1. Ndaga itshi tudi naye gutshita mukut’etu agasue?

WAJIYA gutshigina guzula phushi gula udi mujiya egi idi lamba handaga udi mukata nga udi wa guhuila ba? Ndo sha. Mupostolo Phaula wazuelele egi, Aklisto agasue adi muzula phushi. (Heb. 12:1) Mukut’etu agasue ikhale ana nga akulutu, ikhale tudi ya guhuila nga tudi nu ngolo, ha guheta ishimbigo idi gutubambela Yehowa, tudi naye gukolesela uu nu gu gisugishilo.—Mat. 24:13.

2. Mukunda natshi mupostolo Phaula gahanele longo didi mu 2 Timote 4:7, 8?

² Phaula wazuelele ndaga yene handaga muene ‘wamanesele guzula phushi.’ (Tanga 2 Timote 4:7, 8.) Uvi phushi jitshi jiene jiakhalele muzuelela mupostolo Phaula?

3. Phushi jidi muzuelela mupostolo Phaula jidi itshi?

³ Matangua ako, Phaula wakhalele mukalegele ifezegeselo ya saga jiakhalele mukalegewa gu Grece ikulu ha gulongesa ndaga jia ndando. (1 Kol. 9:25-27; 2 Tim. 2:5) Iphungu yavula, wakhalele mufuanesa guzula phushi nu lujingu lua Muklisto. (1 Kol. 9:24; Gal. 2:2; Fili. 2:16) Muthu wana sendesa guzula “phushi” gula wadihana gudi Yehowa nu wabatijiwa. (1 Phet. 3:21) Wana manesela guzula phushi gula Yehowa wamuhana gishimbigo gia monyo wa ivo nu ivo.—Mat. 25:31-34, 46; 2 Tim. 4:8.

4. Ndaga jitshi tuza muzulela mu longo edi?

⁴ Gudivua gutshi gudi mukatshi dia guzula phushi, nu lujingu lua Uklisto? Gudi nu ndaga jiavula jia gudivua. Tutadilenu ndaga thathu mukatshi dia ndaga jiene. Thomo, tudi naye gulandula njila ya bonga; ya mbadi, tudi naye guya uu nu gu gisugishilo; ya thathu, tudi naye gukolesela ngatshima tuatagana nu malamba.

5. Njila itshi tudi naye gulandula, nu mukunda natshi?

⁵ Ha guheta gishimbigo, athu adi mukalagala saga jia guzula phushi adi naye gulandula njila ya tombewa gudi mafumu awo. Esue nji, ha guheta gishimbigo gia monyo wa mayilago, tudi naye gulandula njila ya Uklisto, nga ndo luholo lua gujinga lua Aklisto. (Makal. 20:24; 1 Phet. 2:21) Uvi, Satana nu athu adi mulandula gifezegeselo gienji, ana tshigina ndo egi esue tulandule njila ya Uklisto; ana tshigina egi ‘tulandule guzula phushi hamoshi nu ene.’ (1 Phet. 4:4) Ana segulula luholo luetu lua gujinga, nu ana monesa egi luholo luawo lua gujinga ludi luabonga, luana guabatela diphanda. Uvi idi ndaga ya mambo.—2 Phet. 2:19.

6. Longo ditshi tuajiya guzula mu gifezegeselo gia phangi Brian?

⁶ Muthu wagasue udi mujinga gifua athu a ha mavu awa a Satana, wana kotelesa gungima egi njila yatombele muene yana gumubatela ndo diphanda, uvi yana gumubata mu uhiga. (Lomo 6:16) Tutadilenu gifezegeselo gia phangi Brian. Mvuaji jienji jiakhalele gumukuatesa ha gulandula luholo lua gujinga lua Aklisto. Uvi hatagenesele muene ivo kumi nu holu, wasendesele gudihula gula gutshita ngenyi mbagumubatela gusuanguluga. Brian wazudile desizio dia gujinga gifua athu a ha mavu awa a Satana. Udi muzuela egi: “Gungima ngakotelesele egi diphanda ngakhalele mukamba diangubatele malamba. Ngasendesele gunua ima yabala (drogue) nu matombe abala nu gukalagala uthambi. Gungima dia ivo yavula, ngalanduile luko gunua ima yabala muavula, ngabuile diago muhiga wa ima yene. . . . Ngasendesele gusumbisa ima yene nu matombe abala ha gudikuatesa.” Brian wazudile desizio dia gutumagela mikhuala ya Yehowa. Wasombegesele makalegelo enji abola nu wabatijiwe mu 2001. Mangino udi nu lujingu luabonga handaga udi mulandula njila ya Uklisto. *

