1. ¿Imatataj tukuy cristianos ruwananchej tiyan?

ONQOSQA chayri saykʼusqa kashajtinchej, pillapis atipanakupi correnanchejta niwajtinchej, ¿corresunmanchu? Ichapis mana. Astawanraj mana munasunmanchu, chay atipanakupi correna mana atinapaj jina kajtenqa. Apóstol Pabloqa, tukuy cristianos atipanakupi correjkuna jina kasqanchejta nerqa (Heb. 12:1). Chayrayku jóvenes, viejitos, kallpayoj chayri saykʼusqa kaspapis, maymanchus chayananchej kashan, chaykama correnallanchejpuni tiyan. Jehová Diostaj premionchejta qowasun (Mat. 24:13).

2. Kay 2 Timoteo 4:7, 8 nisqanman jina, ¿imajtintaj Pablo tukukuykama correnamanta parlayta aterqa?

² Pabloqa nerqa: “Atipanakupi corresqaytapis tukuniña”, nispa. Chayrayku payqa tukukuykama correnamanta parlayta aterqa (2 Timoteo 4:7, 8 leey). Qhepan parrafospi yachakusun, ima atipanakupichus correshasqanchejta.

3. ¿Imatataj apóstol Pablo atipanakupi correywan kikincharqa?

³ Unay tiempopeqa, Grecia suyupi atipanakupi pujllaykuna karqa. Apóstol Pablotaj cristianosman yachachinanpaj, wakin kutis chay pujllaykunamanta parlarqa (1 Cor. 9:25-27; 2 Tim. 2:5). Chayrayku ashkha kutispi, cristianospa kausayninkuta uj atipanakupi correywan kikincharqa (1 Cor. 9:24; Fili. 2:16). Chay atipanakupi correyta qallarinchej, maypachachus Jehová Diosman kausayninchejta qopunchej, bautizakunchejtaj, chaypacha (1 Ped. 3:21). Maymanchus chayananchej kashan chayman chayajtinchejtaj, Jehová Diosqa wiñay kausayta premiota jina qowasun (Mat. 25:31-34, 46; 2 Tim. 4:8).

4. ¿Imasmantá kay yachaqanapi parlasun?

⁴ Cristianosqa karu ñanta atipanakupi correjkunaman rijchʼakunchej. Kay yachaqanapeqa kinsa imaspi rijchʼakusqanchejmanta parlasun. Ñaupaj kaj, mana munasqanchejman jinachu maynintapis correnanchej tiyan. Iskay kaj, maymanchus chayananchej kashan, chaypi yuyayninchej kanan tiyan. Kinsa kaj, ima kajtinpis correnallanchejpuni tiyan.

5. ¿Imatá ruwana tiyan wiñay kausayta japʼinapaj?

⁵ Atipanakupi correjkunaqa, maynintachus correnanku kashan, chaynintapuni correnanku tiyan. Mana chayta ruwajtinkoqa, mana premiota japʼinkumanchu. Noqanchejwanpis kikillantaj. Wiñay kausayta japʼiyta munanchej chayqa, Diospa munayninman jina kausananchej tiyan (Hech. 20:24; 1 Ped. 2:21). Satanaswan pay jina kausajkunawanrí, mana chayta munankuchu. Astawanpis paykuna jina kausananchejta munanku (1 Ped. 4:4). Paykunaqa Diospa munayninman jina kausasqanchejmanta asikunku. Ninkutaj: “Noqaykoj kausayniykoqa aswan sumaj, imaraykuchus ni pita kasunaykuchu tiyan”, nispa. Chaytaj mana jinachu (2 Ped. 2:19).

6. ¿Imatá Brianmanta yachakusunman?

