1. Hadia zinangea tafalua?

HADIA omasiʼö fao ba watandrisa hewaʼae na no öʼila waʼabua wamalua yaʼia, mendrua manö ba ginötö mofökhö mazui marase ndraʼugö? Tatu manö löʼö. Hewaʼae simanö, iwaʼö sinenge sotöi Faulo wa fefu niha Keriso no fao ba watandrisa. (Heb. 12:1) Fefu ita, si no atua hegöi sawuyu-wuyu, abölö mazui marase, moguna anau gölöda irugi gamozua enaʼö tola tatema mbuala si no ifabuʼu khöda Yehowa.​—Mat. 24:13.

2. Simane nisura ba 2 Timoteo 4:7, 8, hana wa aoha khö Waulo ba wameʼe mene-mene?

² No fagohi Waulo ”irugi gamozua”. (Baso 2 Timoteo 4:7, 8.) Daʼö mbörö wa aoha khönia ba wameʼe mene-mene ba niha böʼö enaʼö lafalua zimane nifaluania. Hizaʼi, hadia zindruhunia geluaha watandrisa niwaʼö Waulö?

3. Hadia watandrisa nitutunö Waulo?

³ Ba wamaʼema sambua famahaʼö si tohude, itaria iʼogunaʼö Faulo ngawalö zoʼamakhaita ba watandrisa nifalua ba Yunani ba götö siföföna. (1 Kor. 9:25-27; 2 Tim. 2:5) Ba zi hauga kali, iʼogunaʼö duma-duma watandrisa fagohi ba woʼamaedolagö faʼauri niha Keriso. (1 Kor. 9:24; Gal. 2:2; Fil. 2:16) Ibörögö ”fatandri” zi samösa niha, me ilulu waʼaurinia khö Yehowa ba tebayagö idanö. (1 Fet. 3:21) No fagohi ia irugi gamozua, me itema mbuala faʼauri si lö aetu moroi khö Yehowa.​—Mat. 25:31-34, 46; 2 Tim. 4:8.

4. Hadia nitutunöda ba artikel daʼa?

⁴ So ösa waʼafagölö watandrisa fagohi ba lala waʼauri niha Keriso. Datatutunö tölu ngawalö ba gotaluania. Si oföna, moguna fagohi ita ba lala satulö. Si dua, moguna taʼosambuaʼö dödöda ba gamozua. Ba si tölu, lö taböhöli fagohi hewaʼae na so daha-taha.

5. Hadia lala waʼauri niʼoʼöda, ba hadia mbörö?

⁵ Enaʼö tola labeʼe mbuala ba niha si fagohi, moguna fagohi ia ba lala si no mutatugöi. Simane daʼö göi, na omasi ita tatema mbuala yaʼia daʼö faʼauri si lö aetu, moguna taʼoʼö lala waʼauri si no ituturu Keriso. (Hal. 20:24; 1 Fet. 2:21) Hizaʼi, lö omasi Zatana hegöi niha si so barö wamatörönia, na taʼoʼö lala waʼauri si no ituturu Keriso. Omasi ira na tatörö ”lala si lö sökhi andrö khöra”. (1 Fet. 4:4) Laʼoʼaya lala waʼaurida, ba lawaʼö wa abölö sökhi lala waʼaurira. Lawaʼö tödöra wa tola lafalua gofu hadia ia börö me daʼö lala waʼauri nitöröra. Hizaʼi, lö atulö daʼö.​—2 Fet. 2:19.

