Skip to content

Al lor tablo konteni

LARTIK LETID 18

“Galoup Lekours Ziska Lafin”

“Galoup Lekours Ziska Lafin”

“Mo’nn galoup lekours ziska lafin.”​—2 TIM. 4:7NW.

KANTIK 129 Anou Kontign Andire

REZIME *

1. Ki nou tou nou bizin fer?

ESKI to ti pou anvi partisip dan enn lekours ki bien difisil, sirtou si to malad ouswa fatige? Kitfwa non. Pourtan, lapot Pol ti dir ki tou bann Kretien pe partisip dan enn lekours. (Ebre 12:1) Anplis, ki nou zenn ouswa vie, an plenn form ouswa fatige, nou tou nou bizin andire ziska lafin si nou anvi gagn pri ki Zeova donn nou.​—Mat. 24:13.

2. Kifer Pol ti kapav donn konsey ki ena dan 2 Timote 4:7, 8?

2 Pol ti kapav koz lor sa size-la parski limem li ti reisi “galoup [so] lekours ziska lafin.” (Lir 2 Timote 4:7, 8, NW. *) Me ki sa lekours-la sa?

KI SA LEKOURS-LA SA?

3. Lor ki lekours Pol ti pe koze?

3 Parfwa, pou ansegn bann leson inportan, Pol ti koz lor sertin kitsoz ki ti ena dan bann spor ki ti pe fer dan Lagres antik. (1 Kor. 9:25-27; 2 Tim. 2:5) Plizir fwa, li ti konpar lavi enn Kretien avek enn lekours. (1 Kor. 9:24; Gal. 2:2, NW; Fil. 2:16) Enn kikenn koumans galoup so “lekours” kan li vwe so lavi ar Zeova ek li pran batem. (1 Pier 3:21) Li pas lalign darive kan Zeova donn li so pri, setadir lavi eternel.​—Mat. 25:31-34, 46, NW; 2 Tim. 4:8.

4. Ki nou pou gete dan sa lartik-la?

4 Eski ena bann pwin komin ant galoup enn long lekours ek lavi enn Kretien? Wi, ena boukou. Anou get trwa parmi zot. Premierman, nou bizin swiv bon parkour; deziemman, nou bizin res konsantre lor lalign darive; ek trwaziemman, nou bizin sirmont bann difikilte ki ena lor nou parkour.

SWIV BON PARKOUR

Nou tou nou bizin swiv nou parkour Kretien (Get paragraf 5-7) *

5. Ki parkour nou bizin swiv, ek kifer?

5 Dan enn lekours, bann partisipan bizin swiv parkour ki bann organizater inn swazir si zot anvi gagn enn pri. Dan mem fason, si nou anvi gagn nou pri, setadir lavi eternel, nou bizin swiv nou parkour Kretien, setadir viv dan enn fason ki fer Zeova plezir. (Zist. 20:24; 1 Pier 2:21) Parkont, Satan ek bann ki swiv so lexanp anvi ki nou fer enn lot swa; zot anvi ki nou “galoup ansam avek [zot].” (1 Pier 4:4, NW) Zot boufonn fason ki nou viv. Zot pretann ki zot parkour pli bon ek ki li pou rann nou lib. Me seki zot dir fos.​—2 Pier 2:19NW.

6. Ki leson to aprann ar lexanp Brian?

6 Biento, bann dimounn ki galoup ansam ar bann ki inflianse par lemond Satan, zot pou rann zot kont ki zot pa finn pran semin liberte. Okontrer, zot inn vinn bann esklav Satan ek zot esklav zot prop dezir. (Rom. 6:16) Anou get lexanp Brian. So bann paran ti ankouraz li pou swiv parkour Kretien. Me kan li ti enn adolesan, li pa ti sir si sa ti pou rann li ere. Brian ti desid pou galoup ansam ar bann dimounn ki ti swiv bann prinsip Satan. Li dir: “Mo pa ti rann mwa kont ki sa swadizan liberte-la ti pou fer mwa vinn esklav bann move kitsoz. Avek letan, mo ti koumans droge, bwar, ek mo ti ena enn lavi imoral. Pandan plizir lane apre, mo ti pran bann ladrog pli danzere ek mo ti vinn adik. . . . Mo ti koumans vann ladrog pou mo satisfer mo bann vis.” Finalman, Brian ti desid pou viv dapre bann prinsip Zeova. Li ti sanz so lavi ek li’nn pran batem an 2001. Asterla, li vremem ere parski li pe galoup lekours Kretien. *

