1. Itwe bosi tutolere erikolaki?

WANGANANZA eritibita omo matangwa owo unasi ngoko akalire, kutibu-tsibu wamabya iwulwere kutse iwuluhire? Alinga iyehe. Aliwe, omukwenda Paulo mwabugha ati aBakristo b’ekwenene bosi bali omo matangwa. (Ebr. 12:1) Kandi itwe bosi, abalwana kutse abakekeluhire, abawite akaghala kutse abaluhire, tutolere eriyiyinia erihika oko nduli tutoke eribana embita kutse ekihembo ekyo Yehova akasyatuha.​—Mat. 24:13.

2. Ngoko kiri omo 2 Timoteo 4:7, 8, busanaki Paulo mwabugha n’obunya-mutima obuwene?

² Paulo abya asingene eribugha kutse mwabugha n’obunya-mutima obuwene kundi iye “mwayitsinga omo matangwa n’eribugha olughendo.” (Soma 2 Timoteo 4:7, 8.) Aliwe, amatangwa awo Paulo akanayako ni wahi?

3. Amatangwa awo Paulo akanayako ni wahi?

³ Erikangirirya emyatsi milebe y’omughaso Paulo iniakanakolesaya emyatsi eyabya ikakolwa omo bitsange by’omo kihugho ky’Abagiriki kya kera. (1 Kor. 9:25-27; 2 Tim. 2:5) Ngendo nyingyi mwasosekania engebe y’oMukristo n’eritibita omo matangwa. (1 Kor. 9:24; Gal. 2:2; Flp. 2:16) Omundu akatsuka “amatangwa” ayo omughulu akayiherera oko Yehova n’eribatisibwa. (1 Pet. 3:21) Akabugha amatangwa ayo Yehova abimuha ekihembo ky’engebe y’erikota.​—Mat. 25:31-34, 46; 2 Tim. 4:8.

4. Tukendikania okuki omo mwatsi ono?

⁴ Ni myatsi yahi eyisosene omo katikati k’engebe y’oMukristo n’eritibita omo matangwa w’ebisando? Hali emyatsi mingyi eyisosene. Tulangire eyisatu ya kuyo. Ow’erimbere, litolere itwakwama amatangwa awatolere; ow’akabiri litolere itwayitsinga  tutoke eribugha olughendo; n’ow’akasatu, litolere isitwaleka eritibita n’omo twangabana amaligho.

5. Litolere itwakwama enzira yahi, kandi busanaki?

⁵ Eribana ekihembo omo matangwa w’ekihugho, abatibiti batolere erikwama enzira eyiryateghekanibawa erikolerwamo amatangwa ayo. Kutya, twamanza eribana ekihembo ky’engebe y’erikota, litolere itwakwama amatangwa w’eKikristo, kutse enzira y’engebe. (Emib. 20:24; 1 Pet. 2:21) Aliwe, Sitani haghuma n’abandu abakamukwama sibanzire tukakola tutya; banzire “itwasangira nabo.” (1 Pet. 4:4) Bakabugha muhanda oko nzira y’engebe eyo tukakwama n’eribugha bati eyabo yo yuwene; kandi bati yikaletera obwiranda. Aliwe ayo ni mabehi.​—2 Pet. 2:19.

