1. E na dɛ̄dɛɛ̄ ii ɛrɛ edoo a?

ENIAGE a eteera tee o suā kɔ a aga, sɔ̄ loo a le e’ɔ ale sɔ̄ nu gaa a yɔ ni? Pio sɔ̄, oo le edoo wo. Kɛ̄adoo, nɛɛ lɛɛratam Pɔɔl bee kɔ dɛ̄dɛɛ̄ pya kaka Nɛɛ Kraist gaa teera lo tee. (Hib 12:1) Kere i lege zege ale i e’anna, i le e’agaloo ale loo i gaa ɔ, dɛ̄dɛɛ̄ ii ɛrɛ esu egerebu teā mmɛ kɛ̄ lo i gbī e’ɛrɛ ekpɛanu aābah Jɛhova.—Mat 24:13.

2. E na anua Pɔɔl bee dap kɔ pya ue a le bu 2 Timɔti 4:7, 8 a?

² Pɔɔl bee dap kɔ doo wo nyɔnɛbee a “eteera lo tee sah.” (Buū 2 Timɔti 4:7, 8.) Mɛ taɛ amunu tee na Pɔɔl gaa bee kɔ nu kumaloo a?

3. E na alu tee Pɔɔl gaa bee kɔ nu kumaloo a?

³ Siga sɔ̄ Pɔɔl wee su pya bii a wee lu ebira bie Gris a dee kere a su tɔŋɛ pya nu a kuī. (1 Kɔr 9:25-27; 2 Tim 2:5) Gbɛnɛ-edo sɔ̄ Pɔɔl bee su bii tee a wee lu eteera dooreloo tɔɔ̄dum Nɛɛ Kraist. (1 Kɔr 9:24; Gal 2:2; Fil 2:16) Nɛɛ bɔātɛ̄ lo “tee” ama sɔ̄ a kiī ye loo nɛ Jɛhova sa liamaā. (1 Pit 3:21) Sɔ̄ Jɛhova enɛa dum a naa tah lo nɛɛ na etɔgɛ kɔ eteera lo tee mmɛ kɛ̄ a.—Mat 25:31-34, 46; 2 Tim 4:8.

4. E na i gaa le kɔ ue nyɔɔ bu lo ekobee ue ama a?

⁴ Bii tee a nyɔɔ dɛɛ̄ le tɔɔ̄dum doodoo Nɛɛ Kraist bee ziī doodoo wa? A ɛrɛ gbɛnɛ-edo nu anua a bee ziī. I naa kɔ nu akiiloo taa ka. Tuatua, i ɛrɛ etɔɔ̄ nyɔɔ etaā; eree baɛ, i ɛrɛ esere dɛɛ̄ nyɔɔ lo eteera mmɛ kɛ̄, e lo eree taa, kaɛlɛɛ ɛrɛgeba e’aga kɛ̄tɔɔ̄ i kpesī, i ɛrɛ eteera mmɛ kɛ̄.

5. Amunu sīdee tɔɔ̄dum na i nyɔɔnɛ a, e e na anua a?

⁵ Dookɛ̄ bii tee wee le doo, lo e’ɛrɛ ekpɛanu nɛɛ a gaa teera ɛrɛ ebia nyɔɔ etaā a bee lu esere kɛ̄. Bu aba lo sīdee, lo i gbī e’ɛrɛ ekpɛanu dum a naa tah, i ɛrɛ enyɔɔnɛ sīdee tɔɔ̄dum pya Nɛɛ Kraist. (Doonu pya Nɛɛ lɛɛratam 20:24; 1 Pit 2:21) Kerewo, Setan le pya a ye le loo naa gbī kɔ i nyɔɔnɛ sīdee tɔɔ̄dum Nɛɛ Kraist; ba gbī kɔ i “nyɔɔnɛ” wa. (1 Pit 4:4) Ba kɛgɛ i sīdee tɔɔ̄dum sa kɔ alaba sīdee tɔɔ̄dum na a lee sa doo kɔ nɛɛ a ɛrɛ ye loo a. Mɛ alu esah.—2 Pit 2:19.