7. Dapre Matie 7:13, 14, ki de semin nou ena devan nou?

7 Li vremem inportan ki nou swazir bon semin! Satan anvi ki nou aret galoup lor semin ki tipti ek ki “amenn ver lavi.” Li anvi ki nou vinn lor semin ki larz kot mazorite dimounn dan lemond ete azordi. Boukou dimounn pran sa semin-la parski li larz ek li fasil pou swiv. Me an realite, sa semin-la “amenn ver destriksion.” (Lir Matie 7:13, 14, NW. *) Pou nou res lor bon semin ek pa les nanye distrer nou, nou bizin fer Zeova konfians ek ekout Li.

RES KONSANTRE KAN TO PE GALOUPE

Nou bizin res konsantre ek pa fer lezot tonbe (Get paragraf 8-12) *

8. Ki enn partisipan dan enn lekours pou fer si li tonbe?

8 Enn kikenn ki partisip dan enn long lekours bizin gard so lizie fixe lor seki devan li pou ki li pa tonbe. Kanmem sa, li kapav arive ki enn lot dimounn fer li tonbe ouswa ki li tonbe akoz enn obstak ki devan li. Si li tonbe, li pou releve ek kontign galoupe. Li pa pou res konsantre lor seki’nn fer li tonbe, me li pou res konsantre lor lalign darive ek lor pri ki li kapav gagne.

9. Si nou tonbe, ki nou bizin fer?

9 Dan nou lekours Kretien, kitfwa plizir fwa nou pou tonbe akoz bann erer ki nou fer an parol ouswa an aksion. Li kapav arive osi ki enn lot dimounn fer enn erer ki bles nou. Se bann kitsoz ki arive. Nou tou nou inparfe ek nou tou nou pe galoup lor mem semin ki tipti ek ki amenn ver lavi. Alor, li pou arive ki nou pou “kogn” ar nou kamarad ouswa ki nou kamarad pou “kogn” avek nou. Pol ti dir ki nou pou fer bann “repros” nou kamarad. (Kol. 3:13) Me olie ki nou konsantre nou lor seki’nn fer nou tonbe, nou bizin res konsantre lor pri ki ena devan nou. Si li arive ki nou tonbe, nou bizin leve ek kontign galoupe. Si nou ankoler ouswa nou vinn amer ek nou aret servi Zeova, nou pa pou pas lalign darive ek gagn nou pri. Anplis, nou kapav osi vinn enn obstak pou lezot ki pe kontign galoup lor semin ki amenn ver lavi.

10. Kouma nou kapav pa vinn “enn obstak” pou lezot?

10 Nou kapav osi pa vinn “enn obstak” pou nou bann frer ek ser kan nou les zot fer bann kitsoz dan zot fason kan li posib. Fode pa nou panse ki lezot bizin touletan fer kouma nou nou anvi. (Rom. 14:13, 19-21, NW; 1 Kor. 8:9, 13) Dan sa domenn-la, nou bien diferan ar bann dimounn ki pe partisip dan enn vre lekours. Dan enn vre lekours, sakenn get pou li, sak partisipan konsider lezot kouma bann adverser ek sakenn fer zefor pou gagn pri-la zis pou li. Kitfwa zot pou mem esey pous lezot pou zot pas devan. Me nou, nou pa dan enn konpetision ek nou pa konsider lezot kouma bann adverser. (Gal. 5:26, NW; 6:4) Nou lobzektif se pou ed maximum dimounn pou pas lalign darive ansam avek nou ek pou gagn lavi eternel. Alor, anou fer zefor pou aplik konsey ki Pol ti done kan nou “pa rod [nou] prop lintere, me rod lintere lezot avan.”​—Fil. 2:4.

