1. Segdame tɩ d fãa maan bõe?

RẼ YĨNGA, yãmb na n sak n naag n zoe zoees y sẽn mi tɩ yaa toogo, sẽn yɩɩd fãa y sã n yaame wall y ka laafɩ bɩ? Yaa vẽeneg tɩ ayo. Tʋm-tʋmd a Poll yaool n yeelame tɩ kiris-neb hakɩɩkã bee zoees zugu. (Ebre. 12:1) D yaa bi-bɩɩg tɩ d yaa kãsma, d tara keelem tɩ d pa tar me, d sã n dat keoorã a Zeova sẽn pʋlmã, segdame tɩ d fãa zoe zoeesã n baase.—Mat. 24:13.

2. Bõe yĩng t’a Poll tõog n bas a yam n yeel bũmb ning sẽn be 2 Tɩmote 4:7, 8 wã?

² A Poll tõog n basa a yam n gom woto, bala yẽ mengã tõog n “zoee zoeesã n tãag a tɛka.” (Karm-y 2 Tɩmote 4:7, 8.) La pʋd n yaa bõe zoees yell la a Poll sẽn gomdã?

3. Yaa bõe zoees yell la a Poll sẽn gomã?

³ A Poll ra mi n goma pĩnd Gɛrɛs soolmã reem kẽer yelle, n na n zãms nebã bũmb sẽn tar yõod wʋsgo. (1 Kor. 9:25-27; 2 Tɩm. 2:5) Naoor wʋsgo, a maka kiris-ned vɩɩm ne zoeese. (1 Kor. 9:24; Gal. 2:2; Fili. 2:16) Ned sã n dɩk a meng n kõ a Zeova n deeg lisgu, a sɩnga zoeesã. (1 Pɩy. 3:21) A Zeova sã n wa keo a soabã n kõ-a vɩɩm sẽn ka sɛtã, wakat kãng la zoeesã ta a tɛka.—Mat. 25:31-34, 46; 2 Tɩm. 4:8.

4. Bõe yell la d na n gom sõs-kãnga pʋgẽ?

⁴ D tõe n yeelame tɩ bũmb kẽer wɛɛngẽ, kiris-ned wõnda ned sẽn segd n zoe zoees n zãag zĩiga. Bõe yĩnga? D gom bũmb a tãab yelle. Pipi, yaa tɩlɛ tɩ d tũ sor ning b sẽn yãkã. Yiib-n-soaba, d raabã segd n yɩɩ zoe zoeesã n tãag a tɛka. Tãab-n-soaba, d segd n kell n wɩnga ne zoeese, baa ne zu-loeesã.

5. So-bʋg la d segd n tũ, la bõe yĩnga?

⁵ Zoees sɩd-sɩd pʋgẽ, ned sã n dat n wa paam keoorã, yaa tɩlɛ t’a tũ sor ning b sẽn yãk zoeesã yĩngã. Woto me, tõnd sã n dat n wa paam vɩɩm sẽn ka sɛtã, yaa tɩlɛ tɩ d tũ sor ning Kiristã sẽn wilgã, rat n yeel tɩ d vɩɩmd wa kiris-ned sẽn tog n vɩɩmd to-to wã. (Tʋʋ. 20:24; 1 Pɩy. 2:21) La a Sʋɩtãan ne a poorẽ dãmbã pa rat tɩ d maan woto ye. B ratame tɩ d “naagd bãmb b tʋʋm-yoodã pʋgẽ.” (1 Pɩy. 4:4) B yaanda tõndo, d sẽn vɩ to-to wã yĩnga, la b yetẽ tɩ bãmb sẽn tũud sor ningã la sõma, la tɩ kɩtdame tɩ ned paam lohorem. La yaa ziri fasɩ.—2 Pɩy. 2:19.

