1. Tʼáá áníiltso éí haʼátʼíí ádadiiʼnííł?

NITSʼÍÍS bąą dahazʼą́ągo doodaiiʼ chʼééh díníyáa ndi, kótʼéego jáákʼeh atah yishwoł dooleełísh díníízįįł? Nda shı̨́ı̨́. Ndi yilʼaadii Paul éí tʼáá aaníinii Oodlání danilínígíí éí jáákʼeh bá hashtʼehoolyaago atah dajíjeeh ní. (Heb. 12:1) Tʼáá áníiltso, ániid neiidá doodaiiʼ náás siidlı̨́ı̨́ʼ, nihidziil doodaiiʼ chʼééh deedzáa ndi, Jiihóvah aidooléłígíí niidzingo éí nihoníyáajįʼ hadaʼííníilníi doo.—Matt. 24:13.

2. Paul éí 2 Timothy 4:​7, 8 bikʼehgo doo yistiʼgóó haʼátʼíí ní?

² Paul éí “ałtso yiishteeʼ” ní, díí doo jistiʼgóó baa yájíłtiʼ. (2 Timothy 4:​7, 8 yíníłtaʼ.) Paul éí jáákʼeh nihá hashtʼehoolyaa níigi haʼátʼíí ááhyiłní?

3. Paul éí jáákʼeh bee níjiiltih níigi haʼátʼíí ááhyiłní?

³ Paul éí tʼáá ałkʼidą́ą́ʼ Gríisdi daanéʼé baa nidaʼaldeeh ńtʼééʼ yę́ę bitsʼą́ą́dóó yee naʼnitingo yee akʼeʼashchı̨́. (1 Cor. 9:​25-27; 2 Tim. 2:5) Oodlání beʼiiná yoołtʼihgi éí jáákʼeh bee níjiiltih níigo díkwíidi shı̨́ı̨́ yee chʼíiníʼą́. (1 Cor. 9:24; Phil. 3:14; 2 Tim. 4:7) Tʼáá háida éí Jiihóvah baa ázhdeetʼą́ągo baptize áhoʼdilyaago éí díí jáákʼeh nihá hashtʼeelyaaígíí atah jílwod doo. (1 Pet. 3:21) Ałtso jiilteeʼgo éí iiná doo ninítʼiʼii Jiihóvah haidoolééł.—Matt. 25:​31-34, 46; 2 Tim. 4:8.

4. Haʼátʼíí baa nídadíitʼįįł?

⁴ Nizaagóó jáákʼeh nízhdiijahgo índa Oodlání bikʼehgo  iiná éí łahgóó tʼáá aheełtʼéego átʼé. Táaʼgo baa nídadíitʼįįł. Áłtsé éí, nízhdiijeehígíí bikʼehgóó joolwoł doo; naaki góneʼígíí éí, jáákʼeh joolwołgo tʼáadoo nahgóó nanighalí doo; áádóó tááʼ góneʼígíí éí, achʼįʼ nahwiiʼnáa ndi haʼííníilníigo yiilwoł doo.

5. Haʼátʼíí atiin shı̨́ı̨́ bikááʼ yiilwoł, éí haʼátʼíí biniyé?

⁵ Tʼáá aaníigo ałghazhdijeehgo áádóó woobįįhii jiidoołbįįłgo éí nízhdiijeehígíí bikʼehgóó atah joolwoł doo. Tʼáá ákótʼé, iiná doo ninítʼiʼii yidiilbįįłgo éí Diyin Bizaad bikʼehgóó yiilwoł doo. (Acts 20:24; 1 Pet. 2:21) Ndi, Séítan dóó bikééʼ naazíinii bí yikʼehgo deíjeehígíí bikʼehgóó yiilwołgo éí ‘béédadiijah’ doo danihóʼní. (1 Pet. 4:4) Nihí éí iináájí beʼatiin deíníijeehgo biniinaa danihiʼı̨́įgo yádaałtiʼ áádóó nihí niheʼatiinígíí yáʼátʼéehgo atiin daaní. Ndi díí tʼóó ádaaní.—2 Pet. 2:19.