11. Lor ki kitsoz enn partisipan res konsantre, ek kifer?

11 Dan enn lekours, bann partisipan pa zis get devan zot, zot res konsantre lor lalign darive osi. Mem si zot pa trouv lalign-la avek zot prop lizie, zot mazinn zotmem pe pas lalign darive ek pe gagn pri-la. Zot kontign pans lor zot rekonpans ki bien kler dan zot lespri ek sa motiv zot.

12. Ki rekonpans extraordiner Zeova pou donn nou?

12 Dan lekours ki nou galoupe, Zeova rekonpans tou bann ki fini sa lekours-la. Sa rekonpans-la se lavi eternel swa dan lesiel ouswa dan paradi lor later. Labib dekrir bien sa rekonpans-la pou ki nou kapav mazine kouma nou lavi pou extraordiner sa lepok-la. Kan nou res konsantre lor lavenir ki Zeova promet nou, nou pou plis determine pou andire.

KONTIGN GALOUPE MALGRE BANN DIFIKILTE

Nou anvi kontign galoup lekours pou lavi malgre nou bann difikilte (Get paragraf 13-20) *

13. Ki lavantaz nou ena lor bann partisipan ki dan enn lekours?

13 Dan Lagres antik, bann partisipan enn lekours ti bizin sirmont bann difikilte kouma fatig ouswa douler. Pou ed zot, zot ti kapav kont zis lor zot prop lafors ek lor bann lantrennman ki zot ti fer. Parey kouma sa bann partisipan-la, nou osi nou gagn enn lantrennman pou kone kouma pou galoup nou lekours. Me nou ena enn lavantaz lor sa bann partisipan-la. Nou kapav gagn lafors gras-a enn lasours pwisans ki pena limit. Si nou kont lor Zeova, Li promet ki Li pou form nou ek fer nou vinn for!​—1 Pier 5:10NW.

14. Kouma 2 Korintien 12:9, 10 ed nou pou fer fas ar bann difikilte?

14 Pol ti bizin fer fas ar boukou difikilte. Par exanp, li ti gagn bann persekision ek bann dimounn ti insilte li. Parfwa, li ti osi santi li feb ek li ti bizin siport enn “pikan dan laser.” (2 Kor. 12:7, NW) Me olie ki li trouv sa bann difikilte-la kouma enn rezon pou abandone, li ti trouv zot kouma enn lokazion pou kont lor Zeova. (Lir 2 Korintien 12:9, 10, NW. *) Parski Pol ti ena sa fason panse-la, Zeova ti ed li dan tou so bann difikilte.

15. Ki pou arive si nou imit lexanp Pol?

15 Parfwa, li kapav arive ki bann dimounn insilte nou ouswa persekit nou akoz nou lafwa. Ouswa, kitfwa nou pe fer fas ar enn maladi ouswa nou santi nou extra fatige. Me si nou imit lexanp Pol, sa bann difikilte-la kapav vinn enn lokazion pou nou trouv lamour ek soutien Zeova.

16. Mem si to lasante pa bon, ki to kapav fer?

16 Eski to lor enn fotey roulant ouswa to oblize res lor lili akoz enn maladi? Eski to ena bann difikilte pou marse ouswa to pa trouv bien? Si wi, eski to kapav galoup ansam avek bann ki zenn ek ki ena enn bon lasante? Biensir! Boukou dimounn ki dan laz ouswa ki andikape pe galoup dan lekours pou lavi. Zot pa kapav fer sa par zot prop lafors. Se Zeova ki donn zot lafors kan zot ekout bann renion par telefonn ouswa kan zot get bann renion ki’nn anrezistre. Anplis, zot partisip dan predikasion kan zot pres avek bann dokter, bann ners, ek zot fami.

