1. Me yẹ ọwan ephian ine vi ru?

WU NE kwe zorhẹ wu rheri taghene ọnọ gbanhon wẹn, maido orhianẹ emiamo ọ lahuọ yanghene oma ọ rhọ? Ẹjo. Ọrẹn, ọnyikọ Paul ọ tare taghene Ilele Kristi ephian a zorhẹ. (Heb. 12:1) Sẹ ọwan iphuphẹn yanghene a ho ne, sẹ a ji gbanhon yanghene oma ọ rhọ ọwan, ene vi vwo edirin toba orhianẹ a guọlọ vwo osa ri Jehova o ve rẹn ọwan na.—Matt. 24:13.

2. Sekpahen oborẹ ọ ha 2 Timothy 4:7, 8, mesoriẹ i Paul o vwo ugbomọphẹ ẹmro ẹta?

² Paul o vwo ugbomọphẹ ẹmro ẹta, fọkime ọ “zorhẹ na toba ne.” (Se 2 Timothy 4:7, 8.) Ọrẹn, me yẹ orhẹ ri Paul ọ tẹmro kpahen na?

3. Me yẹ orhẹ ri Paul ọ tẹmro kpahen na?

³ Ọkezẹko, Paul ọ ha iruẹn ezẹko re ruẹ uvuẹn Greece ọke ahwanren, e yono iyono eghoghanren. (1 Cor. 9:25-27; 2 Tim. 2:5) Ọgbọ buebun, ọ ha orhẹ ẹzẹ dje akpenyerẹn Ilele Kristi. (1 Cor. 9:24; Gal. 2:2; Phil. 2:16) Ohworho ọ tuẹn “orhẹ” ọnana rhọ, ọke ọrhọ homakpahontọre rẹn Jehova ji bromarhame ne. (1 Pet. 3:21) Jehova ọrhọ yẹ ohworho arhọ i bẹmẹdẹ ne, nọyẹ ọravwọ ọ zorhẹ na hin ne.—Matt. 25:31-34, 46; 2 Tim. 4:8.

4. Me ye ne yono kpahen uvuẹn urhomu-ẹmro ọnana?

⁴ Marhẹ akpenyerẹn Ilele Kristi o ru họhọ orhẹ ugbo oseseri ra ha oghwẹ zẹ? O vwo ekwakwa ezẹko ri họhọre uvuien. Jene yono kpahen esa usuẹn aye. Ọrukaro, o fori na nyalele izede ro serhọ; ọreva, ana vi tẹnrovi oba orhẹ na; ọrhẹ ọresa, ana vi rha zorhẹ na arha tobọ mẹrẹn ebẹnbẹn vwọye.

5. Izede ọgo ya na vi nyalele, mesoriẹ?

⁵ Neneyo era guọlọ zorhẹ i sabu mwuovwan, aye ine vi ru lele ọsoso oborẹ eri kwaphiẹ orhẹ na rhọ i tare. Omaran ọ ji havwọ, arha guọlọ vwo osa arhọ i bẹmẹdẹ, ene vi nyerẹn akpọ Olele Kristi. (Acts 20:24; 1 Pet. 2:21) Echu ọrhẹ era nyalelie, i guọlọre taghene a nyalele izede ọrọrọ; aye i guọlọre taghene e ‘ru erharhere iruemru aye.’ (1 Pet. 4:4) Aye a ha oborẹ ọwan e nyerẹn akpọ lele djechẹẹ, aye na ta taghene izede akpenyerẹn aye yọ mai rhomu, o ji suẹn riẹ ugbomọphẹ. Ọrẹn, ọrana ofian.—2 Pet. 2:19.