6. Brian haʼátʼíí bitsʼą́ą́dóó bíhwiiniłʼą́ą́ʼ?

⁶ Ndi háíshı̨́ı̨́ éí Séítan yinantʼáhígíí bikééʼ ninájilwoʼgo éí atiinígíí naalteʼ ídlı̨́ı̨́ góneʼ beʼatiin lágo bił béédahoyoozįįh. (Rom. 6:16) Brian kótʼéego baa haneʼ. Éí hazhéʼé dóó hamá Oodlání bikʼehjí oodááł bikʼehgóó yinááł hałníigo hachʼįʼ yáłtiʼ. Ndi teenager jílı̨́įgo díí kojí atiinígíí shił hózhǫ́ǫgo daatsʼí áshósin doo jinízingo baa nízdiidzá. Áko Séítan bikʼehjí oodáłígíí bikʼehgóó yishwoł jiniizı̨́ı̨́ʼ. Brian ájíní: “Áájí yeeʼ doo naalteʼ ídlı̨́į da nisin yę́ę éí doo yáʼádaashxóonii idiʼníiltsóodii yiih shinííʼaaʼ. Azeeʼ tsiʼndaʼiiłáhígíí índa adlą́ áádóó naʼageh bee tsiʼdéyá. Náás hodeeshzhiizhgo éí tʼáá yéigo azeeʼ tsiʼndaʼiiłáhígíí baa ńdiisdzá, éí yéigo shidíniiltsood. . . . Áádóó azeeʼ tsiʼnaʼiiłáii shaa nahaniihgo baa ńdiisdzá.” Ndi, Brian éí Jiihóvah yee hasʼáanii bikʼehgóó ninádeeshdááł jiniizı̨́ı̨́ʼ. Atiin yáʼátʼééhjí ninájidzáago 2001 yę́ędą́ą́ʼ baptize áhoʼdilyaa. Kʼad éí ayóó hoł hózhǫ́ háálá Oodlání beʼatiinjí joolwoł. *

7. Matthew 7:​13, 14 bikʼehgo nihidáahgi haʼátʼíí naakigo atiin ní?

⁷ Oodlání beʼatiin bikááʼjí yiidáałgo tsʼídá nihá yáʼátʼééh! Séítan éí ‘iináajįʼ áhoołtsʼóózígo yah ahóótʼiʼígíí’ yiilwołgi neʼ ádiilníiłgo tsʼénaají atiin hóteelígíí diné ląʼí ákóneʼ deíkááhjí azhdoolwoł nihóʼní. Ndi éí atiinígíí “atíʼoolníiłjįʼ . . . yah ahóótʼiʼ.” (Matthew  7:​13, 14 yíníłtaʼ.) Tʼáá ákóneʼ atiinígíí yiidáałgo índa doo yóóʼanihidiʼnóotʼáał dago éí Jiihóvah tʼóó baʼííníidlíigo yísíníiltsʼą́ąʼ doo.

8. Náádiilwoʼii éí deezgoʼgo haitʼįįh?

⁸ Ayóó ánízáágóó náádadiijahii éí tʼáá áhánígóó bilą́ąjįʼ hadaʼasíidgo deílyeed łeh. Ndi, yił yijahígíida łaʼ bididoołgoh doodaiiʼ ahoodzą́ą́ góyaa ádidooltał. Áko naaʼíígoʼgoda éí náádidooʼnahgo nínáádidoolwoł. Éí haʼátʼíí shı̨́ı̨́ bídeesgoʼígíí doo yaa nitsékees da, ndi hoodzojįʼ nídeeshwołgo yídoobįįłii shaa doolyééł nízin łeh.

9. Deegoʼgoda, haa diiʼnííł?

⁹ Nihí jáákʼeh atah deíníijeehjí éí ląʼídi nídadiigoh, éí nihizaad índa íiʼníiłgi bee niʼiyiilzííh. Doodaiiʼ bił deíníijeehígíí nidaʼiisíihgo biniinaa doo bikʼee ákóniitʼée da łeh. Háálá tʼáá áníiltso nidaʼiyiilzííh, áádóó tʼáá áníiltso tʼááłáʼíígíí áhoołtsʼóózígo atiinígíí bikááʼgóó yiijah. Áko łahda ałchʼįʼ doo ákonáádaniitʼée da łeh. Paul éí ‘ałchʼįʼ saad hólǫ́ǫ doogo’ átʼé ní. (Col. 3:13) Haʼátʼíí shı̨́ı̨́ biniinaa deegoʼgo tʼáadoo éidígíí baa nitsíikeesí doo, ndi aa doolyéełii bíká dadíníitʼı̨́įʼ doo. Deegoʼgoda éí náádidiiʼnahgo nináádidiilwoł. Tʼóó niháháchįʼgo doo náádideeshná da niidzingo éí hoodzojįʼ doo nídiilwoł da áádóó aa doolyéełii doo nihaa doolyéeł da. Áádóó ałdóʼ áhoołtsʼóózígo atiinígíí bikááʼgóó yiijah yę́ę nantłʼago ííníilzin doo.