6. E na o nɔ aāloo edoba Brian a?

⁶ Ɛrɛgeba pya a nyɔɔnɛ ezū a aabu nyɔuwe Setan wee sikɛ̄ muɛ̄ kɔ lo sīdee tɔɔ̄dum naa doo kɔ nɛɛ a ɛrɛ ye loo, mɛ a doo kɔ nɛɛ alu zooro. (Rom 6:16) Naa kɛɛrɛbu edoba Brian. Ye ka le tɛ bee ye yere mɛm loo kɔ a nyɔɔnɛ sīdee tɔɔ̄dum pya Nɛɛ Kraist. Mɛ sɔ̄ a bee le zege, a bee kɛɛrɛ sɛh lo sīdee tɔɔ̄dum edooge kɔ a ɛrɛe ɛɛbu naa e. Brian bee biaɛfii lo eyɔ pya a nyɔɔnɛ sīdee tɔɔ̄dum Setan gbaa. A bee kɔ, “Mm bee suā kɔ tɔɔ̄dum lo e’ɛrɛ na loo edoo kɔ pya pɔrɔ nu eyere mɛ muū loo a nia mɛ. Sɔ̄ sɔ̄ gaa kiisī, m bee bɔātɛ̄ e’ɔ̄ pɔrɔ eyuu pie, ɔ̄ mii a wee bumɛ nɛɛ sa doo bag bag dogo. Bu gbɛnɛ-edo zua, m bee kiisī lo e’ɔ̄ pya lo pɔrɔ eyuu pie a bee piya ee pya lo m wee ɔ̄ tua sɔ̄ sa lu zooro nɛ gbɛnɛ-edo ɛɛ. . . . M bee bɔātɛ̄ e oo pɔrɔ pɔrɔ eyuu pie lo eyeābah nɛ na sīdee tɔɔ̄dum.” Sɔ̄ a esaa, Brian bee biaɛfii lo enyɔɔnɛ daakuu Jɛhova. A bee nyaana ye sīdee tɔɔ̄dum sa liamaā bu zua 2001. A ɛrɛ kaāna ɛɛbu anyaawo nyɔnɛbee a gaa tɔɔ̄dum doodoo Nɛɛ Kraist. *

7. Dookɛ̄ Matiu 7:13, 14 kɔ doo, baɛ amunu dee na alu esere i kɛ̄sī a?

⁷ Ɛp kɛ̄ a kuī doo kɔ i sagɛ le dee etɛɛ̄ nyɔɔ a! Setan gbī kɔ dɛ̄dɛɛ̄ ii a ɔbɛ etɛɛ̄ nyɔɔ lo dee alu biibii sī “lo a ture nɛɛ bu dum” sa obia kii nyɔɔ lo dee a bɛɛasī lo gbɛnɛ-edo pya a le bu nyɔuwe ama le nyɔɔ. Booboo nɛɛ suāloo lo dee sa a waɛ etɛɛ̄ nyɔɔ. Mɛ “a ture nɛɛ bu pepe.” (Buū Matiu 7:13, 14.) Lo etɔɔ̄ bia nyɔɔ dee dum sa ii dabia, i ɛrɛ edɛrɛ nyiɛ nyɔɔ Jɛhova sa ye gbaɛ̄tɔ̄loo.

8. Lo nɛɛ a gaa bee teera tee dɔ, e na a wee doo a?

⁸ Pya teera tee wee ɛp deesī wa lokwa ba naa dɔ. Kerewo, ba dap nage zaga gāma nɛɛ le aba gaa gbaa teera ale ba dap dɔ bu bana a le nyɔɔ dee. Lo ba dɔ, ba wee aakɛ̄ sa bɔā nagetɛ̄ eteera. Tua nu ba wee sere ekɛɛrɛ nyɔɔ na teera mmɛ kɛ̄ sa ɛrɛ wa ekpɛanu, e a naale nu a bee doo kɔ ba a dɔ.

