1. So svako amendar mora te čera?

DA LI bi mangeja te učestvujine ki jekh trka asi koja džaneja so ka ovel but phari, posebno ako hijan nabormo ja umorno? Verovatno na. Ki aver strana, o apostol Pavle o dživdipe ando prava hrišćanja uporedindža jekhe trkaja (Jevr. 12:1). Ako mangaja te dobina i nagrada koja o Jehova dela amendže, sare amen bilo te ova terne ja phure, ja bilo te ovel amen snaga ja na, mora te istrajina dži o krajo (Mat. 24:13).

2. Premalo 2. Timoteju 4:7, 8, sose o Pavle šajindža slobodno te vačeri kotar i trka?

² O Pavle šajindža slobodno te vačeri akalestar, sose ov uspešno „i trka prastandilo dži o krajo.“ (Čitinen 2. Timoteju 4:7, 8.) Ama, soj tani odija trka andi koja o Pavle vačerdža?

3. So predstavini i trka andi koja o Pavle vačerdža?

³ Te bi šaj te sikavi amen disave važna buča, o Pavle podijekh puti sar primer koristindža o igre kola ičerdže pe ki purani Grčka (1. Kor. 9:25-27; 2. Tim. 2:5). But putija, o dživdipe ando jekh hrišćanin ov uporedindža jekhe trkaja (1. Kor. 9:24; Gal. 2:2; Fil. 2:16). Jekh manuš počmini te učestvujini ki odija „trka“ ked predajini pe e Jehovase hem ked krstini pe (1. Petr. 3:21). I trka tani završimi ked o Jehova dela lese i nagrada ando večno dživdipe (Mat. 25:31-34, 46; 2. Tim. 4:8).

4. Sostar ka vačera ko akava članko?

⁴ Kola tane disave sličnostija maškaro prastibe ki jekh dugačko staza hem amaro hrišćansko dživdipe? Isi nekobor buča kola tane slična. Kola tane odola buča? Sar prvo, valjani te ačhova ko pravo drumo. Sar dujto, mora te ova usredsredime  ko cilj. Sar trito, ked ko drumo pojavinena pe razna prepreke, valjani te istrajina.

5. Ko kova drumo mora te ačhova hem sose?

⁵ Ki jekh trka, te šaj te dobinen i nagrada, o trkačija mora te prastan ki staza koja odredindže o organizatorija. Isto adžahar, ako mangaja te dobina o večno dživdipe sar nagrada, amen mora te živina sar hrišćanja (Dela 20:24; 1. Petr. 2:21). Ama, o Beng hem okola kola oponašinena le mangena te cida amen kotar pravo drumo hem te prasta olencar (1. Petr. 4:4). Olendže na sviđini pe o način sar amen živinaja hem odolese marena amendže muj. On phenena so olengo drumo tano pošukar sose ljegari dži i sloboda. Ama, amen džanaja so on u stvari hovavena kokri pes (2. Petr. 2:19).

6. So sikljoveja kotar o Brajan?

⁶ Sare kola živinena sar o manuša upro kaste utičini akale svetoso duho, sigate haljona so o drumo kova birindže na ljegari len ki sloboda. Umesto odova, o Beng hem olenge želje ovena olengo gospodari (Rimlj. 6:16). Amaro phral, o Brajan, odova haljilo. Olese roditeljija sikavdže le te živini sar e Jehovaso svedoko. Ama, sar tinejdžer, ov počmindža te sumnjini da li čače ka ovel bahtalo ako džala akale drumoja. Ko krajo, ov odlučindža te živini sar o manuša ko sveto. Ov phenela: „Odobor mangljum te ovav slobodno manuš, ama, u stvari uljum robo bute bučendže. Počmindžum te koristinav i droga, but piljum hem nemoralno živindžum. Palo nekobor berša, počmindžum te koristinav pana pozorale droge hem hijum le olengo robo... Te šaj te živinav adžahar sar so mangljum, počmindžum te biknav i droga.“ Ko krajo, o Brajan odlučindža te živini premalo e Jehovase merilija. Odolese, o Brajan menindža po način sar živindža hem krstindža pe 2001. berš. Akana, ov tano bahtalo sose tano ko pravo drumo. *