10. Haitʼéego éí tʼáadoo naʼníiltłʼaí doo?

¹⁰ Łahgo ałdóʼ éí tʼáadoo ‘naʼníiltłʼaí’ doogo éí bił yiijahígíí bí yiníziníjígo bá baa nitsíikees doo, nihígíí éí ndagaʼ. (Rom. 14:​13, 19-21; 1 Cor. 8:​9, 13) Díí éí łahjįʼ tʼáá aaníigo diné náádadiijahígíí doo ákódaatʼée da. Éí áájí yidoobįįłii biniyé ałchʼą́ą́h nidaaʼnaʼ łeh. Tʼáá bí tʼéiyá ádaa nitsídaakeesgo deílyeed. Alą́ąjįʼ nídeeshwoł danízin. Ndi nihí éí doo ałchʼą́ą́h nideiiʼnaʼ da. (Gal. 5:26; 6:4) Íiyisíí biniyé ádeitʼínígíí éí  łaʼda bíká adiilwołgo dahodíníilnéełgo iiná bił deiidiilbįįł. Áko Paul ádííniid yę́ę bidaʼdiilnííł, “tʼááłáʼí nootínígo náánáłaʼ yídaneedlíinii ałdóʼ bá baa nitsídaahkees.”—Phil. 2:4.

11. Náádiilwoʼii éí yilwołgo haʼátʼíí yaa nitsékees łeh, éí haʼátʼíí biniyé?

¹¹ Tʼáá aaníigo diné náádadiijahígíí éí doo tʼóó áháníjįʼ hadaʼasíidgo deílyeed da łeh, ndi éí nihoodzojįʼ nidoolwołgo yíká déezʼı̨́ı̨́ʼ. Azhą́ hoodzooígíí doo dayooʼı̨́į da ndi, éí áadi nánishwodgo woobįįhii yiséłbą́ danízingo deílyeed. Kótʼéego nitsídaakeesgo éí yee wołí bee ádaatʼı̨́įgo deíjeeh łeh.

12. Jiihóvah éí haʼátʼíí nihichʼįʼ kwííłʼı̨́?

¹² Nihí éí jáákʼeh atah deíníijeehjí Jiihóvah éí bidineʼé tʼáá aaníí doobįįłii nihaa dadoolyééł ní, éí yáʼąąsh doodaiiʼ nahasdzáán ayóó ánoolingo bikááʼ hoolʼáágóó iiná. Diyin Bizaad éí tʼáá íídą́ą́ʼ kótʼée doo níigo yaa halneʼ, áko éí ákótʼéego iináa dooleełgi baa nitsídeiikees doo. Kótʼéego yéigo nihił chodahooʼı̨́įgo ádaʼdííníilzingo tsʼídá tʼáadoo nihidinółtłʼahí da.

13. Tʼáá aaníigo náádadiilwoʼígíí haʼátʼíí bilááh átʼéego nihíká anáʼáwoʼ?

¹³ Gríik dineʼé ałgháádikah yę́ę éí chʼééh adidááh índa áneezgaii ádaatʼéii nidabinółtłʼáa ndi, náádadiilwoʼ ńtʼééʼ. Éí nááʼdiilwoʼgi bee nidabidiʼneestą́ą́ʼ índa bibee adziilii yadaʼólí. Nihí ałdóʼ tʼáá ákótʼéego jáákʼeh deíníijeehgi hazhóʼó bee nidanihidiʼnitin. Ndi nihí éí tʼáá aaníigo náádadiilwoʼígíí bilááh átʼéego nihíká anáʼáwoʼ. Jiihóvah beʼadziilii tsʼídá doo niitʼééhgóó nihichʼįʼ kwííłʼı̨́įgo bee danihidziil. Jiihóvah badaʼííníidlíigo éí nanihinishtin doo índa danihidziilgo ádanihíínísin doo nihiłní!—1 Pet. 5:10.

14. Nihichʼįʼ nahwiiʼnáago 2 Corinthians 12:​9, 10 haitʼéego nihíká adoolwoł?

¹⁴ Paul éí ląʼígóó bichʼįʼ nahwiisnáá’. Éí biʼdoodzííʼ índa atíbiʼdoolʼįįd, áko łahda doo shidziil da nízingo ádaa nitsíkees, áádóó “shąąh dah hooʼaʼígíí” bichʼįʼ haʼííníshní, ní. (2 Cor. 12:7) Áko díí biniinaa éí kʼad Jiihóvah doo bá naashʼaʼ da doo tʼáadoo niizı̨́įʼ da, ndi Jiihóvah yeeʼ tʼóó baʼííníshłíi doo nízin ńtʼééʼ. (2 Corinthians 12:​9, 10 yíníłtaʼ.) Paul kótʼéego nitsékeesgo tʼáá ałtso bee bichʼįʼ nahwiisnáʼígíí bichʼįʼ haʼjólníi dooleełgo éí Jiihóvah yee háká aalwod.

