a. Kan hrisêl lohnate pawh kan hmachhawn a ngai mai thei. Mahse, Paula kan entawn chuan, chûng harsatnate chu Jehova ṭanpuina hmuh nân hun remchângah kan hmang thei a ni.

16. Kan hrisêlna a ṭhat tâwk lo a nih pawhin eng nge kan tih theih?

¹⁶ Dam lohna avânga khuma mu emaw, kal thei lo va wheelchair rinchhan emaw i ni em? Khûp nâ leh khaw hmu fiah thei lovin i awm em? Chutiang i ni chung pawhin, ṭhalai hrisêl takte rualin Jehova rawng i bâwl thei em? I thei a ni! Kum upate leh tisa lama chak tawh lo unau tam takte chu nunna kawngah an la tlân zêl a. Mahni chakna mai chuan an ti thei lo. Chu aiin, Kristian inkhâwma thusawite chu phone aṭanga ngaithlain leh chûng inkhâwmte chu video-a enin Jehova chakna chu an rinnchan a. Anmahni enkawltu doctor te, nurse te, leh chhûngkhat hnaite hnêna thu hrilin, zirtîr siamnaah an tel a ni.

17. Tisa lama hrisêlna ṭha nei tawh lote chu Jehova’n engtin nge a thlîr?

¹⁷ Jehova rawngbâwlnaah i duh anga i tel thei tawh lo a nih pawhin lunghnual mai lo la, a tâwp thlenga tuar chhuak thei lo tûr angin inngai suh. Jehova chuan amah i rinchhan avâng leh i chhelna avângin a hmangaih che a. Tûn hma zawng aia a ṭanpuina i mamawh  avângin a thlahthlam lo vang che. (Sâm 9:10) Chu aiin, ani chuan a hnaih lehzual sauh vang che. Hrisêlna lama harsatna nei unaunu thusawi hi chhinchhiah rawh: “Ka hrisêlna a tlâk hniam zêl rualin, mi dangte hnêna thutak hrilh theihna hun remchâng pawh ka nei tlêm telh telh a. Mahse, ka theih ang tâwka ka thiltihte chuan Jehova a tilâwm tih ka hria a, chu chuan min tihlim hle a ni,” tiin a sawi. I lunghnual hunah pawh i mal lo tih hria ang che. Paula entawn tûr siam hi ngaihtuah la, min tichak thei tak he a thusawi: “Chak lohnaahte . . . ka lâwm ṭhîn a ni; ka chak loh apiangin a ni ka chak ṭhin ni,” tih hi hre reng rawh.—2 Kor. 12:10.

18. Mi ṭhenkhatin eng harsatna khirh takte nge an hmachhawn?

¹⁸ Nunna kawnga tlântu ṭhenkhat chuan harsatna dang pawh an hmachhawn a. Mi dangte hmuh theih loh leh hriatthiam theih loh, mi mal harsatnate an nei a ni. Entîr nân, rilru hahna nasa tak leh lungkhamna nasa takte an nei a. Engvângin nge hêng Jehova chhiahhlawh rinawmte hian chûng harsatna khirh takte chu an hmachhawn a ngaih? Mi chu a kut a tliak emaw, a kal theih loh avânga wheelchair a rinchhan a ngai emaw a nih chuan, chûng a harsatnate chu mite’n an hmuh avângin, ṭanpuina pêk an duh mai thei a. Mahse, rilru lama hrehawm tuartute chuan an tawrhna chu an tilang lo pawh a ni mai thei. An rilru hahnate chu kut ke tliak tuemaw na tawrh nên ang khat reng a ni a; mahse, rilru lam hrehawmna chu hmuh theih a nih loh avângin, an dawn tûr ang hmangaihna leh ngaihsakna chu an dawng lo pawh a ni thei bawk.

19. Mephibosetha entawn tûr siam aṭangin eng nge kan zir?

¹⁹ Harsatnate i hmachhawn bâkah, mite’n an hre thiam lo che nia i hriat chuan, Mephibosetha thiltawn aṭangin chakna i hmu thei a ni. (2 Sam. 4:4) Ani chuan tisa lama harsatna a neih chu a hmachhawn a ngai a, Lal Davida’n a chungah dik lo takin a ti bawk. Chûngte chu Mephibosetha thil tihsual vânga thleng a ni lo. Chuti chung pawhin, ani chu a thinrim lo va, a thil ṭha neihte chungah a lâwm a ni. Davida’n tûn hmaa a chunga ngilneihna a lantîr avângin a lâwm hle a. (2 Sam. 9:6-10) Chuvângin, Davida’n a chunga dik lo taka a tih pawhin, thil nih dân dik tak chu hriatthiam a tum tlat a ni. A chunga Davida thil tihsual chu thinrim nân a hmang duh lo va. Davida thiltih avângin Jehova pawh a mawhchhiat hek lo. Mephibosetha chuan Jehova ruat lal a thlâwp theih dân chauh a ngaihtuah a. (2 Sam. 16:1-4; 19:24-30) Jehova chuan Mephibosetha  entawn tûr siam ṭha tak chu kan hlâwkpui theih nân Bible-ah a chhinchhiah a ni.—Rom 15:4.

20. Lungkhamna chuan unau ṭhenkhat chu engtin nge a nghawng mai theih a; mahse, eng nge an rin tlat theih?

²⁰ Lungkhamna nasa tak an neih avângin, unau ṭhenkhat chuan mi zînga awm chu nuam an ti lovin, hrehawm an ti a. Chutiang chu ni mah se, kohhran inkhâwmahte leh inkhâwmpuiahte chuan an tel chhun zawm zêl a ni. Hmêl hriat lohte biak chu harsa an ti chung pawhin, rawngbâwlnaah mite chu an be hrâm hrâm a. Chutiang dinhmuna i awm a nih chuan, nang chauh i ni lo tih hre reng ang che. Mi tam tak pawhin chutiang chu an hmachhawn a ni. Jehova chuan theih tâwp chhuaha i rawngbâwlna chu a hlut hle tih hre reng ang che. Beidawng lova i awm hi a malsâwmna i dawng tih leh i mamawh chakna a pe che tih chhinchhiahna a ni. * (Phil. 4:6, 7; 1 Pet. 5:7) Tisa lama harsatna leh rilru hahna nei chung pawha Jehova rawng i bâwl zawm zêl a nih chuan, ani chu i tilâwm hle tih i ring tlat thei a ni.

21. Jehova ṭanpuinain kan za hian eng nge kan tih theih?

²¹ Intlânsiakna tak tak leh Paula sawi intlânsiakna chu a inang lo va. Bible hun laia intlânsiakna tak takah chuan mi pakhat chauhvin lâwmman a dawng a. Chumi nên inkalhin, rinawm tak leh chhel taka Kristian nun kawng zawhtu zawng zawngte chuan chatuana nun lâwmman an hmu ang. (Joh. 3:16) Chu bâkah, intlânsiakna tak taka telte chuan hrisêlna ṭha an neih a ngai a, chutiang a nih loh chuan lâwmman an chân thei a ni. Kawng leh lamah chuan, kan zînga a tam zâwkte chuan tisa lama harsatna kan nei chung pawhin chhel takin kan tlân thei a. (2 Kor. 4:16) Jehova ṭanpuinain kan za hian a tâwp thlengin kan tlân dâwn a ni!