7. Premalo Matej 7:13, 14, kola duj drumija tane anglo amende?

⁷ But tano važno te birina o pravo drumo hem te ačhova ko odova drumo. O Beng bi najviše mangela ked više na bi prastaja ko tesno drumo kova vodini ko dživdipe. Ov bi ovela but bahtalo ked bi džaja buvle drumoja koleja but manuša džana. Ko odova drumo tano polokho te džal pe hem but manuša mangena te džan oleja. Ama, ov „ljegari ko uništenje.“ (Čitinen Matej 7:13, 14.) Ako na mangaja te ova prevarime ando manuša kola na šunena e Jehova hem ako mangaja te ačhova ko šukar drumo, mora te verujina e Jehovase hem te šuna le.

8. So čerela jekh trkači ako spotaknini pe?

⁸ Sa o učesnikija ki trka džanena kobor tano važno te dikhen anglo peste te na bi spotakninena pe. Ama, šaj te desini pe slučajno te peravi len okova kova prastala uzalo lende ja ko drumo šaj te ovel rupa sebepi koja šaj te peren. Čak hem jekh trkači te perel, ov uštela hem nastavini te prastal. Ov nane usredsredimo ko odova so spotaknindža le, već ko cilj hem ki nagrada koja ka dobini.

9. So valjani te čera ako peraja?

⁹ Ki amari trka but putija šaj te spotaknina amen adžahar so grešinaja ko lafija ja ko postupkija. Isto adžahar, okola so prastana amencar šaj te povredinen amen. Ked odova desini pe na valjani te ova iznenadime. Sare amen hijam nesavršena hem sare prastaja jekhe tesno drumoja kova ljegari amen ko večno dživdipe. Odolese šaj te desini pe podijekh puti te „khuva“ jekh jekhe. O Pavle phendža so disavo puti šaj te uvredina jekh jekhe (Kol. 3:13). Ama, umesto te ova usredsredime ko odova so spotaknindža amen, pošukar tano te usredsredina amen ki nagrada. Odolese, ako peraja, valjani te ušta hem te nastavina te prasta. Ako holjanaja hem na mangaja te irina amen ki trka, tegani na ka nakha o cilj hem na ka dobina i nagrada. Uzo odova, sebepi amaro, averendže ka ovel pharo te prastan ko tesno drumo kova ljegari ko dživdipe.

10. So na valjani te čera ako na mangaja te spotaknina averen?

¹⁰ Pana jekh način sar šaj te spotaknina amare phraljen hem phenjen kasa prastaja ki e dživdipasi trka, tano ked insistirinaja te čeren pe o buča ko amaro način (Rimlj. 14:13, 19-21; 1. Kor. 8:9, 13). Odova tani jekh bitno razlika maškaro amende hem o trkačija kola prastana ki doslovno trka. On takmičinena pe averencar hem svako olendar isi le cilj te osvojini i nagrada. On jedino razmislinena ando odova so ka pomožini len te pobedinen ki trka. Odolese, on čak khuvena averen kola prastana olencar te šaj on te oven prva. Ki aver strana, amen na takmičinaja amen jekh jekheja (Gal. 5:26; 6:4). Amaro cilj tano te pomožina so pobuter manušendže te nakhen o cilj zajedno amencar hem sar nagrada te dobinen  večno dživdipe. Odolese trudinaja amen te primenina o savet kova o Pavle dindža: „Ma dikhen samo tumendže te ovel šukar, nego isto adžahar hem averendže te ovel“ (Fil. 2:4).

11. Ko so tano usredsredimo jekh trkači hem sose?

¹¹ Uzo odova so dikhena anglo peste, sa o trkačija ki trka tane usredsredime hem ko cilj. Iako našti te dikhen le pe jačhencar, on šaj te zamislinen sar nakhena o cilj hem sar dobinena i nagrada. Ked razmislinena kotar i nagrada, odova podstaknini len te istrajinen.