9. Lo i dɔ, e na i doo a?

⁹ Bu i tee dum i dap dɔ gbɛnɛ-edo sɔ̄, nyɔɔbee tɛɛ̄ ekwɔ loo nu i kɔ sa doo. Pya le ii gaa gbaa teera dap nage doo nu a i ziloo. Bɔloo kɔ i suā kɔ lo ama dap sira. Lɔgɔ ii ii mmana, sa i gaa gbaa teera nyɔɔ aba biibii sī dee a ture nɛɛ mmɛ loo dum. A lu kaka kɔ i dap tɛɛ̄ ekwɔ loo ziī. Pɔɔl bee dābeeloo kɔ i dap “pima” ue ziī. (Kɔl 3:13) Mɛ taā i sere i ekɛɛrɛ nyɔɔ nu a bee doo kɔ i dɔ, i sere ekɛɛrɛ nyɔɔ i ekpɛanu li deesī. Lo i dɔ, nu i doo na e’aakɛ̄ sa kiisī lo eteera. Lo bu i biira sa i ɛrɛ saŋ sa ii aana kɛ̄ teera, ii le eteera na mmɛ kɛ̄ sa ɛrɛ i ekpɛanu. Lo dɔɔ̄na, i dap nage lu nu kum tɔ loo nɛ pya dɔɔ̄na a gaa bee piiga lo eteera nyɔɔ lo biibii sī dee a ture nɛɛ mmɛ loo dum.

10. Bu mɛ sīdee na i piiga lokwa ii lu “ekuma” nɛ pya dɔɔ̄na a?

¹⁰ Dɔɔ̄na sīdee ii le lunage “ekuma” nɛ pya le ii gaa gbaa teera na sɔ̄ i wa lɛɛbaloo kɔ ba a doo nu ba gbī siga sɔ̄ sa ii bialoo kɔ ba a doo nu ili kɔ. (Rom 14:13, 19-21; 1 Kɔr 8:9, 13) Lo ama lu kpog-bee nu anua ii le doodoo pya a wee teera kunɛ tee. Ba wee nyɔɔnɛ pya le aba gaa gbaa teera doo ɛrabah, sa piiga lo e’ɛrɛ lo ekpɛanu nɛ wa loo. Nu dɛ̄dɛɛ̄ wa ekɛɛrɛ dɛɛa nyɔɔ na kɛ̄ ba edoo eebah. Ba dap nage gbī etaābah dɔɔ̄na nɛɛ lɛɛ lokwa ba le deesī lo etaā tee. Mɛ lo ama lu kiiyasī nyɔnɛbee ili ii gaa doo ɛrabah. (Gal 5:26; 6:4) Nu i seea sī na kɛ̄ edoo yerebah nɛ gbɛnɛ-edo nɛɛ kɔ ba a nyɔɔnɛ i teera mmɛ kɛ̄ sa i gbaa ɛrɛ ekpɛanu dum a naa tah.  Nyɔɔwo i piiga lo esu zuurabahtɔ̄ Pɔɔl yere bu dogo lo a kɔ “Doolo ziī ziī bui naa ɛp aba alɛɛ nu, mɛ a ɛmanage nu pya dɔɔ̄na nɛɛ.”—Fil 2:4.

11. E na nɛɛ a gaa teera tee wee sere dɛɛ̄ nyɔɔ a, e e na anua a?

¹¹ Gbaa nage loo sere dɛɛ̄ wa deesī, pya a gaa teera kunɛ tee wee sere dɛɛ̄ nyɔɔ kɛ̄ edoo yee lo kpɛdumɛ eniī. Kere ba sii muɛ̄ lo eniī, ba wee le gaa kɛɛrɛ sɔ̄ ba e’eebah sa ɛrɛ wa ekpɛanu. Dɛ̄dɛɛ̄ sɔ̄ ba wee kɛɛrɛbu ekpɛanu ba e’ɛrɛ.