6. A Brian kibarã sõnga yãmb tɩ y bãng bõe?

⁶ Ned sã n yãk yam n na n tũ sor ning a Sʋɩtãan dũniyã neb sẽn tũudã, pa yãt n kaoos la a bãng tɩ pa kɩtd t’a paam lohorem ye. Pʋd n kẽesda yembd pʋgẽ. (Rom. 6:16) Saam-biig a ye kibar wilgda rẽ. A yʋʋr la a Brian. A roagdbã sõng-a-la sẽn na yɩl t’a tũ Kirist sorã. La a sẽn wa n lebg bi-bɩɩgã, a ra sokda a meng so-kãng sã n na n sõngame t’a paam sũ-noogo. Kɩtame t’a yãk yam n na n vɩɩmd wa a Sʋɩtãan dũniyã nebã. A yeelame: “M pa tol n tags tɩ m sẽn da geend a soab wa lohormã, n da baood rẽ ne m sũur fãa wã na n kẽes-m-la yembd meng-meng pʋgẽ ye. M wa n sɩnga rãam la dorg yũubu, la m yooda. M wa n yũuda dorg-toose, hal n pa le tõe n bas ye. . . . M wa n sɩnga dorgã koosg me, n na n paam n ges m meng yelle.” A Brian wa n yãka yam n na n tũ a Zeova noyã. A sak n toeemame, hal n wa reeg lisg yʋʋmd 2001 wã. A sẽn tũud Biiblã sẽn yetã, a tara sũ-noog hakɩɩk masã. *

7. Matiye 7:13, 14 wilgdame tɩ soay a yiib n be d taoore. Yaa bʋg ne bʋgo?

⁷ Ad d sã n yãk yam n na n tũ so-sõngã la sõma! A Sʋɩtãan ratame tɩ d fãa bas sor sẽn yaa sẽka, sẽn tar n “dabd vɩɩm zĩigẽ” wã tũubu, la d tũ so-yalengã wa dũniyã nebã. Neb wʋsg nonga so-kãnga, a tũub me yaa nana. La yaa sor sẽn tar n “dabd sãoong zĩigẽ.” (Karm-y Matiye 7:13, 14.) D sã n dat n kell n pa so-sõngã zug n da tol n bʋdge, d segd n kɩsa a Zeova sɩda, la d sakd n kelgd-a.

8. Zoɛt sã n lak n lʋɩ, bõe la a maanda?

⁸ Neb sã n zoet zoees sẽn zãagd zĩiga, ned fãa geta a taoor sẽn na yɩl n da wa lak n lʋɩ ye. La nina tõe n wa kala a to, wall a kẽ bok pʋga. Baa a sã n lʋɩ, a tikd n yikame n kell n wɩng ne zoeesã. Pa bũmb ning sẽn n kɩt t’a lʋɩ wã yell la a na n tagsdẽ ye. A na n tagsda a sẽn na n zoe zoeesã n baase, n tõog n paam keoorã.

9. D sã n lak n lʋɩ, bõe la segd n maane?

⁹ D zoeesã pʋgẽ, d tõe n laka naoor wʋsgo. D mi n tudga d no-goam wall d tʋʋm-tʋmdɩ pʋgẽ. D tẽed-n-taasã sẽn naag tõnd n zoetẽ wã me mi n maana bũmb tɩ sãam d sũuri. La pa segd n ling tõnd ye. D fãa yaa neb sẽn pa zems zãnga. Sẽn paase, yaa sor sẽn yaa sẽka, sẽn dabd vɩɩmã zĩigẽ wã la d fãa tũuda. Dẽnd d tõe n wa kala d to n lʋɩ. A Poll yeelame tɩ wakat ninga, ned tõe n tara “yell ne a to” (Kol. 3:13) La pa bũmb ning sẽn kɩt tɩ d lak n lʋɩ wã yell la d segd n tagsdẽ ye. D tagsd keoorã sẽn be taoorã yelle. D sã n lak n lʋɩ, bɩ d sak n tik n yik n kell n wɩng ne zoeesã. D sã n bas tɩ d sũurã yiki, hal tɩ d maand sũ-kẽk n pa rat n le yiki, d pa na n tõog n baas zoeesã, n wa paam keoorã ye. Sẽn paase, yãmb mengã tõe n lebga kug-lakdg n kõ y tẽed-n-taasã sẽn maood n dat n kell n tũ sor sẽn yaa sẽkã.