6. Me wu yono nẹ udje i Brian?

⁶ Ohworho rọ zorhẹ lele ihworho akpọ Echu, ọnọ mẹrẹnvwrurhe phẹrẹkpẹ taghene izede aye a nya na, ọ vwọ yẹ aye ugbomọphẹ-ẹ; ukpomaran ọ lẹrhẹ aye rhiẹ evrẹn. (Rom. 6:16) Roro kpahen udje i Brian. Eri vwiẹriẹ i ha urhebro riẹn no nyerẹn akpọ Olele Kristi. Ọrẹn, ọke rọ ha uphuphẹn no roro sẹ aruẹ akpenyerẹn ọrana ọnọ sabu lẹrhẹ oma merhiẹn. Brian no brorhiẹn ro no kwomakugbe ihworho re vwa ga i Jehova. Nọ tare, “Mie rhe taghene ugbomọphẹ mia guọlọ na ọnọ lẹrhe mẹ fiomarhọ ekwakwa ibiobiomu-u. O jiri, ni mia ha imwu egbogbanhon, da inyo vrẹn oma, ji nyerẹn akpọ ọfanrhiẹn. Ọke ẹgbukpe ezẹko a vrẹn, ni mia ha imwu egbogbanhon erọrọ, ni mi rhiẹ ọvrẹn rẹn aruẹ imwu erana. . . . Ni mia rhẹ imwu egbogbanhon ne mi sabu hobọtua akpenyerẹn mẹ.” Ọrẹn, Brian no brorhiẹn rọ nọ nyalele irhi Jehova. No wene akpenyerẹn yen, ji bromarhame uvuẹn ẹgbukpe 2001. Oma ọ dabu merhiẹn vwana ra mẹriẹn taghene o nyerẹn akpọ Olele Kristi. *

7. Sekpahen Matthew 7:13, 14, izede eva ego yi havwiẹ?

⁷ Ọ ghanranren omamọ na nya uvuẹn izede ro serhọ na! Echu ọ guọlọ na zẹ uvuẹn izede ọkpakpa ro “suẹn riẹ arhọ” na-a, ọrẹn ọ guọlọre na nya uvuẹn izede okekeri na, rẹ ihworho buebun uvuẹn akpọ na i havwọ. Izede ọrana o titiri omamọ, ọ ji phẹrẹ ẹnya. Ọrẹn, o “suẹn riẹ oghwọghọ.” (Se Matthew 7:13, 14.) Na sabu daji izede rọ gbare na ji vabọ ukọ, ana vi hẹroso i Jehova jeghwai kerhọ ye.

8. Ohworho rọ zorhẹ ọrhọ kproghwẹ, me yo ruẹ?

⁸ Ihworho ra zorhẹ ugbo oseseri a dabu tẹnrovi izede na neneyo aye i ja rha kproghwẹ. Ọrẹn, aye ina ji sabu kproghwẹ yanghene dumu oghwẹ rhẹ ukpotọ. Aye i rhe se, aye ne vẹnrẹn ji zẹ nyarhẹn. Aye i vwa tẹnrovi oborẹ ọ lẹrherẹ aye se-e, ukpomaran aye a tẹnrovi oborẹ aye ine ru zẹ orhẹ na hin ji vwo osa na.

9. Arha kproghwẹ, me yo fori ne ru?

⁹ Uvuẹn orhẹ ọwan na, ana sabu kproghwẹ ọgbọ buebun, ji ru sọ ọrẹ ẹmro ọrhẹ irueruo. Yanghene ereva ọwan re lele zorhẹ na, ine ru oborẹ ọnọ da ọwan omamọ. O vwo gbe ọwan unu ọrhọ phia-a. Ọwan ephian a gba-a, a ji zẹ uvuẹn izede owu ro kenkenrin ro suẹn riẹ arhọ. Omarana, e fiẹrorhọ taghene ene rhe ruẹ owuowọnwan sọ. Paul ọ tare taghene ọkezẹko ana sabu rhe ruẹ oborẹ ọnọ lẹrhẹ ereva ọwan “biomevwan.” (Col. 3:13) Ọrẹn, ukperẹ ana tẹnrovi oborẹ ọ lẹrherẹ ọwan kproghwẹ na, o fori na tẹnrovi osa rọ ha obaro na. Erhe se, jene vẹnrẹn ji rha zẹ nyarhẹn. Arha sẹrorẹ orusọ rhẹ ẹhẹn jeghwai daji ekete erhe se na, a sabu zorhẹ na toba ji vwo osa na-a. Habaye, ana sabu rhiẹ ukọ rẹn awọrọ ra damoma aye ina ga i Jehova rhẹ aghọghọ.