⁶ Ashkhas munayninkuman jina kausayta munasqankurayku, Satanaspa mundonmanta runas jina kausanku. Jinapis juchaj esclavosnillanman tukunku (Rom. 6:16). Hermanonchej Brianmanta parlarina. Wawallaraj kashajtin, tatasnenqa Diospa kamachiykunasninta kasukuyta yachacherqanku. Jinapis jovenyaspaqa, munayninman jina kausaspa astawan kusisqa kananta yuyarqa. Chayrayku Satanaspa mundonmanta runas jina kausayta qallarerqa. Pay nin: ‘Mana yuyallarqanipischu munasqayman jina kausay, mana allin imasman apanawanta’, nispa. Chantapis Brianqa drogakuyta qallarerqa, tomayman qokorqa, millay kausayniyojtaj karqa. Unayta ajinata kausasqanmanta pay nillanpuni: “Imaymana drogasman qokorqani, chaykunaj wata runanmantaj tukorqani. Drogakunallaypajpunitaj, drogasta venderqani”, nispa. Astawan qhepaman, Brianqa Jehová Diospa kamachisqanman jina kausakuyta qallarerqa. Payqa kausayninta cambiarqa, 2001 watapitaj bautizakorqa. Kunantaj cristiano jina kausakuspa, cheqamanta kusisqa kashan. *

7. ¿Ima iskay ñankunamantataj Mateo 7:13, 14 parlan?

⁷ Mayqen ñantachus correnanchejta sumajta ajllana. Cristianosqa kʼullku ñanta rishanchej, chay ñantaj kausayman pusan. Satanasrí chay ñanmanta llojsipunanchejta munan. Payqa munan, kay mundomanta runas jinallataj ancho ñanta rinanchejta. Chay ñanta riytaj atikullan. Jinapis chay ñanqa wañuyman pusan (Mateo 7:13, 14 leey). Kausayman pusaj ñanmanta mana llojsipunapajqa, Jehová Dios allinninchejta munasqanpi creenanchej tiyan, kamachiwasqanchejtataj kasukunanchej tiyan.

8. Atipanakupi correjkuna, ¿imatá urmaspa ruwanku?

⁸ Karu ñanta atipanakupi correjkunaqa, mana urmanankupaj sumajta ñaupaqenkuta  qhawakunku. Chayta ruwajtinkupis, wakenqa uj tʼoqoman saruykuspa urmanku. Wakintatajrí correjkuna masinku, mana munaspalla urmachinku. Jinapis urmakojqa, mana “kay urmachiwan” nispa pachanpi qhepakunchu. Astawanpis sayariytawan correllanpuni. Imaraykuchus yachan, maymanchus chayanan kashan, chayman chayajtin premiota japʼinanta. Chay yuyaywantaj correllanpuni.

9. Cristiano kausayninchejpi urmakuspa, ¿imatataj ruwananchej tiyan?

⁹ Cristiano kausayninchejpi, ichá noqanchejpis ashkha kutista parlasqanchejpi chayri ruwasqanchejpi pantasun. Manachayrí ichá waj hermanos contranchejpi imatapis ruwasqankurayku pantasun. Chaytaj kanqapuni, imaraykuchus tukuyninchej pantaj runas kanchej, kʼullku ñantataj correshanchej. Chayrayku ichapis wajkunawan tanqarparinakusun, nisunman purajmanta pantachinakusun. Apóstol Pablopis nerqa, ‘wajkuna contranchejpi imatapis ruwanankutapuni’ (Col. 3:13). Jinapis pichus chayri imachus urmachiwasqanchejpi yuyanamantaqa, ima premiotachus japʼinanchejpi yuyana. Urmaspaqa sayariytawan correnallapuni. Ama phiñasqallapuni pachanpi kanachu. Chayta ruwasunman chayqa, maymanchus chayananchej kashan, chayman mana chayasunchu, nitaj premiotapis japʼisunchu. Chantapis kikillanpi qhepakuspaqa, wajkunata urmachisunman. Imaraykuchus kausayman apaj ñanqa kʼullkulla.

10. ¿Imatá ruwananchej tiyan hermanosninchejta mana pantachinapaj?