10. Bõe la d tõe n maan n da wa kɩt tɩ ned “lak n lʋɩ”?

¹⁰ Bũmb a to me d sẽn tõe n maan n da wa “kɩt tɩ saam-biig lak n lʋɩ” yaa d sẽn na n modgdẽ tɩ sã n tõe fãa, bɩ d mi n bas tɩ b maan bũmb nins sẽn noom-bã, la d ra baood wakat fãa tɩ b maan tõnd sẽn datã ye. (Rom. 14:13, 19-21; 1 Kor. 8:9, 13) Woto n na n wilg tɩ d yaa toor ne sẽn zoet-b zoees sɩd-sɩdã. Bãmb geesda taaba, tɩ ned fãa modgd n dat n paam keoorã tɩ yɩ yẽ a ye tãa rẽnda. B mens yell bal n pak-b n tɩ yɩɩda. Kɩtame tɩ b mi n wẽdgd b taabã n na n paam n lʋɩ taoore. Tõnd yẽ nengẽ pa woto ye. D pa wagsd taab ye. (Gal. 5:26; 6:4) D sẽn datã yaa d sõng neb wʋsg wa d sẽn tõe tɛka, tɩ d naag taab n baas zoeesã n paam keoorã sẽn yaa vɩɩm sẽn ka sɛtã. Rẽ n so tɩ d modgd n tũud saglg ning Wẽnnaam sẽn vẽneg a Poll t’a kõ wã. A yeelame: “Ra bao-y y mens nafr bal ye. Bao-y y taabã nafr me.”—Fili. 2:4.

11. Zoɛt tagsda bõe yell n yɩɩda, la bõe yĩnga?

¹¹ Sẽn zoet-b zoees sɩd-sɩdã pa get b taoor bal ye. B tagsda zoeesã sẽn na n baas to-to wã me. Baa b sã n nan pa ne zoeesã baasg zĩiga, b tõe n mamsda b yamẽ b sẽn na n ta be, n tõog n paam keoorã. B sẽn tagsd keoorã yell n ka basdẽ wã, kɩtame tɩ b rat n kell n zoe zoeesã n tãag a baasgo.

12. Bõe la a Zeova pʋlem tõndo?

¹² Sã n yaa ne zoees ning tõnd sẽn zoetã, a Zeova pʋlmame tɩ sẽn na n baas-b zoeesã na n paama vɩɩm sẽn kõn sa saasẽ, wall tẽngã sẽn na n lebg arzãnã zugu. Biiblã bilgda keoorã d sẽn na n paamã, hal tɩ d tõe mams d vɩɩmã sẽn na n yɩ noog to-to wã d yamẽ. D sã n tagsd keoorã yell tɩ yaa vẽeneg d yamẽ, d kõn saag n bas tɩ bũmb kɩt tɩ d lak n lʋɩ, n pa le tõe n yik ye.

13. Bõe la tõnd tar tɩ sẽn zoet-b zoees sɩd-sɩdã pa tare?

¹³ Pĩnd Gɛrɛs soolmẽ wã, zoɛtbã ra segd n maoo ne zu-loees wala yaamse, la toogo. B ned kam fãa sẽn da tõe n maan bal yaa a segl a meng sõma, la a teeg a yãoog pãnga. Tõnd me paamdame tɩ b zãmsd tõnd d sẽn segd n zoe d zoeesã to-to wã. La bũmb a to la tõnd tar n paase. D tõe n paamame t’a Zeova sõng-d ne a pãngã sẽn ka to wã. D sã n teeg-a, a pʋlmame t’a na n sõng-d lame tɩ d paam minim, la a kõ-d pãnga.—1 Pɩy. 5:10.

14. Wãn to la 2 Korẽnt rãmb 12:9, 10 goamã sõngd tõnd tɩ d tõogd n maood ne zu-loeesã?

¹⁴ A Poll ra segd n maoo ne zu-loees wʋsgo. Nebã sẽn da tʋʋd-a la b namsd-a a tũudmã yĩngã sẽn yãk a toogo, a ra mi n getame t’a ka pãnga, la a ra segd me n mao ne zu-loɛɛg a sẽn bool tɩ “gõaag yĩngã pʋgẽ.” (2 Kor. 12:7) La a pa tags tɩ zu-loe-kãensã yaa bʋʋm sẽn sek a na bas a Zeova tũub ye. A pʋd n gesame tɩ yaa segb a sẽn paam n na n teeg a Zeova. (Karm-y 2 Korẽnt rãmb 12:9, 10.) A sẽn tall yam-sõng a woto wã kɩtame t’a Zeova sõng-a a zu-loeesã fãa pʋgẽ.