17. Ki Zeova resanti pou bann dimounn ki ena bann limit akoz zot lasante?

17 Si to ena bann limit akoz to lasante, fode zame to dekouraze ek panse ki to tro feb pou galoup dan lekours pou lavi. Zeova kontan twa parski to ena lafwa an Li ek ki to pe servi Li avek fidelite depi plizir lane. Azordi plis ki avan, to bizin so led ek Li pa pou abandonn twa. (Ps. 9:10) Okontrer, Li pou vinn pli pros ar twa. Get seki enn ser ki pe fer fas ar bann problem lasante dir: “Amezir ki mo lasante pe degrade, mo ena mwins lokazion pou prese. Me mo kone ki mem bann ti zefor ki mo fer, fer leker Zeova kontan ek sa rann mwa zwaye.” Kan to dekouraze, rapel ki to pa tousel. Mazinn lexanp Pol, ek rapel so bann parol ankourazan: “Mo siport avek plezir bann febles, . . . parski kan mo feb, se lerla-mem ki mo pwisan.”​—2 Kor. 12:10NW.

18. Ki sitiasion inpe pli difisil sertin bizin fer fas?

18 Sertin frer ek ser ki galoup dan lekours pou lavi bizin fer fas ar enn lot difikilte. Zot bizin fer fas ar bann problem personel ki lezot pa trouve ek ki kitfwa lezot pa konpran. Par exanp, sertin soufer akoz depresion ouswa souvan zot angwase. Kifer sitiasion sa bann frer ek ser la inpe pli difisil? Kan enn kikenn so lebra kase ouswa li dan enn fotey roulant, tou dimounn trouv so problem ek kitfwa zot pou anvi ed li. Me enn kikenn ki ena bann problem mantal ouswa emosionel kitfwa so soufrans pa vizib. Li soufer parey kouma enn dimounn ki ena enn lebra ouswa enn lipie kase, me parski lezot pa trouv so soufrans, kitfwa li pa gagn lamour ek latansion ki li bizin.

19. Ki nou aprann ar lexanp Mefiboshet?

19 Eski to pe fer fas ar bann difikilte ki pe anpes twa fer seki to anvi pou Zeova ek to panse ki lezot pa konpran twa? Lexanp Mefiboshet kapav ankouraz twa. (2 Sam. 4:4) Li ti andikape, ek enn zour, Lerwa David ti mal ziz li. Mefiboshet pa ti fer nanye pou gagn sa bann leprev-la. Me li pa ti les sa fer li vinn amer. Li ti rekonesan pou bann bon kitsoz ki ti ariv li dan so lavi. Par exanp, li ti rekonesan parski David ti bon anver li dan lepase. (2 Sam. 9:6-10) Alor kan David ti mal ziz li, li ti esey konpran seki ti arive. Li pa ti ankoler akoz erer David. Ek li pa ti repros Zeova pou seki David ti fer. Mefiboshet ti res konsantre lor seki li ti kapav fer pou soutenir lerwa ki Zeova ti swazir. (2 Sam. 16:1-4; 19:24-30) Zeova inn met bon lexanp Mefiboshet dan Labib pou ki nou kapav aprann ar so lexanp.​—Rom. 15:4.

20. Kouma langwas kapav afekte sertin, me ki kitsoz zot kapav sir?

20 Sertin frer ek ser soufer parski zot bien-bien angwase, ek kitfwa zot santi zot malalez ouswa zot strese kan zot avek lezot dimounn. Kan ena boukou dimounn otour zot, sa kapav difisil pou zot. Me kanmem sa, zot kontign asiste bann renion ek bann lasanble. Zot kapav trouv sa difisil pou koz avek bann dimounn ki zot pa kone, me pourtan zot al prese. Si to dan sa sitiasion-la, to pa tousel. Boukou dimounn santi zot parey kouma twa. Pa bliye ki Zeova kontan kan Li trouv bann zefor ki to pe fer ar tou to leker. To pa’nn abandone, alor se enn prev ki Zeova pe beni twa ek pe donn twa lafors ki to bizin. * (Fil. 4:6, 7; 1 Pier 5:7) Si to kontign servi Zeova malgre to bann problem fizik ek emosionel, to kapav sir ki to pe fer Li plezir.