12. E na Jɛhova enɛa i a?

¹² Bu i tee, Jɛhova ekɔa ekpɛanu i ɛrɛ lo i teera lo tee mmɛ̄ kɛ̄, lo a le dum a naa tah li bunyɔɔ ale a nyɔɔ kɛnɛkɛ̄. Kpa Kaɛ ekɔa kɛ̄ lo ekpɛanu emɛā doo lokwa i dap muɛ̄ kɛ̄ i dum ekpeloo doo lo sɔ̄. Kɛ̄ i sere i ekɛɛrɛ le i beenyiɛ bie nyɔɔ lo bɛabu doo, edoo kɔ i aa yiga kɔ lɔgɔ nu a doo kɔ i dɔ sa bia kɛ̄.

13. Bu mɛ sīdee na i lu kee loo pya a teera kunɛ tee a?

¹³ Pya Grik a wee teera kunɛ tee wee ɛrɛ ebe eebah nu finiabah a doodoo kɛ̄tɔɔ̄ e’ɔaloo le ezialoo. Mɛ kuma nu ba wee dɛɛa nyɔɔ na wa ekpo le kɛ̄ alu ekpɔā wa doo. Doodoo pya a wee teera tee lunage ekpɔā ili nyɔɔ kɛ̄ i dap teera lo tee doo. Mɛ i lu kee loo pya a wee teera kunɛ tee. I dap ɛrɛ ekpo aābah Jɛhova, e a kpɛ̄naloo eyerebah i nɛ. Lo i dɛɛa nyɔɔ Jɛhova, a yira lo ekpɔā i sa edoo nage kɔ i agaloo!—1 Pit 5:10.

14. Bu mɛ sīdee na 2 Kɔr 12:9, 10 i yerebah nɛ sɔ̄ i kpesī doā-ɛp a?

¹⁴ Pɔɔl bee kpesī gbɛnɛ-edo nu finiabah. Gbaāloo kɔ a wee lu ebɔbɛɛ ye kɛɛ sa ye tɛ̄ŋaloo, pio sɔ̄ a wee tama nage e’ɔaloo le nu alu ekue “suu bu namloo.” (2 Kɔr 12:7) Mɛ taā a ɛp pya lo nu finiabah nua nu e’ɔbɛ ye lɛɛloo esitam nɛ Jɛhova, a wee ɛp nua dee a ye kpaā nɛ lo edɛɛa nyɔɔ Jɛhova. (Buū 2 Kɔr 12:9, 10) Nyɔɔbee Pɔɔl bee ɛrɛ elap dogo ama a, Jɛhova bee ye yerebah nɛ kɔ a dap tama pya ye doā-ɛp.

15. Lo i nɔ Pɔɔl, e na i muɛ̄ a?

¹⁵ Dap nage lu ebɔbɛɛ i kɛɛ sa i tɛ̄ŋaloo nyɔɔ i yira. I dap nage tama kɛ̄bah eyɔloo le e’ɔaloo. Mɛ lo i nɔ Pɔɔl, ziī ziī pya lo finiabah dap lu dee a i kpaā nɛ lo emuɛ̄ wereloo le yerekpotɛ̄ a aabah Jɛhova.

16. Kere nu gaa a yɔ, e na o dap doo a?

¹⁶ Ekɔ eyɔloo ebie a tɔ ale o le bu kpe pya kɔga ni? Ekɔ beezū a gaa a yɔ sɛh oo wee muɛ̄ nu leere ni? Lo a le doowo, o dapge nyɔɔnɛ pya a le zege sa lege nwanaloo gbaa taāŋabah Jɛhova ni? bu kaka, o dap doo wo! Gbɛnɛ-edo pya nama nɛɛ le pya loo dumɛ gaa teera nage tee dum. Ba naale edap dɛɛa nyɔɔ wa ekpo lo esitam ama. Taāwo, ba dɛɛa nyɔɔ ekpo a aabah Jɛhova tɛ̄maloo egbaɛ̄tɔ̄ tɛ̄mabu fon, lo ba dā aba muɛ̄ ale lo ba dap muɛ̄ nu a gaa sira bie enɔānu. E ba sudɔ bu tam doo kɔ pya nɛɛ a nyɔɔnɛ dumɛ Kraist tɛ̄maloo ezue ue nɛ pya dɔktɔ, pya nurse, le pya wa mana-mana.