¹⁰ Hermanosninchejqa noqanchejwan khuska correshanku, manataj paykunata pantachiyta munanchejchu. Chayrayku atikojtenqa, munasqankuta ruwajta saqena, amataj munasqanchejtapuni ruwachinachu (Rom. 14:13, 19-21; 1 Cor. 8:9, 13). Atipanakupi correjkunaqa, sapa ujninku premiota japʼiyta munanku. Chayrayku paykunawan correjkunata atipayta munanku. Atipanankuraykutaj correj masisninkutapis tanqarparinku. Noqanchejrí mana hermanosninchejta atipayta munaspachu correshanchej (Gál. 5:26; 6:4). Astawanpis tukuyta yanapayta munanchej, noqanchejwan khuska correnallankupajpuni, wiñay kausaytataj japʼinankupaj. Chayrayku apóstol Pabloj nisqanta kasukunapaj, mayta kallpachakunchej. Pay nerqa: “Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa (Fili. 2:4).

11. ¿Imapitaj atipanakupi correjkuna yuyanku, chanta imaraykutaj?

 ¹¹ Atipanakupi correjkunaqa mana ñaupaqellankutachu qhawanku, manaqa maymanchus chayananku kashan, chaypi yuyanku. Correshaspaqa ichapis chay lugarta mana ñawisninkuwan rikunkuchu. Jinapis paykunaqa chayman chayashasqankutaña yuyanku, piensankutaj premiota japʼishasqankutaña. Chayraykutaj correllankupuni.

12. ¿Imatataj Jehová Dios qonawanchejta niwanchej?

¹² Jehová Diosqa munakuwasqanchejrayku niwanchej, tukukuykama correjtinchej uj premiota qonawanchejta. Chay premiotaj kashan, cielopi chayri kay jallpʼapi wiñay kausay. Bibliaqa willawanchej imaynachus chay kausay kananta. Chayrayku kunanmantaña piensarisunman, imayna sumajpunichus chay kausay kananpi. Chay premionchejpi yuyasun chayqa, mana saykʼuspa correllasunpuni, nitaj imapis urmachinawanchejta saqesunchu.

13. Atipanakupi correjkunamanta nisqa, ¿ima yanapataj kapuwanchej?

¹³ Ñaupa tiempomanta Greciapi atipanakupi correjkunaqa, saykʼusqa kaspapis chayri imanku nanajtinpis correllajpuni kanku. Paykunaqa yachachisqa kasqankuman jina, kallpankuman jinataj correj kanku. Noqanchejpis Jehová Dios yachachiwasqanchejman jina correshanchej. Jinapis atipanakupi correjkunamanta nisqaqa, noqanchejtaqa Jehová Dios yanapashawanchej. Payqa mana tukukoj atiyninwan kallpachawanchej. Jehová Diosqa niwanchej, paywan yanapachikojtinchej yachachinawanchejta, kallpatataj qonawanchejta (1 Ped. 5:10).

14. ¿Imaynatá 2 Corintios 12:9, 10 llakiykunata aguantanapaj yanapawanchej?

¹⁴ Apóstol Pabloqa ashkha llakiykunasniyoj karqa. Runasqa payta tukuy imata nerqanku, qhatiykacharqankutaj. Chantapis wakin kutis kallpan pisiyasqanta yuyarqa, mana tukukoj llakiyniyojtaj karqa. Chay llakiyninmanta nerqa: “Aychaypi khishkayoj jina kani”, nispa (2 Cor. 12:7). Pabloqa chay llakiykunasninrayku, ichapis Jehová Diosta niña sirvinmanchu karqa. Jinapis payqa Jehová Diospi astawan atienekorqa (2 Corintios 12:9, 10 leey). Chayrayku Jehová Diosqa payta yanapallarqapuni.