7. Ha gutadila Matayo 7:13, 14, njila jitshi mbadi jidi gu tuama dietu?

⁷ Idi diago nu ndando egi tutombe njila yabonga ya gulandula! Satana wana tshigina egi mukut’etu agasue tubembe gulandula njila yazonda idi ‘mubata gu monyo’, nu tulandule njila yakoma yinyi athu avula a ha mavu awa adi mulandula. Njila yene yakhala nu athu avula nu yakhalago lamba ha guya guene. Uvi yana ‘bata gu gufua.’ (Tanga Matayo 7:13, 14.) Ha gusala mu njila yabonga nu hagula tuhuigiwago gudi athu ana gutuna mikhuala ya Yehowa, tudi naye guhaga mutshima gudi Yehowa nu gumutegelela.

8. Gila muthu udi muzula phushi wabua, itshi gadi naye gukalagala?

⁸ Athu anyi ana tshita saga jia guzula phushi ana haga meso awo gu tuama hagula gima giaakhakhuisago. Uvi muthu muko adi muzula nenji phushi wajiya guakhakhuisa, nga ndo ajiya gubua mu wina didi mu njila. Gila abua, ana zugidila nu alandula luko guzula phushi. Ana haga ndo meso awo gu gima giaakhakhuisa, uvi ana haga meso gu mufundunda wa gisugishilo nu gu gishimbigo adi mudifelela ha guheta gula abinga.

9. Gila tuakhakhuga, itshi tudi naye gutshita?

⁹ Mu phushi jietu jia mu nyuma, tuana khakhuga mahugo avula mu ndaga tuana zuela nu eji tuana kalagala. Nga ndo aphangi etu Aklisto ajiya gutshita ndaga imoshi yabola yajiya gutusagesa. Tuajiyilego gudihula gula ndaga ya luholo elu yatubuila. Mukut’etu agasue tushigo athu atagana, nu tudi muzula phushi mu njila yakama idi mubata gu monyo. Hene, matangua ako tuajiya gudikhakhuisa nu aphangi ako. Mupostolo Phaula wakhalele mujiya egi matangua ako, tuajiya ‘gukhala nu ndaga nu muthu muko.’ (Kol. 3:13) Uvi ha fundo dia gutala gima giatukhakhuisa, tuhagenu meso gu gishimbigo gidi gutuama dietu. Gula tuakhakhuga, tudi naye gukamba luholo lua guzugidila ha gulandula guzula phushi. Gila tuavua khabu nu tuatuna guzugidila, mbatushigo muheta gu mufundunda wa gisugishilo nu mbatuhetshigo gishimbigo. Luko, esue nji tuajiya gubua gikhakhuishilo mukunda nu athu ako tudi muzula nawo phushi mu njila ya monyo.

10. Luholo lutshi tuajiya gutuna gubua ‘gikhakhuishilo’ mukunda nu athu ako?

¹⁰ Luholo luko tuajiya gutuna gubua ‘gikhakhuishilo’ mukunda nu aphangi etu Aklisito ludi, guabemba egi atshite ndaga adi mutshigina gula ishigo yabola, ha fundo dia guashinjiga ha gutshita ndaga gifua luholo tudi mutshigina. (Lomo 14:13, 19-21; 1 Kol. 8:9, 13) Uvi esue tushigo gifua athu anyi ana kalagala saga jia musende wa phushi. Ana kamba gubinga athu ako, muthu wagasue mukatshi diawo wana kamba guzula gishimbigo giene muene hakhenji. Athu ene ana tangiza thomo phamba gubonga guawo. Hene, ana kamba gubuisa athu ako hagula ene abalege gutuama. Uvi, esue tuanago gukamba gubinga aphangi etu. (Gal. 5:26; 6:4)  Felela dietu diakhala dia gukuatesa athu avula ha guheta gu mufundunda wa gisugishilo hagula tuhete nawo gishimbigo gia monyo. Hene, tuana kamba gukalegela longo dia mupostolo Phaula didi muzuela egi, ‘tukambigo phamba gubonga guetu, uvi tukambe nji gubonga gua athu ako.’—Fili. 2:4.

11. Muthu wana zangula phushi wana haga matangi gu ndaga itshi? Nu mukunda natshi?

¹¹ Athu ana gukalagala saga jia gulenga phushi ana guhaga meso awo gutuama, nu ana guhaga matangi awo gu mufundunda wa gisugishilo. Nga ashigo mumona mufundunda wene, uvi ana gutangiza luholo mbaaheta hene ha guzula gishimbigo. Gutangiza gishimbigo giene tangua diagasue, guana guahana ngolo jia gulandula (gulunduga).