17. Tɔɔ̄loo Jɛhova doodoo wa sɔ̄ pya nɛɛ le bu e’aga kɛ̄tɔɔ̄ ni?

¹⁷ Waa iye kɔ e’ɔaloo ale dumɛloo a  doo kɔ o kɛɛrɛ kɔ oo le edap nae teera lo tee dum. Jɛhova were a loo nyɔɔ o yira le kuma buā sɔ̄ o esua ye siātam nɛ. O gbī ye yerebah anyaawo, e a naale ebie a. (Yɔɔ 9:10) E tɔɔ̄ nage a waɛloo. Naa kɛɛrɛbu nu ziī wuga nɛɛwa a gaa bee kpesī e’agabah dumɛloo bee kɔ ama: “Kuma sɔ̄ loo mɛ gaa bee kiisī lo edumɛ a, m bee muɛ̄ kɔ mm dap nae zue ue gbɛnɛ-edo sɔ̄. Mɛ m bee suā kɔ kere nwīgbagbara epiaga m doo lo edoo wo ɛɛrɛbu Jɛhova, e lo ama bee mɛ nɛ ɛɛbu.” Sɔ̄ loo a ɔ, nyɛŋiabu kɔ oo le aba ɔɔ. Kɛɛrɛbu edoba Pɔɔl, sa o nyɛŋiabu ye ue yere mɛm loo a kɔ: “E’ɔaloo gbɔmɛɛ̄ loo, . . . nyɔnɛbee sɔ̄ loo mɛ ɔ, lo sɔ̄ loo mɛ aga.”—2 Kɔr 12:10.

18. Pio nɛɛ gaa kpesī amunu e’aga kɛ̄tɔɔ̄?

¹⁸ Pio pya a gaa teera tee dum kpe nage sī dɔɔ̄na e’aga kɛ̄tɔɔ̄. Ba gaa kpe nage sī pio kɛ̄tɔɔ̄ pya dɔɔ̄na naa dap muɛ̄ sa dābeeloo. Bu edoba, ba gaa tama biinɛkɛ̄ ale gbɛnɛ ekɛɛrɛ. E na anua pya zooro Jɛhova wereloo ama gaa kpesī pya e’aga kɛ̄tɔɔ̄ ama ani? Nyɔnɛbee sɔ̄ bah ziī nɛɛ bunā ale a le bu kpe pya kɔga, dɛ̄dɛɛ̄ nɛɛ dap muɛ̄ taāŋa a le bu sa dap ye yerebah nɛ. Kerewo, naa dap lu emuɛ̄ pya a gaa tama gbɛnɛ ekɛɛrɛ nua pya a gaa tɔga. Lo ama lunage gbɛnɛ taāŋa a bee sɔ̄ tɔ nɛɛ bunā, mɛ nyɔɔbee pya nɛɛ naa muɛ̄ a, ba naa ɛrɛ aba gbɔ̄gbɔ̄ aābah pya dɔɔ̄na.