15. Llakiypi kaspa, ¿imatataj Pablo jina ruwasunman?

¹⁵ Runasqa ichá noqanchejtapis, Pablota jina creeyninchejrayku qhatiykachawanchej chayri imatapis niwanchej. Manachayrí ichá onqosqa chayri saykʼusqa kashanchej. Jina kajtin, apóstol Pablo jina ruwana. Ima llakiypi kaspapis, Jehová Dioswan yanapachikuna, munakuyninta rikuchinawanchejtataj saqena.

16. Onqosqa kaspapis, ¿imatataj ruwayta atisunman?

¹⁶ Wakin hermanosqa onqosqa kasqankurayku, camapi chayri silla de ruedaspi kashanku. Wakintajrí moqosninkumanta mana sanochu kasqankurayku, mana purikuyta atinkuchu. Wakintaj niña allinta rikuyta atinkuchu. Chay hermanos, ¿correyta atinkumanchu joveneswan chayri sano kajkunawan? Arí. Ashkha hermanos machitus chayri onqosqa kaspapis, kausayman pusaj ñanta correshanku. Jinapis mana kallpankuwanchu correshanku, manaqa Jehová Dios paykunata yanapasqanrayku. Paykunaqa tantakuykunata telefonopi uyarinku. Chayrí reunionta grabasqata videopi qhawanku chayri uyarinku. Chantapis familiaresninkuman, doctoresman, enfermerasman ima predicanku. Ajinamantataj runasta Jesuspa discipulosninman tukuchishanku.

17. Onqosqas chayri viejitos kajtinchej, ¿Jehová Dios qonqapuwanchejchu?

¹⁷ Onqosqas chayri viejitosña kaspapis, wiñay kausayta japʼinapaj correyta atillasunmanpuni. Jehová Diosqa creeyniyoj kasqanchejrayku munakuwanchej, yachantaj imastachus paypaj ruwasqanchejta. Onqosqa chayri viejitoña  kaspaqa, Jehová Diospa yanapayninta astawan necesitanchej. Paytaj mana saqerpawasunchu, astawantaj qayllaykamuwasun (Sal. 9:10). Uj hermananchejqa sinchʼi onqosqa kashan. Pay nin: “Astawan onqoykusqayrayku, manaña anchata predicanichu. Jinapis mashkhitallatapis runasman willarispa, Jehová Diosta kusichisqayta yachani. Chaytaj mayta kusichiwan”, nispa. Maykʼajllapis sinchʼi llakisqa kashanchej chayqa, ama qonqanachu Jehová Dios noqanchejwan kashasqanta. Apóstol Pablo imatachus ruwasqanpi, imatachus nisqanpiwan piensarina. Pay nerqa: ‘Kusikuni pisi kallpayoj kasqaymanta. Imaraykuchus pisi kallpayoj kaspaqa atiyniyoj kani’, nispa (2 Cor. 12:10).

18. ¿Ima llakiypitaj wakin hermanos rikukunku?

¹⁸ Kausayman pusaj ñanpi correjkunamanta wakenqa, waj llakiykunapi rikukullankutaj. Chay hermanospa llakiyninkoqa mana reparanapaj jinallachu. Chayrayku wajkuna mana entiendeyta atillankuchu. ¿Ima llakiyniyojtaj chay hermanos kanku? Chay hermanosqa, anchata phutikunku chayri sinchʼi llakiywan onqosqa kanku. ¿Imajtintaj chay hermanospa llakiyninku mana entiendeyta atinapaj jinallachu? Imajtinchus pillapis makin pʼakisqa kajtin chayri silla de ruedaspi kajtin, tukuy rikunchej onqosqa kashasqanta, yanapariytataj munanchej. Jinapis llakiywan onqosqa kajkuna chayri umitankumanta onqosqa kajkunaqa, qhawarisqaqa sano jina kakushanku. Jinapis paykunaqa sufrishanku, imaynatachus makin pʼakisqa chayri chakin pʼakisqa runa nanaywan sufrin, ajinata. Chay hermanospa sufrisqankuta mana rikusqanchejrayku, mana paykunata khuyakuyta atillanchejchu, nitaj yanapaytapis atillanchejchu.