21. Avek led Zeova, ki nou tou nou pou kapav fer?

21 Nou bien kontan ki ena bann diferans ant enn vre lekours ek lekours Kretien, pa vre! Dan lepok Biblik, zis enn sel partisipan dan enn lekours ti gagn enn pri. Me dan lekours Kretien, tou bann ki andire avek fidelite pou gagn zot pri, setadir lavi eternel. (Zan 3:16) Dan enn vre lekours, tou bann partisipan bizin ena enn bon lasante, sinon zot ena bien tigit sans pou gagne. Dan lekours Kretien, boukou parmi nou pena enn bon lasante, me nou kontign andire. (2 Kor. 4:16) Nou kapav sir ki, avek led Zeova, nou tou nou pou kapav galoupe ziska lalign darive!

KANTIK 144 Fixe To Lizie lor Pri-La!

^ par. 5 Azordi, boukou serviter Zeova pe fer fas ar bann difikilte parski zot pe rant dan laz ouswa parski enn maladi pe afebli zot. Ek parfwa, nou tou nou santi nou fatige. Alor, kan nou panse ki nou bizin galoup enn lekours, kitfwa nou kapav trouv sa difisil. Dan sa lartik-la, nou pou trouve kouma nou tou nou kapav galoup avek landirans ek gagn lekours lor ki lapot Pol ti pe koze.

^ par. 2 2 Timote 4:7, 8: Mo’nn konbat sa bon konba-la, mo’nn galoup lekours ziska lafin, mo’nn res ferm dan lafwa. Asterla, ena enn kouronn lazistis ki’nn rezerve pou mwa, kouronn ki Lesegner, enn ziz ki zis, pou donn mwa kouma enn rekonpans sa zour-la, pa zis mwa, me osi tou bann ki anvi trouv lepok ki li pou retourne.”

^ par. 6 Get lartik « La Bible transforme des vies » dan Latour Degard 1Zanvie 2013.

^ par. 7 Matie 7:13, 14: 13 Rant par laport ki sere, parski laport ki gran ek semin ki larz amenn ver destriksion ek ena boukou dimounn ki pe pas par la; 14 me laport ki sere ek semin ki tipti amenn ver lavi, ek zis enn tigit ki trouv li.”

^ par. 14 2 Korintien 12:9, 10: Me Li’nn dir mwa: ‘Mo faver ki personn pa merite ase pou twa, parski mo pwisans pe vinn parfe dan to febles.’ Alor, avek plezir mo plito flat momem akoz mo bann febles, pou ki pwisans Kris kapav res lor mwa kouma enn latant. 10 Alor, pou Kris, mo siport avek plezir bann febles, bann koze maltrete, bann letan dir, bann persekision ek bann difikilte. Parski kan mo feb, se lerla-mem ki mo pwisan.”

^ par. 20 Pou gagn lezot konsey pratik lor kouma pou sirmont langwas ek pou trouv lexperyans bann frer ek ser ki’nn reisi sirmont sa, get Program Televizion JW Me 2019 lor jw.org®. Al dan seksion BIBLIOTEK > PROGRAM TELEVIZION JW.

^ par. 66 DESKRIPSION ZIMAZ: Kan sa frer aze la res konsantre dan predikasion, sa ed li pou res dan lekours Kretien.

^ par. 68 DESKRIPSION ZIMAZ: Nou kapav fer lezot tonbe kan nou insiste pou zot bwar plis lalkol ouswa kan nou pa vey lor kantite lalkol ki noumem nou bwar.

^ par. 70 DESKRIPSION ZIMAZ: Mem kan li lopital, enn frer pe res dan lekours Kretien kan li pres avek bann dimounn ki travay dan lopital.