10. Marhẹ ene ru kẹnoma rẹn uruemru re rhiẹ “ukọ” rẹn awọrọ?

¹⁰ Izede ọrọrọ re ne je rhiẹ “ukọ” rẹn imizu uvuẹn ukoko na, yẹ ọrẹ ana ha uphẹn rẹn aye djẹ odjẹ aye orho serhọ, ukperẹ ana gba aye ru lele oborẹ a guọlọre. (Rom. 14:13, 19-21; 1 Cor. 8:9, 13) Erhe ruẹ ọnana, na na vẹnẹ ihworho ra zorhẹ uvuẹn akpọ na. Aye e lele ereva ye tiẹ orhẹ na, ji damoma rẹ aye ine vwo osa na rẹn oma aye. Edamẹ aye ọvo yẹ aye e roro kpahan. Omarana, aye na mwa awọrọ nẹ izede neneyo aye i sabu kobaro. Ọrẹ ovẹnẹ, ọwan i vwe lele imizu ọwan tiẹ orhẹ na-a. (Gal. 5:26; 6:4) Ẹkẹ ọwan ọrẹ ana ha userhumu rẹn ihworho buebun zorhẹ na hin, ji vwo arhọ i bẹmẹdẹ. Omarana, ọwan na damoma nyalele urhebro ọnyikọ Paul sekpahen  ọrẹ ana ‘guọlọ edamẹ awọrọ, ukperẹ ono rhiẹ edamẹ ọwan ọvo.’—Phil. 2:4.

11. Me yẹ ọrọ zorhẹ ọ tẹnroviẹ, mesoriẹ?

¹¹ Haba ọrẹ aye ina tẹnrovi izede rọ ha obaro na, era zorhẹ na a ji tẹnrovi oborẹ aye ine ru zẹ te ẹta. Dedevwo aye i vwa mẹrẹn ekete aye ina dobọji-i, ọrẹn aye ina sabu rha ha ẹhẹn roro kpahen oborẹ ono rhirhiẹ ọke aye i rha zẹ te yi ne jeghwai vwo osa na. Ọnana nọ lẹrhẹ aye dabu fiomarhọ orhẹ na.

12. Me yi Jehova ọ yẹrẹ ọwan ne?

¹² Uvuẹn orhẹ ra zẹ na, Jehova o vive taghene idibo yi ina mẹrẹn osa uvuẹn obẹta orhẹ na, nọyẹ arhọ i bẹmẹdẹ uvuẹn paradais otọrakpọ na yanghene obẹ odjuwu. Baibol na o dje kpahen ebrurhọ ri ne rhirhiẹ ye rẹn ọwan, ọnana ọnọ ha userhumu rẹn ọwan rhe oborẹ akpọ ọwan ono rhirhiẹ. Arha sẹrorẹ ifiẹrorhọ ọwan gbanhon, a lẹrhẹ emru owuorowu rhiẹ ukọ rẹn ọwan bẹmẹdẹ-ẹ.

13. Me yẹ ọwan i vwori rẹ ihworho ra zorhẹ i vwe vwo?

¹³ Ihworho ra zorhẹ ọke ahwanren, a zẹ ghele ebẹnbẹn jerẹ emiamiamo ọrhẹ omẹghwọghọ. Ọrẹn oborẹ aye a hẹrosua yẹ, omẹgbanhon aye ọrhẹ uyono ra yẹre aye. Ọwan i họhọ ihworho erana ra zorhẹ na, fọkime ọwan e yono oborẹ ene ru zorhẹ na hin. Ọrẹn, orhẹ ọwan o rhomu ghwẹ erẹ ihworho erana. Jehova ọnọ sabu yẹ ọwan omẹgbanhon rhọ. Arha hẹroso i Jehova, o vive ro no yono ọwan ji ruẹ ọwan gbanhon!—1 Pet. 5:10.

14. Marhẹ 2 Corinthians 12:9, 10, o ru ha userhumu rẹn ọwan nyerẹn ghele ebẹnbẹn?

¹⁴ Paul o nyerẹn ghele ebẹnbẹn buebun. Haba ẹkparehaso ọrhẹ ephien re phien rien, ẹhẹn yen o ji seriotọre ọkezẹko, o ji nyerẹn ghele “uvwẹn” rọ ha ugboma yen. (2 Cor. 12:7) Ukperẹ ono ni ebẹnbẹn na rhiẹ uphẹn rọ nọ dobọ ogame i Jehova ji, no nirien rhiẹ uphẹn rọ nọ hẹroso i Jehova. (Se 2 Corinthians 12:9, 10.) Fọkiẹ uruemru ọnana, Jehova nọ ha userhumu rẹn Paul uvuẹn ebẹnbẹn yen ephian.