15. D sã n dɩk a Poll togs-n-taare, bõe la d na n paam n yã?

¹⁵ Wakat ninga, nebã tʋʋda tõndo, wall b namsd tõnd d tũudmã yĩnga. Tõe me tɩ d maooda ne bãase, wall yaamse. La d sã n dɩk a Poll togs-n-taare, zu-loe-kãensã fãa tõe n yɩɩ segb tɩ d paam n yã a Zeova sẽn na n sõng-d to-to, tɩ wilg t’a nong-d lame wã.

16. Baa yãmb laafɩ wã pa waooge, bõe la y tõe n maane?

¹⁶ Rẽ yĩnga, bãag n kɩt tɩ y pa le tõe n yiki, wall y kẽnda ne puus-puus bɩ? Yãmb rũmã zabdame, wall y ninã pa le ne sõma bɩ? Sã n yaa woto, y na n tõogame n kell n naag sẽn yaa-b kom-bɩɩs n tar keelmã, n zoe zoeesã bɩ? Sãmbg kae tɩ y na n tõogame! Neb wʋsg yʋʋm sẽn vẽsge, la koms-rãmb n ket n tũud vɩɩmã sore. Pa ne b meng pãng la b tõogd n maand woto ye. B kelgda tigissã ne telefõn wall video-rãmb maasem, n paamd pãng a Zeova nengẽ. B taasda logtoɛɛmbã la neb nins sẽn wat n get-bã koɛɛgã.

17. A Zeova tagsg yaa wãn ne neb nins laafɩ sẽn pa waoogã?

¹⁷ Baa y sã n pa le tõe n tʋm a Zeova tʋʋmã wʋsgo, ra n tol-y n bas-y tɩ rẽ koms y raoodo, n tagsdẽ tɩ y pa le tõe n zoe vɩɩmã zoees ye. A Zeova nonga yãmba, y sẽn tẽed-a, la bũmb nins fãa y sẽn maan a tũudmã pʋgẽ na maan yʋʋm wʋsgã. Yaa masã meng la y rat a sõngr n tɩ yɩɩda, la a pa na n tol n daag-y n bas ye. (Yɩɩn. 9:11) A na n pʋd n kolga yãmb n paase. Saam-bi-poak a ye sẽn maood ne bãas yeelame: “Mam bãasã sẽn tar paasgã, m mikame tɩ m da pa le paamd segb woto n taasd m taabã koɛɛgã ye. Mam miime tɩ baa m sẽn maandã pa waooge, a Zeova sũur nooma ne m modgrã, tɩ kõt-m sũ-noog wʋsgo.” Y sũurã sã n wa sãam wʋsgo, tẽeg-y tɩ y pa y yembr ye. Tags-y mak-sõng ning a Poll sẽn kõ wã yelle, la y tẽeg t’a yeelame yaa: “Mam maanda sũ-noog pãn-komsem pʋgẽ, . . . Bala yaa mam sẽn wat n ka pãng sasa la m tar pãng wʋsgo.”—2 Kor. 12:10.

18. Zu-loe-bʋg sẽn sɩd pa nana la kẽer maood ne?

¹⁸ Bũmb a to me n pa nana ne neb kẽer sẽn tũud vɩɩmã sorã. B maooda ne yɛl neb a taabã sẽn pa mi. Wala makre, b maooda ne deprɛsɩyõ, wall ne yɩɩr sẽn loog noore. Bõe yĩng tɩ d yetẽ tɩ b sẽn maood ne zu-loɛɛg ningã sɩd pa nana? Ned nug sã n kao, wall yaa ne puus-puus la a kẽnda, nebã fãa nee yell ning sẽn tar-a wã, n tõe n maan bũmb n sõng-a. La ned sã n bẽed deprɛsɩyõ, wall a maood ne sũ-sãams sẽn loog noore, a sõngr tõe n yɩɩ toogo, bala tõe n yaa wa a pa tar yell ye. A yellã keelem yaool n yaa wa ned nug sẽn kao. La tõe t’a pa na n paam t’a taabã sõng-a la b kʋm-a, b sẽn pa mi a yellã yĩnga.