6. Hadia wamahaʼö si tola öhalö ba zalua khö Brian?

⁶ Na so niha soloʼö lala waʼauri gulidanö nifatörö Zatana, hasambalö iʼila wa tenga itugu teʼefaʼö ia börö lala waʼaurinia andrö. Sindruhunia, iʼosawuyu ia Satana hegöi isö-isö dödönia samösa. (Rom. 6:16) Nehegö duma-duma Brian. Lafahaʼö ia ira satuania ba woloʼö lala waʼauri nituturu Yesu. Hizaʼi, me no tobali ia si bohou ebua ia, lö faduhu dödönia wa tola irasoi waʼomuso dödö na iʼoʼö lala waʼauri andrö. Ihalö gangetula Brian ba woloʼö lala waʼauri niha nifatörö Zatana. Imane Brian, ”Ba zi lö udöna-döna, sandru ndraʼo ba wamalua amuata si lö sökhi, börö me tola ufalua gofu hadia ia zomasi-masi dödögu. Ba gafuriata, uʼogunaʼö narkoba, ulau maminu, ba ufalua gamuata fohorö. Ba zi hauga fakhe aefa daʼö, ibörögö uʼogunaʼö ngawalö narkoba sabölö alawa dosis, irege itugu abölö-bölö waʼasandrugu. Ibörögö ufamawa narkoba ba wombönökhi soguna khögu ba wotuhini lala waʼaurigu andrö.” Ba gafuriata, ihalö gangetula Brian ba woloʼö lala waʼauri somasi Yehowa. Ibulöʼö lala waʼaurinia ba tebayagö ia idanö me 2001. Iadaʼa, owua-wua sibai dödönia börö me iʼoʼö lala waʼauri nituturu Keriso. *

7. Moloʼö Mataiʼo 7:13, 14, hadia lala si dombua si so tanö fönada?

⁷ Moguna sibai tafili lala satulö! Omasi Zatana na tabato wagohisa ba lala sise-ise ”saekhu ba waʼauri”, ba numalö ita ba lala sebolo nitörö niha sato ba gulidanö andre. Ato niha somasi ba wanörö lala sebolo ba aoha khöra ba wanörö yaʼia. Hizaʼi, lala andrö no ”saekhu ba waʼatekiko”. (Baso Mataiʼo 7:13, 14.) Enaʼö lö mamalö tatörö lala satulö ba lö mangoloi dödöda, moguna faduhu dödöda khö Yehowa ba tafondrondrongo ia.

8. Na manendre niha si fagohi, hadia nifaluania?

⁸ Enaʼö lö manendre niha si fagohi, moguna lafaigi-faigi lala si so fönara. Hewaʼae simanö, tola manö nasa manendre ira börö nawöra si fagohi mazui börö me so goho-koho ba lala nitöröra. Hizaʼi, hewaʼae na alau ira, ifuli zui lalau mosindro ba latohugö fagohi. Lö laʼosambuaʼö dödöra ba zameʼe manendre ira. Hizaʼi, laʼosambuaʼö dödöra ba gamozua hegöi ba mbuala nidöna-dönara.

9. Na manendre ita, hadia zinangea tafalua?

⁹ Ba watandrisa ba wamati andre, tola manö asese manendre ita, fasala wehededa mazui amuatada. Mazui, te so ndra talifusöda samalua zala sangafökhöiʼö tödöda. Sindruhunia, lö moguna tokea ita na alua daʼö. Fefu ita lö moʼahonoa, ba fagohi ita ba lala sise-ise saekhu ba waʼauri. Andrö, itaria ”fatandru” ita khö ndra talifusöda. Iwaʼö Faulo wa itaria ’so mbörö waʼabao dödöda’ khö ndra talifusöda. (Kol. 3:13) Hizaʼi, moroi na taʼosambuaʼö dödöda ba zameʼe manendre ita, abölö sökhi na taʼosambuaʼö dödöda ba mbuala nitemada. Ba na manendre ita, moguna ifuli talau mosindro ba tatohugö fagohi. Na lö aetu-aetu wönuda ba lö saʼae tafosumange Yehowa, tebai tarugi gamozua ba lö tatema mbuala. Baero daʼö, tola manö tobali ita daha-taha ba niha böʼö samorege ba wagohisa.