15. Arha hẹrokele i Paul, me ye ne rhiẹromẹrẹn?

¹⁵ Ana ji sabu phien yanghene kparehaso ọwan fọkiẹ esegburhomẹmro ọwan. Ọkezẹko, ana dẹrughwaroghwu emiamo yanghene ebẹnbẹn. Ọrẹn arha hẹrokele i Paul, ebẹnbẹn erana ni na sabu lẹrhẹ ọwan vwo uphẹn ra na mẹrẹn obẹhatua i Jehova.

16. Emiamo ọrhọ tobọ kpokpuo, me wu na sabu ru?

¹⁶ Ekpa wu havwọ, gbinẹ aga ukpolo? Igbon enọ e kpogho gbinẹ ikẹro ye kpokpuo? Orhiomaran, wu na sabu lele erẹ oma aye ọ gbanhonron ga i Jehova? Ee! Ihworho buebun ri ho ne ọrhẹ eri vwa sabu nya, a zẹ uvuẹn izede arhọ na. Aye i sabu ha omẹgbanhon aye ọvo wian owian ọnana-a. Ukpomaran, aye a hẹrosuẹ omẹgbanhon i Jehova nyoma aye a kerhọ uyono ukoko ọwan nyoma ifonu, yanghene ividio. Habaye, aye e ji fiomarhọ owian aghwoghwo na nyoma aye e ghwoghwo rẹn idọkitọ, inọsu, ọrhẹ ihworho ekrun aye.

17. Ukẹro ọgo yi Jehova ọ ha nẹ ihworho re kpomẹ?

¹⁷ Wu vwe jenẹ emiamo nọ lẹrhẹ ẹhọn seriotọre, ji lẹrhuọ roro taghene wu sabu zorhẹ arhọ na tobẹta-a. Jehova o vwo ẹguọlọ kpahuọn fọkiẹ esegburhomẹmro ọrhẹ edirin wu vwo kpahiẹn. Wu guọlọ userhumu ọnẹyen vwana vrẹn  ọke bi, ọye ọ ji sẹrerhumuji owẹwẹ-ẹ. (Ps. 9:10) Ukpomaran, Jehova ono tikẹruọ rhọ. Djokarhọ oborẹ omizu ọmase owu ro kpomẹ ọ tare: “Ọke emiamo mẹ e buẹnrhọ, ni mi mẹrẹnvwrurhe taghene mi vwa rha sabu vwo uphẹn mi ne ghwoghwo rẹn awọrọ-ọ. Ọrẹn, mi rheri taghene omẹdamu mẹ ọ lẹrhẹ i Jehova ghọghọ, ọ ji lẹrhẹ oma merhen mẹ.” Ẹhọn orho seriotọre, karorhọ taghene rhẹ owẹwẹ ọvo yi havwiẹ-ẹ. Roro kpahen udje i Paul, ji karorhọ ẹmro urhebro ọnẹyen: “Mia ghọghọ uvuẹn ovwiẹlẹme, . . . fọkime ọke mia vwiẹlẹ, yi mie vwo omẹgbanhon.”—2 Cor. 12:10.

18. Obẹnbẹn ọgbogbanhon ọgo yẹ ihworho ezẹko a dẹrughwaroghwẹ?

¹⁸ Ihworho ezẹko ra zẹ uvuẹn izede arhọ na a dẹrughwaroghwẹ obẹnbẹn ọrọrọ. Aye e rhiẹromẹrẹn ebẹnbẹn omobọ rẹ awọrọ ina ja sabu mẹrẹn yanghene vwẹruọ ye. Jerẹ udje, aye e nyerẹn ghele ẹhẹn aye ro seriotọre yanghene ọfiamu ro kpokpo aye. Mesoriẹ aye a dẹrughwaroghwẹ aruẹ ebẹnbẹn enana? Fọkime ohworho orho burhun obọ yanghene ọravwọ orho siyẹ aga ukpolo, ihworho ephian a mẹrẹn obẹnbẹn yen, ọnana nọ lẹrhẹ aye ha userhumu riẹn. Ọrẹn, ihworho rẹ ẹhẹn aye o seriotọre i vwa sabu dje aruẹ oka ọrana phia ro djephia taghene aye a rioja-a. Obẹnbẹn ọnana ọ gbanhon te ọrẹ ohworho ro burhun isuaso, ọrẹn fọkime awọrọ i vwa mẹriẹ-ẹn, ọ vwọ lẹrhẹ aye dabu dje ẹguọlọ phia riẹ-ẹn.