15. Paul ádzaaígi ádeitʼı̨́įgo haitʼéego nihíká aʼdoowoł?

¹⁵ Nihí ałdóʼ niheʼoodląʼ biniinaa nihiʼdódziih índa atínihiʼdilʼı̨́į doogoda átʼé. Nihitsʼíís bąąh dahazʼą́ doodaiiʼ ayóó chʼééh nídiidááh. Ndi Paul ádzaaígi átʼéego Jiihóvah yeeʼ tʼóó baʼahódlíi dooleeł niidzin doo.

16. Nitsʼíís bąąh dahazʼą́ą ndi, nahaneʼgi haitʼéego bee áká anánílwoʼ doo?

¹⁶ Tʼóósh tsáskʼeh biiʼ sínítı̨́ doodaiiʼ wheelchair biiʼ sínídá? Nigod doodaiiʼ ninááʼísh bąąh dahazʼą́? Ákónítʼéego éí ániid nidaakaii índa ayóó dabiinéii bił yijah doogoósh átʼé? Aooʼ, bííníghahgo átʼé! Ląʼí náás daazlı̨́įʼii dóó bąąh nidahazʼáanii éí iiná beʼatiingóó deíjeeh. Tʼáá bí bibee adziil yee ádaatʼı̨́įgo éí doo bíighah da. Ndi, éí béésh bee haneʼé bee Oodlání áłah nádleehígíí nidáyółtsʼįįh doodaiiʼ binááł ninádaalkiʼ. Áádóó íhoołʼaahii álnéehgi yinaalnishgo éí  azeeʼííłʼíní, azeeʼ neikáhí, dóó bikʼéí yee yił nahalneʼ łeh.

17. Bitsʼíís bąąh nidahazʼáanii éí Jiihóvah haitʼéego yaa nitsékees?

¹⁷ Shitsʼíís bąąh dahazʼánígíí biniinaa Jiihóvah bá naashʼaʼgi doo bíighah da nínízingi tʼáadoo nikʼeh didlíní. Jiihóvah yinídlą́ągi áádóó ląʼígóó bá nisínilʼaʼgi yee ayóóʼánóʼní. Kʼad tsʼídá yéigo níká adoolwoł, doo yóóʼanididooʼáał da. (Ps. 9:10) Ahánígo nił hólǫ́ǫ doo. Nihisister łaʼ bitsʼíís bąąh dahazʼą́ągo ání: “Shitsʼíís tʼóó tséʼádin bąąh dahazʼą́ yileeł, áko tʼáá aaníí baa haneʼgi ląʼí diné bee bił nááhodeeshnih yę́ęgi shá nantłʼa. Áłtsʼísígo bee anáshwoʼ ndi, Jiihóvah bee bił honishǫ́, áádóó bee shił hózhǫ́.” Doo náábíighah da nínízingo, béénílniih Jiihóvah éí nił hólǫ́. Paul yee haadzííʼ yę́ę béénílniih: “Shił hózhǫ́ǫgo íʼdííníszin, háálá doo shidziil da nidi, shidziilgo átʼé.”—2 Cor. 12:10.

18. Haʼátʼíí éí łaʼ ayóó bá ndantłʼago átʼé?

¹⁸ Iiná atiinjí deíjeehígíí éí łahgo ałdóʼ bee bichʼįʼ anídahaztʼiʼ. Éí yínííł danilínígi náánáłahdę́ę́ʼ doo bá baa ákohwiindzin da. Áko díí yínííł łahda ayóó áníłtso bił nídaadleehgo wołí bee yichʼįʼ hadaʼólní. Jiihóvah yá ndaalʼaʼí kódaatʼéhígíí baa dahojoobaʼígo haʼátʼíí biniinaa bí éí yéigo bichʼįʼ nidahwiiʼná? Jó, łaʼda bigaan kʼéʼéltǫʼgo doodaiiʼ wheelchair yiiʼ sidáago éí bee bichʼįʼ nahwiiʼnáanii tʼáá bééhóziní, áko éí bíká adeeshwoł hwiiniidzįįh. Ndi, łaʼda yínííł doodaiiʼ bíniʼ siláagi bee bichʼįʼ anáhóótʼiʼgo doo ayóó bééhózin da łeh. Bí ałdóʼ tʼáá ákótʼéego łaʼda bitsʼin kʼéʼéltǫʼígi átʼéego diniihgo átʼé. Áko diné doo bił béédahozin da, éí biniinaa doo bíká eʼayeed da łeh.