12. Koja nagrada obećindža amendže o Jehova?

¹² Ki trka koja amen prastaja, o Jehova obećini amendže so ako resaja dži o cilj ka dobina i nagrada, bilo odova te ovel o večno dživdipe ko raj ki phuv ja o besmrtno dživdipe ko nebo. Ko e Devleso Lafi vačeri pe andi akija nagrada te bi šaj te ovel amendže polokho te zamislina savo dživdipe adžičeri amen. Ako trudinaja amen amari nada te ovel dživdi ki amari godi hem ko amaro vilo, tegani na ka mukha nikase hem nisose te spotaknini amen odobor so našti te ušta.

13. So amen isi amen, a so o trkačija ki Grčka na hine len?

¹³ O trkačija kola učestvujindže ko igre ki Grčka morandilje te borinen pe razno problemencar sar soj tane o umor hem i dukh. Ama, on šajindže te osloninen pe samo ko po trening hem ki pi snaga. Sar on, hem amen dobinaja i obuka sar te prasta ki amari trka. Uzo odova, amen isi amen diso so on na hine len. Amen šaj te oslonina amen ki e Jehovasi neograničeno snaga. Ako osloninaja amen upro leste, ov obećini amendže so na samo so ka sikavi amen, već hem ka zorjačeri amen (1. Petr. 5:10).

14. Sar o lafija kotar 2. Korinćanima 12:9, 10, pomožinena amendže te borina amen e problemencar?

¹⁴ O apostol Pavle morandilo te borini pe bute problemencar. But putija, o manuša uvredindže le hem progonindže le. Uzo odova, hine le „karo ano telo“ hem podijekh puti na hine le snaga te borini pe (2. Kor. 12:7). Ama, ko odola problemija ov na dikhlja sar razlog te odustajini, već upro lende dikhlja sar prilika te oslonini pe upro Jehova. (Čitinen 2. Korinćanima 12:9, 10.) Odolese so o Pavle hine le asavko stav, o Jehova pomožindža lese ko sa olese problemija.

15. So ka osetina ako oponašinaja e Pavle?

¹⁵ Šaj hem amen doživindžam neko te uvredini amen ja te progonini amen sebepi amari vera. Ja šaj isi amen problemija amare sastipaja hem osetinaja amen umorno. Ako oponašinaja e Pavle, svako problemi kova doživinaja šaj te ovel prilika te osetina e Jehovasi podrška.

16. So šaj te čere čak iako nane tu šukar sastipe?

¹⁶ Da li sebepi o nabormipe hijan ko kreveti ja ko invalidska kolica? Da li te pre hem te jačha izdajinena tut? Ako osetineja tut adžahar, šaj pučeja tut da li šaj te prasta zajedno okolencar kola tane terne hem saste. Ov sigurno so šaj! But okola kola tane phure hem bizi snaga prastana ko akava drumo kova ljegari ko dživdipe. On našti odova te čeren pe snagaja. Ama, on osloninena pe ki e Jehovasi snaga adžahar so šunena amare sastankija prekalo telefoni ja dikhena len prekalo strim. Uzo odova, on učestvujinena ki služba propovedanja adžahar so svedočinena e doktorendže, e medicinsko sestrendže hem pe familijendže.

17. Sar o Jehova dikhela ko okola kola isi len problemija e sastipaja?

¹⁷ Ako našti te čere sa so mangeja ki ti služba e Jehovase, ma obeshrabrin tut hem ma mislin so našti te prasta i trka dži o  krajo. O Jehova mangela tut sebepi so isi tut vera upro leste hem ov na bistrela sa so beršencar čerdžan olese. Pobuter nego iked angleder, tuče valjani lesi pomoć. Odolese, ov sigurno so ov niked na ka mukhel tut (Ps. 9:10). Umesto odova, ov ka ovel pana popaše tuvaja. Jekh amari phen isi la disave problemija e sastipaja. Dikh so oj phenela: „Odolese so isi man sa pobuter hem pobuter problemija e sastipaja, nane man but prilike te vačerav averendže ando Devel. Ama, bahtali hijum so džanava so e Jehova radujini čak hem odova hari so dava lese.“ Ked hijan obeshrabrimo, ma te bistre so na hijan kokri. Tegani, razmislin ando Pavle hem setin tut ko olese lafija kola ohrabrinena amen: „Uživinava ked hijum slabo... sose ked hijum slabo, tegani hijum zoralo“ (2. Kor. 12:10).