10. Hadia zinangea tafalua enaʼö lö tobali ita ”fangala” ba niha böʼö?

¹⁰ So lala tanö böʼö enaʼö lö tobali ita ”fangala” khö ndra talifusöda. Moguna taforege enaʼö böi fatandro ita ba zomasi dödöda samösa. (Rom. 14:13, 19-21; 1 Kor. 8:9, 13) Na tafalua daʼö, no faböʼö ita moroi ba niha si fahindri ba watandrisa sindruhu. Niha si fagohi andrö, laforege enaʼö ha yaʼira zanema buala. Sabölö laʼangeragö yaʼia daʼö, hewisa lala enaʼö yaʼira zi möna. Tola manö latuliʼö zi fagohi tanö böʼö enaʼö yaʼira zangagö föna. Hizaʼi, tenga simane daʼö ita. Lö fahindri ita khö ndra talifusöda. (Gal. 5:26; 6:4) Tobali, omasi ita na oya niha nitoloda enaʼö fao ira khöda ba wagohisa irugi gamozua, hegöi ba wangokhögö buala faʼauri si lö aetu. Daʼö mbörö wa taforege ba wamalua mene-mene nibeʼe Waulo  ba ’woʼangeragö soguna ba niha böʼö, tenga ha soguna khöda manö’.​—Fil. 2:4.

11. Hezo laʼosambuaʼö dödöra niha si fagohi, ba hadia mbörö?

¹¹ Tenga ha lala si so tanö fönara nifaigi-faigi niha si fagohi, hizaʼi laʼosambuaʼö göi dödöra ba gamozua. Hewaʼae na lö nasa niʼilara gamozua andrö, tola lakhalaigö wa no larugi gamozua ba latema mbuala. Na lafalua daʼö, tola fagohi ira si fao faʼaterou dödö.

12. Hadia nifabuʼu Yehowa khöda?

¹² Hadia nitemada na mofozu ita ba wangasiwai fatandrisa ba wamati? No ifabuʼu Yehowa wa ibeʼe khöda mbuala faʼauri si lö aetu, ba zorugo mazui ba gulidanö. No itutunö khöda Sura Niʼamoniʼö hadia manö mbuala nitemada ba zi so miföna, enaʼö tola takhalaigö hewisa waʼomuso dödö nirasoida dania. Na lö mamalö takhalaigö wanötöna moroi khö Yehowa, lö awuwu ita ba wagohisa ba wamati.

13. Hadia waʼatohudeda moroi khö ndra si fagohi?

¹³ Niha si fao ba watandrisa fagohi ba Yunani me götö siföföna, lataögö ngawalö daha-taha, simane faʼafökhö hegöi faʼamarase. Hizaʼi, laʼodaligö wamomaha si no latema hegöi faʼabölöra samösa. Abölö tohude ita moroi khöra. Tenga ha famomaha nitemada enaʼö lö awuwu ita ba wagohisa. Tatema göi waʼabölö moroi khö Yehowa, faʼabölö si tola manolo yaʼita ba ngawalö hadia ia. Na taʼodaligö Yehowa, ifabuʼu wa ifomaha ita ba ibeʼe khöda waʼabölö!​—1 Fet. 5:10.

14. Hewisa 2 Korindro 12:9, 10 tola möi fanoloda ba wanaögö daha-taha?

¹⁴ Iforege Faulo ba wanaögö ngawalö daha-taha. Duma-dumania, laʼoʼaya ia niha ba göna ia folohi. Itaria göi irasoi Faulo wa lö faʼabölönia, ba so ’ndroi bakha ba mbotonia’. (2 Kor. 12:7) Hizaʼi, hewaʼae na alua khönia daha-taha andrö, lö ibato Faulo ba wamosumange Yehowa. Ba wamaiginia, daha-taha andrö zameʼe khönia inötö ba wangodaligö Yehowa. (Baso 2 Korindro 12:9, 10.) Börö lala wangera-ngera Waulo andre, itolo ia Yehowa ba wanaögö fefu daha-taha salua khönia.