19. A Mefibosɛt kibarã wilgda tõnd bõe?

¹⁹ Y sã n maooda ne zu-loees sẽn kɩt tɩ y pa le tõe n tʋm a Zeova tʋʋmã wa pĩndã, tɩ y yaool getẽ tɩ nebã pa wʋmd y yɛlã võore, a Mefibosɛt kibarã tõe n kenga y raoodo. (2 Sãm. 4:4) A ra yaa koamsa, tɩ rĩm a Davɩɩd me le tall tagsg sẽn pa zems a zugu. Woto fãa pa a Mefibosɛt yell ye. Baa ne rẽ, a pa lebg sũ-to-ned ye. A pʋd n da maanda sũ-noog ne bõn-sõma nins sẽn maan a vɩɩmã pʋgẽ wã. A wilgame t’a sũur nooma ne bõn-sõma nins a Davɩɩd sẽn maan n kõ-a wã. (2 Sãm. 9:6-10) Dẽnd a Davɩɩd sẽn wa n kao a Mefibosɛt bʋʋd kɛgrã, a Mefibosɛt pa yik a sũur ye. A pa bas t’a Davɩɩd kongrã kɩt t’a lebg sũ-to-ned ye. A pa ning a Zeova taal me rẽnda yĩng ye. A Mefibosɛt sẽn da rat bal yaa a maan a sẽn tõe fãa n teel rĩm ning a Zeova sẽn yãkã. (2 Sãm. 16:1-4; 19:24-30) A Zeova kɩtame tɩ b gʋls a Mefibosɛt kibarã Biiblã pʋgẽ tɩ d tõe n dɩk yam.—Rom. 15:4.

20. Wãn to la yɩɩrã namsd neb kẽere, la b tõe n basa b yam ne bõe?

²⁰ D tẽed-n-taas kẽer maooda ne yɩɩr sẽn loog noore, hal tɩ lebg wa bãaga. B sã n be neb sʋka, b yamã pa gãe, b sẽn tagsd tɩ nebã get-b lame wã yĩnga. Tõe n yɩɩ toog wʋsg tɩ b zĩnd zãma sʋka, la b pa vaand tigissã la tigis-kãsemsã ye. Yɩl n gom ne ned b sẽn pa mi pa nana ye. Baasgo, b yitame n moond koe-noogã. Yãmb sã n maooda ne yell a woto buudu, bãng-y tɩ y pa y yembr ye. Neb wʋsg me maooda ne y zu-loɛɛgã buudu. Tẽegd-y t’a Zeova sũur nooma ne yãmb sẽn modgd ne y sũur fãa wã. Yãmb sẽn pa komsd raood n basã wilgdame t’a Zeova ningd-y-la barka, la a kõt-y pãnga. * (Fili. 4:6, 7; 1 Pɩy. 5:7) Yãmb sã n ket n tũud a Zeova baa ne yɛlã la sũ-sãamsã, y tõe n basa y yam tɩ y noogda a sũuri.

21. Ne a Zeova sõngre, bõe la d fãa na n tõog n maane?

²¹ La zĩis wʋsg wɛɛngẽ la zoees ning yell a Poll sẽn gomã yaa toor ne zoees sɩd-sɩda. Pĩnd wẽndẽ wã, neb sã n da zoet zoeese, nin-yɛng bal n paamd keoorã. La sã n yaa ne kiris-nebã zoeesã, ned ning fãa sẽn na n tõog n zoe zoeesã n baasã na n paama keoorã sẽn yaa vɩɩm sẽn kõn sa wã. (Zã 3:16) Zoees sɩd-sɩd pʋgẽ, zoɛtbã fãa segd n tara keelem sõma. Sã n pa rẽ, yɩta toog tɩ b tõog n zoe zoeesã n wa paam keoorã. La tõnd yẽ nengẽ pa woto ye. D wʋsgã pa tar keelem woto ye. Baasgo, d ket n tõogda toogo. (2 Kor. 4:16) Ne a Zeova sõngre, tõnd fãa na n tõog n zoe zoeesã n tãag a tɛka!