1. Eaa ta tatou ka rave?

INANGARO ainei koe i te oro i te oro anga roa, noatu kua kite koe kare teia e māmā no te apikepike o te kopapa? Kare. Karanga te apotetoro ko Paulo e te oro nei te au Kerititiano mou i tetai oro anga roa. (Ebe. 12:1) Ka oro tamou marie tatou, te aronga mapu e te ruaine, te maroiroi e te paruparu, e tae ua atu ki te openga.—Mata. 24:13.

2. Ia 2 Timoteo 4:7, 8, eaa te tumu i tuatua ai a Paulo i teia?

² Kua rauka ia Paulo i te tuatua i teia no te mea “kua oti toku oro anga.” (E tatau ia 2 Timoteo 4:7, 8.) Inara eaa ta Paulo oro anga e tuatua ra?

3. Eaa ta Paulo oro anga e tuatua ra?

³ Taiku a Paulo i te au mea e raveia ana i roto i te oro anga i Ereni, no te apii i te au manako puapinga. (1 Kori. 9:25-27; 2 Timo. 2:5) Tetai atianga kua akatutu aia i te oro anga a tetai Kerititiano ki te ora, ki tetai oro anga roa. (1 Kori. 9:24; Gala. 2:2; Phili. 2:16) Ka piri tetai tangata ki roto i te “oro” me akatapu aia iaia uaorai kia Iehova e kia papetitoia. (1 Pete. 3:21) Ka rauka iaia te re, me oronga a Iehova i te ora mutu kore kiaia.—Mata. 25:31-34, 46; 2 Timo. 4:8.

4. Eaa ta tatou ka uriuri i roto i teia atikara?

 ⁴ Eaa te au tu aiteite i rotopu i te oro anga roa e te oro anga a te Kerititiano? E maata te reira e ka uriuri tatou e toru. Mea mua, ka aru tatou i te arataa meitaki; te rua, ka akamou i to tatou manako ki runga i te tutaki; e te toru, ka oro tamou marie noatu te taitaia.

5. Eaa te arataa meitaki ka aru tatou, no teaa ra?

⁵ Kia rauka te tutaki i roto i tetai oro anga, ka aru te aronga oro i te arataa meitaki tei akanoonooia e te aronga akaaere. Pera katoa te oro anga a te Kerititiano kia rauka te ora mutu kore, ka anoanoia tatou kia aru i te akaraanga o Iesu. (Anga. 20:24; 1 Pete. 2:21) Inara, kare a Satani e te aronga aru iaia e inangaro ia tatou kia pera; inangaro ratou ia tatou kia “kapiti katoa ia ratou.” (1 Pete. 4:4) Kua akakino ratou i to tatou oraanga e kua karanga e meitaki atu to ratou turanga, kua rangatira ratou. E pikikaa te reira.—2 Pete. 2:19.

6. Eaa taau i kite mai mei te akaraanga o Brian?

⁶ Ko tetai e oro ra i roto i ta Satani akaaereanga ka kite e kua arataki ta ratou ikianga ia ratou ki te oraanga tuikaa kare ki te oraanga rangatira. (Roma 6:16) Teia te akaraanga o Brian. Kua akamaroiroi tona nga metua iaia kia aru i te oraanga Kerititiano. Te mapu ra aia, kua ekoko aia me ka apai mai te reira i te mataora. Kua iki a Brian i te aru i te aronga e rave ra i to Satani anoano. “Kare au i kite ana e te arataki ra te tu rangatira taku e inangaro ra iaku ki roto i te turanga kino no te kai i te au apinga akakona,” karanga ai aia. “Aere ua rai, kua kai au i te apinga akakona, kua inu i te kava e kua rave i te au mea tau kore. I te au mataiti tei aru mai, kua tamata au i te au apinga akakona pakari atu e kua maata atu taku kai anga i te reira. . . . Kua akamata au i te oko i te au apinga akakona ei turuturu i taku peu.” I te openga ra, kua iki a Brian i te aru i ta Iehova au kaveinga. Kua taui aia i tona oraanga e kua papetitoia i te 2001. Mataora tikai aia i teianei e te aru ra i te oraanga Kerititiano. *

7. Ia Mataio 7:13, 14, eaa nga mataara e rua tei mua ia tatou?

⁷ Mea puapinga kia iki tatou i te aere  na runga i te mataara meitaki! Inangaro a Satani ia tatou kia tuku i te au kia kore e aere na runga i te mataara o iti “e tae atu ei ki te ora” mari ra kia aere na runga i te mataara pararauare. Māmā ua i te aaere na runga i teia mataara. Inara te “tae atu[ra] ei ki te mate.” (E tatau ia Mataio 7:13, 14.) Kia aaere na runga i te mataara meitaki e kia kore e akavareia, ka anoanoia tatou kia irinaki kia Iehova e te akarongo iaia.

8. Me inga tetai tangata oro, eaa tana ka rave?

⁸ Te aronga e oro ra i te oro anga roa, ka akara tamou ratou ki mua kia kore e inga. Noatu rai ka tarapeia tetai e te tangata oro e ka topa. Me inga ratou, ka tu, ka oro ua atu rai. Ka akamou i to ratou manako kia tae ki te openga, kia rauka te re.