15. Na taʼoʼö duma-duma Waulo, hadia nirasoida?

¹⁵ Simane Faulo, tola manö göi laʼoʼaya ita mazui göna ita folohi börö wamatida. Tola manö göi tarasoi waʼamarase hegöi fökhö. Hizaʼi, na taʼoʼö duma-duma Waulo, fefu daha-taha nitaögöda tola tobali fanolo khöda ba worasoi fotuhini moroi khö Yehowa safönu faʼomasi.

16. Hadia zi tola öfalua hewaʼae alö waʼabölömö?

¹⁶ Hadia tebai öfazawaʼö ba naha wemörömö mazui ba gurusi roda so ndraʼugö? Hadia afökhö mbalö duhimö mazui ambö öʼila-ila niha? Na örasoi zimane daʼö, hadia tola fao ndraʼugö fagohi khö ndra talifusöda sawuyu-wuyu ba sabölö? Tatu manö tola! Ato ndra talifusö si lö mamalö fagohi ba wogamö faʼauri, hewaʼae na no alawa ndröfira mazui alö waʼabölöra. Tebai lafalua na dali waʼabölöra samösa. Latema waʼabölö moroi khö Yehowa, ba ginötö lafondrondrongo hadia nifaʼema ba gangowuloa na lafake HP, mazui lafaigi rekamannia ba Internet. Laforege göi wanuriaigö khö ndra doto, sohalöwö ba ruma saki, hegöi khö ndra talifusöra si möi mamaigi yaʼira.

17. Hewisa dödö Yehowa ba niha si tebai boto?

¹⁷ Na lö oya saʼae zi tola öfalua khö Yehowa, böi ide-ide dödömö ba öwaʼö tödöu wa lö anau gölömö irugi gamozua. Iʼomasiʼö ndraʼugö Yehowa börö me mamati ndraʼugö khönia, ba no öforomaʼö waʼanau gölö ba wamosumange yaʼia irugi ba zi  hauga fakhe. Iadaʼa, moguna khöu wanolo moroi khönia si töra moroi ba zilalö, ba lö irai iröi ndraʼugö. (Zin. 9:10) Itugu ifahatö ia khöu. Nehegö hadia niwaʼö dalifusöda ira alawe samorege ba wolawa fökhö nitaögönia, ”Börö me mofökhö-fökhö manö ndraʼo, itugu alö ginötögu ba wamalua fanuriaigö. Hizaʼi aboto ba dödögu wa tola uʼomusoiʼö dödö Yehowa ba ngawalö nifaluagu, hewaʼae na no ide-ide daʼö. Daʼö zangaʼasogö khögu faʼomuso dödö.” Na ide-ide dödömö, böi olifuʼö wa lö iröi ndraʼugö Yehowa. Angeragö duma-duma Waulo, ba törö tödöu wehede si möi fondrara dödö andre, ”Omuso dödögu me ambö faʼabölögu, . . . Na sambö faʼabölö ndraʼo, ba daʼö abölödo.”​—2 Kor. 12:10.

18. Hadia manö daha-taha nitaögö ndra talifusöda?

¹⁸ So daha-taha tanö böʼö salua khö ndra talifusöda si fagohi ba lala sofeta ba waʼauri. Laʼokhögö gabula dödö si lö laʼila niha böʼö. Duma-dumania, moguna laforege ba wolawa fökhö wangera-ngera, simane faʼafawuka wangera-ngera mazui faʼaombö dödö sabölö-bölö. Hana wa abua sibai zalua ba nono mbanua Yehowa andre? Na no afatö döla zi samösa niha mazui modadao ia ba gurusi roda, laʼila ia niha böʼö ba tola manö terou dödöra ba wanolo yaʼia. Hizaʼi, lö oroma wa so gabula dödö ba niha samorege ba wolawa fökhö wangera-ngera. Hewaʼae simanö, sindruhunia larasoi göi waʼafökhö simane salua ba niha safatö töla. Hizaʼi, börö me lö laʼila daʼö niha böʼö, tola manö lö latema wanolo hegöi foʼameʼegö tödö soguna khöra.