18. Kova posebno problemeja disave e Devlese sluge borinena pe?

¹⁸ Disave kola prastana ki e dživdipasi trka isi len avera pharipa. On isi len problemija kola avera našti te dikhen hem našti te haljon. Disave olendar isi len depresija ja već dugo vreme tane but uznemirime. Sose baš akale e Devlese mangle slugendže tano posebno pharo? Odolese so ked jekh manuš phagela po vas ja tano ko invalidska kolica, odova svako dikhela hem svako mangela te pomožini. Ki aver strana, ked neko isi le depresija ja disavo mentalno poremećaj upro leste na dičhola kobor patini. Ama, sar so patini neko ko povredindža po vas ja pi čang, adžahar hem olengi patnja tani stvarno. Odolese so olengi dukh na dičhola, but putija o manuša na mothovena lendže kobor mangena len hem kobor brininena pe olendar.

19. So šaj te sikljova kotar o Mefivostej?

¹⁹ Ako našti te čere sa so šajindžan angleder hem ako dičhola tuče so niko na haljola tut, but šaj te ohrabrini tut e Mefivostejeso primer (2. Sam. 4:4). Ov hine hromo. Isto adžahar, o kralj David hine le lošno mišljenje olestar hem postupindža nepravedno premalo leste. Sa akava na ulo lese sebepi so ov čerdža diso lošno. Ama, ov na dozvolindža te ovel negativno. Ov hine zahvalno aso sa o šukar buča kola desindže pe ko oleso dživdipe. Na bisterdža o šukaripe kova o David mothovdža lese angleder (2. Sam. 9:6-10). Ked o David nepravedno postupindža premalo leste, o Mefivostej na usredsredindža pe samo ko odova. Ov na dozvolindža sebepi e Davidesi greška te ovel jekh nezadovoljno hem holjamo manuš. Ov na mislindža so o Jehova tano krivo aso odova so o David čerdža. O Mefivostej usredsredindža pe ko odova so ov šaj te čerel te bi mothovi so podržini e kralje kole o Jehova birindža (2. Sam. 16:1-4; 19:24-30). O Jehova dindža ko oleso  Lafi te ovel pisimo e Mefivostejeso šukar primer, te bi šaj amen te sikljova olestar (Rimlj. 15:4).

20. Sar i uznemirenost šaj te utičini ko disave phralja hem phenja hem ko so on šaj te oven uverime?

²⁰ Odolese so but vreme osetinena i uznemirenost, disave phralja hem phenja patinena kotar o panična napadija. Odolese, olendže tano but pharo ked tane ko društvo avere manušencar. Ama, iako olendže tano pharo te oven odothe kaj isi but manuša, on ipak džana ko sastankija hem ko kongresija. Olendže tano posebno pharo te vačeren e manušencar kolen na pendžarena, ama on ipak propovedinena. Ako hem tu osetineja tut adžahar, ov sigurno so na hijan kokri sose hem avera manuša osetinena pe sar tu. But manuša borinena pe isto problemeja. Niked ma te bistre so o Jehova tano zadovoljno odoleja so čereja olese celone dušaja. Odova so na odustajindžan mothovi so isi tut oleso blagoslov hem so ov dela tuče i potrebno snaga * (Fil. 4:6, 7; 1. Petr. 5:7). Ako služineja e Jehovase, iako sebepi to sastipe ja sebepi te emocije našti te čere sa so mangeja, ov sigurno so o Jehova tano zadovoljno tuvaja.

21. So sare amen ka čera uzi e Jehovasi pomoć?

²¹ Šukar tano so isi disave razlike maškaro jekh doslovno trka hem i trka andi koja o Pavle vačerdža. Ko purano vreme, ki trka, samo jekh manuš šajindža te osvojini i nagrada. Ama, ki amari trka, svako ko istrajini hem svako ko verno služini e Jehovase, šaj te dobini o večno dživdipe sar nagrada (Jov. 3:16). Ki jekh doslovno trka, sa o trkačija valjani te ovel len šukar sastipe te šaj te pobedinen. Ki aver strana, but amendar isi amen problemija e sastipaja, ama amen ipak istrajinaja (2. Kor. 4:16). Uzi e Jehovasi pomoć, sare amen sigurno ka resa dži o cilj!