6. Eky’erileberyako kya Brian kyamakwighisyaki?

⁶ Hakisigha hake abosi abakasondalawa n’ekihugho kya Sitani ibalangira ngoko enzira eyo basombola siyiriletera obwiranda; aliwe yikaleka ibabya bakobe ba Sitani n’ab’esyongumbu syabo. (Rom. 6:16) Tulebaye eky’erileberyako kya Brian. Ababuti biwe mubamuhira mw’omuhwa w’erikwama enzira y’eKikristo eyikakolaya oko ngebe. Aliwe omughulu abya mulwana, mwatsuka eriyibulya enzira eyo nga yanganamuletera obutseme. Brian mwasombola eritibita haghuma n’abakakwama ebihano bya Sitani. Brian akabugha ati: “Munalangira ngoko obwiranda obo nabya ngayitsutsa bwanganikolirye omo bwiko bw’eribya mukobe w’emyatsi mibi. Kera, ingakolesaya muhanda obwabu n’esyodawa esikatamiraya, kandi munabya musingiri. Omo myaka mingyi eyakwama, munatsuka eribya ngakolesya muhanda n’esindi dawa esikatamiraya esikalire kutsibu, neryo munabya mukobe w’esyodawa nyingyi sya kusyo. . . . Munatsuka eribya ngaghulya esyodawa esikatamiraya nitoke eribana ebyo nilaghireko.” Oko nduli, Brian mwatsuka erikwama esyokanuni sya Yehova. Mwalua omo nzira nyibi eyabyamo, neryo mwabatisibwa omo mwaka 2001. Lino atsemire kutsibu kundi akakwama enzira y’eKikristo eyikakolaya oko ngebe. *

7. Ngoko kiri omo Matayo 7:13, 14, embere syetu hali esyonzira ibiri syahi?

⁷ Tutsemire kundi twabirisombola enzira eyitolere erikwamwa! Sitani anzire itwaleka eritibita omo kayira kake “akakakolaya oko ngebe” n’erikwama enzira nene-nene eyo abandu bangyi oko kihugho kino balimo. Enzira eyo yikalabamo abandu bangyi kandi kyolobire erilaba muyo. Aliwe “yikakolaya okw’ihera.” (Soma Matayo 7:13, 14.) Litolere itwayiketera Yehova n’erimwowa imo twatoka erisighala omo nzira eyuwene  n’eritendiheribwa n’abandu abatekwama esyokanuni sya Yehova.

8. Oyukatibita omo matangwa amatwikala, akakolaki?

⁸ Abakatibita omo matangwa w’olughendo luli bakasamalira enzira eyiri embere syabo yo ndeke bakasyatwikala. Aliwe, butaminya, omutibiti mulebe anganatwikala oko ghundi kutse inyatoghera omo kyuna. Amabiyitinira, akahangana n’erilola embere eritibita. Abakatibita sibalihira amalengekania wabo oko ekilyaleka ibatwikala, aliwe bakahiragho okw’ibugha olughendo lwabo n’oko kihembo ekyo banzire eribana.

9. Twamabitwikala, litolere itwakolaki?

⁹ Omo matwangwa awo tulimo, twanganatwikala ngendo nyingyi, omwitandaghalwa omo ebyo tukabugha kutse ebyo tukakola. Kutse abatibiti balikyetu banganakola amakosa awakatubuna mutima. Ekyo kyamabya, sitwangasweka. Itwe bosi situhikahikene, kandi itwe bosi tukatibita omo nzira nge eyikakolaya oko ngebe. Neryo hanganabya endambi omughuma w’okw’itwe “inyatwikalya” oghundi. Paulo mwaminya ngoko hanganabya endambi itwabya ‘n’omwatsi owakaleka itwayilungumula oko ghundi.’ (Kol 3:13, NWT) Aliwe omo mwanya w’erihira amalengekania oko ekilyatutwikalaya, litolere itwalengekania kutsibu oko kihembo ekyo tukasyabana. Twamabitwikala, ngambe itwahangana n’erilola embere eritibita. Twamabihitana n’eribika ekinigha, n’erighana erihangana, isitwendisyabugha olughendo n’eribana ekihembo. Eritomeka okw’ekyo, itwanganabya kindu ekyangatwikalya abandi abakayikasa eritibita omo nzira nge eyikakolaya oko ngebe.