19. Hadia wamahaʼö si tola tahalö moroi ba duma-duma Mefibose?

¹⁹ Tola manö ötaögö gabula dödö si tola manaisi yaʼugö ba wamosumange Yehowa. Tola manö örasoi wa lö tefaudu lala wangera-ngera niha böʼö ba wamaigi salua khöu. Na daʼö zalua, tola möi fangabölöʼömö duma-duma Mefibose. (2 Zam. 4:4) Moguna iforege ba wolawa faʼatebai mbotonia, ba lö atulö nifalua Razo Dawido khönia. Sindruhunia, tenga börö zalania wa itaögö daʼö Mefibose. Hewaʼae simanö, ifaigi zalua khönia andrö si fao fangera-ngera si sökhi. Iʼameʼegö tödö ngawalö zi sökhi si no itema. Iʼandrö saohagölö me no iforomaʼö khönia Dawido waʼasökhi dödö. (2 Zam. 9:6-10) Andrö, me lö tefaudu lala wangera-ngera Dawido khö Mefibose irege ifalua khönia zi lö atulö, itandraigö Mefibose ba wangokhögö faʼaboto ba dödö sanandrösa ba zalua khönia. Lö abao dödönia ba zala nifalua Dawido. Lö itahigö Yehowa ba ngawalö nifalua Dawido khönia. Iʼosambuaʼö  dödönia ba zi tola ifalua ba wotuhini razo si no ituyu Yehowa. (2 Zam. 16:1-4; 19:24-30) Itatugöi Yehowa enaʼö musura ba Zura Niʼamoniʼö duma-duma Mefibose irege tola tafahaʼö ita khönia.​—Rom. 15:4.

20. Hadia lua-lua waʼaombö dödö nirasoi ndra talifusöda, hizaʼi hadia nifaduhusira tödö?

²⁰ Börö waʼaombö dödö sabölö-bölö, so ösa ndra talifusöda sanizi-nizi ba lö khöra faʼabarani na falukha ira ba niha ba waʼaurira si ero maʼökhö. Tola manö lö ohahau dödöra na so ira ba gotalua niha sato. Hewaʼae simanö, lö laröi weʼamöi ba gangowuloa hegöi ba kebaktian. Mazui, tola manö abua khöra fahuhuo ba niha si lö laʼila. Hizaʼi, hasambalö manuriaigö ira ba niha. Na alua khöu zimane daʼö, tenga ha yaʼugö zorasoi yaʼia. Ato göi ndra talifusöda zorasoi simane daʼö. Törö tödöu wa omuso dödö Yehowa ba wamorege si no öfalua soroi ba dödö. Irugi iadaʼa, lö faröi ndraʼugö. Daʼö dandra wa ifahowuʼö ndraʼugö Yehowa ba ibeʼe waʼabölö soguna khöu. * (Fil. 4:6, 7; 1 Fet. 5:7) Börö daʼö, na lö öböhöli wamosumange Yehowa hewaʼae ötaögö waʼatebai mboto mazui fökhö wangera-ngera, yafaduhu dödöu wa tola ibeʼe khöu waʼomuso dödö Yehowa.

21. Börö wanolo Yehowa, hadia zi tola tafalua?

²¹ Taʼandrö sibai saohagölö börö me faböʼö watandrisa nitutunö Waulo faoma fatandrisa sindruhu. Ba watandrisa sindruhu me götö Zura Niʼamoniʼö, ha samösa niha zi tola manema buala. Hizaʼi, fefu niha si fagohi irugi gamozua ba watandrisa saekhu ba waʼauri, tola latema mbuala waʼauri si lö aetu. (Yoh. 3:16) Baero daʼö, moguna abölö mboto niha si fao ba watandrisa sindruhu. Na löʼö, tebai möna ira. Hizaʼi ba watandrisa si fao yaʼita, oya ba gotaluada zi tebai boto. Hewaʼae simanö, tola anau gölöda ba wagohisa. (2 Kor. 4:16) Börö wanolo Yehowa, tola fagohi ita irugi gamozua!