12. Felela ditshi Yehowa wana gutuhana?

¹² Mu phushi jia Uklisto tuana zangula, Yehowa wana gutulaya ishimbigo mbatuheta gula tuamanesela guzula phushi: Mbatuheta monyo wa ivo nu ivo mu dilu nga mu phaladiso ha mavu. Biblia yana gutumonesa luholo ishimbigo yene mbayikhala, ngenyi tuajiya gutangiza luholo mbatukhala nu lujingu luawaha mu phaladiso. Gula tudi mutangiza felela dietu tangua diagasue, mbatushigo mubemba nga gima gimoshi ha gutukhakhuisa.

13. Ndaga jitshi jiawaha tudi najio gubalega athu anyi ana guzula phushi?

¹³ Athu akhalele mukalagala saga jia gulenga phushi gu Grece ikulu, akhalele mutagana nu malamba avula, gifua guhuila nu ndaga jiko. Uvi akhalele muhaga mutshima gu formasio akhalele guahana nu gu ngolo jiawo. Esue nji tudi gifua athu ene, tuana guheta formasio ha gujiya luholo lua gulenga phushi jiene. Uvi esue tudi nu ndaga jiavula jiawaha gubalega athu anyi ana guzula phushi. Tuajiya guheta ngolo gudi Yehowa, handaga ngolo jienji jianago guhua. Gula tuahaga mutshima gudi Yehowa, muene mbagashigo phamba gutuhana formasio, uvi udi gutulaya luko gamba mbawutuhana ngolo!—1 Phet. 5:10.

14. Luholo lutshi 2 Kolinto 12:9, 10 idi gutukuatesa ha gulua nu malamba?

¹⁴ Phaula wataganele nu malamba avula. Athu a mushingile, a musagesele, matangua ako muila wakhalele gumuleba nu watagenele nu lamba diko diakhalele gifua ‘muiya mu muila.’ (2 Kol. 12:7) Uvi ha fundo dia gubemba gukombelela Yehowa mukunda nu malamba ene, waamonele gifua okazio wa guzegemena gudi Yehowa. (Tanga 2 Kolinto 12:9, 10.) Handaga Phaula wakhalele nu matangi a luholo elu, Yehowa wamukuatesele mu malamba enji agasue.

15. Okazio itshi mbatuheta gula tualandula gifezegeselo gia Phaula?

¹⁵ Esue nji tuajiya gushingiwa nga gusagesewa mukunda nu gutshigina guetu. Tuajiya gukata nga guleba muila. Uvi gula tualandula gifezegeselo gia Phaula, malamba etu agasue ajiya gutuhana okazio ya gumona ukuateshi wa Yehowa mu monyo wetu.

16. Gila udi nu ukhashi mu muila, itshi wajiya gukalagala?

¹⁶ Wana gukata misongo yakola ba? Wana khala nu malu a gufua nga meso a gufua ba? Gula idi ngenyi, wajiya gukombelela Yehowa hamoshi nu mavuala nga nu athu anyi adi nu ngolo ba? Ayi! Athu avula a gukola, nu anyi adi nu ukhashi mu muila ana guzula phushi mu njila ya monyo. Ajiyilego gukalagala mudimo owu nu ngolo jiawo hakhawo ndo. Uvi, ana guhaga mutshima gu ngolo jia Yehowa tangua ana landula gudibungisa gua mu hungu mu njila ya telefone nga mu njila ya Internet. Ana gudihana mu mudimo wa gubuisa athu alandudi tangua ana gulongesa minganga nu enya fami jiawo.

17. Yehowa wana gudivua gikuatshi tangua tuana gukata?

 ¹⁷ Ukhashi udi nawo mu muila ugulebesago muila ha gumona gifua wajiyilego guzula phushi mu njila ya monyo. Yehowa wana guguzumba mukunda nu gutshigina guaye. Udi diago nu funu ya ukuateshi wenji, muene mbagashigo gugubemba. (Ngi. 9:10) Muene mbawudi musuena hehi nu aye. Tala ndaga yazuelele phangi mumoshi wa mukhetu yonu wana gukata: “Luholo ngana gukata muavula, nganago guheta ba okazio avula a gulongesa athu. Uvi ngana gujiya egi ndambo ya ngolo ngana gukalagala yana gusuanguluisa Yehowa, nu yana gungubatela gubonga.” Gula muila wa guleba, jiya egi ushigo hakhaye. Tangiza gifezegeselo gia Phaula, nu mbimbi jiazuelele muene egi: ‘Ngana gusuanguluga tangua ngana gukhala muila wa guleba, . . . handaga, tangua ngana guleba muila, hene ngana gukhala nu ngolo.’—2 Kol. 12:10.