19. ¿Imatataj Mefibosetmanta yachakusunman?

¹⁹ Ichapis llakiykunasninchejrayku, Jehová Diosta mana munasqanchejman jinachu yupaychashanchej, piensanchejtaj ni pi entiendewasqanchejta. Jina kajtenqa, Mefibosetpa kausaynin mayta yanapawasunman (2 Sam. 4:4). Payqa cojito karqa, rey Davidtaj mana allinta yachaspalla payta juchacharqa, jallpʼasnintapis qhechukaporqa. Mefibosetqa ajinata sufrinanpaj mana juchayojchu karqa. Jinapis mana chay llakiypi piensaspachu kausarqa. Astawanpis payqa, imaspichus allin risqanmanta kusikorqa. Chantapis David aswan ñaupajpi khuyakusqanmanta agradecekorqa (2 Sam. 9:6-10). Chayrayku David mana allinta yachaspalla payta juchachajtin, Mefibosetqa mana phiñakorqachu. Chantapis mana Davidta sajra ñawiwanchu qhawarqa, nitaj Jehová Diostapis juchacharqachu. Astawanpis Jehová Diospa ajllasqan reyta yanapayta munarqa (2 Sam. 16:1-4; 19:24-30). Jehová Diostaj Mefibosetpa kausayninmanta Bibliapi qhelqacherqa, noqanchej paymanta yachakunanchejpaj (Rom. 15:4).

20. 1) ¿Imaynataj wakin hermanosninchej kanku anchata phutikusqankurayku? 2) ¿Imamantataj Jehová Dios kusikun?

 ²⁰ Wakin hermanosqa anchata phutikusqankurayku, yuyanku runas paykuna qhawarisqalla kasqankuta. Chayrayku waj runaswan kayta manchachikunku chayri pʼenqakunku. Ajina kaspapis, tantakuykunaman, jatun tantakuykunamanpis rishallankupuni. Mana rejsisqaswan parlayta manchachikuspapis, predicacionman llojsillankupuni. Noqanchejpis ajina kanchej chayqa, ama yuyanachu sapallanchej kashasqanchejta. Ashkha hermanosninchejpis ajinallataj kanku. Kayta yuyarikuna: Jehová Diosqa mayta kusikun paypaj tukuy sonqo llankʼasqanchejta rikuspa. Paypajqa tukuy atisqanchejta ruwashallanchejpuni. Chaytataj ruwashanchej Jehová Dios bendeciwasqanchejrayku, kallpatataj qowasqanchejrayku * (Fili. 4:6, 7; 1 Ped. 5:7). Jehová Diosqa mayta kusikun, mana sano kaspapis payta sirvisqanchejmanta.

21. ¿Imatataj ruwayta atisun Jehová Diospa yanapayninwan?

²¹ Kay yachaqanapi yachakorqanchej jina, atipanakupi correjkunawan wiñay kausayta japʼinapaj correjkunawanqa, mana kikinpunichu kanku. Ñaupa tiempopi ashkhas atipanakupi correjtinkupis, ujlla premiota japʼej. Kausayman pusaj ñanta correjkunamantarí, mana ujllachu premiota japʼenqa. Astawanpis tukukuykama tukuy correjkuna premiota japʼenqanku (Juan 3:16). Atipanakupi correjkunamantaqa tukuyninku sanitos, kallpayojtaj kananku karqa. Pisi kallpas kaspaqa, mana ganayta atillajchu kanku. Wiñay kausayman pusaj ñanta correjkunamanta wakintajrí, onqosqas chayri machitusña kanchej. Jinapis correshallanchejpuni (2 Cor. 4:16). Jehová Diospa yanapayninwanqa, tukuyninchej tukukuykama correllasunpuni.