19. E na i nɔ aāloo edoba Mephiboshet a?

¹⁹ Lo o le bu ziī kɛ̄tɔɔ̄ sa a bee kɔ pya nɛɛ naa dā a bee loo, o dap ɛrɛ mɛm aāloo edoba Mefiboshet. (2 Sam 4:4) A bee egerebu kɛ̄bah dumɛloo, le kɔ Mɛnɛ Devid naa bee ye biaɛ leere. Nu a bee sira loo Mefiboshet naa bee ye lu bah. Kerewo, a naa bee ɛrɛ saŋ, a bee ɛrɛ ɛɛbu loo nu a bee ye sira loo. A bee doo yaa loo pya le nu Devid ebee ye doo nɛ bu pya sɔ̄ akii adumɛ. (2 Sam 9:6-10) Nyɔɔwo sɔ̄ Devid bee biaɛ Mefiboshet bu pɔrɔ sīdee, a bee ɛp lo kɛ̄tɔɔ̄ leere. A naa bee lɛɛbaloo kɔ ekwɔ Devid a yere ye saŋ bu. E a naa bee bege ue Jɛhova loo nu Devid bee ye doo loo. Mefiboshet bee sere ekɛɛrɛ nyɔɔ nu edap doo lo eyerekpotɛ̄ mɛnɛ Jɛhova ebee tubobaloo. (2 Sam 16:1-4; 19:24-30) Jɛhova bee doo kɔ alu e’ɛm le edoba Mephiboshet ama sere kɛ̄ bu ye Muɛ̄ Ue lokwa a i dɔbiī nɛ.—Rom 15:4.

20. Gbɛnɛ ekɛɛrɛ dap ɛrɛ pah nyɔɔ siga nɛɛ doodoo wa, e e na ba dap suā leere a?

 ²⁰ Nyɔɔbee gbɛnɛ ekɛɛrɛ, kɛ̄tɔɔ̄ pio pya wuga nɛɛdam le nɛɛwa kpesī nɛ wa taāŋa gbɛnɛ kere sɔ̄ ba lenage yɛɛ pya nɛɛ. A dap wa agabah etɔɔ̄ kɛ̄ gbɛnɛ-edo nɛɛ le, mɛ ba piiga lo ele kɛ̄ bu pya i enɔānu bu bɔŋanaloo, pya i asɛmbli, le pya i kɔnvɛnsɔn. A wee lu nu finiabah lo ekɔ ue nɛ pya ba naa suā loo, kerewo, ba kɔ ue nɛ pya dɔɔ̄na sɔ̄ ba si uwe zue ue. Lo alu kɛ̄tɔɔ̄ o gaa tɛɛ̄ bu lo, suā kɔ oo le aba ɔɔ. Mɛā nage loo gbɛnɛ-edo nɛɛ doo wo. Nyɛŋiabu kɔ epiaga a a aabu beenyiɛ ama ɛɛrɛbu Jɛhova. Nyɔɔbee oo pee beenyiɛ a, tɔgɛ kɔ a gaa a nɛ leelee sa a nɛ ekpo a a bɛɛ̄. * (Fil 4:6, 7; 1 Pit 5:7) Lo o le gaa sitam nɛ Jɛhova kaɛlɛɛ dumɛloo ale gbɛnɛ ekɛɛrɛ, suā leere kɔ o gaa ɛɛrɛbu Jɛhova.

21. E na Jɛhova eyerebah i nɛ kɔ i dap doo a?

²¹ Bu i ɛɛ kɔ kee le yɛɛ bii tee le lo tee Pɔɔl bee kɔ nu akiiloo a. Bu pya tee a wee lu eteera bu pya sɔ̄ a bee lu e’ɛm Baibol, aba ziī nɛɛ na a wee ɛrɛ lo ekpɛanu a. Mɛ bu kiiya sī, ɛrɛgeba nɛɛ a egerebu mmɛ kuma bu tee pya Nɛɛ Kraist e’ɛrɛ ekpɛanu dum a naa tah. (Jɔn 3:16) E bu bii tee nage, dɛ̄dɛɛ̄ pya a gaa teera ɛrɛ ele bu nwanaloo, lo a naale wo ba naale edap eebah. Mɛ bu tee dum, i dap egerebu teera mmɛ kɛ̄ kere loo gbɛnɛ-edo ii gaa dumɛ. (2 Kɔr 4:16) Jɛhova eyerebah i nɛ kɔ i teera mmɛ kɛ̄!