18. Lamba dia luholo lutshi athu ako ana gutagana nadio?

¹⁸ Athu anyi ana guzula phushi mu njila ya monyo ana gutagana nu lamba diko. Ana gutagana nu malamba ako anyi athu ako ajiyilego gumona nga gukotelesa. Ha gufezegesa, ana gutagana nu ukhashi wa matangi (dépression) nga gutagana nu gikenene giakola. Mukunda natshi akombeledi a gujinginyina a Yehowa ana gutagana nu lamba dia luholo elu? Handaga, gila muthu wabogoga koko nga udi nu misongo yakola, athu agasue ana gumona lamba dienji nu ana kamba ha gumukuatesa. Uvi, athu awa ana gukata misongo ya matangi, ukhashi wawo wanago gumonega haphelo egi adi mukata. Lamba diawo didi luholo lumoshi nu muthu munu yabogoga koko, uvi, anago guheta ukuateshi adi nawo funu gifua athu agasue, handaga athu ako ashigo mumona lamba diawo gu meso.

19. Longo ditshi tudi muzula mu gifezegeselo gia Mefiboshete?

¹⁹ Gila aye nji udi nu ukhashi nga lamba diko nu udi mumona egi athu ako ashigo gugukotelesa, gifezegeselo gia Mefiboshete giajiya gugukuatesa. (2 Sam. 4:4) Wakhalele malu a gufua. Lusugu luko, Fumu Davidi wamukalegele ndaga nu khabu. Mefiboshete gakalegelego nga gima gimoshi giabola hagula malamba awa agasue amubuile. Uvi muene gavuilego khabu tangua diagasue; wakhalele musuanguluga nu ndaga jiabonga gakhalele mutagana najio mu lujingu. Wakhalele muhana mersi mukunda nu mutshima wabonga wamumonesele Davidi mu masugu abalega. (2 Sam. 9:6-10) Hene, tangua Davidi gamukalegele ndaga nu khabu, Mefiboshete wamonele ndaga jiene mu luholo luabonga. Gabembelego egi ndaga yabola yakalegele Davidi yimukatule gusuanguluga guenji. Nu gavidilego Yehowa khabu mukunda nu ndaga yabola yakalegele Davidi.  Mefiboshete wakhalele mutala phamba ndaga gakhalele naye gukalagala ha gutumagela fumu watombele Yehowa ha guhinyina. (2 Sam. 16:1-4; 19:24-30) Yehowa wasonegesele lumene lua Mefiboshete mu Mbimbi yenji mukunda nu gubonga guetu.—Lomo 15:4.

20. Luholo lutshi gikenene giakola giana gusagesa athu ako? Uvi athu ene ajiya guhaga mutshima wawo gu itshi?

²⁰ Mukunda nu gikenene giavula, aphangi avula ana guvua musonyi, nu ana gusuanguluga ndo nu ndaga jiavula tangua adi mukatshi dia athu ako. Ana suanguluga ndo gukhala mukatshi dia athu avula, uvi ana guya mu gudibungisa gua mu hungu nu gu asamble a lusugu lumoshi nu a masugu thathu. Ana suanguluga ndo guta maga nu ngenji, uvi ana longesa athu ako mu mudimo wa gulongesa. Gila wana gudivua ngenyi, jiya egi ushigo hakhaye. Aphangi avula ana tagana nu ndaga ya luholo elu. Ujimbilago egi Yehowa wana gusuanguluga nu ngolo wana gumukalegela nu mutshima wagasue. Luholo ushigo mubemba ha gumukombelela, idi mumonesa egi yowu gugukuatesa nu guguhana ngolo udi najio funu. * (Fili. 4:6, 7; 1 Phet. 5:7) Gula udi mukombelela Yehowa uvi udi nu ukhashi mu muila nga mu matangi, jiya egi wana gumusuanguluisa muavula lume.

21. Yehowa mbawutukuatesa mukut’etu agasue ha gutshita itshi?

²¹ Ndaga ya gusuanguluga idi egi, gudisha gudi guene mukatshi dia phushi jiana zula athu nu eji jiazuelele Phaula. Phushi jiakhalele muzudiwa mu tangua dikulu, phamba muthu mumoshi wakhalele mubinga. Uvi, muthu wagasue udi muzula phushi jia Uklisto mu njila ya monyo, mbawuheta gishimbigo gia monyo wa ivo nu ivo. (Yone 3:16) Ndaga iko, athu ana guzula phushi adi naye gukhala nu muila wabonga hagula abinge, gula ndo ajiyilego gubinga. Uvi esue, aphangi avula mukatshi dietu akhala nu ukhashi mu muila, uvi ana gukolesela sha. (2 Kol. 4:16) Yehowa mbawudi gutukuatesa ha guzula phushi uu nu gu gisugishilo!