9. Me inga tatou, eaa ta tatou ka rave?

⁹ I roto i ta tatou oro anga, ka inga tatou i tetai taime, na roto i ta tatou ka tuatua e te rave. Penei ka rave to tatou au taeake oro i te kino e ka mamae tatou. Eiaa e poitirere i teia. E aronga apa tatou, e te oro nei tatou i runga i te mataara o iti ki te ora. Ka “u” rai tatou ki tetai e tetai i te au taime ravarai. Karanga a Paulo i tetai taime e “tapepeanga ta tetai” ia tatou. (Kolo. 3:13) Kare tatou e akamou ki te kino, mari ra ka akamou ki runga i te re. Me inga tatou, e tu akaou e oro. Me ka riri ua tatou e te akamoupuku, kare tatou i tu ki runga i te akaoti i ta tatou oro, kua ngere tatou i te re. Ka akaturori rai tatou i tetai, inara e aruaru i te oro i runga i te mataara o iti ki te ora.

10. Akapeea tatou me akakore i te turori i tetai ke?

¹⁰ Tetai mataara kia kore to tatou au taeake oro e turoriia, na te āriki anga i to ratou manako kare ua i to tatou. (Roma 14:13, 19-21; 1 Kori. 8:9, 13) Na teia mataara, kare tatou i aite ki te aronga oro. Ka taemoemo ratou ki tetai kia rauka te re. Te manako ua ra te tangata oro i tona anoano. Penei ka tuki i  tetai kia tae aia ki te ngai mua. I tetai tua kare tatou e taemoemo ki tetai. (Gala. 5:26; 6:4) Ka inangaro tatou i te katoatoa kia oro e tae ua atu ki te openga e kia ora. No reira ka taangaanga tatou i ta Paulo akamaroiroi anga “auraka te tangata e akono i tona anake uaorai au mea.”—Phili. 2:4.

11. Eaa ta tetai tangata oro ka akamou i tona manako ki runga, e no teaa ra?

¹¹ Kapiti mai ki te akara anga ki mua, ka oro te aronga oro kia tae ki te openga. Noatu e mamao te re, ka akamanako ratou e kua tae ratou ki te openga e kua rauka ia ratou te re. Kua oro ratou ma te maroiroi na te akamou anga i te manako ki runga i te reira.

12. Eaa ta Iehova i oronga mai kia tatou?

¹² I roto i teia oro, kua oronga mai a Iehova i te tutaki ki tona iti tangata—te oraanga mutu kore i te rangi e te enua nei. Akamārama mai te Tuatua Tapu i teia tutaki, manea tikai. Ia tatou e manakonako ra i teia i roto i to tatou manako e te ngakau, kare tatou e tuku i tetai apinga kia akaturori ia tatou.

13. Eaa i meitaki ei to tatou turanga ki te aronga oro?

¹³ Ka akakoromaki te aronga oro i Ereni i te manamanata, ka roiroi e ka mamae te kopapa. Ka tauturu to ratou tuatau tereni ia ratou. Aite rai to tatou tu ki te aronga oro, ka tereni tatou akapeea me oro. Inara ka meitaki atu to tatou turanga. No te mea ka oronga mai a Iehova i te maroiroi kia tatou, kia oro e tae ua atu ki te openga. Me irinaki tatou Kiaia, ka tereni aia ia tatou e ka akatinamou ia tatou!—1 Pete. 5:10.

14. Akapeea a 2 Korinetia 12:9, 10 me tauturu ia tatou kia akakoromaki?

¹⁴ Kua tupu te au manamanata tukeke kia Paulo. Kua akakinoia aia e kua pāpāia, i tetai atianga kua parukaua aia e kua akakoromaki i “tetai tara i roto i taku kopapa nei.” (2 Kori. 12:7) Noatu te reira kare aia i tuku i te au, mari ra kua tuku aia i te irinakianga kia Iehova. (E tatau ia 2 Korinetia 12:9, 10.) Tei tupu, kua tauturu a Iehova ia Paulo kia akakoromaki i tona turanga.

15. Me aru tatou ia Paulo, eaa ta tatou ka kite?

¹⁵ Ka akakinoia tatou e ka pāpāia no to tatou akarongo. Ka akakoromaki katoa tatou i to tatou oraanga paruparu. Me aru tatou i te akaraanga o Paulo, ka oronga mai a Iehova i te tauturu kia akakoromaki tatou i to tatou manamanata.

16. Noatu te turanga makimaki, eaa taau ka rave?

¹⁶ Tei runga ainei koe i toou roi e te wheelchair? E turi mamae ainei toou e te mata kinokino? Me koia ïa ka rauka ainei ia koe i te oro kapiti ma te aronga mapu e te aronga matutu? Mea papu roa! E maata te aronga ruaine e te makimaki te oro ra i runga i te mataara ki te ora. Kare ratou e rave i teia angaanga i to ratou uaorai maroiroi. Mari ra, ka irinaki ratou kia Iehova na te akarongo anga i te au uipaanga Kerititiano i runga i te tereponi e te akara i te au uipaanga i runga i te initaneti. Ka tutu aere ratou na te pukapuka anga ki to ratou taote, neti e te kopu tangata.