10. Ni kyahi kyo kyangatuwatikya eritendibya “kindu ekikatwikalaya” abandi?

¹⁰ Eyindi nzira eyangatuwatikya eritendibya “kindu ekyangatwikalya” abatibiti balikyetu ry’erileka abandi bakole emyatsi omo nzira eyo banzire omughulu si kibi erikola batya, butsira eribakasa erikwama enzira yetu y’erikola emyatsi. (Rom. 14:13, 19-21; 1 Kor. 8:9, 13) Omughulu tukakola tutya situlibya ng’abatibiti b’ekihugho. Bakalwira ekihembo n’abandi, n’obuli mughuma w’okw’ibo akayikasa iye yunabane ekihembo ekyo. Abatibiti abo bakalengekanaya kutsibu oko ndundi yabo ibobene. Neryo banganasonda erihumangirya  abatibiti balikyabo batoke eribalabako. Aliwe itwe situlilwira ekihembo n’abalikyetu. (Gal. 5:26; 6:4) Ekyo tukasonda ry’eriwatikania ngoko twangatoka eribugha olughendo n’eribana ekihembo ky’engebe. Neryo tukayikasa erikolesya erihano lya Paulo eryasondolawa n’ekirimu ky’oMungu lino, “simurondaye edundi yenyu inywibene, aliwe n’ey’abandi.”​—Flp. 2:4, NWT.

11. Ekyo omutibiti akahira omo malengekania ni kyahi, kandi akakola atya busanaki?

¹¹ Eritomeka okwisamalira enzira eyiri embere syabo yo ndeke, abatibiti b’ekihugho bakalengekanaya kutsibu okwibugha olughendo. N’omo batebangalangira oho bakenditwirirya, omo malengekania banganalangira bakahikaho n’eribana ekihembo. Erihira ekihembo ky’omo malengekania kikaleka ibabya ibane n’omuhwa w’eritibita erihika aho bakenditwirirya.

12. Omo lukogho lwiwe, Yehova abiritulaghaki?

¹² Omo matangwa awo tulimo, omo lukogho lwiwe, Yehova abirilagha eriha abandu biwe abakendisyabugha olughendo ekihembo ky’engebe y’erikota omo lubula kutse oko kihugho paradiso. EBiblia yikakanaya oko kihembo ekyo, tutoke erilangira omo malengekania ngoko engebe yetu yikendisyuwana kutsibu. Omughulu tukabya itunemulengekania oko myatsi y’omo biro ebikasa eyo Yehova abiritulagha, tukayikasa kundu erihanda omutima n’omo hangabya emyatsi eyangatutwikalya.

13. Tuwite endundi yahi eyo abatibiti b’ekihugho sibawite?

¹³ Abatibiti ababya bakakola oko bitsange by’omo kihugho ky’Abagiriki, ikikatolera ibayiyinia omo myatsi eyikalire ng’enduhi n’amaghali. Aliwe ibakayiketera eribegheribwa lyabo n’akaghala kabo. Netu tuli ng’abatibiti abo kundi tukabegheribawa, tukakangiriribawa ngoko twangatibita omo matangwa awo tulimo. Aliwe itwe tuwite endundi eyo abatibiti b’ekihugho sibangabana. Twanganabana akaghala erilua oko Yehova, kandi akaghala kiwe sikangahwa. Twamabiyiketera Yehova, akatulagha eritubegherya n’erituha akaghala!​—1 Pet. 5:10.

14. Erisako 2 Abanya Korinto 12:9, 10 likatuwatikaya liti eriyiyinia omughulu tukalaba omo myatsi eyikalire?

¹⁴ Paulo mwalaba omo myatsi mingyi eyikalire. Abandu mubamubughako muhanda n’erimwaghalya, kandi ihakanabya endambi inyabula akaghala, neryo mwayiyinia akalaba omo myatsi eyikalire eyahulamo “erihwa omo mubiri.” (2 Kor 12:7, NWT) Aliwe omo mwanya w’erileka erikolera Yehova busana n’emyatsi eyikalire eyo, mwalangirayo mo kanya k’eriyiketera Yehova. (Soma 2 Abanya Korinto 12:9, 10.) Kundi Paulo mwataleka amaligho amubune mutima, Yehova mwamuwatikya omo maligho wosi ayo.