19. Me ye yono nẹ udje i Mephibosheth?

¹⁹ Orhianẹ wu vwo emiamo rẹ awọrọ i vwe vwẹruọ ye, wu na sabu mẹrẹn omẹgbanhon nẹ udje i Mephibosheth. (2 Sam. 4:4) Ọye ukpolo, habaye Orodje David no brorhiẹn kpe yi erhierhi. Orhiẹ i Mephibosheth yọ suẹ ekwakwa enana rẹn omaye-en. Ọrẹn, ọ lẹrhẹ ọnana kpe ẹhẹn yen riotọre-e; o vwo ọdaremẹro kpahen ekwakwa irhorhomu ri phia riẹn ne. O vwo ọdaremẹro kpahen ẹguọlọ atamwu ri David o dje riẹn vrẹn ne. (2 Sam. 9:6-10) Omarana ọke i David ọ haye guẹnzọn, Mephibosheth nọ damoma roro kpahen ọsoso ekwakwa ri soriẹ. Ọ ha uphẹn rẹn orusọ i David nọ lẹrhiẹ tuekwẹre-e. O ji kperi Jehova fọkiẹ oborẹ i David o ruru-u. Mephibosheth ọ tẹnrovi oborẹ ọnọ sabu ru nọ hobọtua orodje ri Jehova ọ djẹha. (2 Sam. 16:1-4; 19:24-30) Jehova ọ lẹrhẹ iyẹnrẹn i Mephibosheth rhirhiẹ i Baibol na, neneyo a sabu mẹrẹn erere nie.—Rom. 15:4.

20. Marhẹ ọfiamu ono ru sabu hobọte ezẹko usuẹn ọwan, ọrẹn imwẹro ọgo yẹ aye ina sabu vwo?

 ²⁰ Fọkiẹ ọfiamu ọgbogbanhon, imizu ezẹko ina sabu rhe brudu kpahen okugbe aye ọrhẹ awọrọ. Ọnọ sabu bẹn rẹn aye nẹ aye i kwomakugbe ẹko ihworho buebun, ọrẹn aye e ji riẹ iyono ukoko, emẹvwa okinhariẹ ọrhẹ emẹvwa eduado. Ọ bẹn aye ina tẹmro rẹn epha, ọrẹn aye e lele awọrọ tẹmro uvuẹn owian aghwoghwo na. Ọrana ọrhọ phia wẹn, jenẹ o mwuo ẹro taghene awọrọ e ji rhiẹromẹrẹn aruẹ erhirhiẹ wu havwọ na. Awọrọ i ji vwo aruẹ iroro ọnọ. Karorhọ taghene oma ọ merhen i Jehova kpahen omẹdamu ọnọ. Ra mẹriẹn taghene we ji fiobọrhotọre na-a, ọnana o djephia taghene ọ ha ebrurhọ wẹn ji yọ omẹgbanhon wu guọlọre. * (Phil. 4:6, 7; 1 Pet. 5:7) Orhianẹ wa ga i Jehova udabọ emiamo, jenẹ o mwuo ẹro taghene wa lẹrhẹ oma merhen i Jehova.

21. Me yi Jehova ọnọ sabu ha userhumu rẹn ọwan ephian ru?

²¹ Ọrẹ omamerhomẹ, o vwo ovẹnẹ uvwre orhẹ ẹzẹ ghemeghe ọrhẹ orhẹ ri Paul ọ ta kpahen na. Uvuẹn orhẹ ẹzẹ ọke ahwanren, owuọwan ọvo yo vwo osa na. Ọrẹ ovẹnẹ, kohworho kohworho rọ sabu vwo edirin toba uvuẹn orhẹ Olele Kristi, ọnọ sabu vwo osa arhọ i bẹmẹdẹ. (John 3:16) Habaye uvuẹn orhẹ ẹzẹ akpọ na, ihworho ephian ra zẹ ine vi vwo omọkpokpọ; orhiomara-an, aye i sabu vwo osa na-a. Ọrẹn, ọwan buebun i vwo emiamo sansan, udabọ ọrana ọwan e zirẹn nyarhẹn. (2 Cor. 4:16) Nyoma userhumu i Jehova, ọwan ephian ina sabu zorhẹ na ye tobẹta!