17. Eaa to Iehova manako no te aronga makimaki?

¹⁷ Auraka e tuku i toou turanga makimaki kia akakeu ia koe kia irinaki kare koe e tau i te oro ki runga i te mataara ki  te ora. Inangaro a Iehova ia koe no toou irinaki iaia e te tavini iaia ma te akakoromaki. Ka anoano maata koe i tana tauturu e kare rava aia e akaruke ia koe. (Sala. 9:10) Mari ra, ka akavaitata mai aia kia koe. Karanga tetai tuaine no tona turanga makimaki: “No te tukeke i toku maki, ka meangiti taku ka rauka i te rave no te tutu aere. Noatu rai, kua kite au e te akarekareka ra au ia Iehova i taku i rave, e kua mataora au i te reira.” Me rokoia koe e te turanga taitaia, e akamaara kare ko koe anake ua te akapera ana. Akamanako ana i te akaraanga o Paulo, e tana au tuatua akamaroiroi: “E mea rekareka iaku te paruparu, . . . kia paruparu oki au ra, te maroiroi ra au i reira.”—2 Kori. 12:10.

18. Eaa tetai turanga taitaia te tupu ra ki tetai ke?

¹⁸ Te kite ra tetai pae i te turanga taitaia ia ratou e oro ra i runga i te mataara ki te ora. To ratou manamanata kare e kiteaia e tetai ke. Te tupu ra kia ratou te maki manako e te mamae ngakau. Eaa ra i tupu ei teia au turanga taitaia ki te au tavini o Iehova? No te mea me ati te rima o tetai tangata me kore kua taui tona oraanga ki te wheelchair, ka kite te tangata i tona manamanata e ka tauturu iaia. Kareka ra, te aronga maki manako e te mamae ngakau kare tetai e kite e te taitaia ra ratou. To ratou turanga taitaia te aite ra ki tetai kua ati tona rima, inara te tuke kare e aiteite te akono anga ia ratou.

19. Eaa ta tatou i kite mai mei te akaraanga o Mephiboseta?

¹⁹ Me e turanga taitaia toou e kare e tangata i kite mai i toou tu, ka akamaroiroi te akaraanga o Mephiboseta ia koe. (2 Samu. 4:4) Kua akakoromaki aia i tona turanga makimaki, kua manako viivii te Ariki ko Davida iaia. Kare a Mephiboseta i apa no te kino tei tupu kiaia. Noatu ra, kua akakore aia i te manako paruparu; e kua mareka aia i tana i rauka. Mareka aia kua aroa mai a Davida iaia. (2 Samu. 9:6-10) Te manako viivii anga a Davida iaia, kua mārama ua a Mephiboseta. Kare aia i akariro i to Davida tarevake kia akariri iaia. Kare aia i akaapa ia Iehova no ta Davida i rave. Kua akamou a Mephiboseta i tona manako ki runga i tana i rave, kia turuturu i to Iehova ariki ikiia. (2 Samu. 16:1-4; 19:24-30) Tata a Iehova i to Mephiboseta akaraanga manea ki roto i Tana Tuatua ei apii ia tatou.—Roma 15:4.

20. Eaa te ka tupu ki tetai no te apiapi, eaa ta ratou i papu?

 ²⁰ No te maata i te apiapi o tetai au taeake e te au tuaine, ka akatupu te reira i te kino kia ratou. Ka ngata ia ratou i te piri atu ki te urupu tangata, inara ka aere ratou ki te uipaanga, te rā akaputuputuanga e te uruoaanga. Ka ngata ia ratou i te tuatua ki tetai ke, inara ka tuatua ratou me rave i te angaanga tutu aere. Me ko tera toou turanga, kare ko koe anake ua te akapera ana. E maata te tangata e manako akapera ana. E akamaara te mareka ra a Iehova i taau e rave ra ma te ngakau katoa. No te mea kare koe i tuku i te au, te akameitaki maira aia e te akamaroiroi maira ia koe. * (Phili. 4:6, 7; 1 Pete. 5:7) Ia koe e tavini ra ia Iehova noatu kua rokoia koe e te makimaki e te mamae ngakau, papu te mareka ra a Iehova ia koe.

21. Ma te tauturu a Iehova, eaa te ka rauka ia tatou?

²¹ Ma te meitaki, e tuke tei rotopu i te oro anga ta Paulo e tuatua ra ki teianei ao. I te tuatau Pipiria, e tai rai tangata ka re. Tuke ki te oro anga o te Kerititiano, ko tei tamou marie e tae ua atu ki te openga ka re ïa. (Ioa. 3:16) Ka anoanoia te aronga oro o teianei ao kia maroiroi, kia rauka ia ratou te re. Kareka ra ia tatou noatu te makimaki, te oro tamou marie nei rai tatou. (2 Kori. 4:16) Ma te tauturu a Iehova, ka rauka ia tatou katoatoa te re!