15. Twamabigha Paulo, itukendiyilangiriraki?

¹⁵ Netu kutya abandu banganatubughako muhanda n’eritwaghalya busana n’obwikirirya bwetu. Kandi twanganabya balwere kutse itwabya n’enduhi. Aliwe twamabigha Paulo, itukendibya n’akanya k’eriyilangirira obuwatikya bwa Yehova ob’olwanzo omo buli mwatsi owakalire.

16. N’omo wangabya mulwere kutse mulema, wanganatoka erikolaki?

¹⁶ Une mulwere kutse mulema kwehi? Wabirikonongoka kutse sighukilangira ndeke? Byamabya bitya, wanganasyatoka eritibita haghuma n’abakiri balwana kandi abakalire kwehi? Kwenene wanganatoka! Abakekeluhire bangyi n’abalema banemutibita omo nzira eyikakolaya oko ngebe. Sibangatoka erikola batya omo kaghala kabo ibobene. Aliwe, bakabana akaghala erilua oko Yehova omughulu bakahulikirira emihindano y’eKikristo oko telefone kutse ibakwamayo oko video. Kandi bakakola oko mubiri w’eriyira abigha omwitulira abanganga, abakatsungabo, n’abandu b’omo kihanda kyabo.

17. Yehova akayowa ati busana n’abandu abolobire kinya-mubiri?

 ¹⁷ Wamabya isiwangatoka erikola ebyosi ebyo wanzire erikola omo mubiri wa Yehova, isiwabunika mutima n’erilengekania uti siwangatoka eriyiyinia erihika oko nduli y’ekihugho kino. Yehova akwanzire kundi uyiketere iye kandi busana n’ebyosi ebyo wabirimukolera omo myaka mingyi. Ulaghire oko buwatikya buwe oko biro bino kwilaba ebindi biro, kandi syendikulekerania n’ahake. (Esyo. 9:10) Nibya, akendiyitunda hakuhi naghu. Omumbesa mughuma mulwere mwabugha ati: “Omubiri waghe akalola embere eritsanda, ngalangira ngoko emyanya y’erisangira ekwenene y’eBiblia haghuma n’abandi yikakeha. Aliwe ninasi ngoko ebike ebyo ngakola bikatsemesaya Yehova, kandi bikaleka inabya n’obutseme.” Omughulu wamabunika mutima, wibuke ngoko sighuli iwuwene. Lengekanaya oko ky’erileberyako kya Paulo, n’eryibuka ebinywa biwe ebikasikaya mutima bino: “Neryo ngatsemera obolo, . . . Omughulu indi molo, oko mughulu oyo niri n’amaka.”​—2 Kor 12:10.

18. Abaghombe ba Yehova balebe bakalaba omo maligho wahi owo abandi sibangalangira?

¹⁸ Abandu balebe abakatibita omo nzira eyikakolaya oko ngebe bakabana oghundi mwatsi owakalire. Bakalaba omo maligho owo abandi sibangalangira. Eky’erileberyako, bakaghalirawa omo mutima kutse bawite erihangya-hangya erikalire. Busanaki abaghombe banzwa ba Yehova aba kwenene bakalaba omo maligho aw’akalire? Kundi omundu oyutawite okuboko kutse omulema oyukaghendera oko kinga ky’ebilema, abandu bosi banganalangira amaligho awalimo neryo ekyo kyanganabakuna erimuwatikya. Aliwe, abakaghalirawa omo mutima kutse omo mutwe, sihalibya ekikakanganaya ngoko bakaghalawa. Obwaghali obo bakabya nabo, ko bune ng’ob’omundu oyutwikireko okuboko kutse okughulu; aliwe abandu sibalibakwira obulighe bughumerera ng’oyulehemire.