19. Miifíbosheth haʼátʼíí bitsʼą́ą́dóó bídahwiilʼą́ą́ʼ?

¹⁹ Haʼátʼíí biʼoh nídinídleehii nee hólǫ́ǫgo éí diné doo ná yaa ákodanízin dago, éí Miifíbosheth baa haneʼgi bee nidziil ádíínílzin. (2 Sam. 4:4) Éí hatsʼíís bąąh dahazʼą́ áádóó Naatʼáanii David éí doo yáʼátʼééhgóó haa tsídeezkééz. Miifíbosheth éí doo hó ájítʼı̨́ı̨́góó biniinaa hachʼįʼ nahwiisnááʼ. Ndi, doo éí biniinaa tʼáadoo haada yitʼéego ádaa tsízdeezkéez da, éí yáʼátʼéehgo hweʼiinaʼ siláagi tʼóó baa ahééh jinízin ńtʼééʼ. David éí yáʼátʼéehgo haa tsídeezkééz yę́ęgi tʼóó baa ahééh jinízin. (2 Sam. 9:​6-10) Áko biniinaanii David doo yáʼátʼééhgóó haa tsídeezkéezgi Miifíbosheth éí baa ákozniizı̨́ı̨́ʼ. David asiihgi tʼáadoo bikʼee háhóóchįįd  da. Áádóó éí biniinaa Jiihóvah tʼáadoo yee yikʼíházʼa da. Jiihóvah éí naatʼáanii áyiilaii bíká azhdoolwołgi tʼéiyá baa nitsíjíkees. (2 Sam. 16:​1-4; 19:​24-30) Miifíbosheth nizhónígo áʼiilaagi éí Jiihóvah Bizaad biiʼ baa haneʼgo nihá áyiilaa.—Rom. 15:4.

20. Nitsééʼáltłiʼgi haitʼéego łaʼ baa deinítʼı̨́, ndi haʼátʼíí bíká análwoʼ?

²⁰ Łaʼ nihibrothers dóó nihisisters éí dahasłą́ą́góó naagháago doo ayóó yídinéelnáa da łeh. Azhą́ ákótʼée ndi, éí áłah náʼádleehgóó naaghá. Diné tʼáadoo yééhósinii yichʼįʼ hadoodzihgi bá nantłʼa, ákótʼée ndi hootahgóó nahalneʼ. Doo tʼáá ni tʼéiyá nił ákóhootʼée da. Tʼóó ahayói diné ałdóʼ ákódaatʼéego átʼé. Béénílniih wołí bee ánítʼı̨́įgo Jiihóvah bá nanilʼaʼgo yaa bił hózhǫ́. Nikʼi hadlíigi áádóó adziilii yee níká análwoʼgi bee bééhózingo wołí bee Jiihóvah bá nanilʼaʼgo átʼé. * (Phil. 4:​6, 7; 1 Pet. 5:7) Azhą́ nitsʼíís doodaiiʼ níniʼ bee nichʼįʼ anáhóótʼiʼ ndi, Jiihóvah bá nanilʼaʼgo éí yaa bił hózhǫ́.

21. Jiihóvah nihíká análwoʼgo tʼáá áníiltso haʼátʼíí ádadiilnííł?

²¹ Paul éí jáákʼeh bee diné deíjeeh ní, ndi díí éí doo tʼáá aaníí jáákʼeh bee yiijah da. Ałkʼidą́ą́ʼ tʼáá aaníigo jáákʼeh diné náádadiijah yę́ędą́ą́ʼ éí tʼááłaʼí diné oołbįįh. Ndi, Oodlání jáákʼeh atah deíjeehígíí éí beʼoodląʼ bidziilgo haʼólnínígíí éí iiná doo ninítʼiʼii baa doolyééł. (John 3:16) Tʼáá aaníigo jáákʼeh diné náádadiijahígíí éí hatsʼíís bidziilgo tʼéiyá hodínóonéełgoda átʼé. Ndi nihí atah deíníijeehígíí éí nihitsʼíís bąąh ndahazʼą́ą ndi hadaʼíiniilní. (2 Cor. 4:16) Jiihóvah nihíká análwoʼgo tʼáá áníiltso nihoodzojįʼ nídiijah!