19. Eky’erileberyako kya Mefiboseti kyamatwighisyaki?

¹⁹ Wamabya iwuwite obulema bulebe neryo iwalengekania uti abandu sibasi ngoko ukaghalawa, eky’erileberyako kya Mefiboseti kyanganakusubya mutima omonda. (2 Sam. 4:4) Abya mulema, kandi mwatswerwa muhanda n’omwami Dawidi. Mefiboseti mwatakola ekyosi-kyosi ekyangalekire emyatsi ng’eyo iyamuhikira. Aliwe, mwataleka ekyo kimuletere amalengekania awatuwene; mwatsemera emyatsi mibuya eyabana omo ngebe yiwe. Abya n’erisima linene busana n’olukogho olo Dawidi amukanganaya kera. (2 Sam. 9:6-10) Neryo, omughulu Dawidi amutswera muhanda, Mefiboseti mwasonda eriminya ekiryaleka Dawidi inyakola atya. Mwatabunika mutima kundi Dawidi amamusoha muhanda. Kandi mwatabugha muhanda oko Yehova busana n’ekyo Dawidi abya inyabirikola. Mefiboseti mwalengekania oko ekyo angakola atoke eritendiyisamambula oko mwami oyo Yehova  abirihiraho. (2 Sam. 16:1-4; 19:24-30) Yehova mwahira eky’erileberyako ekyuwene kya Mefiboseti omo Biblia tutoke erighira kukyo.​—Rom. 15:4.

20. Erihangya-hangya lyanganaleka abaghala n’abali betu balebe ibayowa bati, aliwe litolere ibaminya mwatsi wahi?

²⁰ Busana n’erihangya-hangya erikalire, abaghala n’abali betu balebe bakubaha n’eribya omo ngitsi, nibya n’omo myatsi eyitehanga-hangaya abandi bandu. Kyanganabakalako eribya omo bandu bangyi, aliwe bakinalola embere erihika oko mihindano y’endeko n’oko mihindano minene-minene. Kikabakalira erikania n’abandu abo batabeghereko, aliwe bakanakanaya n’abandu bakatulira. Wamabya iwuli omo mibere ng’eyo, uminye ngoko siwuli iwuwene. Abakayowa ngawe ni bangyi. Uminye ngoko Yehova akatsemera ebyo ukakola n’enafsi yaghu yosi. Kundi unemulola embere, ekyo kikakanganaya ngoko Yehova anemukutsumula n’erikuha akaghala ako ulaghireko. * (Flp. 4:6, 7; 1 Pet. 5:7) Wamabya iwunemukolera Yehova ukalwa n’emyatsi eyikalire eyikakwaghalaya kinya-mubiri n’omo mutima, uminye ngoko unemutsemesya Yehova.

21. Omo buwatikya bwa Yehova, itwe bosi tukasyatoka erikolaki?

²¹ Kwenene, amatangwa w’ekihugho asighene kutsibu n’amatangwa awo Paulo akanayako. Omughulu wa kera, omo matwangwa w’eritibita omo bisando omundu mughuma musa iyukabana ekihembo. Aliwe, obuli mundu oyukatibita butaleghula omo matangwa w’eKikristo awakakolaya oko ngebe, akabana ekihembo ky’engebe y’erikota. (Yoa. 3:16) Kandi omo matwangwa w’ekihugho, obuli mutibiti inyatolere eribya inyanakalire; butsira ekyo, isyangatoka eribugha olughendo n’eribana ekihembo. Aliwe, abangyi b’okw’itwe sibakalire kinya-mubiri, n’omo bine bitya tunemulola embere eritibita. (2 Kor 4:16) Omo buwatikya bwa Yehova, itwe bosi tukendisyatoka eriyitsinga omo matwangwa n’eribugha olughendo!